Viva La Vida chapter-2

[Hluhlutei]

VANNUNZIRA POV


Vawiin chu kan thleng tlai khawp mai, Class room a ka lût chu an lo kim ṭhap tawh a, Kiki i leh a ṭhiannu Malsawmi chu ka ṭhutna ṭhin ah an lo ṭhu thân nia, ka van ngei mai mai tak, ṭhutna tûr zawnga ka hawi kual ruai lai chuan Kiki i zâwk chuan min lo hui zauh a, an bul ka va pan lai chuan Malsawmi zâwk chuan min lo melh no lo kher mai, ngaipawimawh duh lo luiin ka ṭhu lui ngat a, a kuttin sei zet mai rawng dum a a hnawih chu ka lo en vung vung lai chuan, "Nuna Lehkha i thiam thei an tia, a dik em?" Kiki i chuan arawn ti sar sar a, nui suk chungin "Thiam hran lo e" ka lo ti ringawt, Ka zir peih ang hian zir peih ve hlawm se chu an thiam ve tho ang, ka rilru a chak fâl bîk vâng leh ka Fin bik vang a ni lo, Lehkha zir loh chu tih tur dang nei hek lo i, Proffessor in eng engemaw a sawi mawlh mawlh lai chuan Malsawmi ve thung chuan earphone a vuah daih thung, he nu hi A hming in college a kal ve mai mai niin ka hria, nizâna a bialpa hlui a ṭawng khum dan te kha ka ngaihtuah lêt a, hmeichhe nasa ve tak zawng a ni, Kei leh kei lo angin thildang ka lo ngaihtuah tluan ve zak nia, Class a zo kan chhuak tûr chu Malsawmi chuan Hmeichhe pakhat kawr ah chuan a juice ken lai chu tihpalh thil thu hian a tih buak palh hlauh mai, chhuak ta mai lo chuan kan en ta ṭhap hlawm a, chu nu kawr lah chu a vâr si, a juice ken lai chu a kai sen luai lehnghâl, mahse Malsawmi chu thil tisual ang pawhin a lang lo, melh ralh paha kal mai a tum chu, "Ka lei thar a sin, i tih luih a ni tiraw?" Ṭap aw ṭeuh hian a han ti tuar a, Malsawmi chu an ding dat, chutah chuan akawr a tih chhiat sak nu chu ngeiawm zeta en pah hian, "Ouchh...." a ti ringawt nia, a tihpalh tih ka lo hmu ve reng tho a, mahse a tihpalh tih tal kha chu sawi ve se ṭha mai tûr, "He college ah hian i pa Principal a nih vâng hian thu ber amaw in ti suh" chu nu chuan thinrim hmêl zet hian a ti leh a, Malsawmi chuan ngawi reng hian A juice tlêm la awm chu Kiki i chu a pe a, "Kan Principal fanu ka nia chuan engtin? Ngaihdam ka dîl vang che khân i kawr kha a fai leh dawn ami? Nangmah a nih kha min rawn su tu" a ti ta zêk a, chu nu chu a ngawi chiang kher mai, ka khawngaih let ling zawk, "Kal ang" tih hmak pahin Kiki i nen chuan an chhuak nghâl nal nal a, keipawn ka ûm chhuak ve nghâl, Kiki i chuan a hnungah chuan a zui dat dat a, va biak a va ûm ka tum chu ka hnungah chuan tu emaw hian min pawt lêt deuh awk a, mak ti zeta ka hawi lêt chuan Ruata chuan "In rawlh suh" tih deuh hmak pahin min kai hrang ta nal nal a.




"Ngaihdam dil tura tih ka tum mai alawm" Lungawi lo zeta ka tih chuan, "In rawlh suh, buaina i tawk reng mai ang, mi zawng zawng huat rawn ini bawk anga, Henu hi hnaih chi a ni lo, ka sawi tawh kha" a tih chuan ka ngawi veleh mai, ni e, engvanga inrawlh tum ve ziah nge ka nih pawh ka hre lo.

Sport na turah in sâwr bing in football khel tur ho chu kan in hmu khawm a, kan house chu kan ṭha thawkhatin ka hria, Ka team mate te ho chu an fel in an ṭawng duh hlawm hle a, ka nêl nghâl êm êm thei vek nia, "A nih enge Chicks lam te?" Rpa'n alo tih chuan beidawng zetin "Rp, ka rin ai daihin ka lo luck lo" ka tih chuan za zet hian an nui hlawm a, "Lungngai lo la, kan team ah hian i khelh ṭhat chuan i lar vet vet ngawt ang" alo ti ve mai a, ka phûr tawh kher mai, naupan lai aṭanga inkhelh atchilh ve thei tak kha ka ni a, mahni tawkah ka thiam ve hle in ka hre bawk, ka huphurh hran lo.



Chawhnu lamah chauh class ka rih loh vângin Library ah techuan ka kal kual vêl mai mai a, Lehkha zir ka tum em em pawh a ni lo, a reh êm a nuam ka tih ve hrim hrim vâng zawk, tukverh bulah chuan ṭhu in thlanglam chu ka hawi thla vang vang a, Malsawmi leh Kiki i tualzawla lo in zui dat dat ka hmuh chuan ka mit ala nghal zar mai, Vawiin pawh a dum suit bawkin a inthuam leh tawh, a pian a nalhin a langsar larh mai, a kal pêl te reng reng chuan an en zui tlawk tlawk zêl, enge ka hriata henu hi ka ngaihven em em phei chu ka hre lo, a chanchin ṭhalai reng reng sawi tûr an hriat loh vâng pawh hian mak ka ti pawh ni maithei a ni, Chutia ka lo thlîr dauh dauh lai chu ka ṭhutna bul dawhkân chu arawn ri ta kerh kerh a, ka la phu uih zui, Puipuii kan ṭhenawm ami nu tereuh kha ka hma zâwnah chuan alo nui ver ver mai,
"Enge hetah i tih?" Arawn ti deuh sar sar a, "Class ka la nei a, ka nghak a" nui vur vur chuan ka lo ti ve sur sur a, "Keipawn ka nei asin, kan haw rual thei ang" a tih chuan nui chungin ka lo bu nghauh ringawt a,Chutah a phone chu rawn phawrh in earphone hi arawn phawrh zui a, a beng lehlama vuah tur chu ngawi reng hian min rawn pe ve a, ka lo ban ve nghâl zat, a phone chu a khawih zui niap niap a, "Ka hla duh ber a nia" arawn ti leh sar sar, keipawn ka ngaithla ve ziah, By My Side tih hla Japanese band hla a ni, ngawi reng chuan kan ngaithla dûn reng a, min rawn en leh ṭhin, a nui ver ver reng a, keipawh chuti tho, ti ti vak theih ni hek lo le, in haw lo na na na chu kan innuih leh tawp zel, Puipuii hi a ngo in a fai ver reuh a, a maimitchhin vang vang lai chuan khabe dawm meuhin hnai set sawtah ka lo enkar reng a, a hrereng aniang ka mitah chuan rawn hup deuh thak pahin a nui deuh hak mai, a kut chu la thla in a Kut no nalh zet chu ka en vang vang a, duat taka hûm vang vang ka châk ngang mai, mahse ka hûm leh ta lo, he nu tê hian min haw lo tih ka hria, bem ta ila chu ka bem thlûk theih mai ka ring, mahse ala hma ka ti a, thlakhat emaw tal nghah phawt ka duh, a mizia te hrechiang ila tichuan ka bem chauh ang.



Library a awm reng zawng tiin kan chhuak ta nge nge a, " Zingah khan Rawn sâwm che ka tum a, mahse ka zak deuh a" nui hak hak pah hian a ti a, ala naupang ve tih ka hria, Zak mahse a awm lo hran chuang lo, "Zak duh tawh suh, a ho lutuk" ka lo ti liam puat, thildang eng engemaw kan sawi mawlh mawlh lai chuan Kiki i te kan tâwk hlawl mai, "Aw...Nuna, class ila nei elaw?" Kiki i chuan alo ti var a, "Aw...nangni in la nei em?" Ka tih chuan nui ver ver hian alo bu nghauh nghauh a, Puipuii erawh alo ngawi kar thung, "Tunge a? I bialnu ni maw?" Kiki i chuan min chhaih ti tih deuh hian arawn ti a, ka lo nui ringawt, a ni lo ti dawn ila bem ka la tum tho a, a ni han ti ngawt dâwn ila a ni bawk si lo, ka awm dân chu alai zo vek, "U Malsâwm i dam maw?" Puipuii'n atih chuan mak ti zetin kan lo en hû a, "Ka dam chu nih hi" alo ti deuh hmak, A chhan dân chu mak pawh ka ti tawh hran lo, Mahse engtin nge Puipuii nen hian an in hriat le? "In in hria maw? Engtin nge in in hriat?" Ka lo ti nghâl vat a, "Hria la enge? Ngatan nge i tih?" Malsawmi chuan alo ti nia, " Second Cousin kan nia lawm U Malsawmi pa leh ka nu hi cousin an nia" a tih chuan mak ka ti ngei mai, engtin nge heti taka mihring in ang lo hian thisen inzawmna an neih theih le? "A mak hle mai" ka ti leh ringawt a, "Enge a mak vak na? I bialnu unaunu ka ni chu enge pawi?" Malsawmi bawk chuan alo ti leh tawh, ngawih hi ava har ṭhin tak hmeichhia khin Ka duh loh vâng chauha ngaithla liam Ka ni reng sia, "Ka bialpa a ni lo, kan in bulah an awm a, kan in ngaizawng lo" Puipuii chuan alo ti nghâl zung zung a, "Tinge in inhmeh viau ang chu" tihpah in min rawn kal pêl deuh fua a, rawn hawi lêt leh pah in, "Cute couple in in tih tepawh ka ring e a" ala rawn ti hrâm nia, ka thinrim insûm chu ka nui tawp, nuih mai loh chu tih theih nei hek lo i,

"A ngeiawm thei ania, chapo si, U Malsawmi hi tuman fel an tih pawh ka hre lo e a" a ti deuh niah niah a, a dik ang ka ring, mahse engmah phei chu ka sawipui duh lêm lo,


Vawiin chu kan bân hma vângin kan team ho chu Practise ni pah fawmin futsal khelh chu kan tum ve ngei a, Ruata'n min lo nghâk bawk, ka insiam zawh chuan kan kal nghâl mai a, Aizawla a khelh na tûr zawng zawng vawiin tlaiah âwl pakhat mah alo awm lo zui, Aizawl aṭanga hla vak lo, Aizawl khaw pawn ni si chu alo âwl hlauh vângin kan pan nghâl chûk chûk a, kan team ho hi la hmelhriat vek lo mahila mifel tak tak vek an nih vângin Inthlahrung takin ka awm lêm lo.

A hmun kan thleng chu Kan hma a inkhel hmasa te hun ala zawh loh vângin kan han ṭhu khawmuang leh te te a, a hmunah meizial zûk an phal loh vângin pawn lamah chuan chhuakin Ruata leh Hriata, Cpa techuan an zu hlat hlat a, kei erawh zûk leh hmuam ti ve lêm lo mahila an bulah chuan ka lo ṭhu ve reng tho, zûk leh hmuam tilo nih vânga ati a te ning leh hnawksak ti reng reng ang kha ka ni ve lêm lo, Hmeichhe ho niin ka hria in khel chu, an thâwm a rin ang hu in an in khel chu a hmuhnawm lutuk lêm loh, nuihzatthlâk ah tepawh a kal zâwk mah, ka ṭhian teho chuan tlêm a khal deuh leh vun ngo deuh, hmelṭha deuh techu an lo thlang sap sap hlawm a, keipawh ka bâng chuang lo, Chuta a khêl zîng a pakhat samsei hniang mai Hoodie dum leh leggins dum ha, lian vak lo hmaibial kerh mai chuan ka mit ala leh tlat tawh, a mit meng a fiahin a nui leh har har ṭhin, a nui rî te chu duhawm ka van ti tak, a lian lo a khal lutuk pawh a ni hran lo, mahse keichu hmeichhe te lam hian ka mit an la tlat zêl, ṭhian ho inkhel mai mai an nih ka ring an nui leh dar dar ṭhin, keipaw'n hriat loh kâr in ka lo en tui hman khawp mai, Tlêm a pâ zân lo pathum vêl hi an tel ve nghe nghe a, chûng ho chuan ka mit an la zual, mipa tam tak chuan an ten ṭhin, a âwm ka ti tho, mahse keichu ka lâwm tlat zêl, chutah chu nu, ka lo en reng nu tê chu hah hmêl zet hian A bag a tui chu la in a rawn in khalh khalh a, a biang ala tai tek zui, ka lo en reng lai chuan arawn hawi chho a, min rawn en ve chiah, mit meng lian tih tûr a ni lo, mahse a mit meng chu a sexy ka ti, a fiah kâk bawk si, a nui deuh sak a, ka lo nuih ve ringawt, bân han vei khum zauh ka tum ûk a ka ṭhulh leh, zaktheilo min tih ka hlau leh deuh, hmanhmawh tak chuan A tlân lût leh dâr dâr a, a che vêl chu ka lo en reng, in la no chuang miah si lo hian A nû hnâp mai, a nui ring thei phian lehnghâl,

"I mit a tla nge aw" Hriata chuan nui vur vur hian arawn ti a, midang ho pawn an hrethiam ni ngei tûr a ni min nuih dar dar hlawm mai, "A hmelṭha êm alâwm" ka lo ti mai a, "Ka rin ai daihin nang hi i lerh" Rpa rilru a awm ang ang sawi ṭhin tih takah arawn ti chhuak leh hlawl tawh, kan nui leh dar dar ringawt,

Chutah an hun chu arawn tawp ta, an la kham lo tih ka hre mai, A thiam lo zualpui chu an chhuahchhal laih laih hlawm a, hmeichhia ka vawikhat hmuh na ah hetiang rêng hian ka la en nasa ngai lo, ka en nasa lutuk a zâm lek lek zawk in ka hria, "Ka hria lawm, a number kan dîl dawn mi?" Ruata'n arawn tih chuan ka lo phûr ngang mai, "Hminghming" ahan ti lûng lûng a, ka duhnu tê chu arawn hawi vat, a mit ko arawn sân zauh, avan duhawm chiang tak,
"Ava nuam awm ve?" Ruata chuan ahan ti zui zat a, hepa hi a zei ka van ti tak, a dîl nghâl tawp dawn maw ka tia, " In in khel ve dâwn elaw? keini chu kan thiam lo na in kan tui ve lutuk" nui ver ver hian alo ti a, ka lo en ngawih ngawih vâng nge a zak ru deuh tih ka hre mai, "I number ka tibo daih a, min lo pe leh teh, star tu deuh che ka hria nia" a tih chuan a nui deuh hak a, "Keini ang min lo duh ve tu techu a ngaihzawn tlâk dawn em ni?" Fiamthû a han tih techuan ka lo nui uar fâl kher mai, Ava han zei loh theih ngai êm, tichuan number techu in pe in an haw ta sang sang hlawm a, hmuh leh ka chak nghâl veng veng mai,


"Engtin nge in in hriat a?" Kan inthlâk mawlh mawlh pah chuan ka ti nghâl a, "Kohhran hmun khat te kan nia, Khawmpui na velah te kan in hmu ṭhin alâwm, a fel teh mai nia, a hmâ chuan bialpa kha a nei ve a, an inṭhen tawh in ka hria, a bialpa lah kha A chapo ropui sia" a ti zui mawlh mawlh a, henu tê hian zûn engemaw tak chu a nei chiang alâwm, ka rilru ah a awm zui veng veng mai, "A single lai tak a nih ka ring, a luck lutuk, mahse ani pawh hi duh bîk tê nei chi ang kha nia, a lerh vak lo" a tih chuan ka nui sûk a, min duh lohna chhan tur a neih ka hre lo ka rilru chuan ka lo ti ve ringawt, "A duh ang che, mahse ka ṭhian ania, a rilru tihnat sak miah suh ang che, hlim a phû" a han ti zui a, "Chuti em em in ka lêrh bîk lo" ka lo ti nghâl hluk, "Puipuii iti bawk" a tih leh chuan ka hre chhuak zawk mai, ka bem êm pawh ala ni lo a, "Hminghmingi ka thlang zawk" ka tih chuan A nui hawk, "Puipuii chu keipawn ka duhpui chiah lo che, ngaihzawng angah tawh emai" alo ti ringawt a.


Kan hun alo thleng a, ka inkhelh lohna a rei ta bawk a,Ka fit tawh lutuk lo, mahse insawi theihna pawh ni lovin ka ṭhian techuan min la tluk lo deuh a ni, ruihtheihthila fihlîm lo na na na chuan a fihlîm zawk techu an tluk thei lo top ang le, Hminghmingi te ṭhian ho pawh la haw ta mai lo chuan an rawn let leh, an ṭhianpa pakhat phone theihnghilh a zarah kan inkhel chu an lo en ve ta reng a, nuam ka ti ru kher mai, "Kawrvâr ha pa Saw" ti a an ṭawng chu ka hre thâwi thuak a, ka chanchin an sawi tih ka hre mai, keimah chauhin kawrvar ka ha miau a, a hnû a an sawi leh erawh ka hre thei tawh lo, rei vak lo ah chuan an haw ta daih a, nuam ka tihna a bo vek, an haw dâwnah chuan kan mit leh mit a intawn fuh leh tho kha tiin ka inhnêm chawp top, keini pawh Darkar chanve hnu velah kan hun chu tâwpin kan haw zui veleh a, nuam kan ti tlâng kher mai.

Ruata chuan min thlah haw leh thlap a, a châng chuan hrehawm ka ti ve ṭhin, hetia ṭhian te rin reng ngai ṭhin hi, mahse ka tilui thei ngang bawk si lo, in ka thleng chu zan riah kan ei hun a pêl tawh chungin ka pa hian a ruala Chaw ei ho loh hi a duh ngai lova, an ril ṭam tawh viau mahse min lo la nghâk hram hram chu nuam lo tiin ka inthlahrung dûk mai, engmah phei chu an sawi lêm lo, Chhûng inkhawmna te hmang zo in zanriah chu kan ei ho a, min awmpui tu nula U Zo i leh ka nu in thleng an seng lai chuan ka pa damdawi lei tûrin ka chhuak lehnghâl a, naktuk zîng ei tur a neih tawh loh avângin zing kara kal ai chuan tiin zânah chuan ka kal ta zawk a ni, Aizawl khawpui hi chu anuam a ni, a bengchheng deuh tih mai loh chu, kal kawnga chutia mahni a ka kal ruk ruk lai chuan, kawngthlang lamah chuan inhau ni âwm tak hi an lo in vîn tuar tuar a, ka mit hlei chu ka zu hawi thla hman pek a, ka thil hmuh chuan min ti ding chawt, Lalmalsawmi leh hmeichhe upa lampang leh mipakhat ruih hmêl zet hi an lo ding ṭhâm mai, "Kan chhûngkua a rawn inrawlh tur hian tunge inih? ka fanu i ni lo a, i ni ngai lo bawk ang, nang hi maw? ka hrin ni che khân lo rêk hlum zawk che ila ṭha tur, ka thil tihsual lian ber inih hi, ka vanduaina in ṭanna, ka tân chuan phâr ang mai ini" Malsawmi bula ding nu chuan Malsawmi chu a tih khum tuar tuar a, an thusawi zet chuan min ṭhawng kher mai, amah hring tunu a ni tih hrilh chawp ka ngai tawh lo,Ka in rawlhna tur a ni lo, ka hre lo der tur a ni, ka rilru a tih mawlh mawlh paha kal tlang mai ka tum chu, "Ka nu inia sin" ti a Malsawmi beidawng aw lawi rât chuan min ti ding leh chawt, ni e ka ngaithla anga ka hre lo der mai ang tiin bang phên ah chuan biru chungin ka en ta reng a, "I nu ka ni lo, vawikhat mah rawn kal tawh suh, i pa nen sawn thi daih mah ula enga tân mah ka ti lo" a ti nih chu, ka nu in ka hmaichhanah tiang hian min ti ve ta se ka awm dan tur chu ngaihtuah pawh ka ngaihtuah ngam lo, eng anga buaina lian leh harsatna lian pawh lo nei se a fa hrin ngei chu tiangkhuan a ti tur a ni lo asin tiin ka lo inhûm ruh nasa mai, Malsawmi chu a vawikhat nan ka khawngaih tlat, mihausa tepawh hi an lo hlim vek kher lo tih ka hmuh chhuah phah a, ka vanneih zia ka in hre thar leh zêl bawk, "I hria maw a thusawi chu, rawn kal tawh hlek suh" tiin an bula ding zurûi pa chuan ahan ti ve nuah nuah a, "Lo inrawlh suh hmelchhepa" Malsawmi chuan a ti vîn ṭhawt, "I va zak lo reuh e" tiin a ri nghâl chawrh, ka zu hawi thla leh chu Malsawmi lo pai chan chan chu ka zu hmu a,lei ah chuan a tlu nghâl tawp, chupa chuan a pêt zui nia, ka inrin hma chuan step ah chuan ka tlân thla a, "A tâwk tawh" tihpahin chupa chu ka namsawn lawp, Malsawmi chu ka han en a, a mit bul vêl chu alo vûng lâk mai, hnek ve nghâl mai duh mahila buaina lian zawkah ka in tah luh ka hlauh vângin ka khawih ve ta lem lo, "Tunge i nih?" arawn tih pâwr chhur pawh chu ngai pawimawh lo in Malsawmi zawi ngiai chu ka pawm tho nawlh a, stepah chuan ka chhoh pui ta dâwr dâwr a, a lo tê chhe zawk zawk lo bawk nen thau lutuk lo mahse a rit ka ti ngei mai, Taxi lo tlân hmasa ber chu pharin Damdawiin lam ka pan pui nghâl.

Taxi a ka chuanpui lai techuan arawn rûm ṭiah ṭiah ṭhin a, zu rim a nam deuh hak bawk, damdawiin casualty ka pan pui hnu chuan a hliam tenau chauh a neih thû an lo sawi a, a rûi an ti bawk,ka zak ngei mai, hmeichhe zu rûi buaipuiin helai thleng hi ka kal chu nia, nuih luih a har kher takzet, Kiki-i number Hriata ka va dîl a, min pek hnu chuan call nghalin Malsawmi damdawiinah ka hruai thû ka han hrilh a, vanneih thlâk deuhin damdawiin bul lokah chuan alo awm remchâng hlauh, a rawn chhoh nghâl tur thû min hrilh hnu chuan ka dah zui nghâl a, ka pa damdawi lei ṭhulh ṭhakin ka buaipui a nia, mahse buaipui lo ta ila kha pa khân a sawisa na leh zual anga, inthiam lo reng renga awm ai chuan tiin ka thinrim ṭun na techu ka han inbeng dâi chawp a, ka ngaihtuah lêt pawh hian rapthlâk ka la ti,a thinchhiat leh khawngaihna neih loh chhan em em pawh hi ngilneihna te, hmangaihna te, chhungkaw awmzia te zirtir a seilian a ni velo tih ka hrethiam mai, a tawrh ang hi tuar ve ta ila keipawh hi ani ai daih hian ka che khawlo zawk in ka ring, ka ngaihtuahna ka kawm melh melh lai chuan Kiki-i leh a bialpa ni awm tak tehi an rawn thaw chho hlawp hlawp a, "Khawnge Mali chu?" Kiki-i chuan hah hmel fê hian arawn ti a, "Inchhung ah, ngaihtuah awm a ni lo" ka tih hnu chuan engdang min zawt tawh lovin an tlàn lut zui a, keipawh thildang min zawh zui ka hlauh vâng leh ka hmanhmawh tawh êm vangin ngawi reng chuan ka hawsan ta daih a.

MALSAWMI POV

Ka harh chiang deuh chu ka taksa na êr ûr techuan min rawn tur nghâl ut ut mai, ka nâk chu a na deuh bîk, ka mit hnuai chu a a duk ruih bawk, damdawiinah ka lo awm reng a, Kiki-i leh a bialpa Rema te an lo awm bawk, "Engtin nge hetah ka awm?" ka han ti chhuak nghâl phawng a, "I awih lo zâwk ang, Khâ..kan college a rawn lût thar pa khan arawn hruai che lawm, Vannunzira kha" a tih chuan mak ti zetin ka ka ho ringawt, "A mak e, enge thleng reng reng a?" arawn ti zui zat a, "Ka nu pasalin min khawih deuh a, mahse ka ṭha" ka tih chuan, "Kal tawh suh ka tih che kha" Kiki-i chuan alo ti zui zat, ka chhâng lêm lo, Vannunzira mawlh chu ni,engzata tam nge a hriat ang le? engmah kha rawn hre hman lo se ka ti takzet a ni, "Khawnge amah chu?" tiin ka hawi kual ruai a, "Ngawi rengin alo kal daih alawm, lawmthu pawh kan sawi hman ta si lova" Kiki-i'n a tih chuan, "Lawmthu ka sawi nachhan tur ka hre lo" ka lo ti hmak, ani laka lawmthu sawi chu tlâwmah ka la tlat nia, nurse in ka damdawi ei tur inziahna lehkha min rawn pêk pahin kan haw theih thû chu arawn sawi a, Zu in tawh lo turin min ti zui zauh, Kiki-i techu an lo la nui hak zui.

Zing dar 2 a ri tawh, peih lo zetin kan in lian takah chuan ka haw a, ka room lam pan tuma step-a ka chho chu ka pa alo ding rûn mai, ka la phu nasa em em zui, "Ka thusawi kha hre reng ang che, tun semester chu i tih chhiat leh viau chuan pasal ka neih tîr ang che, i attendance pawh ka check vek tawh ang, naktuk class kal ṭhulh chhuan lamin khâ i mit duk ruih kha hmang hlek suh, min ti mualpho tam tawh lutuk" ti hmakin a room lam chu a pan zui hmak a, ka chhâng lo, ka room ah chuan thinrim zetin ka lût a, ka pa nen hian mize in ang tak kan ni a, kan thu hnuaia awm techu kan thu thu in an awm tur a ni tih hi kan thupui a ni, ka pa nuam tih zâwng tak a ni bawk, ka tihchhiat vaih chuan ka kuta hlîng chungin pasal nei tur chuan biak inah pawh min hruai duh mai dawn tih ka hria, khumah chuan mu hnawkin min hring tunu thusawi techu ka ngaihtuahna ah arawn lût zut zut a, ka beng hupin ka hmui ka pet fan fan, ṭap vak ila chu ka thâwl hawk ngei ang, mahse ka ṭap lo, ka mittui erawh ka thunun theih chin bâk a ni a, a tla tho, ka pian hlim khân min lo rêkhlum tak tak zawk se ka tih zia kha, hetianga nâ hi ka tuar kher lo tur a nia.

Zîngah chuan peih lo zetin ka tho a, tûkṭhuan ei lo in ka chhuak hmak, restaurant ah ka inhnawh puar ta ringawt, Kiki-i'n ka awmna dawrah chuan min rawn sawm a, hetah hian nitin ka chawl ziah ṭhin, kan in ah hian engmah ka eiin ka in ngai lo hrim hrim bawk,ka kal peih lo a rin thû techu a sawi siam siam a, a nun hi ka awt ṭhin ngawt mai, engtik lai pawn a hlim reng thei bik a.

College kan thleng chu min lo en duh hlawm leh ngang mai, mahse mipakhat chiah ka zawng, tûk in lah chu a vâng em em lehnghâl, kan inhmuh tirh phat aṭangin hepa hi mak ka ti, midang chu ni se khatia ka tlû kha an in pun khawm anga ka thlâ te la in an theh darh anga,mi mak tak a ni, bakah nizan chungchang kha zawh chian vat vat ka duh takzet bawk.

"Tunge i zawn?" Kiki-i'n arawn tih chuan, ka lo hawi nasa tih ka in hre ve chiah, "Vannunzira i zawng a ni maw? lawmthu i hrilh dawn em ni?" nui ver ver hian arawn la ti zui, "A teuh lo mai" ka lo ti bak hlar ringawt, canteen ah chuan a ṭhian mawl zet zet te nen an lo ṭhu reng chu niin, midang ngaihdan tur pawh ngaihtuah lêm lovin an bulah chuan ka va ding chat a, a ṭhian techuan min lo en phâwk hlawm ngang mai, chutiang bawkin Vannunzira pawn phâwk fe a min en chungin alo ka huau a, "Biak che ka duh, in be lok ang" ka han ti nghâl tawp a, alo hrethiam aniang a tho ve vut, min rawn pan chu a sâng reuh ngei mai, eng sawi set set lo chuan ka chhuak zui daih a, ani pawn min rawn zui chhuak nghal, college park ah chuan ka kalpui a, mi an awm vak tawh lo ta maw tih in ka hawi let thut a, alo la phu zuk zui, "Nizan khan eng zata tam nge i hriat? kan thusawi kha?" ka han ti nghâl phawng a, a hmel dam dap chu engtin emaw ti tak hian hmuh nuam ka ti, ka thlâ ati muang ni mai hian ka hria, "Engkim,mahse lungngai suh, ka zêp tlat dawn" arawn ti a, ani ber kherin a hria chu ka va han duh lo tak, "I sawi chhuah vaih chuan i thi ni mai" ka tih techuan alo nui vur vur duh lek chauh, "Ka uang lo ania" ka ti vîn tuar a, "Sawi chhuak ta ila eng hlawk na nge ka neih ang? hlauthawng suh, thinchhe si" a ti ve hluk, Lawmthû sawi tuma ka kâ ka ân zuau lai chuan a ṭhianpa in arawn ko a, ka chîp leh hmak, "Ka rawn kal dawn" a han ti zui zauh a, "Lawmthu min hrilh i tum a nih chuan a ngai lovang, chuan hlauthawng duh suh" tiin a ṭhianpa awmna lam pan chuan a tlan phei nghâl,mi mak tak chu a ni, "Mawl si" rum zeta melhin ka hriat tâwk lek chuan ka ti sap ringawt.