DEAR PAIN CHAPTER- 24 By: Brigida Hugo

Episode kal lai dah luhna

Moderator: writers

BrigidaHugo
Posts: 13
Joined: March 29th, 2023, 7:43 pm

DEAR PAIN CHAPTER- 24 By: Brigida Hugo

Unread post by BrigidaHugo » May 25th, 2023, 10:37 pm

DEAR PAIN
Chapter - 24




By : Brigida Hugo







In lama kan let leh aṭangin kar khat a liam ve leh der tawh a. In chhungkhur boruak pawh a zia rih viau. Kan haw zanah khan ka nu in ṭawngkam hriat nuam lo zet mai a chhak chhuak leh a, ka rin lawk sa thil anih avangin ka pawm dam thei viau thung. A tuk zingah erawh Mampuia'n "Ka nu, thil tisual thei vek kan ni. Nang pawh tun ang reng a i khawsa anih chuan tlakchhiat hun i la nei dawn ania" a ti ta fawk a, dik a ti ve a ni mahna; a ngawi reng a. Bawihtei hian a pi hi a ngaina phian a, an in kai kawi ve reng bawk.






Mahlimi pawh an In lamah a haw ve leh rih a, palai tir in kan umzui ve nghal bawk. Zanin hi an kal leh hun tur a ni a, Mampuia pawh a phi cheng mai. Ka nu pawh a ṭhiante'n chhuahpuiah rawn sawm nasa viau mah se a hnar fithla ve ṭhak a, khawilai hmun emaw a chhuahvah kha a rem lo bawk em a ni. Mo nei tur dinhmuna a din meuh chuan a mizia pawh a danglam ve deuh chuan ka hria. Diktea pawhin theihtawp in min duat ve a, naupang han chhawnchhaih vel erawh a ngaihna a hre miah lo thung.






"Khu ruai suh, mi te paw'n palai an tir ngai. Nang ang cheng chungin an awm lo" ka nu in a ti hlak hlak a, Mampuia chu a lo nui khêk rûih a, awmze nei zetin min melh zuk zuk bawk a. A awm hle hle thei lova, a khât tawkin Mahlimi a va be leh sur sur ṭhin. Zan dar kaw pelh ah kan palaite an rawn haw ta a, an hmel hlim sângah chuan thu lawmawm an rawn hawn tih hai rual a ni lo.






Ṭhutkhawm na ah kan ṭhu ṭhap a, Pa Thara chuan Mampuia chu a fiam kual leh zet phawt a, Mampuia lah an thu hawn hriat chak reng reng a lo khawsa a ni vei bawk nen; a bak hlur tawh mai. Thingpui lum pahin Mampuia leh Pa Thara han in hnialfiam bap bap chu ka nuihpui sak sak reng a.






Pa Muana chuan an thu rel ang te chu a sawi dap dap a, "Inneihni atan khan thla thar Ni 12 kan rawn ruat fel ta mai" a tihlai chuan thingpui ka pe kual den den a. Mampuia chu ka melh zuk a, min lo melh ngheng a, ka nui phuh ṭhat nghe nghe. Ropui taka tih hluai kan duh lo ve ve bawk a, chhungkhat hnaivai leh ṭhenrual ṭha an kim chuan a tawk kan ti viau mai. Rei vaklo kan rik leh luam hnuah kan palai te chuan min ṭin san ta a, keini nufa pawh mu turin room lam kan pan zui ta thuai a. Mampuia leh ka nu chu eng eng emaw sawi dunin an la ri bal bal reng a. Ka rilru ah ka pa a rawn awm nghal zat a, ka ngai thar veng veng mai. Hun ropui tak kan thleng dawn a ni a, ka pa awm ve lo tur chu a hmunruak a zau viau dawn in ka hria. Amah chuan rawn kal a, a fapa hun tawn ropui tak chu rawn chhim a duh ngei ang. Mahse, a rawn lan ka ring lo.






Bawihtei tui taka a mut tawh hnuah pawh a nau erawh ka la awi ta ngat ngat a, ṭap chuang silo hian a meng kar reng mai a; rei fe ka awih hnuah a mu ve hram zel chauh a ni. A chhing ṭan diar diar tihin ka phone a ri tlang tlang a, phun hlak hlak chungin ka pan hnai ta vat. Min rawn call tu hming ka hmuh rual chiahin ka ner sak a, engtinnge maw min rawn biak a la tum ngam zawk ni? Hmet tawp hmakin ka silent zui ta daih a. 'Eng anga piangthar sawmsarih pawh nise ka let tawh ngai dawn lo' tih chu ka thuthlukna a la ni fan. Bawihpuia a muthilh zui ve tak avangin ka mut ṭha ta vat a, kan nufa hmalam hun tur ngaihtuah rauh rauh chungin ka chhing zui ve ta vang vang a.






Zingkar boruak vawt sûng chuan chet a ti nuam lo viau mai. 'Ber' thla han chuankai meuh hi chuan a ken tel boruak vawt ver hi ka ruh hian a hre hma viau mai leh nghal a, thlasik chhung zawng chu ka buai ru leh ngei dawn tih pawh ka hrechiang viau bawk. Thingpui ka lum zawh vek tawh hnuah pawh tumah an la rawn tho chhuak lova, zawitê a zai rât rât in eirawng ka bawl zawm nghal mawlh mawlh a. Mampuia'n bai thak a ei chak thu a sawi reng avangin uluk takin ka siam zui malh malh a.






"Bawihtei te unau an la tho nange?" ham bai bai chungin ka nu in a rawn tichhuak a. "Aw, an la mutui ve reuh lutuk" ka lo ti nghal vat a. Khua a vawt bawk a, mu reng rih mah se pawi ka ti lem lo.





"Diktea room tur hi buaipui a ngai dawn a ni. 'In hnuai khu ping mai ang u' a ti deuh chhen bawk sia, tunge maw kan khawih tir dawn ni?" a ti zui mawlh mawlh a. Tunah tak hi chuan hmana ka nu diktak kha a ni leh tawh. A phone en zui mawlh mawlh in a bengah a chuktuah nghal zat a, a biak dan aṭang chuan kan veng mistiri hlun Sangliana a bia tih ka hria. Ka pa ka lo ngaihtuah thleng leh daih a, awm se chu midang biak buai kan ngai dawn miah lo. Ka nu leh pa te hi theihtawp chhuaha suihzawm leh ngei ka tum nghet bur. Hun erawh a duh ve deuh ka ring thung.






Chaw ei kan peih meuh chuan a tlai duai tawh, kan che zui nghal sawk sawk a. Sangliana kha hna ah a âwl lai tak a lo ni hlauh a, In hnuai a rawn khawih ṭan thei nghal dawn hlauh a, thaw a veng ru huai mai. Diktea'n a tihpui thei dawn a, ka buai ve vak a ngai dawn lo hlauh bawk. Ka nu dawr kal tur chu Bawihtei'n a ngen tlat avangin an in kaichhuak ve ta kha a nia, an inti buai viau ang tih erawh ka hlau ru deuh. Bawihpuia ka awi mu a, insuk tur awm ang ang ka la khawm nghal zung zung a. Tleipuii rawn len a tum bawk a, a lo thlen hma a lo in tihfel hman duak ka duh a ni.






Ka phone ri reng chu phun hlak hlak chungin ka pan phei a, Hriathlua bawk chu! Vawi tam tak a rawn call a, ka dah sak hmak zel kha ania. Tun ṭum erawh chhân deuh fak ka duh avangin ka la ta thung, hlau ang hrim a lak duh loh reng kha tlawmah ka lak deuh vang a ni pakhat bawk.






"Ka fate ka rawn la dawn, engtinmah i enkawl ṭha lul lo ang" a rawn ti nghal phawr phawr a, za lo fahran in ka lo nui hak.





"Mi nuih khanglang a ni maw? Engnge ka tih theih lo en rawh. Ka fate hi mi tenawm bula an khawsak ka phal hauh lo" a rawn ti leh zawt zawt a, ka sa ve ta phat mai.





"I va han zak thei lo zawt zawt tak. Hmeichhe ân cheh ang mai a i rik bawrh bawrh le. En teh, i fate hian an mamawh miah lo che. I ngam anih phawt chuan rawn lak chu tum chhin la, i duh duh ti rawh. Nangmah kha in en la, i fate hian i bula awm hi an thlang dawn lo nasa a nia. Mahni fate pawh reh hlum tum hial mihring kha tuma'n an ngai huam huam lovang che. Hmeichhe rilru ang pawh pu phak lo khawp a mipa nep i nih kha hre ringawt rawh" tih khum nghek in kan inbiakna chu ka ti tawp ta hmak a. Ka sa pup pui thei hial.






Ka tei kual sek a, ka thaw leh hawk ṭhin. Hriathlua'n a mah in en let duh miah lova a chhia zawng zawng min burbun let daih chu pai dam harsa ka ti ngang ngang hle. Diktea chuan min rawn au lâng lâng a, "Tui vawt in tur min rawn pe lawk teh" a rawn tih leh rual chuan ka kal zui nghal thuai a. Thleng silna bula tui khal bûr a hûn tui chu ka la vat a, ka pe zui ta vat a. Kan In hnuai hi ka pa hnathawhna ṭhin kha a nia, eng eng emaw tihfel tur a tam viau mai. Mampuia te Inneih hma chuan kan in peihfel hman mai turah ka ngai.






Inchhung ka luh leh chuan Tleipuii a lo ṭhu reng tawh a, a phone a lo bih ngar a, "I lo thlen na a rei tawh em? In hnuaiah hna an thawk a, ka zu kal lawk maw le" ka ti nghal bawrh bawrh a, min chhang lo in a phone en chungin a khi vur vur ringawt. "Hmuh ṭha i hmu em maw'n le? Mi â ang mai" ka ti leh hlak a.






A phone chu ka en theih turin a rawn dah zui vat a. Pawhthlak sak zui vatin ka en zui ve vat a, karei... a bialpa nena an inbiakna ho zet chu ka nuihpui hak. A mizia nena in rem zet mai bialpa a nei fuh hlauh mai a, a hlimpuiin a chanchin lo chu sawi tur pawh a hre meuh lo. Ka lo lawmpui ve em em ṭhin. Ka ṭhiannu tal hi chuan kei ang mai mai nilo a nun hlim tak a neih ka duhsak em em a ni.







Hriathlua nena kan chungchang sawi zuiin a ang bawrh bawrh a, "Vawikhat tê mah saw ramhuai pa bulah sawn let leh tawh ngai suh ang che" a ti mawlh mawlh reng a. Ka thil sawi ṭhenkhat chuan a mittui a ti parawl kiang thei hial, thinlung takin min tawrhpui tih ka hria a; ani ang ṭhian ka nei hi ka lawm vawng vawng ṭhin. Kan titi tui laiin Bawihpuia muhil a tawn harh a, "Fa ka neih ve hun atan ka lo in zir lâwk ange"' ti chungin min buaipui sak ta vek a. A zeilo lutuk chu ka lo nuih pui nghek thung. Mampuia te Inneih hun tur te sawi kai zelin a phur surh surh kher mai. Kan kawr hak tur nen lam a rel fel leh vek tawh, engkimah hian a in ti neitu ve em em a; ka nau te pawhin an u en ve hliah hliah bawk. Tlai eirawngbawl hun hma deuhin min haw san ta a, a reh nghal ruih mai. Tleipuii bulah lo chuan rilru tawt bunruahna tur ka nei bawk si lova, a bula awm ka nghahhlelh leh thlakhlelh ang aiin a awm rei hman ṭhin bik si lova. Min kalsan hian ka tawt leh nghal up up ṭhin ni mai hian ka hria.







Kan ṭhenawm nu in panhnah khawih turin min rawn be leh a, buai viau dawn mahila kan nufa mamawh tlem a zawng tal ka lo phuhruk theih beisei in ka in la khawm leh ta poh chu a nia. Ka theih ang ang a in hmakhua in ka che chhunzawm mawlh mawlh a. Bawihtei chauh anih lai kha chuan chet a awlsam viau a, tunah chuan nausen buchip pawm chungin a ṭul ṭul ah ka phêt dawr dawr a ngai tawh. Ka fate bak damchhan neiin ka in hre lova, an tana theihtawp chhuah chu ka tih makmawh a ni tih lah ka hai lo. Kan hmalam hun la ko viau mah se engtikniah emaw chuan ziaawm hun kan nei ve ngei ang tih chu ka beisei lui ve ṭang ṭang a ni ber.







Ka nu leh Bawihtei pawh an lo haw hma viau mai, min ngai tih chu min sîk nghal char char danah ka hrethiam mai. A la tal hrang tam lo bawk a, min hmulo in a la awm nileng thei meuh lo. Diktea te hnathawk pawh an bang zawm ve thuai a, Sangliana chu a hna a chak bawk a; nikhat na ah pawh a hnathawh a lang nghal kuarh mai.







Nitin buai phar dawr dawr chungin hun kan hmang ve zel a, Mampuia nupui neih hun pawh ni hnih chiah in min dang ta. Bawihtei pi leh pu te pawhin min be âwl lova, min rawn tlawh an duh ve viau ṭhin nangin kan boruak avang khan ka chhungte an hmaizah ve em a; an rawn leng lut ngam chiah lo thung. Ka nu pawh kan han awm rei leh deuh takah chuan phunnawina tur a hmu tam leh viau tawh mai. Ka panhnah khawih ka la chhunzawm reng a, ka fate buaipui leh inchhungkhur hna nen ṭhut awl pawh ka nei hman meuh lo. Diktea room tur pawh an peih fel tawh a, Mampuia pawh a vir vut vut reng mai.






"I putea te lo thleng tur kha lo buaipui la, ka chhuah ngei ngei a ngai. Thil tih fel tur a tam bawk si, ka tlin lo lek lek ṭhin a ni" in siam pahin ka nu chuan a ti hlak hlak a, a che reng reng hi phun pah lo chuan a che thei lo emaw tih mai tur a ni. Nau paw chungin panhnah ka roll a, Bawihtei'n min lo khawihpui ve sek bawk.






"I thil tih lai te kha duhtawk rih rawh, chhungkaw buai lai laia mahni thil tih ringawt lo buaipui mai. Kan in daih loh em hi maw le" min melh râm râm pahin ka nu chuan a rawn ti leh hlak hlak a. Ka thil khawih avanga ka tibuai viau pawh ni hlei lo, ka ngei ve lek lek ṭhin. Hmanhmawh zetin a chhuak zui ta dawr dawr a.





"Anu, apa bulah khan kan awm tawh dawn lo tiraw?" Bawihtei chuan min en khiau chungin a ti a, ka lo bu nghat a.




"I awm leh chak em?" tih pahin chiang zetin ka melh ngar a.




"Aih, ka duh tawh lo, ka hlau" tia min chhâng chu min chhân dan tura ka rin sa mah nise a mitmeng hlauthawng zet ka hmu tel chuan min vit na veng veng mai. Fa te meuhin an hlauh khawpa khawsa thei chu "Pa" tia koh tlak a ni pawhin ka hre lo hial.







Ka thil tihlai ka zawh fel meuh chuan a lo tlai leh duai tawh. In dah fel zui thuaiin lak mai theih turin ka dahfel thlap a, ka chhunzawm thei rihlo tur chu ka ui ru viau mai. Nau pawm chunga ka thawh ve theih tawk a ni si a, hlawk viau lo mah se mamawh zual a lo phuhru ve kha ka tan chuan a hlu ve em a ni.






Dar thum pelh hret ah ka putea te an rawn thleng a, an chhungkua in an ni bawk a kan ri nghal nak nak mai. Naupangin motor an ruih deuh avangin an mu zawi ngiai hlawm a, Bawihtei'n a khât tawkin a bih leh dâk dâk zel. Ka pitei'n chawhmeh rêp eng eng emaw a rawn keng nual a, ani hi chu a bengvar bawk a; a lo kal tel ve hi a lawmawm bik ṭhin. Bawihpuia chu min lakchhawk nghal vat a, a awm chhung chuan ka zangkhai viau dawn tih ka hria. Ka putea inbual hlan in Hriathlua nena kan chanchin min zawt sar sar a, a tlangpui ka hrilh thuak thuak a.






"Chutiang mihring te an lo awm thei ngai a ni maw? A nun zawng zawng chu dawt hlir zu ni chuan..... In lam let tawh miah suh, ani aia ṭha pawh i la hmu dawn lutuk" a ti bawrh bawrh a. Tuna ka dinhmun nen chuan midang ngaihven chu a theih loh tluk a nih rualin ka tum miah lo bawk. Ka fate bak ngaihtuah tumna ka nei lova, kan nufa a rahbi rem zawk kan rah theih nan ka nun zawng zawng ka hlan a ṭul tih chu keimah leh keimah ka inhrilh thar mawlh mawlh a.







Ka putea hi nupui nei har tih takah an fate pawh an la nau viau mai a, Bawihtei te nena in kawm rual lek an la ni. Kum chhirin nau an nei a, hmeichhia ve ve an ni hlauh a, an harh zawk zawk lo hlauh. Bawihtei pawhin a nel zui thuai a, an motor rui chau zual a zia tawh bawk a; an ri lê lu tawh mai. Rawng ka bawl chhungin ka pitei'n naute a lo chang chawt a, a hahdamthlak ngei mai.






Ka nu chhuak pawh a rawn haw zui ve ta bawk a, a buai zia thu a sawi uar hle; a tihdan ngai te bawkin thil a rawn khai haw leh luk luk a, leitur neuh neuh hi a hrethei phian a. Ka putea ho in mipa lamin Uisa an lo siam ve bawk a, kan eirawngbawl boruak pawh a nuam tham laih laih viau mai.






Naupangin chaw an eikham zawh ah puitling lamin kan ei ve leh nghal a, Bawihpuia pawh ṭhutthlengah muttir in a u te ho in an lo veng ve thei a; hahdam takin chaw pawh ka kîl ve thei e. Ka putea'n Mampuia chu a zilh malh malh reng a, chhungkaw pangngai tak din a puitling taka awm turin chah mawlh mawlh bawk. An ṭawng kâr laka ka nu in min rawn hmer tel zauh kher erawh ka chaw ei ti tui lo tham a ni.






"Zothani pawh nu leh pa zilhna ngai pawimawh nise chu tun ang mai mai hian a awm lo tur ania, tunah chuan 'nuthlawi' tiin an sawi zui reng tawh anga; ṭhenkhat tan phei chuan a nihna aṭang ringawt pawhin a zuamawm nghal sarh tawh ang chu. Fa pahnih chhawm bawk chung chuan khawilai pasal ṭha tak mah a hmuh a rinawm tawh der si lova" ati hlang hlang a, ka nihna mah nise ka nu ka aṭanga chhuak a nih meuh chuan ka la na viau mai.





"Engkim a nih tur ang a ni vek tawh a, naupang han lian deuh sela Matei pawh rilru puitling takin a awm anga; dinhmun te chu a inthlak thei alawm, a la zia chho ve leh mai ang" Pitei chuan a lo thung a, ka nu ner nawk chu ka hmu reng. Ka chaw ei pawh a tui nek lo, ka kham zui ta daih a. A tuk mai man hlan hun a ni tawh a, boruak ṭha lo neih ka hlauh avangin ka ngawi hram hram a ni. Ka dinhmun ah hian ka nu hi ding ve nise, tuna a ṭawngkam ang kha chu a natpui ve viau tho in ka ring. Chaw eikham a an in kawm khawm na ah pawh tel ve peih lovin kan mu zui ta daih a.






Man hlanna hunserh kan hmang mek a, tu te pawh chu kan hlim tlang hle tih a hriat. Mahlimi man ei tu an ṭhahnem viau mai a, vengchhungah pawh mi hlun kha an ni ve a; an phuisui viau mai. Ka pitei leh Tleipuii te ho nen tlar hnung lamah kan ṭhu ṭhap a, Mampuia lâi deuh chu kan lam hawiin a rawn khi leh suk ṭhin a, ka pitei'n rum zetin a lo melh leh kha kha ṭhin. Kan hma chiahah Diktea leh ka putea an ṭhu ve bawk a, Tleipuii chuan Diktea beng bulah "I hmabak ve tho anih saw, engkim saw lo chhinchhiah uluk hle rawh" a ti sur sur a, Diktea chu a rawn lehhawi zuk a, a rûm nghut a. Ngaihzawng a neih pawh hi ka la hre lo, hmeichhia hi a hlau ni berin ka hre tawh.






Tleipuii chu riak ve nghal turin ka sawm a, a lo in peih nghal at mai. Ka pitei hovin eirawng kan bawl a, naupang in kâwmkhawm thawm nen kan ri chel chul mai. Ka pa ka be zuai a, "I rawn kal ve theih ka rin tehreng nen" titau aw ki lam mahin ka ti hlak a.





"Nia, min dem pawl pawh an awm ngei ka ring. Mahni fapa te nupui neihna em pawha rawn lang thei lo nih chu a hrehawm viau mai. Mahse, rawn kal loh ka thlang ta zawk anih hi" a aw ki chu ka hai lo, a inthlahrung ngawih ngawih tih pawh ka hrethiam mai.





"Awm vela ka ti em em a ni mai, ka kim lo" ka tihlai chuan ka hnuk a ulh ru ṭêuh bawk.





"Engpawh nise Mami....mamawh leh ṭul in neih chuan min rawn hrilh hre ve hrim hrim zel dawn nia" a rawn tih hnu chuan a buai deuh thu a rawn sawi zui zat a. Ka thusawi in a rilru a dek ru hle ang tih ka hria. Mahse, min hmangaih zia ka hriat hian atan thil tam tak tih sak ve ka chak ṭhin.






Kan chaw ei boruak pawh anuam laih laih viau mai. Zing lamah thawh hma kan ngaih dawn avangin mahni mutna hmun ṭheuh kan pan zui thuai hlawm a, Tleipuii chu kan khum bul chhuatah mutna zau takin ka phah sak duai a. Kan bula mu ve tura ka tih lahin, "Naupang ka delh khaw lo palh ang" a ti teh tlat bawk sia. Naupang an mut fel veleh a bulah ka in sawn ve ta daih a. A bialpa nen an chanchin te min hrilh ve melh melh a, a sawi danah chuan a fel hmel viau mai a. Pasal ṭha tak nei se ka ti ber mai.






Tleipuii muthilh hnu pawhin ka hun hman tawh leh tun hun, kan nufa hmalam hun thlengin ka ngaihtuah zui neuh neuh reng a. Kan nufa min ngaihtuah ber ṭhintu Mampuia berin nupui a neih phei chuan kan nufa hmalam chu a thim viau in ka hria..






Zing thawhhlim aṭangin kan phi ruai hlawm a, ka nu chu a buai ber ah a ṭang leh a. Mampuia pawh kan veng beautician U Lalnuni'n a hmai vel a khawih sak a, a nui kur kur reng chu a ngaihna hrelo zetin kan en leh hâw ṭhin. "Mipa zawk pawh chei kan ngai ta a nia, i ti ta sa sa paw pheu tur khan min hnawih law law rawh" a ti zuah zuah a; kan nui leh ham ham ṭhin. A tet te aṭanga a kawm chhoh ngar ngar Hruaitluanga'n a dinpui dawn a, coat suit an ha dun rual mai chu an mawi dun viau mai.







Dar 11 Inneih ṭan hun a ni a, kan chhangchhe deuh bawk nen Tleipuii'n U Rinpuia a bia a, min rawn hruai ta hlauh a. Biakin khat tlatin lawmpuitu kan nei a, inkhawm ho zawng zawng chu kan mawi tlang hlawm ngei mai. Mampuia'n ring zetin Inneih thuchham a sawi a, "A ngheh hmel bik" Tleipuii'n a lo ti leh hmanhmawh a. Kan chhungte hmun hran hran aṭanga lo kal khawm te nen hmun khatah kan ṭhu ho ṭhap a, rilru in ka pa a hre rauh rauh reng mai.






Ka hawi kual vel a, kan piah kil khata Malsawma lo ṭhu ve kur chu ka va hmu fuh kher a, Mahlimi te lamin an sawm a ni mai thei. Min en reng chungin a khi suk a, ka hawisawn nghal thuai a. A hmaa min ṭawngkhum dan kha ka la hrereng a, min lo ngaihnep ruk zia ka hriat takah khan vawikhat pawh ka ngaihtuah leh tawh ngai lo. Ani chauh pawh nilo mi tam tak hian Malsawma min endan khan min en dawn tih ka hria, theihtawp a nun uluk ka tum tlat bawk.







Inneih hunserh a zova, Bawihtei pawh flower girl ah aṭang a; nuam a ti viau mai. Thla la turin kan ding ṭhap a, ka pheikhawk bun chuan ka ke a ti na tawh kher leh nghal a, Bawihpuia a muhil daih a; thlalakna ah pawh a lang ve ta lo. Mahlimi te lam aṭang pawhin thla la an awm nual bawk nen kan lakpui zawh veleh Tleipuii leh pitei te nen In lam kan pan ta daih a, ka nu leh a ṭhiante ho erawh an la in hawrkhawm lêt lêt hlawm a. Tlai lamah min lawmpuitu te nena chawhlui kîl ho tur kan buatsaih ve bawk a, ṭhenawm khawveng hnai a kan ngamtlak deuh te fatu turin kan sawm a; anni pawhin an hna an tlin par par hlawm khawp mai. An hah hlawm ngawt in ka ring, an Kuhva ei tur te chu ka lam sak sawk sawk a. An lo lawm thiam ve em em bawk.







Kan inthlak fel a, in leng ho lo chhawn turin ṭhutkhawmna lamah kan ṭhu a; an rawn lut khawm zui ṭak ṭak a, ka pitei'n a lo chhawn zung zung hlawm. "I nu pawh hi vawiin angah te chuan In lam ngaihven ve tur ania, chuti chen chen a khawmuan tur a ni hlei nem... Mi ngaihah pawh a zahthlak alawm, a khawsa zia dang ta hlawk hi engnge maw awmzia ni?" Pitei chuan a ti hlak hlak a, an ṭhian ho khan an la rawn haw ve miah lo tak a. A chang chuan ka nu hian ngaihzawng a nei ni mai hian ka hre ṭhin, a in chei hliau hliau reng mai te hi ka hmu hne leh thut zel. A kum leh a inchei duhdan pawh a in mil tawh lo, ka lo zah rûk chem chem chang a tam ṭhin.







Mo hruai a lo hun chuan an kal ta duak a, Bawihpuia mu tho a suakbak tlat pek a; room lamah kan in buaipui ta chawt a. Hmel hrang hrang a hmu kha a tlei loh phah ni ten ka hria, Mampuia'n 'a damloh phah ang, tih tur ṭul dang a awm chuang lo; lo awmpui mai mai rawh' min ti bawk a, inthlahrung lo takin khum ah hnute pe in ka mutpui ta hle hle a.






Ka lo chhing sek aniang, min sawi nawk nawk tu an awm takah chuan ka ṭhuchhuak hlawl a; Tleipuii'n min lo melh tûr khai a, " Engnge maw i lo muthilh ngawt le? I ti awm ang lo lutuk. Tho la in ti fel rawh. Mo hruai an lo thleng a nia" a lo ti bak hlar a. Rang takin ka thochhuak zui vat a. Bawihpuia pawh mu tho suakbak e tilo chuan a muhil leh daih a, mut a lo kham miah lo anih hmel.






Mahlimi chuan bungrua pawh a rawn keng ṭha hlawm khawp mai, tih mai mai pawh ti ila tunlai angah chuan a kalpah mai theih tawh bik loh chu a ni. Chhungkaw lam aṭanga thusawina te kan neih ve ve hnu ah chaw ei turin kan inbuatsai zui a, ka nu pawhin thu ṭha fe fe a sawi ve leh tak duah kha. Kan ei siamtu ten an uluk bawk a, chaw pawh kan ei ṭeuh hlawm mai. Bawihtei'n pitei a bel tlat a, ka buai loh phah viau mai.






Kan ṭhenawm pa, Pa Thara'n Mahlimi chu a fiam zuk zuk reng a, 'I chet chhiat hun ka chang dawn' tih fiamthu pahin a kalna lam apiangah a en zui ngur reng a, kan nuihpui leh bawk bawk ṭhin. A tam zawk an ṭin tawh ang tihin an present dawn te kan hawng a, an dawng ṭha hlawm khawp leh nghal a. Mahlimi chuan ka nu nena kan puan tur a hran in a lo keng tel reng a, a man pawh a tlawm lo viau in ka ring. Hruaitluanga leh Mahlimi ṭhiannu in an mutna tur an siam fel sak diam a, zan a rei ve deuh tawh avangin min ṭin san zui ta hlawm a.







Mipui huhâng hi ka zo meuh ṭhin lo, ka chau nghulh mai. Bawihtei pawh a tal hah ve ngang aniang, tui takin a muhil sêk sêk a; a nau zawk erawh ka la awi mek thung. Tunah chuan mo nei kan ni ve ta a. Mahlimi chu sual em em turah ka dah lem lo. Mahse, ka fate nen kan nih ve diah tawh avangin inthlahrun erawh a na duh viau in ka ring thung.






Duhthusam leh beisei tam tak ka neih ve te hi puitlin ve tur chuan hun a kal ve fe a la ngai dawn a, a kar lakah eng boruak nge kan la tawn dawn tih hriat a ni lo bawk. Thil tam tak ka ngaihtuah chang chuan Hriathlua ka huatna hi a zual zel a ni ber, kan hawsan dawn zana kan boruak tawn ka ngaihtuah chhuah chang phei chuan ka lo in seh ruh leh ngar ngar zel. Bawihpuia a muthilh tak avangin kan mu ṭha zui ta thuai a.






"Tho rawh u, Zothan..... A mak chen chen thei mange aw..." ka nu in a tih lawng lawng thawm ah ka harh a. Ni a lo tlangsang viau tawh leh nghal a. Kan nufa chuan thawh kan hai chiang viau mai. Bawihtei te unau an la muttui em avangin ka thochhuak zui vat a, mo kan neih tuk mai a thawh ka hai kher chu ka in hau ru mawlh mawlh bawk.






"Kha..... Mahlimi kha lo pui thuai rawh. Chetna tur a la tam si, thawh hma ve tur che a nia" ka nu in a lo ti bawrh bawrh a, min in ti thlahrung zual. Mahlimi nen chuan bai tur an lo chan mek a, bai bel tur ka chhuang zui ve ta nghal vat a. Nimin tlai lama kan chawhmeh bang a la tam bawk a, Hruaitluanga leh Mahlimi ṭhiannu te chaw ei ah kan sawm ve leh bawk a. Bai ka vil mek laiin Bawihpuia a rawn ṭap ngak ngak a, Pitei chu kan pindan lamah a tlan lut zui vat a; a awm hian nuam ka va ti tak.






Chaw ei kan peih fel a, kan ei zui ta thuai a. Ṭhenawm khawveng hnaia kum upa lam rawn leng lut an awm ve deuh reng bawk. Thingpui kan lum reng a, Mahlimi chu a mawng a zâng vat vat hle mai. Ka putea te nupa pawh a ko ve nghal mawlh mawlh a, anni pawh an lawm ve viau in ka hria. Hmeichhe ṭhenkhat hi chu kan sual riau a, mahni pasal nu leh pa te ngei pawh ko duhlo hi ka hriat ve chinah pawh an awm nual mai; nuam pawh hi an ti em maw ni?







Kan chhungkua a boruak tharlam rawn thleng chuan tu te pawh min ti hlim a, ka nu âng reng pawh a zia deuhin ka hria. Keipawh ka panhnah khawih ka chhunzawm leh a, kan vai mai chuan mahni tih tur ṭheuh tiin kan phe kual leh sang sang tawh. Ka rilru ah erawh kan nufa hmalam hun atana inbuatsaih lawk dan tur ruahmanna ka siam ve reng a, midang tana hnawksak a awm loh hram chu ka tum ngar ngar a ni ber. Boruak ngai reng kan hip lo ang bawk in kan inchhungkhur boruak pawh chu danglam thut thei a ni tih ka hria. Engpawh tawk in hmachhawn dawn ila ka fate tan innghahna tlak nih chu ka tum ber a ni.







(to be continue.......)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)