DEAR PAIN Chapter-26

Episode kal lai dah luhna

Moderator: writers

BrigidaHugo
Posts: 13
Joined: March 29th, 2023, 7:43 pm

DEAR PAIN Chapter-26

Unread post by BrigidaHugo » May 29th, 2023, 8:30 pm

DEAR PAIN
Chapter-26



By : Brigida Hugo






Kan nufa za chuan kan indang chu a ni ve ta reng mai. Tleipuii te chhungkua chu kan tan an ṭangkai em em reng a, kawng engkimah min buaipui vek bawk. Kan chhungkaw boruak pawh zep nei lovin ka sawi ta vek a, Nu Zami pawhin min thinrimpui ve kher mai. An In lam hnaih a awm turin min duh viau a, In ruak luah tur a awm mai rih loh avangin tuna kan awm na ah hian kan awm phawt anga; Tleipuii te hnaih dan kan la dap chho ve zel ang chu.






In aṭanga ka chhuah dawn tak tak meuh chuan ka nu pawh a ṭawng nasat leh viau kha. "Mo kan nei fel ve chauh a, a rilru kawih thlak lutuk. Mi ngaiah pawh i mualpho nasa hle ang. Mo pawh hrawn hlei theilo khawpa sual nih kha i hlawh tur a ni mai. Hetiang em em a tihmawh mai, eng rilru hi nge maw i put bik le? I fate pawh engtinnge chawm i tum? Chhangchhe bakberh khan engtinmah in in enkawl hauh lo ang" min ti deuh hrep a. Ka rilru ah erawh hnawk min tih thu a sawi te kha a rawn ri nawn awn awn thung.






Mampuia pawhin "Chhungkua chu in hauh chang te, boruak fuh loh changte pawh a awm a ni ngai a. A in ti mualpho zawnga chet lak kher a ṭul em ni?" min ti deuh hmak kha ania. Kan nufa chunga an khawsak dan hre duh miah lova thiamloh min chantir phet an tum chuan min run hle bawk. Mahlimi erawh a ngawi tlat a, miin kan chanchin an sawi huna hmingchhiat tel ve a hlau te pawh a ni mahna; ngawih chuh hun a hre khawp e.






"Ka fate hi mi neih ang zawng zawng chu ka pe thei kher lovang. Mahse, Pathian zarah ka nghei pui hauh lo ang. Helai hmuna hnawksak nih reng ai chuan rethei tê pawh ni ila zalen sela an seilenna kawngah pawh a ṭha zawk fe ang" tih bakin ka chhang duhlo. Thu tam tak sawiin awmzia a nei tawh lova, 'kan nufa hma hun atan theihtawp chhuah ka ngai' tih chiah chu ka rilru ah ka sawi mawlh mawlh awmchhun a ni.






"Thil zawng zawng hi ka hai bik lo, exam zo fel ila ka pa bulah ka kal ang. Kan Inchhung boruak hi zêp ṭhen awm hauh lovin ka sawi anga, ka pa In a nih angin a ni in ro rawn rel rawh se. Mualpho tih te mai mai, in cho chhuah a nih kha. Ka u te pawh indang rawh se, in kianga khawsak ve hi a harsa em mai. Keipawhin ka pui ve thei reng" tih pahin Diktea chu a tho tharh a, lungawilo tih hriat zetin pindan kawngkhar a khâr ri zui bur a.







Panhnah bakah kuhva rah ka la tel ta bawk a, ka buai a thuahhnih ta viau mai. Bawihtei chu phone te en in a in awm tlei thei mai a, a nau zawk erawh hna pakhat a neih ngai a la ni reng. Kan In nei tunu Nu Tluangpuii hi kan lakah a ṭha em em a, ka buai zual chang chuan Bawihpuia pawh min lo lakchhawk ve lawp lawp ṭhin. Kan chhungkaw dinhmun pawh ka hrilh hre ve vek a, min khawngaih ve hle bawk. An pa hian nikum hmasa lamah khan Cancer vangin a boralsan tawh a, fa pahnih neiin a fanu chu phai lamah hnathawk in a awm ve mek bawk. A fapa High School kal lai mek nen an khawsa ve mek a ni.







Zanriah tur ka bawl mek a, kan bungbel hman tur te pawh Tleipuii te'n min ngaihtuah sak vek a, Inchhung bungrua kan mamawh tur ang ang min dap khawm sak vek bawk. An ni chhungkua hi awm lo ta sela kan nufa chan chhiat dan tur chu ngaihtuah ngam pawh a ni lo hial. Kan ei a tlem bawk a, eirawngbawl pawh a hautak lo kher mai. U Rinpuia'n Bawihpuia walker a leisak a, kan hmang rim tlauh tlauh viau. Walker a chuan lai chuhin ka che sawk sawk ṭhin. Bawihpuia chu a harh ve tawh a, Walker ah kalkual in ban theih a pui a ngah tawh a. Thil pawi thei tur ang chu a khawih phak loh ah ka dah kâng vek bawk. Chaw eikham lama khawih chhunzawm turin panhnah ka sil pah mawlh mawlh a, Bawihpuia che kual chu ka mitmei pah reng bawk.






"Zothan, hei hi lo hmeh ve teh u. Chawhmeh siam hi ka thiam mang lova, a tui kher lo mai thei a ni" Nu Tluangpuii chuan plate a thil rawn chawi luh va va pahin a rawn ti thuai a.





"Awi, kan va han lawm ṭhin tak. Mahse, kan tibuai ṭhin em mai che u" lawmthu sawi mawlh mawlh chungin ka lo laksak thuai a. Bawihtei te unau ṭhutchilhin rei fe mai a chhaih zui a, a awm lai chuhin ka lo che zui sawk sawk bawk a. Tunlai chu ka hah deuh vang aniang, ka taksa te chu a rawl ṭhem ṭhum a; damloh mai te pawh ka hlau rum rum mai, damlo hman ka ni der silo.







An unau in chaw ka hrai a, Bawihpuia pawh naute chaw pe hran lovin chaw pangngai ka pe ta bawk a. A hautak lo thei ang bera khawsak ka tum hram hram a, a chang chuan ka fate ka khawngaih avangin an hmuh loh tura ka ṭah tak nghek chang te pawh a awm. Tun ang laiah an rualpui tam zawk te chu an duh duh ei leh in thei in an awm a, nu leh pa thlazar hnuaiah thlamuang takin an awm ṭhin. Ka fate erawh thil tuihnai ṭha pawh ei phak lovin nitin an khawsa ve naw naw a, a ṭha ber pek ve an phu teh lul nen kan dinhmun in a zir rih miau si lova. Hmangaihna leh khawngaihna mit in ka thlir a, tui taka an unau a an muhil sek sek ka en changte hian dan zawh loh khawp a tam ka mittui a a luang fo, kan nufa hian 'hun' kan mamawh a; chu erawh a kalmuang em thung si.






Chaw ka ei ve dawn chiah tihin Diktea a rawn lut hlawl a, polythene in thil a rawn khai bawr lak bawk. Bawihtei chuan pan vatin a malpui ah a lo kuah nghal châk châk a. Diktea chuan eitur chi hrang hrang a rawn kensak a, an lawm kher mai.





"I va haw tlai ve, khawnge i chhuah a?" ka lo ti thuai a. Chair pakhat chu la in a ṭhu nghal hnawk a, a ṭhut paha a ṭhen deuh sak chu ka lo en reng bawk.





"Sawlai lawkah sawn hna kan thawk a, cement work a nia ka sil ṭhum mai" tih pahin a mal te chu a chum nawk nawk a, "Chaw ei ve nghal mai ta che" ka lo tih zawm thuai a.





"Tlai lam deuhah khan chaw kan ei a, ka la puar lutuk. Exam a hnai tawh sia, haw har thei pawh ka ni lo. Hei hi lo hmang rawh" tih pahin a kekawr ipte aṭangin pawisa a rawn phawrh a, mak ti fe in ka lo en hâ thung.





" A ngai lo, nangma'n hmang rawh. I thawh hah tehreng nen, kei chuan hman tur ka la nei" ka lo hnar vat a.





"Hnathawh te chuan kan hah ve bawk ang chu maw le. Exam zo tawh ila chuan thawh tur pawh ka hre ṭeuh. Ni thum ka thawk tawh a, kei chuan ka ngah mai" tih pahin ka kutah a hmehbel nawk nawk a, a nui pah sak bawk a. Engang pawhin la duhlo viau mahila min ti lui tlat dawn tih ka hria. Lawmthu sawi mawlh mawlh chungin ka la ta nge nge a, ka hnuk te a ulh hial.






"Ti hian lo khawsa ve naw naw ula. Sawlai ramhuai pûk a khawsak ai chuan a hahdamthlak zawk. Nakinah engkim a la fel vek mai ang, theihtawp kan chhuah dawn nia" a ti ve nuap nuap a. Ka nau hi a lo puitling ve tawh tak tak a nih hi. Lehkha zir tur a ngah bawk si avangin min hawsan zui ta thuai a, kei pawhin Diktea ngaihtuah zui neuh neuh chungin chaw ka ei zui ta thuai a.






Bawihtei te unau an mut hma chuan hna a sawt tak tak ṭhin lo. Hma takah muttir in ka hna ka chhunzawm mawlh mawlh a. Ka hun kal tawh tam tak ka chhuikir pah neuh neuh reng a. Kan chhungkua hlim tlang taka kan awmkhawm lai te leh ka pa thlazar hnuaia felfai taka kan awm hun lai te chuan ka ngaihtuahna a luah thar veng veng mai.







Tunah chuan khang hun te kha mumang ang lek a lo ni ta chu a nia. Tuna kan boruak tawn mek hi ka pa hnenah ka la sawi lova. Hnathawk a an riahchhuah daih avangin a ṭhiante zingah rilru nuam lo taka a awm ka hlauh vang a ni pakhat bawk a. Thil tam tak ngaihtuah nachang hria niin, ka nun kha lo uluk viau ila tun ang teh nuaih hian ka awm hauh lo tur hi a nia. Mahse, thil kal tawh avanga inchhir in sawtna a nei tawh lova, siam ṭhat theih tawh loh thil avanga in dawmkun mai mai hman ka ni hek lo. Zing lam dar hnih pelh rawk thlenga ka ṭhutchilh ngar ngar takah chuan ka in khawih zo ve ta hram e. In ti fel zui thuaiin ka mu zui ve ta vat a.







Kan nufa khawvel chu a zim kher mai. Panhnah leh kuhva rah la tura ka chhuak tih lohah chuan pawn ka chhuak zen zen lova, ka fate pawh kan In zimte ah chuan an tawm ve ngat ngat a ni ber. Vengchhungah nasa taka sawi zui kan hlawh a, a hmingchhe nasa ber erawh keimah ka ni. "A fate pahnih nen a let leh a nia, inthlahrung dêk awm si; mo te pawh a mil thei lo chu ania" tih chu mi tam zawk te min sawi dan a ni. Ka thiam thu sawi tum na ka nei lova, thudik erawh lanchhuah hun a la awm ve ngei ka ring thung. Nu Tluangpuii bawk hian min lo tha nat pui ṭhin a, kan sawi dun ve chiam tak ṭum pawh a awm ve ṭhin. Kan pahnih kara kan thusawi erawh khawiahmah a chhuak tawh ngai lo thung.







Pathianni zan a ni a, naupang an mut tawh avangin ka phone a zai ngaithla chungin kuhva rah ka thel malh malh a. Kawngkhar rawn kik dat dat thawmah chuan ka hawichhuak nghal vat. "Tun ang hun ah.. Diktea em mawn le?" ti nang nang chungin ka tho zui thuai a, rang takin kawngka kalhna ka hawng zui ta vat a. Kawngkhar nem hawn pahin "I va tlai ve?" ka ti nghal deuh tâwng a. Diktea hmel hmuh in beisei zetin nuih sâng pahin ka hawichhuak a, ka nui zuilo chiang hle, ka chip nghal hmak.






"Engnge i duh?" ti ram hmak chungin kawngkhar chu ka pawt nghal ṭung a, ka chet dan tur hre lawk ni awm hrimin a lo vuan ve nghal chat bawk.





"Ka fate ka rawn hmu dawn. Khawnge an awm?" a rawn ti let ve hmuk a, ka lo melh râwm râwm thung. Engtinnge helai hmunah hian kan awm tih pawh a lo hriat reng reng ni?





"An mu tawh, naupang men hun pawh a nih tawh loh hi... Haw rawh" ka ti let hlar a, thawm bengchheng siam ka hlau viau bawk.





"An muhil pawh an hmuh theih tho alawm maw le" tih pahin min nek sawn rawk a, Inchhung a rawn lut zui nghal chu a ni der. A hawi kual vut vut a, a ner suk hmel pawh ka hmuchiang kher mai. Zu rim a nam lo ve tehmial chu mak tih tham a tling bawk.







Min en leh zukin room lam chu a bih duk duk a, a lut mai dawn emaw ka tih laiin ṭhutthlengah chuan a ṭhu ta zawk a. Ngaihven duhlo in ka thil tih lai ka chhunzawm a, ka hmel landanah ka lawm lo hle a ni tih a hmuh chuan a kal zui ve mai ka ring kha a nia; ngawi reng a ṭhu in min la en ngur ngur reng a.





"Bawihi, min ngaidam rawh" a rawn ti thawp sut a, ka thil tih lai ka chawl dat. Thaw hakin amah pawh en chuang lo chuan ka tih zawm leh mial mial a, a thusawi chuan ka thinlung a nghawr nghing pha eih lo.






"Ka thiam loh vek a ni. Hetianga dinhmun chhe lutuk a ding tur hian ka fate ka phal lo. Lo haw ula, ṭha takin kan awm tawh dawn nia. Kan fate hian hei aia nuamsa a awm hi an phu asin" a rawn ti leh a, ka lo nui hul hak thung.






"I piangthar leh ta em ni?" ngeiawm zetin ka lo ti let a, mak tih hmel deuh in min en nghal rûn rûn bawk. A bek pawng nghal ṭawlh ṭawlh ah erawh a in seh ruh nasa hle tih a lang reng.






"I lo danglam tawhin i ṭawngkam te pawhin mei a nei ta fak fak hle mai. Mihring ve tho ka ni a, tihsual chang te chu ka nei ve thei a ni lawm ni? Nge, min ngaidam tur khawp in min lo hmangaih ve lo zawk?" a rawn ti zui leh deuh ngat a.






"En teh, Hriathlu.... Ka hmel ah ka lawm loh zia che i hmuh chuan thu tam sawi ngai lova i kal mai ka ring a nia. Ka sawi kher i phut a nia nge. Keipawh mihring ka ni, ka ti sual thei a.. nang ka lo pan thawt thawt che kha ka tihsual lian ber a ni ta reng bawk. Ngaihdamna chungchangah chuan vawikhat ka ngaidam tawh che, ka ngaihdamna che kha min hmuhsit nan i hmang zui ta emaw tih tur khawp in a hma aia nasa in ka lakah i sual a. Ka hmangaih vang che khan i ṭhat leh mai ringin engzat a tam nge na ka tawrh a, chhungril rum vawng vawng a ka awm i hria em? I lak aṭanga ngaihsakna ka dawng miah lo chung pawhin khati khawp khan ka dawh thei ve che. Mahse, tunah chuan ka â nawn tawh dawn lo. Chuan.... danglam tawh min ti maw? Ni e, ka danglam tawh. Tunah chuan ka fate tan Nu leh Pa ka ni tawh miau a, nasa takin ka la danglam zel bawk ang. I lak a ka thutiam hnuhnung ber 'eng ang paw'n piangthar sawmsarih mahla, i kiangah hian ka rawn let leh tawh ngai lovang' ka tih kha a la pangngai reng e" ka tih khum ve ta sak sak a, ka sawi hnem lutuk chu ka thaw te a chham dawn hial in ka hria.






"Kan fate fahrah tur hi i phal bik chu a ni phawt anga. Hmeichhia pawh hi in lo in ang lo mange. Ṭhenkhatin an fate fahrah hlauin an pasal te sual chung chung pawh an vuan lui hram ngai a nia" a ti leh bul bul a, ka sa zak mai.






"Kan fate fahrah hi pawi tihna i nei miah lo. Pawi ti nila ngaihzawng i nei dawn em ni? Ni e, hmeichhia kan in ang lo. Ka fanu rehhlum tum tu bulah kei leh ka fate kan khawsa lul lovang. I duh leh khatiang chunga vuan char char thei tur che chu lo va zawng zawk rawh. Haw rawh, vawikhat pawh lo kal leh tawh suh" tih hrâwk pahin kawngka lam ka kawk vâ a.






Muangchang a ding ṭuah ṭuah chungin "Lo in ngaihtuah ang che, ka fate hi helai hmuna awm an in hmeh lo" tih nghut pahin kawngka lam a pan zui ta vut a. Zaklo ti zetin ka melh nghek ringawt. A tumdan leh a beisei ang mai mai chuan kan awm tawh hauh lovang.







Hun pawh muangchangin a kal ve bek bek zel a. Kâwl a Ni alo chhuah apiangin beseina tam tak ka nei thar zel bawk. Diktea'n a khât tawkin min rawn tlawh ve reng a, a exam lai anih avangin tunhnai ah erawh a rawn lang tam thei lo thung. Ka nu leh Mampuia te nupa erawh an reh ta vang vang a, kan chhungkaw boruak an sawi sep sep pawh a zia ve ṭan viau tawh. Ka fate hriselna a ṭha hlauh a, buaina lian tham tawk lo in kan la awm chho ve zel e. Bawihpuia pawhin thla sarihna hmel a hmu ve ta a, a inti fing ve ṭan viau mai.







Tleipuii ten an In lama chaw ei turin min ti ve reng a, ka hna a bahlah ka hlauh avangin inthahrung ru deuh chungin ka hnial fo mai. Vawiin ni erawh a birthday anih avangin ka hnial thei ta lo thung. Bazar a chhuah lawk a min rawn hruai pah dawn avangin In ah kan lo nghak rân thung a. A lo thlen hma a lo inpeih fel ka duh avangin ka che sawk sawk a, ka panhnah roll sa te pawh ka dah fel diam tawh bawk.






"Awi.. ka hah lutuk. Ka thil lei duh ber ka hmu lawk lova. Ka tei kual ta hrep alawm maw le" Tleipuii chuan a rawn ti lut bawrh bawrh a, a hah viau aniang; a thaw hlawi hlawi mai.






"I duh khirh thei em anih kha. Hahchawl phawt la, keini chu kan in peih tawh ania" ka lo ti ve vat a. A thil khai zinga pakhat chu min pe zui nghal thuai a; engnge anih hriat tumin ka lo ban zui ve zat a.





"Ka nalh tih ho ka la tawp, rawn video call che ka tum viau nangin a rei mai mai ka tia" a tih lai mekin a thil min pek chu ka lo phawrh ve mek bawk. Naupang thawmhnaw mawi zet zet chu ka phawrh chhuak ta mawlh mawlh a. Lawm avanga nui hakin ka ṭhiannu chu ka en zui vat a, maimitchhingin a lo ṭhu hle hle thung.






"Awi.. engatinge hetiang te i rawn lei? Vawiin ni ah te chuan ka hnen aṭanga present dawng tur zawk i nia" ka ti niah niah a. Bawihtei lo thochhuak ve vatin hmeichhe naupang kawrfual nalh zet chu a rawn phihthla zui thuai bawk.





"Birthday anih avanga thil in pek kher a ngai lo. Dam taka ka thleng thei hi ka lawm tawk viau a ni. Mahni puala thil dawn ṭun ṭun ai chuan midangte tana luanchhuah hi a hlawk fe zawk lawm ni?" rawn meng chhuak diar diar chungin a ti sap a. Ka ṭhiannu rilru ṭha lutuk hi chu ropui ka ti ve thlawt. Lawmthu ka sawi ve na te chu ngaihthlak pawh a ngaithla ṭha duh hlei lo a, naupang ho a chhaih zui ta daih a. A hahdam tak hnu chuan kan chhuak zui ta diak a.






"Saw, en teh..... Kan raipuar nu pawh in la no fahrana a kal leh ṭuang ṭuang tawh saw. Ka va hnuk hrep zawk dawn em maw ni?" tih hlak hlak pah chuan a kawk zauh a, a kawhna lam chu ka en zui ve vat a. In lam pana Mahlimi kal phei mek chu ka va hmu ve nghal zat a, ka nui hak ringawt. Vengchhung a kan chanchin a darh chiam tak nachhan kha a kam tam luat vang tih Tleipuii hian a hre ve reng a, huat tak te in a haw zui ta reng bawk.






"A ho em mai, khin tlak pawh a nih loh saw. Kal vat ang" tiin a banah ka pawt zui dawr dawr a, ani erawh chuan Mahlimi ringawt a la en zui ṭawk ṭawk reng thung. Hmeichhe zaidam leh nungchang ṭha zet a ni chung hian a tih loh lamah erawh kawlh ve ṭek ṭek tak a ni. Taxi ruak lo tlan chu ka lo phar vat a, kawngkhar hawng zui vat in ka nem lut zui rawk rawk a, kan kal vat loh chuan a hmel aṭangin a in sum rei thei dawn lo tih ka hmuchiang em a ni.







An In kan thlen thleng pawhin a la phun zui ve hlak hlak reng a. Thildang ka lo sawipui daih zel thung. Nu Zami'n eirawng a lo bawl sat sat a, tihpui ve ka tum chu a lo phal lo nasa mai. Bawihtei'n nuam ati leh pek. A tlan kual zung zung a, a nau in thei leh theilo in, bawkvak in a lo zui ve zel bawk a; kan thawm pawh a ṭha leh ṭan viau tawh.






"Zothan.. i va han cher em em ve le... Mut i hmu ṭha lo em ni? Kha i hmel te kha a dik lo. Hna i thawk a nih pawhin chintawk nei in tih tum rawh, ti ringawt kha chuan i daih rei lo tawp ang" Nu Zami chuan rilru nat hmel fe in min en vang vang a. A hmel a min lainatna chu ka hmuhhmaih hauh lo.






"Ka ṭha lutuk. Ka hmel te hi chu a ṭha lo sa ve hrim hrim" tih pahin ka nui hak hak a, ka biang chu ka tuai zui vat vat bawk a. Ni e, tun hma nen a khaikhin chuan chhe tawh tak ka ni. Zanah ka fate an muthilh lai hi ka hnathawh theih hun a ni miau a, chhun lamah hah viau ṭhin mahila ka mu hman ngai meuh lo. Kawl en ṭan det det a mut hman chauh ṭum ka ngah a, ka men tlang tak pawh sawi tur a awm fo. Ka fate tan theihtawp chhuah a beih ka ngai miau si a, hah hman ka ni lo. In tuai hnûmna hun nei ta lo chu ka hmel pawh a pawr fap tawh a, ka lan mawina aiin ka fate kawpuarna ka ngaihtuah a ngai zawk si a; ka dam chuan a ṭha a ni mai e.







Hlim tlang takin zanriah kan kil ho a, kan nufa chauh a eitur kan siam ve ṭhin hi chu a tui tham mawlh lo. Nu Zami eisiam tui tak ka ei meuh chu ka harh sawng sawng in ka hria. Chaw eikham ah Cake te kan zai ve leh a, Bawihtei'n a chuh ta tlat pek a; a birthday kan lawm a ni ber zawk e. Ka fate an en hrang ngai miahlo hi ka lawm em em ṭhin, min hmangaih pui zia hi ka hmuhchian em avangin ka hnuk a ulh hial zawk. Ka nu khan Nu Zami'n ka fate a duat ang chanve pawh hian min duat pui ve meuh pawhin ka hre ngai lo. A laka ka beiseina te a tawp chiang ta bawk a, ka nu mah nise hriatchhuah loh Ni ka nei ta fo mai.







U Rinpuia'n a ṭhianpa thawhna Vety Department-ah Peon hna a ruak tih a sawi a, dil ve tura min duh thu a sawi nghal zat bawk. Kan sawi chho ta zel a, Tleipuii phei chuan a nawr in min nawr nghal tet tet a. Nu Zami te pawhin ngaihven turin min lo ti ve mawlh mawlh bawk a, "Ka lo in ngaihtuah ange" tiin ka chhang ta rih ngawt chu a nia. Riak turin min sawm nasa viau mah se ka hna khawih lai chhunzawm ka la ngaih avangin zan rei tak tak hma a haw kan tum ta zawk a. U Rinpuia bawkin min thlah ka ring sa ve tawp. An In a kan thlen phei tawh hi chuan kan haw leh lam hi chu a kutah a ngai ve hmiah mai a, a fel ve riau a ni.







Kan haw hma in Nu Zami'n an room ah min ko lut a, ka va luh chuan envelope hi min lo pe zui thuai a. A ngaihna hrelo zet a ka thlek kual lai chuan "Tam chu a nilo na a, in mamawh zual chu a phuhru ve mai ang. Zothan, tuar hram hram la. Tawrh chhuah hun ila nei dawn a nia. Beiseina nei tlat ṭhin ang che. Harsatna i neih chuan rawn sawi hreh lo la aw?" tiin ka sam ah a chul heuh heuh a. Lawm luatah hian mittui a lo tla thei tih ka chiang ta kher mai. Min hmangaihna leh min duhsakna an ti lang mawlh mawlh mai hi ka tan chuan a va hlu tak em!






"A ngai lo asin" tiin ṭang ve viau mahila, "In nufa tan liau liau a i pa nen kan dah hran anih kha. I hnathawh pawh chintawk nei tawh ang che. Kal teh, i chhuak phei ang. I U Rinpuia'n a nghak reng tawh ang che u" tiin a kal zui ta daih a, lawm avanga ka mittui parawl ṭeuh chu tuai fai sawk sawkin ka chhuak zui ve ta thuai a. U Rinpuia pawh a lo in peih at tawh a, Bawihtei a lo pawm leh ât tawh; Bawihpuia pua in kan in zui chhuak a, kan tlanliam thlengin Tleipuii chuan a ban a rawn vai lauh lauh reng a.







Kawng tluanin U Rinpuia chuan thu ṭha tinreng min fah mawlh mawlh a. Beidawng ngailo tura min duh thu a sawi nawn ngun hle. Ka nu leh Mampuia te pawh haw zui reng lo turin min ti bawk a, "Khawvel hi a vir kual reng angin mihring tumah hi kan dinhmun ngai rengah kan awm ngai lo. Nangpawh engtik niah emaw chuan dinhmun ṭha takah ila chuangkai anga, i dikna rahbeh sak i nih te pawh lanchhuah hun a la awm ang. I chunga diklo taka ti tu te hian in hmuhchhuah hun an la nei ngei anga, inchhir ngawih ngawihin an la awm ngei dawn. Chutiang hun a lo thlen hun ah pawh ngaidamtu ni zel ang che. Ngaidamtu nih aia ropui a awm lo a nia" a ti dap dap a, uluk takin ka lo ngaithla ve ran bawk. Kan In bul kan thlen rual chuan, "Thingpui rawn in chawl lawk la" tiin ka sawm zui thuai a. "In û tur ka va rim lawk ange" tih pahin a nui suk a, a tlanchuak zui ta zawk a.







Bawihtei te unau an mu har lova, an tal hah ve deuh vang te pawh a ni ngei ang. Keipawh ka hna ngai bawk ka chhunzawm leh a, ka kâwng kham ṭhin lutuk hi hrehawm ka tih ber a ni. Panhnah roll chungin U Rinpuia hna sawi te chu ka ngaihtuah pah neuh neuh a. Kei sawipuitu pawh nei lo tan chuan hmuh ve kher pawh ka ring lem lo. Tun ang laiah hna hniam tê a kan ngaih thlengin kan bawr luih luih tawh a; chuta karah sawipuitu neih ṭhat a la ngai leh zel bawk. Thiamna avanga hna nei aiin sawipui tu neih ṭhat avanga sawrkar hna chelh an tam ta. Ṭhenkhatah chuan in sawipuina ringawt khan thiamna a chhawm tel si loh avangin mahni hna ngei pawh a nihna anga thawk zo lo te pawh an kat nuk ta ve ang. Kan ram ve hi zawng hetiang renga kan kal anih chuan kan la tlachhe duai duai dawn a nih hi.







Vanneih thil thu ah lo hmu ve ta tehreng pawh ni ila, ka fate hi tu in nge lo enkawl ang? Nitin zantina ka enkawl, ka hlat a awm ngai hauh lo te hi midang kutah ngaihngam takin ka dah ngam kher awm si lova. Thil thui tak ngaihtuah in tuna ka eizawnna ringawt hi chuan min chawm hneh loh hun a la awm ngei dawn bawk si. Ngaihtuahna mumal put dan tur ber pawh ka hre mai lo. "Engkim Pathian kutah kawl tirin ṭawngṭai ila, kan kawng tur chu min ruatpui mai ang" ti chungin ka thil tih lai chu ka chhunzawm leh ta mawlh mawlh a.







Rei vaklo ah ka zo ve ta mai bawk a. Ka mut hma in Nu Zami envelope min pek chu ka hawng hmasa leh te te a, ka enchian nak chuan cheng singkhat lai a lo ni. Ka beisei loh lutuk a nih avangin ka melh tlawk tlawk a, lawm luatah mittui a lo far bawk. Kan nufa tana Pathianin miṭha ṭha tak tak min lo ruahman sak ṭhin hi kan tan a va hlu tehlul em!!





Mut hmunah pawh U Rinpuia hna min kawhhmuh chungchang ngawt chu ka ngaihtuah zui reng a. Ka in let leh thak thak ṭhin a. Ka fate, tui taka an muhil sêk sêk lai chu tihharh hlau zetin ka fawp vawng vawng a. "Bawihte....in tan ka bei zel ang. Mahse, nangni pawhin tawrhchhel in zir a ngai dawn a nia" ka ti rilru melh melh a. Chu hna chu dil ve chhin phawt a ṭha in ka hre ta ber mai.






"Kha chu ha suh, khawinge zei lo nu..... Hei hi a ṭha, a zahawm bawk" tiin Tleipuii chuan ka kawr hak tum mek lai chu min phihthlak sak nawk nawk a, kamis var ṭhui nalh zet mai chu a rawn lek lang va va a.





"Awi, a var ser sur si. Ka thû chil chel si, ka ha zak e a" tiin ka lo hnial ve thung. A mawi chu ka ti reng mai; mahse, ka vun thu thet nen chuan in hmeh dawnin ka hre lo em ani.






"I zak em? Ha mai mai rawh. Mi dum paw'n a var an hak chuan an langsar vah mai asin" tih pahin a nui zui awr awr a, min perh zeuhna chu duh lo zetin ka tlawh zui pawp.







U Rinpuia hna sawi kha ka bawhzui ve dawn chu ania, eng tak kan ang ve ang maw? Tleipuii'n ka fate a lo awmpui dawn a, zing karah rawn pheiin chaw a rawn ei nghal bawk. Vawi tam tak ka ngaihtuah a, ka ṭawngṭai apiangin ka chham tel ziah bawk a. A tawp a ka thuthlukna chu 'Dil ve hrim hrim ila, ka hmu ta lo anih pawhin ka fate ka uap thei a ni mai' tih a ni. Tleipuii a phur sakhai a, "Hlawh i lak ve leh thil min lei ang che" ati nghal ringawt te chu kan nuihpui leh rih a, a ruk tak chuan huphurh tak ka ni thung.







Dar 10 ah interview ṭan tur a nih avangin ka chhuak zui ta vat a. Bawihtei te unau pawhin min ngen buai lem lo. Tleipuii bulah chuan an ngaihtuahawm dawn miah lo tih ka hriat avangin ngaihngam takin ka kalsan a, ka vawikhat kalsanna a niih vang erawh chuan ka ni deuh huih in ka hre thung. Ka in chei khât vang nge ni ka thawmhnaw hak te chu in hmeh ta lo riau in ka in hria a, ka in pawt sek reng a. Ka kamis var hak chu ka smart pants ah chuan ka bilh lut thlap a, pheikhawk ke artui sang lo tê ka bun bawk a. Ka hmel hnuh nawm ve deuh nan tiin make up tlem ka in hnawih ve bawk a, ka sam sei tak chu sang takah ka ṭawn vah bawk. Ka bag rei tak ka ah chhuah tawh loh pawh ka ak chhuak ve leh ta ngei e, inringtawk taka awm erawh har ka ti viau mai.







Taxi la in Vety Office lam chu ka pan ta nal nal a, Jam ah kan tang zeuh zeuh bawk. Ka thlen ve meuh chuan an lo zi hut hut tawh a, ka kalna ber tur ka hriat loh avangin midang ka zawt chawp pah zel bawk a. Hna dil tur te chu an lo awm ṭhap tawh a, hmel zahawm pui pui pawh an lo kat nuk mai. Thiamna lamah pawh ka phak dawn lo tih ka hriatchian em em te nena ṭhutthleng pakhata kan ṭhu ho zet chu zam luatah ka khur chhe lo chauh a ni ber e. Luh hmasak dan tur in dawtin hming an lam ṭan a, ka khur der der tih reh tumin ka kut te chu ka nuai leh nawk nawk ṭhin.






"Zothansangi maw i hming?" Ka hma a ṭhu pa sa ṭha nelh nawlh chuan a rawn ti thum dut a, ka lo chhang let ve nghal thuai a. Interview ka hmachhawn hmasakna ber a ni a, ka te chem chem in ka hria. Ka hma a ṭhu te chu mi pali an ni a, hmeichhe pakhat kum upa tawh lam a ṭhu tel ve bawk a; a bak zawng chu pa valai tak vek an ni.







Ka lehkha pawimawh ken te chu pe turin min ti a, zawhna eng eng emaw min zawh leh hnu ah phone call ngaichang tura min tiin ka chhuak zui leh ta thuai a. Zawhna min zawt hmasa ber tu kha an hotupa ber a ni tih ka chhuah hnu in ka hre ve leh chiah bawk.







In lam ka ngaihtuah avangin ka haw zui leh ta vat a, chhun thingpui hmeh tur te lei kawi leh in hmahmawh takin ka kal zui ta dawr dawr a. In ka thlen chuan Bawihpuia a lo muhil tawh a, Bawihtei erawh Tleipuii phone en in chungin ṭhutthlengah a lo mu thung. Tleipuii chhuat lo nawt mek chu dah turin ka ti nghal vat a, alo che viau a ni tih hriat takin Inchhung a fai vûk mai. "Ka pasal neih hun atan ka lo in zir a" alo ti ham ham a, inthlak turin ka luhsan zui ta daih a.







Hna ka dil aṭanga kar khat lai aliam leh tawh, ka hna dilna lam an la reh vung vung avangin beisei pawh ka nei zui tawh lem lova; ka hna ngai ka chhunzawm reng bawk. Nilaini zan a ni a, kuhva rah ka thel mawlh mawlh laiin ka phone a rawn ri ral ral a, hmanhmawh takin ka la zui thuai.






"Hello.. Zothansangi a ni em?" Mipa aw thum dut in a rawn tih chuan ka nih thu in ka chhang zui vat a.






"Naktukah office ah i rawn kal dawn nia" tih puat pah min biakna chu a ti tawp zui nghal daih. Ka hamhaih deuh nen ka ngawi zui vang vang a. Ka in ngaihtuah fim hnuah ka hna dil chungchang ka hrechhuak leh ta chauh a. Beiseina ka neih tawh loh hnua chutiang thu ka hre leh chu ka lawmna a sang ngei mai.







Ka kâwng kham leh ka taksa rawl ṭhem ṭhum te pawh ka hrechang tawh meuh lo. A la tlai lo bawk a, Tleipuii chuka be zui ta vat a. Phone a lak rualin ka call dawn thu ka sawi a, a ri nghal chel chul mai. "Naupang kha chu ka kutah dah hmiah rawh, zing ah chaw ei turin ka rawn phei ang" alo ti nghal phar phar a. Thawk khat chu a veng leh ta huai e, rei vaklo in be leh in kan duhtawk ta a. Keipawh ka hna hmabak chu khawih leh zung zungin zanlai pelh deuh ah ka mu ve hman ta hram e.







"Sawi puitu hran pawh i nei lem lova, he hna hi engang chiah a mamawh nge i nih le?" Pu Hmingliana, Vety Office a an hotupa ber chuan min zawt dam dup a, a office ah in hmatawn rân in kan ṭhu mek.






"Ka pu, ka fate pahnih enkawl in harsa takin ka chawm ve a. Hna ṭha zawk beiseiin sawipuitu pawh nei lemlo in ka rawn dil ve tawp a ni" ka ti let ve thuai, ka aw chu a khur ru deuh tih pwwh w a hre ngei ang.






"Um.. dil tu tam tak in awm a. Thiamna lama sang tak tak leh sawipuitu nei ṭha tak tak hlir an ni bawk. Chung zingah chuan koh i ni ta a, i hmel ka hmuh tirh khan ka rilru ah i tla na riau a; chuvanga rawn ko che kan ni e" a ti dam leh thluam a. Hmel hlim sarh in ka lawmzia thu ka lo sawi mawlh mawlh reng bawk.






"Mahse, thil pakhat...... I hriat angin hna hniam tak ni mah se mi tam tak in chuh a ni tih chu i hmu ve vek a" tih pahin min en kual dun dun a, ka amâwm zawn a en laia a mitmeng in thlak ta hlawk pawh chu ka hmuhhmaih lo chiang kher mai.






"I fate chawm nan eng anga thui nge i in huam?" tiin zawhna min zawt leh a, a thu min zawh dan dang ta deuh chu mak ka ti ru deuh.





"Ka pu, ka fate tan a nih chuan ka theih na bak bak pawhin ka ṭang ang" ka ti let ve thuai a. A nui sun sun a, a lu a bu nghut nghut bawk a.






"Anih chuan zanin tlaiah zanriah ei chhuak ila, zan hun reilo te min hmanpui bawk la.... Hna chu i nei a ni mai" tih pahin a chair nghenchhan chu a ngheng zui a. Ka taksa a melh kual dun dun danah chuah a sawi awmzia chu ka hrechiang kher mai.






"Ka pu, he hna hi ka tan a pawimawhin ka mamawh takzet. Mahse, ka zahawmna tih bawrhban phah nan em chuan a hlu tawk love. Ka dam anga, he hna tel kher lo pawh hian ka fate chu ka chawm thei tho in ka ring. Min hrethiam la, ka kal ange" tih hmak pahin ka tho zui tharh a, ka thinrim ut ut bawk.






"Engmah ni mang si lova i chapo ar khan engmah sawtna a nei lo ania. Vawiin hun ka pe ang che; i thuthlukna min rawn hrilh leh dawn nia" ka chhuah hma deuh chuan a la rawn ti zui hram nia. Ka ding dat a, eng emaw tak sawi zui ngei ka duh avangin ka in her leh a; a mitah chiang takin ka melh ngar bawk.






"Ka pu, engmah nilo mahila ka zahawmna hralh duh mi ka ni love. Ka rawn biak leh kher che ngai lovin ka hnawl ni rawh se" tiin ka chhuak zui ta hmak a. Pawn lama mi lo zi hat hat te chu hmufiah mang lovin ka kal pel pawp pawp a, kawtlai ka thlen ve leh duhthawh zetin ka thaw hawk hawk a. Ka mamawh em em mah nise kawng diklo zawh a ka fate chawm ai chuan rim taka ka thawhchhuah tlem te hmang a nun ve ṭawk ṭawk chu ka thlang zawk fe a ni.






(to be continue.........)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)