TRUE LOVE CHAPTER - 23 By : Tom Tom Putara

Episode kal lai dah luhna

Moderator: writers

Tomtomputara
Posts: 159
Joined: December 3rd, 2021, 1:17 am

TRUE LOVE CHAPTER - 23 By : Tom Tom Putara

Unread post by Tomtomputara » October 1st, 2022, 11:37 pm

TRUE LOVE
Chap~23



By : Tom Tom Putara






Engtia awm tur nge ka hre lo a, a mitmeng buai nuaih kara sen rûm te chuan a mamawh chu engnge anih min hriatchian tir rual in, a tak ngeia hmachhawn ka lo la inpeih loh zia chu ka rilru taksa thleng hian an dawnsawn thiam loh zia min hrilh mawlh mawlh ni mai in ka hria.





"Chhuak rawh," sehchilh zetin a rawn ti hrâwk a, harhchhuak zawk a pan mai ka tum chu, "Min rawn hnaih suh, ka mamawh lo che, chhuak rawh.....khawngaih in" chang zeta tih pahin a in thunun zo tawh lo tih hriat takin a kut lehlama Syringe a ken chu khûr dar dar chung chuan a bânah a vit lut nghal pawp a, ka awm leh awm lohin danglamna pakhatmah a siam hman tawh lo tih hriat zet hian a pump lut nghal zat bawk.





Khur hlawk hlawk chungin ka in her a, sofa lo in hûngah chuan ka ṭhu thla hnawk a. Ka ṭah a chhuak lova; Mahse, ka natna chuan chhungril ah min ti rûm vawng vawng tho. Hei hi a ni lo'm ni ka la hmachhawn tur chu? Ka lo infuih ve ṭhinna te khan min phatsan nghal vek ni maiin ka hria. Min mamawh lo lutuk hmel khan min tina a. Mahse min mamawh zawk zia lanna a ni tih chu ka chhungril hian a hrethiam; Mahse, pawm har ka ti viau si. A thisen in an mamawh hmuh ngei tuma an nawr natzia kha, min zah zo lo tih hriat ngawih ngawih a an thunun hneh lutuk te kha engtinge ka dan ang? Hmachhawn dan ka thiam lova, ka natna tur ka pan mek tih erawh ka hrechiang viau.





Ke pên thawm chu ka ṭhutna lam pan in a rawn hnai zel a. Ka hnung maia a tawp rual phei chuan thâwk îp tlatin mit ka chhîng sawk a, ka kawr hmawr ka ṭhâm zui nghek ringawt. Ka hmazawn ah ṭhingṭhi hnawk in, ka pumah hmai a rawn phum a, nghet takin min kuah zui a.




Hahdam hmel takin a thaw chhuak suai suai a, awmdan tur ka hre lovin a rawn chetdan chuan min ti hamhaih kher mai. Sawi tur ka hre lova, engtia lo dawnsawn tur nge pawh ka hre hek lo. Rawn dak chhuak ruai ruai in a mitmeng phi chiai chuan min melh a. "Ka ti hlau che ti raw?" inthlahrung leh mahni insit hmel ngawih ngawiha a rawn tih lai chuan ka lo en ngar a, ka chhâng thei mai lo.





Mahni inrintawkna a khat ṭhin hmelah hian hrehawm ti hmel ka hmu a, ka tih theih tlem lutuk chuan min tina nawn awn awn mai. A biangah ka kut pahniha chelhin ka melh rân a. "I beih let a ngai asin, theih tawp chhuah rawh kan pahnih tan, i natna avangte in inhnem nan hmang ṭhin mahla, a tuar lettu tur chu i hmangaih te leh nangmah chiah. I tum a ngai," ka tih lai chuan thaw hawk in ka pumah bawk a hmai a rawn phum leh a, nghet zet chuan min kuah zui leh bawk.





Amah a in dem vang te, a nu tihnat lêt a duh vang emaw pawh nise, harsatna kan tawh vanga sual kawng kan zawh hian a tuar nasa ber chu keimahni bawk. Midangin kan thil tihsual rah kan seng kha min rawn tawrh chhawk dawn lo. Kan buaina kha a chhawk pawh a ni mai thei; Mahse, a hnu leha a ṭhîn lêtna natzia hi a hrechiangtu ber tur chu amah hi a ni. Chu erawh a pawm hmasak phawt a ngai thung si.





Room kawngka chu rawn in kik karh karh in Bsa'n. "Bawiha," a rawn tih rual chuan rawn dak chhuak vat in, "Kan rawn chhuak, ka ṭha" a ti lêt ve vat a, mitmei in ding tur chuan ka ti nghal zat a. Thaw chhuak hawk in, a hmui lum ther ther chuan ka chalah a rawn fawp vang vang a. Ka chal leh a chal insik tir zui zatin, hnai fahran ah kan in melh a. "Tih palh, chelh tur che ka ni lo tih ka hria; Mahse, ka thei si lo" a tih nghut a.





"I tum thei alawm, kan pahnih tan....." ka lo ti ve vat, min chhang lovin a ding zui vut a. Ka kutah rawn chelh in, "Ka thlah ang che, an lo ngaihtuah tawh ang che," a rawn ti daih a.





Chhanna phût in ka melh ngar thung a, thaw hulh in, "Ka nihna chu i hriat kha," tih nghut pahin min kai chhuak zui nghal zat a. Ka duhlo viau na in ka nawr lutuk ang tih ka hlauh rual in a duhna hmang ngei nise ka ti bawk.




Kan chhuak chu awmze nei taka min lo melh in an lo nui vur vur hlawm a. "I ṭha mah mah anih kha Zoramsual...." Te-i chuan a lo ti nghal zat a, chhâng lem lo chuan a nui suk ringawt. Lucy erawh chuan chîk fahranin min lo melh kar a, ka nuih ringawt. Engkim an hriatthiam vek ka ring a, kei aia hrechiang tute an ni hial ang.




Kan haw mai tur thu a sawi chuan an lo bengkhawn em em hran lo, midang chu an la awm dawn a nih hmel. "Naupang ngaihzawn chu kha kha ni mai," Anthony-a'n a lo tih zauh rêng a.




"A helna rei tawh zia kha, a in adjust vek tawh, " Te-i chuan a lo ti ve nghal zat bawk a, midang chu an lo nui ṭhu a, Ramsanga chu a rum nghut ringawt. Bsa'n min thlah hman tho thu a sawi lai chuan a khalh theih thu in a chhang a, rilru nuam vak lo chuan kan inzui chhuak ta tho.




Kan tlan chhung chuan sawi tur avang kher mai. Ka dakchhuak a, thlifim chuan min rawn chhêm dai sawng sawng thei. Kan boruak uap lutuk khan min chiah hneh lutuk a, ka zawi rawih rawih mai.




Chaw eikham hun vel chauh a la ni bawk a, mi veivak an la inpel suau suau a. Tleirawl pathum kawng sir a kal paha inkuah chunga nui bawk bawk ka hmuh chuan Zoramsanga ka tawn hma nun ka ngaihtuah a. Kum khat pawh kan la inzui lo a, ka nun erawh a thlak danglam hneh zia chu khâng tleirawl engmah lungkham neih loh hmel taka hlim nui te khan min hriatchhuah tir nawn awn awn mai.




Kan Gate thlen hma thim chinah chuan a ding a. Ka seatbelt ka lo phelh ve rak rak a. "Naktuk Champhai kan zin dawn," hrechhuak thut in ka ti sap a, min rawn melh vat in, "I va'n sawi lo thei....in châmrei dawn em?" tih pah in ka lam hawiin a rawn awn phei nghal a. A chala lo nem pah chuan, "Dawn lo, zankhat vel a niang" ka ti zui zat a.





"Umm...kal ve lo mai la? In exam zo chauh a, i zin leh daih te chuan?" tih pahin ka kut la in a hum vang vang a, a fawp zui zat a. A chet dan cool ruih chuan min hneh leh tawh viau. Rem lo deuh chuan min rawn kuah nghal zat bawk a, ka nghawng ah hmai phûm in, "I rimtui lutuk, he rim hi ka ngai ṭhin," a rawn tih sup a, ka lo nui seih a.




A rimtui tak hi ka hnar a cham reng ṭhin kha a ni ve tho. Ka nghawng a hmui a rawn nawr châk châk in, a fawp ngawr ngawr a. Ka nui chhuak hak 'Love bite' maw!




Min kuah rem sauh sauh in a bei ngawrh hle, a za a ka tâl nghal pap pap bawk. A shirt tlângah chuan nghet takin ka lo ṭham ngawt ngawt a,nuih chu a har tawh nasa. "Ka chhinchhiah che nih kha, i zin chhung daih tur," a tih chuan nui hak in ka lo fawp zauh chu a duhkhawp lo nasa mai. Min fawp let ngawr ngawr a, ka nui chhuak hak chu a rûm nghût mai!





Kan inthlah meuh chuan kan thaw dun halh halh a, kan chal insi dun in a thâwk na zet chu a rawn chhuak pawh a rimtui in a sexy takzet. Awm ṭhat pahin ka âwmbâwr a rawn ṭham leh zauh chu nghal ti lutuk in ka melh zui nghek. Gate ka luhna tur thleng min thlah in min thlir zui reng tih ka hria. Hawi let zauh in ka bân ka vai a, a kiai suk chuan ka ngaih a ti ṭha veng veng.




Ka nu leh pa chu Tv lo la en in ka puar leh puar loh te min zawt luam a, rei ṭhu lovin in tihfai leh insiam ve thuak ka duh avang chuan mangṭha in ka room lam ka pan zui nghal a.





Muhil thei lo chuan ka let kual sek a, vawiin a ka thil hmuh in ka ngaihtuahna a luah reng bawk. Tawpsan nge ṭha beidawng lovin ka kal zel dawn? Ka beidawng anih loh chuan ka hlawhchham ngai dawn lo tih erawh ka chiang viau thung. Bei nawn reng tur erawh chuan huaisenna ka neih angai si. Ka beih chhinna ah ringawt beidawng lo tur in ka infuih ru sauh sauh a. A tuka kan zinkawng thui tur zia ngaihtuah reng chungin muthilh thuai tum chuan ka mu ṭha zui sat sat a.





Ka nu in kawngka a rawn kik dawt dawt a. "Naute....kan inpeih tawh ania" a rawn ti pah mawlh mawlh bawk a. Ka tho a, Khumah chuan ka ṭhu tûm bâr a. "Misualpa.....nangmah vang mut ka kham lo hle mai, ka ngaihṭhat lohna tur in awm miah suh aw?" tih pahin ka tho sawk sawk a.




Ka insiam zung zung a, ka nu lahin min rawn au teh sek a. "Aw, ka hman ṭep e" ka ti thuai a.




Ka chhuak phei a, ka nu leh pa chu an lo inpeih tawh viau mai. Kan in khâi chhuak zui nghal a. "Thingpui i lem ve lova, kaw ruak a motor chuan hian ruih a awl asin" tih pahin ka nu chuan min rawn melh ralh a.




"Hmanhmawh ching cheng hek che u," nuih hak hak pahin ka ti kher a. "Sawtah thingpui leh chhang thar lâm kan ei phei dawn nia," tih pahin ka pa chuan kan Bag-chu a remfel mawlh mawlh bawk a.




Aizawl khaw fêm ah kan ding a, kan inhnawhpuar a. Ka rilṭam deuh vang nge, ka ei tui phian mai. Zun ram kan thiar leh sawk sawk a, Champhai lam pan turin kan chhuak zui ta nghal a.




Seling ah Zing chaw kan ei a, kan ṭhu chawl vang vang a. Ka phone ri chu ka en thuai a, Bs-a.



"Aw...Bs"



"I tho tawh maw?"



"Tho ve tawh e... Seling ah chaw kan eikham chiah tawh zawk..."



"Tehdaih chuan...? Engnge in tih?



"Champhai ah kan chhung in kan zin dawn a....."



"Anih chu maw le...engnge in tih dawn?"



"Ka pa in min sawm a, a hna thil velah ka nu nen kan zui ve mai mai"



"A nawm dawn chu..tluang deuhin kal rawh u..ṭhianpa hi ka phone tlang thei miah lo, chu mai mai chu aw, " a rawn tizui a. "Anih chu, kan la inbe bik lo. A ṭha ang, a la tho lo aniang" kan tiliam thla ve ngawt a! Nui huk in a dah zui nghal a. Ka rilru a nuam lo nghal a, ngaihtuah loh tum pawh in a harsa ṭhin ngaihṭha taka awm hi.





"Kan kal dawn em ni?" ka pa in a rawn tih rual chuan ka tho nghal a. "Nia, kal ang u," tih pahin ka lut zui nghal a. Ka nu a rawn luh hnu chuan kan chhuak zui leh ta nghal a. "Ka puar tawh bawk a, ka muhil tawh teh ang," ka ti sap a.




"I rui lo hlauh chu a lawmawm mange," ka nu chu a rawn lehhawi pah zauh zauh bawk a.




"Nia...a tihchi tak tak..." tih pahin earphone ka phawrh a. Zai ka ngaithla a, pawnlam hawiin ka ngaihtuahna nen kan inkâwm zui mawlh mawlh a.




"Kha thil kha ka mitvai mai nise....a nih loh pawhin ka mumang mai nise ka ti... Misualpa....khang kha a thlen ring ru reng chungin ka vuan che a; Mahse, ka mit ngeiin a hmuh erawh ka ring lo asin... I tan a harsa dawn tih ka hria...a harsa viau ang; Mahse, kha thil nen khan kan in kâwmngeih ve thei lo. Khawngaih takin misualpa....."




Ka suangtuahna khawvel nu but but nen chuan kan hawidun vang vang a. Tlang lang paw ruih ṭhin te, thing kan tlanpel phe zut zut te chuan ka mit an la a, ka ngaihtuahna erawh an pawtpêng dêr silo.





"Kan hmalam hunah harsatna tam takin min hmuak thei tih hrereng chungin ka vuan che a. Ka thlah lo che...ka thlah dawn lo che; Mahse, a theih loh...rei tak ka nghak ngam lo che. Ka ngah rei poh che leh kha khurchhia ah khan i lut thuk tawlh tawlh dawn si. Ka hmangaihna che in pawt reng che mah se chelhdin theih loh hun, nangmah bûktu a rih em avanga a thlah hun che a awm ang tih ka hlau....nang pawhin hlau rawh"





Ka mengkhup lap lap a, men ṭang ṭang a Zoramsanga hlimthla biak a, kawm ka la chak; Mahse, ka meng thei tawh ngang lo. Ka ṭhutdan ka siamrem sat sat a, muthilh ngei tum chuan Lu ka dahrem zui bawk a.




Kawng siam in vawi thum lai min dang a, min dan apiangin darkar hnih dawn dawn kan ding chho bawk nen, kan chhuah hma ang aiin Champhai chu kan thleng tlai. Ka pa ṭhianpa, a tleirawl chhuah aṭanga tun thlenga a kawm ṭhin Pa Machhuana te In lam kan pan a, kan thlen chin a hrilh chamchi reng bawk a.




Aizawl an rawn kal pawha rawn thleng fo an nih avangin ka nel nghal vek hlawm. An fanu Tetei nen pawh kan inhmu fo tawh a, kan inkâwm nghal bawrh bawrh a. "U Daisy...va inbual harh rawh... Bazar kan zuk kal lawk dawn nia..i peih chuan?" tih pahin a rawn nui sen sen a.





"Peih lutuk e...kan kal dawn nia" ka ti vat a, ka Bag-ka hái zui nghal rak rak a. "Min lo nghak reng rawh, ka va intifai sawk sawk ange" tih pahin min chhanna pawh nghak em em lovin Bathroom ah chuan ka lut zui nghal a.




Ka inbual zo chu min lo tur sek tawh a, ka hmanhmawh bawk nen ka inchei phelh phang mai. Tetei nen chuan kan inzui chhuak ta nghal a.




Chawhmeh kan leikual zung zung a. Burma thil, ka eichak pawh alo awm nual mai. "I rilṭam em?" Tetei'n a rawn tihrual chuan Sana ka bih zauh a. "Chaw ei a hun tawh dawn..naktukah haw hma in kan ei zawk dawn nia," ka ti thuai a.




"Naktukah in haw leh nghal dawn em ni?" tih pahin Tetei chuan mak tih hmel zetin min melh khiau a. "Nia...ka pa in a tihfel hman chuan..." ka lo ti thuai a. Zoramsanga nen kan la inbe miah lova. Ka call in 'Switch off' a in ti tlat bawk si, Bsa han phone thawt thawt chu ni thei in ka hrechiah si lo. Ngaihṭha lo deuh chuan ka ngaihtuah kual leh chiam thin.





Champhai Zan boruak ka hîp vawikhatna!! Bathlar ah chuan ka ding vang vang a. Boruak hîpin ka thaw chhuak hak a. Ka phone rawn ri chu ka bih vat a. "In tluang maw?" Zoramsanga message chu ka en ngar ngar a. Ka nui sak a, ka thawhuai thei."Kan tluang e" tih zawngin ka chhang a. Phone chu ka hûm lum vang vang a, "Tunah tak chuan kan inhlat hle mai," tih pahin Champhai khawchhung chu ka thlirkual den den a.





"I rimtui zet kha ka ngai tawh," tih min rawn thawn rual chuan ka nui a, ka hmet thim zui vat a. "Keipawhin ka ngai lutuk che" tih sap pahin ka thaw sang sang a. "Min chhâng duh bawk silo...muttui le" tih a rawn thawn chu ka bih zawk a. Ka ngai lo a nilo; Mahse, 'ka tel lovin a awm thei lova, ka duh angin a awm a ngai' tih hria se tihna rilru ka neih chu ka zui hrih mai a ni.




Ka pa chu Zing aṭangin a che chhuak a, Tetei nen kan chhuak a. Champhai kan fangkual hi a ni ber a. Ka vawikhat kalna anih avangin nuam pawh ka ti.




In hnawhpuar turin eitur siam tuina a tih hmun min panpui a. 'Mohinga' ngei mai ka lam nghal chat. 'Suanṭam' erawh tui ka ti em em lova, pawisa ka ui avangin ka hâwp zo lui tho.





Tetei chuan nuih ver ver pahin, "U Daisy... Champhai hi mak ve deuh asin. Vengthlang hi Venglai ah a awm a, Venglai hi Vengthlang ah a awm daih asin... 'Champhai nisi tlang a awm, Zotlang ni si Phai a awm te' anti bawk a..." a rawn ti chu kan nuidun har har a. "Tui i ti em?" a rawn tizui a, ka lo bu nghat nghat a. Ka phone rawn ri chu ka en thuai a, "Aw...nu" ka ti nghal vat a.




"I pa a rawn haw tawh...a tifel thei e," a rawn tizui zat a. "Kan haw dawn tihna nge?" tih pahin Tetei chu ka melh ralh a. A Lu a lo thing nâ nâ a. "Nia... naktukah Office lama bawhzui nghal a duh deuh a...." a rawn ti vat a. "E, awle.." ka ti nghal thuai a.




"Kan haw angai anih chu..." tih pahin ka hmui ka hrufai pah nawk nawk a. "A mak ṭalh ṭalh..." Tetei chuan a lo ti hlak a.




Champhai khawpui chu kal leh ngei tumna nen kan thlirliam mek chu a ni leh der tawh a. Tetei min la ngai lutuk chu nuam lo ka ti ru ang reng viau mai.




"Nautei chu nuam i ti em? Kan la zin leh ang chu," tih pahin ka pa chu a nui huk huk a. Ka nu lahin, "Kan chau dawn mange..." a lo ti zat a.




Pawnlam boruak thlir tur awm hek lo chu ka mut a tichhuak nghal riau a. Ka ṭhutdan ka siamṭha leh sat sat tawh. "Ka mu teh ang...." ka ti sap a.




Khawilai nge kan thlen tawh pawh ka hre ve love. Kan chhuah aṭanga darkar khat liam kan tlan leh tawh avangin kan thleng thui leh hman tawh viau turah ka ngai. Ka mutchhuak in min nawr leh tet tet tawh. Ka Lu dahna ka siamṭha a, muthilh ngei ka tum ruh hle. Zai ka ngaithla leh veng veng tawh a, min awihmut ngei pawh ka ring.




Boruak a vawt hit vur tawh a, thli vawtin min chhêm hit seng seng reng bawk a. A rei ka tih em avangin ka hawikual sek tawh. Mi an reh ṭan tawh avangin nuamlo ka ti ru riau bawk. Sana ka en a, zan dar 10 a ri ṭep.




Bike rawn tlan chuan min rawn chhun phâwt phâwt a. Ka mit a vai rum rum thei hial.. Ka mit dâlin ka kut ka lek vat a, ka bulah chuan a rawn ding chawt a. "Ka lo thleng," tih pahin a rawn nui suk.




"Ka enchiang lawk duh che..." tih pahin ka hnaih zui nghal thuai a. A hmai chu ka chûlkual nghal a, "I ni tak tak....engtinnge ka kalna hmun apiangah i lo awm tak tak theih?" tih pahin lawm bawk si, mak ti bawk si in ka nuih sen sen a.




"Chuang rawh..." tih pahin ka kut a rawn chelh a. A hnungah ka lawnkai zui nghal a. "Min kuah rawh..." tih pahin ka kut pahnih chu a rawn vuan a. Nghet zetin ka kuah a, a hnungah chuan ka bei thlawp a. Ka thlamuanna nen kan pawm veng veng ni mai hian ka hria.




Min kalpuina hmun chu a thim zual ruihin ka hria. Ka hnâr ka lên nghal vat vat a, min luh phei puina lai chu a rimtui lem lo hle. "Khawiah nge min hruai dawn?" tih pahin a kut chu ka chelh nghet salh a. Engtinmah min chhang lovin hmalam min panpui zui zel a.




"Ṭhu ang" tih pahin min pawt ṭhu zui nghal a. Kan ṭhutna hmun thim leh hnâwm rim nam ruih chu ka ngaina lo takzet. "Haw leh vat ang aw?" ka tih rual chuan min rawn melh zuk a, a bu nghut ringawt.




A phone a phawrh a, ka lo en reng a. "Ka lo thleng" tih chu a type nuap nuap a. 'Zira' tih niin ka hria. A ngaihna hrelo leh hlauthawng ru deuh chung chuan ka melh leh zawk ṭhin a. A cigarette-phawrhin a ṭankai a, a sî zui vang vang a.




Mi pakhat rawn kal chu ka lo hmu thuai, rang takin Zoramsanga lamah ka tawlhhnai salh a. "Lo ṭhu lawk rawh...ka rei lovang," tih pahin a tho nghal a. "Khawnge...eng.." ka tihlai chuan a kal zui hmak.




Ka en reng a, an inbe sawr sawr a. Chu pa
chu a lêt zui leh nghal a. Zoramsanga chu chiang takin ka en reng a. A rawn phei veleh mai dawn emaw ka tihlai in min hnungchhawn zawngin a ṭhu a. A phone light a ti êng a, a che zui sat sat a.




Hlauhthawnna in min ṭhâm vawt sung sung a; Mahse, rang takin ka rilru ka siamfel thung. Engkim hmachhawn a ngai tih ka hria. Ka infuih thar sauh sauh a, ka ding kawh zat a. Muangchangin ka pên phei chhat chhat a.




A khûr hlawk hlawk a, a chil awm hlei lo chu a chhâk pharh pharh bawk a. A kamsir phuan var liai chuan a kuta a Syringe ken khurh der der a mamawh zia chu a tarlang chiang viau bawk. "I thu ania, ka dang lovang che. Vawi tam kan inhrilh tawh, ka thusawi in i laka awmzia a neih loh zia pawh ka hrechiang viau bawk" ka sawi zawng pawh chuan ka ṭah a chhuak; Mahse, ka chak lohna lantir chu a laka ka thuhrûk tur lian tak a ni tih pawh ka hria.




Min rawn en reng a, chulai hmun kâwm ṭawphnawk zingah chuan kan in enchiang dun hle bawk. A mitmeng a hriatthiam dilna chu ka hmuh hmaih luih a ngai tih chu ka hrechiang viau mai. "Bawih...tun ṭum chiah tak tak....khawngaihin?" a ti hniam ruih a.




Ka ding a, chiang takin ka en kal reng tho a. "Ka hmangaihna che aiin he ruihhlo hi i thlang tlat dawn anih chuan rilru na tawpkhawk chungin ka kal ange. Ka rawn kir tawh ngai lovang. Mahse, hei hian nge keiin hmangaih zawk che i lo in zawt nawn dawn nia" tih pahin ka hawisawn a. A ṭhu kun ngal a, ka mittui ka khap per sak a.






(to be continue.......)


Ads khu min lo click sak ve hram zel dawn nia...👇🏻👇🏻👇🏻 Ka lawm viau ang🥰🥰🥰



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)