#KA TA CHAUH NI RAWH CHAPTER-1

Episode kal lai dah luhna

Moderator: writers

Mampuii pautu
Posts: 210
Joined: August 5th, 2021, 2:05 pm

#KA TA CHAUH NI RAWH CHAPTER-1

Unread post by Mampuii pautu » May 29th, 2023, 7:54 pm

My_Mampuii pautu




Ka ta chauh ni rawh





Chapter-1





"Hey...Vuli lalvulchuknu lo ding teh, iva han induh em em ve a" rawn ti tu an awm avang chuan ka ding chawt, ka chawhmeh khai lai chu siam tha zeuhin ka inher a, ka lam panin, Aiden ka bialpa hlui chu alo phei mek, ka hmu peih vak lo asin le, tun ang khawlum lai phei hi chuan, ka peih lo leh zual, khawlum vanglai tak ani bawk nen, aizawl pawh lum tha hem hem tak ani, chutah nisa hnuai ah chawhmeh ka la khai pur pur zui nihliap ken na chang ka lo hrelo chu ka inchhir rum rum.



















Ka bul arawn thlen rual rual chuan, anui deuh vur vur a, nisat nen a hmel lah chu niin a chhun chiang sia, hmuh pawh ka hmu tha thei meuh lo "khi reng lo khan eng nge i sawi duh, sawi vat rawh ka hmanhmawh viau ania" ka lo ti bak hluk, khawlum bawk nen ka thin a chhe vek, ka thlan lah chu ka nghawngah te aluangthla tawhin ka hria, thlan lah hi ka ngahfal bik riau hian ka hre thin.






















"Tunlai chu iva in duh ve, min be duh tawh silova" zak map lo chuan ati a, ka thawchhuak hak, "ka pe peih lo che pawh ani mahna, i number pawh ka nei tawh lo" ningzet hian ka ti a, ka thil khailai lah chu a rit tawh si, ning tawh tak ka ni "kha eng lam nge i khai a?" Arawn ti leh ta daih, ka ning lutuk chuan chhang pawh ka chhang peih tawh lo, ka in her hmak.





















"Vuli" tih leh ka banah chuan arawn vuan leh nghal a, "laltlanmawi min ti buai renglo hian, i tih tur chu ti mai mai rawh, ka ning lutuk khawmw" tih vin thatin, ka kut a vawn chu ka phih thla sawk a, ka kalzui nghal nal nal, mi kawngkal ho lah chuan min la enzui vawng vawng hlawm a, a zia lo tak tak ani, bus pawh ka nghak peih tawh lo taxi la in, ka haw nghal vang vang.























Inchhung ka lut chu angaite bawkin a reh leh thiap mai, pawn lamah thawm bengchheng tak tak ka hrezo chiah a, inchhung ka luh leh chiah chuan boruak a dang nghal vek, kan in ve hi chu engtik lai pawn a reh thin, in lian tak ani a achhungah pawh awmlo a awm lo, a awm vek mahse acheng te ho hi kan inpawh lo ve em ani.Inchung lam atang chuan ka unaunu hrawn chu arawn chhuk thla thauh thauh a, ani hi Bawihpuii ani a, ka pa nupui fa rawn chhawm ani a, kei aiin athla in anaupang, kan inbe ngailo ang tluk vel ani a, kan in haw lo a, kan inkawm ngeih chuang lo bawk.



























Ka nu hi, kum 13 mi ka nihin, bp sang leh zunthlum vangin min boralsan a, ka pa hian kum 20 ka tlin thlengin min tulpuiin nupui pawh a nei lo hrim hrim, kum 21 tunah hian ka hmang mek a, ka nu hrawn leh a fate hi an awmna pawh ala rei lem lo, ka pa chu a awmdan engmah ka sawisel ngai lova, nupui arawn hawn pawh khan, engmah ka sawi hek lo a chhan chu ka pa hian ka tetlai atang khan min tulpuiin engkimah keimah min dah hmasa ber thin, a ruka ka nu ngaia a thlalak enchunga a mittui tla hi ka hmu zing viau ka khawngaih thei hle, chuvanga sawisel lo pawh ka ni.






















Ka pi leh pu ka pa nu leh pa te hi, thingtlang lam khua an ni a, ka pa pawh hi an rawn ngaihsak bakah, keipawh hian hreawm ka ti ang tih an hlau thei hle, vawitam tak an bula awm turin min sawm tawh a, ka awm chak mahse ka pa hi ka dil ngam rih lo ani, ka pa hi sawrkar hnathawk ania, kan khawsak pawh a harsa lo khawp mai, ka pi leh ka pu te erawh thingtlang lamah, lo neiin ei an zawng a, bawng leh kel pawh an vulh ve nual a, fa hi pahnih an nei a, ka pa leh ka pa nau, nula senior lam kaive lek lek tawh hi a awm bawk.
























Tlaiah chuan angaite in ngawireng chuan, dawhkan kan kil thap, chhungkaw in pawh lo ve tak chu kan ni in ka hria, ka nu hrawn hi a sual lem lova, kan inbiak khat vang hi nge ka nel em em lo, amah pawn min nel ka ringlo mahse hnawksak turin kan awm ngailo thung, ka pa chu ka melh leh zeuh thin a, dil chu ka duh mahse ka ngam leh chiah thin silo.





















Atawpah chuan ka huaisenna zawng zawng sawm khawmin, ka pa chu ka melh ta ngar a, "pa" ka ti chhuak sep, ka pa chuan a chawbar thulh meuh hian min en a, ka lo zam em em ringawt, ahreawm ve em ani pa ten kan mitah thutak zeta min melh tawh chuan, a zamawm ve duh em asin





















"Bawihi sawi ta che, tinge i ngawih leh daih?" Ka pa tho chuan dam zet hian a ti leh a, dawhkan hnuaia ka kut chu ka sik ka sik tawh chaw eilam alang tawh lo reng reng. "Englo ania, ka pi te khaw lama han awm chhoh a, dawr han siam ka rilru ve deuh a, ka pi in karhmasa daih khan min rawn phone tawh a, an bula awm turin min sawm reng tawh a, ka lo rawn phawt tur thu che ka hrilh a" inthlahrung zet chuan ka ti ta nge nge a, ka thaw huai mai.





















Ka pa chu a thawchhuak hak a, "bawihi anih i pu te, khua a awmchu i duh tak tak maw, darlak khua chu aizawl ang hi ani lo ania, engkim a dang vek ania" ka pa chuan ati dam leh dap a, ka pa nupui leh afanu erawh an lo ngawireng thung "pa hreawm ka tih ka ringlo, college kal ka peih tawh chuang lova, thingtlang lama dawr tereuhte han siam pawh kha, achakawm ve reng reng alawm" phur zet chuan ka ti a, ka pa chuan "anih chuan zanin lamah i pi leh i pu chu ka lo be ve phawt dawn nia" atih chuan lawm lutukin ka lu ka bu nghauh nghauh a.






















Ka pa leh ka pi te an inbiak hnu chuan ka pa pawn kalchu a rem ti hlauh, ka lawmzia chu puitak ani, khawpui nun hi tlansan a, thingtlang lama awmve hrim hrim ka chak, ka nun ruak ru riau pawh hi a zia ve mai thei a sin, ka nun hi chhan awm silo hian aruak ngawih ngawih, tu emaw mamawh deuh ka nei mahse tunge ka mamawh chu ka hre bawk silo, ka nu chu ka mamawh ngei mai, mahse ani chu aboral atang kum tam aliam tawh a, ka thinlung in a, a mamawh hi ka hre bik lo.





















Ka pa chu ka roomah alo lut a, ka khumah chuan arawn thu thla nghal a, ka phone khawih lai chu ka dah vat a, ka pa chu ka en nghal bawk "bawihte kan in hi hreawm iti em ni?" Ka pa chuan ati chhuak sup a, nupui dang nei tawh mahse ka nu angaihna kha ala reh lo tih ka hria, ka pa aiin ka nu ka chhun zawk a, ka hmaifangte ka samah leh ka pianah pawh ka nu kha nu lian tak anilo va, keimah pawh hi ft 5 vel awrh chauh ka ni ka pa ka chhun na chu ka mitmeng hi a dum fiah kak a, alian deuh bakah ka mithmul hi siam chawp ve ngai miah lo hian, a er tan a asei bawk hmeltha min ti tu pawh an awmve nual zel.























"Pa hreawm ka ti hleinem, zin khawthawn ve hrim hrim ka duh a, ka rawn haw zeuh zeuh dawn tho lawm, darlak khua ah ka kal anga dawr ka han siam anga, pawisa ka khawl teuh dawn lawm, chuan fanu hausa tawk i nei vat mai ang" ka tih chuan ka pa nen chuan kan nui dun hawk hawk a, ka lu ah chuan rawn chul hauh hauhin "i pi leh i pu thu han awi la, puih an ngaihna apiangah han puive zel ang che, pawisa i mamawh chuan min lo phone vat zel rawh aw, tunah i bank account ah pawisa chu ka dah belh tawh a, i mamawh ang angte pawh i lei dawn nia" ati leh dap dap a.

























Dik tak chuan pawisa hi ka heh lo em em a, ka pa hian thlakhatah vawikhat tal hi ka bank account ah hian pawisa hi min dahsak ngei ngei thin, ka hmang ngai lem lo mamawh hi ka nei tam lem lova, incheina tih vel ka lawm vak silova, tihian ka lan dan ang ang hian simple deuha lan hi nalh ka ti zawk daih, unau ka nei lova keimah chauh hi ka nu leh pa fa neihchhun ka ni, unau mipa emaw hmeichhia emaw neih ka chak thin, ka rilru hah changa ka kianga awm turte, ka rilru a awm ka sawichhuah ve ngamna turte hi nei ve ila ka ti thin, ka nu hrawn fanu bawihpuii nen lah hian kan inbe ngai der lo.
























Ka pi te khua a, ka awm tur chu ka pa chu ka ngaihtuah ang reng viau, vawikhat mah ka tellova la awm ngailo ani a, ka pa hi ka awm loh chuan zanah pawh a mu tha thei ngai meuh lo, kum 17 ka nih laiin vawikhat chu nithum chhung school trip nei turin kan kal a, atukah ka pa in motorin keichu min lo hruai haw nghal daih, ka tel lo a, amuttheih loh thu te a sawi a,ngaihtuah chian chuan ka nuih hi aza zawk, mahse ka pa chu ka khawngaih tho bawk.





















Thawh lai em em ka neilo bawk a, ka pu te khuaah chuan kal vat ka duh ve tho nen, naktuk lawk hian ka kal dawn a, zanlamah thenrual tha leh chhungkhat hnaite ho in min thlah nan chaw kan ei khawm bawk, ka thiante ho pawn min ngaih tur thu chu an sawive hlawm nasa mai, an rilru tak takin an sawi nge sawi lo chu ka hrelo mahse keichuan ka ngai hlawm khawp ang, thian hi ka kawm tam lova thian han tih bik tur riau pawh ka neilo, ka school kalpui thin ho te ka classmate ho te hi an vaiin ka kawm thei vek.










.......






Ka kalna tur khua darlak hi, thingtlang anih vang hian, aizawl atang direct a, kalna mai tur sumo hi a vang ve reuh em em a, sumo service hi ala awmve meuh lova chuvangin kan driver fel tak mai umapuian darlak khua thleng min thlah anga, ani chu ahaw leh nghal ang, aizawl atang hian darlak khua hi ahla ve em em a, mamit lam atanga kal mai chu tha kan ti tlang bawk nen, mamit lam atangin kan kal dawn ani.

























Ka kalni tur chu alo thleng a, ka bungraw ken turho, chu car lamah kan thiar malh malh hlawm a, thawmhnaw ka keng tam em em hran lo, ka kal dawn meuh chuan ka pa nupui nuzuali ka ti mai thin a, ani pawh chuan tluang taka kal turin min chah bawk, kan in be tam lova, ka nuhrawn mah nise nu rilru chhe tak anih ka ring hran lova, ka pa pawh tha deuha min enkawl sak turin ka chah nghe nghe.
























Ka tlan liam thleng chuan, kut kan in vai lauh lauh a ka lung aleng nghal veng vengin ka hria, "eheu, kan vulchuki chu i lung a leng nghal dawn ani maw?" Nui hak hak chuan ati a, keipawh chu ka nui ve tho "leng ve dawn tho, ka pa tel lo hian ka awm khat a, ka pa ka ngaihtuah deuh alawm mawle" tha deuh chuan ka ti ve mai a, umapuia hi chu ka tette atanga kan driver tawh ania nel pawh kan in nel ve viau.





















"Ni e...sawi takah chuan i pa pawh chu a lung aleng ngei ang, mahse in zirna zel alawm nakinah chuan pasal i neih hunte pawh ala awm ngei dawn a, i pa chu i kalan ala ngai dawn tho a, lo in puahchah lawkna ani mai lawm tiraw?" Fiamthu pah deuh chuan ati a, pasal neih lam chu ka la ngaihtuah ngai loh bakah kum 21 ka hmang mek chauh ani a, neih tumna em em pawh ka nei lem lo.


























"Darlak hi ka tet lai bakin ka la kal miah lo, nang i hrechiang viau lo maw?" Umapuia bulah chuan ka ti leh a, ka bo lutuk ka hlau ani, thingtlangah hian ka la awm ngai silova, mahse ka tawn hriat ve atang te leh phone a, ka en ve thin atang te hian thingtlang khua hi a nawm hmel ka ti a, ka awm chak thei lutuk, khawpui nula tam tak chuan ramkal te, lo lama feh a, hnathawh peih lo tam tak an awm ngei ang, mahse kei chu ramhnuai a kal te, lo lama hna thawh a, thlan tla bawrh bawrh a, thawh ve te hi ka chak daih zawk thin, ka thiam kher chuang lo anga, mahse ka zir ve chak hrim hrim.
























"Ni e, i pi te khua darlak hi, mamit district a awm ania, thingtlang khua ni mahse, in atam tawh a kan tleirawl lai khan kan kalve nasa thin khatih lai kha chuan in tlemte bak ala awm lo, mahse tunah chuan in tam tak a awm tawh a, building in pawh hmuh tur tam tak a awm tawh bawk, thingtlang khuaah ro ro pawh, darlak khua hi chu a nuam bik asin, thingtlang nawm lehna pakhat chu maw, khawmi te kan in pawhin, kan in lung ruala, chhiatni leh that ni ah pawh kan in lawmpuiin kan in tawrhpui thiam bawk a, lo nei mi kan nih phei chuan kum tin thlai thar tui hnai tak tak ei turte kan thar chhuak a, hrisel pawh kan hrisel thei asin" umapuia chuan ati mawlh mawlh a, thingtlang khua an ni bawk a, thingtlang lam chanchin chu a hre viau mai.














"Nangpawh i awm char char phei chuan thingtlang tlangval zunah i uai daih ange aw" tiin min fiam zui a, duh lo lutukin ka ner vak "awi awm loh, ngaihtuah pawh ka la ngaihtuah chhin ngailo, thingtlang tlangval ka duhlo tihna nilo in, ngaihzawng lam pang hrim hrim hi chu ka ngaihsak lo" ka ti zui bawrh bawrh a umapuia lah chu a nui aza nasa mai, "thingtlang tlangval zun a uai hi ana teh mai nia aw" atih zui hram a, ka chhang peih tawh lo, ka uai dawn lo tih hi ka hre chiang em ani.


















Rawpuichhip kan thleng a, zing ah chaw eilova kan kal avangin rawpui chhip hotelah chaw kan ei a, an siam tui takzet, an bai siam te chu tui tak ani hmarcha thak hi ka ngam vak lo mai pawh a, mahse an bai siam chu tui ka ti lutuk a, thak ti chung chungin ka ei lui char char ka si hliam hliam chu umapuia bakah, hotel a chawl ve dang thenkhat ho chuan min nuih nasa hlawm mai, ka zak ru chem chem mai.




















"An siam tui thei asin, ka kal apiangin ka chawl ngei ngei thin a, athawk te ho pawh hian min be tlangnel ve tawh lutuk" umapuia chuan ati siam siam a, keilah chu thak ti bawk si chuan "nia, a zawngchhang tlak em anih hi" ka thak ti lutuk mittui tling pama ka tih chuan umapuia chu anui nasa ngang mai.













......







Darlak khua kan lut tan ta, khaw tawn tirh ah chuan lei sei ve ang reng tak hi a awm a, ahnuai ah chuan tui aluang del del a, "khulai lui khu teirei anih khu, khu khuan bairabi tlawng a pawh leh vek bawk a" tiin umapuia chuan min lo hrilh nghal zung zung a, hmuhnawm ka ti leh nuam ka ti bawk si, chu ka hawi kual vak vak leh nghal a zia lo thin mang nge.























Ka pi te in bulah chuan car chu a ti ding a, ka pi te chu veng chhak lam, thlan mual bul ah hian an awm a, an in chhak lamah chuan school ni ngei tur hi a awm bawk, mahse eng school nge anih ka hrelo, zingkarah kan chhuak a, chawhnu lamah kan thleng chauh ka chau viau bawk.



















"Ka ni, Lalneihpuii, neihi ti a, an koh mai chu in atang chuan arawn tlan chhuak nghal a, a au deuh chel chul leh nghal naupangte pawh a ang zawk alawm le, car atanga ka chhuah rual rual chuan, awi an lo thleng ta, nu, pa lo chhuak teh u, hei vulchukchuki te an lo thleng ania" ati deuh kher a, ka ni nen chuan kan inhmuh lohna a rei ve tawh bawk nen kan in ngai bawk a, kan in kuah chung chung mai.






















Ka pi leh ka pu te chu an lo chhuak vat a, an inah chuan an thiante ni ngei tur, upat hmel deuh deuh hi an leng nual a, "ehe hei, kan tunu alo thleng tawh e, lalneihpui lo awmsawn rawh, cheng chawng zel che hian, mi hi pak huam huam ziah suh" ka pi chuan arawn ti chhuak nghal bawrh bawrh a, ka lo nui nasa mai, ka ni lah chu a tum kawh vu leh nghal.






















Ka pi chuan min kuahin ka chalah a fawp zeuh a, ka pu pawh chuan min chibai a, ka len tawh thu chu asawi luam mai, ka hmuh lohna an rei tawh bawk a, an lo tar ve ta bawi bawi mai, an inleng thenkhat ho chu rawn chhuakin min rawn chibai ve ang luam a, nuam ka ti ve reuh lutuk.

























Umapuia chuan ka bungrua ho chu min thiar sak zung zung a, tihpui ve kan lo tum chu aphal thak lo leh nghal "i chauh em kha, ti khan lo awm mai mai rawh" ati deuh tlat sia, "hawh, vulchukchuk, an in marble va tel ve ang" tih leh ka ni chuan min kai a, min kalpui mai atum chu ka pi alo vin leh hlarh.





















"Amak zo zai e aw, lalneihpui ka sawi zo chiah ani lawm ni, i vahnu kha alo thleng chiah a, engvanga in marble pui tura sawm nghal nge inih a, in marble rual pawh ini tawh lo, za hawr hawr suh, pasal neih tum mang silo" ka pi bawk chuan ati leh hlak hlak a, ka ni chuan chhang lo in a phun nang nang "ka nu ve hi chu a, nula senior te kan ni ve tawh a, tihian min hau ve ziah mai ninawm lutuk" ati bai bai , ka pi te in kawt chu a zawl nuamin a fai tha hle a, in ding thenawm pathum vel an nei a, in dang chu tlemin an hlat leh deuh.






















Ka pi te in piah chiah ah chuan, naupang tereuh te te ho hi, an lo in marble a, hmeichhe naupang pawh an tel, athenin kawr an ha lo a, kekawrte chauh ha te pawh an awm, an lawmawm hlawm reuh phian zui, "mate...i nu sawi ang khan, awm teh, chaw lova chhum phawt la, kha vultei inbualna tur tui kha lum sak nghal bawk la" ka pu chuan ati dam thluam a.
























"Hawh...vulchukchuk i inbualna tur tui ka lum sak ang che" tihpahin inchhung lamah chuan min kai lut dawr dawr ka ti mai, ka ni chu hmeichhe harh vang tak ani chiang e, a sang lutuk lo a, mahse a te chuang lo a pangngai viau ka pa nen an hmel a in ang hle bawk, nula senior ka tih vang khan senior deuh turah in ngai ange, kum 30 ala tling lova, pasal neih lam hi angaihsak vak lo nge tianglam hi kan in biak chang pawn a sawi ngailo reng reng, keimah pawh hian mipa ka ngaihsak lo lutuk hi, ka ni ka chhun na lai ani maithei, bialpa pawh pakhat chiah ka la nei ania.



























Ka pu te in chu, building ani lova, dap in ani mahse alian tha viau a, ka pu hi Sipai pention tawh ani a, an khawsak aharsa bik lova, an in chu dapin niin, achung lamah rangva an hmang a, an kawmthlang lamah chuan ar in leh vawk in hi a awm bawk a, ar in chung atan chuan D hi an hmang bawk, thutthleng ah chuan thu in tukverh ah chuan ka dak chhuak a, ral lehlam a, tlang hring dup chu ka thlir vang vang, in hmuh tur engmah awm lo mahse tlang ringawt pawh chu ahmuh nawm tham, mahse thli tleh hunah chuan ka pi te in hi chu ana duh viau mai thei.






















Ka ni chu ka bulah lo thut pah chuan "vulchuknu iril atam tawh em?" Arawn ti zang vah a, "tam lem lo rawpuichhip ah khan ka ei hnem lutuk a" ka lo ti vat a, "i inbualna tur tui ka lum mek a, a so veleh i inbual dawn nia aw" ati leh nghal a lu ka lo bu nghauh "naktuk lamah khawchhung ka fan pui ang che, kan awmna lai vel hi chu thlanmual veng ania, in hi ala tam lutuk lova, mahse anuam tawk chiah, chhun lamah naupang school kal ho an bengchheng thei a, a reh em em ngailo ania" ka ni chuan ati mawlh mawlh a.


























"Ni khilai school khi eng school nge?" Tiin ka zawt ta nge nge a, "khilai khi primary school 1 anih khi, chuan sawtah veng tawn tirh lamah primary school 2 a awm bawk a, middle school pakhat a awm a, private school hi pakhat a awm bakah, sawrkar school high school pakhat a awm bawk, i awm rei anga ila hre chho ve zel mai ang" ka ni chuan ati mawlh mawlh a, khua chu ka fang chak tawh viau.






















"Ka nu te pawh chu, nge maw pawnah an awm reng le, mi hi ahau vak vak a, amah hian pawn a lawm tehreng nen, thingpui pawh ka lum so vek tawh sia, ka nu thang in thingpui tur a so e, lo in rawh u" ka ni chuan atih zawm lang lang a, ka pi hi thangi ania ka ni hian fiam nan ka nu thang ati ziah.






















"Vulchukchuk lo inbual rawh le, chumi zawhah saw kan in piah a, bungkung lian deuh awmna ah sawn kan va awm vel mai mai dawn nia anuam lutuk, thli atam a" ka ni chuan arawn ti a, "ni in awmna lai vel hi thlanmual a awm nual sia, in hlau lo mi?" Ka sam tawn lai phelh pah chuan ka ti a ka ni chu anui deuh uar uar mai.




















"Hlau teh nang, thlahrang phei chuan min hlau mawle, hmanni zanah pawh thlahrang ka um hrep alawm" tih pah chuan anui leh vak vak a, keipawh chu ka lo nui tawp "tak takin kan hnaih deuh a, thlan awmho hi chu thlan hlui ang an ni tawh a, a rei tawh alawm, athen phei chu kan pian ve hma a, an phumna te ani tawh a, tunah tak phei chuan thlanah an hmang tawh lo, thlan thar kan nei tawh a, khitah veng chhak lamah khian a awm, kinah kan la leng dawn nia" thingpui chawh mawlh mawlh pah chuan ati a.





















Ahnu ah, ka pi te leh umapuia te ho chu an rawn lut a, kei pawh in bual turin ka lut zui ve nghal bawk, vawiin kan tlanna khu nen , ka lu ka su bawk a ka in bual rei lem lo ka va chhuah leh chuan thingpui pawh an lo inzo tawh a, umapuia chu kal mai tum hian alo in siam tawh a "umapui zanin chu riak ve mai rawh , zan zanah mahni chauh te chuan anuam lovang" ka lo ti vat a.



















"Riah chu a chakawm alawm, mahse mamit lamah chhungte ho in riakchho ngei ngei turin min sawm sia, kan lo inbe vek tawh si a, mamit lamah ka riak law law mai ang" umapuia chuan alo ti vat a, umapuia chu pawn thleng chuan kan thlah liam a, alan theih chhung chu ka ban ka vei char char, umapuia pawh angaihawm dawn tak tak ani.

















Kan thlen thu, ka pa ka la hrilh lo tih hrechhuakin inchhungah chuan ka lut vat a, room hi ka ni room a zau tha bawk a, kan intawm dawn a, khum pawh alian tho a an dah belh lo bawk, ka ni lah chu a phur phurah ala tang zui, ka phone ka charge chu ka phawi a, ka pa number ah chuan ka dial nghal zat bawk.













Ka pa chuan ala har lo, kan thlen tawh thu te nuam ka tih zia te chu ka sawi mawlh mawlh a, ka pa chuan tha deuha awm tur leh a rem rema, pui ve zel tur hian min hrilh mawlh mawlh a, kan inbe rei em em lo phone ka dah hnu deuh lawk chuan "vulchukchuk lo chhuak rawh, bungah chuan va kal ang" ka ni chuan room pawn atang arawn ti lauh lauh a, "khawiah mah kalpui angailo, arawn thleng chauha, vahchhuahna tur zawnpui nghal reng suh, nangmah kha i vah chak vang anih kha" ka pi ti hlak hlak ri chu ka hria room atang chuan ka chhuak a.

















"Vak chak ila, chuan kan kawt pawh zau tha deuh ania, ka vak nileng thak ang chu, mahse maw ka vak peih lo" ka ni chuan alo ti letve vat "khawiah mah kal angailo, mi hnialna tur lah hi i hre ropui si, i za lutuk lalneihpui" ka pi chuan ati vin leh hluk hluk a, arukin ka lo nui char char "sawlai bunghnuaiah ringawt sawn lawm kan kal dawn" ka ni chuan ati deuh nang nang a, "engmah sawlai bung hnuaiah sawn tih tur inei lo, awke ke vawm i chak vang bak va nisuh, eirawng kha bawl la atawk, awke ke vawm rual pawh ini tawh lo, naupang tereuh te te ho i kawikhawm a, i bawl â vek hi kan ti reng a, nangmah zawk hi naupangho hian an bawl â vek che nih hi" ka piin atih leh chuan ka ni chu ke per tan tan hian roomah alut vei hmak a.



















Ka zuilut ve vat ka ni chu, darthlalang hmaah hian alo thu tum bar a "ni awke ke chu khawnge a awm a?" Ka ti deuh sa sa a, ka tawng ring ngamlo, ka tawn rin chuan tawng hi a inhriat pawh ve vek theih sia, "saw lai bungah sawn a awm alawm, a kak karah hian a cheng a, a ke leh mei hi ati lang thin a, kan vawm thin alawm awi anuam ve reuh thei lutuk" ka ni chuan ati siam siam a, ho ka ti lutuk chu ka nui vak vak, awke ke lo vawm sak mai mai te chu aw.
























"Awi ka hmelthat dan em em hi, ka inzahpui hial" tihpahin a insiam cute vel a, darthlalanga a hmel lang chu tha tih hmel zet hian a en reng "darthlang, darthlalang darlak khua ah hian tunge hmeltha ber keimah ka ni em?" Ka ni chuan pitar aw deuh hian ati a, amah vek chuan aw thum deuh hian "Vulchukchuki a hmeltha ber, nangchu hmeltha list atang itla thla tawh" ti thum leh dutin a nui uar uar a, "eheu chu kan vulchuki chu apple kan ei tir nghal ange" tihpahin min rawn en a, anui nghal vak vak.























Ka ni naupangchhia lutuk chu ka nuih aza ngang mai, ka ni chu kuahin kan nuidun ver ver a, a inrin loh lai takin a zakah ka dek thut chu "awi ka nuthang" tih leh a tho deuh uai ka lo nui uar uar "lalneihpui mahni nu te tikhan koh ziah suh ka tih che kha" ka piin arawn ti pang pang a, ka nuih chu aza zual sauh.












(Story hi zankhat danah zel up tur ani e aw)



Chapter-1 na chauh ani bawk a, ngaihdan leh duhdan thawh te kha in thlahrung lo ang u aw :lol: 😘





Thingtlang lam hi ka la ziah ngailoh vangin ka thiam ang tawk leh ka hriat ve dan tawkin ka lo ziak a, a dik loh laite emaw, chutiang zawk chu ania tiin a dik lo lai chu min lo hrilh zel ula, chuan thingtlangah chuan chutiang khatiang chu ani thin a, ti a min hrilh belh duh in awm anih pawn ka lawm viau ang, ka hriat chin hi atlem ve reuh lutuk , kan naupan laiin kan khua thingtlang atang khawpui lama kan pem daih vangin ka hre tlem lutuk a🤧



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)