ELEOS CHAPTER - 12 BY NUNUI HNIALUM

[Nunui Hnialum]

Eleos


Chapter - 12



Dawr ah ṭhu in order thar awmte ka en thuak a, bungraw tangkhang eng emaw zât ala awm ve bâk ah, kumtâwp ahnâi tawh a customer hîp thei tur tunlai ber ber ka duhve nen rilru abuai ve map map viau.





Vawiin ah Bt-a dawra rawn kal turin ka hrilh tawh a, nizana ka pa nen kan in biakna pawh inhmuh huna hrilh law law ka tum.




Chawhnu dar 1:00pm bâwr ah kawt ah a Bike arawn ding dawt a, Bta anih ringin ka enzui lèmlo, 'engtin nge a chanchin hi ka zawh chhuah ang?' Tihlam ka ngaihtuah, zâwt ta pawh ni ila thudik min hrilh duh kher angem?




"Ka Princess-i chu iva ngûi ve," aw thàm chhal ka hriat chuan a hmel enlo mah ila tunge anih ka hrechiang, ka heh pet fan fan in ka insehruh ṭalh ṭalh, zak theilo lutuk engtin nge ka dawr ah a hmel ala rawn lan ngam cheu ni?




"Ka rawn kal dawn ka tih kha," ngampa zeta tiin ka dawhkàn hma ah tak chuan ading zuah a, rum lutuk in ka melh nghek.




"Heihi ipa dawr emaw ipa in emaw ani lo, chhuak rang rawh," ka ti fiak ṭhak a, ka mitmenga amah ka huatna chu engah vak angaih hmèlloh. "Ka pa dawr emaw ka pa in emaw anilo, ka nupui hual dawr ani," zak map lova atih chuan ahmai ah tak chil chhâk ṭhawt lo turin ka in sùm ngar ngar.




"Police ka koh hma hian chhuak ang che," ka ti hriam hraih, ka naute pahnih Lunch eia an chhuahlai ani kher nen keimah chauh in dawr ah ka awm a, ka hlau lek lek.



"I pa maw?" nersak chunga atih chuan ka ngaihthei dêrlo.




Ka dawhkàna Sketch Pencil awm chu la in ka vawm a, a ṭe zui ṭhawt.





"Nangnu hian ka thisen i chhuah amaw?" Ti chhur chhur in arawn hawichhuak a, a chal ahupna kutkâr aṭang in thisen arawn hnàm ṭiam ṭiam bawk.




"I cho chhuah anihkha, a aia na i tawrhzawm duhloh chuan tlàn chhuak rang rawh," tiin pencil dang chuan ka tin leh uaih a, min vau zui khûi khûi hnu ah achhuak ta nulh.




Thisen èm chhuah kha chu ka tum ani lo a ka in thiamlo ru ve tho; mahse, a pâwngpawrh mah mah ani.




A chêtdàn ṭhin hi zaktheilo ka va han ti tak, engtin nge khatiang mihring kha an awmtheih ni.



Ka pa bulah ka sawi duh angem? Ka laichín ka ṭhiante pawn ka huntawn hi engmah abulfûka hriat mumal annei lo, sawi chhuah a chìnfèl chi nge ngawih bopuia a boruak daih hun nghah tawp ni ang?





Insangmar ṭunga ka awm laiin ka phone arawn nghawr dat dat a, ka phu deuh uaih lehnghàl, thaw ham ham in ka kut in ka àwm ka dawm a hetiang reng a ka awm anih chuan ka rilru apiangsual phah thuai ang tihpawh ka hlau.





Bt-a call ani tih ka hmuh chuan Sana ka en vat, chawhnu dar 2:00pm ari thuak tawh.




"Hello,"



"A Zualte, zan ah ka lo hmu mai dàwn che em ni?" a rawn tih chuan ka lungáwi lohna abelhchhah ani ringawt.





"I va buai àwm ve?" Lungáwilo awka deuhin ka ti hap a, lehlama ka lungáwiloh tawhsa nen ani nen lehzel hi chuan hun thàwl hmandun ka châk viau asin.





Ka pa'n zanriah eia a sàwmna pawh 'kan inhmuh hunah ka hrilh mai ang,' ka ti kha ania, ka hrilh hma in a hmanlo nghàl panga ka pa ka ti hrilhhai dawn maw?




Ka chhûngril sa ru phat phat avâng chuan engthil ah mah ka rilru ka pe tak tak theilo, ka naute pahnih rawn luhhnu ah kei ka chhuak ve ta daih.




Scooty kengbuai lovin Two wheller Taxi in ka kal a, Lunch eina tura pan tur bik pawh hre lovin ka chhuak ve ráwih ani.




Driver bulah, "dawr hnai ber ah min drop rawh," ka ti ta ringawt.




Dawr thianghlim leh felfai zet ah driver in min drop hnu ah keimah in ka ṭhu fel át a ka eitur chah ka nghah laiin ka pa'n minlo call a ka chhâng vat.




"I ṭhianpa chu chaw eitur chuan i sàwm tawh em?" A rawn ti a chhàn ka huphurh ru ngeimai, "aa..ihh. zanin tlai chu a rèmchãng lova," nuamlo tiru fe in ka ti sap, engtin tak dawngsawng ang maw? "E anihchu, hei i Nu Sangi'n min rawn bia a haw ka tum mek," a rawn tih chuan minrawn Phone chhan ka hrethiam.




"Pa, i thu hnial hi ka hreh viau asin," ka ti záwi sap ringawt. nizana a Joris-a awmdan mawilo zet kha ka hrechhuak bawk, ka ner nghek.




Dawr kan in khâr fel hnu ah zâwimuangin ka in khalh phei a, Nu Sangi chuan engthu tak lo lènpui ang maw?



In ka thlen hnu ah zanriah kan ei nghàl vata, ka ring tihchêt in ala na deuhfo nen Damdawi eiin mutur in ka in tintuah zui mai.




Ka muhil siar siar tawh tihin ka nu ṭawng bak hlar vângin ka harh kâwk, ka mumang emaw tiin ka hawikual deuh ruai nghe nghe. A reh deuh vang vang hnu ah ka pa ṭawngri bul bul ka hriat leh tãkah chuan ka in perh tho at.




Inhnuai ka thlenthlâk chuan kawngka bulah Biakthansanga alo ding rùn a, a hma ah ka nu leh pa an awm bawk.



"Bt,"



Ka ṭawngri hria in an pathum in an rawn hawichho rual ṭhat a, ka nu mitmeng alh phat leh ka pa'n athlavâng hauh taka adâra akuah chu hrethiamlo fe in ka en. Bta mitmeng pawh chu ka chhiarthiamlo.




"Nu, Pa tinge in din reng, heihi ka ṭhianpa anihhi, Pa, nizanah a chanchin ka hrilh tawh che kha," ti sawk sawk in an bulah ka va ding ve vat.



Ka pa rùm nghut ri leh ka nu mitmeng râng zet ka hmuh chuan a ngaihna ka hrelo telh telh.




"Ṭhu ang u," tihleh Bta kut vawn ka rual a, ka chêt hma hauh in, "ka inchhûng hi i chhuahsan thei ang," ka pa ṭawng bung nghut avâng chuan alam ka hawi vat.




Ka pa mitmenga Bta huatna leh a lungnihlohna chu haider theih pawh anilo.




"Pa, enge thil awmzia?" awki nèm fahran lovin ka ti vak, ka pa chezia chu mawilo ka tiin ka haw takzet bawk.




"Biakthansang, i case awrhlai hi ka fanu hian a hriatpui che em?" Ka pa ṭawng changfak vâng chuan ka dãng sãwp sãwp in ka hria.




"Pa, eng.. engthil?"



"A hrilh lo che tiraw? Ani hi tualthah leh rûkrúk thubuai neilai anihhi, bum ini,"



Ka pa thusawi chu awilo ru fe in amit ah ka en a, abek pâwng ṭawlh ṭawlh khawpa a in sehruh na leh a mitmenga huatna te chu ader ani in ka hrelo, Bta ka en leh a ahmèl phadai chuan ka pa thusawi chu thudik anihzia a tifiah bawk.



Biakthansanga kut ka vawnna chu ka thlah hlawk a, ka mittui akuanga lenglo chu ka biangah arawn far nghàl zãwih bawk.




Ka awih theilo, ka in nghahna leh ka chhuanrûk ve fo ka hmaiha hi criminal maw lo ni? Áwiloh ka duh a hriatloh ka duh bawk; mahse, engkim chu a thleng vek tawhsi, thildang zawng aia dâwt hmanga min phuarna chu na ka tihber ani.




Ka room ah tlànchho in ka khum ah bawkthlawp in ka inhnîtzui hlawp hlawp a, ka tunlai thu hriat leh ka huntawn zozai te hi ka hrethiam tehnuai lo.




Reitâwk fang ka ṭah hnu ah bûilâk in ka ṭhuchhuak a, ka lu ahai chhalh a ka kawchhûng a in let but but bawk.





Inhnuai thàwm hriattur a awm tawh lova, Biakthansanga kha engtin nge a awm chhunzawm ka hrelo, engtin nge dawt ngialngan lutuk nen ka bulah a awm theih, ka pa leh kan chhûngkua min hresa vek tih hriatreng.






Nizana Rody thu rawn sawi te kha ka hrechhuak uar uar, awihloh ka duh a, an puhna diklo mai nise emaw amah nilo midang hlak nise ka ti takzet; mahse, ka pa khàn ahrechiang hle si a, amah pawh in phatna engmah asawilo cheu bawk
Engmah hi ka hrethiam tehnuaih tawhlo, tualthattu, KS khàwmtu, fahrah naupang pathum enkawltu a... amaha engmah hi ka hrethiam teh nuaih lo.




Ka phone rawn nghawr dar dar chu haiderin ka mului ngat ngat, tun atan chuan tumah ka be châklo hlawllo, keimaha awm a in ngaihtuah ka duh, Bta nuihmel ka mitthla ah alo langa nunna hlutak asiam ni miahlo chhat tur chuan ka phallo a, ka laka zêp aneih vângin ka na hle bawk, chàwl lova azàwna vawithum ngawt arawn call tluk tluk takah chuan, 'a pawimawh aniang,' tiin ka en a Biakthansanga call lek ani.




'Heipawh Joris-a ang thova zaktheilo, mipa ho hi an lo in ang vek anihhi,' ka ti rilru neuh neuh, ka lái ana a bum nih chu chhungril ah min kher nget nget.





Muhil thei lovin ka in letsek a, ngaihtuah tur ber pawh hre lovin ka in ngaihtuah kual chiam, zanlai ah Rody'n min rawn cal leh teh miala ka lâk rual in, "Bta hi ka in thlang ah mi pakhat nen an in sual ania, a ruih hmèl lutuk," a rawn ti.



End Of Chapter - 12