Forbidden Love LAST CHAPTER

[Hluhlutei]

Ka story te min lo chhiar sak tu te zawng zawng chungah thinlung takin lawmthu ka rawn sawi a, Ka group link tekha lo join ula thawnthu dang dang ka rawn post ṭhin dawn tih ka rawn sawi nghâl bawk e...




Ka in ah chuan ka haw leh rih a, Pu Albert-a paw'n min rawn zui haw veleh, riah ala tum zui, pawisa chungchâng chu sawi ṭha ka tih avangin ka han insiam rem te te a, "Hmanah khan i nu in min rawn tlawh a" ka han ti chhuak hlawl a, min lo en kur, " Chuan?" tiin zawhna mit meng hian min rawn en, "Pawisa min pe ṭeuh a, engzat nge pawh ka hre tawh lo, pek let ka tum a, mahse Faki khan alo tlânbo pui daih a" ka han ti zui malh malh a, "Ka nu chuan pawisa a hnawh bo che alo tum amaw?" arawn ti deuh hu a, "Hnawh bo pawh a ni chiah lo, min khawngaih ve a" ka lo ti ban chat, "Tinge tunah i sawi chauh a?" arawn ti leh, "Sawina hun a awm lo em alawm" ka lo ti leh ringawt, a thinrim ka rin tehlûl nen a thinrim lo chu ka thaw huai mai, "Faki chu biak pawh ka be tlang thei lo" ka ti zui zauh a, "A pawi lo e, a mamawh ve a nih dawn chu" alo ti mai a, a tam dawn sia keichu ni ila ka ui viau ang.

Tlai ah chuan rawng te ka han bawl a, min bawlpui ka rin tehrêng nen hna min thawhsan daih, min dim ve deuh te ka lo beisei ania, Chaw lah chu a ei tlêm em em lehnghâl, "Palting pui khatiang tiat lek ei te chu" ka tih chuan a nui suk ringawt, "Ka ei thei lo, a tui lo ka tih vâng pawh ni lo in, tunlai chu chaw ei a har ka ti, ka mut a chhuak reng bawk" a ti ve nuah nuah a, "I nu hah a nih chu" ka tih chuan alo nui ve suk, kum 40 tlin dawn têp fa a nei ve dawn chauh ania, "Mipa nge hmeichhia a nih i rin?" tiin phûr fahran hian ka zawt a, "Eng ang pawh ni se ka lawm vek mai" alo ti mai a, thâwk ka la halh ringawt, "I rin thu talin sawi ve la" ka tih chuan, "Rin dan ka thiam lo" alo ti leh tawp, a hahthlâk lam lek lek ṭhin, chaw ei na ka tih fel mawlh mawlh lai chuan, "Naktukah lamah kan inthar luah tur chu ka en dawn nia, i puar tak tak hma in" arawn ti a, "Mahse ka nau pawh engmah ka la hrilh bawk si lo" ka tih chuan hrilh kher a ṭul loh thu alo sawi ringawt.

Zanah chuan a lodge lamah min phei puiin kan mu lum vang vang a, ka khum tereuhte a mut kha chu sawi kher lo mahse a hrehawm a ti ve deuh a ni mahna, "Biak in a mokawr nena pasal neih chu i duhthusam a ni ve awm sia" arawn tih chuan, "Ni tho a, mahse ti pawh hian ka hlim tho alawm" ka lo ti a, "Ka inthiam lo hle mai" tiin min rawn kuah a,chutiang ka phût loh zia hi hria se a sawi chhuak kher lo ang mawle, inneih kawr nalh tak hak ringawt hi inneih rei na a ni kher lo tih ka hre chiang ve emai,

"I man hi tunge pe ila ṭha ang?" arawn ti leh, "Ka hre tawh bîk e a" inthlahrung tak chuan ka lo ti a, thâwk ala hawlh, hetiang ka nih fo na hian ka mal zia min hriattir fo ṭhin, "I mut a chhuah tawh chuan muhil daih rawh" a ti leh ta daih a, "Ka mut pawh a chhuak lo" ka lo ti sap ringawt, tunah hian hlim viau tur ka nih laiin tinge hlauh thawn rûk na ka neih tlat le? ka awm dan hi ka hrethiam tawh chiah lo, ngawi reng chuan tho in a laptop chu ala chhuak a, hna min thawhsan leh dawn emaw tiin ka lo lungngai hman hle, mahse video pakhat naute insiam dan video mizo ṭawnga an sawi na vel chu min entir ta zawk a, ka hlim veng veng mai, "Fa tam deuh kan nei ang" tiin ka biangah arawn fawp zauh, "Pahnih a tawk" ka lo tih chuan, "Pa nga tal" arawn ti nia, "Ka tar hma dawn lutuk asin" ka lo ti nang nang a, "Unau tam hi a hlu, fa mal ka nia a hrehawm lutuk" arawn ti a, "Aw le, a nih, kan nei char char anga ni mai" ka tih chuan arawn nui ve suk a, hetianga a awm hian a nia ka duh zual ṭhin, "Kan naute chuan chhûn che sela ka ti e" ka tih chuan, "A ho emai chutiang" alo ti ringawt, ka thaw halh ringawt, ava han romantic lo ve tak e aw, mahse a hlim ve hle tih erawh ka hria a azia tho mai.

Ni a liam a, thla tam tak a ral meuh chuan keipawh ka puar lian ta khawp mai, kan inluah ah awm tawh lovin an in pui lamah kan awm tawh a, ka nau pawhin min rawn fin ve, amah chuan duh lo viau mahse Pu Albert-a hian a thlahthlam ngai lo, a nau ang tak takin a en ve ṭhin in ka hria, kei ai mahin a nu leh a pa techuan an duat zawk, ka nu pawh a tir ah hel ve lek lek mahse tunah chuan a zia deuh tawh, mahse keimah ber zawk hi a ni, Pu Albert-a nen kan bul ṭanna vang hian nuam takin min awm tir thei ngai lo, pawn ka chhuak ngai lova, ka hmelhriate hmuh ka hlau ngawih ngawih a ni ber, a nu leh a pa chuan ka nau chu an fapa tak tak ang hian en in ka hre ṭhin, ka nau a nih vang pawh ni lovin mi ze ṭha tak a nei reuh a, mi ṭawng tam zawk zawk a ni lova, thu a âwih thiamin a len chhuah ve dawn pawhin keimah min dil lo in ka pa hi a dîl thlap zel, an lawm zawng a sawi ngai chuang lo na in a chêt zia in a lantir ṭhin, inkhawm a ṭhulh ngai lo techu an fak thei hle a, vawi khat a Christmas pocket money tur tuaka in hlawh ve a dil a, Ka nu leh Pu Albert-a chuan an phallo viau na in ka pa chuan a ṭhian te in sak na ah inhlawh na tur azawn hmuh sak nghâl, "College a kal ve tawh dawn bawk a, intuak ve rawh se, pawisa lamah chuan inthlahrun a ngai miah lo na in mahni thawh chhuah ngei hman tluka nuam hi a awm lo" a ti ve tlat a, ka pawmpui viau, a naupang tawh lo a, inhlawh rual a ni ve tawh bawk nen, a inhlawh ve lawp lawp a, a chau hmel hmuh tur a awm ngai chuang lo, tlai lamah badminton khel turin a chhuak leh peih tho zel, keipawh ka nau neih hnai tawhin na neuh neuh ka nei ve ṭan a, Pu Albert-a chuan min duat hlurh ngai lova, min ngaihsak viau tho, chhun lamah a buai loh chuan ka chanchin ngaihven in min rawn call ziah a, tlai lama arawn haw pawn ka chah lâwk te a nih loh chuan eitur tih vel min rawn hawn ngai chuang lo, mahse vawikhat chu Jeleby ka ei châk lutuk a ka va chah ve ngei a, theihnghilh daihin arawn haw a nih chu, ka thinrim lutuk tih ngaihna hre lo chu ka ṭap tawp, ka pa in alo hriat chuan ala hau zui, ka nau a rang rangin Jeleby lei turin Bazaar pui ah ava kal ta ringawt a, chumi zan chuan min ngaihsak lo riauva hre tharin a bulah pawh ka mu duh lo, chhuatah a mu a nih chu, ka hria, mi inzir mi tak leh hna âtchilh tak niin hmeichhe han duat dan leh tih lawm dan pawh a hre lo, Vday paw'n engmah min pe lo, mahse ka ngaithiam zel a, khami zan kha chu thinrim ve tak ka ni, aw ka vîn a hmang ngai lova kan inhau ngai lo tluk a ni, hmanzan pawh chuan keimah chiah ka thinrim a, min thlem pawh a tum chuang lo, mahni a thinrim reng chuan awmzia a neih loh vangin ka lungawi ve leh mai kha nia, ka phone chu rawn riin ka ngaihtuahna aṭanin ka harh zawk, ka en chu ka pasal ngei alo ni.

"Na te i nei em?" arawn ti nghal, "Nei lo lutuk lo ka mu leh tawh" ka lo ti var a, "Mu hahdam char char rih rawh, na i neih chuan min lo call vat la, ka nu leh ka pa pawh kha engmah hrilh hreh tawh suh ang che" a ti a, ni danga a sawi ang tho a ni, "Ka hria lawm, mahse ka ngai che, i hna hi châwl thei la ka ti" ka tih chuan, "Min mamawh tho mahla, min mamawha min rawn pan tu te hi ka chawlhsan ngawi thei bîk si lova, Hei OPD an khâr tawh a, Class ka la zo anga ka rawn haw hma ang" a ti ve a, "Ka kawng leh ka tai hi ana riai riai reng a,mahse chutianga na lutuk chu a ni chuang lo" ka tih chuan, "Ka nu leh ka pa kha hrilh vat rawh, hei class ka la zo anga ka rawn haw ang" tiin a phone a off zui a, keipawh tuiin tura thawh ka tum chu ka tai chu namên lo hian arawn na zawk a, ka zun arawn chhuak nghâl, tlêm te chiah ka zung, ka tai leh kawng chu arawn na ta tial tial a, kan room hi inchungah daih a awm vangin Ka ṭawng ring theih tawh bawk si lo chuan ka nu chu ka call ta tawp a, ka nu leh ka pa, matea nen an rawn tlân chho nghâl, Matea college chawlh lai alo ni hlauh a, ani chuan min kuah thla in an vai chuan dawmdawiin lamah min hruai ta nghâl a.

Casualty ah chuan pu Albert-a ṭhianpa Gynecologist Doctor alo awm hlauh, Cabin nuam takah min dah phawt a, ka la vei rei deuh tur thû ala sawi zui, ka thlan tuiin min bual a, khum bula ṭhutthleng ah chuan ṭhu in khum tlâng chu ka hmer ngat ngat reng a, ka nu chuan tuar chhel min tiin min khawngaih hle a, ka pa erawh chuan ka na tuar a hmu duh lo in hmun dangah a kal bo daih thung, ka nau lah chu a ṭap lo chauh lehnghâl, "A u a na em?" a khat tawkin alo ti sek, ka nu pawh chuan coconut tui min intir zauh zauh reng bawk, engtin mah min ti lo mahse ka bula an lo awm ve ka thla a muang em em tawp, min be sek lo se ngawi rengin min lo en tawp se tih chu ka duhthusam a ni.

Rei vak lo ah Pu Albert-a chu a rawn lang ve hlawl a, min biak pawh chuan ka chhâng lo, ka ṭawng peih lo, hrethiam takin min be zui tawh lêm lo, a khât tawkin ka rûm chhuak leh hak ṭhin, a chang leh ka bungbu a, anat dan chu eng ṭawng mah hian a hrilh fiah zo lo ang tih tur khawp a ni, khawlum ni miah si lo in ka thlan a luang a, ka nau tih ngaihna hre lo chuan min lo zâp leh ṭhin, Ka pasal chu ka bulah rawn ṭhu in ka kutah chuan arawn vuan a, nghet zetin ka lo hmer nghâl, a âwmah chuan ka lû nghatin ka rûm chhuak halh halh a, ka hnung zangah chuan rawn chûlin "Tuar fan fan rawh iti thei tih ka hria" arawn ti dam thlup a, ka kut lehlam chuan a dâr ah ka hmer zui vak, "Awi...ana lutuk..." ka ti chhuak halh a, kil khatah ka nu alo ṭawngṭai, na tuar tho mahila tunah hian ka thla a muang takzet a ni, ka muttui arawn luang a, ka ṭap chuang lo, chutah nurse pakhat chu rawn lûtin, "Lalnunhlui kha rawn kal tawh rawh le " arawn ti a, ka nu leh ka nau chu an lo tho nghâl hluai, "Keiman ka va hruai ang'e" Pu Albert-a chuan a ti a, muangchâng chuan min kai chhuak a, kan kal na kawng chu a thui hran lo, ka châwl leh dat ṭhin, wheelchair a min nawr a tum chuan ka lo hnar nasa mai, ṭhut kha ka thei tawh lo, chutah Doctor chuan min zen in "Ehe!...a lu arawn lawr thui tawh lutuk" a ti chûl a, a rang rang in nau neihna room ah min hruai lût nghâl.

Ka pasal pawh a ṭhianpa a nih vang leh Neurologist Doctor daih ni mahse Doctor vetho a nih vangin a luh chu an phal sak ve a,ka pasal kut vuan ngeiin, Keimah ka la upa zawk zawk lo a, ka lo in fit ve hrim hrim bawk nen a san chhuah chu ka harsat hran lo khawp mai, naute ṭap ri ka hriat rual chuan ka mittui rawn luangin ka ṭap tawp a, ka pasal chuan ka chalah rawn fawp in "Mipa a ni e" arawn ti sup, "LalPa ka lawm e" tiin ka phun sap, a âw lah chu ahan ṭha reuh em em khawp a, ka pasal pawh a hlim ve takzet a ni tih ka hre thei "Ka hmangaih che u" tiin ka chalah arawn fawp a, kan fapa chu zeilo takin a pawm zui nghâl.

Cabin lamah chuan lêt leh tawhin kan naute chu an bial laih reng a, ka nu leh ka pa te, Ka nau hlim hmel techu hmuh nuam ka va han ti tak êm, Ka nu ka pa, ka vanneih zia leh Khuanu hian min lo hmangaih bîk zia hi ka lo van hre lo rei tak êm,ka rilru chuan tiin kan fapa hnute hne dek dek lai chu kan en ta reng a, hnute tui lah chu ka han ngah em em khawp a, ka pasal chuan a khât tawkin a khuh na chu a hawng sek a, ka nu chuan ahan khak leh rih ṭhin, kan han nui ho leh dar dar a.

Ka nu chuan min riahpui duh viau mahse ka pasal chuan min riahpui a tum bur vangin min riahpui ta nge nge a,

"Hei lo pawh hi ka la duh ania, tawrh ila inhuam em?" a tih chuan, "A teuh lo, hei bâk chu a theih tawh loh" ka lo ti hmak, a nuih aza ngei mai, "Zu i in tawh tur a ni lo, chu chu Bawihtea apian aṭanga i intiamna ni rawh se" ka tih chuan ka hmui ah min rawn fâwp zauh, "Tehreng mai" a ti zui a, Kan pahnih in kan fapa tui taka a muhil lai chu kan thlîr dun ta vang vang a.

A TAWP TA