MR. EXCELLENT Ch ~ 17 by Sammy ♤

Episode kal lai dah luhna

Moderator: writers

Sammy R
Posts: 146
Joined: October 7th, 2021, 8:38 pm

MR. EXCELLENT Ch ~ 17 by Sammy ♤

Unread post by Sammy R » October 1st, 2022, 10:51 pm

Mr.EXCELLENT
By ~ Sammy♤


Ch ~ 17


"Kan dama Pathian in rem a tih zel chuan kan inneih ngei anga. Kan inneih hunah chuan kan indang daih dawn ania, engmah ngaihtuah hah a ngai lo" tiin ka bulah chuan a rawn thu a.


"Hah taka i thawh ka phal dawn lo hrim hrim, mipa te hi chu kan naupan tet atangin nupui fanaute enkawl zo tur khawpa thawk tura zirtir kan ni a. Thangkhat lian zet chu i man tur leh awm hahdam tir tum chein ka in lo inruahman a, ka lo inkhawl ve ten tun tawh alawm" a ti a.


Heiham....Vawiina a thusawi te hi ka damchhunga ka hriat a, ka theihngilh theih tawh ka ring lo. Mipa, pa ve tawk tak pawh a duh ber leh hmangaih ber te hmaah chuan an lei Pathian meuh pawh zah zo lo leh hnuchhawn dawr dawr in tlawm theih patawpa tlawmin a han kun dawr dawr thei mai a nia.


"Palai rawn tir ngei ngei rawh aw" ka ti ve ta sap.


"Ka pa te lo haw veleh rawn tir rawh aw" ka ti leh chuan a lu a bu nghat nghat a "Aw ka rawn tir ang" a ti a, ka biang a chuks zeuh a, kan inkuah vawng vawng. 


"Chhunah i muhil si lo a, zan men rei i thei lovang a" ka hnung ben thek thek pah chuan a ti a.


"Min chhaih ziah suh, ka inti naute tak tak anga i buai mai ang" tiin ka inla hrang a.


Ka phone rawn ri avang chuan a ang zuau tawh chu a chip leh a.


"Khawnga ka phone hi ka dah" tiin choka atang chuan ka chhuak phei a, pawn varandaah ka lo dah.


Ka û call a ni a, "Enge ?" ka ti deuh tawng.


"Chaw chiah lo chhum rawh aw. I thianpaa kha chaw eiah ka sawm a, sa ka rawn lei haw ang" a rawn ti a,  "Mahse a la hma tho a, chhum hmanhmawh suh. Keini pawh bazarah kan kawi lawk anga kan rawn haw ang" ka û bawk chuan a ti leh a, a sawi zawh rual deuhthawin inbeng ri chawrh ang hian a ri nghal chawrh.


"Aw ba..." ka sawi duh pawh ka sawi ve hma chuan a dah daih lehnghal. 


"Amak ngei mai lee" tiin phone chu ka melh vung vung ringawt.


Ka luh leh chuan Sir Jona chu a lo awm tawh lo a, ka auh chuan bathroom lam atangin a rawn ei lauh.


Ka thawmhnaw spin chu a lo phawrh a, "I suk fai pawh ka ring lo e a" a tih chuan "Ngawi hmak rawh, eng ang pawn su fai lo mah ila i thawmhnaw la su tu tur tho ka nih hi" ka ti a. "Nia, i la su dawn nia Au Ruth" a ti ve kher a, keiin min û kher chu ngei zetin "A ni maw Ka pa Jonathan" ka ti a, a balbawm ken chu chhuhsakin pawn lamah thawmhnaw chu ka zar a, min zui chhuak ta em bik lo.


Inchhung ka luh chuan sitting room ah thu in phone a en a, a khi vur vur.


Enge a en tih hriat tumin zawi te chuan ka pan phei a, ngawi rengin a hnungah chuan ka ding a, ka lawmloh na tur thil engmah a en lo. A en chu ka ig account a lo check a, ka thlalak post te, amah nen kan lan na te bakah amah ka lamluih pui na te chu a lo en niin.


Hung atang chuan ka kuah a, a phone chu a off nghal daih.


"Enge i lo en ?" rinhleh hmel deuh chuan ka ti kual vel a.


"Amak nangmah bak ka en lo" tiin min hmuh a.


"Ka hmu e ka Pa Jonathan" ka ti a, " Sir min tih loh leh Ka pa Jonathan min tia, Duata te hi min ti ve la. Anih loh paw Duhtak, Babe te pawh a awm a" a ti a.


"Hmmp, kan val senior a chuan koh duat te a phût a" tia chhaihin ka nui a, a tum hmuk.


"Chhun pachang chang ah ti tau suh. Nangpawn min ko duat ngai bik lo" ka tih chuan "Ka ko duat che 'Dawn titam nu' te ka ti che a, 'ka hmangaih ngawih ngawih te' te pawh ka ti che" lungawiloh hmel fahran chuan a ti a, a awmdan vel chu ka nuih a.


"Titau lo la ka Duatte" ka tih chuan a hmui chu a chip tlat a, lehlam a hawi tlat.


"Ka duatte" tiin a bulah chuan ka thu a, nuih insum tih hriat luttukin a biangsum lang meuhin a hmui chu a chip lui tlat.


"Hmmp chhun pachang ah em em chuan titau lo la Duatte" ka tih chuan chunglam melh lui tlatin a la nui duh lo a.


"Hmmp" tiin ka kut kuangkuahin ka thu veleh ta hmuk a. Chuveleh ka lam rawn hawiin a kareh chuan a mit thleng dawn dawn khawpin a nui a, ka bianga dawmin ka hmuiah te, ka biangah te, ka chalah te a chuk mawlh mawlh.


A inlahrang a, nghet zetin min kuah a "Ruk haw daih mai che ka duh, mahse biakin hawng ngeia neih che ka duh bawk si a" a ti a.


"I over lutuk. Tawngtai tha la, hun hi a tawi sawt sawt mai ang" tiin a biang ka piai a.


"Ka eitur rawn ken kha i ei ta miah lo a, a dai vek anga a tui tawh lo viau ang" a ti leh daih.


"Ka theihngilh daih" tiin choka lamah chuan ka lut a, "A dai vek anih hi" ka tih chuan ka hnunglam atangin "Paih mai rawh" a rawn ti a.


"A uiawm lawm" ka ti a. Paih leh paih loh ah chuan kan inhnial char char hnuah ka hnial hneh lova, ui tawkin ka paih ta vek.

Ka û te rawn haw hma chuan kan inchhaih nui ar ar reng a, nizanah inthen ka sawi tih hre leh tawh map lovin a nuam ti zawkah ka la tang zui.


Ka û te rawn haw hnuah erawh awmdun chawt tawh bik lovin ka û rawng ka bawl pui a, U Adriana nen tukverh glass  keh an siam tha a.


Ka û chu an ram en vel chu ka zawt luam.


"A that chu a tha khawp mai, mahse a pass na leh area vel tlem in a lo buai deuh a" a ti a, ka lu ka bu ve nghat nghat ringawt.


"In pahnih te a awm chu a nuam em ?" meng kual zuk zuk in a ti a, "Engee, hetia kan awm ang tho hian lawm kan awm" ka tih chuan "A ni tak tak maw ?" min chhaih ti tih chuan a ti a.


"I rilru a hmul emai" ka ti ringawt.


Ka û hi kei aiin kum 8 vel ngawtin a upa a, mi chhaih a hrat rualin ka hun hman mek ang hi lo paltlang tawh tu anihna angin min hrethiam thin viau.


"Khi lamah U Adriana palai te an leng tawh a" tiin Aizawl lamah  Adriana chhungten palai an tirh vel leh an chungchang te chu min hrilh a. Ngawi rengin ka lo ngaithla ve zel.


U Tetea awm loh hnua hetianga a hlim thei leh amah hmangaih tak tu a tawng hi ka lawmpui a, inneih a hlim taka awm zel tur pawn ka duhsak.


"Ka pa te rawn haw hunah i thianpa hian palai rawn tirh ve a tum tih ka hria ania" a tih chuan ka lai ringawt a.


"A rawn tir ve ang chu, inneih te kan tum ve a" ka ti a.


"Ni e, mahse ka pa te tan chuan a rual rual a fanu te hralh chhuah chu a har deuh dawn lo maw" a tih chuan ka harhchhuak ve zawk.


Ni pasal neih dawn te chuan thuamchhawm a ngai ve a, a rual lo pawh nise a zawn a sum fai han chhuah chu ka pa tan a harsa ang. Nakin lamah Sir Jona sawipui leh a ngai a ni.


Zanriah kan ei lai chuan eng eng emaw an sawi a, kei ka ngawi kar.


Zanriah ei zawh hnulamah ka û te pahnih chu an chhuak leh a, Sir Jona pawh reilo te a thut hnuah a haw a, phone atangin kan la inbe tho.


A tukah chuan school chawl tawh tih takah in ah ka awm a, ka û te an chhuak leh a, Sir Jona pawh an leilet lamah a kal.


Ka nu in min rawn bia in choka hnunglam chu thlo fai turin min rawn ti a  tlakdeng lam anih vangin chawhma lamah nisa tuar lova thlo tur chuan min ti a, U Adriana palai te chungchang te pawh a sawi nual a, ka pi phunchiar zia te a sawi hnuah a dah hram a, keipawhin hla ngaithla pahin choka hnunglam chu ka thlo a.


Ti ngai lo tih takah hahthlak hi ka'n ti khawp a, vawt chu ka va han ti lo tak. Ka thlan te chu a luang zawih zawih a ni ber.


Zanah pawh Sir Jona chu lo leng lo turin ka ti a, a hah dawn bakah ka chau ve reuh bawk nen ka hmu hma viau.


Zingah Sir Jona call chuan min rawn ti harh a, dil sangha man tura kal a tum thu leh kal ve turin min sawm a.


"A nuam dawn em ?" ka ti te te.


"Nuam dawn eee, tho vat la. I û ka dil tawh, insiam la dar kua velah ka rawn hruai ang che" a ti a, phone chu kan dah.


Dil sangha man tur chuan kan inphur chhuak a, U Adrian an a Jeep chu keng mai turin min ti a, mahse Sir Jona chuan kawng a tet avanga Two Wheeler chiah a luh theih thu a sawi a, tun hi a bike a ka vawikhat chuanna chiah a ni bawk.


"Kawng a chhia ania, min lo kuah rawh" a tih chuan ka kuah ve mai a.


An dil chu lian tak a ni. Mahse nuam pawh ka ti lo, ram lam emaw hetiang vela kal ngai lo ka nih vang nge a nuam hlawl lo.


Thlam ka ti dawn nge in ang deuh hi a awm a, tahchuan riak pawh an awm.


"Ni avan sa veee" ka ti a, "Thlasik lai chuan a sat dan hi a dang deuh ania" tiin a cap khum lai chu min rawn khum tir a, amah chuan cowboy lukhum parh ang hi a khum nghal bawk.


"Sangha kan man anga, nuam i ti mai ang" a ti a, reilo te kan chawl a, pûm ah chuangin len chu a keng a, pûm a kar chhuak tur chu dil kama hminah chuan ka lo la inpawt tang a, diktak chuan ka ring hlawl lo.


"I thlah loh chuan kan inkar chhuak thei dawn lo ania" a tih chuan "I thiam tak tak maw, min tlak hlum pui ange..." ka tih chuan a nui hak a.


"Min ring lo em ni? Khi an en che ania, a zahthlak" tiin dil ko tlang lam chu a hawi a, ka hawi chhoh ve chuan a riahchilh tute chuan min lo en thap.


"Thlah la" atih chuan ka thlah ve ta hram.


Pûm chu a kal fawn hlawrh hlawrh hian ka hria.


A che dul dul, tui a fawn dul dul ang vel hi a ni.


"Hetianga chuan hi a ruih theih em? Ka lu a hai ania, ka rui a mi ?" tiin tui chu ka en a.


"Tikhan che lo khan awm tawp la, invuan nghet la" a ti a, a sawi ang chuan ngawi rengin ka thu tawp.


"Khawilai ah pawh khan a awm vek ang, man lohna a rei leh tawh a. Chhungtlai lek chu man chhung a rei lovang" tiin an rawn au lauh lauh a.


Pûm chu a ding a, kar loh chuan a che sawn chak lo khawp mai.


"Helamah hian lo thu la, lo invuan nghet rawh aw" a tih chuan muang changin a awmna lamah chuan ka kal a, kal zawmh lah chuan pum chu a la che dul dul zel lehnghal.


"A hlauhawm emaii" ka ti tuau a, ka hlau lutuk chu min khawngaih ve deuh aniang "Vawikhat ka'n deng ve hrim hrim anga, kan haw dawn nia" a ti ve ta ngawt.


A che luih a, a ri chhawk a, tui chu a fawn nghal delh delh.


Zawi muanga len a hnukchhuak chu ka en a, len chu a rawn var chhuak ta phak phak mai.


"Aaa... Sanghaaa" tiin ka en reng a. Hetianga a taka Sangha man lai hi ka vawikhat hmuhna a ni bawk a, mak hi ka'n ti leh khawp a.


Len chu hnuk chhuak kimin pûm ah chuan a nghat hnuk a, sangha len a tang ho chu an phu nghal nauh nauh. Tal chhuah tum niawm chuan an perh a, a lian deuh phei chu a inperh sang lutuk.


"Leee, khalai ip kha lo la rawh le" tiin a dahna tur a kan ken ahma pawha lo dah fo tawhna niawm tak chu a kawk a, ka pe vat.


"Avan tam em em ?" ka tih chuan "Engtik lai pawn man tur a awm reng" a ti a. Sangha pakhat a ban puam tiah vel zet tur chu a man a, sangha chu a tal vak vak a, mahse engtin tin emaw a ti a a reh hmuk.


"Engtin nge i tih? A te hi ka man ve dawn ?" ka ti a.


"Aw, i kung tang tiat lek lek ho kha man la chhuah zel rawh aw" a ti a, "Tinge?" ka ti vat.


"An la te bik a, an ei tham loh. Tikhan kan chhuah leh anga, nakinah an len hunah kan man leh dawn nia" atih chuan "Aw le" tiin phur zetin a te ho chu ka lo chhuah a, a tira nuam lo ti deuh kha sangha nung ka'n man a, kan chhuah vel chuan nuam hi ka ti leh lutuk ringawt.


A deng leh a, a nin a lian a thlang a, keiin a te ka lo thlang leh.


Chutiang chuan kan duhtawk a, dil kam lam pan chuan kan inkar leh.


"Nakinah kal leh ang aw" a ti a, a lu a bu nghat nghat.


"I ke kha tuiah khan chiah rawh, nichina i sangha chhuah khan an lo ti za mai ang" a ti a, "Tak tak maw ?"  at hmel zeta ka tih chuan a nui a, a lu a bu leh nghat nghat.


Ka ke chu tuiah chuan ka chiah a, minute hnih velah Sir Jona sawi ang tak chuan ka ke chu a za a, ka en chuan sangha te tak tak te chu ka ke sir zawng zawngah chuan an lo bet a. Ka nui uar uar.


Kan haw thleng chuan sangha in ka ke an seh dan chu ka sawi a, kal lam ang lo takin ka harh haw khawp mai.


Sir Jona ka kuah lai chuan ka âwm chu ka khawih a, hmana kha khawih chak zia te kha hrechhuak in ka tham vak a.


"Ouch" nu zetin a rawn tia nih chu!


"A hmeichhia zawkin min ngam hle mai maw" a tih chuan then vur vur in ka tham leh a, "A za ania" a tih chuan "Dek i haw tih ka hre reng" ka ti a, "Kei zawk pawn ka la khawihsak lo che a, a hmeichhia zawkin min huaisen khalh zel mai a" a tih chuan a dar chu a seh sak a.


"Ka dulah i kut dah la, awm tha rawh. Anih loh chuan ka ding lawk anga, hnim zingah sawn ka pu lut che nga ka pawngsual dawn che" a ti a, ka kut chu ka dahtha vat a, engmah ti lo ang chuan a hnungah chuan ka bei ta hle hle. 


..............


Kar a liam leh meuh chuan Christmas kan hnaih tawh ngang mai. Kar hnih chiah a awm tawh.


Ka nu te an la rawn haw lova, mahse Aizawl tlang atangin tihtur a rawn sawi reng tho.


Sir Jona chuan zin puiah min sawm a, min sawiphur pui thiam si a, ka âw leh thlap tawh.


Ka nu te chu ka hrilh ve a, ka nu chuan kan haw rual thei anga tiin a lo phal nasa a. U Adriana palai te nena an inbiak dan a sawi a, kumthar January ni 20 a inneih turin thu an rel ta niin a sawi.


Chutia ka nuin a rawn sawi lan leh takah chuan Sir Jona pawh palai chungchang kha ka la sawipui miah lova, ka nu lah chuan "Nangpawh hi palai an rawn leng vat mai lo maw ?" a ti a, "A ninawm a" ti hlukin ka off daih.


Zanah chuan a ngai te bawkin a rawn leng a, ka û te pahnih chuan t.v en in keini choka lamah kan inkawm a, palai chungchang vel sawidan tur chu ka ngaihtuah rauh rauh.


"I dik lo riau mai, enge i ngaihtuah a ?" a rawn ti ta a, kei ka thaw hak.


"Palai chu rawn tir leh lo mai rawh" ka ti ngawt a, a mal chu na lo te te in ka chum a.


"Tinge ?" a ti dam thluam.


"Ka ngaihtuah a, ka û te an inneih hnai ve tho bawk si a, keiin ka tih veleh nghal chuan ka pa tan a hautak dawn lutuk" ka ti a.


"Tahchuan eng ber nge i buai na ?" a tih chuan "Awww ngaihtuah la, pasal neih chu tih namai a ni lova. Thuam chhawm leh neuh neuh angai a...." ka tih lai chuan "Chutiang angai hleinem, blanket set khat rawn keng la, i titauh changa i sin hran tur" a tih chuan rum zetin ka melh a. "Mi thutak laiin lo uang thin lo la" ka tih chuan thutak ve deuh zawk hian "Ka ti tak tak, keimah zawk hian i pa hnenah hian i man hi ka tlak thei angem ka ti..." a tih chuan "Cheng 420  lek chu i tlak thei lovang maw !?" thu mar awtin ka ti a.


"Kan thu lak dan te hi ava mak thin tak. Nangchu thil hlu tak i ni a, ka lei zo dawn che em tih ka ngaihtuah. Neih duh viau che mah ila i pa lung hi ka awi zo kher angem tih te ka ngaihtuah" a ti a. Ngaihtuah zui niawm tak chuan a melh ngai a melh vang vang.


"Lungngai lo phawt la" a ti a, ka darah min kuah a "Immm" ka ti ringawt.


...............


"Mipa be hlek suh ang che" aizawl kan thlen hma hma atang chuan a ti nghal a, "Min lo be ta se" ka tih chuan "Chupawh ni se i thih phah dawn anih loh chuan chhan a ngai lo" a ti a, "Anih ka pa leh Bawihte pawh maw ?" ka ti leh.


"Hmmp" a ti nghut.


Kan tlan zel a,  Aizawl kan thlen chuan kawng a tawt lutuk ringawt.


Zan dar 8 velah kan in kan thleng a, kan ina thleng ve mai tura ka nu ten an tih chuan a duh tlat lova,  an in lamah amahin a inkhalh chhuak lehnghal.


Ka nu chuan ka thau sawt thu a sawi a, excer lak ka ngaih thu a sawi zar zar.


Zanah chuan Sir Jona nen kan inbia a, an awmna ka zawt a, min la hrilh duh map lo zui.


Chaw a ei leh ei loh la zawh chuan a ei tawh thu in min chhang a. Kei mi zawt chik mi tihtakah rawng a bawl hman leh hman loh te ka zawt leh.


"Keimah tak chuan bawl love, innghak te kan dah ve a" a tih chuan ka thaw huai. Amah chauh anih kha chuan a chau dawn nen a che buai awm tiin ka lo hlauthawng kha ania.


Rei inbe lovin kan dah a, motor ka chuang chau ve deuh bawk nen ka mu vat.


Zing ka thawh chuan ni a kang tawh a, a la vawt em em zui.  Ka room atanga ka chhuah chuan Dinmawia lo thu reng chu ka hmu a, min hmuh chuan "Morning" tiin a ding hluai a.


"Morning" ka ti hul hak.


"Inhmuh a khât hle mai, i dam maw ?" a tih chuan "Aw dam e, nang zawk" ka ti tha mai a.


"Dam e, i nu in i rawn kal ve thu min hrilh a" a tih chuan "Nia, kan rawn kal ve mai mai" ka ti tha leh mai a.


"Mut i la duh reng a ni maw ?" a tih chuan "Aw, hriselna atan a pawimawh lawm" a ti a.


"Ka hmangaih ngawih ngawih te" tiin Sir Jona rawn lamg hlawl.


Keimah chiah min rawn hmu nge ni, a rawn kal hnaih deuh chuan Dinmawia chu a hmu a, a chal ti chuar tap in a en a.


"In leng i nei a" tiin a thu a, "Aw hei, Dinmawia nih hi" ka ti a, a en vang vang.


"Chibai le, Dinmawia ka nia Ruth-i thianpa hi" tiin Dinmawia chuan polite fahran chuan a chibai a.


"Immm, a bialpa hlui i ni ang maw ?" Sir Jona chuan a ti a, ka lo check hluk.


"Aa aww,,, nia" tiin Dinmawia chuan min en a, "Khalam en suh. Ka hriat avang che khan a sawi thin lo che nia. A la duh che tihna pawh a ni lo. Ka bulah a hlim a, a hrechhuak ngai miah lo che. Ka student pakhat nen in in an chu a sawi a, chuvang chuan ka hre mai che a ni" a ti a, Dinmawia chuan hriatthiam loh hmel tawk hian min en a, ka nuih te a za zawk.


"Tinge zing zingah i lo kal a ?" zawh bik pawh nei lo chuan ka ti a, "Keichu tukthuan ei a, ei zawha bazar nghal turin ka rawn kal. Nang ve le Vala" Sir Jona chuan a ti a.


"Eng maw ?" Dinmawia chuan a ti hu, thil awmdan chu a hriatthiam loh hmel viau.


"Rut... Ruth-i hmu turin ka lo kal..."


"Ruth hepa hi tunge, i patea mi ?" a tih chuan ka lu ka thing a.


"A bialpa ka nia, kumtharah kan inneih dawn" Sir Jona chuan a lo ti dam thluam.


"A awihawm loh lutuk. Tunge Ruth, hetiang senior tawh hmel zet hi i bialpa anih chu ka ring lova" a tih chuan "A nia lawm, kan inneih hunah i rawn kal ve dawn nia" ka ti a, "Coffee ka va siam lawk, in duh ve angem ?" ka tih chuan Sir Jona chuan a lu a bu nghat a.


"Tikhan lo inkawm ru" tiin choka lamah ka lut ta hmak.


Coffe no chawia ka chhuah leh chuan Dinmawia chu a lo awm tawh lova, ka pi ni lum ai a rawn lut ve chiah.


"Pi Coffee i duh ve em ?" ka lo ti nghal var a, "Thingpui hang kha min va thlit zawk teh" a ti a, Sir Jona thut lohna lamah chuan a thu a kei choka lamah ka lut leh nghal. 


"Ni e, ka tum ang" ka chhuah leh chuan Sir Jona chuan a lo ti a, engmah an sawi zawm tawh lo.


Rei lovah tukthuan kan bar vat a, Sir Jona nen kan chhuak lehnghal.


Traffic a jam nasat thin avangin ke in kan kal a, kut inkai rial in.


Kan bazar kan ti ve bawk a, kan lengkual a ni mah.


Mall pakhata kan awm lai chuan reels ka rilru ah rawn lang tlat a, ka ngen fe hnuah a phal hram a.


Ka phone chu ken eng emaw rinchhan chuan ka tung a, time set in Sir Jona din na lamah chuan ka zuang phei a, "Zuang awt awt suh i tlu ang" a ti a, runluihin ka zuang a, a sawi ang ngei ngeiin ka mawng sawh dawt khawpin ka tawlh thlu ta chawrh.


Ka nui vak vak a, Sir Jona pawh chu nui ring ngam chiah si lo in a nui a, min rawn kaitho vat.


"Thusawi i awih bawkah" tiin ka chalah a pen leh fawk.


...............Time Skip


Nikhat chiah kan cham tawh dawn a, ka nu te chu naktuk zing lamah an chhuak anga, keini erawh tlai lamah kan chhuak dawn thung.


Inchhungah chuan chanchinthar ngaithla in kan thu thap a, Sir Jona pawh awm leh vang tawh.


"Bawihte flash a dah tur thingpui va lum la, a awm sa kha min rawn thlit nghal la aw" ka pi chuan a ti a, thingpui chu ka chhuang a, flash a awm sa chu ka thli a, sitting room lamah chuan ka chawi phei a. Chanchinthar pawh a lo tawp ve chiah.



Thingpui ka sem kual lai chuan "Ka pu" Sir Jona chuan a ti dut a, kan ngawi nghal thap. Min rawn melh zauh a, a bulah chuan ka thu thla ve nghal.


"Enge maw khatia khawvel tawp tur ang mai a in awm a..." ka pa chuan a ti a, Sir Jona chuan a hrawk a thian kharh.


"I fanu hi neih ka duh a, palai rawn tirh pawh ka duh a mahse amah hian min dang a..."  a ti a, ka thin hi a lo phu zawih zawih.


Ka pa chuan a ku chu a en zawk a, kei min en leh.


"Min duh loh vang a ni lo  ania. Dam chuan kum thar lamah a û in a nei dawn niin ka hria a, fanu te hralh chhuah hi thil namai a ni lovang tih ka hriatpui che. I fanu hian i tana phur rit nih a duh lova, a zawn zawn a fa te hralh chhuah chu a harsat a rinpui che a. Chuvanga min dang tlat pawh a ni, mahse ka tum dan chu kal tlangpui ka tum tho a. Palai pawh rawn tirh ngei chu ka tum a, in fanu hi neih ngei ka tum" a ti a, ka thu hle hle thei lo, ka thu mar at a, ka pa chu ka en ran.


"A chutiang vut vut...." ka pa in a tih lai chuan tawng khalh in,."Thuamchhawm emaw thil dangah engmah lungngai suh, ka duh ber chu i fanu hi a ni a, i fanu neih chiah hi min phal sak rawh"  a ti a. Ka thaw chhuak hak.


"In book tawh em ni ?" ka pa in a tih chuan ka meng kâwk a, "Pa!" ka ti thut chu, an phu zuk.


"Chutiang vang a ni lo e ka pu, mi ngaiha mawi leh mawi lo pawh thlu thei tawh loh khawpa naupang zawk zawk ka nih tawh loh zia min hria in ka ring" Sir Jona chuan a ti a, a kiai suk.


"Aaa, chutiang anih chuan  keini'n a kan pawm kan pawm loh theih a ni hleinem. Kan fanu in a a lo duh ve chuan sawitheih kan nei lo. Amaherawhchu mizo dan takin palai te rawn leng se, chutiang sum lamah buaina a awm hleinem. Mipa, pâ ka ni a, ka fanu te pahnih hralhna tur chu buai a ngai lo ve" ka pa chuan a ti dam dap a. Sir Jona nui suk chu ka hmu vuai.


Eng enge maw an sawi zui a, ka pi chuan "Mate lo kal teh" tiin room lamah min ko hrang ta daih.


Ka pi chuan dam tak hian "Mate, pasal neih chu i duh ve tak tak amaw ?" a ti a, ka lu ka bu nghat nghat.


"I puitling ve tawh anih ngei hi" a ti leh a, a tap dawn ringawt emaw ni.


"Thuamchhawm te, inneih senso engahmah rilru hahna tur a awm lo ve" tiin min kuah a, keipawhin ka kuah let  a, a insut hraih.



.................... Time Skip



Kan haw a, Sir Jona pawn palai a rawn tir a, kumthar February ni 20 ah chuan kan insawirem ta.


Christmas hmang turin kan inpuahchah ti ila inneih turin kan inpuahchah a ni ber awm e.


Ka nu chuan nitinin awmdan tur min hrilh a, pasal te tihlawm dan te, pasal chhungte tihlawm dan te, hmeichhia bawk hi kan sual thin avang hian pasal nu te bawk hi hrawn an har thin thu te a sawi a. Thu tha tinreng chu min hrilh mawlh mawlh a ni ber e.


#Keimah hi min rawn beng chawrh te u.... Dawt hi ka sawi char char mai. Fa neih tir chu sawi loh inneih pawh an inneih hman lo, naktukah Sunday Bonus  EPILOGUE  ka rawn dah tak tak ang min hrethiam mawlh mawlh teh u.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)