(Dah loh aiah ngawr ngawr, naktuk zana zawm tur aw....)
"Eng nge awmzia?" Mawi leh mawi lo pawh dawn loin ka ti ta hmiah a, ka hrilhhai bawk nen ka awmdan chu a dik ber em tih pawh ka ngaihtuah thei lo.
"Saii, Kei hi KH-a putea ka ni a chuan hei hi kan thenawmpa leh ka thianpa te anni bawk. In lo sawi dun tawh turah kan lo ngai deuh hmiah a, chumi den chhana rawn leng pawh chu kan ni, mahse kan tupa hmanhnawh hian rawnna chang che alo hre lo a ni awm a" Tiin an nui leh vur vur phawt a, an eng emaw lai tak chu Rohmingliana pawh hian alo chhun ve khawp hi le. A putea dik tak anih chuan zopa ah chuan a palian in sa tha pawl tak a ni a, a hnai vai vel ho an te chhe lo bawk a, a pa Patea lah pa satha lian pangngai tak ani bawk a, alo lian viau pawh hi a awm lo hran lo.
"Ni e, ahh zep loh chuan kan la sawi dun chiah lo" Ka ti ve ta mai a, chutianga dam leh inphah hniama an han tawng vel chuan keimah zawk chu min ti zak leh hnuhnawh viau bawk. Rohmingliana vang a ni vel vek mai.
"Pu Sai, mi tihdan ani chiah em phei chu ka hre lo a, mahse han sawi ta rawt mai ila kan fapa hian Saii hi neih ngei a duh a, kan lo kal nawn leh tal rem inti ang chu maw?" Pa te lam deuh zawk chuan an ti ve leh chuar chuar a, ka pa chuan a mitmeiin min rawn ràwn zawm zat bawk.
"Aah, kan beisei loh lam daih ni mahse thil tha lam ani bawk a chutia han phallo nghal ngawt turin eng kan ni bik hleinem. Ni e, chhungkua te pawh inthu rawn ken chung changah kan han inrawn khawm ve anga, keini hi chawlh hmanga rawn zin zawk mai kan ni a naktuk hian let kan tum nghe nghe, intheih chuan Inrinni tlai lamah kan lo beisei dawn che u nia" Tiin tha tak chuan an han inmangtha zui a. An polite in thusawi tur chin awm leh mawi pawh an hre viau mai lehnghal.
"Engtia han tih chi nge maw ni dawn ni?" Tiin an chhuah hnuah ka pa nen kan sawi zui leh a. Ka nu boral kum kher alo ni bawk nen ka pa pawh a rilru a buai viau mai.
"A thu hrimah KH-a chu eng hna tak nge a thawh ve tak, a kutah hlan ringawt che ila chhungkua a chawm zo meuh ang maw?" Tiin uluk takin ka pa chuan min zawt zui a. A zawhna a sawi zawh rualin a chhanna ka neih a duhkhawp loh tur zia ka hre zui zat bawk.
"Tunah rih tak chuan a rem rem a thawk rih niin ka hria, mahse amah a thatchhe lo a, pathian zarah kan lo inkut suih ve thei anih te chuan kan rethei bik em lovang ka hnathawh te nen" Tiin ka sawi zui ve leh a, a ngaithla uluk a min melh leh run run thin bawk. Fa te nge nge ngaihtuah an nà te pawh ania nge.
"Saw lamah kan sawi fel tawh mai dawn em ni? Va mu phawt mai rawh le, keipawh kan mu ange" Tiin a thingpui in no a dahthla a, a ding zui nghal bawk. No chu sil sawk sawk in ka inti fek thuai thuai a, room a ka lut chiah erawh ka nau ten zawhna an lo ngah ngang mai. Rin ai takin an phur phian a, KH-a an ngaina bawk nen a awm ve reng mai.
"Mawllian!" Call apick rual rual in kan han ti nghal tawng a, ka nau te erawh ka hmai ka phih laiin an lo muhil daih tawh thung. Thawm erawh ka theih tawkah ka dim ve viau tho mai.
"Fing min tih em kha" A rawn la ti zui. He pa hi chu aw..
"Min ràwn ve ta che emaw min hrilh hre ve thei, zak takin min siam ani ringawt alawm" Ka ti kha kha a, ka aw ki tih rin loh hram hram ka tum nangin a harsa viau mai.
"Ka ràwn che chuan i rem ti dawn chuang em ni? Ti khan a tha, chan leh che ka tum tawh lo" A ti zui hmiah a, a aw a bul deuh hmuk bawk nen chhan zel pawh ka huphurh zo leh vek tawh. "Mi pangngai kan ni a, pasal nei rual zet i ni ve tawh bawk, kumin ah kher ka ti lo mahse ka ta i ni tih chhinchhiahna i neih angai" A ti zui leh a, nichin ai chuan a aw pawh a dam ta deuh. Fel deuh si hian a duh loh zawng lama nawr harsa tak leh luhlul ve tak hi ani a, thu duh ve ve ta chu inhauh chang kan ngahna chhan kha ani ve thin pakhat.
"Engpawh sawila ka la lungawi chuang lo, bakah zaninah pawh ka pa'n i chungchang zawhna min zawt nuala tunhnai thil ami pawh engmah hriat ka la nei hleinem" Ka ti ve leh a, kan tha hluai a a hnu lawkah kan inhau leh a, kan inthen phal tak tak der bawk silo, a lem tak ngial pawn.
"I duh apiang chu min zawt thei reng alawm" Awlsam zet a alo tih chuan ngei zet hian ka meng kual raih a, ka bulah chuan awm se ka nam bu lawp hial ang.
"Lo inneih ta ila khawiah nge kan awm ang? Ka hna hi bansan vel ka duh lo ania" Tlang tak chuan kan ti nghal tawl a, a thaw hawk ri ka hre zui zat bawk.
"A tul chuan bang mahla pawi ka ti miah lo, a tello pawn kan khawsa thei lutuk" A lo ti leh pek a. Inhlawh chawp ringawtin chhungkua kan din thei lo, tunlaiah changkanna in min chiah hneh tawh bawk nen sum hlutna lah a hniam tulh tulh mai bawk si.
" Ka ning tlat, ka dah dawn, innei lo mai ang" Ka thil sawi ngaihtuah chiang hman lek lo a ka tih hmawk hmawk hnuah ka dah zui ta daih a, khumah na zetin ka inlet ka inlet zui a, chubak thawm dang a awm tawh der silo.
Thawm ri nak nak avangin ka harh zawk a, ka nau te thawm lek chu lo niin haw turin an inbuatsaih ani ngei ang an thawmhnaw an lo pack fel diam tawh a, zing dar 7 ala ri lo deuh chauh alo ni. Ka vannei a, ka nu kan enkawl lai khan tarmit vuah ngai tawh loin ka mit kan enkawl ve zui bawk nen tarmit vuah ngailo hialin ka khaw ve ta a, a hahdamthlak viau bawk.
...........
Home sweet home
Chawhnu dar 3 rik hma hlekin kan inah ngei kan awm leh ta vanga, nizan kan inbiak hnuah Rohmingliana nen kan inbe zui leh tawh miah lo bawk. Ti tau rei thei zawk in elna kan tan anih leh der tawh chu hahthlak hian.
Zanah ka pa thiante leh unau te an lo leng tak tak a, ka pa'n a ko ani ngei ang. A rei deuh hnu phei chuan thutna room langsar lo deuh laiah chuan thu in an titi zui mawlh mawlh a.
"Mami, rawn phei lawk teh" Tiin ka ni in min rawn ko zui ta reng a. Puitling 7 chuang kianga han thut ve run chu anuam viau lo. "I palai hmuh i pa hian alo sawi a, ava han lawmawm em tiraw?" Tiin ka ni chuan ma kut a chelh vang vang a, a mittui te chu a rawn hnai nghal kuar hial lehnghal. "I khan han hre hman ve ni se" An ti leh mau mai a, insum chu har tawh tak a ni.
"A khai kha lam kha chu duhtawk teh u, Saii keini lam duhdanah chuan nakkum January thla chawhma lam nise kan ti deuh a, eng nge i ngaihdan ni le? I nu min kalsan kum a han thlah nghal mai che chu kan thei tlat lo a ni" Ka pa chuan min ngaichang tak chung siin a harsatna chu a rawn sawi zui a, ni e keipawh a hma lam chu ka lo beisei lo ve hrim hrim bawk nen pawi ka ti hran chuang lo.
"Pawi ka ti lem lo, inthu thu ni mai" Ka ti ve ta hmiah a. Thu thukna han siam vel kha ka thiam zawng ani tlat lo upa ho karah hi chuan.
"A nih chuan alawm nan thingpui han chhuang rawh le" Pa BZa ka pa cousin chuan alo ti khauh a, a nui zui hawk hawk bawk. Kei pawh thingpui lum turin ka tho chhuak zui ve nghal ta mai bawk.
Ka phone ri chhen chu hre reng mahila la mai turin ka taksa bakah ka sam thlengin a phuan vek a va lak theih pawh anilo. Vasi 5 chuang lai a rik nawn sek takah chuan intleuh thuak thuakin bathroom ka chhuahsan zui a, ka phone ka en chuan KH-a miss call lo awm hman teuh mai lehnghal, ka call back zui zat bawk.
"I va la har ve" An rawn ti leh nghal hmuk a. Nizan atang khan a mood chu ala fuh thei lo nge, ngaihthlak ala nuam lo hmek hmuk khawp mai.
"Ka hman reng bik hleinem" Kan ti ve leh hlar a. Mahni tawka kawlh ve ve kan in ngam viau mai.
"Ngawi rawh! Vawiin ah Aizawl inphei em ni?" A rawn ti leh a, min be duh lo bawk nen ka va be hmasa duh lo kha nia engtin nge maw alo hriat ve leh pek ni, bakah hman zan khan ka hrilh hial in ka hria.
"Phei e, eng nge? " Kan inbiak dan hi chu palai tir mek te inbiak dan dang nen chuan a inang lo ve viau mai thei ni.
"Eng nge tih tih angailo Saihlu, in kal dawn te chuan rawn sawi ve ta che, naupangchhia ang mai a tihtauh kual te hi sim a hun tawh" A rawn ti leh pek a, a fanu ka nia mi hetia a duh tawk a zilh tur ka ni bik lo.
"Vawiin eng nge i tih?" Thinrim bawk a ka chhan let chuan kan inhnial thui thei mai dawna hria in thudang ka sawipui ta daih a, ani pawn a sawi zui tawh lem lo bawk.
"Hna kan thawk, Sintex alo thleng a" A ti ve leh mai a. Nitin a han inhlawh chawp ringawt mai chu hah a ti dam lo, a taksa a chau ve thin dawn bawk nen ka khawngaih leh hnu hnawh kher mai lehnghal
"Tu te hnenah nge i inhlawh ziah hi,a rit thin si rit lak vak vak hi a tha miah lo ania" Kan tu ve ngial a, min nuih san vel mai mai lek tawh. Kan inhau dawn emaw tih hnuah tha deuhin rei deuh kan inbe leh lawi si a, kan dah meuh chuan thaw a veng suai suai ta mai, leh ta nghal hian.
_____________________
Rilru pek theih loh bakah ke a Mualpui college atanga Upper Khatla thleng han haw tau tau leh thin chuan maw chauh alo na bawk nen mut a chhuak zung zung mai sia duh ai sei hlek hrut rual leh lawk mai ang. Mut chhuak hlep innei dawn anih chu. Muttui ule
