TRUE LOVE CHAPTER - 24 By : Tom Tom Putara

Episode kal lai dah luhna

Moderator: writers

Tomtomputara
Posts: 159
Joined: December 3rd, 2021, 1:17 am

TRUE LOVE CHAPTER - 24 By : Tom Tom Putara

Unread post by Tomtomputara » October 4th, 2022, 8:36 pm

TRUE LOVE
Chap~24


By : Tom Tom Putara






Motor horn ri tuarh chuan min ti harh zawk a, ka harhchian dan chu chiang tak a ni. Ka ṭhu ngîl zawt a, "A va fimkhur lo tak...kan in su ṭep alawm," ka pa in a ti nuah nuah chu ka hre nghal zat bawk. Ka mumang mai a ni tih ka hriat rual chuan ka thaw huai thei!




Kalsan ka duh lova, ka ngam hek lo. Ka tel lova nun hmang tur in ka duh lova, ka mumang chhe zet ka ngaihtuah thlen rual erawh chuan ka inrintawkna zawng zawng te chu engmah lo anih theih zia erawh ka chiang viau bawk.




Motor seat hnung chu ka ngheng zui nghal chawrh a. Rang takin Glass-ka tihniam zui zat a. Ka dakchhuak deuh a, boruak thar chu ka hîp zui vang vang a. "Misualpa....i ṭha ti raw? Mumangah lehzel chuan hlauthawng in min siam tawh suh," ka ti rilru neuh neuh a.




Tluang tak in aizawl kan thleng a, kan indah fel meuh chuan zing lam dar 2 a lo ni duai tawh. Kalkawngah kan hmanhmawh loh bakah kan tluang lo neuh neuh nen kan thleng tlai ta hrep a. Motor chuan chauh nen ka intleuh sawk sawk a, mut hahdam vang vang ka chak ber.




Ka zing tho chu ka rit bur mai, ka hritlang dawn aniang ka pik ṭûp a. Ka hmai phih zo ka in en chu ka mit te a lo sen râm a, ka hrawk lah chu a thip hlar bawk. Ka chhuak phei chu ka nu te pawh an lo tho daih tawh tih ka hre nghal. A chaw chhum a phit sûr sûr a, ka pa in a bulah dawhkan kîlin Chanchinbu a lo bih bawk. Chair pawt chhuak in ka ṭhu thla hnawk a, Dawhkan ka bawh zui zat.




"I nuam vak na nge Naute?" ka pa in ka pang dekin a rawn ti zui vat a, ka bu nghat. "Nizan kan tlan thaw rei si, boruak dang in hîp thut nen i hritlang dawn anih kha," ka nu pawh chuan a rawn ti nghal thuai a. Damdawi eitur te min lakin ka ei nghal a, ka nuam lo takzet.




Tukṭhuan kan eizawhin ka nu School a kal nghal a, ka pa pawh Office dawr a ngaih avangin a zui chhuak ve nghal. Mahni chauh in ka awm a, ka nawmloh em avang chuan inkhar khum in ka mu ta daih, mu ila ka harh kâwk in ka ring.




Doorbell ri râl râl chuan min ti harh zawk! 'Ka pa lah a rawn haw a la hun der si lo' peih lo tawk chuan ka chhuk thla ta vat a, a ri chu a chawl lo rêng rêng. "Ka lokal,mawlh mawlh a," ka ti phei hlak hlak a. Ka hawng chiah chu Zoramsanga lo ding reng nen chuan kan inmelh chiang ngang mai.




"E he..chhun chhun ah," ka lo ti hâw chu, nûr nûng in min melh a. "Khawnge i phone, i la thei bawk si lo," a rawn ti chhum hmuk chu ka inthiam lo ve deuh. Ka mut dawn khan ka silent ta daih kha a nia. Ka tawlhsawn chuan a rawn lut ve mai a, a la tum hmuk tho.




"Khawnge i phone chu?" a la ti hram, thaw hak in ka room ka pan nghal a. Ka phone ka'n en chu min rawn call na vawi sawmhnih chuang a lo awm! Nimin piah zana kan inbiakna bak kha kan la inbe miah lo, kan in text hnuhnung ber ṭuma a lungawi lo deuh kha ka thlem a beisei deuh aniang. Ka be hmasa bik ta silo, ka tum rûk dan kha a ni bawk a, ka inthiam lo duh ta lem lo.




Living room ah chuan a lo la ding reng a, min melh dan chu zawhna a ngah hmel kher mai. "I ding reng dawn em ni?" tih liam puat pahin ka kal pel a, ṭhutna ah chuan ka ṭhu thla zui zat. Thaw chhuak hawkin a rawn phei ve mai, ka ep chiah ah ṭhu in a khup chungah a kiu a nghat a, min melh vung vung hnu chuan, "Lungawi lohna i nei em?" tih pahin kut pahnih chuan a hmai chu a tuai puat a, ka ti mah mah deuh hial in ka hria, lungawi lo ru zawk niin chanchin engmah ka hrilh mumal hek lo; Mahse, ka lo dawnsawn danah a in sûm ta zawk tih a hriat reng.




"Nizan kan tlân thawlêng rei lutuk a, ka nuam chiah lova, phone ka lo ngaihven lo a nih kha," ka tih chuan, "A hma ni khan?" a rawn tih zawm hmuk a. "Engnge?" ka ti liam leh mai.




"Lalruatfel, ka bia che?" ti hrâwk in ka phone thai kual sek chu a rawn phih thla sawk a nih chu! "Engnge i hriat a?" ka ti vîn hlar a, a kekawr ipte ah a ak zui hmak. Ka melh zui nghek chu a lo nui suk ringawt.




Ka bulah rawn in sawn phei in, chik zet chuan min melh a. "I khua a sik tel em?" tih pahin ka pang a rawn dek zat a. "Damdawi ka ei a, ka zia tawh," ka tih chuan ka bek ah a hmui lum ther ther chuan min rawn nawr vang vang a, ka kut chu rawn la in a fawp zui zauh a. "Min tih hlauhthawn zia i hria em?" tih pahin a thaw chhuak zui suai suai a. A lam hawia in her rem in ka melh let kar a.




"Engtik lai paw'n min ti hlauthawng zawk tawh tih i hria em? I nun chauh nilo ka nun thlengin a hah in a buarchuar nuaih a, ka dinhmun khirh zia leh harsat tur zia te hi i chhut ve ngai em? Kan hma hun ka ngaihtuah in a thim a, hlauhna in min chen chilh reng asin," ka tih melh melh lai chuan ka kut chu a hûm nghet ṭha kher mai.




In sûm duh lovin zan lama ka mumang nen lam chuan ka hrilh lui ta vek a, ka sawi chhung zawng chuan ngawi ngulin ka kut chu a lo hmer nghet in a na lek lek hial zawk.




"Ka chanchin i hriat loh vang leh call ka lak theih loh avang ringawt pawhin i buai a tiraw? Ka mumanga mi ang kha thleng thei a ni asin.....thleng ta se?" ka tih leh rual chuan, "Duhtawk rawh, sawi tawh suh," a rawn tih chhuak hrâwk a. A inseh ruh leh nghal tlat tawh. 'A thinlunga a duh leh a thlan hi engnge a nih? Atan engnge anih?' tih hi a hriat a ngai miau, ka hriattir zel bawk ang.




"I thil tih hi nuam i ti em ni?" zawhloh ka tum viau a ka lei ka veng hman lo. Min rawn melh zawk a, thawchhuak hawk in hmalam a en leh nghal a, ka en ngawih ngawih tawp mai a ni. "I inchhir tawh ngai em?" ka ti leh sap a, a rawn nui huk. A za lo hle tih erawh ka hria.




"I la ngaihtuah ngai miah lo tiraw? Ngaihtuah tur in ka duh che, ka hmangaih che Ramsang.....a awlsam lo a ni thei. A harsa viau ang, vawilehkhata thleng thei nghal mai pawh a ni lo; Mahse,i tum a ngai,tum rawh aw,i beih luih fan fan chuan kawng chu i zawng hmu ngei ngei ang," ka tih zawm leh mawlh mawlh a.




Min rawn melh vung vung in, "Ka phu lo che tiraw? I thianghlim mah mah a ni," a rawn tih lai chuan a mitah tak ka melh let ve ngar a. A mitmeng a beidawnna, hrehawm tihna te chu ka hmu thiam lutuk mah mah; Mahse, hei hi ka duh ber a ni lo, a beidawnna leh hreawm a tihna hi bei let a hneh zawk tur in ka duh a ni.




Ka nu in kan unau min zilh fo na ṭhin chu 'Mi tam tak kan hlim loh chhan chu thil awlsam leh remchang chauh kan zawn ṭhin vang a ni. Chu chuan kan nun hreawm ah a siam a, harsatna tel lovin engkim neih kan tum a, kan tana ṭha lo kan thlan phah fo a ni' a ti ṭhin. A nunhluia a hun tawn kha a harsa ang tih ka hria; Mahse, a aia harsa leh ṭha lo zawk a thlang tih hi hrethiam se ka duh takzet.




"Thingpui in ang aw?" ka tih chuan lu thing nghut in, "Ka phei zawk ang, Bsa'n haw hma a duh a, a nu a rawn chho dawn a," tih pahin ka phone a ah chu min rawn pe a. "Biak theih in awm tawh rawh," tih pahin a ding zui zat a, ka thawchhuak hak. A la in kharkhip in pehhel phet a tum tlat zel.




Kan inthlah lai chuan Muankima rawn len luh tum ni ngei tur nen kawtah kan intawk a. "Ka rawn leng dawn, zana hla zir turin ka rawn sawm pah ang che ka tia, chhuah i tum em ni?" tih pahin min melh tawn a. "Lo va awm rawh, ka lo lut ang," tih pahin ka nuih var var a, a kal nghal mai.




Zoramsanga hmel ka en chu Muakima a lo thlir ve vung vung a. "Zanah kan lo leng dawn, i dam loh kha," tih pahin ka chhânna pawh nghak lo chuan Car- ah lut in, a tlan chhuak nghal. Ner nâwng in ka thlir liam ta ngawt a. Muankima a thîk deuh tih a hriat reng. Hla zir pawh ka tum reng reng lo, ka hrawk thîp nen tum chi pawh va ni suh!




Muankima chu a leng rei ta vak lo, "I nawm loh hmel em mai" tiin min chhuahsan zui a. Hla zir a sawm chi ka nih loh zia pawh a hrethiam ve nghal mai. Ka nu rawn haw hma a, a haw hman hlauh chu a tihzia. An titi tui leh dawn lutuk a, tun dinhmun ah chuan ka ngaithla chak hrih lo. Ka nu damdawi min pek chu ka hmawm leh pawp a, ka mu leh nghal tawp.




Ka harh chuan khua a lo thim lek lek tawh. Ka nu School bângin min rawn en thli thlai tih pawh ka hre rei ruai. Ka tho chhuak a, ka pik telh telh in ka hre mai, ka hrawk te chu a thîp hlar tawh.



"I rawn tho peih maw? Ka lo haw in ilo la mutui lutuk a, engnge i an?" a lo ti thuai thuai a. "Ka hrawk a na," ka tih chuan, "Tuilum chi al ka'n siam ang che. A zia deuh mai ang," tih pahin a che zui sawk sawk a. "Phone ila thei lo a tia....Brenda-i'n ka phone ah a rawn phone kha, va be rawh," a rawn ti zui leh a. Ka inthiam lo nghal zat, ka biak tlem zia leh ngaihsak lo min tih dan tur ka ngaihtuah a, 'a rawn vui paw'n ngawi reng ila a ni mai' tih te thleng thleng chuan ka ngaihtuah hman vek.



"Aw..Mate," a lak rual in ka ti nghal zat.



"I chhe lutuk, min rawn tlawn vak suh. Ka ngei daih tawh che, a la reh lo bawk aw," ring leng lawng chuan a rawn ti nghal vak bawk a, a la ring ṭha em mai, a thinrim tawh lo deuh tih ka hrethiam nghal.



"Sorry lutuk...kan Champhai kal haw ka nuam lo char char a, min rawn kan zawk rawh," ka tih chuan, "Champhai te kha ka kal ve chak asin. Min sawm ve ta che, i mak lutuk. Zohmelseka bak i ngaihtuah lo," a la rawn tih tân tân chuan ka nui tawp tawh. "A mimal taka induat reng te kha a ṭul lo aw," a la rawn ti hram chu ka bulah awm se chuan ka chûm pawp duh ang.



"Zanah min rawn kan ru Lalrohniam-a nen," ka tih chuan a rawn nu zui uar uar a, a thinrim hi a rei lo thei nia.




Zan riah pawh chu tih tham ka ei mang lo, ka pa in a tuka in entir ngei ngei tura min tih pawh chu ka chhâng lem lo, a hun thleng phawt teh se. An ngaihṭhat nan in entir an ti leh ṭalh dawn tih ka chiang viau, ka nu in in steam na tur min siam sak leh bawk a, ka hrawk pawh tlem chuan a zia ta deuh.





Puan nuam nen sofa ah ka in zam hnawk nuaih a, ka nu leh pa pawh Chanchinthar an en tui viau bawk a. "Ei châk i nei em? Hla chu lo zir suh aw? I dam loh kha, i dam hunah hla chu i zir dawn nia," Zoramsanga message ka chhiar chu ka nui chhuak ṭep a ni. Muankima'n min rawn sawm tih a hriat mai vang a, In a min awm tir dan tur a lo ngaihtuah ve nasa lutuk chuan ka nuih a ti za in amah nen a in hmeh hlawl lo. "Kâwna Pani Puri kha lo lei rawh," tih ka thawn let ve nghal a.




Kan ṭhian thum group ah chuan ka lut a, a lo tlar leh put tawh! Pathum lek kan awm a nia.


"Lalrosang vawiin a i phone lo chhâng tu kha tunge?"


"Ka cousin"


" I cousin zawng zawng ka hre vek tawh aw.....a thar puitling sa an lo pian belh thut em ni?"


"Kan ṭhenawm nuthlawi kha nih dawn chu...."


"I phone kha naktuk nilengin Ni sa ah pho la, Sanitizer in hruchhuak leh vek bawk rawh"




Rsa leh Brenda-i an lo inhnial leh char char tawh, an peih ve chiang a nia. Private hian an inbiak ngai pawh ka ring lo, group ah hian inbia in an inhnial a, an inchhaih a, a tawp ah tu emaw zawk zawk an titau leh a, an inhmeh tih bak hi endan vak pawh ka thiam lo.




Doorbell a rawn ri ral ral a, ka nu chuan a lo chhâwn thuai. Zoramsanga lo lut chu ka lo melh kar, a in thuam dan zawng zawng nen ka lo melh chuak dap chu mitko min rawn sân khum ûk in a rawn nui suk a. Ka harh chhuak zawk, ka mawlzia ka inhrilh nghal mawlh mawlh bawk. Ka bulah ah rawn ṭhu ve in a thil min rawn ken sak chu min pe nghal a. "I van fel tak, ka kâ a tui lo lutuk a, hei chiah hi ka rilru ah a awm," tih pahin ka tho a, bowl la turin Choka lam ka pansan nghal a.




In chawi pheiin a bulah chuan ṭhu leh in ka ei nghal pâwng pâwng a, min melh nasa lutuk chu a hmui bulah bowl ka va lek phei a. "Ka duh lo, ka ten," a nûr nung chu ka nuih hak hak a. "A tenawmna awm lo chiang e," tih pahin ka hmawm leh hmak a. A hawisawn rang ngang mai.




"Vai kut dum deuhin an hmet nawk nawk lai hmu la i ei tuam tuam lovang. An kut balh leh fai pawh a hriat loh a, an hmeh zawngin an kut kar aṭangin a lo chhuak pár pár bawk a," a sawi zawng te chuan a la ner nasa.




"Hei te chu mizo siam a lawm," ka lo ti ve nghal zat. "Mahse, vai kut hlir ka mitthla ah a cham miau a," a la ti. A ṭang na ve ngâng ngâng lutuk chu ka nuih tawp tawh.




"Bs-a nu chu a lo chho ta em ni?" tih pahin ka melh zauh a. "Aw, a rawn awmpui ve zuai hrih ang," a tih chuan ka lo bu nghat a. Ka nu te ṭhutna lam ka va hawi chuan Ramsanga a lo melh vung vung ka hmu a, ka ngaih a ṭha lo nghal. A rawn luh aṭangin ṭum dang ang lo takin a la be mumal lo tih ka hrechhuak nghal zat bawk.




Ramsanga pawh chuan a en nasa lutuk chu nuam a tih loh hmel kher mai. A phone chu a bih leh zauh ṭhin a. Kan boruak rit ru ta riau chuan ka awm a ti nuam lo nghal vek thei. A belhchhah zual turin Chanchinthar a an ruihhlo man thu an rawn puang chu ka ṭang nghal ṭeuh a.




"A ti duh leh leitu tur an awm chhung chuan a rem dawn lo. An hralh thei a, an hlawk a, tu in nge bansan phal ang? Demand- a sân chhung chuan thuhmun reng an ni," ka nu chuan a rawn sawi zawm nghal zat bawk a. Ramsanga chu ka melh vat a, hnuailam bihin a kut a lo hûm ruh ngawt ngawt a.




Ka pa phone chu a rawn ri zui ral ral a. "Aw...Mama, a ṭha....rawn ngaihtuah suh u. 'Natukah in entir hrim hrim se' kan tia law'm.....aw...aw.." tih mawlh mawlh pahin Phone chu ka nu a pe nghal a. "In ṭha em Mama? I ṭhianpa Ramsanga pawh a lo leng a hei..." tih pahin kan lam a rawn hawi nghal zat a. Zoramsanga en reng chung chuan a 'aw' mawlh mawlh reng a. Ramsanga hmel ka melh zawk chhung chuan nuam lo a tih hmel in a inthlahrun hmel tawh kher mai. Ka nu awm dan teh thut chuan ka ngaih a ti ṭha lo in ka hlauthawng nghal em em ringawt mai a ni.




An inbiak zawh chuan ka pa in mut a rawt a, ka nu erawh ka ngaihbel nge a rilru chu a buai hmel in ngaihtuah na tam tak seng hmel a pu a. Room an luh dawn thleng chuan a rawn melh leh zak zak reng a, an kal liam hnu chuan ka ṭang lutuk chu ka thaw chhuak halh a.




Zoramsanga lo nui huk chu ka melh nghal vat. "Engnge?" ka ti nghal haw a. "I hriat kha," tih zawngin min chhâng. Duhkhawp lo viau mahila ka nu nungchang in thlak thut a sawina a ni tih chu ka hrethiam ve reng.




Sawi tur avang kher mai, ṭum dang angin a kut a hlei lova, awmdun reng chung chuan ngaihtuahna hran ve ve sengin kan in pawh lo hle. Kan ngaihtuahna erawh a in hlat hauh lo ang tih ka chiang viau bawk.




"I ngawi reng a, a nuam lo. Ka nu vang kha nge?" ka ti chhuak tawl. Ka in sûm hman ngang lo.




"A thiam loh a ni hlei nem....a tih tur dik tak a ti anih kha," a rawn ti chhuak hawlh a. Ipik hmel fe in a thaw chhuak nghal hawk bawk. Engnge sawi tur ka hre tawh lova, amah ni ta ila nuam ka tih bik loh tur zia erawh ka hrethiam hle thung si. An fapa ṭhianpa anih mai piah lamah a hma zawnga a lo leng pawh ṭha takin an lo dawngsawng a, zanin an awmdan chu ngaihṭhatna tur a awm lo ve chiang em a ni. Ka ngaihtuahna in ka chhui zawn thlen phei hi chu nilo se ka ti takzet. Chu thil chuan awm nawm lohna in min rawn tuam nghal hlup hlup a, duhlo engang mahila kan hmabak a ni tih erawh ka chiang hle thung si.




A haw dawn thleng chuan kan boruak chu a nuam lo in a rit em em ringawt mai a ni. Kawngka thleng ka thlah a. "Pawn chu thli a tam, lo chhuak suh," tih pahin ka bek tawn tawnah a rawn chelh a, ka lo melh chho ve kar a. Rawn kûnhniam ruai ruai in ka chalah a chal a rawn nghat dawt a, kan inmelh hnai kher mai. A mitmeng thûk taka khawharna chu ka hmuthiam lutuk mah mah, a hmel inthlahrung leh inkil tawih lutuk mawlh hi ka hrâwkah hnawh tu a rawn awm a, lainat lutuk in ka melh ngawt ngawt ringawt.





Ipik hmel zet chuan a rawn thawchhuak hawlh a, a thaw lum huam chuan kan hmabak pik zia min hrilh ni maiin ka hria. Ka chalah ah a hmui vawt thler chuan a rawn nawr vang vang a, a thaw ham ham reng chuan min titawt hluah hluah. Nghet zetin min kuah leh vang vang a, "Ka hmangaih che," harsa tih hmel fe hian a rawn tichhuak ṭuak a, nghet zetin a kâwngah ka lo kuah lêt ngawt ngawt a. Engmah kan sawi lova, hahdamna hmuh erawh kan tum ve ve tih chu kan awmdan ah chuan a chiang viau. Min thlah in, "Muttui....ka lo bia ang che," tih pahin chak takin a pên sawn nghal pâwk pâwk chu mittui tling pam in ka thlir liam a, ṭah hawm hawm ka chak lutuk chu ka hrawk ah hian min hnawh na kher mai. Thaw chhuak ham ham in ka lut zui nghal.




Ka room lam panin ka lut a, kawngka ka hawng chiah chu ka phu nasa kher mai. Ka âwm dawm vang vangin, "Engnge? In mu tawh emaw tia?" tih pahin ka khum a ka nu lo ṭhu ngawi reng chu ka melh phâwk hle.




"Lo ṭhu teh, in be lawk ang aw?" tih pahin a ṭhutna bul chu a bêng thak thak a. Tîm dai chuan ka pan phei chhat chhat a, ka ṭhut fel hnu chuan ka kut ah la in a hûm vang vang a. A awmdan chuan min ti hah hluah hluah.




"Kan chhungkaw boruak tehnuaih avangin ka lo ngaihsak tawk lo che a, i û te thusawi pawh ka lo ngaihtuah zui ngai lova; Mahse, ka la tlaichhe love," a tih lai chuan a sawi tur ka chian em avang chuan ka lo inseh ruh in tlanchhiatsan daih theih se ka ti.




"Ramsanga kha damdawi a khawih tiraw?Kalsan rawh naute....i û te'n an sawi kha a dik, i hma hun tichhe suh," a rawn tih lai chuan ka mit ka chhîng sawk a, duhlo lutuk in ka Lu chu ka thing zui nghek a.




"Tum duh suh, ka tawrh ang hi tuar turin ka duh lo che. Harsatna tlanchhiatsan a in hnem nana thildang hmanga harsatna hmachhawn ṭhin mi chuan a ngaiah bawk kual an duh leh ṭhin. An rilru in tum mah se kawng awlsam lam chu a tawpah an thlang leh fo ania, ka nun hi en rawh. Hlim tura ka kalkawng thui zia leh bumboh zia hi..... Heng hi i paltlang ve kher a ngai lo. Tunah ila tlai hma hian kalsan rawh," a tih leh rual chuan ka mittui chu dan tumin ka khap per sak sak a, sawi dikloh a nei miah lo chuan min tina zual sauh thung si.




"Ka lo ngaihsak tawk lo che in ka enliam rei lutuk che a. Ka thiam loh a ni e, i u in min rawn Phone khan in ngaihtuah harh nachang ka hre chauh a ni. I u te hian an enliam mai mai dawn lo che tih hre bawk la,3rd Sem aṭang phei chuan an bula kal zawm tir tur che in thutlukna kan siam tawh," a rawn tizui leh phei chu hrilhhai lutuk in ka melh ngawt ngawt tawh.





"Kan hmangaih vang zawk che tih hria la, ka thusawi kha ngun takin ngaihtuah ang che. Kan dinna ngaiah kan ding reng dawn i chhungte hi.....chuvang chuan min nawr lui suh," a rawn ti fiah leh fak a. Ka nu ze pakhat a tih tawh loh lama nêkluih chi miah loh, hmeichhe luhlul leh tumruh tak a nihna chu min hmuhtir nghal zat. Ngawi rengin a chhuak a, kawngka a khar fel chiah chu ka ṭap chhuak nghal hawk.





Sawi dik loh pakhatmah a nei lo lutuk chuan min tina zual a. Pawm harsa erawh ka ti em em lawi si. Zoramsanga hmel ka mitthla a, min mamawh ngawih ngawih niin ka hre tlat tawh si. Ka nun erawh kil tinah dan chêpin a awm thung a. Atan hian ka huaisen in ka chak tawk zo angem? Khur thûk thim takah min hruai lutin keimah chiah in min hnutchhiah ta si se...





Hlawhchham hlauhna chuan min rawn tuam a, engmah ngaihtuah zawm ngam lovin hlauhna avangin ka khûr a. Hlawhchham hlauhna avangin ka ngaihtuah thui ngam hek lo, hlauhna chuan kal zel tura ka ke pên ṭhinna te hi an pawt lêt rawk rawk in ka hre hial bawk.




Ka hlauhna chuan engmah ngaihtuah zawm ngam lovin min siam a. Ka ngaihtuahna chu an rawn luah tup tup a. Ka hlau a, ka zâm takzet a ni. Mitchhing in ka dâk vang vang a, a hmel inthlahrung tak leh a nun ruak tak te ka ngaihtuah chhuah leh chuan ka mittui chu a rawn luang ngiai ngiai a...





(to be continue......)


Ads khu min lo click sak ve hram zel dawn nia...👇🏻👇🏻👇🏻 Ka lawm viau ang🥰🥰🥰



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)