MS

Episode kal lai dah luhna

Moderator: writers

Cck Lalchhuanawmi
Posts: 323
Joined: August 5th, 2022, 8:54 pm

MS

Unread post by Cck Lalchhuanawmi » October 5th, 2022, 8:01 pm

♡MS♡
Bung Ngana Last
Ziaktu: Cck Lalchhuanawmi


Ka u bulah chuan loh thei loin ka hrilh ta vek a, " Ka naute khawngaihthlak", tiin min kuah vawng vawng a.

Ka lungchhe zualin ka u âwmah chuan ka ṭap hawm hawm.

" Ka u, Msan a hre miah lo nia ka hmangaih tih hi, ka u... lo len ringawt a tum a",

" A pawi lo nia, i duh chen chen ṭap rawh. Lâte, i u ka awm hi lungngai miah suh aw", ka u âw dam thlup chuan min tithlamuangin ka him hliah hliah hian ka hria a.

Dan pangngai thoin college kal a ngai a, ka nu leh pa hmel hmuh pawh ka hreh vek tawh, " Khati khan awm suh, i tana ṭha tur vek a nih hi", ka pain a tih chuan harsa ti tak chungin, " Awle", tiin ka lo chhang a.

Ka ṭap dawna ka hriat avangin, " U, pawnah ka lo nghak ang che", tih leh chhuah ka rual nghal.

Ka u chuan uAngaihi bulah min dah a, uAngaihi pawh chuan min hrethiamin min hnem reng a.

Mahse, ka zak deuh hlek; nula pumpa tianga han awm chu, " Lâte, a pawi miah lo nia, inthlahrung reng reng suh, i riak daih dawn nia, i pa chu ka lo bia ang", dam diaiin uAngaihi chuan a ti a.

" Captain Underpant a chhuak", tiin, Bawihtei a au vak vak a, a nau Tlantea pawh a zuang awr awr. Upuia erawh a tum deuh bar a, Captain Underpant tih tawh hi chuan a ngaihdan hi a pel tlat zel.

" Kan Professor Madiki nen an inbe ve ṭhin awm sia, i la thik ṭhin em?", ka zawhna hi a mak thei nia, ka inthiamlo hnuhnawh chu sehchilh deuh takin, " Ka tihpalh lutuk, ka rilrua awm hi ka zawt leh tawp zel che a", ka ti a, zawhna awm lo pui pui hi ka zawt ṭhin a, eng nge maw ka hriat ṭhin ni.

UAngaihi chu a nui deuh saih a, " A chang chuan thik ve ṭhin tho, mahse; tunah chuan ka unaunu a ni tawh a, a chungah ṭhat ka chhuah phawt chuan engtinmah min ti bik dawn chuang lo tih ka hria a. Bakah ka ngaihtuah hian kei ai pawh khan a khua a lo harin a nun kha hrehawm a ti ve ṭhin ngawtin ka ring a ni",

" In sawi dun tawh em, video chungchang vel kha?",

" Sawi tawh e, mahse", a thaw halh a, " Ngati nge khatiang khan uPuia kha a awm kher tih hi ka zawhna a ni fo, a tir te aṭangin mim hrilh se ka ti ṭhin, khatiang natna zozai kan tuar lo tur. Ka ngaihtuah chang chuan ka thinrim leh thut ṭhin, mihring ve tho ka ni a", uAngaihi chu a nui sen sen a, " Mahse maw, khang thil ngaihtuah chhuah leh ṭhin a, thinrimna leh thikna tihharh leh hi ka duh lo, chuvang chuan ka ngaihtuahnaa a lo luh pawhin thildang ngaihtuah ka tum daih zel.

Kan tun hun leh a nakin zel hi ngaihtuah ka duh", uAngaihi chuan a ti dap dap a.

Ka zahin ka ngaisang thar, " Nangmah ang nih ve ka duh ngawt mai",

" Chuti maw, kei ai pawhin i chakin i huaisen a i tawrhchhel zawk alawm", ka va kuah a, ka tan hian a va hlu tak.

" Lâte, i hria em, ka nu chanchin hi hriat ka chak ngawt mai. Khawiah nge a awm ang a, a dam ṭhain a hlim zel ang em tih ka hre chak takzet a ni, eng mi pawh ni mah se, ka nu a ni tlat bawk si a, ani lo chu nu dang ka nei si lo", uAngaihi chu nghet takin ka kuah a, kan pahnih chuan arukin kan ṭap dun tlawk tlawk a, ka thinlung chuan Msa a au a, uAngaihi thinlungin a nu a au bawk.

Thinlung pahnih khawhar, hnemtu ngai; muantu tur te erawh kan ban phakah an awm si lo!

Ka u pawh hian tihvak ngaihna a hre lo, min ṭanpui turin inngaizawng kan ni bawk si lo.

College kal pah hian ka u nen kan sawi dun ṭhin a, " Msa ka hrilhsak mai dawn che mi", tiin min fiam leh zeuh ṭhin a, " I ngam lo tih ka hria lawm",

" Ka farnu tan chuan engpawh tih ka huam", nui saih chunga ka kut rawn vuan chungin a ti ṭhin bawk.

Kan unau pawh kan inpawh sawt ni ber, ka nu leh pa lak aṭang erawh chuan ka hla tial tial thung.

Duhawma a rawn lawr zuk zuk reng bawk a, hman zana thil thleng avang khan ka huatna hi a la reh thei lo.

Ka nu leh pa lahin an lo be ṭha thei si.

Inrinni zan a ni a, class-12 reunion neih a ni dawn, ka huphurh lutuk ringawt, Duhawma a kal ngei dawn a Msa pawh.

Alex-an min lo hruai a ka uin, " Inchhung thleng lo thlah leh rawh aw", a ti chu ka melh ralh a, ṭul lo thei lutuk.

Ka nu leh pain Duhawma ruala kal turin min ti a, ka uin Alex-an min hruai leh thlah leh nghal tur thuin min lo chhan a, an remti ve mai.

" Sangsangi(Sawngi) Kulikawn lamah ka va kalpui lawk ang a, in zawh hunah min lo hrilh mai dawn nia",

" Awle, fimkhur deuhin aw", ka kut ka vai a, " Lâte?", ka lo nuih hlawm a, ka mi hmuh hreh ber mai pawh a lo ding khiau tawh, Zoan min lo nuih vur vur mai bawk.

Ka mi hmuh duh loh ber pawh a lo thleng ve nghal.

Kan inhmuh khawmna hmun hi Chhinga Veng lam daih, hla veng veng tak a ni.

School kal ho lai sawiin kan ri chel chul a, keipawh chu engthawl takin ka nui vak vak a, tum lo deuha Msa ṭhutna lam ka hawi chu min lo melh kur!

Ka pangngai lo leh vek tawh.

Msan ka awm a tihnawm loh em avangin ka haw hma tur thu ka hrilh hlawm ngawt a, an phal lo nasa mai.

Mahse, " Nih phawt u", tiin ka kal nghal nal nal.

Ka mittui luang hruin a tlanin ka tlan ni ber, Hotel pawn ka thleng chiah tihah tu emaw hian min kuaiher lawpin min fawp ta mai!

Miin min fawh hmasak berna a nih avangin engtia tih tur nge ka hre si lo a ka awm tawp.

Ka hmuh theih chin a bek veilam chu Msa a ni ngeiin ka hria!

Ani pawh chu engtin vak mah min ti lo, ka sam karah a kut rawlhin ka hmui hnuai lam chu a hnê dek dek ni mai hian ka hria.

Muangchangin a inla hrang a, ka inhmu chiang tawh ngang mai, " Ms", tiin ka phun sep a, kan awmna hmu a thim deuh hlek a, a tihzia hlauh.

Ka chal lo siin, " Lâte, ka tan chuan i sang em mai, beiseina min siam sak tawh suh",

" Ms", ka mittui a rawn tling piau nghal a, " min enin, " Ka hria lawm, i nu leh pa thu awih ang che", kuahin, " Ms", tiin a âwmah chuan ka ṭap khur zawih zawih a.

Khang hun chhung zawng khan a lo hria maw, " Ms",

" Shhhh, a tawk a tawk",

" Ms, ih, ih, min hmangaih ve a ni tiraw?",

" Vanhminglian, ngun deuhin Malsawmtluanga thusawi hi lo ngaithla rawh", ṭap purin ka lo en a, Msa chu thaw hrawkin, " Msa hian Lâtei a hmangaih, a damchhung zawngin a hmangaih reng ang a chumi piah lam ram thlengin. Lâte, ka hmangaih che", a sawi zawh rualin min fawp lehnghal.

Inlahrang leh thuaiin, " Mahse, Msa leh Lâtei chu Khuanu ruat an ni a, awmdun tura ruat erawh an ni lo; an thinlunga an inhmangaihna vawng reng sia insûl pel tura ruat an ni", ka biang a dawm chul heuh heuh pahin a ti a.

" Ms", a âwm ka chum dat dat a, nghet takin min kuah, ngati nge awmdun tura ruat kan nih loh? A nâ em mai!

Ṭap hawm hawm chungin Mimii ka hrilh a, " Awi Lâte, ka khawngaih em mai che u", tiin, min lo ṭahpui, " I bulah ka awm thei lo a min ngaidam rawh, min mamawh lai berin ka ṭanpui thei lo che a, ṭhian nikhua lo tak ka ni, min ngaidam mawlh mawlh rawh aw, awi Lâte, ka lainat em mai che u", insut hlawp hlawp chungin a rawn ti.

Keiin ka lo hnem ve leh, kan inhnem tawn a ni ber.

Ni e, kan thinlung a inhmu tawh chung pawhin kan awmdun thei dawn si lo, a fair lo em mai, fair lo tak a ni.

" Lâte, in tan tihtheih ka nei a nih phawt chuan maw tihhreh ka nei miah lo nia aw", Zoa chuan dam dup hian a ti a.

" Zoa, Msa tan hian awmpui ṭha deuh zawnsak la ni mai, chu chu ka duh ber, chu chu min tihsak rawh, min tihsak ang tiraw?",

" Hui, Lâte nangmah hi i ṭha ber sin le, hausa leh rethei inkar zau lutuk hi chu tiraw? Ka ṭhianpa hi ka hrechiang a, nâ lo angin lang mah se; a chhungrilah erawh a rum vawng vawng tih ka hria, nangpawh i nih ka ring, mahse; in duhdan a ni miau si a, titura min duh chu tih ka lo tum ang, mahse Lâte, ka ṭhianpa thinlunga i awm reng angin ka thinlungah i awm reng ang, ka ṭhianpa nupui tur chu nangmah i ni reng ang", tiin, Zoa chuan min hrilh a, ka lo ṭah nuih hak.

Khuai leh Pangpar chu kawp tura duan, nang leh kei erawh hrang tura duan an ti mi kha!!!

Ka pindanah ka pa lo lutin Duhawma chhungte nen an inbiak rem thu min hrilh a, Palai hmel hmuh vat inring turin min ti bawk, ngawi rengin ka lo bu ringawt a, " Mahni fate nawmsakna tur kan duh vek alawm, ka fanu pawh hi a rem a nih chuan i lawina tur te an awm thei a, i buai hauh lo ang, hnathawh pawh ngai lo nuam deuhin i awm thei dawn a, chubak baka nu leh pate duhthusam a awm lo ang", a ti chhar chhar a.

Hrehawm ka va ti tak.

Msa pawhin an thu awih turin min ti tawh bawk si, ka mittui far chuan ka pawm mek ka lukham chu a chiah zawr vek tawh.

Ka uin ka duh phawt chuan min ṭanpui theih thu min hrilh ṭhin a, mahse; eng nge sawtna awm tawh chuang ang, amah berin thlahna thu a sawi tawh miau si a.

Ka hmuh chhunah pawh hmelhriat satliah pakhat ang chauh a ni ta!

" Lâte, ka u pasal neihnaah rawn kal ve ta che, ka rawn hruaiin ka thlah leh thlap ang che", Alex-a chu ka melh ralh a, " Ka bialnu anga sawi che ka tum lo nia",

" I bialnu ka nih i duh lo tihna em ni?", a meng phar kâwk a, ka lo nui hak hak, " Duh mai mai lo", a lai chhe nasa mai.

Min hruai peih phawt chuan ka kalpui tur thuin ka lo chhang a, a lai chhe nasa leh khawp mai, hepa hi bialnu a nei tih ka hre reng sia a nau Sawngin min hrilh vek.

" Msa lo haw hunah ek in khur tur chu laih tir kan tum deuh a", Duhawman a tih chuan ka melh rawm rawm nghal a, " Sumo khalh chauh lo pawh Mistiri hna te hi a thiam lutuk, Lâtei phawikhawk dahna tur pawh kan siam tir alawm", ka pa pawh chuan a lo ti, ka kun leh daih a ka kut ka sik niap niap, ṭawngchhuak lo turin ka insum hram hram.

" Khatia in hmuhsit mai mai theih a ni lo", tia ânkhum hrep hrep ka chak lutuk.

Alex-a u pasal neihnaah chuan ka kal ve a, a u chu a hmelṭha chiang ngei mai, a hmelṭhat dan a chiang lutuk.

A pasal pawh a hmelṭhain a hleitling a, an inhmeh dun phian.

Ka mitthlaah Msa chu Coat suit dum tliang nalh lutuk maia Maicham hmaa ding a lo lang a, ka ngaihtuahna vah thui tir leh hretin Msa lam panin muangchangin ka u kaiin kan kal a, Msa chuan nui sun sunin a kut a lo phar a ka u chuan Msa kutah chuan ka kut a dah a.

" Lâte, i ṭha maw? I ṭap a nia", zawi sapin Sawngi chuan a ti a, " An nalh lutuk a", tiin ka mittui ka hruhul thuai thuai.

An nalh piah lamah ka thik takzet bawk, ka chan ngai loh tur dinhmun an chang bik a!

Zankhuain ka inngaihtuah lungpuam a, ka ngaihtuah thui telh telh leh kawng ka bo telh telh a chhuahna tur a awm lo, kawng min khar saktu pawh Msa a ni si a, " Beiseina min siam sak tawh suh", a tih chu ka bengah a ri nawn tlut tlut a.

A ṭum khatna atan leh a tawpna atana kan infawhna te chuan min fan raih raih mai bawk.

Ka chhungril tawt lutuk chu shower ka va inphuh tir ringawt.

" Final exam zawh hun chu kan ti mai dawn nia, a duh te chuan a zir chhunzawm thei ang a, kan venga mi ṭha ve ve innei in ni dawn bawk a ran lu kim lehnghalin", an nui dar dar hlawm a.

An haw fel hnu chuan ka pa hmaah ṭhingṭhiin, " Ka pa, pasal neih ka duh lo khawngaihtakin min neih tir suh, Msa chauh neih ka duh, kutsuihin ka ngen che ka pa", ka tlawm ngawih ngawih, a pawi lo Msa tan chuan engmah a ni lo.

" Eng maw i sawi a?", ka pain a ti vin ṭhawt a, ka lo phu nghek, " Pa, Duhawma neih ka duh lo, Msa ka hmangaih alawm, Msa pawhin min hma",

" Duhtawk rawh, i va zak thei lo ve, i pa thu i hnial ang maw?", ka pa chu en pawh ka en ngam tawh lo.

" Duhtawk zawk teh, fate duh lo chung an tir lui ngai lo, min en teh mah; hmangaihna tel lo leh insawirem avang maia chhungkaw din hi, a tawpah chuan ka hetih mai hi, Angaihi fahrahin a awm phah der a sin", UAngaihi pa chuan a ti a.

Mahse, ka pa mi luhlul a thu zûk ngai lo chuan engahmah a ngai lo.

Duhawma nena kan inneih ngei tur thu sawiin min vau chhar chhar a, " Ka pa, tun thlengin i thu ka la hnial ngai lo, khawngaihtakin tun ṭum chu i thu hnial min phalsak hram rawh, Msa hi ka hmangaih takzet a ni, ani chauh hi neih ka duh, maw ka pa", ka pa hmaah bawka a ke vuanin ka ṭap hawm hawm a.

" Eng nga tinge a?", ka u a lo haw ta!

Min lo kaitho vat a, beisei nei deuha ka pa ka va en chu min lo hawisan hmak!

" Ka pa, i ti lutuk em mai, an inhmangaih a chu chu a tawk lo em ni? Hlim takin a va awm theih i ring tihna nge, kei chuan hrehawm ti taka a va awm ka remti lo, Lalhmangaihi nun aṭang sawn en ta che",

" Ni e, Faka pa ngaihtuah ṭha rawh", uAngaihi pa pawhin a lo ti ve leh a.

Ka pain min lo en a, " Lalhmangaihi chu michhe inah a lawi tihna em ni?",

" Ka pa", tiin ka u a au ruai a, ka ṭhu thla hnawk, ka beidawng ngawih ngawih ta.

" Hmeichhia te chu an dan alawm, nakinah Lâtei pawhin nuam a la ti dawn lutuk",

" Ka nu, chutiang sawi hun pawh a nih loh hi", ka uin a tih chuan an inhnial chu a ni der mai.

Ka uin min kuahna lak ata tawlhsawnin inchungah muangchangin ka chho a, ṭap tur pawhin chakna reng ka nei ta lo.

Khumah chuan bawk thlawpin puan ka hmer ngawt ngawt a, ka nu leh pa ngeng engtikahmah kan chhun tlang thei dawn lo tih ka hrechiang hle tawh bawk.

Final exam kan ṭan hnai a, hun awl neih ka duh loh avangin lehkha zir lamah ka ṭuan nasa reng bawk a, inchhung chet erawh ka nuin a phal lo a, awmpui a la bawk.

Hun awl ka neih hlek chuan Msa ngaihtuahin thil ṭha lo pui pui ngaihtuahnain a zui nghal mai ṭhin a, chu chu ka duh loh avangin buai taka awm ka tum hram hram ṭhin.

Nui hmel put luih ngai reng erawh ka tlin ṭhin lo.

Biak ina la puantir loh mah nise, Duhawma nena kan inneih tur chu a tlang than thuai a, min lawmpui thu sawia min chibai lawp lawp lah bo lo.

Zoa pawhin min lawmpui thu sawiin min chibai a, a lakah erawh inthup thei ngang loin ka ṭap chhuak ta nge nge.

Min hrethiam takin min hnemin min fuih zawk a, Msa pawhin a hriat thu min hrilh, hre lo thei lo a ni hleinem.

Ka nu leh pate inkhawmin an kal a, a tuk hi exam zawh a nih avangin kei erawh ka inkhawm lo thung.

Ka u chu inkhawm chiang sa.

Keimah chauhin ka awm a, ka hma dawhkana note ho chu ka bih mial mial.

" Lâte?",

" Ms", ka phun sep a tukverhah a lo ṭhu kur mai, " Ka lawmpui che", a nui saih a, ka mittui a luang thla nghal ngiai ngiai, " Nangmah i ni em?",

" Min ring lo tihna em ni?", a ṭhutna aṭang lo thoin ka lam a rawn pan a, keipawh chu ka ṭhutna aṭang thoin ringhlel tak chungin ka pan ve a.

Kan indinchilh ta ran, ka la ring lo cheu, a hmai ka khawih, " I ni tak tak", ka kuah nghal chûng a min lo kuah let ve zat.

" Ka ngai thei lutuk che sin",

" Keipawhin ka ngai lutuk che", nghet takin kan inkuah a.

Engmah pawh kan sawi lo, kan inkuah deuh chawt chu a ni mai.

" Lâte, min zui duh em?",

" Ms", ka phun sep a, " Naktukah, in exam zawh hun ka lo nghak ang che, in college pawnah. Lâte, min ngaidam rawh, mahse; hetiang lo hi chu kawng dang ka hre thlawt lo, i duh lo a nih pawhin ka hnial hauh lo ang che", nghet takin min kuah sauh sauh a, ka chhang thei mai lo.

Khumah ka let ka let a, Msa chu ka zui mai duh ang em?

Nge ni a, ka nu leh pa ngeng hi chhun tlang puiah ka sawm zawk ang?

Ka tihngaihna hre lo chu ka Ṭawngṭai leh ringawt ṭhin a, awmzia phei chu a awm lo.

A tawpah zawng mi pawhin an tifo a lawm tihah ka intilungawi ta ngawt mai a.

Ka bag-ah hak thlak pakhat lek thunin ka u nen chuan college panin kan kal ta a.

Ungaihi te chhungkua hmu lawk turin ka u ka hrilh a, uAngaihi engmah ka hrilh lo. Bawihtei leh a nau chu pawmin ka fawp vawng vawng a, uAngaihi pawh kuah vawng vawngin uPuia pawh reilote ka kuah ve.

Engtikah nge kan inhmuh leh ang tih ka hre si lo, ka van ngai dawn tak em!

Exam kan zo a, ka u bulah kalin, " U, farnu laktlak lo tak min neih avangin min ngaidawm dawn nia", kuah chungin ka ti a.

Ka u chuan ka mittui min hruksak pahin, " Lâte, tluang deuhin in kal dawn nia",

" U?",

" I u zawk hi min ngaidawm rawh, mamawh engpawh in neih apiang min lo hrilh hreh miah suh ang che aw", dam diaiin a ti a.

Ka u hian Msa nen kan inbiakna a lo hre vek chu niin, ka ṭhat leh ṭhat loh min zawt tura ka pindana rawn luh a tum kha Msa nen kan inbiakna a lo hria ni awm e.

A tawp nan ka u âwmah ka hmai phumin ka ṭap tlawk tlawk a, " Ka u, min ngaidam rawh aw, ka hmangaih che", ka ti mawlh mawlh bawk.

Msa lam pana ka tlan chu taxi pakhat hian min su ṭhelh a ka tlu chiang ngei mai bawk.

Ka ke dinglam a ulh lehnghal, Msa lo tlanin min kaitho vat a, taxi driver lahin ngaihdam min dil mawlh mawlh.

A pawi lo thu kan hrilh a Msa erawh ngawi reng mah se, a thinrim tih ka hre thei.

Kan kalsawn hnu chuan ka kut pahnih humin a fawp vang vang a chumi hnuah, " Lâte, min zui i duh tak tak maw?", hlauhthawn hmel takin ka lo bu zeuh a.

" Bike nalh tak takin ka phur ve thei ngai dawn lo che nia",

" A pawi lo",

" Car nalh takah lah i chuang ve ngai dawn lo bawk",

" Ka bulah i awm dawn phawt chuan pawi ka ti lo", ka lo nuih saih a, ka inhuam tak tak leh tak tak loh min zawh leh chuan, " Chawhmeh pawh kan vah kualpui dun dun mai dawn lawm, ka bulah awm reng turin ka duh zawk che",


" Awle awle, ṭap tawh suh; i bulah ka awm reng ang, ka theihtawp chhuahin nuam taka i awm theih nan ka bei ang", min kuaha ka hnung chul heuh heuh pahin a ti a.

Inkai rialin sumo counter lam panin kan kal a, restaurant-ah te chawlin; a ṭum khat nan kan indate!

Bike leh car nalh taka chuan pawh a lo ni lo, kan bula awm te hian han zir sela a lo nuam em em mai zawk a lo ni.

Tunah chuan official takin inngaizawng kan lo ni ta a, nupaa insiam kan tum mek bawk, ka rilruin ka Ṭawngṭai mawlh mawlh a, " Aw Lalpa, khawngaihtakin hlawhtlinna min pe hram rawh aw", tiin.

Msa nen chuan hapui lang ṭhawin kan nui deuh reng a, hetiang hun hi ka nghahhlelh leh ka duh ber ṭhin kha a ni a, Msa nena kan duhthusam.

Midang sumo khalhah kan chuang a, Siaha-ah Pu-a a lo zawn te inah kan innghat dawn.

Msa kut hmer ngawt ngawtin ka mittui an luang thla ngiai ngiai a, " Ka nu, ka pa min ngaidam rawh u aw", ti nuah nuah chungin Aizawl kan mangṭha ta!

Msa darah beiin ka muhil siai siai a, ka thla a muang hliah hliah; seat tawp bera tukverh bulah kan la ṭhu zui, thli lo thaw lut chuan min chhem dai sawng sawng bawk a, a va nuam tak!

A khat tawkin zawi sap hian Msan, " Ka hmangaih che", a lo ti ṭhin a, ka lo lai chem chem zel.

" Lâte, Lâte", tep chuap chuap hian ka meng sawr sawr a Msa lo khi vur vur chu, " Eng nge a?", ka ti a, " Sumo hi a chhia a kan chhuk lawk a ngai".

Sumo aṭang chuan kan chhuk sup sup hlawm a, khua a lo thim der mai!

Msa ka zawh chuan, " Dar kua, Thenzawl a nih hi, saw, sawti lai lawk saw Hmuifang Tlang", ka hawi vat a.

Nui sun sun chungin Msa ka va en a, a lo kiai sak.

An siam chhungin chuang dangte nen kan titi hlawm a, nu pakhat chuang tel vein a fanu kum thum mi a hruai ve a, chu chu kan lawm luai luai a, eng eng emawni sawiin kan nui thler leh duai duai ṭhin.

Msa chuan hnehsawh takin Sumo hma te chu a hawng ṭhuai ṭhuai a, ka lo thlir reng a, ka hmu hmelṭha zual sauhin a pa chiang alawm!

" E hei, in pa pawh a rawn kal a lawm", ka lai lutuk chu ka sa chhuak vek thei.

Midang ho pawh an lo kal sup sup a, chanchin kan lo zawh chuan, " Driver leh kan zinga pakhat kha Hotel-a thawk pakhat Bike hawhin khawchhung lamah an kal a, part la turin",

" Kan Driver inthlahrung lutuk kha a khawngaihthlak zawk lawm le",

" A fel ngawt mai", an ti sap sap a.

Kan piah lawk Hmuifang Tlangah chuan kan kal a, zan ni tho mah se; êng an vuah avangin a thim lutuk lo.

Reivak lo hnuah Midang ho Hotel lamah kal hlawmin Msa nen chauh chuan kan awm ta a.

Inngheng chungin kan titi mai mai a, " Duhawma nen khan in ni tak tak em?",

" A teuh lo em mai, amah khan kan ni angin a sawi chiam ringawt a nih kha", lungawilo zet hian ka ti a.

" Chu, ka lo thik sual che u ni maw", min piai zeuh chunga a ti chu, " I thik sual tihna nih dawn chu Misualpa", ka ti zawi sap a.

" Lâte, hrehawm i tih hun a thlen pawhin min kalsan suh aw",

" Ms, engtikah mah ka kalsan ngai lo ang che; nangmah zawk hian min kalsan miah suh ang che. Takah, bazara i bialnu kha", ka ti chhuak phawng a, " Ka bialnu ni lo, ka ṭhianpa farnu nih kha, a nupui neih ni-ah a ṭhianah min sawm a", ka thaw huai a.

" I lo thik sual ve tihna ni maw", a kiai leh sup a, ner nawngin ka lo bu nghauh nghauh.

" Lâte, ka kalsan ngai lo ang che", ka khabe dawmin kan infawp vawng vawng a.

" Lâte, zanin hi kan inneih zanah hmang ang hmiang",

" I va Khawnglung Run reuh e", ka lo ti hlak a.

A thutak thu sawiin zanin ngeia nupaa insiam a duh thu a sawi a.

Keipawh chuan hnial eih lovin thuawih tak chuan ka han 'aw' ve ringawt.

Kan pahnih chuan chu Hmuifang Tlangah chuan inneiin, ṭhingṭhia Ṭawngṭaiin Malsawmna kan dil a.

Leiah tlu riai riaiin inngaizawng aṭang Nupa kan ni ta der mai!


" Ms, ka kalsan dawn lo che",

" Che tawh suh", thaw halh halh chungin a ti a, a nâk dawmin thisen lah a chhuak tawp thei lo.

Sumo-ah kan pahnih chauhin kan awm ta a, chuti chung chuan ka banphakah a la awm lo zui.

Sumo chu a inbuk a inbuk a, Msa nen a kil ve veah awmin pakhat zawk zawk a damchhuah theih nan chuan zuanthlak a ngai.

" Vanhminglian, zuang thla rawh ka tih che chu", a ti vin hlur mai a.

Ka lo duh lo nasa mai, " Ṭap lo khan ka thusawi ngaithla rawh",

" Min kalsan loh tur thu i sawi vek tawh kha, Ms", ṭap hawm hawm chungin ka ti a.

" Ka kalsan dawn lo che, ka kalsan ngai dawn hleinem che, mahse", ṭhen sakin, " Tunah tak hi chuan ka thu awih la zuang thla mai rawh",

" Ms, ka hlau a nia ka kuah duh che, i bulah ka lo kal duh a nia",

" Lâte", beidawn hmel tak hian muangchangin a ti a.

Thei leh thei loa a kut lo phar chu ka va ban ṭawk ṭawk a kan kut hmawr chauh a intawk thei!

" Ms",

" Lâte, ka hmangaih che",

" Ms, keipawhin ka hmangaih che",

" Ka thu awih la aw", a ṭhen sak sak a.

" vawikhat", Msa chuan a ti a, tihngaihna ka hre tawh lo lutuk chu ka ṭap vak vak ringawt a, min puitu tur ka au vak vak bawk.

" Ms", ka mittui avangin ka hmu vai ruai a Msa hmel pawh ka hmu ṭha thei tawh lo.

" Vawihnih", thei leh thei loin ka mittui ka hru a, min lo nuih sen sen.

" Lâte, ka hmangaih che", a mittui luang chu hruksak thei ila ka va ti tak em!

" Ms, keipawhin ka hmangaih che",

" Vawithum",

" Ms", tiin ka au ruai ruai a, sumo lum thla riai riai chu auh din tumin ka theihtawpa ringin ka au vak vak a, chawl eih loin a lum thla ruah ruah!

" Ms, ka psal khu min chhanchhuahsak rawh u; Ms, Ms".

Khawiah mah kalsawn loin ngawi rengin ka ṭhu a, ka awmhmunah chuan ka hliamte chu min tuamsak a, ka rilru a chawmawlh vek ni ber.

Ka u âw ka hriat rual chuan ṭap hawm hawm chungin ka va pawm a.

" U, Msan min kalsan dawn lo tiraw?", ka ti a.

" Aw, ka naute lainatawm", ka u pawh chuan a ti vawng vawng a.

" Kan lo chhuak chho thei ta e", ka hnung ka hawi vat a, leia Msa an dah chu ka va bawh thlawp, sawi nawk nawka tho tura au rawng rawngin, a âwm te chu ka nem a, a hnar hmet pingin a kâ ka ham thul.

" Ms, tho rawh, kan tum ram kan la thleng lo a nia", naupang nuar ṭapa tal nawk nawk ang hian ka awm tawh.

A kuang an zawn chhuah dawn chuan," Ka pasal a nih hi, khawiah mah in kalpui lo ang", Msa chu kuah vawng vawngin, " A lo tho leh dawn, a muhil mai chauh a nih hi", tiin, ka tha tawp chuan ka au a.

A hmel dâng bem vawt thler chu ka chul heuh heuh a, lumna reng a nei tawh lo.

Chhuak tur âw pawh ka nei tawh lo a, mittui lah luang thla tur an awm tawh bawk hek lo!

Nitin mai chu Msa ka sûn ni a ni ringawt tawh mai a, " A rei lo em mai", tiin ka han Ṭawngṭai leh ngawt ṭhin bawk.

Mimiin min awmpui chawt a, kan inah pawh awm duh loin Msa te inah tap deuh chawtin Msa pindanah ka awm nileng zankhua ṭhin a.

A thawmhnaw te leh a pheikhawk te ka rem ṭha nitin bawk.

A kamis chul heuh heuhin hatu tur awm tawh lo ngaiin ka kiau leh vawng vawng ṭhin.

Chaw ei chu sawi loh, tui takngial pawh in harsa ka ti. Kan chanchin an sawi dan lah ka lo hre ve zel ṭhin bawk nen.

" Lâte, min ngaidam rawh aw, khami ni khan lo dang che u ila ṭha tur. Ka naute min ngaidam mawlh mawlh rawh aw", ka u chu chhan ka duh a, a thiam loh engmah a awm lo.

Ka ngaihdam thu hrilh ka duh a, ka chakna zawng zawng sawm khawma men ka tum pawhin ka thei der lo, ka kut tihchet ka tum takngial pawhin ka tha zawng zawng hoin min chhuahsan ta emaw tih tur a ni.

" Nu", tia mipa naupang ṭap ruah ruah thawm ka hria a, a ṭap nasa lutuk chu a hnang hial!

Ka fapa a nih thu leh thlem vat turin min ti hlawm a, mak ka ti lutuk chu ka ka ho ringawt!

Chu naupang pawh chuan ka lama a kut rawn phar chung chuan 'Nu' tiin ṭap rawng rawngin min ko reng bawk.

Ka hrilhhai lutuk tihngaihna hre loin chu naupang ka va pawm chu a ṭap bang ta hmak a, hlim tih hriat takin a mittui kar aṭangin min lo nuih sun sun a, a hmelah Msa ka hmu nia mawle!

Ka harhchhuak kâwk a, ka thaw halh halh nghal.

Ka hrawkah hian min hnawhtu awm ang mai a ni, ka hawi ruai a damdawi in khumah ka lo mu reng chu niin!

Ka u lo lut chu thil awmzia ka lo zawt vat, min tung thoa ka kut vuanin ka harh avanga a lawm thu a sawi mawlh mawlh a ngaihdam min dil mawlh mawlh bawk.

Mimii leh Zoa te an rawn lut ve leh a, ka nu leh pa leh Msa nu leh pate pawh an rawn lut ve nghal.

Ka pa ka hmuh chuan ka huatna rawn chhuak lehin, mahse; engtinmah ka ti thei si lo ka pa a ni miau bawk si a.

Muangchangin ka pa chu ka va pan a, a hmaa ka lo tih dan angin ṭhingṭhiin ka pa ke chu ka vuan a, " Ka pa, a nâ em mai, a nâ em mai, ka pa", ka ṭap khur zawih zawih a.

Ka nuin min lo kuahin, " Lâte ka fanu, a pawi em mai", ka pa ke chu ka la vuan reng a.

" Ka pa, mite pawh an tlan dun fo ṭhin a, mite pawh nu leh pa thu loin an innei tho a; ka pa, mite pawhin innei si loin nau an pai ṭhin tho a ni lawm ni? Harsatna tawk loin him takin an awm ṭhin tho a, engvangin nge keini hian kan tawrh bik, ka pa a nâ em mai. Awi ka pa, a nâ em mai. Ka pa, kan thiam loh a ni min ngaidam rawh aw, Msa lo let turin ka duh, awi Ms; a nâ em mai", ka âwm ka chum dat dat a.

Ka uin min pawmin khumah min muttir a, " Ka u, ka mangah fapa ka lo nei a sin 'Nu' tiin ṭap chungin min ko a ka pawm a, a bang daih, Msa chiah chiah a ni mawle ka fapa chu", nui saih chungin ka ti a.

" Lâte, Msa nen fa in nei a sin", ka uin a tih chuan ka meng phar kâwk a, " Eng, eng maw?",

" Tun aṭang chuan chak taka i awm tawh a ngai, nangmah chauh i ni tawh lo a nia aw", ka pum dawm chunga a ti chu ka pum ka dawm ve vat a, kha zan kha.

Ka u chu mittui tla zawih zawihin ka en a, " Thla khata upa chauh a la ni a, i enkawl ṭhat hle a ngai dawn a nia a dam chhuah theih nan", ka u chuan a ti a.

Ka pum dawm vawng vawng chungin, " Ms, "Khawiah nge ka pa?", a tih hunah engtin nge ka chhân ang?", van lam hawiin Msa ka au ruai a.

Ms, Ms, engtiklai pawhin Ms kan ti reng dawn a nih hi, " Ms, ṭha takin ka lo enkawl ang, a hero i ni ngei ngei ang, zantin i chanchin ka hrilh ṭhin ang a. A hmangaih chu eng ang mi pawh nise, ṭhen hran ka tum ngai lo ang".

Ms.......

*** PI PUTE KHAN DUH LOH NENA KHUANGCHAWI AIIN HMANGAIH NENA BAHRA KHUR CHAWH A THLANAWM ZAWK TIH THU RO MIN CHHIAH KHA MAW! ***



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)