BY : Msi, Hmeichhe naupang tereuhte
"Bawihte, ilo thlenna a rei tawh em...?" Tiin ka pan hnai a, hlauh hmel zet hian ka hnung a Rosanga ding chu a en a, "kal tawh rawh," tiin Sawmtea chu room lamah ka hruai phei a.
"Vawiinah lehkha in zir hnem em...?" Tiin a form vel chu ka thlak sak zung zung a, "Mami kha kha hman tawh a games min khelh pui tu kha a ni em..? Lo kal kha nangma țhianpa kha," a rawn ti heu a. Alo la hre reng em maw ni.
"Umm ni e, inbual rawh aw nge inkhelh zawh ah i inbual dawn...?" Ka ti daih a, Rosanga chungchang pawh sawi pui ka duh lova ka sawi ngai hek lovang.
"Inkhelh zawh ah a ni mai, au Felfela alo kal tawh ami...?" Naupang rilru thianghlim tih takah a duhzawng sawi chuan theihnghilh veleh nghal maiin a sawi zui tawh lem lova.
"Sawm love an la bang lo aniang, duh leh inbual phawt la ilo haw hunah i inbual leh mai dawn nia," ka ti a, a form vel chu thing pharh nawk nawk in ka khai sak a ka khai lai chuan khumah alo mu zawn zawn a alo let tual tual a amah in a ni a infiam leh tawh ni.
"Mami, phone games khelh theihna ka duh e... Dawnga pawn a nei a sikulah Alfred-a te nen games an sawi vak vak zela," khum a mu chung chuan a rawn ti a, "ka phone ah sawn rul games kha a khelh theih kha va khel rawh," ka ti nui hak hak a.
"Mahse games pui tawk khelh theihna ang kha ka duh ve alawm ka țhiante chuan an khel thei vek a Dindina pawn ka duh ve alawm," ala rawn ti țang țang, a țhiante hian a bulah an lo sawi leh tawh emaw ni le tun hma in games an țhiante khelh an sawi pawn a rawn sawi chhawng ngai miah lo asin mawle.
"Mami.... phone lian tawk ang kha nakinah lei ve ang aw games khelh theihna ang phone kha," mu ngawih ngawih chung chuan a rawn ti leh hram a, "aw le, nakinah pawisa tam tawk ka chhar hunah kan lei ve ang khawi le towel la la inbual ang le," tiin a mood tih on tum chuan ka khawih rak teng tung a a țawng duh leh barh barh tawh.
Kan gas hman lai a zawh avang chuan a hman leh tur kawl ka lo nei mai lo nen kawmchar lam thuk ah kan chhuang ta ngawt a chaw kan ei tlai in kan ei fel meuh chuan khua a thim fel der tawh.
Sikula an hun hman dan te an sawi a an bulah awm in ka ngaithla in ka rilru hmundanga dah ka tum a ka theilo, thil thleng thil ngai amah in a rawn in lar zut zut a ka nau te ka en chang a ka mangang leh ringawt țhin avang chuan ka â mai dawnin ka hria.
Ka nau te hi awm lo phei se chu engtin nge ka awm ang..? An tan ka nui lui a ka țawng hram hram a ka awmdan ațanga an hriat ka duh loh avangin ka awmdan leh hnuhma lang te ka thup hram hram bawk.
Engtin nge hna ka kal ngam tawh ang...? Vanlala pawn a hre vek tawh ang a ka chungah khatiang thil kha an duh vang ngawt a ti an nilo tih, ka duhthlanna telna video an en tawh bawk. Ka zak a, tenawm ka ti a suangtuah pawh ka suangtuah phak loh thil chu zan khat thil thu ah awlsam takin a bo thei a chu chuan min ti hlau a ni.
Vanlala te, Fibby te, Hriatkima leh Rosanga leh hmanni a khami room a awm ve dang te pawh aniang chu ka hmu zak a tuman engmah rawn sawi lo mahse ka awmdan an rawn hmu vek tawh. Ka zak a hmuh ka hreh ngawih ngawih a ni ber.
Mahse ka phone ka la bih âwl chuang lova beisei ngam tur ka nilo tih ka in hre reng chung pawn ka la beisei tho. Video a en tawh hnuah pawh eng video tak nge an en ka hrelo mahse ka la beisei tho ka â a nih loh vek pawn ka rilru a kim chiah lo te pawh a ni ang.
Ka nau te an mu tawh, damdawi mum tereuhte chu khur dar dar in ka keng kâng a a kawr pawh dawhkanah ala awm thlap bawk. A kal dawn khan dawhkanah a dah aniang ka nau ten an hmuh hlau zetin ka thukru nghal vat a nih kha.
Ka ei ang nge ei lo ang tih ah ka inngaihtuah buai a dawmdawi chu a rap in ka rap hial mai, Rosanga thusawi ka ngaihtuah a ka mittui a rawn hnam nghal țiam țiam bawk.
Ka ei hlau, ni e... ka ei ngam lo. Ka hlau a, ei lo ta ila a sawi ang thil kha thleng se tih vel ka ngaihtuah a ei ka tum a mahse ka ngam lo eng emaw keimah ah hian tîm na a awm a ei lo tura min ti tu awm ang mai hi a ni.
•
"Bawihi, thil ka zawt ang che ka ti a mahse hun remchang hmasa ka nei leh thei si lova. Hmanni zan ilo haw loh tuk a i taksa a duk awm khan ka mit a la tlat a mahse hun remchang ka nei zawm si lova i chungah enge thleng engtin nge khang duk te kha i neih theih...?" Ka kun ngal a ka ban chu ka thukru bawk.
Khami ni khan zawhna a nei tih kha ka hria a mahse min zawh zawm lo a zin zui avangin. Tunah ka taksa a duk awm te an reh țan dawn lek lek ah min zawt a engkim a rawn thar leh vek niin ka hria.
"I chungah enge thleng bawihi...? I țawng tlem sawt si a i pa Zova te an rawn kal dawn pawn chhunglamah ilo kalh tlat zela hna pawh i kal ngailo an ti a," țhenawmnu chuan a rawn ti leh a mahse ka la chhang chuang lo.
Ni e... hna hi ni 5 chuang chu ka kal tawh lo inah ka awm tawp a ka rilru leh mittui ka kawm a ka nau te avanga engmah thleng lo anga awm theih ka in zir a mahse ka theilo ka taksa hnuhma lang ten min ngaihtuah tir lo theilo a thil thleng fumfe tun thlenga ka la hre theilo hriat tum pawn ka bei nasa bawk.
Ka țawngțai nasa zual a mahse ka chham ngai hlir a ni ka chham țhin ni. Ka zak a veng chhung mi te hian hre ve in hrelo mah ila ka hmu zak a puan pho tur ringawt a ka chhuah pawh a min en zawk pawn an hria ni ang tih rinna nen ka zak in ka inthlahrung a hawi pawh ka hawi chhuak ngam ngailo.
Vanlala te fibby te pawn min rawn be ngai lova an ngaihdan tur pawh ka rin thiam niin ka hria. Mahse keimah a beisei ruk awm ve reng erawh chuan beisei chhete chu ala nei a mahse a dam țawk țawk chauh tawh a ni ber.
Tiang a awm tur ka nilo tih ka inhria ka hre lutuk, kan unau tan hna ka thawh a ngai tih ka hria hna ka thawh loh chuan khawi ațang mah in ei tur kan nei dawn lo. Ka nau te rilțam a an awm ka phal bik lo mahse zahna leh inkiltawihna in min chenchilh a theihnghilh a thil kha thleng satliah ang a ngaih ka tum pawn ka theilo tlat lo a ni.
U Mza pawh a rawn leng țhin a mahse a ni tak ngial pawh ka hrilh ngamlo, a ni phei chu a thianghlim si a min duh thu a sawi kha a ti tak tak a nih phei chuan a ngaihzawn tlak ka ni lova tuman hre lo mahse a mualphona siam tu amah ti zahawm lo tu mai chauh ka ni dawn.
"A țha e bawihi, sawi turin ka tilui lo che ania a țha vek ania," tiin ka dar ah chuan a rawn tuai a.
"Engmah sawi tur ka hrelo," ka ti a, ka mittui a rawn hnam țiam țiam bawk, "enge i sawi awmzia..?" A rawn ti thuai a.
"Engmah sawi tur ka hrelo, ka hriat leh thil thleng chu thil tawi te mai chauh a ni a mahse chu chuan a hril kim viau a ni a bak ka hriat belh thei tawh lo," tiin thil thleng ka hriat chhun chhun chu ka hrilh a ngawi reng a ngaithla in alo bu nghat nghat a min khawngaih hmel zetin min en bawk.
"Bawihi, i chung a thil thleng te chu ava han mak ngai ve le..!" Min rawn kuah a ka mittui a luang ngiai ngiai bawk.
"Tinge a tirah khan engmah min hrilh lova. I nu ang in min en la i chanchin a țha emaw țha lo pawh min hrilh țhin rawh ka tih țhin che kha," ka lu ah a tuai a.
"Ka ngamlo alawm, ka hlau a," țap țeuh chung chuan ka ti a.
"Aw bawihi ka van khawngaih tak che em..!! Nangmah in ngawi rengin i nâ leh hliam chu chhunglam ah tuam dam i lo tum a ka van lainat tak che em..!!" A ti vawng vawng.
"Awmdan tur pawh ka hre tawh lo, thil thleng satliah ang a ngaih a pal zam ka tum a mahse ka thei lo kan awmdan rawn hmu tu te kha tute nge an nih i hria em hna ka kal ngam lo video a awm a an en tawh bawk awm ngaihna pawh ka hre tawh lo inah ka awm tawp a ka rilru rawn hah leh thut țhin avangin ka țawngțai leh tawp zel," ka ti chhuak sap.
"Video chu i en ve tawh em...?" Min ti a ka lu ka thing ringawt.
"En ve la," a rawn tih chuan amah chu ka en nghal zawk.
"Ngaih țhat loh lamah la lo la, i video ni a an sawi an en chu nangmah ngei tih i chian nan va en ve ta che. Thil i hrechhuak thei lova thil thleng chu i hriat tur a ni alawm," min ti a, "ka chunga thil thleng video maw...?" Ka ti halh.
"Ni e.... ngaih țha lo rengin i awm a video en lovin video a a nangmah ni ngei an en chu i en ve ngei ngei tur a ni nangmah pawh ilo nilo thei a," min ti leh a, ka lu ka thing ringawt.
"Keimah chu nilo ila heti chen hun a kal tawh min rawn hrilh daih tawh ang chu chu ka ring a ni min rawn hrilh tawh ang," ka ti a.
"I beisei em ni...?" A tih chuan engkim chu a reh nghal vekin ka hria, "chutiang ang rinna leh i beiseina te chu a thlen loh chhan hriat chu i hna tur a ni. Video ami chu nangmah ini tih a chian chuan engtin nge thil an rawn hrilh ngam ang che. Țhian țha an nilo hmelhriat satliah an ni," min ti a, ka thaw chhuak hak.
"Nangmah ngei in ti huaisen la, hetiang tawp a awm lovin thil thleng va chian la va kal la hetiang ngawt hian awm loh tur ania thil thleng chu i hriat ve tur a ni alawm bawihi in ti chak la i hmachhawn a ngai a ni. I nau te hi en ta che nangmah thlengin, lungngai a awm hman in nilo tih hre tur ini," min ti a ka ngawi reng ringawt.
"Video chu i en ngei ngei tur a ni bawihi thil thleng i hre ve tur a ni. Nangmah a i kal ngam loh pawn ka kal pui thei reng che ania," min ti a ka lu ka thing ringawt, midangin an hmuh a țhenkhat in an hmuh kha a tawk lutuk tlat a ni mit tam tak in a hmuh a mit dang a mitthla tir tura hmuh tir kha ka duh lo bawk.
"Chaw rawn ei phei ula vawiin tlai chu," a tih zawm daih a, "a ngai hleinem hei alu te ka kang dawn a," ka ti a.
"Rawn ei rawh u rawn ei rawh u, sawtah pawh ka kang dawn alawm. Chaw ei ho te a khat lutuk tlat chaw chhum sa ken pawh a ngai bawk lova rawn ei rawh u ka tih chuan rawn ei ula a ni ringawt," ti lung lung in kan chawhmeh țhing vel chu a enkual a kan unau chuan tlai lamah chaw ei tur chuan kan phei leh ta nge nge.
Zingah chuan hna kal tur chuan ka insiam ve thlap a mahse phurna chhete mah ka neilo, kal lo tlang ila ti hian awm tawp ila tih te chu ka ngaihtuah leh hnuhnawh a mahse ka nau te ka ngaihtuah tel lo thei silo.
Phur lo zetin ka pan hnak hnak a Hotel kawt ka thlen te chuan ka lut hreh lutuk chu ka ding reng ringawt a, dar 10 nasa takin a pel duai tawh bawk.
Ka va luh chuan enge ka sawi ang...? Video ka lo en ka ti tawp dawn em ni..? Enge ka sawi ang tu bulah nge ka kal ang a enge ka va tih ber ang..? Ka rilru a insual buai a let leh tum chuan ka in inher leh țhin a mahse hmachhawn ngai ni a lang chu hmachhawn turin ka in buatsaih ta zawk.
Ka lut a staff țhenkhat pawn a lo awm ten a min rawn en leh țhin chu ka hmuh hmaih lo, thil thleng an lo hre vek tawh a nih pawh in ka dem lova mahse ka zak a ni. Mihring vek ni mah ila hmuh ka zak a nuam pawh ka ti bawk hek lo.
A chhungah ka lut a alo reh deuh țhap a mikhual awm loh lai a ni nge ni, counter lam pawh pan lo chuan lift lam chu ngawi rengin ka pan nghal nal nal a ka kalna lam tur pawh chiang lovin ka kal ve tawp a mahse ka tawpna tur chu ka chiang in ka hria.
Lift kawngkhar a rawn inhawng a ka hawi chhuak a chhunga chuang ka hmuh chuan ka meng deuh kâwk..!!!
"Mira," Fibby chuan a rawn ti deuh hliai a ka hawikual a mi chuan min en hrek hrek mai bawk, "lo lut vat rawh," tiin min pawt lut a hreh zet chuan ka lut ta ngawt. A bulah Hriatkima a ding ve reng a nuam pawh ka tilo engkim an hre ve vek tawh âwm si a.
"I țha em...?" Min ti hmasa ber, ka nuih ringawt a an bulah pawh a ding lo chuan tlem in ka ding hnung deuh a, "Mira... thil thleng te," Hriatkima'n alo pawh chah avang chuan Fibby chuan a sawi zawm lo a thaw halh a.
"Ka lo kal țhin a mahse in chhunglamah a in kalh daih zela call che pawn ilo hawn duh loh ka ring a ka ngaihtuah che asin. Nitin ka lo kal a mahse kawngkhar chhunglamah a inkalh ziah a in țhenawmpa khan let mai turin min hrilh țhin," a rawn ti a, ka ngawi reng ringawt. A rawn kal tih ka hre ngai miah lo.
"I țha tih hriat chu ka lawm kher mai Mira.. ka ngaihtuah che asin, ka be ngam bawk silo che a," min ti a, "ka țha lutuk alawm," ka ti ringawt.
Min rawn kuah a, "Mason-a bulah i kal dawn em ni...?" A rawn ti leh a ka bu ringawt. Ka kal dawn em pawh ka hrelo mahse ka kalna tur ni ngei chuan a lang tawh ka rilru in duh lo mahse ka taksa chuan zawm lovin min pan san ta tho a ni.
Fibby chuan min be reng a mahse a rul tawk lek bak in ka chhang lo, staff kan kal pel apiang te chuan min en tlat ni hian ka hria a nuam pawh ka tilo bawk. Vanlala awmna office thlen hma deuh hlek a peng phei ah chuan Hriatkima chuan min kalsan a ka hawichhuak in a chumi peng a Rosanga te rawn kal phei ka hmuh chuan hawisawn in ka kal nghal hlawk hlawk.
Hmuh ka duh loh ang bawk in amah pawn min hmu lo se ka duh.
Vanlala office kawt kan thleng a, "Miss.. tun ang hunah eng thil nge ni chuan u Mira.. nangpawh maw...?" Min ti a, min hmu chu mak a tih hmel kher mai.
"Boss a awm em...?" Fibby chuan a ti a.
"Aw awm e, mahse....." a tih lai mek chuan intercom rawn riin Vanlala ti ngei tur chuan coffee a lam a ni ngei ang dah zat tur a zawh danah chuan ka lo hrethiam nghal mai a inleng a neilo a ni nih hmel.
Fibby pawh be lo chuan ka va lut tlang tawp a a dawhkanah a țhu lo tih ka hriat a țhutkhawmna lam ka pan phei chu a țawng ring zet avang chuan ka ding chawt.
"Chhuak rawh ka hmu peih lo che," a ti leh țhawt a..!! Chutah hmanhmawh zet hian staff mipa pakhat chu a rawn tlan chhuak ti tih a a hnungah hmeichhe pakhat hian a rawn zui chhuak bawk.
Muangchangin ka pen hma a, ka hmu ringawt dawn a ni a enge ka sawi ang..? Video chu ka lo en ka ti tawp dawn em ni enge ka sawi ang enge ka zawh anga enge helai hmun a ka tih tum ber pawh ka hre chiang tawh lo.
Chhuah leh mai tum a ka inher chu Fibby rawn lut in min rawn koh avang chuan ka ding dat a, "min lo luhsan daih a," a tih lang lang ruala ka hnunglam phui mup a ka hriat rual chuan ka inher a Vanlala hmel rum ûl nen chuan kan in hmachhawn ta ran mai.
"Engthil nge ni Fibby...?" Kei min en lovin Fibby a en a a hmel nelawm loh lutuk chu eng thil nge thleng hrelo mah ila nichin ami vang kha a nih ngei ka ring.
"Aaa, hei Mira hi ka rawn zui a," Fibby chuan a ti deuh sap a.
"Engthil nge...?" A aw chu a nelawm miah lo, a rum ûl a ka mur er er mai.
"A be duh che aniang," Fibby chuan min lo chhan khalh a.
"Engthilah nge...? Nang chu chhuak tawh rawh hna a tam lutuk list peih tura ka tih che kha lo peih vat la vawiin tlaiah ken chhuah ka ngai dawn ania chuan a soft copy ka pa ilo zu thawn thla dawn nia engmah hmaih awm lo in Fibby, a pawimawh tih hria la tihsual palh pawh a awm tur a ni lo," Fibby zawk en in a ti dap dap a mahse Fibby kal tur chu kal lo mai tura ngen leh ka duh leh hnuhnawh tawh. Keimah mai chuan hmachhawn ka zuam lo enge ka sawi ang...??
"Ka lo nghak reng tawh che a," Fibby chhuah hnuah chuan a rawn ti a amah chu ka en zawk a hmel nelawm loh kha alo bo tawh a keimah zawk min ti bangbo zawk.
"I rawn ngaihven har lutuk a helamah lo kal la," min ti a ka hrethiam lo takzet.
Ka zui phei ve ringawt a, "i dam țha maw...?" Te chu min ka ti ta ang deuh deuh a hmelhriat țha vak lo ang maiin a ni min biak ni.
"Englo," ka ti sap a.
"Sawi duh i nei em ni....?" Min ti a, chil ka lem khalh. A boruak uap lutuk chu ka zo lova ka thaw te hi a chham thei mai dawnin ka hria.
"I cher hle mai," ka biang a rawn chul a mahse tho chhuak in dawhkan lam chu a pan phei a, "i mamawh chu ka hria in ka hria chuan hna ilo kal a ngai tawh lovang i ai awh tur kan la tawh e," a tih zawm zat a. Ka nghilh dup in ka hria ka ai awh tur engmah sawi lovin an lo la fel diam tawh maw...??
Hmeichhe țawng ri ka hriat chuan ka hawi let a nula chhelo zet mai hi Vanlala bulah chuan lo dingin eng emaw hi a sawi a Vanlala'n a chhan let dan ațang chuan a thawh tur âwm ang chu ka hrethiam in ka hria an innel hmel in Vanlala țawng dan ațang pawh chuan a duat hmel takzet bawk.
"Inleng ka nei a nakinah ka rawn hmuh tur thu lo hrilh mai rawh ka rei lovang," a tih te chuan ka rilru na miah lo tur ni mahse alo na ve em em ringawt tawp.
"Chuan engmaw ilo kal chhan...?" A chhuak fel ta aniang a rawn ti leh a, chhan dan tur pawh ka hrelo a awmdan avang chuan awm reng na chi niin ka hrelo engah mah min ngailo a ni. Video a hmu tawh a min ngaihdan tur chu a awmdanah hian a tilang chiangin ka hria.
"Ka hriat duh ka hre tawh a ang ka kal mai ang e," ka ti ve ta deuh hmak a.
"Nilo ve," tiin din ka tum chu min pawt țhu a, "i rawn kal chhan pakhat ila ti zo hleinem lo nghak rawh," tiin ka hmaah laptop pakhat hi a rawn dah a eng emaw chu play tur hian a inring reng mai bawk.
"Ka kal zawk mai ang e," ti a thawh țalh ka tum chu ka hnunglamah awm in ka darah chuan a rawn vuan tlat a, "ni mai lo e, he thil hi kawl reng tur ka nilo tih ka hria mahse enge ka kawl reng chhan hi i hria em...? A hmu tur dik tak in ala hmuh loh vang mai chauh a ni," ka beng bulah chuan a rawn sawi a hlauh avangin ka thinphu a rang dup dup tawh.
"Hlawh chu i la nghal thei a mahse nakinah he video en zawh ah hian ni mai rawh se," a ti leh a, thawh ka tum lah in ka darah vuan in min nem tlat a min nem na chu duh ai a na lek lek bawk.
Chutah video chu a play a mahse mihring lang ka hmuh chuan tal chhuah ka tum a mahse min nem nghet lutuk tlat, "video chu en turin ka tilo che i nuam ti lai hmel chu a țha viau si a, eng emaw ngaithla rawh..!!" Ka beng bulah chuan a rawn ti leh a ka hlau lutuk chu ka khur dar dar tawh.
"Off rawh..!" Ka ti sap a ka mittui a tling vek bawk..! Keima awmdan ngei en chu ka rap ngawih ngawih a ni ber.
"Off rawh khawngaihin...!" Ka phun sep sep a a ri te avang chuan ka beng hup ka tum a mahse ka kut chu min dah thlak sak zel, "maimichhing suh," min ti a chung a thusawi te chu a khawk rum rum hian ka hre tawh.
Chutah keima aw ngeiin a ka sawi thil ka hriat avang chuan ka kut chu ka hmer a Vanlala pawh chuan ka dar a hmerna chu a ti na mah mah bawk.
"Off tawh rawh khawngaihin," ka beng hup ka hup a mahse min lak thlak sak in na zet hian ka kut chu ka hum a video a in play tawp ah chuan ka țap chhuak hawk...!!
"Keimah ka nilo, khatiang kha eng ang pawn rilru fim lo mah ila ka sawi chhuak ngai lovang ka nilo takzet, an siam chawp a ni ang," ka ti khur hlawk hlawk a.
"Siam chawp maw...? Engtin nge a nih theih ang ngaihtuahna hmang tlem viau suh," min ti a, min țawngkhum dan te chuan ka thin a ti na takzet a ni.
"Video chauh kha nise chuan ka lo tihsual tawh avangin ka en liam mai thei mahse i thusawi khan min ti tlawm tlat a ni. I rilru thianghlim lutuk tih nat sak che ka duh lova engmah ka ti ngailo duh chuan ka nawr lui thei che ka ti fo mahse ka nawr lui ngailo che a chhan i hria em ka hmangaih che a tihnat che ka duh lo mahse i rilru erawh alo danglam hle mai. Mihring hi kan pawn lam landan ang ngawt kan lo nilo tih hi a dik viau in i hre ve lo maw...?" A țawng chu a ring hauh lo mahse a chiang takzet thung.
"Keimah ka nilo, ka nilo takzet khatiang kha ka sawi ngai lovang...?" Ti a ding chhuak a kal ka tum chu min pawt let dawrh in sofa ah chuan min theh țhu hnawk a.
"I aw ri ngei i aw thâm mawi zet ri ngeiin a sawi chu engvangin nge ila phat țalh..? I rui a ni lawm ni, ka khawsak dan avanga i lungawi loh avangin i rui a ni lawm ni engtin nge rui in a țawng dan a hriat let leh reng ang ni. Ngaihtuah chiang rawh Mira..!!" Ka hmai zawnah a rawn au țhawt..
"I thusawi avang chuan kha i mutpui pa Rosanga hrep khan min nuihzat tih i hria em...?" Ka hmai zawnah a au leh țhawt a ka phu nasa lutuk hlau bawk si chu ka tawlh rawk rawk mai.
"Min hlau suh, engtin mah ka ti dawn lo che. Rosanga ang khan ka khawih ve dawn hleinem che kan in rul tawk ah ngai mai ang hmiang..!" Mitmeng sen vek chuan min en a.
"Ka nilo, khatiang kha ka sawi ngai lovang tih ring tur ini asin," ka țawng khur nawk nawk a, a ni alo nui hawk.
"I hmui sexy zet leh i ka ațanga chhuak a ni miau si alawm le..!" Ka hmui na zeta a rawn hmer na kut chu ka paih sawn nawk.
"Tiang chiah khan ka awm a hreawm ka ti a, ngaihdam ka dil che a mahse min ngaidam duh lova kan in rul tawk a ni mai," a rawn ti leh.
"Ka nilo, Vanlal khatiang kha ka sawi ngai lovang tih min ring tur ini asin,"
"Sawi tei vet suh i sawi miau a ngatinge i la phat țalh..? Chuan khati pawh khan min ko tawh suh khatianga min ko tu leh tuna ka hmaa hmeichhe awm hi chu mihrang an ni," a ti leh khur khur.
A khawsak dan chu ramsa ang chiah chiah a ni mai, ka hlau lutuk chuan tho chhuak a kal ka tum chu min pawt let sawk a ka hlau lutuk chu ka rak țhat..!!
Ka biang tawn tawn ah a rawn dawm a, "Khatiang ang khan pawisawi lo ang khan awm hlek suh..!! Ka rilru hi a nâ asin, min tihdan avang khan ka rilru a na min hmusit a ni nang hian khatianga ka awmpui ve theih loh avang che khan min hmusit a ni. I nu nen khan in lo danglam lo," min rawn fawh a tum chu hlau lutuk in ka țap khur ngar ngar chutah au țhawt in a inher a a thaw kawk kawk bawk. Ka nu nen kan danglam lo, ni e... kan danglam lo a fanu ka nia lawm.
"In mudun kha chu kan in rulh tawk naah ka ngai a enliam ka tum mahse i thusawi khan ka thinlung a ti na tih hre rawh..!! Ka tlawm a ka mipat pui te lakah ka tlawm ngawih ngawih tih hre bawk rawh..! Nun thar min pe a min hlim tira ka laka i rilru thianghlim tak mahse midang laka tenawn si khan min lêm a mahse ka hrechiang tawh che nilo ka hrechiang ngai lovang che a chhan chu mi inthup mahni nihna ang pawh lang ngamlo ini tlat," a ti leh tawn tawn a a țawng dan avang zawng zawng chuan ka ruh invuah zawng zawng hi a inthlawn vek niin ka hria.
"I tan enge ka nih...?" Ka phun sap.
"Vanlal, i tan enge ka nih zawt ngam tur che pawh ka nilo tih ka hria mahse khatianga i țawngkhum tur khan i tan enge ka nih ve chiah...? Thil a thleng fuh lo chho zela pakhat a buai chuan a dang pawh a buai zela mahse khatiang țawngkhum a ka nu nena min tehkhin tur khan i tan enge ka nih a...?" Ka in sût hlap hlap.
"Mawh... i tan enge ka nih a khatianga i țawngkhum tur khan. Min hmangaih iti a ni lawm ni a nih chuan a hma khan i tan enge ka lo nih țhin...?" Ka mittui a luang zung zung a a ni erawh chuan min hnungchhawn thung.
"Chu chu zawt zawk tur che ka ni, thil thlen lai khan ngaihdam ka dil che a min nghak turin ka ti che a mahse nang chuan i ngaithla lo ka Hmangaih che i hria em ka hrelo hrilh che ka tum a mahse min ngaithla duh lova ka ngen lawm lawm chung che pawn min ngaithla duh lo, i lakah ka inthlahrung a ka in la hrang reng bawk.
Ka thil tihsual avangin ka in la hrang a hnaih che pawh ka zak a ka duh lo bawk chuvanga hnaih lo reng che ka ni, i bula ka awm chuan inthlahrunna a ka khah thin vang a ni i hre miah lo nang chuan. Mahse ka hnaih lo thei lo che a i chungah thuneih ka la tum fan a a chhan chu mipa dang tan ka phal tlat lo che a ni.
Midangin a duat taka an kuah che ka phal lo, mipa dang laka i awm tur ka ngaingam lova ka phallo che, ka ta ni reng thei la tih hi ka duhthusam a ni a ka nupui ni la kan hum hman leh rilru te thuhmun se ka ti țhin," a ti a.
"Mahse... tinge... khang kha sawi a nilo tih i rin theih si loh..? Khatiang kha ka sawi ngai lovang tih hre tur ini asin,"
"Min thlak danglam nasat zia i hre lova ni, thil tam tak min zirtir a eng ang mi nge ka lo nih țhin min hmuh tir a ka nunah bung thar min kai pui a chungte chu i hre miah lo.
Ka tum reng vanga mutpui ka ni lo ka tih chuan dawt ka sawi a ni dawn a ka rui a mahse ka duhthlanna a tel ve ngei chu a ni.
Mahse a tawk viau a ni kan in rul tawk ni mai rawh se, na takin mim siam a lawm tur ini na taka ka siam ang che khan," thinrim zet hian kha fakin a ti a.
"Mahse kha kha ka sawi a ni hleinem," ka thle nghal sawk ka beng a kiu vung vung bawk.
"Kha thu kha sawi tawh suh, i kâ a i sawi chu engvanga i sawi nilo nge a nih ngawt ang. Ât hmel tak khan awm tawh suh i â tak tak lo i fing lutuk ni e... i sawi ang khan mipa pawh ka lo nilo ania nge i duh chuan mipa dang bulah va mu leh rawh..!! A tawk viau a ni," a ti leh țhawt..!!
"Vawikhat chiah ka zawt leh ang che,...." ka sawi zawh hma hma chuan.
"Ka nun hruai khawlo tu ini a chiang em...??? Min bum chiang hle mai," a aw a sehchilh nak bawk.
"Chhuak rawh..!" A mit a sen vek a ka âwm chhung na vîn tuk mai in a zawhna min rawn zawh chu dawn sawn dan ka hrelo. Mahse amah zawk a kalsawn a na zeta khawngkhar ri in a zui bawk a. Ka biang na lutuk min ben na avang a ka mittui luang zung zung nen chuan chhuatah ka țhu thla a keimah chu pawhsawm vek ni ta ila na ka hriat pawh ka ring lo ka taksa a lang thei chin te hi mei a hliau ang mai a ni.
Ka phone a rawn ri a ka nî ani, ka chhang a mahse ka țawng theilo ka țap zawih zawih tawp a ka âwm chhung na lutuk chu ka chum a ka kawr ka țham a ka ni chuan min rawn ko chul mahse ka chhang theilo ka țap zawih zawih a.
Ka na lutuk hi tuman min hriatthiam sak ngai lovang engtikah mah..!!
☆ MASON V.L THLAMUANPUIA P.O.V ☆ ( Kum 1 hnuah ) daih daih chuan
"A awmna chu i hre tawh em...?"
"Hrelo, a nau te chu a nî te bulah khan an awm tih chu ka hria a mahse ama awmna chu ka hre theilo, kan zawng kim tawh viau pawn ka hria khaw lama an țhenawm te leh hmelhriat țha te pawh khan a awmna an hrelo," a rawn ti a.
"Khawiah teh hrep nge maw i awm le...?"
"Sir, a thi a nih i ring ve em...?"
"Ngawi hmak rawh...!"
"A chungchang engmah hriattur a awm lova, zawn theihna ah kan zawng a kan hmulo kei chu a thi a nih ka ring," a ngaihdan a rawn sawi a.
"Ka tana a pawimawh zia hre lo in khatiang khan sawi tawh hlek suh.. chhuak la Hriatkima va ko rawh..!" Ka ti țhawt a, a thi theilo a thi theilo hrim hrim chu chu a ni ringawt..
#ZAWMNA
"Buai lai lai hian min lo ko ve sek zel a..!" Hriatkima chu a rawn phun lut nang nang a, "ti zo lo ila min hau leh a ti țha lo ila min hau leh bawk a engthil nge...?" Chair-ah chuan a rawn țhu thla hnawk a.
"An la hmulo," tih zawng ka sawi.
"Ka sawi na laiah chuan an zawng em..? An va hmu har reng reng ve mawle a tet tet nen ava biru thei zawk ve hmuh har lutuk mai kan hah tawh," a thinrim aniang a ti leh lung lung a, ka thaw chhuak hawk.
"Thutak teh Hriatkim..!! Engtia rei nge ka zawn tawh zawn na tur ka hre tawh lo," ka ti chhuak hulh a, ka hmai thlan chu tuai zui pâwk in ka țhutna nghenchhan chu ka ngheng dawt bawk. Ka hmulo a nih chuan damchhung in ka inchhir ngei dawn tih ka hria hmuh ka duh a ngaihdam dil ka duh a hriatsual vang a ni tih hrilh mawlh mawlh ka duh.
"Mi hausa thil ti thei tak ni ilang chuan kan zawn hmuh sak mai tur che ania, pakhat lah induh thiam si ngawi reng in a kalbo a eng emaw tak sawi ve âwm..!!" A tih leh nung nung lai chuan, "Hriatkim..!" Ka ti zui hluk, a thaw vak a..!!
"Ka hah a nih hi, engmah hi ka ngaihtuah peih lo ka zirna avanga ka project buaipui avangin zanhnih ka mu mang tawh lo, a awmna chin kan hriat reng reng loh hmeichhia zawn a ngai bawk a a hahthlak lam ve hret chu a ni," a ti ve ta hluk.
"Naktukah Aizawl chhuk ila a nî te inah chuan ka va kal ang a engkim ka zawt chhuak vek ang,"
"C'mon bro... an hrilh duh che i ring reng reng em ni khatiang a thil a thlen tawh hnuah khan. Tum buai duh suh an chhanna tur che chu a ngai tho, an duat em em khati vak a ân khum a kut hial thlak tu mihring chu lawm taka an lo dawnsawn che lah ka ring hek lo," a ti sup. Ding chhuak zawk in thlang lam chu ka pan a.
Khawiah tak chuan nge maw a awm le..? Hrilh tur ka ngah a engkim kha ka hriatsual vang a ni tih hrilh ka duh a min ngaidam kher ang em ka hrelo mahse ka thil beisei chu a ni. A awmna âwm ang tur ka zawnna a rei tawh mahse a thawm chhete pawh hriat tur awm tawh lohna khawvelah hian thlarau zawng ang mai ka ni tawh si.
Mahse ka beidawng hauh lovang, ka zawng anga ka hmuh hma chu ka zawng bawk ang.
Thil thleng tawh ka ngaihtuah let avang chuan insehru nghek in ka thaw chhuak leh deuh ham ham a. He ka kut ngei hian ka thu hriatchian loh avanga ka thinrim khaw hmu lovin a biang ah khan ka beng ngei a ni.
Hun harsa a paltlang mek, nilo... kan intawn hma ațangin a nun chu hremhmun alo ni sa tawh reng keiin ka tih sat belh sak thung a. A harsatna tawh hriatthiam a hnem a hnek in a hliam siam belh sak zawng in ka khawsa a min ngaidam duh kher ang em ka hrelo mahse hmuh ka duh a engkim kha hriatsual vang a ni tih hrilh ka duh.
A tello a ka awm a ka kim loh zia ka hriat belh telh telh, ka Hmangaih ni a ka sawi chu ka ât luat avangin ka ti na bawk. A tel ve lohna khawvel apiang chu kim lo nuam lo leh a tello a engmah lo mai khawvel chauh a ni tawh mahse chumi ka hriatchhuah hun meuh chuan engkim a thleng vek tawh si.
"Hahdam teh țhianpa, a thi lo tih kan hria a khawi hmunah pawh awm se hmuh theih in a rawn in lar leh em em ang," ka darah a rawn hmer vawng vawng a.
"Kum 1 pawh hi a rei viau asin, khawiah nge a kal ang a a nâ te kha engtin nge a tihdam ang...? Ka lak tlak loh takzet a ni an bum kual theih in ka lo awm a mipa lak tlak loh zet ka ni," ka ti zui hluk.
"Hahdam la, meeting turin kal ang hmiang..!! Naktukah i pa alo chho dawn si a engkim kan peihfel sa vek loh chuan i nupui tur pawh a rawn hruai tel dawn a nih hmel khawp mai," ka lungngaihna hre lek lova a nuih vur vur avang chuan ka hnek sawk lo chauh.
"Ngawi hle hle rawh, engtikah mah khanu kha ka nei ngai lovang kum upa lutuk mahni pawh a engmah ti thei tawh lo pawh ka la ni lova nupui ka la mamawh lo ka mamawh tak ka hmuh hunah ka nei mai ang," ti hluk in ka inher a ka coat chu inthawlh sawk sawk in ka phone chu ka ban a ka hmet êng leh zawk bawk.
"A hmelțha in a lu a zo vah an ti asin, a thluak pawh a țha mahse ze inang in nei tlat a in luhlul ve khanglang si nen romantic scene chu hmuh in hlat viau maithei ni," a nui deuh vur vur ka hmuh chuan ka sir a pen awm chu ban zawk in ka vawm a ala nui ang vur vur lehnghal.
"I u ai awh in Amber-i a rawn tel leh dawn a nih hmel, chuan Rosanga te team lam ațangin a secretary in a ai a rawn awh dawn bawk a," a ti phei malh malh a, Hotel building chhung te chu an pi tur a awm tak loh avang chuan keimah ang tho in an nguai ve niin ka hre țhin.
"Amber-i kha lo en thli thlai țha ang che. A thusawi apiang hnial kalh la phih âwk zel rawh. A rawtna siam apiang hnawl thla zel la Rosanga te lamah suan lut in duhsak ang tak khan lang bawk ang che, hnunglam ațanga min bum tu te ve ve chu ka kut ka thawh ngai lovin kâ hmang in hmelma a siam kha ka duh zawk viau a ni," ka ti sup a.
"An țawng thei dun mai sia ka hnial hneh ang emaw...?"
"Hnial turin ka ti lo che, an rawtna siam ve ve kha hnial kalh zelin lehlam zawk ah i pass zel dawn zawk ania Pu Sanhminga ka hrilh tawh a a ni khan alo thlawp zel che anga țawngna hun an neilo mai ang. Engthil chiah nge an ruahman na chu ni a an thil tih zawng zawng ka hriatchhuah vek theih nan hmelma ah an insiam ka mamawh Dawngdawngi thihna chen in," ka ti sup a, alo bu nghut bawk.
Dawngdawngi thihna chungchanga rinhlelh man tura kan sawi erawh kha chu tih hlauh nan chauh a ni, Rosanga pa a inrawlh tih Sammy hian a hriatchian tawh lutuk avangin a tir ațang engkim hriat vek ka duh a chuvanga khami zan khan bawh zui lo ka ni reng.
Bawihi chung a thil thleng pawh engmah kha thudik a nih lo tih ka hriatchian tawh êm avanga Amber-i enthla mek pawh kan ni. Ka control room duty inpuanna ațanga ka hriat a ni a footage siam chawp lek en in min pawh țhen nan an lo hmang a ka pawtsawm vek lo hi lawm hliah hliah tur a ni.
•
Ka pa te an rawn thleng a, ka nu bula hmeichhe awm ve chu tunge a nih hrilh hranpa ka ngailo ka pa țhian țha em em mai fanu hmelțha leh fing ti a an sawi țhin ngei chu a ni.
Ka u tih tiam loh an rawn chho a Hotel in kum khat a tlin lawmna tur atana inbuatsaihna an rawn nei tel dawn bawk. Ka pa thu chhuak avangin lawm takin ka lo dawngsawng lova an rawn hruai nu lah chu ka be hek lo.
"Be ve la bawiha, a tlangnel thuai dawn alawm," ka nu chuan min rawn nghawk zauh va.
"Hmeichhia ania lawm a hmeichhiatpui an tam a a tlangnel hma leh a nuam a ti a ni mai, inrawlh tam ka tum lo chuan ka ngaina lo bawk," tiin ka hrilh tlang nghal tawp a ka pa rawn hruai te chu nui suk in ka chibai zawm zat zel bawk.
"Ka ngaina lo keipawn mahse lo biak lum lam chu kan tihtur a ni, nei rawh kei chuan ka ti kher lo che mahse inbe tlangnel ula țhian atan pawh a insiam theih alawm," ala rawn ti fan.
"Ka mamawh lo, a tello pawn ka awm thei alawm a inthuam duh dan engkim saw a lem vek a nih saw a pawnlam landan a mahni nihna a pawh a lang tlang lo hmeichhia chu a chhungril zia a thup tih a tilang chiang viau a ni. Hlawkna tur bak a ngaihtuah lo an ni ang chuan sum chiah a ni an ngaihtuah ni," ka ti zui nghut a. A mithmul te saw a sei leh lutuk a a chal a han thleng țep a nih saw.
"Vak vak țhin a che, mi hrechiang lo hian khatiang khan sawi ngawt zel suh," a ti deuh hlak a.
"Hriatchian ka mamawh hleinem, saw a lang vek alawm enge i beng nâ chu a an...?" Ka ti zui daih a, sawnu chungchang sawi reng tur saw chuan chil per a uiawm deuh lua a ni.
"A zia chho ve zela a rawn na leh zawk țhin tih loh chu tunlai chu a zia ve lutuk beng chhet ang te ri hum hum anga awm te kha a nei rih lova ka thil hriat pawh a zângkhai leh deuh tawh," a ti a, kan awmna hmun a inang lova ka enkawl thei ngailo erawh hi chu hreawm ka ti țhin.
"Enkawl theih che ka chak hle mai mahse ka thei si lova nakinah ka nupui tur an hmuh hunah a kut dam zetin a enkawl dawn che nia," ka nui zui suk a. Mira kut dam lutuk kha ka taksa hian ala feel thei. Ka kutphah chu en in ka nui leh a a kut tereuhte nena min kaih ve țât khan ka kim viau țhin a ni.
"A awmna in la hrelo em ni...?
"Hrelo, khawiah tak chuan awm ang maw..? Zawn ngaihna pawh ka hre tawh lo," ka ti a.
"Mi thil ti thei tak kan ni lova duh duh naah kan zawng thei hek lo. Mahse a thi lo a nih si chuan hmuh theih in a rawn lang leh em em ang chumi chhung chu nangmah in en let nan lo hmang la alo let leh veleh a engkim a fel theih nan," a ti dap dap a.
"Ka ngai tawh êm a ni," tiin ka thaw chhuak ham ham. A hmel hmuh tur pawh awm lohna khawvel hi a lem mai chauh a ni nawmna a awm tawh lo.
"I țha maw...?" Ka zan mu theilo chu coffee in turin ka chhuk a choka ah chuan Lapuii chu alo awm reng hi alo ni.
Chhang lovin coffee machine lam chu ka pan phei a mahni chuan ka in buaipui mawlh mawlh.
"Ka lo pui dawn che em ni...? Khawi ka lo siamsak ang che,"
"A ngai love, mi na zawng siam ka in ngailo," tiin ka siam zawh sa chu ka in a eng ang pawn siam ve mahse Mira siam ai pawh khan a tuilo dawn tih ka chiang êm a ni.
Chhoh lehnghal mai ka tum chu min koh avang chuan ka ding ve mai a, "i pa nen in in be tawh tho ang a eng emaw sawi dun ve reng reng ila inneih hmaa in hriatchian hi thil țha a ni," ka nui suk mai.
"Tunge kan innei dawn ti...?" Ka inher a a mitmeng chu a buai lek lek a mahse rei a ni lo.
"Fiamthu i thiam hle mai," a rawn ti nui hak a.
"Nia, ka thiam alawm chuvanga i fiamthu kha rawn man ka ni reng a ni. Mahse kan innei dawn hleinem chuvang chuan in hriatchian kan mamawh lo, ni lawm ni...?" Ka ti sup a, a hrilhhai hmel chu hmuh a nuam letling phian.
"I pa thuthlukna i la hre chiah lo a nih hmel....," a sawi zawh hma hauh chuan.
"Sumdawnna a ni, engtin nge i duh miah loh leh i Hmangaih miah loh chu sum vanga neih i duh tlat engvanga i zahawmna chu hralh tum nge inih...? I tum ruh a ni lawm ni i zahawmna humhim a i dikna humhim tur khan tum ruh ta che," ka ti a.
"Ka duh che alawm," awih lo lutuk in ka nui hawk.
"Kei chuan ka duhna che a rei tawh mahse ka hrilh ngai loh che avangin i notice lo mai mai a ni, ka duh che a chuan ka nei ngei bawk ang che," a bahlah chhin eih lova a inringtawk hle bawk. Mahse a inrintawkna a san poh leh a tlakna a sang a ni mai.
"Duh leh Hmangaih ka nei, ka nghak mek bawk a ni chauh chu ka nupui tur a ni. Suangtuah suh, hmeichhe pakhat tan chauh ka awm dawn ka nunna a nih ang in hmeichhe dangin ka thinlungah hmun chan tur an nei ve lo," tiin ka inher a inchung lam chu ka pan chho nal nal bawk.
Ka intiam tawh a a tih hlawhtlin chu ka hna a ni, alo let hunah rinawm takin ka lo nghak reng tih a hriat chuan a rilru ka hneh theih ngei ka ring a ni.
Khumah chuan mu in kan thlalak dun na vel bawk chu ka hmet chhuak leh, phone hmai chu chul in ka thaw leh ham ham țhin a.
"Khawiah nge maw i awm le bawihi, engkim ka hrilh theih nan che lo haw tawh la ka ngai tawh che," ka ti sup a, a nui lai thlalak chu en in ka nui ve suk bawk.
•
A dan ngai te in Office banah chuan an in kawt ah chuan ka ding leh vâng tawh, luah lum lohna a rei tawh tih hriat zet in engkim chu a chul em em a kawtah lah nise hnim chu an țo pheng phung bawk. A rawn haw palh ring in zan tin ka kal ziah țhin, office banah ka tlawh kawi âwl lova mahse nitin a ka thil hmuh chu kawngka tala a inkalh chu a ni.
A nui ri ka beng a cham te chuan suangtuahna ah min hruai lut a he in nen hian danglamna kan neilo, Mira tello a awm theilo ve ve kan ni a a tello chuan kan hringnun a mawi ve theilo a a chul vek țhin. Mahse kan hriatchhuah meuh chuan amah ah ser reh thei tawh lo tur kan siamsak thung si.
Muangchangin in chu ka pan phei a engkim chu a reh ruih a rannung hram te chuan ka ngaih zia min puan chhuah pui niin ka hria.
"Khawiah nge maw i awm le bawihi lo let tawh la ka ngai tawh takzet che a ni," ti halh in kawngkhar hmaah chuan ka ding reng a van lam hawiin ka thaw chhuak ham ham.
Ka ngai a ni ka ngai takzet, thi dawn pawh ni ila a kiang ah vawikhat tal hun ka hmang leh phawt dawn a nih loh chuan thih ka duh lo.
Kawngkhar chu khawih in tala chu ka khawih a mahse alo in hawn avang chuan ka meng deuh zawk. A inkalh reng țhin ka khawih fo a kei aia hrechiang an awm hauh lovang tunah a inhawng a Mira a nih loh chuan tunge lut ang.
Kawngka chu hawng sawk sawk in inchhungah chuan ka lut a light chu on sawk sawk in ka on fel rual a room a thawm ri leh eng emaw tla ri rum rum ka hriat rual chuan ka pan phei vat. Room chhungah chuan ka lut a light chu ka on nghal vat.
Chhuatah chuan lehkhabu leh thil bawm hi alo let rem rum a ka hawikual a engmah fel lo ka hmu lo, ka kal kual zel a thawm kan ngaithla leh deuh vang vang țhin mahse a reh tak êm avang chuan ka hawikual a hmun tin mai chu ka melh a ni ber.
"Bawihi, nangmah inih chuan Vanlala ka ni e khawngaihin min hlau suh," ka ti a. Mahse a reh tlawk tlawk a min chhang tur reng an awm lo.
Thil tlakna lam chu ka pan phei a a chhung chu ka bih dek dek a chutah zen lut thut in eng emaw ka țham fuh rual chuan ka pawt chhuak zawk. Min rawn khawih a tum chu ka hnek nghal sawk a chhuat a a tlu chu pawt tho in a lukhum khum leh a hmai tuamna chu ka phelh nghal sawk sawk.
"Rama...!" Ka ti chhuak hluk a, amah ka țhamna chu ka thlah hlawk bawk.
"Enge hetah itih...?"
"Bo..bo..boss englo ania," a ti khur hlawk hlawk a.
"Hetah Mira te inah hian enge itih ka tih chu...?" Ka ti leh țhawt..!!
"Englo.. mi.. min tir a," a ti leh nawk nawk a.
"Tu in..?" A ngawi ran mai chu ngai theilo zet in a kawr âwm ah chuan ka țham zui pawp, "zep engmah awm lovin sawi vek rawh tunah i zep a nih chuan ka that ang che...!" Ka ti kha hrawih.
"Englo... miss Amber-i'n min tir a," khur hlawk hlawk chung chuan a rawn ti a Amber-i hming a lan avang chuan ka thlah nghal hlawk bawk.
¤ Tawi kar ta he...!! Next-ah chuan changtunu pawh rawn lang ve tawh turah ngai ang ¤