TRUE LOVE CHAPTER -25 By : Tom Tom Putara

Episode kal lai dah luhna

Moderator: writers

Tomtomputara
Posts: 159
Joined: December 3rd, 2021, 1:17 am

TRUE LOVE CHAPTER -25 By : Tom Tom Putara

Unread post by Tomtomputara » October 5th, 2022, 11:47 pm

TRUE LOVE
Chap~25



By : Tom Tom Putara






"Naute....i pa a in peih vek tawh ania," chu thu chu vawi thum harhchiang lo ruaiin ka hre tawh. A 'aw' ka hriat chuan nizan lama thilthleng ka ngaihtuah chhuak nghal zat bawk. Ka nu 'aw' ah erawh danglamna a nei ve lem lo, hmeichhe chak tak leh huaisen tak kha a ni miau a lawm.




Zoramsanga ka ngaihtuah thleng nghal zat bawk a, min mamawh ni a ka hriat ang ai hian min mamawh ve ang ngem? Ka nu sawi ang kha lo ni ta se.... ka ngaihtuahna chu duh lo lutuk in ka Lu ka thing zui nawk nawk a.




Ka mit ka nuai sat sat a, Khumah chuan ka ṭhu ngui bâm a. Sana ka bih zawk a, zing Dar 5 a pel hret. Zing dar 6 ah kan inentirna tur Doctor Malsawma a ṭhu chauh dawn tih ka hria..hun ka chhût a, tlêm zawi taka awmna hun ka la nei tih ka hria. Khumah chuan ka bawk leh thlawp a.




"Tho teh...i pa in a nghak reng che. In tlai palh ange" ka nu chuan a rawn ti vîn ṭhat a. "Ninawm....ka dam ṭha" keima hriat tawk leka tih pahin ka ṭhu ngil zui zat a.




Ka tho a, ka inphihfai zui a. Muangchangin ka insiam zui nghal a. Darthlalang hmaah chuan ka ding a, ka in thlek kual sek a. Zankhat lek mah ni se ka pawr chhep mai, ka mit hnuai a val dum kalh a. Ka mut tlem zia ka hre chhuak nghal zat. Huaisen turin chakna ka nei rih lova, engnge ka tih ang a, 'engtinge?' tih zawhna erawh ka in zawt tâwp thei si lo. Ka zawhna zawng zawng chhanna hi ka duh a, chumi hre tur leh hmachhawn tur erawhin ka huaisen tawk thei lo hi ka in haw lek lek tawh.




Ka pa nen chuan kan in zuichhuak nghal a. "Nizan i mutui em?" tih pahin min rawn melh vung vung a. Ka lo bu nghat a, ka phone chu ka enkual dan dan a. Zoramsanga Whatsapp message tak ngial pawh a la awm lo, engtingnge a awm ang? Min mamawh em em si in min chelh ngam lo se, a hma ang chiah khan ka nun aṭangin inthiarfihlim thlang leh zawk se? Ka hlim in ka nun a famkim phah chuang angem?Zawhna chhan sen loh hi ka ta niawm rêng in ka rilru ah an nghet tawh chu a nih si hi!





'Ka hringnuna a lo luh rual khan a kalh nghal a, a chhuahsan tawh lo; Mahse, a beidawnna ruam aṭangin beiseina thar siamsak turin hmun sang takah ka lawnpui a, lawnchhuak tur erawh chuan a ler thlen hma in Lungpui sak tak te kan tâwn dun angai si...'



'A tan ka chak tawk lova, a nun a tel tur hian huaisenna leh chakna te hian min chenchilh reng se. A nunah harsatna tam takin a tlakbuak tih hrereng mahila ka chhungte tan chuan chhuanlam mai a ni dawn si'




Ka thawchhuak halh a, ka ngaihtuahna tawp thei lo leh awmze nei lo inchawhpawlh kual nasa lutuk avang chuan ka hah hluah hluah.




Ka pa chuan min mitsir leh rulh ṭhin tih pawh ka hria. Thil tam tak ngaihtuahin pawnlam ka hawi reng a. Ka pa lahin min be hek lo.




Doctor a lo la ṭhu lo a, kan nghak reng hlawm a. Sana ka en zauh a, dar 7 a ri tak ngial dawn, "Hetiang hi ania eirukna chikhat chu.. Mipui hun, kan hun min eisak ṭeuh anih hi," ka bula pa upa lam chuan a ti mawlh mawlh a. Ka ngaithla kar reng a, a dik viau pawhin ka hria. "Morning" tih ka thawn a, ka ngaihven zui nghal deuh reng a. Mahse, chhânna engmah ka hmu lo.




Kan Doctor nghah pawh a rawn thleng ve ta hram a. Parukna ka nih vangin tlem la nghah a ngai tih ka hria. Ka pa lah chuan Chanchinbu rawn thleng thar chu a lo bih leh daih tawh. Ka hun a rawn thleng a, ka lut zui ve nghal a. Ka pa chuan min rawn luhpui a tum ngial na a, ka zah ve deuh avangin pawnlamah min lo nghak a. Eng eng emaw kan test ve nual a, Dengue, Septicemia te min lo test sak nual a, results nghah chhung nen kan rei ta phian.




Ka in entir zawhin kan haw thla nghal a. Ka nu chuan min lo ṭhutchilh a, hritlang khawsik ka la na deuh ringawt a nih thu a hriat chuan damdawi min chawh te chu a lo en nghal zung zung a. Kei erawh pindan lamah ka lut zui nghal a. Khumah chuan ka ṭhu hnawk a, phone ka bih a. Engmah chhânna ka la hmu chuang lo.




Nilengin ka rilru ah a awm reng a. Biak ka tum ṭhin a, a switch off tlat bawk si. A dinhmun ka ngaihtuah kual a, in kiltawih reng rengin a awm dawn tih a mizia ka ngaihtuahin ka hria, ka lainat takzet bawk.




Ka inbual a, ka in tilum zui nghal a. Ka nu eirawngbawl pui turin ka chhuak phei zui a. Ka nu chuan thingpui min lo pe thuai a, "Engnge i an? I zia em?" a lo ti thuai a. "Ka zia khawp mai" ka ti vat a.




"Nizan a ka hrilh che kha vawng reng ang che. Ka hmangaih vang che, i hmalam hun thui tak ka ngaihtuah vang zawk a ni. Ka thil tawn ang tam tak hi mittui nen i rawn pal chhoh ka hlauh vang a ni," a rawn ti leh dap dap a.




"Ka hria alawm," tih nghat pahin thingpui ka lem khalh a. Ka phone chu ka en leh thuak thuak a. Bs-a status chu ka chhiar nawn leh ngat.



'Ṭhianpa...vawiin zet chu i khua a har viau ang tih ka ring. Mahse, tuar hram hram la...in ti chak ang che. Kha chen i tawrhchhuah tawh kha...'




Ka ngaihtuah kual a, Bs-a hian Ramsanga bak ṭhian kawm a neih em em pawh ka hre lo. Rang takin message-ka thawn nghal thuai a. Ka nghak rei lo, a rawn chhâng thuai a. "Vawiin a pa thih cham ania... Thlanah a awm ka ring...." a rawn ti chu ka meng kâwk a. "Amah chauhin maw? Engatinge i kalpui loh?" ka ti lêt thuai a. "A duh ngai lo..amah chauha a pa thlan a ṭhut nilen a duh ṭhin" a rawn ti leh zel phei chu ka thin a phu nghal det det a.



"Ka kal ve dawn, hnawk min lo ti angem?"


"I chhungte'n an remti dawn em ni?"


"Remti lovang"


"Ka ring...mahse,a mamawh khawp ang che"



Thawh pahin, "Kâwnah ka va kal lawk teh ang. Ka rei lovang" tih pahin ka pindan lam ka pan nghal a. Ka kekawr bûl hak chu ka thlak a, ka chhuak phei leh nghal a. Ka nu chuan min lo melh zuk a, "Va rei lo la.." a lo ti nghut a.




Thlanmual lam panin ka inkhalh chhuak zui nghal a. Ka rilru kâwm melh melh chungin ka chhuk thla zel a. Engang chiahin nge kan in hmachhawn dawn tih hrelo mahila a bula awm hlan ka nghakhlel takzet.




Thlanmual chhak kawngpui chu ka zawh phei zel a. A Car emaw Bike emaw pawh ka hmu lo. A awm lo anih ka rin rualin a kal ngei ka ring bawk si. Kawngsirah chuan ka inhûng ṭha zui a. Muangchangin hawikual hrek hrek chungin ka chhukthla zel a.




Thlan lung nghenga a ṭhu ka zuk hmu chu ka ding chat a, ka en reng a, "Misualpa... engvanga engmah min hrilh lo nge i nih?" ka ti sap a. Ka chhuk thla leh chhat chhat a, ka pan phei zui a. Ka aw ka thian kharh a, ka en pah reng a; Mahse, a rawn hawi lova, min ngaihsak chuang hek lo.




Ka pan phei chhat chhat a, a bul ka thleng a. A bulah chuan ka ṭhu a, ka melh reng a. Min lo en lova, hmun hla tak a en tih erawh ka hria, a mitmeng sen râm leh thîp râm te chuan ka kal ve ringawt chu min ti zam zual, "I ṭha em?" ka ti sap a.



Engtinmah min chhâng lova, ka biakna chu hria ang pawhin a awm heklo. Ding taka ngaihtuah nei ang maiin a hmalam hla tak chu a melh ngar reng a, a kut veilam sira thil awm chu chiang takin ka en zui a, Syringe- ka hmu chu ka meng kâwk mai. "I ṭha tiraw?" ka tinawn leh nghat a.




"Engvangin nge i rawn kal? Haw rawh," tih pahin min melh a, i pik hmel fe in a thawchhuak hawlh a, ka kal kher kher chu ka inchhir ṭan der tawh, "Ka ngaihtuah che lawm," ka ti sap a.



"Min ngaihtuah suh....tuma ngaihsak nih ka duh lo"



"Ka ngaihsak che i duhlo maw?" min chhâng tawh lo, a kut hûm ruhin a in seh ruh nghal ngawt ngawt a. Tumah mamawh lo nia a hriatna te, ngaihsak nih a duh lohna te hian a mamawh zia min hriattir thung a. A landan phenah hian chu chu thukru tlat in a tihreh nan damdawi ah bawk a natna te tihdam nan hahdamna a zawng leh ṭhin. Mahni in pawm hi a lo har viau a nia nge.




"Ngaihtuah tawh lo tur che in min ti suh..." ka sawizawm thei tawh lo. Ka na ngawih ngawih...



"Haw rawh...i chhungten an ngaihtuah ang che," a rawn ti leh nghut a.



"Min en teh," tih pahin ka melh ngar a. Muangchangin a rawn hawi a, nuih suk pahin, "Nang hnaih tur che in ka mizia in a tlin lova, ka tling hek lo," tih pahin a thaw chhuak hawk a. A ipik hmêl chuan min tina a, a nun a ka tel ve hian a belhchhah sauh a hriatna te min neihtir hial mai.



"I rindan leh ngaihdan ringawtin kal tum suh," tih pahin ka ṭhut hnaih nghal. A kut a hûm ruh tlat chu la in a kutṭang karah ka kut chu zen lut in nghet takin ka suihzawm a.



"Engkim hrethiam turin ka mit a del hlei nem, ka dem lo bawk," a ti leh nghut.



"Min hmangaih em?" tih pahin ka thlêk vang vang a.



"I hriat kha; Mahse, a ṭangkai lo," a ti anih chu!!



Ka thaw halh a, "Min hmangaih reng rawh," ka ti láwi rât a, engmah kan sawi zui lo. Ngawi rengin kan ṭhu vang vang a. Cigarette-a phawrh a, a ṭankai zui a. A sî zui vang vang a, "Haw tawh rawh..an ngaihtuah ang che," a rawn ti leh nghut a.



"Ka haw lovang....ka zawhna che diktakin min chhâng phawt rawh" ka ti ve leh hmak a.



"Ka chhân tawh che kha," tih nghut pahin a meizuk chu a fawp tâwk tâwk a. "I chhânna kha a rintlak maw?" tih pahin ka tho zui nghal a. Engtinmah min chhâng lo.




A hma zawnah ka ding a, chiang zetin ka en kal bawk a. "Min en rawh..." ka tih rual chuan a mitmeng fiah leh chhungrila thîp zet chuan min en ngar a. "Nang hmangaih tur chuan zinkawng ṭawp ka zawh thui tawh lutuk," a rawn ti nghut a.




Ka hnaih a, a biangah chuan ka dawm a. Chiang zetin ka en reng a, "Nang bansan tur che in ka kawng zawh a thui tawh lutuk. Keimahin min let tir ngawt thei lo," ka tih rual chuan ka kûn a. Kan chal a insîk rual chuan, "Ka hmangaih lutuk che, i hria tiraw? Ka hmangaih che....chu chuan engkim a thlak danglam zo lo em ni?" ka ti chhuak ṭiau a.




"Dy....i thei lo...min kalsan rawh," tih pahin min nemsawn dat a, "I tan a ṭha zawk," tih pahin ka chalah a rawn tauh dat a, a nui lui suk a. A za lo hle tih chu a thawk chhuah hawk danah a chiang reng si.




"Ka nuih a za lo," tih pahin ka kûn hnai a. A taksa depa a thil dahṭhat chu ka ban a. Syringe leh damdawi bur tereuhte chu ka la a, ka bânah a lo man chat a. "Dah rawh...i mamawh lo," a rawn ti hrâwk a.




"Nang pawhin...." tih pahin ka pawt ṭang ṭang a. "Kei chuan ka mamawh alawm," a la rawn ti anih chu!! Ka thlah a, ka ṭhu hnawk a. "Keiin ka mamawh ber che a, nang chuan infiam nan chauh a ni maw min lo hman? Hei hi kei aiin i thlang zawk maw?" tih pahin ka kûn chal a.




Thil ri pawp ka hriat rual chuan ka phu zawk a. Ka hawichhuak thuai a, a ke in a rah nawk nawk chu ka en nghal vat a. Ka nui sak a, Syringe keh nuaih leh Damdawi bûr keh nuaih chu ka en reng a. "Nang aia ka thlan loh zia chu i hrechiang tawh em?" a rawn ti nghut a. A aw khûr dar dar chuan a mamawh zia chu min hrilh hre tho si.




Ka pan hnai a, dingdihlip âk âk in a bek tawn tawn ah ka chelh a, "Ka hmangaih che," ka tichhuak ṭiau a. Engtinmah min chhâng lo mah se nghet zetin ka kâwngah min lo kuah let thung, "Harsatna hmachhawnpui che ka in huam anih chuan nang pawhin ka duhloh thil hi bansan in huam ve ang che aw? Kan pahnih tan i thei ti raw?" ka tih pahin beiseina sang tak nen ka melh ngawih ngawih a.




"Ka mamawh ngawih ngawih laiin nangmah vangin ka tichhia chu anih hi, ka tum ang," a rawn ti nghut a. "Kan pahnih in kan bei ang, harsa mah se nghet taka kan inchelh tlat chuan ka beidawng ngai lovang," tih pahin a khabe chu ka fawp zeuh a. "Theihtawp chhuah rawh aw? Ka ring tawk che ania," ka ti zui vat a.




A pa thlan lungphun chu a en reng a. Ngawi rengin ka en ve tlawk tlawk ringawt a. "In thiam lo reng rengin hun hmang tawh suh. Pathian rorel dan hi dan theih a ni lo," tih pahin a kutah chuan ka chelh a. "Tirawh...haw tawh ang" ka tizui sap a.




Kan inzui chho nghal a, nghet zetin a kutah chuan ka chelh a. Ka kal ṭha duhlo, pangchang zeta ka kal chu hnehsawh zetin min pawtkal zel a. Ka nui hak hak a, ka hmaa kal chu ka melh reng a. Ka lungawina chu tumahin min chhuhsak ka phal hek lo.




"Lo han chho rawh...muangchangin ka rawn chho ang," tih nghut pahin a ding chat a. "Aih...i scooty khalh ah ka chuang khat tawh," ka ti lui tlat a. "Kei aiin i khalhthiam zawk daih ang," tih pahin a kiai suk a. "I sual a nih chu a," tih pahin ka melh zui râm râm a.




Khua a thim ṭan tawh a, engmah ka sawi si lo. Ka phone tak ngial pawh ka ak lo tih ka hriat chuan ka nu leh pa min ngaihtuah dan tur chu ka ngaihtuah thleng nghal vek.




Ngawi reng in a hnungah chuan ka ṭhu kai a,ka hlim rukna te chu an reh nghal rawih rawih thei. Ka nu tumruh hmel ka mitthla ah a rawng lang nghal zat a, a kâwngah chuan nghet takin ka kuah zui vak a, "A vawt i ti em ni?" a rawn tih chuan ka Lu ka thing vat, hrechhuak lehin, "Tlak ka hlau alawm," ka tih chuan a taksa chet danah a nui tih ka hre thei. Thlifim thaw heuh heuh chuan min rawn chhem dai sawng sawng a, ka buaina te hi chhem kiang vek se ka ti takzet. Ka ngaihtuahna mawlmang zet chu awihlo lutuk in ka nui chhuak hak a, a za hlawl si lo.




Kan Gate zawnah a ding dat a, kan in kawngka chu rawn in hawng in ka nu a rawn chhuak a, a rawn pen phei nghal hlawk hlawk chu thin hu dawt dawt in Ramsanga kawr tlangah chuan ka ṭham ngawt ngawt a, chhuk in ka kut chu nghet zetin a rawn hum nghal hmiah a.




"I phone i keng bawk si lo, kan ngaihtuah zia che i hria em?" in sûm tih hriat tak chuan a rawn ti fak a, "Lut rawh, i kalna tur sawi lo in chhuak tawh suh. Ramsang ka be duh che," a tih zawm zat a. Chu chuan min ti hlauthawng zual sauh, "Daisy" a rawn tih nawn leh chuan Ramsanga chuan ka kut chu thlah in a bu nghut a, a mitmeng in kal turin min hrilh nghal bawk.




Hreh tak chung chuan ka kal chhat chhat a, dawhtheih loh hmel fe in ka nu chu a lo thaw halh a. Ramsanga chu ka melh zauh a, hahdam tur a min hrilh niawm fahran in mitmeng dam ruih hian min lo melh a, bu nghat in a nui zui suk.




Inchhung ka luh chuan thawk ka la ham ham a, ka taksa ṭang nasa lutuk chu ka hahdam mai thei lo. Rilru chawmawlh zetin ka room ka pan nghal a, Khumah chuan ka ṭhu thla hnawk a, ka phone lo let bal chu ka ban vat a. Ka nu lo Call tam zet chu ka hmu nghal, chu thil erawh chuan min tibuai rei lo. Ka nu in Ramsanga a biak duhna mawlh chuan a ni min kap.




Ka room kawngka chu rawn in hawng rawk in ka nu chu ka hmaah tak a rawn ding nghal a, "Min nawr lui suh, ka nat anga i nat ka duh lo. Chu mi i tawrh lohna tur anih phawt chuan engpawh ka ti ang," nghet charh in a rawn ti zui a. A aw chu dam hle mah se a tumruh zia ka hriatchianna a ni thung si.




"Mahse, nu...a nghei.." ka sawi zo hman lo, chiang taka min melh chungin, "Kum sawm an nghei hnuah pawh awih duh suh, an thih hunah chiah an nghei hlen ṭhin. Chu chu an nun a ni tawh," a rawn tihzawm leh zat a, rapthlak ti lutuk in ka melh ngawt ngawt.




A hmel ka en chuan ka chak thar a, a luhlul ang chiah a luhlul ka nih zia a la hre lo nge, bum reng a nih fo avangin hlauhthawnna in a khat zo tawh zawk? Ka nui sak a, ka duhna ah ka chiang tih ka hriatna chuan lawmna tur awm miah lo mah se ka zâng in ka thawl hawk mai.




Kan chhungin kan ṭhukhawm a, TV kan en ṭhap hlawm a. "Naute...i Inkhawm ve peih dawn em?" tih pahin ka pa chuan Sana a thlek pah zauh a.




"Ka peih chiah lo....han Inkhawm rawh u. In ka lo nghak ange," ka ti vat a. "Tirawh...in siam ila?" tih pahin ka nu chu a melh pah rulh a, a tho zui nghal a. "A la hma viau lo'm ni?" tih nuah nuah pahin ka nu pawhin a zui ve nghal vat tho.




TV chu ka hmetkual sek a, a hmaa ka channel ngainat em em te pawh ka en ṭha peih tawh lova. A hma zawnga ka thlir tui ṭhin em em pawh ka ngaihven lem lo. Phone ka bih a, Whatsapp leh Fb velah ka luhchhawk deuh sek bawk a.




"Naute...kan kal aw?" ka pa in a rawn tih rual chuan ka melh zawk a. "Umm...." tih bakin ka chhâng lo. Phone chu ka bihzui ngar a, "Room lama i awm dawn chuan kawngka hi kalh ang che," ka nu in a rawn tihzui pawh chu ka chhâng lem lo.




Ka nu te kalliam hnu deuh lawk chuan Door bell-ri ka hre nghal zat a. "Lo lut rawh" ka ti nghal zat. Zoramsanga rawn lut hmel chu ka en reng a. A hmel hmuh ka in ringlo lutuk bawk nen min ti hrilhhai ang reng viau. "Nang maw?" tih pahin ka lo nui sak a.




Ka bula rawn ṭhut pah chuan, "I tum loh zawk ka rawn lang a ni maw?" a rawn ti nghut a. "Hmmm...." tih pahin ka lo melh nghek a.




"Khawnge midang?" tih pahin a hawikual thuak a. Duhdah zetin a ṭhu zui leh nghal a, "An Inkhawm," tih pahin ka melh zauh a.




Door bell-rawn rik rual chuan ka rilru a nuam lo nghal. "Rawn lut rawh u" ka ti nghal vat a. "Kha maw..." ngeiawm zeta kiai suk pahin a lo ti vei hluk a.




U Chhuanmawia leh a ṭhianpa rawn inzui lut chu kan lo endun reng a, ka thaw huai thei. Ka nu te an lo let ah ka ngai hman ania, "In awm maw? Kan rawn tibuai che u em?" U Chhuanmawia chuan a rawn ti nghal zat.




"Teuh lo mai...rawn leng ṭhu rawh u," ka tihrual chuan ṭhuthmun an rem ve nghal vat a.




"Tlaiah khan i nu nen kan inhmu a, 'Zanah rawn leng ngei ngei rawh u' a ti sia... Khawnge amah pawh chu a awm reng reng?" ngeiawm zeta nuih sâwng pahin a rawn ti nghal zat a.




"An inkhawm a...an bâng har lovang. Lo nghak rawh u," ka lo ti thuai a.




Ka bula ṭhu chu ka melh ralh a, phone a lo thâi mawlh mawlh a. "Daisy...i u te hi helamah an awm lo tiraw?" a rawn ti leh nghut a. A ṭhianpa erawh Zoramsanga ang thovin phone a hmet nuap nuap a, an in an lohna chu a nui vur vur chu a ni deuh ber mai e.




Ka chhâng ve zel a, zawhna a ngah lutuk chu ka hne takzet. Ka bula duhdah zeta ṭhu kawisawi chu ka be leh zauh ṭhin tih loh chu a rawn ṭawng ve lem lo.




Ka nu te Inkhawm bâng rawn lut ka hmuh rual chuan ka ṭang nghal ṭeuh, "E he...Machhuan, in rawn leng tak tak a ni maw?" a rawn ti deuh hluai a. Ka pa erawh pindan lamah a lut tlang thung. "Lo ṭhu rawh u, kan va inthlak felfai ve ange," tih pahin Zoramsanga ṭhutdan ngeiawm zet chu a rawn en hâw a, a hawilet hmak rual chuan ka nui sak a. "Mi nghal pa...i duh hi chuan i chimawm thiam ve maw le" ka ti rilru neuh neuh a.




Ka nu chuan a rawn kâwm nghal bawrh bawrh a, "Naute...i u Machhuana hi i hre hrim hrim em?" tih pahin nui var var chungin a rawn ti pah zung zung a. "Police officer a ni tawh ania," a rawn tizui leh zat a. Zoramsanga erawh a ṭhutdan ngai rengin phone a hmet mawlh mawlh reng a.




"Thingpui te in lo in tawh em?" ka nu chuan a ti leh zung zung a. Ka bula ṭhu Message- ka thawn mek lai chuan, "Naute...thingpui han lum rawh," a rawn tizui zat a. Ngawi rengin phone bih reng chung chuan ka tho zui nghal a.




Engmah chhânna ka dawng lo, ka bula a awm reng lai pawhin duhtawkin ka kâwm ngam lo a ni si a. "Ka tihpalh..." tih sap pahin thingpui chu ka siam pah mawlh mawlh a.




"Engnge i din teh hluai? Thingpui a siam kha...." ka nu in a tih ri chu ka hria. Ka misualpa bak a ni dawn lo tih pawh ka hrechiang viau bawk. "Zan dangah ni mai rawh se...." tih pahin ka awmna lam pan a ke pên thawm chu ka hre zui a.




"Heyyy..." zâwi sapin ka lo ti a. A ding dat a, a rawn hawi phei zawk a. "Thingpui in phawt ang" ka lo ti zui sap a. "Zan dangah kan la in dawn nia...ka hmanhmawh deuh thut a," tih nghut pahin a nui lui suk a. "Ka phei phawt ange" tih pahin a kal zui a. Rang takin ka ûmzui vat a.




Kawngka bulah chuan ka ding a, ka en reng tih hria ang pawhin a lang lo. Vung takin a kal phei hmawk hmawk a. "Anih...muttui le," ka tih pawh chu hria awm angin a lang lo.




Ka lêt a, thingpui chu ka châwi phei a. Ka nu chuan uluk fe in min lo en reng tih pawh ka hria. Ka ṭhutna ngaiah ka ṭhu a, phone chu ka khawih zui nghal a. Ka message thawn pawh chu a la en miah lo anih chu!!




"Daisy chu i lungawi vak lovang a? I inleng kan rawn hnawt haw te pawh a ang riau mai," U Chhuanmawia chuan a rawn ti zauh a. Ka lo nui ringawt a, "A zialo hle mai" a rawn tizui a. "Chutiang engmah a awm lo" ka lo ti thuai na a, ka chhungril erawhin a haw ngawih ngawih thung.




"Machhuana te hi in fakawm ngawtin ka hria. Nangni awmlo ta ula kan ṭhalaite ruihhlo avanga an boral tam dan tur hi," ka nu chuan sawi satliah angin lang mah se a tum erawh ka chiang viau.




Ka nu sawi nuam tih zawng a nih ang bawkin ka hma zawna ṭhu lah chuan fak nih chu nuam a ti hle tih ka hria. Ka nu chu a ṭawng tui bawk a, ka pa in a koh pawh chu a hre miahlo niin ka hria. "Nu....ka pa in a ko che in ka hria," ka lo ti thuai a.




Ka nu chu pindan lamah a lut phei zui a. Ka awmdan leh khawsa ziaah chuan thup hle mahila ka kâwm châk vak lo tih an hrethiam a ni chêk ang chu, "Ṭhianpa....kan phei dawn em ni?" tih nghut pahin min rawn melh zuk a. "A la hma em mai," ka ti liam puat a, an tho zui ta tho.




Kawngka ka kalh fel a, hmanhmawh takin pindan ka pan thuai a. Khumah chuan ka ṭhu hnawk a. Ka thaw halh a, ka phone chu ka hmet kual sek a.



Whatsapp ka lut chiah tihin Brenda-i call a rawn kal. "Aw ṭhiannu..." ka ti nghal thuai a.



"I buai em? Awiii...sawi tur ka ngah lutuk" a rawn ti nghal bawrh bawrh a.



"Ka rindan sa tho alawm" ka lo ti vat a.



"I rin aiin a ṭhâwng mai thei che"



"Eng lampang nge?" ka ti vat a.



"Enteh ṭhiannu....ka na hi a ni tawp.." hriatchian thuai ka ngahhlelh nen a sawi kikual sek zui a.



"Rsa hian damdawi a khawih leh a..." a rawn ti chuai raih a.



"Engnga? Engtin maw i tih?" ka lo ti mawlh mawlh a.



"Kum 5 a ngheina a ni tawh sia...ka rilru a na zual.." a rawn tih rual chuan, 'Damdawi ti ho chu Kum sawm tâl tap an nghei anih loh chuan rin loh tur' an tih te chu ka hrechhuak zawk a. Ka nu thusawi pawh ka hrechhuak zawk bawk a.



"Bsa-ṭhianpa hi Zoramsanga te nen pawh an inhre lutuk," a rawn ti hnual raih a.



"Rsa te nen an ti ho em ni?"



"Ka hre tawh bik lo. Chubakah, a aia chanchin lungchhiat thlak a la awm..." a rawn tih lai chuan ngaihtuahna tam tak ka lo sêng hman a. Zoramsanga nena in kaihhnawih chanchin lawmawm loh hriat ka duh lo.



"Hello..." a rawn ti leh a. "Aw..." tih ngawtin ka chhâng a. "I ngawi reng ringawt a, i dah emaw ka ti alawm" a rawn tizui leh a. "Ṭhiannu...ka in ngaihtuah nasa lutuk; Mahse, ka ṭhian i ni a. Ka tih tur hi ka lakah pawh i tih tur tho niin ka hria..." a rawn tizui leh a.



"Ummm....engkim chiang taka hriat ka duh," ka ti nghat a.



"Bsa ṭhianpa Sawmtluanga sawidan khan," a ngawi zui leh vang vang a. Engmah sawi lovin ka lo ngaithla kar reng a. "Zoramsanga hi a thisen a thianghlim lo anih hmel," a rawn tih zawm anih chu!



Ka thaw hawk in ka hria...ka bing mup mup a. Chu thu chu zawh nawn ka duh lo. "Bren....naktukah kan inbe leh dawn nia," tih pahin phone chu ka dah hmak a.




"Ni lo...ni lo... Zoramsang... nangmah nilo Zoramsanga dang an ni ngei ang," ka ti mawlh mawlh a. Mahse, ngun takin ka ngaihtuah a, thil ni thei, thil thleng thei a ni ve tho tih chu ka hrechiang em em mai si.





(to be continue.......)


Ads khu min lo click sak ve hram zel dawn nia...👇🏻👇🏻👇🏻 Ka lawm viau ang🥰🥰🥰



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)