Ka Vawk Pu Chapter 31

Episode kal lai dah luhna

Moderator: writers

Euricka
Posts: 183
Joined: July 23rd, 2022, 12:23 am

Ka Vawk Pu Chapter 31

Unread post by Euricka » October 1st, 2022, 9:41 pm

Ka Vawk Pu



Chapter 31:





Hmangaihtu nu leh pa kan la nei hi kan vannei takzet.An fa ten thil lian tham tak kan tihsual pawhin,anni chuan hmangaihna nen min ngaidamin min lo kuangkuah leh ṭhin a.Mahni inngaidam thei lo khawpa inchhirna khuarkhurum thuk bera kan tlak lai pawhin,an hmangaihna kutin min lo dawm kang leh ṭhin.





In buatsaihna em em pawh awm lovin vawk pu te inah chuan ka lawi ve dâwn ta.Fakzuala'n a dawra motor nalh leh changkang ber ber chu a naute rawn khalh chhuah tîr in,ka thuam chhawm pawh a rawn buaipui leh vek a.





Ka nu lah chuan,"ka fanu man min pe rawh, engahnge ilo dâwn ve rikngawt"a ti deuh chhen reng bawk a.Fakzuala lahin pe duh bik mai lovin,"a pa ka ni tawh"ati deuh tlat mai bawk si a.Ka hriat loh in pa zawn ka lo nei renga,hêng non-mihring ho hi ka hriat miah lovin engtinnge ro an lo rêl tih hi ka hrechak ngawih ngawih.An rorelna hmunah chuan ka awm ve chak,thu veivir tu ber pawh Fakzuala bâk anih ka ring lo.








Khaw ên laiin Saizami an thlah liama,thim hnuah kei ka lut veleh thung a.Vawk pu pa,(ka pa ti tawh mai ila)chuan man in hlan nawn leha,Biakin hawng ngeia in neih ṭhat leh te a rawt thar leha.Mahse vawk pu in,"tuak thar ten an tih tur ang kan ti fel vek tawh"zak duh miah lova atih takah chuan Fakzuala'n a Kalvari power alo hmang tel ve zeuh bawk nen.Non-mihring dâna kan inneihna chu min pawm pui ta ringawta.Mak ka tih leh deuh chu, kohhranah pawh an lo report ve thlap ani awm e.Engmah min hrilh chiang duh lo ná in,chawp leh chilha tih chung chung chu anih hmel loh.







Ka in thar tur kawtah chuan lawi mai in ringin kan ding ve ta rên râwn a.Lawichal atân pawh a tlachawpin Hmingsanga ka Patea nita chu kan pawt ta ngawt a.A hnial ve deuh na in Fakzuala'n a pawt lui tlat a.Amah hi mi kam tam chi ani vak silova,a hreh ru ve viau ang.




"Awle a hmasa in kan fanu hi in fa tak anga min pawm sak turin kan ngên hmasa cheu a"tiin bul a ṭan hmasa phawt a.Rawn hawi lêt leh in,Fakzuala chu zawhna mitmeng hian a melh leh rih a."Ka duat, Kalvari lam hawiin red zone hmet pawp rawh"Fakzuala lah chuan alo ti sam êt a.




Muangchangin,vawk pu nu leh pa te lam chu hawi leh in,"kan fanu hi in fa lâk angin in en angem?"tiin a zawt ta thawr mai.





Vawk pu nu leh pate chu an lo nui a,Vawk pu mit erawh keimahah a fu leh ngar ngar tawh.



"Kan fanu tak tak kan hnênah a rawn haw dawna.Fa lâk ang chuan kan en thei lovang"Vawk pu pa chuan nui sang in alo ti nghal a.





Hmingsanga chuan alu bu leh nghutin,"anih chuan kan makpa tur hi vawk vulhtu hlawhtling ani tih kan hre ṭheuh anga.Kan fanu hi a lawi lût dâwn anih chuan a vawk te a enkawl dan aṭangin,kan fanu nen an inkara hmangaihna hi sawifiah turin ka phut e"ati leh ta daih mai.Zawhna harsa tak ava ni em,engtinnge Vawk pu hian a chhan dâwn tih chu ka hre chak zek zek.





Vawk pu chu a hawi kual rulh rulh a.A nu leh pa te melh leh in,"tih ngei ngei angai em ni?"a pa melh run chung chuan a ti leh a.A hreh ve ngang aniang,Hmingsanga pawh zawhna har lutuk zawh reng reng.A pa chuan a tih ngei ngei angaih thu lo sawiin,vawk pu chu a ner nghal nung mai.





Kan nghah reng takah chuan,rawn hawi chhuak leh in,a aw a thian leh hmasa phawt a.




"Vawk chaw ka chhum dawnin,an ei tur chu a thianghlim nge thianghlim lo ka en hmasa phawt ṭhin.A thianghlim chin chu la in,ka sil fai leh thlap a.A hmin tawk chiaha chhumin,ka pêk tur chin chu bucketah ka chhûng leh ṭhin.A sa an tih lutuk hlauin ka pêk dâwnah ka chhêm daih sak leh vek a.Chumi hnuah chuan pawn lam aṭanga thli lo lût in a tih bawlhhlawh loh nan an chaw ei chhûng zawng ka vêng ṭhin.




Zûn hing leh ek rim chhiain a tih buai theih loh na turin nitin an in ka silfai sakin an ek te pawh ka paih fai sak vek ṭhin.Kar khatah vawikhat ka bual ṭhin a,damloh hritlan an neih in weed ka pe mai zel bawk.An period laiin nikhatah vawihnih ka silfai ṭhin bawk a.Hrik an neih loh nân an hmul neih ang chhun chhun ka khuih fai sak ṭhin.





Hmangaih leh duat takin ka enkawla,an ni pawhin min hmangaihin ka lakah an pangchang em em bawk.




Chutiang chiah chuan ka Chawngmawii pawh hian harsatna ruâm a ka awm laiin ka vawk te ka duata ka hmangaih ang chiahin min hmangaihin,vawk rim nama ka awm pawhin min pawm ṭhin.





Ka mawi loh hlauin a theihtâwpin min zilh ṭhina.Na taka ka siam pawhin min tina tu an awm hlauin min ṭawngṭaisak reng ṭhin.




Ka vawk te ka hmangaih aia nasaa min hmangaih tu hian duat a phu ve tawhin ka hria."




Tiin a ṭawngkam thiam loh ang ang chuan a sawifiah ve nasa.Hmeichhe awm nêm tih takah thu holam tak sawi mahse ka thinlungah chuan thuril tak niin,ka chhungril zawng zawng a fan chhuak leh vek tawh.











"Rose,a luh theih tawh ania"Dinpuia'n ka bula dingin a rawn tih chuan ka ngaihtuahna lak ata harhchhuak in,ka bianga mittui lo luang leh ringawt chu ka hru hul zauh a.Vawk pu chuan a kut rawn dawh in,ka lo vuan nghal a.Ka in thar leh ka chhungkaw thar te bulah chuan ka lawi lût ve ta.








Ka pa chuan hun hmang leh in,"Hriatpuii pawh kan fanu i ni tawha.Mo anga inngai lovin i nu leh pa te tak tak angin min en la ka duh a.Harsatna i neih pawhin inthlahrung miah lovin ka nu ka pa tiin i mangan hunah pawh i koh hmasak ber te kan nih ka duh bawk ani.Tin,in nupa inkârah pawh Pathian chauh awm sela.In buai chang pawha in tluk luhna lo ni sela.Inremlohna tam tak in neih pawhin khumpuiah sawi dun ṭhin rawh u."ti a min fuih in,Bible chang a chhiar leha.Ṭawngṭaina nen hun serh chu a khar ta a.








Saizami te inneih lawmpui tura thingtlâng lama an chhungte rawn kal ho pawh chuan lawmpuina thu min hlan ve bawk a.Keima lam aṭang chuan ka nu a ding dâwn emaw tih laiin Dinpuia'n din a chuh tlat a.




"Pathian in malsâwmna min pe in,nu pahnih min pe bik a.Ka u hi ka nu ang chiaha min hmangaihtu.Tun thleng pawha a pang lum dek lova mu thiam lo ka nia.Pasal min neih san tak si ah chuan,a tellova mut ka zir angai dâwn a.Rose,i phal chuan I roomah ka la mu rih dawn ania"tiin min rawn nuih var var a.


"Pasal i nei tawha,i nunah Pathian tih lovah i pasal dah pawimawh ber la,tichuan nangchu chawimawiin i awm ang.In pui nghak tu tur i ni a,i mawhphurhna hlen in,i nu leh pa te pawh duat takin enkawl ang che.Chuan Rose,he thu hi ka hrilh ngai lo che,ka hmangaih lutuk che ani tih hi hre reng la.I nau hian kala rawn chawimawi zêl ang che"a tih chuan ka mittui a lo tla leh hman tawh a.Ani pawh ṭah chhuak in sum chungin min rawn kuah a."Hlim reng ang che, Rose"tiin ka nau pawhin min thlah liam ve ta.









Ka nau a ṭhutna tur a pan leh lai chuan Fakzuala rawn din chhuah leh a tum chiah chu vawk pu in lo hmu hman in,"Mmm tikhan programme a zo, zaithiam koh tur kan nei lova.Thusawi tu te pawh in dang a ro palh ange,zan a rei tawh bawk nen hahdam takin awm tawh ang u"tiin a rawn din khalh hmiah.Fakzuala chu lungawi hmel vak lo hian a nui ro hawk a.A dinhmun lai lutuk chuan kut a beng ta ringawt.Midang pawh chuan an beng ve ta ringawta.Kalvari chungchang kan ngaithla hman ta lo ani.






Min thlah tu te ho chu kawt thleng kan thlah hlawm a.Ka nu chuan in enkawl ṭha turin min chah nasa mai.A fanu hi a tellovin rawng kala bâwl thei lo tih a hre ve renga.Min ngaihtuah ve viau ang.






Ka bungrua te chu a thawh hnih nân kan room tur tak tak tawhah chuan kan rem ṭha leh ta a.Kan zawh meuh chuan zanlai a pêl lek lek tawh.Buai rûkna ka neih chu room chhûngah bathroom a awm velo.Mikhual an awm nual bawk nen in bual tura chhuah chu ka zak ta tlat a.






Mikhual ho mut reh hun kan nghah hnuah kan nupa chuan kan va inbual ta a.Inbualnaah pawh thawm ka nei ngam lo,vawk pu lah chu tuia in leih pah in, lungkham nei lêk lovin a faifuk rût rût lehnghala.






Kan inbual zo a,vawk pu hnungah chuan dim tê in ka pen phei ve zel a.Room kan thlen dâwnah vawk pu chu ding thutin,a hnungah ka la in tauh zui."Chawngmawi,ngatinge sazu ang maia kan awm.Kan in anih hi"rawn in her in a ti lung lung mai.Saizami room lama mu te ho an harh hlauin,Vawk pu chu hmanhmawh takin room ah chuan ka kai lût dawr dawr mai.





A sam ka tih ro sak hnuah ka sam min chhêm ro sak veleh a.Duat takin min khuih pial sak leh vek hnuah khumah min pawm phei leh a.Ka kawr hak hlim chhoh a tum chu lo dangin,"zing thawh hma ka ngai ania"ka tih chuan a khi suk a.Ṭha tak chuan puan min sin ṭhat tîr lehin light a off zui nghal a.







Ka bula a rawn mut rual chuan,"honey moon part 2"tiin a rawn che leh hrâm.*****








Ka chau lutuk chu min biakna pawh hre mumal tawh lovin,a awm ah beiin thlamuang takin ka chhin san ta daih a.












"Siakmawi,Rotawta thu awi rawh"fiah taka rawn ti tu aw ka hriat chuan chiang lo tak hian ka harh rêi ruâi a."Siaki"rawn ti leh tu chu vawk pu aw ngei ani.Ka harh nghal kâwk a.Ka awmah beiin tui takin alo la muhil.






A mumangah a vawk ho a hmu leh anih hi tiin ka nuih sak a."Siaki"ring taka tiin a rawn phu dawrh lehnghala.A lu ah chuan sawiin,zawi tê in ka ko leh a.Meng lo chuan ka lu a rawn dap dun dun a.Ka hnar leh ka hmui a rawn dap fuh hnuah rawn meng in,ka lo en ve reng chu hrilh hai zet hian a tho nghal a.Angaihna hriat loh hmel tak hian a hawi kual hû hû a.





Ka awm a nghenna sil urh chu dawm chungin ka ṭhu chhuak ve nghal a."Good morning ka Hrangchhuan"nui sanga ka tih chuan,"Good morning"ngaihtuah vak lo chungin ati liam puat mai.





"Hrangchhuan,i ṭha em?"ti a a kut ka deh chuan a rawn phu zuk lehnghala.A awmdanin min ti hrilhhai lutuk chu thawh lawk nachang hre lovin ka en reng a.






"Inah kan awm tak tak tawh tiraw"chian loh hmel tak hian ati leh a.Amah en reng chung chuan ka lu ka lo bu nghat a.





Chutah chiang taka min en in,min nuih leh var var a."Ka mumang anilo"tiin min rawn kuah nghal.Niminah resort-ah kan awm sia,an ina a harh thut chu mumang emaw ati ani ngei ang.







"Tho tawh ang,mo thar an tho tlai ngai lo ania"a awma bei chung chuan ka ti a."Chawngmawi,mo ini hleinem,fanu alawm inih.In ina i awmdan ang chiahin awm rawh"min ti ve bawk tak naa,fanu rilru put nghal har zia hi a hrethiam lo mai mai ani.







Pawn lama che ri rak rak ka hriat phei chuan min ti phawklek vek tawh a."Tho tawh ang, midang pawh an tho tawh ania"tiin tal sawn ka tum leh a."Engtiklai pawhin ka bulah i awm reng ang ka tih kha"tiin min pawm nghet leh sauh mai."Rotawta te ril a ṭam tawh ang"ka ti ta ringawta,a thawk chiang hle mai.A tho nghal thurh a,a kawr ha ṭha sawk sawk in,"lokal rawh"tiin min kaih a tum nghal.






"Kawr pangngai ka'n ha ve phawt ange"tiin ka inthlak nghal a.Ka hmai chei leh ka tum chu,"tikhan i hmelṭha zawk"tiin min kai chhuak daih.






"In mutui maw"a tho tawh ho chuan min lo ti sap sap a.Chhân pawh ka chhân hma chuan,"mutui"ti a min chhân khalhin pawnah chuan min kai chhuak nghal dawr dawr mai.





"Rinzam,rawngbawl ka ngai alawm.Leng hman ka nilo"a kut thin thlâk tum chuan ka ṭang ve ngar ngar a.





Inhnuaiah chuan min kai thla zel a.Reilo te ah ar in lian taka sak kan thleng der mai.Ar lah chu an tam em em lehnghala,min hmuh rual chuan che miah lovin min lo en ṭhap a."Zikpui,in lo dam ṭha maw,hei in pi tur ka rawn hruaia.A thlalak ka hmuh tir tawh cheu kha"tiin arpa rawng mawi zet min lo en reng tu chu a bia a."Chawngmawi, chibai ve rawh"tiin min pawt hnai a.






Uluk taka min lo en ṭhap hrim hrim pawh ṭih ruk tawh naklaia,chibai tura min ti phei chu ka ṭap lo chauh tawh.





Ar ho in min en reng bawk si,vawk pu lah chuan ka chibai hun a nghah tak tlat avang chuan,ka aw ka thian ta kharh a.Ar ho chu an phu miah lo nia mawle.





"In lo dam maw,Hriatpuii ka nia"ka tih chuan ka hmaa arpa min en reng tu chu a thla zâpin a khuang nghal al al a.Chu veleh arpui ho rawn dawkdawlakin,a ṭhen an chiapa,a ṭhen an khuang nghal chuah chuah bawk a.Min lo lawm ve ah ka ngai hmiah mai.






Vawk pu in kut ring taka a ben hnuah an reh leh ṭhap a.An dinna ngaiah dingin min en leh ṭhap mai.Vawk pu chuan an chaw tur la in,ar in kawngka chu hawngin an chaw bawmah a dah leh vek a."Chawngmawi,tui kha lo la rawh le"ar in chhûng aṭang chuan rawn tiin,tuizem in hunga tui awm chu bucketah thal chhuakin ka pe ta a.A rawn chhuah leh hnuah pawh an dinna ngaiah la ding rengin,vawk pu in,"chaw ei tui"a tih veleh an ei nghal a.Mak ka ti lutuk chu vawk pu ka en nghal hâw a,"vawk pu generation"tiin alo nui suk mai.







Ka kuta min kai leh in,step-ah chuan min chhuk pui leh a.Hmun zawl laiah chuan vawk in lian pui pui alo ding ruah hlawm mai.A hmun hma lah chu mihring chêt tlatna ang maiin a fai em em vek a.






Vawk ho erawh chu min hmuh veleh an lo nguk nghal a.Vawk chaw chhum naah min hruai lût in,mei a chhêm leh phawt a.A alh ṭhat hnuah a vawk te chu en dik leh vek in,a be mawlh mawlh hlawm a.







Chumi hnuah chuan rawn lêt leh in,"Rotawta ril a ṭam vak lo anih chu.A in diet leh dawn aniang"tiin bucket ah chuan buhfai a chhûng nghal a.Uluk taka sil fai leh in,Belah tui chhungin,buhfai chu a thlâk ta a.Zikhlum kau eng lai paih in ,a ṭha ho chu chan sâwm leh in a sil fai leh vek a.A buh chhum a hmin hnu chuan Zikhlum chu a thlâk leh a.Chi tlêm tê phûl leh in,chawk pahin a fai fuk leh hlarh hlarh a.






A sawi ang tak tak in,a vawk chaw chhum pawh a uluk hle mai."Chawngmawi,mei kha lo chhawm ṭha zêl rawh aw.Hlutei te saw bawnghnute an duh leh duh loh ka'n zâwt leh lawk"tiin vawk in lam pan chuan a chhuak leh daih a.






Vawk note ho dahkhawmnaah chuan kal in,a be leh bawrh bawrh mai.A ran vulh ho fing lutuk chu mak tih tham a tling tlat.He vawk pu hian a vawk te hi a châwm satliah lo,uluk leh hmangai takin a enkawl ani.







Mei chu ka thiam ang tawkin ka chhêm alh a.A rawn lêt leh hnu chuan a bêl chhuan lai chu rawn chawk leh in,"Hlutei saw,bawnghnute ngaina mi ania.Dengzika saw chu a tawhkhirh ve a,nghapih bawk a thlang leh tawh"tiin bêl chu a suan thlaa.Bel dang chu tleuh fai leh in,bawnghnute a chhuang zui a.Be lem lovin,a awmdan ang ang chuan hmuhnawm ti takin ka lo thlir reng a.






Bucketah chuan bêla a chaw chhum chu suak chhuak leh in,nghapih chu a pawlh leh a.Fian pui chuan chawk leh hlarh hlarh in,vawk in lamah chuan a khai phei leh a.A bawnghnute chhhuan a rawn so takah chuan mahni in beng var ve in,ka lo siam sak ta ngawt a.






Vawk chaw a pêk zawh meuh chuan hun a kal veleh duai mai."Zams,ka hman lawk thei lova"Zara aw ka hriat rual chuan vawk chaw chhum na aṭang ka chhuak ve nghal a.






Vawk pu chuan Zara chu kuah in,"ka ngai tawh lutuk che"tiin a hnungah chuan a beng thauh thauh a.Zara pawh chuan,a ngaih thu sawi ve in,an pahniha an in biak dan chuan min ti nui ve var var mai.





Zara chuan min rawn hmu thut a,Vawk pu chu thlah nghal in,a tshirt hak te chu a siam ṭha sawk sawk a.






"Hriatpui,i pui nghal animaw,iva fel ve"tiin pangngai deuh chuan min bia a.Nichina Vawk pu bula a awmdan nen chuan in ang leh tawh lo tak ani.







"Mmm pui ti ila,ka lo en pui mai mai.In inneih ka lawmpui lutuk che"tiin ka lo nuih ve var var a.Saizami rilru hneha pumkhata an in siam thei hi ka lawmpui takzet.






"Ka lawm e,nangni pawh ka lawmpui lutuk che u.Tunah chuan seeker family pawh ka mangṭha thei tawh ang"vawk pu melh rulh chung chuan tiin ala nui vur vur zuia.Vawk pu lah chuan melh hlum alo tum leh tawh.






"Mangneii han buaipui rawh,Zikpuia chi pawh ka bawksik tawh dâwn lo che"ti hlukin,min rawn kai nghal a.Zara lo khi ṭhaw chu nek sawkin min chhoh pui hlawk hlawk mai.A van naupang chhia thei tak.






Inchhung luh dâwn chuan,ding khawmuang rih in,thawk ka la leh vang vang a."Chawngmawi,mahni inah tunge zak ngai"dawhthei lo taka tiin min kai lût leh hmiah.




Chokaah ka tlang nghal a,"U Hriatpui,U Rinzama chuan a vawk te nen a in hmelhriat tîr che em?"Nula pakhat chuan dawhkan hru fai pahin alo ti nghal a.Nuih sak in,"an fel hlawm khawp mai"ka ti ve tawp.Mi biangbiak hi ka thiam hlawl lo.





"Seeker family in tlawh nghal em ni"tlangval pakhat chuan rawn ti ve in,chawhmeh siam sa ho chu a rawn tem kuala.Ka lu lo bu in,purun sen leh tomato dawhkâna in chhawp sa chu siam tur anih ringin ka ban ve tawp a.





"Hruaizel,innu hi tunge a hming khah,ka hre thei lo reng reng"patling pakhatin a rawn ti ve bawk a.Ka bula tlangval chu lo nui sukin,"Bella,ka nupui la ni mai tur"tiin nula lo che ve chu a kuah nghal a,pakhat lah chu alo lai chhe em em lehnghal.Ka en chian takah chuan,a bialnu chu hnam dang daih te pawh a ang.Zara mitmeng ang maiin a paw ve râm mai.







"Hraii,chaw kan ei tawh mai dâwn em ni?I Patea te hi chaw eikhama chhuah nghal an ngai dawn sia.Hruaizel, tlaiah ei leh nghal law law ru aw"Ka nu chuan a rawn ti lang lang a.





"Kan ei hman pawh ka ring tawh lo,nidangah kan rawn ei leh zawk dâwn ania"Hruaizela chuan lo ti ve nghal in,ka purun zai lai chu Bella chuan min rawn zai pui ve bawk a.






Chaw ei kan siam chhunzawm nghal a,mikhual an tam bawk nen,dawhkanah chuan chaw leh chawhmeh mahni a in suah mai theihin kan hung a."U Hriatpui,thleng lak belh angai dâwn"tleirawl pakhat chuan rawn tiin,chhuar sang ami chu ka ban nghal bawk a.Ka tleuh leh thuak thuak a, dawhkâna dah tuma ka in her chiah chu ka kut a chawl leh tawh.Chhuatah chuan ka thlauh thla chuaia,a ri ring bawk nen an rawn hawi ṭhap hlawm mai.







"Mo thar chet chhiat hun alawm"ka Patea chuan lo tiin midang ho lah chuan min lo chhaih liam liam hlawm lehnghala. Rang lutukin ka chhar nghal a,Bellai'n min rawn pui vat bawk.






Vânneih thlâk takin thleng chu a keh lo hlauha.Sil ṭha leh in,fimkhur takin dawhkânah chuan ka dah nghal a.Ina kan chhoh leh hnuah vawk pu ka hmu leh tawh miah lo lehnghala.Chaw ei kan hman tih a hrelo emawni.





Roomah a awm anih ringin ko turin ka kal nghal a.Kawngka ka hawn rual chuan,lo phu zuk in,a phone a dah ṭha nghal a.Ngaih ṭhat lohna em em pawh nei lovin chaw ei kan hman thu ka hrilh chuan,a rawn chhuak ve nghal mai bawk a.Chaw kan ei lai chuan ka phone ka dil leh a.Car a a dah thu a min chhangin,min kham san daih.Avan mawl thei tak,ka zah te a ring ve lo em ni.Chaw ei a tui loh pawhin ka kham hun te nghah ve awm ania.






Thleng kan tih fel lai chuan,bathroom ah lut in a rawn chhuak leh ṭhin a.Thil zawn nei ang maiin fridge chungte chu a dap leh ruk ruk ṭhin bawk a.







Hmun ka phiah lai pawh chuan,zawn nei ang maiin a rawn tei kual sek a."Engnge i zawn?"ka ning tawh lutuk chuan ka lo ti a.Ding chungin ngawi reng hian min en a,"Chawngmawi,khawnge i awm char char a?"ati leh hû mai."Min zawng em ni?"ngaih ṭha lo tak chuan ka ti ve nghal bawk a.A lu bu nghutin,"kal bo tawh suh,ka bulah awm reng ang che"tiin ka hmun phiah ken chu min chhuh sakin a phiat chhunzawm nghal daih a.







A awmdan in min ti hrilh hai lutuk chu mak ti takin a hmun phiat chu ka en ta reng ringawt a.Min zawng ni ta se,engnge fridge chungte kha a dap kher le.Thildang zawn a nei anga min hrilh duh lo zawk te pawh ani maithei ani.






Thlêng chu mikhual nula ho in an sil a.Chaw eikham thingpui lum in,ka pa te chu ka pe a."Hraii,hei hi i ni tur ania,chuan hei hi i patea.I pa nau te an nih hi"ka nu chuan a bula ṭhute nen chuan min in hmelhriat tîr a.






An bulah chuan ṭhu ve in,an titi ngaithlain,ka lo nuih pui ve chiam bawk a.Thingpui an in zawh takah chuan seng felin ka sil fai nghal zat a.No ka dah fel tur chuan ka thlauh keh leh chuai mai.Min rawn en leh ṭhapa hriatna ka nei lehnghala."Ka tihpalh lutuk"hawi pawh hawi chhuak ngam lo chuan tiin,no keh chu ka chhar nghal a.






"Bawihi,pawi ti rêng rêng suh,keipawh ka mo thar hlim te chuan chawhmeh ka chhuang ut rum ṭhin alawm"ka nu chuan tiin ka awm nawm nan min lo hnem ve bawk a.Ka zak lutuk chu ka ṭap lo chauh tawh.Vawk pu lah hi,ka bulah awm reng rawh ti ve si,amah zawk a bo leh daih a.Min ngaihsak lo reng reng.






Mikhual haw tur kan thlah lai chuan Vawk pu leh Zara te in hnuai lam aṭang an rawn lang hlawl a.Midang hmuh loh lai chuan rum theihpatawp hian ka lo melh râwm râwm a.Vawk pu inthlahrung deuh chuan,ka bulah rawn dingin,"Siakmawii'n tuipui sen a kân a"a rawn ti nghal.Ngaihsak duh lovin, mikhual ho kan thlah liam hnu chuan inchhungah ka luh san daih a.





In leng kan nei nak nak reng bawk nen,a fala in biakna hun pawh nei hman lovin nilengin thingpui lum leh hmun phiatin ka nileng ta ngawt.Hna hahthlâk anih loh nen kawng a kham duh zek lehnghala.







Tlai lam pawh mo lawmna ruai kan la kil zêl a.Vawk pu pawh ngaihsak hman lovin ka phe buai em em reng mai.Chaw einaah kan in hmu zuaia,in biak na hun awm lovin,midangin min rawn fin zêl bawk nen vawk pu lungawilo ti tau chu roomah a inkhung daih lehnghala.A che naupangchhia thei lutuk chu min ti nui leh var var zêl.







In leng an haw fel meuh chuan dâr pawh a tlai leh ta der mai.Vawk pu lah chu a rawn chhuak duh reng reng bawk silo.Ka nu te mu tura an chhoh hnu chuan keipawh kawngka kalhin,room ka pan nghala.







Vawk pu chu tui takin alo muhil der tawh.A vawk te a buaipuina lamah a chau ve aniang.Inbual tumin bathrobe leh thawmhnaw hak thlâk tur ka la chhuak a.Room aṭanga ka chhuak tur chu,"Chawngmawi"fiah tak hian a rawn ti a.Ka hawi lêt rang viau mai.







"Khawnge i kal leh dawn?"ala ham bui bui zui a."Ka inbual dâwn,ka rawn mu ve vat ang"ti a kal leh mai ka tum lai chuan,"ka tel lovin maw"a rawn ti leh.Ka khi sak a,"ka rei dawn hleinem"ti a ka chhan chuan, lungawi lo tak hian a lu a thing a."Pumkhat kan nih tawh hi,min phatsanin ka tellova inbual i tum amaw"tiin muangchang hian a rawn tho chhuaka.A towel la in,bathroom lam pan chuan min kuah phei a.






Sahbawn nuai phuan in,fai fuk rat ratin ka hnung min nawh sak hauh hauh a.Tuia tleuh fai leh in,"ka Chawngmawii a fai ta,Hrangchhuana a in bual ve ang"tiin ka hmaah chuan a hnung a rawn dawh nghal zata.Nupaa han inbual takah chuan nuam ka tiin ka zawngchhang dâwn tlatin ka hria.






Inbual zawhah ka sam min chhêm ro sak leh vek a.Duat taka min khuih sak leh in,khumah chuan min pawm phei leh a.







A kut min kham tir in,thil ngaihtuah nei tih hriat tak hian chung lam a melh vang vang a.






"Chawngmawi,thih hi i hlau êm?"ka en reng lai chuan a rawn ti chhuak hlawl mai."Thih maw?"hamhaih tak chuan ka zawt lêt thung a."Thihna,kan thih hnuah hian khawiah nge kan kal i rin?"thutak deuh chuan min zâwt leh a.Rilru tawt lutuk aṭanga sawi chhuak ang mai hian thawk a la leh kâwk a.







"Kan thih hnuah chuan vanramah kan kal tawh ang"ti a ka chhan chuan,za lo tak hian a nui ro hawk a."Kan thih dâwn hian,engvanginnge natna kan tawrh kher le?"min zâwt pawh ani chiah tawh lo,amah leh amah a inbe tawhin ka hria.Zanin chu ngatinge thihna chungchang ringawt a sawi le.Innei thar chauh kan ni a,thihna nilovin hlimna zawk kan sawi dawn lo em ni?






"Kan pi leh pute khan,kum khata inkhat aṭanga lût leh chhuak awm hi a ṭha ngai love an ti a.Chu chu i rin zâwng ani ve em?"tiin thudang min zâwt leh daih.Chhân ka tum mek lai chuan,rawn ṭawng leh in,"a ṭhatna kan hmuh tir dâwn ania.Naktukah Siakmawii te unau kan bual anga,kan in date daih dâwn ania"tiin thu inzawm lo tak tak chu a sawi leh daih bawk a.A rilruah hian thu ngai hlir ngaihtuah a thiam lo zawk nge,thil a ngaihtuah hnem lutuka a buai zo vek zawk pawh ka hrethiam tawh love.









🦋



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)