**DANTE VINO P.O.V**
Chutia Rebel-i nikhawhreloa a awm takah chuan ka thinlung chu a hnual nghal ruih mai a.
"Rebel, REBEL! I mit kha meng teh! Hrep tak chuan!" Steering wheel ben chawrh pah chuan ka au tuarh tuarh a. Damdawi in kan thleng hman lo ang , a lo berah pawh minutes 45 lai tlan a ngai dawn a. Chulovah, Rebel zai tur hian tumah ka ring zo lo, chhete chauh pawh zai ngai nise. Ka phone chu lain Angelo ka dial nghal a.
"Unaupa, eng nge a an a?" Hlauhthawn hmel tak hian min lo zawt a.
"A thidang a ni. Kan mite kha L'Americano lamah tir nghal rawh. Ruangte kha endikin dahbo nghal rawh se. In lamah kan haw a, keimah ngeiin Rebel hi ka zai dawn a ni." Vawt ruih a tiin ka hang up nghal a.
Tun ang renga motor ka khalh chak pawh ka la hre lo. Kan in gate a lan theih takah chuan ka thaw huai a. Rang takin ka hung fel a, passenger side lamah ka tlan phei nghal a. Ka pawm kang nghal lawpa kawngkapuiah chuan ka luhpui ta a.
"Pheikhawk kha, mister!" Ka luh rual rual chuan ka nu chuan a lo ti hlak a. Ka melh rulh a, ka pheikhawk chu phelh nghalin ka Sihal nu tetakte chu dimtein thutthlengah chuan ka muttir a. Thisenin a bual huh vek a leather jacket chu ka phelhsak nghal a.
A hliam ka han enfiah vel takah chuan Giana, Harry leh Florence-te'n thil awmzia an hrethiam ta chauh a. A lamah chuan an tlan phei thuai a. In chhunga pheikhawk bun luh ngaitheilo bur, ka nu chuan Rebel-i pheikhawk chu a phelhsak nghal mawlh mawlh a.
"Tunah chuan ni rih love,ka nu." Tih ngul ngul pah chuan ka Sihal nu tetakte chu ka zuk melh chhuk a.
"Ka vahpa, eng thil phiangsen nge thleng hrep a?" Rebel-i nikhawhrelo ka endik mek lai chuan Giana chuan a lo ti thawt a.
"Ah, i hria alawm. Milkshake a in hnem lutuk a, puar luat vangin nikhawhreloin a awm a nih hi..ENG THIL PHIANGSEN NGE THLENG NIA LANG HREP NI?" Ka ti tuarh a. Rebel hian puih a mamawh a ni. Rebel hian min mamawh a ni. An zawhna mawl tak tak chhanna'n hun khawhral hman ka ni lo.
Angelo leh phirte chu kawngkaah chuan an rawn lut nghal a. In chhung an rawn pen lut hman tawh a ka nuin rum lutuk maia a lo melh takah chuan inher lehin an pheikhawk chu an phelh ta a.
"An kap fuh a ni." Tiin Natalia chuan rawn luh pah hian a lo hrilhfiah zung zung a. Rebel-i jacket chu a lamah ka theh phei a, mamawh vel la khawm turin pindan dangah chuan ka lut ta thuai a.
Engtin nge ka lo fimkhur loh em em thei zawk? A nunna chu dinhmuna hlauhthawnawmah a awm mek a ni si a. Khang Russian mawl tak takte khan silai kah thiam hle se chuan tunah hian a thi daih tawh awm si a. Ka Sihal nu tetakte hian min kalsan daih tawh ang.
Ka chhanhim zo lo ngei ang.
A laka ka chet dan thinte avang chuan ka rilru leh taksa chu mahni inthiamlohnain a khat a. Rual ka pawl lo lutuk tiin Stephan khan khang hmeichhiate kha min lém kual vel turin leh min tihlim turin pawisa chawiin a ruai kha a ni a. Min hneh zo em emtu mitmeng buang uk khak mai chu ka rilruah a cham reng tho a nih kha.
A race dante kha a dangdaiin hisap thlap leh thiam chungchuang tak a ni. Rebel hi chu ka hmeichhe tawn tawhte lakah chuan danglam tak a ni. Ka engkim hi min hnehzo vek a. A finna , a fiamthu leh a thinlung ngilnei takte chuan ka thlarau thlengin a tituiral zo vek a nih si hi. A thil chhui ruk chhui zo Italy-ah a rawn let hlim hlawt ni mah se Rebel-i a inchawipui avang khan Stephan kha ka kap lo chuah a ni. Ni, ka Capo a ni a, ka second cousin a ni bawk mahse, Rebel-i chungchang a tel tawh chuan kan inlaichinna chuan tukverhah min thlawh chhuahsan vek a ni. Amah hlata awm harsa ka tih em avangin kha American restaurant thleng khan ka umzui ve zel a. An kah fuh kha keima thiam loh a ni. Na a tawrh pawh hi ka thiam loh vek.
A laka ka khawsak dan, ka lo dawnsawn dan leh keima awmdan hrim hrim avang pawh hian keimah leh keimah pawh hi ka inhua a ni. Chutih rual chuan ka thluak thenkhat erawh chuan ka hlatsan tur a ni tiin min hrilh thung si. Tawrhna pumpelhna'n kan inkar hi ka tihla tur a ni. Ka chhungkaw member tam tak ka lo venhim zoh loh anga amah pawh hi ka lo venghim zolo palh hlauh a nih pawha ka tuar lutuk tur lo inven lawkna'n.
Silai mu lakchhuahna tur hmanraw tul ang ang ka lakkhawm hnu chuan living room-ah ka let leh ta a. Ka chhungkuate chuan an lo zim luai luai a.
"Hrep tak hian, zim luai luai lo teh u." Ka Sihal nu tetakte lam ka pan lai chuan thinrim takin ka ti thawt a, ka chhungte pawh chuan an tawlh hlatsan thuai a.
"A tha e, ka ti tak tak. Ka pem hlek chauh alawm." Nuih sang chung chuan a ti a. A nui hmel ka hmuh chuan ka lungphu chu a rang sauh a.
"Honey, kan ngaihtuah lutuk che a. I tha hlauh chu a va lawmawm tak. Mamawh i nei em?" A kut vawn chawt pah hian Giana chuan a ti a. Mi reng reng hian an tawk tur a ni lo, ka thisen a tisosang tlat zel.
"Aw, hmun thawl a mawmawh." Lo tih chhur chhur pah chuan tray chu coffee table-ah ka nghat a. Hmanruate chu tithianghlimin ka rem fel nghal mawlh mawlh a.
"Eng thil nge thleng a?" Tiin Florence chuan Angelo kuah pah chuan ngaihthatloh hmel tak hian a ti a.
"L'Americano-ah beih kan tawk a ni. Min rawn hual bet vek a, mahse kan that vek thei hlauh e." Isa chuan a lo ti a.
"Chu inbeihnaa a kaikuang ber chu tu nge ni ta ang le?" Florence chuan zam hmel tak hian a ti a.
"Kan la hre chiah lo..." Natalia chuan hnuai lam melh ralh chung chuan a ti a. "Finfiahna awm zawng zawng lakhawm turin kan mite kan tir mek a ni."
"Russian-ho. Russian-ho an nih kha." Rebel chuan tiin thoh chhuah a han tum a. A aw ri vang chuan ka hawi chhuak var a, a lamah tlan phei thuaiin a hnungzang tetakteah chuan ka kuta lo dawmin ka tung tho ta nghal a.
"I chiang chiah maw?" A mitmeng sen uk kharh mai, thaw tichham dawn khawpa nalh chu melh vang vang pahin ka zawt a.
"Russian tawnga thu inziak tattoo an nghawngah an nei a ni." Muang dam raih hian a ti a. Lu buk nghat pahin chair chu ka pawt hnaia a kiangah chuan ka thu ve ta a.
"A thu inziak chu ila hre thei ang em?" Dilchhut tak chuan ka zawt a, a hnungzang chu dimdawi taka la dawm reng chung chuan. A mit chu chhing vang vangin inkah lai vel kha a han mitthla a.
"Silai kaptu parukte kha chuan 'Hmingchhiat aiin Thih' an nghawnga ziak an neih laiin pahnihte kha chuan...'Shadow' tih ziak an pu thung." Mi pahnihte chungchang a sawi chuan ka lo inseh ruh hle a, Florence leh Giana thaw ri halh thawm chu ka hre bawk a.
Shadow-ho pherh hrep chu min rawn umzuitir a maw?
"Tualthah hmang maw? Italy-ah hian maw?" Tiin Angelo chu a lo phun sup a.
"He thil hi nakin lamah kan la sawi zawk dawn nia. Ralveng dah belh ula, tumah rengin tun kar chhung hian mansion in chhuahsan tur a ni lo." Khauh zeta tiin Rebel-i hnungzang ka dawmna chu thlahin ka chhungte chu ka hmachhawn ta a. Angelo chu bu nghat nghatin thupek zawm chuan a chhuak ta nalh a. Harry chuan Giana hlauthawng hmel tak chu a kuah a. Ka hmangaihte hlauthawng hmel ka hmuh chuan ka thinlung chu a tihnim ruih thei hial a. Hei hi a ni Pavlovski-a duh chu : hlauthawng zek zeka kan awm hi. Rebel-i thisen luang chu ka han melh a, a damna tur chu ngaihtuahin ka rilru chu ka sawrbing ta zawk a.
"Tunah chuan hmun min kian ula, zu min rawn laksak bawk ang che u." Tiin a lo ngaithla fuh a piang hnenah thu chu ka pe a.
Ka kut chu tichein a sam nalh tak chu dimtein ka chul hliah hliau a. A bul hnaia awmte tana hlimna thlentu leh vanneihna chu a ni takzet a ni. A taksa khawilai mai pawh ka tawh(tawk) zeuh pawhin ka rilru sehhel tak hi a tihahdam sawng sawng thei a ni.
Natalia leh Isa chu choka lamah an tlan phei vat a, zu chi li ngawt hi an rawn keng lut a. Ka duh ber min thlantir a, an zu rawn ken luh zinga tui ber ka whiskey ngainat em em chu ka la nalh a.
"Rebel," a sam chu a bengkawma zeh pah chuan ka ko nem duai a. "He hmunah hian kahhitna emaw hnimhlum tih vel kha kan kawl ve loa, a na viau dawn a nia aw. Silai mu hi kan lak chhuah a ngai bawk si a, hei hi in la a chhawk em em ang che." Tiin whiskey um inhawngsa chu ka pe a.
Zu tak ngel ngawl chu a han hnim chhin a, a inthing deuh nak a, a hnar chu a ner deuh nang nang a, ka thil hmuh tawha hmuhnawm ber a ni.
"Hrep taka , a inna tur no tal chu pe ve la." Harry-a'n a tih chuan ka chhungte lahin hlauthawng zet hian Rebel che vel zawng zawng chu an lo thlir thap hlawm a.
"Nula puitling a ni tawh a, a ti thei mai ang." Harry lam hawi pah chuan ka ti a, ka ngaihdan diktak ka sawi a ni. Eng vangin nge ka Ni hian mipa diktak, mafia mipa ang hi a hmangaih mai loh le? He librarian hrep hi a hmangaih tlat lawi si. Mipa eizawnna inhmeh lo ber mai chu.
"Kei chu whiskey hi ka lem pawp pawp thei miah hleinem." Harry chuan tiin rinhlelh hmel tak hian Rebel chu a mithmul a san khum ak a. Librarian pa hrep chu a.
"A chhan chu i nep em alawm." Ka tih chuan Gigi chuan min rawn melh rum kher mai a, Rebel chu ka ngaihvensan ta daih a.
A ban tha lam chuan whiskey um chu a lo ban vat a, tam tham tak hian vawi hnih a han lem khawlh khawlh a. A in nawn leh hma chuan a khuh ang bawrh bawrh a.
Ka nula ngei chu.
A lei chu chhuahin a lu a thing nak nak a. A innocent lutuk chuan min tinui tet tet a.
"Tun hmain zu i la in ngai miah lo a ni maw?" Tiin nuihzat taka melhin ka chair chu ka ngheng ar ar a.
"Ngai lo." Tiin zu um chu a intulh leh ta a. Zu um zahve zahve leh chu a in zo ta thuai a, min hneh reuh hle a ni tih hi ka sawi tel hram duh.
"Awiha, lawng mi ang maiin zu i in thei a nih hi." Isa chu a lo nui hak hak a. Rebel chuan meng deuh diar diar hian Isa chu a va melh a, zu a intulh leh hma chuan a han salute ngei a. Midang zawng chu an lo nui dar dar a, kei ngei pawh tiamin.
"Nang hian min thui dawn a maw, Dr Dante?" Doctor mask ka vuah mawlh mawlh lai min rawn en vang vang chung hian Rebel chuan a ti a. Min rawn melh chhoh ha pah chuan a mithmul sei seng sawng kara a mitmeng buang uk khak mai chu a sen deuh ram a.
"Okay, a tawk ta e, lightweight." Then deuh sak pah chuan a kut tha lama a zu um chu ka laksak ta a. Kan kut chu a intawk zauh a, ka lungphu chu a phu rang hlawk hlawk kher mai.
"Lightweight a? Inhmuhsitna tawngkam dang leh em ni?" A ti a, a aw chu a zurui aw bah nuaih a.
"Zu i rui awlsam tihna a nih chu." Thutak zet chuan gloves bun mawlh mawlh pah hian ka ti a, ka thiltih laiah chuan rilru pek hram hram ka tum a.
"I mi hmuhsitna avang hian ka lawmlo hle a ni, Dr Dante. Thil hriatchiansa i rawn chhakchhuah danah mi remhre tak chu i ni lo phawt ah. Arsi sawmah bial ka pe ang che." Rui zet chuan a ti a.
Midangho chu an lo nui leh dar dar a. Ka nui hmel hliab tura mask ka lo vuah hlauh chu ka lawm kher mai.
"Aw le, in vai khan pindan atang hian chhuak tawh rawh u. Rilru pek ka ngai a nia." Aw vawt ruih chuan ka ti a. Ka chhungte chu pindan atang chuan an chhuak ta nghal a.
"Dr Dante, min zai tur hian credentials i nei chiang chiah maw?" Tih pahin a hmui chu a han tipawrh deuh tar a. "Nemnghehna lehkha thenkhat chu hmuh ngei ka duh a ni."
"Doctor tia min koh renga khatia i hmui i tihpawrh reng chuan maw zanina ka thil zai tur hi i ban chauh a ni hauh lo ang." A beng bulah chuan ka ti sa sa a. Ani hian min tizauthau tlat a, ka mipatna khawng luh chung chuan ka zai thei hauh lo ang.
"Wow, surgeon leh gynecologist maw." A heh pet zauh chung chuan a ti a.
He hmeichhia hi ka thihna tur a nih hi.
"Ka Sihal nu tetakte, zu i ruih hian i lawmawm reuh tlat. Zu inpui tura la hruai chhuah ziah tur che a nih hi." Tiin dawhkan lam chu ka bana inzaina chemte chu ka la ta a. Tun hmain hmeichhia hi ka la date ngai hauh lo a, diktak chuan hmeichhia han date-pui chu ka hlau hial zawk a ni. Nawmchen dun hmaa nuamlo zeta hun kan han hmang dun tur vel ka ngaihtuah chuan min rap deuh roh. Mahse, Rebel nena hun han hman dun chu...a danglam ngeiin ka ring. Ani nen hun hmang dun tur anga ka inngaihtuahna chuan min tihlim hle a, ka ngaihtuahna chu ka dahbo leh ta thuai a.
"Thuruk ka hrilh thei che ang em, Dr Dante?" A ban ka zai tan mek tih chuan a rawn ti sar sar a. Silai mu chu lakchhuah awlsam zawk nan zau deuh zawkin ka zai kak a.
"Min hrilh tura zir a niang chu, amore." Inngaihtuah muk tak chuan ka ti a.
"Dante-a pangngai ai khan ka duh zawk daih che a ni." Nui ker ker chung chuan a ti a. A ban ka zai mek laia a lo nui ker ker thei chuan nge doctor anga min en vanga a mi ngaihdan a thlak danglam ta chuan mak min tihtir zawk hi ka chiang a ni.
"Oh, takzet? Eng vangin maw, ka Sihal nu tetakte?" Nuihzat taka tiin ka zai kakna laiah chuan tweezers chu ka han hawlh lut a.
"Ani ai khan i fel zawk daih a." A ti a, a la nui reng bawk. Mithmul san ak chung chuan ka melh ralh a.
"I ban thisen zam ka zai fuh teuh zia hi hria la chuan i thusawi kha i uluk sawtin ka ring." Ka ti fiamthu hluai a, a mitmeng buang uk khak nalh lutuk la melh reng chung chuan. A nui chhuak ta ar ar a, a nui ri, angel nui ri ang maia nalh chuan min tinui ve suk a.
"Mahse, Dante pangngai zawk kha chu a duhawm daih zawk. Mize inthlak thut thut leh thinchhe em em a ni a, mahse chuti chung pawh chuan a la duhawm em em tho." Rui zet hian a ti a.
"Engtik lai pawha thinchhe em em reng leh rilru thlak thut thut reng mi a nih si chuan, a eng lai chuan nge tiduhawm ta em em a?" Hrethiam lo zet chuan ka ti hu a, a ban atang chuan silai mu chu ka phawrh chhuak ta a. Engtin nge mi thinchhia leh rilru mumallo tak chu a duhawm theih zawk? Rebel-in a mi hmuh dan diktak a sawi chhuah chuan min tilunghnur ang reng hle a.
"A chapo a, engti kawng emaw tak hian a hma a sial hle bawk a, engtik lai mai pawhin a thinrim reng a, mahse chu chu Dante-a pangngai ti Dante-a pangngaitu chu a ni. Mahni a indahsangin midangin engtin nge an ngaih tih reng a lungkham hek lo. Miin insiam tha turin lo hrilh ta sela thlawkbo tura a hrilh loh leh an mit leh mit inkarah a kap pawp mai ang." Nui hak hak chung chuan a ti a. Ka chanchin a sawi duh dan chuan min nuihtir deuh huk a. Chu chiah chu a ni midang laka ka tihdan tur chu...amah tiam lohin.
"A nihna ang anga a lang chhuak thin hian Dante-a pangngai kha a tiduhawm tlat a ni. Mita kan hmuh theih mai piah lamah hian mize dang pawh a la nei ngeiin ka ring. Midang hmuh atana a phawrh chhuah chauh ni lo Dante-a pangngai mize pang khing lehlam chu engtik hunah emaw chuan ka la hmu ngei ang." Rui aw bah nuai chuan a ti a. Ka nui deuh thaw a, ka nui nasa lutuk chuan ka biang ki a tina thei hial a, mahse pawi ka ti hran lo.
A tawngkam chuan ka thlarau a hliau pha hialin ka hria. Tun hmain tumahin ka chungchang hetiang hian an la sawi ngai lo. Ka nihna ang anga min pawm tawptu ka neih pawh ka la hre hek lo, min rawn perh chiang kher mai. Mahse, harhfim laia ngaihtuahna hi ruih laiin an sawi chhuak thin a ni lawmni kha?
"Hmeichhe rilru kimlo i nih hi. Hlauhawm khawpa bawraw." Thut ngil paha melh vang vang chung chuan ka ti a. A hmel angel ang maia tha chu ka ngaihtuahna atang chuan ka paihbo thei lo. Kawng engkimah a danglam bik a ni. A ban atanga ka lak chhuah silai mu chu ka lek chhuak a, chik zeta a thlek lai chu ka lo thlir a, tray-ah ka dah ta a.
"Thil satliah leh pangngai hi chu kawngpui sialsa ang a ni a, a kawng zawh pawh a nuam a mahse, pangpar reng a tiak ve ngai lo." A nui seih a. Rui hle mah se Van Gogh-a thusawi chu a la rawn chham chhuak nalh hle.
"Han buai deuh nak nak hian nun hi a hlim zawk thin a ni, a ni lo'm ni?" Thui mawlh mawlh pah chuan ka ti a.
"Ka nuna ka thil tum chu hetia nun mawl tawp ni loin hriatna leh finna zawnga buai hi a ni. A nuam fe zawk bawk." Rui zet hian a nui hak hak a. A thusawi vang chuan ka lo nui suk a, a ban chu gauze hian ka tuam ta mawlh mawlh a.
"Hmeichhe dangdai tak i ni tih hi i hria ang chu maw?" Ka ti dam ruih a, a mit buang uk khak chuan min rawn melh ha a.
"Min hrilh a ka hre chiah." Tia a nuih her her lai chuan a ban chu ka tuam zo a, ka mask chu ka phelh ta nghal a.
"Ka lawm e, Dr Dante. Dante-a pangngai zawk hnenah khan kan inbiakna chungchang hi hrilh miah suh, i hria'm?" Tiin a tho chhuak phut a. A inpal tlu nghal a, a ban ka thuisak a sawh peh leh hma chuan ka lo dawm vat a.
"Tho rawh le." Tiin hneh zet hian ka pawm kang vaw a. A ban hliam lam chu ka kutin ka dawm a, a ban tha lam chuan ka nghawngah min kuah chial a. Ka awmah chuan a hmai a phum deuh kak a. A rim tui tak chuan ka hriatna thazam chu a fan chiai chiai a, amah pawm chiala awm chu nuam ka tih em vang chuan dan pangngai aiin ka kal muang a ni tih ka inhria a.
A pindan kawngkhar chu hawngin dimte hian a khumah chuan ka nghat a. Bual inah chuan ka va intifai puat puat a, amah endik tur chuan ka let leh thuai a. A sam chu chul hliau hliauin ka hmaa sihal nu tetakte, fing leh nalh chungchuang tak chu ka melh vang vang a. A kiangah zan khaw tlaitluan awm a, kuah vawng vawng reng mai ka duh mahse, a rui em mai a, chu chu remchanga lo hman ka duh lo a ni. Ka kut chu lasawnin kawngkhar lam pan chuan ka kal ta nghal a.
"Awm ve rawh, khawngaihin." A mit sen uk khak rawn men diar diar pah chuan a ti a. Ka lu ka bu nghat a, mal min sawmtu chu eng pathian pawh nise ka lawm. Ka kawr leh kekawr chu phelhin boxer nen chauh ka awm ta a. Khumah chuan mu ve nghalin ka sihal nu tetakte chu ka awmah ka pawm bei chial a.
"Ka mu ka thanharh hunah ka kiangah ilo awm ang em?" A ti sar sar a.
"I thoh har leh har loh azir a niang chu." Ka ti a, a tawngkam chuan min tikhawng nghal luh mai. Kalsan hi ka hlau a ni lo, ka kalsan phallo ang tih hi ka hlau zawk a ni.,.ka inthunun theihna ka hloh phah thei tih ka hriatna avang chuan min tihlauthawng a ni.
"Chuti a nih chuan ka kianga i awm chhung chu nuamti takin hun ka chen thei a nih chu." Tiin ka bawp chu a rawn kherh chial a, ka awmah hmai phumin min nul ne ne a. A chalah chuan dimtein ka fawp zauh a, he hmeichhe kianga ka hun hman second tin mai chu nuam hi ka ti hliah hliah.
Amaha eng emaw tak hian min tidanglam vek a, amah vangin ka rilru ka thlak thut thut a, ka thikthu a chhia a, ka thin a rim a, ka atchilh a, ka chhan a, ka mawl bawk. Amahah hian eng emaw tak a awm a, amah hi a lawmawm phian lawi si. A bula ka awm ringawt pawh hian ka rilrua sual awmte chu phuarin a awm phah a. Chu tia phuara awm chu a ni ka lo duh em em thin chu.
A chalah chuan ka fawp a, ka bana angel kuah chial chung chuan ka muhil ta siai siai a.
**REBEL SIMMONS P.O.V**
"H - honey, tun hi hun tha a ni lo. Kal rawh." Ka nu chuan min ngen a, a aw chu a hriat theih chang chang chauh a.
"Ah, Rebel. Kan engkim hre veki hrep chu. Ka hmuh duh tak chu i ni." Ka pa chuan a ti a, a tawngkam tinah chuan tihelna awka hi a lang chiang hle. Ka lama a rawn zuan phei zawk lai chuan ka nu chu a lo te tuar tuar a.
Bual in lamah ka tlan lut nghal a, kawngkhar chu ka inkhar hnan hmak. Pawn lam atang chuan a rawn chum bur bur a, kawngkhar thing chu a khi ruak a, a khuar deuh duk thei hial a ni. Tui khawihna hnuai chu ka va ban a, bleach leh ammonia chu ka la ta a. Ka t-shirt chu hlim chhoin ka hnar khuhna'n ka hmang te te a, chu chemicals chi hnih chu towel-ah leih pawlhin chloramine ka siam chhuak ta a.
A tawpa tawpah chuan bual in kawngkhar chu a thlawn ta hlawl a, ka pa chu bual in chhungah a rawn tlu lut thlawrh a. Towel chu la vatin a hmai tuamna'n ka hmang ta a, a tukhumah chuan ka rap bet ran bawk a. Ka ngalrek chu a ham buan buan a, min ham thi neu nuau a.
A tawpah chuan, a hrawk dawmin a thaw ta hrawih hrawih a. An mut pindanah ka tlan lut nghal a, kil khata ka nu nikhawhreloa lo let reng chu ka hmu ta a. Ka pa silai chu la chhuakin bual in lama ka kir leh hma chuan silai mu chu ka thun nghal a. Ka pa chu ka kuai thal a, towel chu ka la sawn ta a. Boruak mamawhin a thaw kawk kawk a, chloramine tur hlauhawm tak chuan a chuap lamah hna a thawk mek a ni.
A mitmeng sen uk khak chu melh vang vangin a hmaiah chuan vawi tam tak ka kap ta zawt zawt a.
***********************************
"REBEL!" Tia au tuarh tuarh pahin Dante chuan ka ban vai buan buan chu a lo dang a.
"Rebel, keimah ka ni e." Dante chuan a ti a, a hmelah chuan tawrhna hi a lang chiang hle.
Ka vuan chawt a, nghet takin ka kuah ta vawng vawng a. Ani chu a thu chhuak, ka inthlahdul theihnan ka sam chulin ka chalah min fawp mawlh mawlh a.
Italy ka thlen hnu hian he mangchhia hian min bawh buai khat tawh asin mawle. He hmunah hian vengtu ralthuam nena inralring reng leh mafia mi leh sa rorum tak tak an awm tih ka hriat vangin ka him hle niin ka lo inhre thin a. Dante lahin ka him leh him loh thlithlaiin zanlaiah min rawn enfiah ziah a, ka muhil emaw min ti thin a, ka lo la muhil ngai hauh si lo. Ka thawk a rawn pangngai leh tan chuan kan inkar boruak chu a reh tlawk tlawk a.
"Tu'n nge tina che?" Ka chala a fawh leh hma chuan Dante chuan a ti sup a.
"Tuma'n." Dawt ka hrilh a, ka hmai chu a awmah ka phum kak a.
"Rebel....,i muthilh hlanin i rawn au chhuak alawm." Tiin hnem pahin ka hnungzang chu a chul ruai ruai a.
"Min han hrilh teh. An hming min hrilh la he khawvel atang hian ka paihbo ang." Thutak zet hian a ti a.
"Mitthi tawh hnu chu i that thei tawh lo ang." Ka ti sap a.
"Mitthi khua atangin ka hruai kir leh anga ka that nawn leh ang." Tiin ka khabe hnuaiah a kut rawn dahin amah en tur chuan min kuai dak a.
"Ka nunna thapin ka venghim tlat ang che, Rebel Simmons." Ka mitah tak melh run chung chuan a ti a.
"Mahse, chu chu i hre vek tawh tho ang tiraw?" Tia nui sukin khumah chuan a mu thla leh ta a, a awmah chuan ka la bei chial tho a. Dak chhoin a khabe kuala hmul rawn to siar siar chu ka fawp zauh a, buk nghat pahin a awmah chuan ka bei leh ta a. Ka samah a rawn fawp a, mutchhuak chuan min rawn zem leh ta chiai chiai a.
***********************************
Khum ruak huai leh lum thur thurah chuan lu na tluk tlukin ka harh chhuak hlawl a, ka lu na lutuk chuan ka ban na kham urh pawh chu min hriatchantir lo hial a. Sana chu ka han bih zauh a, dar 11AM a lo ri tawh a. Hrilhhai zet hian khum khuhnaa a rim paa thung mai la chambang vang vangah chuan ka mu leh hnawk a. Min kalsan...leh ta.
Thawk hrawih pah chuan ka han thu chhuak a, ka khum bul dawhkanah chuan thil hmuh ka nei ta a. Ka mit nuai nawk nawkin ka han en chiang a. Huan atanga thliah hlim hlawl rose par tharlam sar mai, Advil's pathum, coffee no khu vat vat, tui leh lehkha ziak hi a lo awm a.
My little Vixen,
I thanharh laia nangmah chauha i awm tur hi pawi ka ti.
Vawiin nileng deuh thawin meeting ka nei a.
Zan dar 9 bawr velah ka rawn let leh ang.
Kan inhmuh leh hma chuan le.
D.
Chu a lehkha hnutchhiah mawlmang tak leh a thil tih dan vel vang chuan ka nui sak a. Joggers dum leh t-shirt fual haa inthlakin bookshelf lam chu ka pan ta a.
Hawkdak thil thu-ah, lehkhabu pakhat chu ka han keu a, thil inziak chu ka khaikhin vel a. Dante-a kut ziak ngei a lo ni. He book shelf-a lehkhabu tinah chuan sawifiaha ziakin a lo chhinchhiah thlap vek a nih chu. A fin zia chu makti takin ka ding ran a, chutah a hma ka lehkhabu chhiara note lo ziaktu ka ngaihsan deuh kha nitin maia ka ngaihtuahna luahtu hi a lo ni reng tih ka hrethiam ta a.
Kawngkhar chu rawn intheh hawngin phirte chu an rawn tlan lut nghal a. An sam senno chu hnawk niai hian an tawn bawk tawp a, min han hmuh chuan an hmelah thawven huaina hi a rawn lang nghal a.
"Shit Rebel! I tha chu ka va lawm em!" Natalia chuan min rawn pan hnai a, min rawn kuah nghal chawt a. Ka ban rawn na zawk vang chuan ka lo rum hak takah chuan min thlah ta vat a.
"I mawl lutuk." Isa chuan a laizawnnu lu chu dimte hian a beng thak a.
"Ka ngaihtuah em a ni. Kaithotu apiang che chu Dante lahin kah-ah a lo vau bawk nen. Darkar eng emaw chhung kha chu i pindan kawngkhar hi ven pahin phone a hmang char char a, silai a chhawp run bawk si!" Natalia chuan a mithmul kual nalh zet chu min san khum ak ak a.
"Nia, eng vanga khatia ti nge a nih a?" Isa chuan chair-a thut pah chuan dilchhut tak hian a ti a.
Ka hriat theih chin chin chu ka hrilhfiah nghal a, ka pa thihna chungchanga ka mangchhia vanga ka bula riak ve ta mai a nih thute.
"A nih leh, 'Dr Dante' tia i koh laite kha i hre tawh miah lo maw?" Sual hmel zeta nuih rawh rawh pah hian Isa chuan min zawt a.
"Maw?" Ka ang phiau hian ka zawt a.
"Kan lo ngaithla ru emaw ngaithlaru lo emaw a ni mahna." Natalia chuan a dar a chhin ak a, kei chuan lukham chu la lawkin ka va vawm ta a.
"Ngaithlaru emaw ru lo emaw tih awmzia chu engtik lai pawh khan kan ngaithla vek a ni." Isa chuan min nuih sawng pah hian a ti a.
"Chu chu thian tha zia a ni zawk." Tih pahin Natalia chuan a hmai lama lukham thlawk phei chu a kutin a lo dang a.
"Dr Dante ti khan i ko deuh chhen mai a." Dar san ak pahin Isa chuan a ti a. Nizan lam khan thil zahthlak tak tak ka lo sawi lo kha ka lawm leh hnuhnawh a nia aw.
"Chu zawng chu maw?" Ka han ti a.
"Oh, eng vanga Dante-a duh em em nge i nih tihte kha i sawi mial maithei a ni. Dante hnenah chuan Dante pangngai zawk hnena engmah hrilh lo tura i intiamtir hnuin i tho chhuak a, i tlu ta a ni." Din chhuah pah hian Isa chuan a ti a. "Engmah thil thalo a awm love." nuihza insum tak chuan a ti a.
"Isua krista! Zu ka in tawh ngai miah lo ang." Tiin ka hmai ka hup a.
"I awm a tihnawm phah takin, Dante chu zing tluanin a hmel a engin ni dang zawng aiin a mood a fuh khawp a nia. Min thah vekah min vau tih mai loh chu." Natalia chu a nui hawk hawk a. "Nangmah vang veka chung thil chu thleng a ni." Ka mit chu ka lo meng ralh ralh a. Dante nena kan inkar thil thleng chu ka ngaihtuah chhuak fumfe hlei thei lo, he lu na tluk tluk lah hian ziaawm lam a pan der bawk si lo.
"Thawmhnaw ha rawh, christmas bazar kan nei dawn!" Din chhuah pahin Isa chuan a ti a. Ka mit chhin pah chuan ka han rum hak a.
"Kar kalta mai khan kan bazar tawh a ni lo'm ni?" Ka ti a.
"Ni e, mahse kan thil lei zawng zawng kha kan duhzawng vek a ni si a, keimahni'n kan nei vek dawn a. Midang pek ve tur pawh kan nei tawh hleinem." Dar chhin ak pahin Isa chuan a ti a. Zep neiloa a thusawi vang chuan ka lo nui lo thei lo.
Ka inthlak sawk sawk a, kawngkhar pen chhuah pah chuan Dante-a lehkha min hnutchhiah chu melh zauhin ka nui ta sak a.
@@##@@
He thawnthu hi i ngaina a nih chuan khawngaih takin ads kha min lo click sak hram rawh u aw. Ads min click sak vang khan net pack man kan lo neih ve phah thin asin. Net pack neih loh chuan thawnthu a post theih bawk si loh a..
