Keima Pu

Episode kal lai dah luhna

Moderator: writers

Cck Lalchhuanawmi
Posts: 323
Joined: August 5th, 2022, 8:54 pm

Keima Pu

Unread post by Cck Lalchhuanawmi » May 27th, 2023, 11:31 pm

Keima Pu: Sir Sawmtea
Chapter-18
Ziaktu: Cck Lalchhuanawmi

School ka tlanbo dawn tihna a nih chu, ka nu leh pain an hriat vaih chuan, min vaw duh ngei ngei ang.

"I ṭha em?",

"Ṭha chiah lo, school ka la tlanbo ngai si lo a", ka tei kual chhen. School tlanbo kher hi chu ka ti ngai lo, eng rilru pua tlanbo nge maw ka nih reng reng le?

"Dingdong, hahdam tum rawh",

"Ka thei lo nih hi, ka nu leh pain an hriat vaih chusn aw, Pu David-an a hrilh ngei ngei ang, ka chhe vek a ni mai", ka ti bah nawk nawk.

School-a kir leh mai te ka duh rum rum, a hrehawm lutuk. "A nih, ka thlah leh ang che, emergency a awm thu i sawi mai dawn nia aw", ka dara vuan chungin a ti a. Ka lo hnial lo nasa lutuk, ka bu nghauh nghauh.

School panin min phur let leh vang vang, kan thlen chuan line-up a la zo lo chiah chiah a, tlai hrem zingah ka tel thei hlauh.

School tlanbo ai chuan, tlai vanga hrem nih ka la duh zawk. "Laldindini kha, i va tlai ve", Pu David-an min hmuh rualin a lo au nghal lauh lauh.

Kei tih loh, hmeichhe pahnih an tlai ve a. Line-up loa biru mipa pathum an man tel bawk. Min hrem nan, school hall kawtah min dintir a, kan ban pahnih min phar tir zui.

Miss Lâpuiin min veng a, min titi pui char char. Kan ban erawh min dahthlak tir chuang lo, kei phei chu ka ban a kham tawh lutuk ringawt.

"Sir Sawmte", ka pu awmna lam kan hawi ṭhup a, a inpawm hnawk ṭun mai. Kan lam panin a lo kal chharh chharh a, line-up a la zawh loh avangin keini pawh kan la kalsawn thei chuang lo.

"Lehkhabu ringawt i ngaihtuah a, hunawl i nei thei lo lutuk, computer leh lehkhabu zûnah i uai tak tak tawh a nih hi", Miss Lâpuiin a tih chuan, a nui hak hak.

Min lo en zeuh a, "Thilnung lo zûna uai hian kan nâ lo ber zawk alawm", ka pu chuan nui sukin a ti a. Bo hûin ka en a, min sawichhan ve deuh nge mawni, ka zûnah a uai ve tihna a ni thei ang em?

"I tum ram va pan tawh rawh, ka ko mai mai che a nih kha", ka pu chu, bu nghuta nui sukin, Library panin a kal hnak hnak.

Ka hmuh theih chhung chu ka thlir reng, thilnung lo zûnah uai mah se, thilnung zûna a uaina chu keimah han ni hlauh ila!

"Line-up zawhah chauh in kal thei ang aw", Miss Lâpuii chuan a ti a. Kan lo bu nghauh nghauh. Tunah pawh hian min kal tir mah se, pawi ka ti miah lo.

Ka pu hnenah luh dilin, min en loin min hui ringawt a, ka kal pelh dawn lai chuan, "Lo let teh", a ti bul hmuk a, ka phu zuk.

"Nidangah chuan tlai tawh ngai suh ang che", zawi tho si, chang fak hian a ti a. A thinrimna bengdai tum niawm takin, a thaw huai huai.

Ka ṭhutnaa ka ṭhutthlak rualin, "Ngati nge i tlai a?", Hruaiin min zawt nghal. Thawh ka hai thu ka sawi ngawt a, a awih ve tho. Ani pawhin thawh a hai ṭhin thu a sawi ve tawh tlat a ni.

Ka pu chuan green board-ah chalk a zum leh mial mial a, chuti chungin min zirtir pah tho. A changin, white board-ah kan zirna kaihhnawih, thlalak te a kap chhuak a.

Mohenjodaro hmun hlui tih vel lam daih a ni. Tihpalh thilthu pawhin ka thlalak a kap chhuak tawh lo. Ka ngaihtuah erawh, a wallpaper kha a thlak tawh ang em tih a ni.

A thlak ka ring chiah lo, a chhan chu, tukinah pawh min mamawh thu a la sawi a, a la thlak lo tihna a ni mai.

"A nâ", ka rak ṭhat. Ka lu ka tuai vât vât a, "Eng nge i ngaihtuah?", a ti vin hlur. Ka âng zuau zuau a, han chhan dan tur ber ka hre lo. "Ding rawh", a ti fiak ṭhat. Ip chawihin ka ding a, "I kut dah thla rawh", a ti leh fak.

"Ti khan, tun period chhung i ding ang", en pawh ka en ngam tawh lo. Ka kun ngaih a, ka hnung lamah ka kut suih ka sik niah niah.

A ṭawng leh nuah nuah a, engtin nge a awm ka hre tawh lo, a âw aṭang erawh chuan a kal kual tih a hriat. "Awmawmi, i muthlu a nia", dam deuha ka puin a tih chuan ka hawi chhuang rang lutuk.

Nui sangin Awmawmi chu a en a, "First period chauh a la nih hi, mutthluk nan a la hma lutuk", ka pu chuan a ti dam thluam a, ka inhum ruh nghek.

Ka mittui a tlak loh nan, thil hlimawm lam hlir ka ngaihtuah a, thinrim taka min ṭawng khum reng te avang hian ka haw ngawih ngawih. Nêm deuha min biak lahin, beidawnna bak a ni ngai chuang si lo.

School danga insawn daih mai te ka duh tawh, "Ṭhu rawh", nêm deuh zawkin a ti a. Kun ngaih chungin ka ṭhu thlaa, Hruaiin ka hnung a lo chul hliau hliau.

Ka pu chhuah hnu chuan, "Dindin, engahmah ngai suh aw, a tihdan a nih kha, nikum school kal theih tawh pawhin min vin nasa thei lutuk", Zamin a lo ti dap dap.

"A ho em mai ah", nui lui sakin ka ti a. A ho erawh ka ti chiang lo nasa. A zirlai ka ni ve a, ṭha taka min ṭawng khum ve mai tur hi a nia. Awmawmi pawh chalk-in a vawm lo a, ṭha deuha a biak theih chuan, min be ṭha ve tur a ni.

Lunch break thleng pawh chuan, ka rilru a tâwt, "Naktuk Teachers Day, pangpar lei in tum em?", Hruaii chuan a ti lang lang a. Pangpar lei lam reng ka ngaihtuah leh tawh lo.

"Kei chu ka lei dawn lo, pawisa kan thawh khawm a, present an lei tho", Zamin a ti nang nang. "Thawh khawm mah ila, pangpar chu a dang bik alawm", Hruaiin a ti leh.

An pahnih chuan an inhnial dun kar kar a, a tua ve ve chuan tlawm an tum lo nasa. Ka nuih hak hak ringawt.

Chba a lo kal a, Third year min tih loh leh, senior double tiin, min ko chhen a, amah avangin ka nui nasa, ka rilru tâwt pawh a thawl huai.

Serkawn leh kan veng Ramzotlang inrinaa waiting shed-ah, Nga-ki a lo ding vang a, ka hmuh rualin nuih var varin ka pan.

"Ka lo thlah ang che", a ti sup a. Ka lo hnial lo nasa mai. "I hnungah, tukina mi pa kha a ding a nia", Nga-ki chuan a ti zawi sup.

Nui sakin, "A nih, kal ang", ka ti a. Ka hnung lam pawh chu ka hawi chuang lo. Nga-ki chu, a dul zawnah ka kut suihin, amah si cheta ṭhua a darah ka khabe ka nghat.

Engtiang chiaha nasain nge min en ang tih ka hre lo. Ka pu kan tlan liam san tih ka hriat ve leh, ka awm hrang thuai. Nuam ka ti miah lo.

Kan in kan thlen chuan ka chhuk thuai a, Nga-ki pawh chu ka en ngam lo lek lek. "Nichin vang khan ka tihpalh lutuk aw", ka ti sap. Ka inchhir hnuhnawh.

"A ho lutuk, mahse; nuam ka ti", nui sukin Nga-ki chuan a ti a. "Nga-ki", ka ti chuai raih. "Hey, ka fiamthu a nih kha", ka dara sâwi zeuhin a ti a. A fiamthu lo tih kan pahnihin kan hrechiang ber ang.

Thei tui a in zawh ve leh Nga-ki chu a haw a, Sangi pawhin Delhi a thleng tawh ang chu ah, ka u nen an inhmu nitin thei tawh dawn a. Sangin ka u Hlima a la duh ru reng bawk nen, an nih ṭhat leh te ka ring rum rum.

Sangi leh ka u ngaihtuahin ka nui var var a, an han inhmu ngei ang a, eng tak sawi ang maw?

Ka u chuan, a duat ngawt ang le. Tu nge, inṭhen rawt hmasatu zawk zawh a ngai lo, Sangin a rawt hmasa tih a chiang reng.

Ka u ka la zawt ngei ngei ang, ka hriat lohin an lo inngaizawng vel a, ka la dawp ngei ngei ang mawle.

"Bawihte", ka nuin min koh avangin, room aṭang ka chhuak a, "I u te hoin an be duh che", ka nuin a tih chuan, a phone ken chu ka zu bih a, min lo vai lauh lauh.

"Ka phone-ah min lo call r'u, nu, hotspot lo on teh", ti nghal zatin, ka room-ah ka lut vat.

Wifi ka on a, unau video calling kan nei. U Hliman net recharge sak min tum a, "Tun thla chhung chu ka duh rih lo, nakinah ka lo hrilh dawn che nia", ka ti a.

Min hnial em bik chuang lo, "Sangi chu, a nuam a ti em?", U Hlima a phu zuk. Ka nui hak hak a, U Puitea tih loh chuan a awmzia kan hre vek, "Sangi chu ngati nge a?", U Puitean a lo zawt nghal.

"U Hliman hnathawh tur a hmuhsaka, a thawhna Hotel-ah khan", ka lo ti zung zung. "A van ṭha em em", U Puitea chuan a ti muang ban charh.

Ka u nen kan nui dun hak hak a, U Hlima erawh a nui duh ṭhak lo, U Puitea lah engmah hre hek lo, hrilhhhai deuhin a tarmit kar aṭang a meng kual rak rak.

"Duhtawk teh u, in ninawm, a thuhrimah, a lo la thleng lo. A lo thleng ṭep tawh ang chu ah", U Hliman a tih chuan, "Eeee", ka u nen kan lo ti thuai.

U Puitea lah a bo tawlh tawlh, "U, Sangi nen an ni tawh lawm, an inṭhen chhan pawh, u Hlima kha a lo haw thei si lo a", nui huah huahin ka ti a.

U Puitea pawhin a hrethiam ve ta chiah a, tlai khawhnuah a han nui ṭha leh rih.

"In lo che chukchu vak vak ang e aw", U Puitea chuan a ti. "Nang kha, ngawi mai mai rawh", u Hliman a lo ti vat.

"Manager-a i kai hunah phei chuan e, i Assistant-ah i dah hmak ang a, duhtawka chet chukchu a ni tawh mai",

"Hotel a nih hi, Assistant a neih theih ngawt loh", U Hliman a tih chuan, "Ka man che, chet chukchu chu i duh hle ni maw", ka uin a ti hluai. A nui vak vak a.

U Puitea nen kan nui hak hak, U Hliman chhan ngaihna a hre tawh lo, "In ṭawng thei lutuk mai", U Hliman a ti nang nang.

"Tak taka, duh loh chunga inṭhen in nia, ni ṭha leh mah ula, a pawi hleinem", U Puitea chuan a ti dam thlup. Ka thaw chhuak hawk a.

U Puitea hi chu, kan unau zinga fing ber tih takah, a ṭawngka chhuak te hi, a ngaihtuah fe hnua a sawi chhuah tih hi a chiang ngawih ngawih.

"Ngawi lawk r'u aw, Sawmtean min lo call tlat mai, ka chhuahsan mai ang che u, muttui vek ule", U Hlima chu a chhuak nghal a. Sawmtea a tih chuan, ka rilruah ka pu a lang nghal.

Ka u hnenah eng nge a sawi ang le? "Bawihte?", ka lo pending san daih tih ka hre chhuak. Ka u te pahnih chu ka nuih sak a, anni pawhin, "Nidangah kan inbe leh dawn nia, muttui ule", an ti a.

Call kan titawp, ka khua a har nghal rawih rawih. Ka u te ho hi ka ngai tawh em mai, ka bulah awm se, ka rilru hahna te, ka harsatna te hrilha, ka kianga ding ve turin ka duh ngawt mai.

Wifi ka la off loh avangin, message a lo thleng zut zut. Group message bak a ni lo, Nga-ki pawhin phone recharge ka ngaih thu a hriaa, a message hmuh tur a awm lem lo.

Ka nu hnenah off turin ka ti a, la recharge lo ila, rilru hahna pawh a awm lo a ni mai. Group ho chu ka clear fai vek a, hla ka download sa ka ngaithla ta mai mai.

'Thawnthu tawp thei lo' ka ngaithla nawn tlut tlut. Hemi hla hian, ka rilru pek tak takna ka ex kha min hriatchhuah tir ziah a, mahse; ka ngaithla lo lo phal ṭhin lo.

A nalh ve em bawk atin ni. Ka rilrua mi pakhat lo lang avang chuan ka mittui a hnâm sawk. Kum chuang fe a lo hmangaih tawh a, tun thleng pawhin a la hmangaih fan a.

Mahse, an inkawp a rem lohna chin a awm tawh si, ka pu rilru tur pawh ka hriatthiampui uar uar. Mahse, chumi vang chuan ka pan hmasa lo ang.

Amah ngeiin, beiin hneh zawk rawh se. Ka mittui luang chu ka hru tawk tawk a, ka hla play chu off-in, lukham hnuaiah phone ka dah daih.

Ṭawngṭai tumin ka kut ka suih a, ka mit ka chhing vang vang ringawt. Sawi tur ka hre lo reng reng. A tawpah, "Amen", ka ti ringawt.

Ka mu meng kar a, ka u leh ka pu te chuan engtak sawi ang maw? Ka zawt ngam si lo, ka puin a harsatna te a thlen ve a ni hrim hrim ang.

"Pangpar te i lei ve lo a?",

"Ka theihnghilh daih lawm, chubakah pek tur pawh ka hre lo",

"I pu David-a saw i pe ang chu, in zirtirtu a ni ve tho alawm", nui sangin ka pa chuan a ti a.

Ka nu pawhin, "Sawmtea pawh a awm saw, i pe ve ang chu", a lo ti ve bawk. Ka bu nghut ringawt.

Dawrah ka kal a, Rose sen chuan ka mit a la thlu ngang mai. Rose var pakhat leh a sen chu ka lei ta a. A var hi chu, pu David-a ka pe ang a, a sen hi chu, tu emaw dawhkanah ka dah tawp ang.

School ka thleng a, pangpar an keng nalh hlawm ngang mai. Dar sawm daiha ṭan tur a ni bawk a, Office hawng tawh mah se, Zirtirtu kal an la awm lo tluk a ni.

Hruaii te pawh an lo thleng a, "Pangpar i lei ve em?", an tih chuan ka bu zeuh. Ka bag-ah ka dah ṭha khiau. "Sir Sawmtea birthday a ni pah a, a nuam double thei dawn e", Hruaii chuan a ti lang lang.

"Tu birthday maw?", ka zawt ṭha leh ngat. "Sir Sawmtea, pen zasawmnga man chi ka pe dawn a, Rose sen nen", nui deuh tet tetin Zami chuan a ti a.

Teachers' Day a birthday a ni pah bawk, a mak tawp. A piang fuh ka ti dawn nge, fuh tawk lo. A piang fuh chu a ni ber mai.

Office-ah Hruaii leh Zami te nen kan chho a, Office-a kan lut chu, Zirtirtu te dawhkan tin chu, pangparin a lo khat lûk mai. Ka pu dawhkan awmna kan thleng a, birthday present nen, pangpar nen, a dawhkan a ruak lo ber mai thei a ni.

Chocolate pe te an awm a, ka thik lek lek dawn. Zami chuan pen leh pangpar chu a dah a, Hruaii pawhin birthday present nen a dah.

Kei erawh, ka dah ta lo mai. Keia thilpek ve mai mai te chu, engmah a ni lo.

"Sir Muana dawhkan saw", Hruaii chu a au hlaui. "Sir Sawmtea aiin a khat zawk", a ti leh. "Sir Sawmtea a khat zawk", Zamin a ti ve leh.

Nui sakin ka lu ka thing nar nar, Sir Muana dawhkan a khat zawk tlat. Office aṭang kan chhuak a, CR ho an phe suau suau, ka fak ve thlawt. Ka taimaknain a tlin loh tur thil a ni ve tlat.

"Pu, Sir", ka ko sual nawk. Ko sual pawh a ni chiah lo. Pu David-a chu Rose var ka pe a, a sen erawh ka phawrh chhuak lo hrim hrim.

"Ka va lawm ve aw, Zirtirtu hian hau ṭhin che u mah ila, kan hmangaih vang che u leh, in ṭhatna tur kan duh vang zawk tih hriat tur aw", ka lo bu nghauh nghauh.

Ka kalsawn a, ralkhat aṭanga min lo thlir rengtu ka pu ks hmuh chuan, ka mit ka chhing sawk. Hruaii te lamah ka phei leh ta daih a.

Hall chhungah ṭhu ṭhapin, kan host-te chuan kan Zirtirtu te chu an ko lut ta a, kan lo ding ṭhap a, kut kan beng dur dur.

Class-9 CR, Remruatan Bible chhiar leh Ṭawngṭaina neiin, Education Minister hnen aṭanga lehkhathawn chhiar chhuah a nih hnuah, cake an lo chawi lut a.

Stage-ah Zirtirtu te chho vekin, Proncipal leh Vice Principal-in cake an zai a, chuti chhungin kut kan lo beng dur dur.

Cake chu an inbarh den den a, ka pu pawh a chhe lo hawr hawr lutuk. A hawi kual leh dû dû ṭhin chu ka hmu fuh thei em em lehnghal. Zawn nei ang tak a ni, min zawng te hi a ni mai ang a?

Tlar laihawla ṭhu kan ni bawk a, ka ṭhu kun deuh bawk nen, min hmuh mai mai ka ring lo.

Zirtirtu te an ṭhut fel hnu chuan, kan host-te pahnihin lawmthu sawina te an nei a. Chumi hnuah, "Kan school hian Teacher tlangval pahnih kan nei a, tu te nge kan hria em?", host-nu zawkin a tih chuan, "Sir Muana leh Sir Sawmtea", tiin, an au dual dual a, an khêk vak vak bawk.

Host-nu bawk chuan, "Vawiin Teachers' Day hi, kan tlangval senior zawk birthday a ni a, a senior zawk chu", a tih chuan, "Sir Sawmtea", an ti leh dual, kut an beng dur dur a, an auin an ṭe chel chul bawk.

"Cake zai ṭha turin lo chho leh lawk se, khawngaihtakin, chuan a lo chhoh chhungin birthday song sa ang aw", host-nu chuan a ti a.

Ka luhlul ka chhuah leh tlat pek a, ka zai duh ṭhak lo, ka rilru erawh chuan a zawm ve tho. Cake a zai a, ka pu chuan Principal ko chho ve lehin, cake chu a ei tir ve leh.

"Sir, min solo sak dawn tiraw?", host-pa zawkin a tih chuan, ka pu a nui hak. "Solo turin kan duh em?", host-pa chuan uar fe hian a ti a.

An 'aw' dual dual. Ka pu chu microphone a pe a, a lo ban ve mai bawk. "Sir Muanan ka soundtrack a kawl daih", ka pu chuan a ti a.

Sir Muana thoin sound control-tu te lamah a kal vat. Music a lo ri a, "Saw, tu pu nge tu pu mah, ama tar tiin an sel e", a zai hluah hluah.

Ka beng ka hup tawp a, ka beng a chhet mai dawn. Au bengchheng kara music ring tak nen, ka beng a chhe thei takngial dawn.

Ka pu chu, ka en zeuh ṭhin a, a hla sak nen an inhmeh ngawih ngawih. Ka nui uar uar a, ka mittui a tla phung.

Chuta ṭang chuan, zirlaite aṭang solo, skit, dance show a ni leh ta mai a. Zirtirtu zawng zawngte, thilpek pekna hun nen. Dar sawmpahnih pelh hret hnuin kan zo fel der.

Tlar te tea chhuakin, refreshment kan dawng vek a. Refreshment hi chu zirtirtu te tum a ni ve.

Chawhnu lam kan chawl thei a, nilenga kan hmang lo te chu ka lawm zawk. Primary ho an lo bang fel der, An la te hlawm bawk em atin ni.

Tlai lam mutchhuakin min zêm a, ka harh meuh chuan dar li a lo ri ṭep. Tep chuap chuapin room aṭang ka chhuak a, ks nu chu ka pui ve vat.

"I hmai te kha phih rawh, i harh deuh ang", ka nuin a ti a. Hnial loin inphih harh turin bathroom-ah ka lut leh. Ka nu sawi angin ka harh kâwk.

"Vawiin chu a nuam bawk em?", tia, ka pain min zawh chuan, a nawm(nuam) thuin ka lo chhang a. Refreshment awm ngaihna programme apiang hi chu, a nuam a ni mai.

Nga-ki a lo leng a, "Teacher ho ka wish kep vek che nia, i lo lungngai lutuk ang e aw", a ti a. Lawmthu hrilhin ka nuih var var.

Nilai zan inkhawm a ni a, ka nu leh pa an inkhawm a. Nga-ki chu tv hmaah ka ṭhutpui, room-ah chuan ka luhpui duh tawh lo. Engtiklaiin nge F4 a tawp hmsn pawh ka hre lo.

Tv ka on ve tak naa, kan en lo tluk a ni e. Tihian, ṭhian kan nihna hi, eng inlaichinna dang mah hian min luhkhung lo se ka ti.

"Ka'n haw tawh ang e", a ding hluai a. Pawn thleng ka thlah. "Dingdong, i lo inngaihtuah ve reng reng tawh em?", a ti a.

Ka ngawi ren rawn, ka inngaihtuah lo hrim hrim. "Dingdong, i ṭha maw?", ka darah min lo sâwi a, thaw halhin, "Nga-ki, ṭhian angin awm reng zawk ang", ka ti a. A hmel a dang nghal vek.

"Ih, ka tihpalh. Mahse, ṭhian bak inlaichinna dang neih ka duh lo", ka ti zawi sap a. Ka rilru dik tak sawi chhuak mah ila, tlem chuan ka inthiam lo ve deuh.

"Ka nghak leh rih ang che, thutlukna siam zung zung hi a ṭha ngai lo a nia", a ti zawi sup a. Nui lui tih hriat takin, a nui suk zui bawk.

Ka thlir zui vawng vawng a, ka ṭhian a nihna ang bakin feelings dang ka pu thei lo. Ka put theih ngai pawh ka ring lo.

Chutiang bawkin, ka laka a rilru put hmangte thlak se ka ti. College-a a star nu pawh, a lem vek. Dawt min hrilh mai mai.

"Min hua mi?",

"Eng maw?",

"Ngati nge, keimah chauh hi min hauh bik reng zel. Zirlai dang ho chu ṭha deuhin i bia a, kei chu, khawvela i mi huat ber angin min hmuh tawh phawt chuan min hau nghal hrep zel",

"Pass la ka duh vang alawm, lehkha zir i ngaihsak si lo a",

"Ka zir ṭha ve reng alawm", ka au khum nghek. Kan insual tak tak tawp si lo, engmah hrechiang loin keimah min hau vak ringawt.

"Ngaihzawng nei chungin i zir ṭhat theih i ring em ni?", ka pu chu ka melh rawm rawm.

"Ngaihzawng ka neih leh neih lohah i buai a ngai lo, ka zir ṭha ka tih chuan pawm ve mai rawh. Nangpawhin ngaihzawngte chu i neih ve tho kha, Zirlai te zingah min tiduhdah thei bik lutuk", ka ti leh tawn tawn.

A falin kan awm bawk a, tumahin min hre thei dawn chuang lo. "Lalte", thaw halhin a ti a. "Khati khan min ko tawh suh, vawikhatmah min ko tawh suh", ka hmui hnuai ka seh niah niah nghal.

Ka mittui ka hru tawk tawk a, ṭah ka tum loh tehreng nen, dam diaia min koh avangin ka rilru nô a chhuak ringawt.

"Ka kal dawn", ti sapin, ka kalsawn zui. Ka sam te chu hui ṭha sawk sawkin ka ṭawn ṭha a.

Fiamthu mai maiin Jolene-i nen kan insual a, hmeichhe insual a lem zia sawiin, sama inkeh bak thiam kan neih loh thu sawiin, kan tichhin mai mai a ni a.

Ka puin min lo hmuin, keimah zawk chu min vin phar dawrh a, min kai hrangin min la hau hrep zui.

"U Dindin, ka tihpalh lutuk, Sir bulah nakinah ka sawifiah dawn nia", classroom-a ka luh rualin Jolene-i chuan a ti nghal a. A inthiamlo lutuk chu ka khawngaih zawk.

"A ho lutuk, engmah sawi a ngai lo. Ka hrilhfiah vek tawh alawm", ka ti a. A hrethiam lo a nih chuan, ka thu a ni tawh lo.

Lunch break zawhah ka pu chu a lo lut a, ka luhlul chhuahin ka ding duh lo ngat. Tlar hma berah kan ṭhu a, ka lang chiangin min hmu kuau bawk.

"Afternoon, sit down", thaw halhin a ti a. Beidawn hmel zet hian min lo en ṭhin a, kei lahin ka theihtawpin ka lo melh ve ngar ngar bawk.

Ka thinrim tih hi la hre ve reng reng teh se, a inthiam lohna thu emaw, 'ka tihpalh' tih takngial pawh a sawi ngai lo.

"Nimin ang hun, changtlung taka a thlen theih nana tha leh zung sengtu, kan CR te tan kut beng ang, lo ding reng reng rawh se", nui sangin ka pu chusn a ti a.

Ka lakah chuan Sakei hmel ang chiah a pu a, midangah erawh, Ṭhuro hmel a pu leh lawi thung. Ka thin a tirim zual sauh.

"In awm loh chhung pawhin, kan zir san miah lo che u nia", nui varin a ti a. "Thilpek min petu zawng zawngte chungah lawmthu ka hrilh vek bawk che u", ka pu chuan a ti leh dap dap.

Inbengdai tumin boruak ka hip lut kâwk kâwk a, ka ṭah a chhuak ṭun ringawt.

"Nimin avangin kan rilru a la peng deuh si a, naktuk aṭangin kan zir mai dawn nia. Le, eng nge kan tih ang?", thaw chhuak hawkin, ka pu chusn a ti a.

Hmangaihan, "Sir, aim in life kha inzawt leh ang u", a lo ti. "Ni tak, kum tirah kan inzawt a, tunah a la ni reng em, en chhin ang u aw", ka pu chuan a ti a.

Hmangaiha kawk zeuhin, "Hmangaih, bul i ṭan thei. What is your aim in life?", a ti a. Hmangaihan, "IPS", a ti vah a.

"A ṭha, i la tum reng a, i la hlawhtling ngei ngei ang", ka pu chusn a ti a. Baby-i a zawt ve leh, College Lecturer a nih tum thuin a chhang a. Baby-i pawh, a dinna ngaia a la din reng thu ka pu chuan a sawi leh.

Chba a zawt ve leh a, "Baby-i pasal", a tih chusn an nui huah huah. "Khai, khai, khsi, IAS aṭang Baby-i pasal maw?", ka pu chu a chek tlawk tlawk.

Chba lah a khi ṭhaw ringawt. Kimkimi a zawt ve leh a, designing lam a sawi. "Bank Manager aṭang designing lam maw, a ṭha vek tho e", nui sukin ka pu chuan a ti a.

Chban, "Kan tlachhe sawt e", a ti nuah nuah. Ka pu pawh a nui hak hak a, midang a zawt leh.

"Jcb operator",

"Sumo driver",

"Rickshaw driver",

"Kan tlachhe sawt lah tak hle mai a", mipa lam enin ka pu chu a chek leh tlawk tlawk. "Air Force lam tum te kha, khaw'nge in awm tak?", a ti a. An nui vak vak.

"Mahse, a ṭha vek tho e. Kan specialist-na tur kan thlang a nih chusn, rinawm tak leh nuam ti takin kan thawk dawn a, chu bak baka ṭha a awm lo", a ti chharh chharh. A sawi dik phian zui.

"Sir, hmeichhe ho zawt ve tawh rawh",

"Sir, Third year-i zawt hmasa ber rawh", Chba hmu thei lo mah ila, amah a ni tih ka chiang.

"Tu nge, chu chu?", ks pu chuan a ti a. "Senior-i", Chban a ti leh. Hmangaiha ai pawhin a chimawm zawk.

"Chutiang an awm em ni?", ka pu chusn bo hûin a ti a. Ka ner sawk. A hrethiam lo lui a ang ka ti.

"U Dindini", Hmangaihan a ti chu, ka nui hak. Min u hi chuan, ka third year mai piah lamah, ka senior double ngawih ngawih hmel.

"Ding rawh se", mi pawh en loin ka pu chuan a ti a. Ka ding ve mai bawk.

Min lo en a, "What is your aim in life?", a tih chuan, "Sir Sawmtea wifey", tiin ka lo chhang.

A thinrim nge a lawm tih pawh hriat lohin, au dur dur karah min en kar reng a. En ve kar mah ila, a rilru awm ang tur ka hre thei der lo.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)