SHIVERS (Beauty and the Monster) Chapter - 13 by Calm Bird

Episode kal lai dah luhna

Moderator: writers

Calm Bird
Posts: 101
Joined: May 1st, 2022, 8:28 am

SHIVERS (Beauty and the Monster) Chapter - 13 by Calm Bird

Unread post by Calm Bird » October 1st, 2022, 11:22 pm

Chapter - 13
SHIVERS
(Beauty and the Monster)
by Calm Bird




"Miss? I tha em?" A tih chuan bu nghatin "Ah, aw aw, tha e" bah nak hian ka ti a, room atanga a chhuah rual rual chuan ka awm dawm vatin ka thaw hak a, boruak am zetin ka hip nghal kawk kawk. "Jameson" rilru na zet chuan Jameson-a hming lamin ka phun sep a, ka mittui ka biangah a rawn luang nghal ngiai ngiai. Ka biang ka mittui vanga huh hliam chu ka bana hru tawkin haw tur chuan ka insiam a, pindan ka chhuahsan dawn chiah tiha ka hawi let chuan khuma thisen val kalh ka hmu a, thaw hakin khum lam chu ka pan leh nghal zat.





Bedsheet chu hlip vatin bathroom lamah ka pawm phei a, bawm pakhat chhungah ka khung hmiah. Pindan chu chhuahsanin step-ah ka chhuk thla a, hotel luhna kawngkhar ka pel fel chiah tihin mipakhat hian 'miss' tia min kovin min au ding a, a lam ka hawi nghal vat. "Sir-in hruai haw tur chein min ti a, min lo zui ta che" ka bul a rawn thlen rual chuan kun zeuhin a ti a, ka bu nghat. "Helamah min lo zui rawh" tiin a inher vut a, a hnungah ka zui nghal dat dat.





Car awmna laia kan thlen rual chuan a seat hnung lam kawngkhar hi min hawn sak a, ka luh theih nan amah a awmsawn hret bawk. Ka thut luh rual chuan kawngkhar a nem khar dawt a, car chu helin driver seat-ah a thu lut nghal vat. "Jameson-a zinna hmun i hria em?" Kan ngawih dun rauh rauh hnu chuan ka tichhuak sap a, front mirror atanga min melh zeuhin kawng a en leh nghal a, ka kawrfual hmawr ka tham vak.





"Chennai-ah" a rawn tithum dut a, ka rilruah zawhna a rawn lang nghal zut zut. Eng titurin nge? Tinge engmah min hrilh ve loh? Ka taksa leh tha chiah em ni ka lak atanga a duh? "A hna lam thil vang a nia, a rawn haw hun tur a hriat lawk loh" a tih zawm leh zat a, kan..... nilo, nilo; Jameson-a in kawtah chuan car tidingin a chhuak a, ka thutna zawn kawngkhar a rawn hawng nghal vat. Car atang chuan chhuakin driver pa chu ka melh zeuh a, a hmaa ka hmuh ngai awm pawh ka hrelo. In lam chu ka pan nghal a, kawngkhar chu hawngin inchhungah chuan ka pen lut nghal zat.





Inchhung zau leh reh zetah chuan ka hawi kual, thaw hakin ka pindan lamah ka pen chho va, hotel-a ka inbual tawh tho vangin inbual ka tum leh tawh em em lo. Khumah chuan ka mu thla thak a, ceiling chu mitkhap eih lovin ka melh ngur a, ka ban ka phar hliai bawk. "Awmdan tur min tihre lo. Ka hrelo takzet. Eng ang mizia nge maw i neih bik le?" Ceiling melh ngur chung chuan ka ohun sep sep a, ka pheikhawk bunlai chu tlawh phelhin ka ke hmang chuan khum mawnga ka puan thleh chu ka thai chho va, ka sin tha nghal vat.





Puan sin hlun chung chuan a saisir zawngin ka mu tawm kak a, ka kap na leh ut ut thin chuan min tichau nghulh thei. A na a reh mai loh vang chuan thovin ka pawhdawh ka hawng a, nachhawkna mum chu la chhuakin dawhkana ka bottle chhawp chu ka ban nghal zat bawk. Damdawi chu dawlhin ka mut zawm leh nghal a, mut ka mamawh takzet. Engmah hre lo leh hahdam taka mut reng theih ka chak.





Chhun lam dar hnihah ka harh ve chauh va, ka riltam zia ka hre hmasa ber. Inhnuai lamah chhukin choka lamah eirur ka insiam rak rak a, rice leh sausage ka kang a, bowl-a dahin sitting room lamah ka chawi phei nghal bawk. Tv on-in couch-ah chuan ka thu sawt sawt a, thil ei chung chuan tv ka hmet kual nghal mai mai. Tv channel ka hmeh sawn zut zut lai chu ka thil hmuh vang chuan ka tawp chawt a, hnuai lam ka hmet leh nghal vat. Jameson-a hmel chu chiang takin a rawn lang a, volume ka ti ring nghal vat bawk.





"Kan Mizo mipa ngei chuan kan ram, Mizoram hming titha leh turin Chennai lamah a zin a, contract a sign leh dawn a ni awm e." Tiin news reader chuan a puang zut zut a, a news chhiar lai erawgin ka beng a verh lemlo. Video leh thlalak an rawn tihlan zawk sawn ka mit a la zawk! Thlalak pakhatah chuan hmeichhe pakhat kawngah hian a dawm a, an nui dun sang bawk. Ka lakah sawtiang sawn a nui ve ngai miah lo!





Video-ah ve thung chuan hmeichhe kawnga kuah chunga an kal dun lai hi a ni a, kaa awm dan ber pawh ka hrethiam lo. Saw saw hna maw? Tv chu remote atangin ka off daih a, ka hmai tuai puatin ka thil eilai chu centre table-ah ka dah a, couach-a thu ngil ah chung chuan ka kuttin ka seh char char.




"Ka awih thei lo" ka sam tham nawk nawk pah chuan ka tichhuak hap a, ka thaw lak a rang hle bawk. Ka thik a nilova, a nupui hetah ka awm reng laia hmeichhia lo kuah reng te chu! Ka tan a tlawm thlak lutuk! Lerh lutuk mai. Nupui nei lai a ni tih a inhre lo zawk em maw ni?! Khatiang thil kha nizan lawkah a thleng bawk a! Rapthlak hian.





Kar khat lai a liam leh tawh a, daily news-ah Jameson leh khanu, a hmeichhe kuah, vainu hang beh zet kha an lang reng a, ka kham dan chu pui tak a ni! An inngaihzawn leh zawn loh chungchangah mipui an inhnial reng bawk a! Chu vainu hmung pawh chu ka hre tehhrep love ah! "Miss, hei lehkha an rawn thawn che a, i nutei hnen atang a ni awm e" guard pakhat chuan a rawn tilut a, ka thutna atang ka tho nghal zawt. "Eng a!" Mak tizet chuan ka ti that a, a lehkha ken chu ka chhuhsak nghal vat. Nutei ka neih awm pawh ka hre silova. Ka nu unaunu hnen atang maw? Ka nu'n unaunu a nei tih pawh ka hriat si loh!





Guard chu a chhuak lehnghal vat a, envelop ka hawn chuan thlalak pakhat leh lehkha hi a lo awm a, thlalak zawk chu phawrhin ka en nghal vat. Mipa pakhat hi khawl hmaah a ding a, wire em mawni! Chu thil chu a zai lai a ni bawk. A hmel a lang lo va, thlalak pawh chu a fiahlo takzet. Thlalak hnung ka bih chuan ni leh kum zah hi a lo inziak a, a ni leh kum zah inziak chuan min thawng takzet. Ka nu leh pa thih ni, elevator-a kan accident ni chiah chiah kha a ni!





Lehkha chu la chhuak leh vatin hmanhmawh zet chuan ka pharh a, a chhunga thu inziak chu ka chhiar nghal vat. "Thlalaka mipa lang kha i nu leh pa thattu an ni. Accident nilovin elevator kha tihluihnaa tihchhiat a ni." Tih zawng hi a inziak a, ma chhiar zawh rual chuan thlalak chu ka bihtha leh ngat. Hmuhchian tumin uluk zet chuan ka en reng a, ka meng phawk nghal vak. "Patea maw?" Ka tisep a, ka paper ken chu ka hum nghal vak. He thil hi awih tur nge awih tur loh ka hre lova, patea kher chu a nih ka ring theilo bawk! Min tiduhdah fo mah se ka pa unaupa, a thisen zawm pui ngei a ni a, mahni thisen zawmpui chu tu'n nge that duh teh lul ang!





Envelop chhunga lehkha thun leh ka tum lai chuan eng emaw hi a rawn tla nawlh a, chhuat lam chu hawi thlain chhar tur chuan ka kun hniam nghal vat. Ka en chian nak chuan memory card hi a lo ni a, a ngaihna ka hrelo hle. Engvanga hethil khung tel hi nge an nih ang? Ka thil ngaihtuah chhuah chiah vang chuan in atangin ka tlan chhuak a, guard lehkha min rawn petu lamah ka tlan phei nghal vat. "I phone ka lo hmang" ka ti nghal vat a, hamhaih zetin min en heu. "Vatin!" Vin thah chuan ka ti a, dawhtheihna tlachham tawh tak ka ni!





A phone min pek rual chuan inchhung lam ka pan leh a, phone-ah chuan ka memory card ken lai ka vuah lut nghal vat. Phone chu tinungin gallery-ah ka lut tlang nghal a, video pakhat deuh tlawng hi a lo awm a, ka play nghal zat. Ka thil hmuh vang chuan phone ka thlauh chawrh a, ka ka ka hup nghal chawt. "A ni theilo ang" bah nak chuan ka tisep a, phone chu chhar lehin ka memory card thun chu ka la chhuak a, rka thlalak dawn chu kengin in ka chhuahsan a, guard pa awmah a phone hmeh bek chawt chawtin ka kalna tur lam pawh sawi lo chuan gate atang ka tlan chhuak a, driver chu kovin kan hotel lama min thlah turin ka ti a, a ni pawh chu a che ve nghal vat.





Ka thil hmuh zawh chiah vang chuan ka la khur der der a, ka ban chu ka hmer leh vak thin. Kan car company kawta a tihdin rual chuan motor atanga chhuakin building chhunglam chu ka pan vat a, ka patea rawn chhuak tur ka hmuh rual chuan a lamah tlan nghal a, min hmuh rual chuan a ding ve chawt. "He thil hi sawifiah rawh!" Ti tuarin a awmah ka thlalak ken lai chu ka hmehbel chawt chawt a, hamhaih zet chuan thlalak chu a bih ve mai.





"Engthil nge a?" Min rawn melhin a ti a, ka nuih hak. "Nangmah i nih kha. Khawl thil i zai chat lai, wire ngat lehnghal! Elevator tihchhiatna tur" a mitah tak melhin ka ti a, a nui hak. "Elevator a? Huh, eng atan nge ka zai chah ngawt ang?" Nui sang chung chuan a ti a, ka then ve sak. "Ka nu leh pate i dah bo nan mawle" ka ti nghat rual chuan a nui lai a tawl chawt a, mitmeng eng emaw ka sawifiah theih loh hian min en a, zam duh bik lovin ma melh let ve kar.





"Tual thattuah min puh tihna em ni?" Nui duh tawh miahlo chuan a ti a, ka ner sawk. "Ka ring che sin! Mah se, mah se nang chuan... nang chuan rosum leh pai vang maiin ka nu leh pa i that a!" Ban phar meuh chuan ka ti a, a nui hak. "I hre ta tho tho" thlalak en paha nui sang chuan a ti a, mak tizetin ka en reng. "Nia, ka that alawm. Finfiahna i nei em ni? He thlalak chauh hian thiam loh min chantir theilo" min nuihsawj zet chuan a ti a, ka patea a ni hi ka awih lo hial zawk!





"I thil tihchhiat lai video ka nei" ka tih sep chuan min melh kawk a, "Min bum tumlo mai teh. Cctv record zawng zawng ka delete vek tawh!" Nuih leh hak pah chuan a ti a, lu thingin "Nia, a vaiin i delete vek tawh. Pakhat tiam lohin" ka ti fak a, inhera pensawnin kawnga thing lian tha nelh nawlh chu ka la a, an motor siam chhuah thar, man to tih hriat zet awmna lam chu ka pan ding nghal. A zawn ka thlen rual chuan ka thing ken lai chuan ka vaw pawp a, patea a au nghal that. "Nilo! Ka car man to ber!" A tih ri chu hre pha reng mah ila car chu ka vuak zawm zel tho a, security te'n min dang ngam lawk lo. "Chhe vek rawh se" ti thatin ka vuak zawm zel a, patea'n security a au nghal chul.




____________ⓩⓐⓦⓜⓝⓐ____________





Car hma glass chu ka vaw pawp a, a keh nghal chhuai. Ka thinrim lutuk chu ka au vak a, ka tha a khur thei hial mai! Kha leh chen ka lo chen pui tawh, ka patea ngei chuan fahrahah min siam a maw? Min hmangaih ngai reng reng lo tute hi ka hmangaih reng bik nachhan tur ka hre tawh lo. Mahni ka intihrehawm mai mai. "LALRINHLU!!!" Ka lama rawn pen hlawk hlawk chuan thinrim awrawl ring zetin a ti teng chhuai a, mit sen ram chung chuan a lam ka hawi nghal. Car hma darthlalangah ka hmel ka hmu thei vek a, ka mit a sen zia leh ka biang leh beng a sen tai tak a ni tih ka hmu thei. Ka thinrim vang chauha sen a ni bawk.





"Nang hian buaina min siam ngam a maw?" Ti thawtin ka ban rekah a rawn vuan a, a lamah min pawt hnai dawr. "Ka that dawn chiang khawp mai che!" Ring zzeta ti tuarin min thing nawk a, mim vawnna kut ka phih thla nghal pawp. "Ka nu leh pate i thah tawh hnuah pawh kei min thah leh zel i la tum a maw!" Ka ti ve that a, ka kawchhung sa bulh bulh chu a hrehawm letling zawk! "Ka that teh hrep lo! Ka unaupa ka that lul lo ang! Min puh chhiat hi tum reng suh!" Ka hmai zawnah chuan a au vak vak a, ka insum hman lo chu a hmaiah ka beng ri nghal pawp a, lehlamah thle sawnin a biang a dawm nghal vat.





"Finfiahna, finfiahna ka nei. Nang hian lift kha i tichhe lui a ni. Wire i chep chat a, khawl a chhiat theih nan tubohin i vaw chhe bawk a!" Thinrim vanga aw khur der der chuan ka ti a, tawng pawh ka tawng hleithei tawh lo! "Nangnu phiangsen hih!" Ti thatin a kut chu min ben tumin a phar kang hluai a, cho zetin a mitah tak ka melh a, a kut a chet rual chuan ka chhing nghal sawk a, rei fe mit ka chhin hnu pawha min la ben loh vang chuan ka meng chhuak a, Jameson-a ka hmuh rual chuan mak tizetin ka en nghal haw.





Ka patea kut chu a lo man bet a, ka hmaah tak a ding bawk. "Nang hian ka nupui kutthlak tum hlek suh" chang fak chuan a ti a, ka thin a phu nghal dup dup. Ka ding khawng at chung chuan Jameson-a chu ka melh reng. "A thil tih saw i hmu em? Kan car siam chhuah a tichhia a nih saw!" A kut phih thlak pah chuan a ti a, min melh rum nghal zat bawk. "A car ve tho a ni a, tihchhiat theihna dan a nei. Vawikhat, vawikhat pawh i kut hi ka nupui hmaah lek tawh suh" fiah fek fawk chuan a ti a, patea chu a rum nghut.





"He company-ah hian share engmah a neilo. Ka unaupa fa, ka fanu a ni a, kutthlak theihna dan ka nei bawk" khi sukin a ti a, Jameson chu a chek tlak mai. "Ka hnenah i hralh tawh a, a man ka pe fel vek tawh. Ka nupui a nih ni atang chiah khan a chungah thuneihna i nei tawh lo. Ka ta chauh a ni tawh. Chuan, ka ta chu a ta a ni tawh a, ka share chu a share. I hria maw?" A hmai zawna melhin a ti a, ka patea chuan chhan ngaihna a hre tawh lo. Tuna a thusawi zawh chiah vang erawh chuan ka danglam hnehsawh takzet.





"Kal ang" tia min kaih a tum chuan a kut ka beng per lawp a, ngaihna hrelo chuan min melh nghal haw. "Hnaih pawh min hnaih suh" ti fakin chhuata thlalak chu ka la a, ka pen sawn nghal hlawk hlawk. Hmeichhe dang vangin a zin char char a, tunah erawh min ngaihtuah ang takin a awm vel a! Tenawm hian! Patea chungchang chu ka la ngaihtuah leh ang. Ka nu leh pate thattu hi ka awm mai mai tir hauh lo ang. Taxi ka chan lai chuan tu emaw hian ka darah vuanin min kuai her thut a, ka phu lutuk chu ka au that. "Tuna i thil tih zawh chiah kha i sawifiah ngei tur a ni. Lo kal nghal rawh" a ti nghut a, ka ner khum nak.





"I laka insawifiah ka ba lo ve, i ruala haw pawh ka duh heklo" ka ti let ve nghat a, a hmel te hi ka ten hliah hliah! "Hrep che hian a" ti hapin min kai kal nghal dawr dawr a, ka au nghal tuarh tuah. Min kaihna kut chu pawh phelh tumin ka bei fan fan a, ka chum leh awk thin. Eng atan mah ngai lo chuan a pen ngaiin a pen pawk pawk a nih chu!





"Jameson Lalrinpui!" Thinrim zet chuan ka ti fiak that a, a rum nghal nghut. Ding chawtin min melh tur chuan a rawn hawi let a, rum zetin ka lo melh nghek thung. "Ka thu zawm i tum mai mai hauhlo a ni tiraw?" A ti thum dut a, ka ban rek a vawnna chu laksawn tumin ka tal leh aih thin. A hmer nghet sauh zel thung a!





"I thu ka awih nachhan tur ka hrelo. Va zin bi leh daih rawh!" Ka ti ta zek a, a ner nghal nawk. Thaw hakin min pawt hnai a, a darah min pu nghal lawp a nih chu! "Lalrinpui!" A hnungah chuan ka chum tawk tawk a, bahlah miah lovin a pen pawk pawk thei thung. Ka haw so bawrh bawrh hi a ni tawp mai. "Ngawi reng khan awm rawh" motor seat hnunga min hlang thlain a ti a, kawngkhar khar ri dawpin driver seat-ah a thu lut nghal a, chhuah tum chuan kawngkhar hawnna ka ban nghal vat. Hawn ka tum pawh chuan a inhawng thei tlat lo a, a hawnna handle chu ka sawi vak vak. "Hawng nghal rawh hmela!" Tawngkam tuihnai lo zet chuan a lam hawiin ka ti a, darthlalang atangin min melh reng.





Mihring ve tho ka ni a, tawngkam thain min daih bik lo. A bikin he pa, Jameson-a lakah hian dawhtheih a har bik takzet. "Unlock rawh ka tih chu!" Ti tuarin hnung lam atang chuan Jameson chu ka ban a, a samah ka tham nghal nawk nawk. Ka kut chu vawn beh tumin a bei nghal a, min bawn beh sak mai thei bik lo. A hmaiah te chuan ka ham a, a sam zawng zawng hi pawh kawlh vek a nia ka duh ni! "Lalrinhlu!" Ka kut phih thla pawpin a ti that a, min vin ngam tur hi a ni bikin ka hre tawglo. "Lalrinpui!" Ka ti let ve that a, ka lamah a rawn hawi let a, a hmai khem nuaih chu ka hmu hmasa ber!





"Eng thil nge i hriat a!" A ti that a, za lo zetin ka nui chhuak hawk. "Eng thil nge ka hriat maw? Huh, ka hriat zawng chu nang hi ka then chak che tih a ni!" Ka sawi zawh rual chuan car steering chu a chum pawp a, a duh tawk nghal dawn emaw ka tih hnua a la chum leh pawp pawp vang chuan ka awm hla nghal dawr. Thinrim tih hriat zet hian a rak chhuak tuarh a, min tibangbo takzet. "Inthen a? Nang hian min then i duh a maw?" Ka lama rawn hawiin a ti tuarh a, ka hlauhna a kai chhuak chiang hle.





Tunah khan ngaihtuah pawh inngaihtuah hmasa lovin ka ankhum a, min sawisak leh mai ka ring rum rum. "Ka" "Lalrinhlu!" Ka tawng tur chu min pawt chatin a ti that a, a thinrim zia chu hai rual a ni lo! Car atang chuan chhuakin ka thutna kawngkhar lam panin car chu a rawn hel a, ka thutna lam kawngkhar a hawng nghal zat. "Lo chhuak rawh" a sawi zawh rual chuan ka melh chho nghal dawr. "Lo chhuak rawh ka tih chu!" Thinrim zet hian a hma aia ring mah chuan a ti leh thawt a, min la tiphu nghek zui. Muang changin car atang chuan ka chhuak a, ka chhuah fel rualin kawngkhar chu a khar ri chawrh a, ka kuta min kaiin min pensawn pui nghal pawk pawk.





A pen chak em vang chuan a tlan in ka tlan a, kan bawp a insei hlaih bawk nen, a pen khat hi ka pen thum ang vel a ni! "Sawi tha leh nghal rawh" company chhungah bawk chuan min luh pui a, room pakhata min luh pui rual chuan kawngkhar khar ri pawpa banga min nemin a ti a, min melh chhuk ran bawk. "Ka"
"Aw, ni e, min then i duh thu kha sawi nawn leh rawh!" Ka mitah tak min melhin a ti a, ka chil ka lem nghal khawlh. Ka thi dawn chiang ta!





A awm zawn chu ka melh ngawt ngawt ringawt a, ka khabea min kuai dakin min fawp nghal nawk nawk. A ban puamah chuan vuanin ka nam tang tang a, ka kut pahnih chu a kut pakhata hmer khawmin chung lamah bang siin min phar kan tir a, bangah a nem bet hmiah bawk. A kut lehlam erawh chuan ka tukhum samah a tham a, min kuai dakin min fawp buan buan!



- End of Chapter 13 -



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)