Keima Pu

Episode kal lai dah luhna

Moderator: writers

Cck Lalchhuanawmi
Posts: 350
Joined: August 5th, 2022, 8:54 pm

Keima Pu

Unread post by Cck Lalchhuanawmi » May 25th, 2023, 10:15 pm

Keima Pu: Sir Sawmtea
Chapter-16
Ziaktu: Cck Lalchhuanawmi

Christina chu pawmin a pen pui pawk pawk a, ka rilru nâ lutuk chu ṭhu thla hnawkin, a vawikhatna atan, hmangaihna vangin ka ṭap chhuak ve ta hial!

Ka mit ka chhing ve tak naa, muthilh chu khawilamah, meng chuang loin ka meng kur ni ringawt. Ka ṭahna avangin ka mit ka meng ṭha thei lo nen.

Ka hmuh lai ngeiin a duhthlanna lamah a kal a, min duh lo a nih pawhin ṭha taka min hnar tur a ni asin, khatia midang a thlang zawk tih lantir lo khan.

A tawpna chu ni lo hrâm se, a lo kir leh ka ring tlat. A lo kir leh ngei ngei ang, Christina bulah khan a hlim lo, ka bulah chauh a hlim!

Ka biang ka dawm leh ṭhin a, a duh vanga min beng a ni lo tih ka hria. Ka taksa nâ te chu ka palzâm thei, mahse; ka rilru nâ erawh, ka palzâm thei lo. Naupang nih ṭhat leh mai ka duh.

"Dingdong?", ka room aṭang chhuakin kawng ka hawng a. Ka nu leh pa te an chhuah lawk avangin, mahni chauhin inah ka awm a, kawng ka kalh daih, tumah lo leng lut lo se ka duh.

Mahse, Nga-ki erawh midang a ni lo a, ani hi chu a tan kan in hi a inhawng reng.

Tv hmaah kan ṭhu a, nizan thil thleng ka hrilh ve vek a, ka sawi zawng ringawt pawhin, ka mittui a hnâm thei.

Ṭap awlsam tak mi ka ni lo a, eng emaw mai maiah ka ṭap ngai lo. Thawveng ṭha ve tak ka ni a, mi pawi sawi zawnga thawveng erawh ka ni lo thung. Ṭawng thei hle mah ila, mi pawi sawi ka hlau thei hle bawk.

Mahse, ka mittui a tlaka, ka ṭap a nih chuan, ka nâ tawk ve hle tihna a ni mai. Tunah hian, ka nâ mek.

"Dingdong, engtia tih nge i duh?",

"Engtinmah",

"Eng a? Kut a thlak man che chu a tuar ve tur a ni. Kutthlak theihna tur che a nei lo", Nga-ki chuan a ti chang fak. A hmelah thinrimna a lang thei a, a insehruh ṭeuh avangin, a bek a pawng ṭawlh ṭawlh.

"Nga-ki, i lungngai nih kha, a lo kir dawn tih hi ka chiang", ka ti chiah chu, "I mawl em ni, i ngaihtuahna kha hmang rawh. Nangmah ni loin, midang a thlang a nih chu, i hmuh lai ngeiin a pan a ni lawm ni?", sehchilh nawk nawkin a ti a.

Inthunun tumin boruak a hip let kâwk kâwk. "Christina kha a tlûk vang alawm, tlu lo se chu a pan miah lo ang", ka ti zawi sap a. Nga-ki a thaw ri hrawih. "Kut a thlak che, chu chu pawi i ti lo em ni? A ex hmaah kut thlak chein, a ex zawk chu a la buaipui thei a ni lawm ni?", a ti leh chharh chharh.

Ka lu ka thing nar nar, "A lo kir dawn a ni ringawt. Min mamawh tih ka hria, tunah pawh hian a bula awm turin min duh tih ka hria. Engtiang pawhin awm se, ka chungah engthil pawh ti mah se, ka ngaidam zel ang",

"I â tawh nih kha",

"Ka â alawm", nui sakin ka ti a. Ka mittui ka hru tawk tawk. "Hmangaihna tluantlinglo tura a inham tang reng tur ka duh lo, keimah hian a damna tur hmangaihna ka pe dawn alawm", nui lui sakin ka ti a.

Beidawn hmel zetin Nga-ki chu a chek tlawk tlawk. A damna tura hmangaihna pek ka intiam tawh a, min manawh hun a thlen apianga, hmun hla taka min zawn a ṭul loh nan, a bul hnaia awm reng turin ka intiam tawh.

Mahse, ka nghak ang, keiman ka pan lo ang a, min pan hun ka nghak ang. Ka lama a kut a lo phar chhuah hunah, ka lo vuan vat ang.

Nga-ki nen chuan ngawi rengin kan awm ta reng a, hrehawm ka ti. Kan pahniha kan awm dun tawh chuan, a reh diak ngai lo.

"Nga-ki, eng nge i ei duh?", boruak tihzangkhai tumin ka biaa, "I duh duh ni mai", a ti zawi sup. En pawh min en lo a, min ngaihtuah lutuk tih ka hria, keimah vangin a rilru pawh a hah ve ngawt ang.

"Noodles ka'n chhum ang e aw?", ka ti a. A lo bu nghut. Noodles chhum turin chokaah ka kal a, kan ṭhian dun awm dan chuan, min tinâ tel bawk.

Noodles ei lai pawhin min be lo a, a ngawi reng. Han titi pui tur ka hre thlawt lo chu ka inhaw hlur.

Sawi tur apui ngah tak si khan, tunah tak hi chuan ka hre thlawt lo.

"Ka'n haw ang e, lo ṭap tawh lo la", ti supin min lo kuah a. Keipawhin ka kuah let ve, ka ṭhiana hlim thei tak pawh, ka tikhawlo zo vek.

Chhuat nawtin, hmun hnawk lai ka tifai a. Ka rilru erawh, a pik ngut ngut.

"I inkhawm dawn em?",

"Dawn lo mai", ka ti a. Inkhawm pawh ka phur lo vek tawh. "Hla zir in ngai lo em ni?", ka nu pawh chuan a lo ti a.

"Kei chu, ka zir tawh lo mai ang", ka ti a. Ka nu leh pa pawh chu, inkhawm turin an kal ve ta mai.

Ka room-ah ka inkhung a, khumah mu zangthalin inchung ka en kar. Ka thaw halh halh a, tih tur ber ka hre lo a, sawi tur ber lah ka hre lo.

Tuna ka rilru put hmang leh, ka awmdan pawh hi ka sawi chhuak thiam lo. Ka nâ ti baka sawi ngaihna ka hre lo.

Ka phone lo ri chu banin, "Ka pu", ka phun sap a. Ka chhang dawn nge dawn lo tih ka ngaihtuah rauh rauh laiin, a ri tawp.

A ri nawn leh turah ka ngai a, mahse; min lo call nawn miah lo. Ka âwmah phone chu ka nghat vang vang.

Ka pu nui suk suk lai te chu, ka mitthlaah a lang uar uar a. Mittui tla ṭeuh chungin ka nui var var, ṭul lo deuhin kan infawh lai te ka ngaihtuah zui nuah nuah.

Duh lo zetin ka thaw chhuak hawk a, phone chu lukham hnuaiah ka dah daih. Ka inlet ka inlet a, muthilh lui tumin ka mit ka chhing vang vang. Awmzia a awm chuang lo.

Phone bawk chu lukham hnuai aṭang ka la chhuak a, vawikhat chauh min lo call chu ka hrethiam lo. Min lo call nawn tur a ni asin.

"Duhtawk rawh", phone chuan ka lu ka khawng karh karh. Min lo call nawn tlut tlut pawh nise, chhang tur ka ni lo.

Chutih laiin, kan kawngkhar chum rik bawrh bawrh ka hria a. Ka room aṭang ka chhuak a, "Lalte, Lalte?", ka thinphu rang lutuk chu, a thlawk chhuak dawn ta mai emaw ka ti hman.

"Nêm miah suh ang che", ka inhrilh mawlh mawlh a. Boruak hip let kâwkin kawngka lam ka pan a, "Eng nge?", ti vin ṭhak pahin kawng ka hawng ṭhuai.

Ka pu chu a nui hak a, ka hnar ka hup nghal. Eng rim nge ka hriat hi?

"Lalte", nui vara tiin, min lo kuah a tum chu hnung lamah ka kat dawrh. "Min hlau mi, min hlau suh, engtinmah ka ti lo ang che", kut phar hluaiin a ti a. A meng sisap nasa bawk a, insawifiah tum ngar ngar hi a ang.

"Hetah eng nge i lo tih dawn?", ka ti hlak a. Thinrim anga ka lang lo a nih chuan, min zuam mai ang.

"Inkhawm turin kal ang", min lo hnaih leh chu ka tawlh sawn leh. "Min lo hnaih tawh suh, inkhawm te i sawi ngam zawk elaw, khatiang chung khan inkhawm ta la, an nuihzat zawk ang che", ka ti tawn tawn a.

Ka chhungrilah erawh ka khûr nasa lutuk, chhuatah a ṭhu hnawk a, "Haw rawh", ka ti a. A nui chhuak hawk hawk. Ani pawhin haw turin min ti fo.

"Aw le", ti supin, muangchangin a tho a. "Ka kuah thei che ang em?", tim dai hian a ti a. En pawh min en ngam lo, a kun ngaih. "Thei lo", ka ti ram hmak.

"Khawngaihtakin", a ti zawi leh sup a. Ka khawngaih lutuk chu, ka hmui hnuai ka seh niah niah. A hmaah ka ṭap tawh dawn miah lo.

Intipachangin, "A theih loh", ka ti chang fak a. Ka mit ka khap fap fap.

"Lalte?",

"Haw tawh rawh, khatiang chunga ka in chhunga i lo luh ka duh miah lo nia", ka ti leh a. A nui hak. Engahmah min ngai lo chu ka thinrim tak tak tawh.

Pai chawn chawnin min lo pan a, ka hnungah ka tawlh ve hret hret. "Lo kal hnai tawh suh, a nih loh chuan ka au vak mai ang", ka ti a. A ding chawt.

A phone a phawrh a, ka hmaah a lo lek, "Ti tura min tih apiang ka ti vek ang", meng sisap deuh hian a ti a. A din ngheh theih loh avangin a âwn zul zul mai bawk.

"Eng nge tihtir tur chea i duh?",

"Ti tura min tih apiang ka ti vek ang", ti pahin, a phone lock screen a hawng a. Ka hmaah a lo lek, wallpaper pawh, inhnaih deuha Christina nen an lanna.

"Duhtawk rawh", ka hawisawn zui a. Min tihnât hi a duh ve hrim hrimah ka ngai tawh. "Ti tura min tih apiang ka ti ang, keimah chuan ka thei lo", a thaw chhuak hawk.

Ti tura ka duh apiang maw, wallpaper thlak se, whatsaap-ah block-in, a number delete nghal sela, a dam theih nan min lo pan turin ka duh.

"Engmah tihtir tur che ka nei lo, nangman tihtur leh tih loh tur i hria, keiin ka tihtir che aiin, nangmah ngeiin i duhthlanna hmanga i tih ka duh ber", ka ti a.

Ka âw a thâm ṭiak tawh, a kun ngaih a, a phone chu a ak ṭha leh. "Ka pu, haw tawh rawh, vawikhatmah zû in tawh bawk suh. Mipa i nih kha, mipa takin awm rawh", amah ka en a, ka ngaihsan rukna te kha an kiam duak duak.

Hetianga a awm ka ring ngai lo asin. "Lalte", a lo hawi chhuak a. Thaw halhin, "Ka mamawh che", mitmeng fiah kêk kâwka min en karin a ti a.

Ka ṭang nasa lutuk chu, ka taksa a nâ vek thei. "I nêm thiang lo", ka rilruin ka inhrilh mawlh mawlh. "Haw rawh", harsa tak chungin ka ti chhuak thei hrâm.

Min lo pan hnai leh a, "Ka pu, haw tawh rawh",

"Ka, ka mamawh che",

"Min mamawh lo, haw tawh rawh", ka ti zawi sap. Ṭawngkam vin taka au khum nghek ka duh. Muangchangin a inher a, a tlu dawn dawn ṭhin, ngaihsak lo anga ka lan a ṭul bawk si.

Kawngka kharin ka ngheng a, ka âwm ka dawm vang vang. Ka ṭhu thla riai riai a, ka mittui ka dang zo leh lo. Eng emaw hleka ka ṭap ziah mai chu, ka inhaw ngawih ngawih.

Inah buaina awm miah loa a thlen theih nan ka ṭawngṭai mawlh mawlh. Min tinâ hle chung pawhin, atan ka ṭawngṭai a nia!

"Ka puitling ve tak tak ta em ni?", ka ti chhuak hial. Ka puitling ve tak tak tawh a ni ngei ang.

Biak in chhungah ka ṭhu kur ve tak naa, ka ngaihtuahna erawh, Biak in pawnah a awm daih thung. Ka nu leh pa ruala inkhawm tura ka kal loh avanga ka inchhir ṭum ber a ni ang.

Ka pu leh U Maria-i te inkhawm kal tur ka hmu a, an innuih sun sun reuh a, U Maria-in ka pu kut a tawk leh zeuh ṭhin te chu ka hmuh hmaih lo nasa, an hnungah khan ka kal miau a ni. Christina pawh a duhtawk lo a ni ngei ang chu!

"Dindin?", phun sapin Sangi chuan min lo nghawk a, ka harh chhuak ve chiah. Mahse, thusawi pawh ka bengah a lut chuang lo, ka ngaithla liam ve vel mai mai.

Inkhawm ban ve leh, inah ka haw nghal a, Sunday School pawh ka kai lo. Ina awm hmak ka duh.

Ka room-a ka luh rual rualin ka phone a lo ri a, khumah ka theh thla ṭhuai. Tun ṭum erawh, vawikhat call mai a duhtawk lo, ngaihsak lo luiin ka inthlak sawk sawk a, bathroom-ah rei tawk fang ka awm.

Phone ri ka hriat tawh loh avangin bathroom aṭang ka chhuak a. Khum chungah ṭhuin phone ka ban a, data ka on chu message a lo thleng zut zut, mimal message ang chu, ka pu hnen aṭang vekin a ni.

Noti bar aṭang a ṭhen ṭhen ka chhiar a, *I ṭha em?* *i dam ṭha em?* phone off-in, thawk ka la kâwk kâwk. Min ngaihtuah tih ka hriatna chuan min tihlawm rualin, min tithinrim tel ṭun bawk.

Min lo call leh a, kawngkhar chum ri ka hre tel bawk. Kawngkhar hawn ai min call-na chu ka chhang zawk a.

"Ngati nge i haw daih a, i dam ṭha em?",

"Ka dam ṭha, Sunday School kai a ngaih kha, va let rawh", ka ti dam thluam a. Dam deuha ka be thei chu, mak ka inti letling zawk.

"Lalte?",

"Va let rawh, ka ṭha lutuk",

"Min ngaithla phawt rawh, ti tura min tih apiang ka ti ang, keimah chuan ka thei lo", a rawn ti a. A buaithlak ṭhin teh e.

"Lalte, khawngaihtakin min luh tir rawh",

"Va let rawh ka tih chu, Sunday School i kai kim loh chuan, kum tawpah lawmman i dawng thei lo mai ang", ka ti a. A lo nui hak.

"I bulah ka awm duh", ngen ngawl tak hian a rawn ti a. Ka insehruh ṭeuh, ka ngawi tawp tawh, chhan dan tur ka hre tawh lo.

"Ka lo lut dawn a nia", rang lutukin ka hawi chhuak a, ka room chhungah a lo ding reng tawh. "Engtin?", ka ti hliai a, a nih tur ang chu a ni vek tawh.

A smart ang huin, a hmel erawh a smart lo, a bui chûr. Min tihhrilhhhai em avangin khum chungah ka la ṭhu reng.

Min lo pan sauh sauhin, khuma puan awm chu lain min sintir hmak. "Ina i awm pawhin khatiang khan inthuam suh", a ti hmuk.

T-shirt kawr nghawng zau deuh hain, boxer te deuh ka haa, hemi vang hi a ni ngei ang.

Puan hlipin, "Eng nge i lo tih dawn? Chhuak rawh", ka ti a. Ka ding hluai chu min pawt, ka kut thing sawkin, "Min khawih suh, midang room-a lut mai mai lo turin min tih kha, i thusawi ngei pawh i zawm tawp lo", melh ralh chungin ka ti a.

Min en lo a, khum chungah a ṭhu ngawi reng. "Ngati nge min tihbuai reng, buaipui tur i neih kha", ka ti ta tawp.

Rang lutukin min lo en chho a, "Lalte", beidawn hmel zet hian a ti a. Ka thaw halh halh ringawt. Amah hi nge keimah zawk hi, luhlul chhuah tlat pawh ka hre tawh lo.

"A nih, tikhan lo awm rawh, ka chhuahsan dawn che a nia", tiin, ka chhuak zui.

Room-ah ka lut ta miah lo a, ka room ngei aṭanga chhuah ka ngai zawk chu, ka nuih te lam a za tawh.

Ka nu leh pa an lo haw a, ka pu chu engmah hre loin a lo chhuak nawlh ang tih ka hlau hnuhnawh. Mahse, vanneihthlak ka ti dawn nge, thingpui pawj in loin, Pu Hminga dam lo kan turin an chhuak zui leh daih a, ka thaw huai huai.

Room-ah ka lut thuai a, ka thil hmuh avang chuan ka ding ren rawn. Tui deuha muhilin a lo thaw sât sât mai.

Ka beidawng lutuk chu, ka thaw halh ringawt. Room aṭang chuan ka chhuak zui leh daih a. Tv hmaah ka ṭhu ringawt, tv ka on lo a, tv en pawh ka phur lo.

"Dingdong",

"Nga-ki", mak ti deuhin ka en a, min lo nuih sang. "Eng, eng nge i lo tih dawn?",

"A mak, ṭhu tur tein min ti dawn lo mi?", nui varin a ti a. Ṭhu turin ka han hrilh leh rih. "Khawiah nge ka nu leh pa hi?", Nga-ki chuan a ti a. Dam lo an kan thuin ka lo chhang.

A ṭawng tam reuh si a, ka lawm tawp. "Ngati nge min en char char a?",

"Ngati mah, i lo kal a, ka lawm lutuk", nui varin ka ti a. A lo kal hi ka lawm tak tak, ka hahdam sawng sawng.

"Dingdong, Fellowship ṭan hma ka lo kal zuai, eng lo, hrilh tur che ka neih vang a nia",

"Eng maw?", ka ti hû a, ka ṭhutna dawt chiah sofa-a ṭhu a ni a. Ka kut lo vuanin, "Dingdong, ni ang", a tih chuan, "Maw?", ka ti hluai.

"Ih, ih, Nga-ki", ka ti bah nawk a, a sawi sual a ni hrim hrim.

"Tun lawka ka ngaihtuah a ni lo a, ka phur thut vanga sawm che pawh ka ni lo. Hrilh tur chea huaisenna ka neih loh ṭhin vang a nia",

"Nang, nang chu, ka ṭhian i nih kha",

"Ka hria lawm, ka hrilh lawk loh chhan che chu Ralte chauh i duh vang a nia, Ralte ka ni si lo a", inthlahrun hmel tak hian a nui suk zui.

"Mahse, Ralte lo lakah pawh i thinlung i hawng tho a, ka tan pawh hian min hawn sak ve rawh",

"Ih, ih", ka kut ka la sawn a. "Tuna min chhan kher ka phut lo, i ngaihtuahna a buai dawn tih pawh ka hria, ka nghak thei che", Nga-ki chu ka en mawl tawp.

Engtin nge chutiang rilru, ka lakah a put theih zawk le? "Nga-ki, ka ṭhian hi chân che ka duh lo",

"Min chân dawn hleinem, i ṭhian ka ni reng tho dawn a, i ṭhian ni reng chung siin inlaichinna thûk zawk ka dil mai chauh che a ni", Nga-ki chuan a ti leh dap dap a, min tibuai vek.

Engtin nge ka tih tak ang? Ka hmaah leh room lamah, eng, eng hi nge maw thleng ta le?



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)