DARK ALBUM

Episode kal lai dah luhna

Moderator: writers

Tluangpuii Ck
Posts: 110
Joined: February 24th, 2023, 2:29 am

DARK ALBUM

Unread post by Tluangpuii Ck » May 30th, 2023, 12:00 am

CHAPTER : 8






Nu Sangpuii chu a tawng bawrh bawrh a ,an chhugkaw khawsak harsatna chu hre ranin hreawm kan tih a hlau viau a ,ka in thlahrung ru ngawih ngawih zawk.Heti tak hian min dawngsawng tha in min ngai pawina a ,keini lah chuan dawt hlir kan hrilh mawlh mawlh mai chu nia .




" Sawmte," tia min koh chang chuan ka lo phu leh deuh zawk thin a chhan mai nachang pawh ka hrelo. Nu Sangpuii fa te chuan min melh leh zak zak thin a, min nel lutuk lo ni in ka hria . Nu Sangpuii chhuah zawk lai chuan Marcus nen kan awmdan tur kan sawi dun a , hetah hian kan him reng theihlo maithei ; chuvang chuan kan tan chuan Aizawl thlen vat kha a tha ber in kan hria .





Chaw ei hma in a theih ang ang in ka inbual ve a,uluk tak a ka inbual lohna a rei tawh bawk nen ka hahdam sawng sawng mai. Ka inbual zawh chuan ka thawmhnaw hak leh chu ka hreh viau a , nu Sangpuii bawk chuan a thawmhnaw thenkhat ka hak turin minlo chhawp lawk diam a. A thawmhnaw te lampang ho chu ka ha thei ve mai bawk a , thawmhnaw fai hak a inbual fai bawk chuan rilru pawh a veng sawt sawt mai.





Marcus tan chuan a pasal thawmhnaw thenkhat a la kawl that te chu a phawrh chhuak bawk a , nu Sangpuii bulah hian lawmthu sawi senloh kan ba ani.Inbual fai a ka sam te ka khuih takah chuan naupang ho pawh chu ka bulah an tap chawt a , an zirlai thlengin ka sawipui a min ngaina ve viau chuan ka hria .




In leng an rawn chuang Kai miahlo chu ka lawm ru viau a , inleng neih chuan dawt tam zawk sawi leh a ngai ang a mahni inthiamlohna kan ngah mai mai dawn a .Chaw kan ei lai chuan hreh deuh takin nu Sangpuii bulah chuan " Nu Sangpuii,sumo service vel a awm em?" Kan chhuahna a rei ve tawh angreng sia,kan chhugte kan be pawp thei silo a min ngaihtuah kan hlau deuh a" pehhel deuh tak a ka tih chuan min hrethiam viau a .





" Zanin chauh chu riak thei ula tha tur ania " a ti niah niah a , " sumo chu a la chhuaklo deuh ang , dar 10 velah hian an chhuak tlangpui a ; pakhat tan pawh 500 lai a ni ve a " tiin a sawi zui a .Buaina kan nei ta tlat mai, pawisa cheng khat mah kan neilo kan chhungte kan be theilo bawk. Nu Sangpuii te chhugkaw dinhmun lah kan hrechiag a , cheng 1000 lek pawh an tan chuan thawhchhuah a harsa dawn takzet.





Chaw kan eikham chuan dar 9 a ri tawh a ka rilru a buai takzet.Marcus ka va melh chuan kei ai mahin a rilru a buai hmel zawk ,tih vak ngaihna ka hriatloh vang chuan tho in nu Sangpuii thleng sil tum chu ka chuh ta rigawt a . " Anih chuan Sawmte tikhan lo sil mai la, ka va chhuak lawk ang a sumo te chu ka va be chhin ang e .E takin; Thantei ka thlai man min pek zawhloh te ka va lam pag ang , pawisa in mamawh dawn si" tih pahin a chhuak zui a . Chutia ka sawi ngai miahlo a nachang a hria chu ka lawm takzet, mahse a pawisa chu ka rul leh ngei ngei ang






Zualtei te unau chu school kal turin an chhuak tawh bawk nen Marcus nen chauh chuan kan awmdun a,chutia kan awmdun takah chuan haw ka hreh ru viau a dik tak chuan Marcus hlat a awm leh chu ka hreh ru deuh tlat a.


" Marcus"... " Umm" min chhang tawi thei tek tawk sia maw. " Kei chu kan inah ka haw ang a mahse engtin nge i awm ve ang?" In thlahrung deuh tak chuan ka zawt a,dik tak chuan haw na tur a neihloh zia ka hria a . Min chhan mai loh avang chuan a mah chu ka en vat a ,min lo melh ve chiah bawk a .

" Haw lo in kan pahnih in awmdun mai ila ,i duh em?" Ka zawhna avang chuan a nui suk a ." Min ngaihtuah suh" a ti sup a .Engtin nge a mah hi ka ngaihtuah loh theih ang ni. A thutna atang a tho chhuakin ka kawngah min rawn kuah zui a ,ka darah a khabe a nghat bawk a a za ka ti . " Marcus, Hriatpuii vang khan min ngaidam tak tak em? Rilru damlo chung a ka kiangah I awm reng chuan"



" Shuuttt....ka ngaidam I ngai em ni? I tihsual a awmlo , sawi tawh suh" . hmm,,


" Nih ka pa chungchang hi" ......." Kha pawh sawi lo ang" engmah min sawipui duhloh vang hian ka lungawilo hle ani. " Thil tamtak i thluak te reuhte hian i ngaihtuah kual ve a, kha khan a tihbuai che anih hi" tiin ka lu ah a kut tangin a chhu kauh kauh a. " Kal teh, lo va thu mai mai rawh. Ka sil zawh tep hi" ka tih chuan ngai pawimawh lo zetin ka nghawng ah a rawn fawp zui a , pawn lamah thawm a awm zui a ka kiu in ka nghawk nghal sawk a .Ka chetdan chu a lo rin lawklo bawk nen a then ve sawk mai ,chumi rual chiah chuan ni Sangpuii a rawn lut zui ve chiah bawk a .






In hnaih tak a kan ding a hmuh chuan a nui tet tet a , Marcus chu rum lutuk in ka melh a ani lah chu a lo nui ruh ruh duh chauh a . " An lo nghak dawn che u anih chu ,in siam nghal mai rawh u" a ti zui a , insiam tur vak pawh kan neilo.Engvang nge ni haw chu ka hreh ru tlat a . " Nu Sangpui, i phone no min pe la " ka tih chuan paper ah a ziak in min pe thlap a,bo lo turin uluk takin ka ak zui hmiah bawk a ." Sawmte,nang hmeichhia zawk ah hei hi kawl rawh " tiin pawisa min hmehbel chawt chawt a , engzat nge anih pawh ka hrelo.




" Ka lawm e aw" ka lung a chhe dawn dawn anih chu. " Kan lawm e" Marcus chuan a ti nawn ve sup a,nu Sangpuii chuan min en dun vang vangin " ka fate u, kan dam ang a kanin hmu leh thei em ang chu " tiin a mittui a hru ta mai a , tih ngaihna ka hrelo mahse mak tak mai in keipawh chu ka tah a chhuak ve tho mai. " I kal ang u ,kan tlai mai dawn " tih pahin a chhuak zui sawk sawk a , Marcus nen chuan ngawi rengin a hnungah kan zui chhuak a .Nu Sangpuii'n kawngka a kalh laite chuan ka rilru dik takah chuan heta awm hi ka la duh zawk mah a ,mahni in thlen chakna reng ka neilo chu mak ka in ti a , Marcus ka ngaihtuah vang ah ka puh ta ringawt a .





An khawlai chu a nuam angreng viau a kawng chho ulh lutuk a awm lo a ,a fai in a thiang nuam reuh em em mai lehghal. " Kha ,Sangpuii khawilam mikhual nge I neih a?" Tiin nu pakhat hian nu Sangpuii chu a rawn au lang lang a , " Aizawl lam a kan naute an nih hi,min rawn tlawh a " tiin a chhang liam ve mai a. Sumo counter kan thlen chuan sumo pawh alo rum vung vung tawh a, passenger dangte pawh an lo awm nual a a then sumo ah an thu lut tawh a ,a then chu a pawnah an la ding far bawk a .





" Pu Ro, hei ka naute chu an nia lo ngaihsak ve deuh la aw" ti in nu Sangpuii chuan driver ni awm tak kuhva ei sen buah buah pah a ,lo tawng mawlh mawlh pa bulah chuan a ti a , a biak pa lah chuan ngaihsam hmel fe hian " nang berin I tihte chuan kan hnial ngam nang" tiin a nui zui huah huah a . Ka bulah a ding reng emaw tih laiin Marcus chu kan piah deuh dawr te ah chuan alo thu a , rei vaklo hnu ah chuan a lo let ve mai bawk a ,ka bul alo thlen rual chuan mask min pe in " i mamawh ang" a ti a .






Sumo a kan luh dawn tak tak ah chuan ni Sangpuii chuan Marcus nen min kuah dunin " mangtha u" tiin a phun sap a , a puan bah lai chuan ka lu a khuh zui a . Sumo a kan luh chuan a hnung ber seat ah Kan thudun a , kan tlanchhuah dawn thleng chuan " tluang takin aw ,dam takin le " tiin nu Sangpuii chuan min la rawn au zui tak tawk tawk a. Kan kan theih chhung zawng chu a ban a vai lauh lauh bawk a .





Kan tlan thui telh telh a ka rilru lah chu a mang telh telh mai bawk a, Marcus darah chuan bei thlamin a kutah ka chelh a ani pawh chuan nghet takin ka kut ah a chelh zui a . Hetiang hian a kut hi ka vuan reng thei tawhlo maithei, tun hi a tawpna ni ta se ..Ni lo, he kut hi ka thlah leh ai chuan ka neih zawng zawng pawh chan ka huam mai ang ,ka chhungkua thleng pawhin.




Sumo ka chuan leh takah chuan rilru in hun kaltawh a chhui kir a , Hriatpuii bawk ani ka ngaihtuah leh tak ni. Kha ni ah khan sumo pakhat ah chuang dunin harsatna thuhmun kan tawk a ,mahse tunah chuan a tuar tu tan a fair lo zetin keimah chauh nung damin ka haw ta thung a . Fahrah unau lainat awm zet leh hmangaihna ngah tak ka tawng a , a hmasa zawkah Hriatpuii nungrawng na vang a laksak ka ni a ,tunah a u zawk Marcus. Marcus pawh hi ka chanpual a ni chiah em ka hrelo, Marcus lehzel laksak a ka awm anih chuan ka ngaihtuah zawm ngam lo.






" Vivian ...Vivian" Marcus chuan min sawi dat dat a,kei hi kalo muhil leh daih a ni maw . Ka men chhuah chuan sumo pawh alo ding tawh a , " thingpui in ang aw" tiin minlo nuih sang a .Sumo a Chuang ve dangte pawh an chhuk sap sap a , " khawi lai nge kan thlen" ka tih chuan kan awmna hmun chu min hrilh ve mai bawk a . Nu Sangpuii pawisa min pek chu phawrhin a zat ka en a , cheng 1500 lai alo nia .Hemi hian an chhungkaw mamawh tam zawk a phu hru thei ngei ang , mahse phal takin min pe a khatiang tak a midang tan a in pe zo kha an awm thei tawh pawhin ka ringlo.






Sumo atang a kan chhuah dawn chuan Marcus chuan mask a vuah zui a ,keipawh chuan a tih ang chuan ka vuah ve a motor atang chuan kan chhuak ta a . Kan thawmhnaw kan thlak tawh a,kanin cheina a zahpui awm lutuk lo bawk a mi pangai kan ang ve tho in ka ring .Ni e ..Mi pangai kan nia lawm.




Thingpui dawr lampan a kan kal lai chuan Marcus banah ka vuan bet tung a , chutia midang zing a ka awm leh chu ka ni deuh hui hian ka hria. Thingpui dawrah chuan chow , rice ,thingpui ,chana tih angreng an lo nei nual a ,a vawikhat na atan thingpui dawrah chow chu ka lam ve ta a . Ka rin ai daihin kan thil ei chu a tui a , chow chu plate hnih ngawt ka ei a , Marcusa'n a plate ami min barh zauh zauh bawk nen ka puar viau mai.





Thil kan ei zo sumo a kan chuan leh dawn lai tak chuan driver chuan " Sawmte ,in rui em?" Tiin minlo zawt khauh a ," ruilo e ,ka muhil deuh char char" tiin ka chhang vat a . " In ruih loh chuan a that chu , harsatna in neih chuan sawi bawrh bawrh ru aw" tiin min hrilh zui luam a , kuhva bawk a lo ei sen leh huam tawh a kuhva chu a duh ve viau in ka ring. Marcus chuan meizial a lo dil khauh a , driver pawh chuan zozial ngei mai a lo theh a ,a lighter chu hmansak nghalin Marcus chuan kan piah deuh ah chuan a zu khi hlat hlat a .





Sumo a kan chuan luh leh hnu chuan Marcus hnen ah " meizial i zu ve ngawt a " ti in ka melh kar a , " kan thil ei kha ka a ti tuilo " a ti liam puat a ,a hma ang tho in ka kutah chelhin a darah min bei tir zui a ,rei pawh ding twhlo in kan tlanchhuak zui nghal a .Muthilh leh mai ka tum a mahse hmalam atang chuan driver in tumah muhil lo ang,thalai vek kan ni bawk a tiin polite lo zetin hla a play zui a ,a la ring em em zui .Ka rin ai takin passenger dangte chuan an ngaithei a ,a tawpah phei chuan an zai pui dual dual a , rilru ti harh nan ti in ka zai pui ve ta chiam a a nuam letling phian a .





Tun lai hla rap leh hla maksak tak tak a in play fuh apiang ngaithla duhlo in driver chuan a next hmak hmak a , Rebecca Lallawmsangi " Aw i hlui lo" tih a play duh chuan kan zaipui nasa zual sauh a ,kanin sawi nasa bawk nen ka thlan deuh hliam a Marcus chuan minlo nuih suk suk in ka hmai a rawn piai zauh a. Zai ve tur a ka tih chuan a ner nasa ngag mai.






Chawhnu herah chuan Aizawl kan lut a , chutia Aizawl ka hmu leh chu lawm na ka neih phah em em pawh ka hrelo . Dik tak chuan ka haw duhlo a , Marcus hian amah zui turin min sawm duhlo mai pawh a .Sumo stand kan thleng a sumo a din rual chuan kan chhuk sap sap a, Marcus chu ka vuan tung tawh a , chuan man kanin pek fel lai te chuan ka dawm nghet sauh sauh a.




" Ka thlah theilo che a " ka hlauh ang ngei nge in,hepa hian in lak hran a tum chiang lutuk. Ka pa pawn a hre tawh awm tawp silo,bakah tunge a belh ve ang .Ka lo haw pui chu ka inchhir chawp nghal a ,ka tum zui nghal hmuk a .Ka hmel a hmuh chuan thaw hawkin a hmai a tuai puat a , " Vivian, hmeichhe huaisen tak i nih kha , taxi hmang la in lam pan rawn. Ka lo kal ve a rem lo ,zanah hmu tur che in ka lo kal ang", a thilsawi chu hnial rual ni in ka hre lo a amaherawh chu ka pawm thei nganglo ani.




" Ka duhlo" ka tih chuan min en vung vung ah ka chal ah rawn tauh datin " nih ,lo kal rawh" tiin min kai zui a ,taxi lo tlan hmasa ber chu phar in min chuan pui a , driver hnenah chuan kan veng hming a sawi nghal a ,min haw tir chu a tum ve hle mai. Kanin zawn kan thlen chuan " kal rawh, zanah ka lo hmu ang che" tih pahin ka mask leh ka lu khuhna chu a siamtha mawlh mawlh a. Ka haw duhlo tih hi a hrethiam lo ami le? Ka haw duhlo tak tak, Marcus bulah hian ka awm duh alom.




Kanin lam chu a thlir a " en teh saw , Lily pawn a hmuh che chuan a lawm viau ang " tih pahin gate lamah a thle buk a . Hla deuh hlek a Lily leh a ui roxer a lo inchhaih chu ka hmu zui a , Lily chu ka ngai ngei mahse Marcus bulah awm ka la duh zawk tho. Marcus chu taxi atang a chhuk a ,ka thutna lamah lo phei in ka chhuah theihna turin kawngka min hawn sak zui a , min kaih chhuah a tum lai chuan ka lo tang hrak a rum nghatin" Vivian" a ti sup a ,thil hi harsa tu nih ka duh biklo mahse a bulah hian ka awm duh alom.





Taxi atang a ka chhuk chuan min kuah vat a ,tu mah ka zah buai peihlo" I bulah ka awm duh" tiin ka in sut zui a ." Nula khwwlaiah an tap ngailo " tiin ka hnung ah a chul hauh hauh a , ka chalah a fawp leh zauh a " kal tawh rawh, zanah kalo kal ang" a tih leh chuan ka la kal duh mai lo ,zanah lo kal pawh ni se engtin nge alo kal tih ka hriat theih ang. " Kalo kal ngei ngei ang" tiin min nam zui dat dat a , chutiang tak a min hnar tu chu ka zui biklo ang tiin ka chapo lui a, in her hmakin gate lam ka pan zui nal nal a , Marcus chuan min en zui reng in ka ring mahse ka hawi kir hauhlo ang.





Gate ka luh chuan kanin leh a compound chu a hma ang bawkin a fai in pangpar pawh a par nalh leh viau tawh a , mahse ka nun ah chuan an chul ruap mai. Hreh deuh chungin kawngpui lam ka hawi leh hram a , Marcus chuan a ban alo vai lauh a . Ka hma lam ah ka kal zui a , Lily leh roxer in fiam chuan min hmu mai lo ,ka hnaih takah chuan ding vang vangin ka hmai tuamna leh ka lu tuamna ka phelh a " Lily" tiin ka au lauh a .



Lily rawnin her rual chuan kalo nui sak a min hmuh rual chuan Lily chu a ka hau a ,engmah sawilo in min en reng a " phung hmu ang mai" ti hluk pah a ka kal hnaih chuan " eheeee! ...I ni tak tak ,a van mak U Vivian" tiin min rawn kuah nghal chuk chuk a, ka hmaiah chelhin chiang zetin min en a " Lalpa ka lawm e , I lo haw leh ka ring reng ah . Nu...Nu, Au Viviani " tiin a au nghal tuar tuar a. " Enge ni?" Tih pah a ka nu leh kan nula te rawn thlanchhuakin min hmuh chuan Lily ang tho in an ka hau mai.





" Nu, au Viviani alo haw leh dawn ka tih reng kha" Lily chuan alo ti zat zat a ,ka nu chuan min rawn pan hnai in min en vang vang a ,a kut rawn phar chhuakin a hmaiah a chul a a kut a khur dar dar a " ka fanu" tiin min kuah zui a ,a tap chhuak hawm hawm a " Lalpa ka lawm e ....Ka fanu min va ti mangang ve ,dam takin ilo haw leh a . Bawihte,na I nei em ? I ril a tam em, enge I ei chak" min thlek kual nghal thuak thuak a ,na ka neilo tih a hmuh chuan a thla a muan hmel deuh.





" Khawge ka pa?" Ka tih chuan" hna a thawk a , a lo haw tep ang ... Ti teh u lut phawt ang " tiin min kai zui a inchhung ah kanin zui lut thuai a .









End of chapter : 7



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)