Viva La Vida chapter-8

[Hluhlutei]

Viva la vida chapter-8
Hlutei Jocund Pachuau

Thla khat a liam hnu thleng pawh chuan ka zirna chu ka la bei ve zel a, ka pa leh Pi Mawii chu la be chhunzawm zelin ka number erawh ka thlak hmak, Kiki-i erawh ka la be tho, Vannunzira chanchin ka zawt ngai lo a, a sawi veleh zauh ṭhin, mahse thu thar vak erawh a nei bik lo a ni awm e, ka mizia pawh a inthlak chho zel a, Kiki-i pawn danglam chak min ti khawp mai, Vannunzira chuan ka chanchin alo zawt ṭhin a ni awm e, mahse tumah hrilh lo turin ka ti tlat thung, ka pa pawh ka be lui hram hram zel a, tunah chuan ngaihdamna nen ka en liam thei tawh, mahse ka laka a thil tihsual te ala hre chuang miah lo, thlakhat chhung leka ka inthlak danglam zia chu amah pawn a hai bik lo, ṭhian thar te ka chhar a, in kan luah dun bawk, ka college kalna chu nuam ka ti tawh hle a, mahse ka graduate chuan ka pa bulah ka haw leh phawt angai dawn si, Mizoram chu ngai viau mahila haw leh ka chak tawh lo takzet a ni.

Exam chawlh a ni tawh a, Mizoram haw chu ka tum deuhna in ka phur hran lo, ka inkhawm ṭhin tih te, ka nunah chuan Pathian a tel ve tawh tih tehi hria se an lawm ve ngawt ang, mahse tlem chuan ka zak deuh, ka thinlung takin ka nui ve tawh a, engkim chu ka thlir dan tepawh dang chho ve zelin pawmthiam dan ka zir chho mek zel a, mahse ka thinlung thuk taka hliam tam tak ka neih erawh chuan rilru ala ti no viau tho mai.

Zanriah tur ka buatsaih mawlh mawlh lai chuan Kiki-i'n min rawn call a rang takin ka chhang nghal vat,

"Mal, ka hrilh lo ang che ka tia, mahse ka hrilh ang che, Vannunzira pa kha kar hmasa khan a boral alawm, keipawh ka tlaivar ve a" arawn ti ta mai,

Min ṭhawng lutuk nge? Chhan dan tur hre mai lo chuan ka melh ngai ka melh reng,

"Amah khan Malsawmi nen in inbia a nih pawn sawi kher lo la, ati tlat a" ati leh a,

"A tuar viau em? A nuam lo e, ka awm lo chu" ,

"Tuar ve ang chu, mahse i hriat kha Nuna chu mi puitling tak a nia, a tuar thiam khawp mai" a ti leh a, a tuar dawn tih ka hria, a chhan chu a pa nen khan ṭhian ang maiin an inkawm ṭhin tih ka hre tawh tlat, Kiki-i nen kan inbe zo chu ka chaw ei pawh a tui tawh lo.

Khumah chuan mu vang vangin Mizoram lama thlawh chhoh chu ka tum ta rum rum a, Rei tak ka ngaihtuah tawh loh hnu ah Vannunzira chu rilru ah arawn thar leh a, kan inbiak lohna a rei ve ta bawk nen han biak leh chu duh viau mahila ka ngam rih tlat lo.

Pi Mawii chu bia in naktuk tlai lamah Mizoram ka thlen tur thu ka hrilh chuan ani pawh alo lawm khawp mai, hreh viau mahila ka bi bo reng thei dawn lo tih hria in, huaisen taka a nih tur ang ang nih tir chu ka tum ta a ni.

Airport ah chuan Kiki-i leh A bialpa khan min lo hmuak a, car in min hruai chho nghal, Kiki-i chuan sawitur ava han ngah malh malh tak em, kawng tluan chuan a ti ti ta char char a, Aizawl kan thlen dawnah phei chuan ka lo muhil daih.

Ka khum ngei ah chuan mu leh ta vang vangin ka chauh em vang chuan ka lo muhil zui leh daih a.

VANNUNZIRA POV

Result ala chhuak lo bawk nen, ka nu a hna lamah a kal tawh bawk si, tih tur ka nei lo chu a rem rem thawkin ka inhlawh ve lawp lawp a, Kan ṭhenawmte insak na ah chuan inhlawh ve in hlawh pawh a tam a, ka nu remti lo chung ka inhlawh ṭhin, pawisa ka mamawh em em vang pawh a ni lo, in a mahni chauha ka pa sulhnu nena awm reng kha ka duh loh vang a ni, bakah tlangvala pum pa lehkha zir bawk si lo, hna thawk lova awm reng kha a zahthlâk ka tih vang chauha inhlawh ve mai ka ni, ka patea fanu lehkha zirin arawn awm bawk a, a ṭawng duh a ka nu nen kan khawhar lutuk pawh a ti zia deuh, Hminghmingi nen pawh kan la in be reng a, mahse ngaihzawng ang ni lovin, ṭhian angin kan in be ve reng, a laka ka feelings kha lak bo in a awm ta daih a, ṭhian anga ka kawm nghal hmiah hmiah chu min ngei thu a sawi fo ṭhin, ka lo duh ngai reng reng lo tepawh a ni mahna le, Malsawmi pawh rilru ah ala awm ve reng, a tan zantin ṭawngṭai ka la ban san lo, mahse khawi ah pawh awm se a ṭha ang tih hi ka ring tlat a, Pathian nei tawh se tih chu ka duhthusam ber a ni, kan inkarah engmah a awm ngai lo a, mahse ka duh lo tihna erawh a ni lo, ka duh tih a awm loh aṭang chiah khan ka pawm thlap tawh a, a mipa duhzawng ka nih loh zia ka inhriat chian em vangin ka thlah zalen a, mahse englai pawha puih erawh ka la duh reng tho mai, a tan ka tling lo tih ka pawm thiam bawk, khawvel hran hlak a cheng kan ni a, mipa tan chuan mahni aia sâng nalh ngaihzawn chu a tlawm thlâk duh zia ṭhiante ka aṭang paw'n ka hre ve fo mai, mahse chumi vang ngawr ngawra belo erawh ka ni lo, ani chu kei Tlangval mawl mang ve tak tam chuan cho rual niin ka hre ve lo a ni.

Chhun chawlh lai chuan kan inhlawhna pa leh kan mistiri Abdula te nen chuan fiamthu thawhin kan nui nasa mai, "Vannunzir" rawn ti tu aw vang chuan ngawi ṭhapin ka va hawi phei chu, Kiki-i'n min rawn bye lauh lauh a, a bula ding chu ka hmusual emaw tiin ka mitchhin deuh sur hian ka han en ṭha leh, ka awih lo lutuk, alo let leh pawh ka ring tawh lo kha nia, rang takin ka pan a, an bul ka va thlen chuan an lo nui hak mai, "Ka mumang chu ni si lo a" tiin ka han insik vel a, "I va han over tak" tiin Kiki-i'n min lo beng, kan han nui leh rih ṭhin, Malsawmi hmel chu ṭum dang zawng zawng aiin a ṭha zual a, a nui hmel nung sar mai chu ka en ning thei lo, "In kuah ve reng reng ula" Kiki-i chuan alo ti zauh, "Ka inhlawh a, hei ka bâl rih emai" tiin ka kuta cement kai techu ka han tuai thuak thuak a, "A ho emai a, Vana" Kiki-i chu alo ti leh hmanhmawh tawh, kuah chu kan inkuah ta em lo, midang inhlawh ve an awm tho avangin Pu Rama chu haw ka dil a, "Vawiin chu ka rawn pui che u ni mai" ka ti ta ngawt, rilru ah thildang lut thei tawh hek lo, "Chawhma hlawh tal i lak loh vin le,tlangval nih chuan hausak angai ania, i bialnu lah kha a hmelṭha in a pian a nalh si, tûnlai ah a sum ngah ngah hi an luck duh a nia" a han ti fiamthu a, a sawi tum chu ka man thiam mai, pawisa erawh la lovin kan in lam kan pan hlawm a, Quarter kan luah kha a hmun nen khan pêk kan ni a, tunah chuan quarter ni tawh lovin keimah ni in tak tak a ni ve tawh bawk, ka inhlawh na hi kan ṭhenawm lok a nih vangin ka pensawm vel chauha in hlat a ni, inchhunga an ṭhut chawlh lai chuan ka han inbual thuak thuak a, ka thil ti reng reng chu ka phûr sûrh sûrh khawp mai, inthup pawh ka tum hran lo, ka kawr duh ber chu ha chhuakin ka chhuk thla a.

"Hawh u leng chhuak ila" ka ti a, an nuih ka ti za ngei mai,

"I va han phûr thak tak e aw" Kiki-i chuan ati deuh hlak a,

"Enge nangpawh chu min attack reng a? Exam dawnah Nuna irawn ti leh duai duai ange" ka tih chuan min bêng zui ṭawk a, exam lai zawng zawng pawn ka pui awl lo a, tih let tham si loh hi a kutthlak ana si.


"Khawnge i nu hi?" Malsawmi chuan alo ti a, "School a kal leh tawh alawm" ti a ka va en chu min lo en ve kar, "Ka tui in a hal" arawn tih chuan rang takin fridge a tui chu ka lak sak a, centre table dawhkanah ka ke zungte u ka la tauh zui, ka tuai zui vawng vawng ringawt, enge ka hriat pawh ka hre lo, ka che buai vek mai, ka hamhaih bawk nen, "Ṭhu teh ṭhu teh" tiin Kiki-i chuan min pawt ṭhu a, tlem chuan ka zak ve deuh a.

Hmuifâng lamah kan in kap chhuak ta nge nge a, Malsawmi nen a hnungah kan ṭhu dun a, Rema'n ngawi rengin a khalh thung, Malsawmi pawh a ṭhu ngawi kar reng mai, Kiki-i nen erawh kan ti ti chho char char a, kan ṭawng kar lakah min lo zawm ve zauh tih loh chu kan chuan pui te pahnih erawh sawi tur an hre tlêm ngei mai,

"Kan ṭhiante dang kan thlim daih sia aw aw " Kiki-i chuan arawn ti a, tlem chuan ka inthiam lo ve deuh,

"Ni e, ka rawn haw tih pawh an hre awm si lova" Malsawmi chuan arawn ti ve a, "A pawi lo, hun ala tam alawm, in la inhmu hne hlei hlui dawn" ka lo ti hmak, Malsawmi chuan nui sak hian min rawn en a, "I vairam awm techu report te han pe la" ka tih chuan, "A rei lo lulai e, mahse a nuam ka ti,Sunday chuan kan inkhawm ve ṭhin a,ka ṭhiannu hi vai a nia mahse Kristian alo ni ve a, a bengchheng thei deuh e tih mai loh chu a lum bawk a, abak chu a nuam ve reuh khawp mai" a han ti siam siam a,

"Mahse i ngeih daih zawk alawm, i rawn no zual top, tlemin i khal bawk a" Kiki-i chuan a ti a, "Nia a mawi tawk chiahin a khal zual" ka lo tih chuan an nui nasa hlawm ngang mai.


Hmuifang tourist kan thlen chuan mi an lo awm vak tawh lo, he lam chu ni asa lutuk lo a, Aizawl ang lo takin khua a dul ruih mai, thlifim a tam bawk a, hah adam sawng sawng mai lawm,

Kiki-i te an kal bo daih takah chuan waiting shed fal deuh ah chuan ṭhu dun in keichu ka ṭhian te chanchin sawiin ka ti ti luam a, ni hawi chi kan chip pah bawk, "I pa chanchin kha ka hre ve chauh a, a pawi ka ti takzet a ni" arawn ti a, "A ho lutuk, mihring techu la boral tur vek alawm kan nih, Pathian remruat hi keini dan ngawt theih a ni hleinem, natna tuar tawh lo turin a hah chawl tawh a, lehlam kawng zawng tak chuan ka hahdam huai mai" ka tih chuan min rawn en vang vang a, a mit meng erawh ala danglam lo, he mit meng hi lawm thla liam ta aṭanga ka ngaihtuah na a rawn lut zantin ṭhin kha,

"Nakinah i nu awm hunah ka rawn ral ve ang che u" a ti zui a, chutiang nachang te a hre tawh chu mak ka ti, Malsawmzuali hi alo danglam tawh takzet a ni, mahse keichuan a nihna ang ang hian ka ngaina reng tho mai,

"A nih ṭhian thar te i zu chhar em?" Ka tih chuan alo bu nghauh,

"Ka chhuk leh hunah chuan tun ai hian nuam ka tih leh zual tawh ka ring" awlsam zet hian alo ti a,

"I chhuk thla leh dawn maw?" Ka lo ti vat, a awm hlen tawh dawn emaw tiin ka lo hlim ve tawh nen, "Aw, awm hlen mai ka duh" ala ti ta deuh deuh, ka thin arawn rim nghal ṭun mai,

" I rawn awm hlen tawh turah ka lo ngai asin " lungawi lo ru tak chuan ka ti zuai ruih a, min rawn en vang vang lai chuan a kutah chuan ka vawn sak a, a lamah chuan tawlh pheiin "Tinge i awm dan chu? Min lo ngai viau a ni maw?" Tiin a nui zui hak a,
"Aw"
Ka tih chuan a nui tawp ta riai riai mai,

"Ka ngai takzet che, hetah awm tawh rawh, ka hmuh phak loh ah awm tawh suh" ka huaisenna zawng zawng sawm khawm chuan ka ti a, "I mawl ami?" Arawn ti ringawt,
"Ka fiamthu lo, ka ti tak tak alawm, fiamthu hmel ka put loh hi"
Tiin ka han hnaih deuh a, a hmelah chuan mak tihna, hlauhthâwnna te arawn in pawlh nawk mai,
"Ka venghim tlat tawh ang che, khawngaihin kal bo tawh suh aw, i laka ka thil tih zawng zawng tekha kei hian ka lo duh reng vang che tih ka lo hre lo a" ka han ti leh a, min chhang ta mai lo chuan hawi sawnin thawk ahan la deuh halh a, sawi sual ka nei emaw tiin ka awm a nuam lo nghal rum rum mai, thu zep ṭit ṭet ka thiamlo a, tlang takin engkim hi ka sawi mai zel, bakah, Malsawmzuali hma ah kher hi chuan zam ve ṭhin mahila amah hian inrin tawkna hi engtin emaw tak hian min pe ṭhin,

"Ngati nge ka kal bo hma tekhan i sawi loh?"
Tiin a tui in na bur ruak ken lai chuan ka lu arawn khawng chawrh, "Nia" ka ti ta ringawt, a hnu deuh ah chuan, "Chuan min lo duh ve reng tihna ni maw?" Tiin phur zet chuan ka ṭhut hnaih leh sauh sauh a,

"Tak takah, Chutiang rilru i pu ang tih ka beisei pha lo, ka sual ropui sia, kei ang techu"

A ngawi ta daih a, thawk ala leh halh, a mittui a hru zui zauh a, a kutah chuan ka lo vawn sak vat,

"Midang te hmuh loh kha nangmah ah ka hmu tlat a, ka hmuh hmasak ber ni che aṭang khan nangmah hnaih thei ang bera awm ka duh tlat ṭhin, hei kan naupan laia hmeichhe duh deuh kan nei a an bula awm phet kan tum ang hian" ka tih chuan a nui deuh hak a, ka lo nui ve tawp, a muttui chu hru mawlh mawlhin "Min duh tak tak a nih chuan ring deuhin min duh thu sawi rawh" arawn ti ta mai, "Enga?!" Ka lo ti hu, "Khi lai deuh ah sawn han kal la, Khi ti lai aṭang khian rawn sawi rawh" a ti nia, ka hnial hreh tawh bawk si nen, ngawi reng chuan ka kal chho ve mai a, amah ka hmu thei chang chang tih ah chuan, "Aw khati lai aṭang khan" a tih velah chuan,
"A zahthlâk e, miin an hria ang'e" ka ti lûng lûng, "Mi hriat chu enge a pawi na?" Alo la ti zui, boruak chu hip lut vakin "Malsâwmzual kei hian ka duh che, Snowball Rabbit hi khawngaih takin min kalbo san tawh suh aw" ka han ti leh ta lung lung a, a nui ri ka hriat chuan ka zahna zawng zawng techu a bo nghal vek nia, "Thu tam tak sawi tur ka nei a, i lakah hian sawi tur ka ngah lutuk, i kawng dal tu nih ka duh loh vang chauha kalbo ka nia sin, nang hi ka tan chuan Vantirhkoh i ni, Vannunzir i lakah khan ka him a, ka tan chuan ka nun chhanhim tu Angel duhawm tak i ni, i lakah ka in nghat lutuk ang tih ka hlauh vanga kal bo ka nia sin, tunah hian ka hlim takzet a ni, hlimna awmzia min hriattir avangin ka lawm e, ka nun chanve hi i tan hman ka duh" arawn ti lang lang a, chak tak chuan tlan thla in a bul ka thlen chuan mit meng sen ram hian alo ding chhuak ve a, ka pawm nghal thlawp, a ṭap tih ka hriat chuan a aia nghetin ka kuah vawng vawng ringawt.

Mi an awm lo bawk a tiin abiang tawn tawnah chuan vuan in ka fâwp thut a, min lo namsawn rang ngang mai, "Miin min hmu anga sin" arawn ti sar sar a, "Tumah an awm loh hi? Awm se chu kan awmdan vang khan an nui nasa ngawt ang" Tiin ka han hawikual vel a,
"Hmaichhanah chuan ka sawi ngam lo a"
A rawn ti a, a lai tih ka hria, ka chêt dan chuan a ṭhawng ve deuh tepawh a ni mahna, kun hniam ka fawp lui leh ta tho a, min lo chhanglet ve tawh, kan han inkuah leh vang vang a, engkim chu a hlimawm vel vek tawh.

Thla techu kan han la ho a, in ngaizawng chu kan ni mai ta chu nia, kan ṭhian te'n hre hlawm se chu mak an ti ve hlawm viau ang.

Haw lamah techuan kawngtluan chuan ka darah beiin a muhîl sâk sâk a, a danglam tawh viau na in a thinchhia erawh ala danglam lutuk lo,

"Ka hlim tawh e, tunah chuan nangni pahnih vang hian hrehawm deuhin ka awm tawh lo ang"

Kiki-i chuan arawn ti chhuak deuh hlawl a,

"Chu ilo hrehawm viau a ni maw?"

Rema'n alo tih chuan, "Tehreng e, hemi te pahnih vang hian ka rilru hah theih zia hi, induh reng si hian an inkawp rem thei bawk si lo a" a ti leh a, ka lo nui tawp,

"Nuna kalbo tir tawh suh aw, a tan chuan a engkim ini tih hre reng la, Malsawmi hun reilote chhunga thlak danglam thei tu chu nangmah chauh i nia, a nunhlui ah khan let tawh lo se ka duh takzet a ni" a ti ve siam siam a, ka thlak danglam a ni pawn ka hre lo, "Amah a in thlak danglam zawk alawm, keima tih engmah a awm lo" ka lo ti ve mai a, a kutah chuan nghet zetin ka lo vuan zui bawk.

In ka thleng ka lût chu ka nu leh Notei chuan mak tih hmel fe hian min lo en a,

"Pu Rama te in sak na ah i inhlawh emaw ka tia" ka nu chuan min en ha chung hian alo ti a, "Chawhma ang chauh ka thawk, Ka ṭhiannu rawn haw a ka len chhuah pui leh daih alawm" ka lo ti liam puat a, fridge a tui chu la in ka in zui khawlh khawlh, "Tu i ṭhiannu maw? Hminghmingi maw?" Ka nu chuan alo ti leh, "Ni lo, kha Ka pa boral hma lok a kan ina ka rawn hruai kha, Malsawmi kha" ka tih veleh chuan rawn tho hluaiin min rawn pan hnai a,

"Enge a an? A damṭha em? Khawnge alo kal bo daih a?"

Ka nu chuan ati nghal mawlh mawlh a, "A zirna chhunzawmin vai ramah a awm daih alawm, tunah techuan nun pangngai tak a hmang tawh, a sam pawh a ṭial tawh lo" ka lo ti zung zung a,

"A u, i bialnu mi chu chu?"

Notei pawh chuan hriat chak hmel zet hian arawn ti a, "A nih tepawh niang" nui vur vur a tiin inchung lam ka pan san ta daih a.

[Hluhlutei]

CHAPTER-9
VIVA LA VIDA

MALSAWMI POV

Ka pa thusawi chu engtia han dawn sawn chi nge pawh ka hrethiam lo,

"Kha pa bawk kha tiraw min neih tir i tum chu?" Tiin ka pa chu rilru na zetin ka en a,hmana min pawngsual tum tupa kha a nih chuan ka tlanbo leh duh tak tak ang.

"Ni lo e, ani chu midang mawle, a fel khawp mai, a hma ami ang kha chu a ni lo" alo ti ve mai a, Pi Mawii nen chuan kan in en ralh ralh ringawt, "Ngaihzawng ka nei asin" ka lo ti ve a, ka kum a naupang tawh lo bawk a ka sawi hreh hran lo, a chaw ei tur chu chawl datin min rawn en a, "Eng ang mi nge?" Arawn tih chuan chhuang takin ka nun chhanhim tu a nih zia te, a pa chu Pastor niin a boral tawh thu te, mifel tak a nih zia techu ka han sawi mawlh mawlh a, hmanzana min chhanhim dan tekha Pi Mawii pawn phur zetin alo sawi ve bawk, ka pa chuan engmah sawi zui tawh lo in a haw tlai tur thu sawi chuan a chhuak ta daih a, mahse Vannunzira chanchin ka sawi erawh ka thaw huai mai.

"Vawiin enge i tih dawn?" Tiin ka va call a,

"Ka in hlawh leh ang" zang vah hian arawn ti a, tlangval in fit tak leh tha tho ṭha tak tan chuan in a awm chu a hne awm duh viau ang le,

"Ka lo kal zuai dawn?" Ka tih chuan a phallo nasa mai, mahse kal chu ka tum lui ta tho a, phur zetin Pi Mawii bulah chuan tlan thla in tiffin min siam pui turin ka ngen a, ka thiam ang tawk chuan ka siam sak ve, Mizo Bai siam dan techu min zirtir a, Artui leh sangha leh Ka bai siam chu ka ken sak a, a ei duh zawng ka hre bawk si lo, Car ken ka tum ûk a, midang te hmuh a hausa ber ang maia awm vel kha ka duh loh vangin kan driver scooty chu ka hawk sak a, a ai ah ka bike chu ka kawl tir ta ringawt, phur tak chuan a hnathawhna lam chu ka pan a.

Ka thlen chuan dar 12 alo pel hret tawh, ka thleng tawk hle bawk, Kiki-i nen parlour a kal kan tum vangin ka inchei ve si a, nuam lo atih erawh ka hlau rilru ngei mai, chutah a hnathawk lai chu ka en ta reng a, phur zeta cement alo chawk turh turh ka hmuh chuan ka nui sak, hlim hmel a pu reng a, fiamthu a thawh pah reng bawk, a fiamthu ah chuan a thawhpui Vai leh mizo techu an lo nui nasa mai, hetiang mipa zunah hian ka uai hi tun thleng hian rin harsa ka la ti reng, ka pa bula a chanchin chhuang taka ka sawi thei techu ka lawm a, dawt tel miah lo a nihna zahawm ru tak, puitling leh khauh tak chu, Tuarna phena ka malsawmna dawn chu Vannunzira ka tawng hi a ni ngei ang, ka duh mai ni lo in, Ka hmangaih takzet tawh in ka hria, nge ka lo hmangaih sa reng zawk pawh ka hre lo, thil hi alo thleng zung zung a, mahse a hlimawm zawng hlirin a ni thung.
Chutah a thawhpui pakhat chuan min rawn hmu in Vannunzira chu a han kheuh zauh a, ka awmna lam arawn hawi chho chu ka kut ka lo vei zauh a, midang ho chuan lo hrethiam in, "Chawl ang u, hei chaw chhun ei a hun tawh alawm" an lo ti a, Vannunzira tha tho zetin arawn tlan chho zui bawk.

"Rawn kal suh ka tih kha" alo ti nghal,

"Hei thil ka rawn ken sak che a" tiin tiffin ka siam sak chu ka pe a, lak a tum úk a, a kut alo paw ang reng si, "Kan in ah phei ang, Bawihtei chiah a awm" tiin kal a tum chu a kutah chuan ka vuan lui a, "I nalh ropui sia i kawrah tekhan a kai ange, bakah hei min en duh teh ania" alo ti a, a kut lianpui chu ka hûm lui lui ta tho,

"A ho emai" tiin ka kai lui ta tho a, a hnathawh ka zahpui lo a, Ka bialpa a ni chu ka chhuang hliah hliah zawk, thei ngat ila chu Tlangau phi khawp hial a ni ka duh,
an in kan thleng chu tleirawl pakhat hi lo awm in, min en duh ngei mai, "Ka nau a nih hi, lehkha arawn zir a" a ti a, a kut chu sil in tiffin chu a hawng zui rak rak a, "Nangma siam vek maw?" Awih loh hmel fe a arawn tih chuan,

"Ni e, enge?" Ka tih chuan min chhang lo, a ei zui mial mial a, "Enge a an?" Min chhan hun nghakhlel tak chuan ka lo ti a, "A tui lutuk, mahse sangha hi ka ei lo a" a rawn ti a, a ei duh zawng engmah hre lo khan ka keng ve ringawt kha nia, "A u hi maw, Sangha a ei duh loh nachhan chu maw, a ruh a thian peih lo a" a nau in alo tih chuan kan nui zui hak.

"Nangma siam a ni tak tak maw?" A ti leh ṭhin,

"Ni tak tak e, enge min zawh reng a?" Ka lo tih chuan, ala awih hmel loh kher mai, hepa tak hi chuh, "Awih lo top rawh" tiin thinrim zet chuan ka ṭhu tau ta hmak a, "Ka awih alawm, thinrim lo la" tiin ka biangah arawn piai a, "Foundation ka inhnawih ania" tiin min piai na chu ka lo tuai thuak thuak a, "Ei vela, i rawn keng hnem ropui sia, ka puar lutuk hi hna ka thawk theilo ang'e aw" a tih chuan ka puar tawh thu in ka lo chhang a,

"Kiki-i nen parlour ah kan kal dawn a" ka tih chuan,

"Haw har lo la, zanah ka lo leng ang" a ti a, a thusawi chuan min ti lai leh ringawt tawh, in hrechiang sa tho kan ni na chungin a bula ka laih hi ala reh theilo, bialpa dang ka neihin hetiang hian ka awm ngai miah silo a, a chaw chu a ei chak ka van ti tak,
"Ei muang deuh la" tiin tui ka lo pe a,
"A mak a nia, helh âwl âwl khawp hian a ei rang a" a nau bawk chuan alo ti leh tawh, a rawn helh ta ngei a, tui a in lai chuan a hnungzang ah chuan ka lo beng thak thak thung,
"Ka ei muang thiam lo lawm"
Alo ti ve mai a, 'Thil ei chak deuh hi chu an rilru chak tlangpui' an tih kha maw,
"Parlour ah chuan engmaw in tih dawn a?"

"Kan kal vel mai mai ang, ka sam tehi tan ṭhen ka duh a" ka tih chuan a thil ei lai tawp meuh hian min rawn en a,
"Tikhan i inhmeh ber, chuan hei hi i mamawh lo bawk" tiin ka mit a eye shadow rawng uk lam ka hnawih chu arawn kâwk a, ka lo nui top,
"E...a u chu i van in ti thu tak" a nau bawk chuan alo ti leh tawh, "I ninawm, i room ah kal raw...." Alo tih chuan a nau chuan a lei chhuah khum zauhin room lam chu a pan zui daih a,
"I nau chu avan duhawm em em" ka tih chuan chek hlakin a lu alo thing,
"A thiam thei lo lutuk ber hi ka buai, a rilru chak lo lutuk a" a tih chuan, "I rilru ang vek kha kan nei hleinem" ka lo ti a, nui suk hian min rawn en, "Khawi i kal hma" tiin ka hma zawnah chuan a hmui arawn dawh a, a hmui chu na vak lo in ka lo ben sak, a phu nasa em em zui, "I mawl ami?" Ka lo ti a, "Enge tuman min hmuh loh hi?" Awlsam zet hian alo ti leh tawh, "Chu pawh ni se, chhun pachangah lehnghâl, a zahthlâk duh....." Ka sawi zo hman lo, ka inrin hma chuan min rawn fawp lui ta tho a, ka dang hran lo, rei vak lo hnu ah min thlah lehin, "Ti kha chuan i kal ka phal tawh e" tiin min rawn fawp nawn leh,
"Bawihte eitur ka rawn lei a nia" tih ri ah chuan ka va han in la hrang chiang tak, Vannunzira tho zawkin min hnungchhawn zui a, keipawh ka lo ding hluai,
"Ehe!! Ilo leng elaw?" Tiin Vannunzira nu chuan min rawn pan a, a chawhmeh khai chu ka lo khai pui vat, "Aw hei ka thilsiam ka lo tem tir chhin a" tiin aw khur lek lek chuan ka lo ti a, Chutah Vannunzira chu aw thian kharh hian, "I van rawn haw hma ve?" A nu chu alo la ti zui,
"Ka rawn ti buai che u ni maw?" Tiin a nu chu a han nui hak a, kei erawh ka zak lutuk chu ka hmai asa nghal hut hut mai.



Kiki-i nen chuan kan inzui loh na a rei tawh bawk a, kan bazaar dun nghek,

"Mal, ka ngaihtuah a Vannunzira bialnu hlui Hminghmingi kha keichu ka khawngaih reuh top, A pa aboral tekhan a bulah a awm chawt a, Vannunzira tan khan a in pe zo asin aw" a han ti leh a, keipawn ka khawngaih ve takzet a ni, an inkarah ka lo inrawlh ve khanglang bawk nen,

"Nia, awm lo ila chu an inkawp leh mai awm sia"

Ka lo ti chuai raih a,

"A...an in kawp lo ang, Nuna hian a duh thei thlawt lo ni berin ka hria, mipa hi chu engmah hi an sawi ṭha duh lo ṭhin a, duh loh nachhan ṭha tak tepawh alo nei maithei sin" a ti leh a, tlem chuan ka inthiamlo lutuk pawh ati zia ve deuhin ka hria.

Zan riah eikham thleng chuan ka pa chu alo la haw lo a, a bialnu bulah a riak leh dawn tepawh a ni mahna, khuma ka mut mai mai lai chuan ka phone chu a rawn ri ral ral a, "Ka rawn thleng, in security hian min melh rum thei teh mai nia" arawn ti a, phur zetin ka chhuk thla nghal.

Pawnah chuan fai var hian alo ding a, hna a thawk tho sia hepa hi chu a thu ve theilo reng reng, "Lo lut la" tiin ka kai lut a, ka room lamah ka luh chho pui nghal daih, balcony ah chuan ṭhu dun in Ka guiter chu a perh chhin vel a,

"Ila zai ngai em?" A rawn tih chuan ka lu ka lo thing ringawt, ka zai lohna chin pawh ka hre tawh lo,

"Zai la" a tih chuan, "Hla thiam pawh ka nei mang tawh lo" ka lo ti daih a, Guitar chu dahin a darah chuan ka lu min nghah tir a, "Engtia awm zel nge i tum?" Ka han ti a, hma hun sawi dun hi kan la nei miah lo bawk, "Ka la hrilh miah lo che ni maw?....Eng lo...ka pa khan a boral hma khan Bd zir turin min tia, Pastor ni ve turin min duh a ni awm e, a dam ṭhat lai khan a sawi ngai miah lo a, a thih dawn meuh chuan a sawi chhuak ve a" ati a, a awm lo hran lo e, ama nun nen pawh a inhmeh viau alawm, "Chuan i zir dawn ta em?" Ka lo ti vat, "Zir chu ka duh a,mahse ka nu hi ka khawngaih ve deuh a" tiin ka kut chu a khalh niap niap a, ngaihdan han siampui dan pawh ka thiam velo, ama duhthlanna nih chuan engtin pawn awm se keichuan ṭha ka tih pui vek mai.

A mal chungah chuan min ṭhuttir in inthlahlel tak chuan kan inkuah vang vang a, "A nih nang? Engtia awm zel nge i tum?" Arawn ti veleh, "Ka hre lo, ka pa hian pasal nei turin min ti leh tawh a" ka tih chuan a rawn ṭhu ngil zawk a, "Hman ami kha maw?" Awki sang sang lek lek hian arawn ti, "Ni lo e, midang zawk mawle, mahse i chanchin ka hrilh a, engmah chu ala sawi rih lo" ka ti a, a hmel a ngui nghal ringawt nia, "Makpa atan ka tling dawn lo ropui mai sia" arawn ti a, ka lo nui hak, "I tling ber zawk alawm" tiin a biangah ka lo piai zauh, ka kawngah nghet zetin rawn kuahin ka hmui ah arawn fâwp leh vang vang a, ka nghawngah muangchangin rawn fawp lehin a in la hrang zui daih, "Hetiang reng chuan ka insum theilo mai ang" tiin thawk ala zui halh a, keipawh ka tho zui vat, "Mipa vetho ka ni tih i hria tiraw?" Arawn ti a, ka lo bu nghauh, keilah chu dang tur ka nih laiin ka lo dawh vel mai mai sia,a ruk chuan ka zak leh hnu hnawh kher mai, "BD ka zir chhuah veleh ka interview anga, ka tlin hlauh chuan rei rial lovin kan innei daih dawn nia" arawn ti a, lawm takin a bulah chuan ka ṭhu nghal, "Mahse zir i tum leh tum loh i hre bawk si lo a" ka tih chuan, "Ka zir lo a nih chuan MCS tepawh ka try ve ang chu" alo ti a, a thiam thei a, a rilru a chakin a fing ru fu bawk a, ahma hun hi ka hlauhthawn pui chhin lo reng reng.

A haw tur ka thlah chu ka pa pawh arawn thleng ve hram a, zu rim arawn nam a, rui chhia erawh a ni lo, "Chibai le Sir" alo ti vat, ka pa pawh a bu ve nghauh mai, "Kan college ah i kal ṭhin elaw?" Ka pa chuan a ti a, a be ve chu a mak zawk, "Kal ṭhin e, Malsawmi te nen hian batch khat kan nia lawm" Vannunzira chuan alo ti ve a, "A ṭha e" tiin ka pa chuan room lam a pan zui daih, a awm dawmin thawk ala zui hawk, ka lo nuih nasa mai, "Kan principal a ni kher a, ni lo se chu ti em em khan ka zam lo ang" a ti a,

"A be ve che kha lawm hle tache, keipawh min be ṭawk a nia" ka tih chuan, "Vannunzira ka nih hi" tiin inti thei tak chuan a hmel chu arawn siam danglam a,ka lo nui hak ringawt.

Ka chalah chuan rawn fawp vang vang in a helmet a siamṭha zui nauh nauh a, "Chal a infawh hi a awmzia i hria em?" A ti a, ka lu ka lo thing, chutiangin awmzia a nei tih pawh ka hre ve reng reng lo, "Ka ta ini, engpawh thleng se ka venghim tlat ang che' tihna", inti thei zet hian ahan ti a, "A naupang chhia emai a" ka lo ti ringawt, a rûk tak chuan min ti hlim veng veng tho mai.

"A nih ka kal aw, ka thlen veleh ka lo bia ang che" a ti a, a tlan chhuak zui nghal, ka ruak nghal huai mai, ka awm dan chu ka hrethiam lo, inchhunga muangchanga ka lut leh chu ka pa choka ah alo awm reng a,

"Kha tlangval kha maw i ngaihzawng i sawi chu?"

Alo ti a, pan hnaiin ka lo bu nghauh,

"Pasal nei turin in ruahman zawk rawh, ngaihzawng neia theu leu kual mai mai tawh lo in" arawn ti leh tawh,

"Ka sawi tawh kha, pasal ka nei dawn a nih paw' ani lo kha chu neih ka duh lo, a hma ang kha ka ni tawh lo" ka lo ti ve hlak hlak a,

"Enge an chhungkaw khawsak phung?" A rawn ti leh,

"Chu chu a pawimawh ber lo" ti hmakin tui ka la a, ka room lam panin ka chho zui hmak.

Engti kawng mahin ka pa duh min thlan sak ka nei lul lo ang, bakah, a thu ka awih vak nachhan tur hi ka hre lo, coaching class kal turin online chuan ka inziak lut ve a, computer class kal pah ka tum bawk, hna ṭha tak keipawhin ka thawh theih awm tawk ka nei anga, ka pa hausakna tello a khawsak theih chu ka duhthusam ber a ni tawh.

VANNUNZIRA POV



Malsawmi nen kan inzuina pawh thla dawn alo ni ve ta, keipawh BD zir turin ka inbuatsaih pah reng a, ka rilru leh thlarau Pathian tan ka hlan fo ṭhin, Malsawmi nen kan inkar chu inṭhianṭha sa kan lo ni bawk nen a romantic hranpa lutuk lem lo, ka hmingpum ngatin min ko a, "lo kal rawh" a tih tawh chuan kal ngei ngei angai, lui a kan kal ṭum pawh in tui ka hleuh thiam leh thiamloh a hriat duh vangin min namthla top duh a nia, a mizia chu a pianpui ania ka hrethiam zel mai, mahse thlalak ka thiamloh ṭhin em vanga ṭhian te zinga min hau hrep zel chu nuam lo ka ti ve ṭhin, tunah rih chuan ka ngam lo hle tih hi zep rual a ni lo.

Khua a lum bawk a ka inkhawm bang chu ka chau hnawk mai, chutah ka phone arawn ri a, "Hlim en park-ah kal ila, ala tlai chuang lo a" Arawn ti nia, thlalak arawt leh ngei dawn tih ka chiang, peih lo zet chuan "Awle,mahse motor keng la, ka chau emai ka khalh peih lo" ka lo ti a, alo rem ti ve mai, ka nghah lai chuan ka lo muhil ta daih a.

"Tho teh, ngati nge ilo mut daih a?" Ti a min sawi nawk nawk tu vang chuan ka harh zawk a, ka hma a ding chu ka bialnu a nih hi ka la ringhlel ṭhin, puan a bih ve ngei a, thlalak ah chuan hmu tawh tho mahila a takah ka la hmu miah lo, pheikhawk sang a bun bawk a, min chen thuak nia, "Ti hian kal ang" a ti a, ka nu pawh alo nui top, peih lo zetin ka tho a, ka mit ka nuai zui nauh nauh,

"I van inhmeh ve a" tiin asam chu ka han tuai a, "Chutiang sawina hun a awm lo, kal ang" tiin min pawt tho lawp a, hmanhmawh zet chuan kan inzui chhuak ve nghal.

[Hluhlutei]

Viva La Vida

Chapter-10

Nula tlangval leng ve techuan room an lo book vek a, khua a lum bawk nen vawiin zet chu nuam ka tilo ru kher mai, sawi erawh ka sawi chhuak duh lem lo,

"Ka ke hi a na tawh e" tiin a ding dat a, a pheikhawk chu a sang bawk em a ni, "Saw lai ah sawn ṭhu ila" tiin ka hruai phei a, kan ṭhut vang vang hnu chuan a ke chu ka hmeh sak a, inti thei tak hian alo nui var var mai, thla techu min han lak leh rih a, midang lo awm ve ho chuan min en duh hlawm si, zak ru viau mahila a hlimna nih chuan tiin ka tilui mai zel,

"I pheikhawk kha phelh lok teh ka lo bun" arawn ti leh ta, "Enge ka bun anga?" Ka lo tih chuan, "ka pheikhawk hi lo bun lok mai rawh, hmanhmawh ka zun a chhuak a nia" arawn ti a, lungawi lo ru zet chuan ka phelh ve mai a, lo bun nghal rawk rawkin zun in lam chu hmanhmawh takin a pan zui nal nal a, chutia pheikhawk sang bun a ka lo ṭhu chu midang min rawn kal pel tu techuan min en zuiin min nuih tet tet mai, ka zak lutuk chu hawi pawh ka hawi chhuak ngam lo.

A rawn let leh chuan ka nui thei tawh lo, ka lo ṭhu ngawi deuh tawp a, "A nuam e tiraw?" Arawn ti, a hlim hmel chu hmuh nuam ka ti tho bawk si,

Ka pheikhawk chu min rawn pe in, a pheikhawk bun in a nawhna a ke zungṭang lo sen ṭan ṭan ka hmuh chuan ka khawngaih tho bawk si, "I pheikhawk kha khai la" ka tih chuan, "Ke lawnga kalna chi nih loh hi" arawn ti a, "Khai mai mai teh" ka tih takah a khai zui ve mai a, chutah a inrin hma chuan ka pawm ta nawlh, alo ṭe ṭhat zui, ka rin aiin a rit zêk lehnghâl,

"Ka tla dawn nia" arawn ti ruai a, ka chhang thei lo ṭan ka lo pe laklawh tawh nen, lodge varanda ah chuan ka nghat thei hram, ka bân tha chu rit chawi zo tih takah ala khûr der der zui, chutah mipa khat hi rawn chhuak in,

"Room in hmang dawn em ni?" Arawn tih chuan kan hawi phâwk dun nasa mai,

"Aih kan ding rih mai mai" Malsawmi chuan alo ti vat a, ruah arawn sur zui, "Lo book ula, AC pawh a awm asin, a darkar pawn a book theih a" ala ti ta deuh deuh, chutah min rawn en in, "Ala hma tho a chawlh hahdam pahin darkar hnih vel book ila, AC hnuai ah ka awm chak e" arawn ti a, "A pawi hleinem" ka lo ti ve mai, lum uap churh siin ruah a sur tho bawk nen pawi ka ti hran lo, pawisa chu pek a tum viau na in keiman ka pe ta zawk a, darkar hnih chiah chu book in room kan lut chu alo lian lutuk lo, a faiin a nuam tawk viau mai, TV leh Fridge alo awm a, juice intur leh tui intur alo awm tel hlauh bawk, Malsawmi chuan AC chu alo buaipui nghal bawk, Maaza vawt tak chu in dun in Ac hnuai ah chuan kan ṭhu dun ar ar a, "Khumah sawn ka mu chak e" arawn ti leh tawh, "Va mu la, ka lo veng ang che" ka tih chuan phur takin ava mu vei thân a, ka juice in lai chu keng pheiin a bulah chuan ka ṭhu thla ve a, inchung lam en in alo la ngawi vang vang,

"Ka pa hian pasal min neih tir luih tlat lo tum ta se engtin nge kan tih ang?"

Arawn ti chhuak hlawl a, a hmel chu ka en vang vang,

"Ka hre lo le, tinge? A mit ka tlung vak lo a ni maw?" Ka tih chuan, "Ka pa rilru hneh thei tur chuan mi hausa leh thil ti thei i nih angai, mahse chu chu ni turin ka duh chuang lo che nia" tiin min rawn en a,

"Min ru bo daih ngam angem?" Arawn ti leh,

"Chutiang lam ngaihtuah lo la, hlim deuhin awm rih ang"

Tiin ka thiam ang ang chuan ka lo hnem a,

"I awm dan hi a tawp thleng min thlenpui i tum lo ni a hriatna ka nei tlat zel" tiin arawn tho a, thil a ngaihtuah kual vak vak zel hi min mawh chhe leh top zel, vawikhat pawh a mumangah ngaihzawng dang ka lo meih vangin min thinrim khum ringawt tawh bawk.

"Chutiang a ni hleinem, ka hma huna ka tih tur ka sawi lawk ve thiamlo, a taka ka tawn phawt loh chuan" ka tih chuan a kun leh lap tawh, "Thil ho deuh deuh ngaihtuah vak vak zel lo la, tun hi a pawimawh ber" tiin ka kuai dâk a, a hmui ah chuan ka fâwp zui vang vang, ka duhdan ni hauh lo in nidang zawng zawng aiin ka duh thaw a, a awm bawr ka ṭham chu alo îp deuh zawk, in la hrang vatin "Ka zun a chhuak" tiin bathroom lam min pan sawn ta daih a, ka nui hawk ringawt, mipa vetho ka ni a, ka hmeichhe duh em em, nalh zet bulah hi chuan humsual ka dai har lo top ang ka rilru chuan ka ti nauh nauh a, ka rilru chuan ka ṭawngṭai ta top, a rawn let leh chuan ka mal chungah rawn ṭhu in, a kawngah ka lo kuah zui a, "Nidang i ang lo hle mai" tiin a nui sak,

"I duhawm em a ni" ka tih chuan a sen leh ṭan ṭan tawh, a hmui ah chuan fawp leh vang vangin khumah chuan ka nawr mu a, a nghawng chu ka fawp uluk kher mai, "I awm dan hi a dik miah lo ania" aw khur dar dar hian arawn ti a, a nghawngah chuan ka hmai phumin thawk ka la zui ham ham, tho chhuak leh vatin ka inthing deuh nawk a, sana ka en chu ka book zat alo la ni teuh silo, rawn tho ve in a insiamṭha zui sat sat a, a insiamṭhat lai chuan ka va fawp leh, mahse rei min fawp let lo in alo in la hrang thuai a, a tho zui daih, "Ka tihpalh" tiin ka han hawi chho a alo nui sak, "A pawi lo, ka hrethiam che lawm" a lo ti mai a, nidang aiin a hmel techu ka hmu ṭha zual, a sam rimtui chem chem te, a vun mam nalh tak rim thlum veng veng techuan min hip vel vek,

Tichuan kan book zat thleng chuan ka insum quit thei ta hram a, kan haw kawngah techuan ka ṭawng tlem ta lutuk chu min rawn en leh zak zak ṭhin,

"Nuam iti lo mi?"

Arawn ti chhuak deuh hlawl a,

"Ti tehreng e, i bulah hi chuan a nuam mah mah zel" ka tih chuan a nui hak, a hmeichhia zawkin a khalh reng chu nuam ka tih chiah loh vangin ka khalh chhawk ve a, a ke a hlang chho nghal, a ke chu a nalh kher mai,

"I ke a na tho sia khatianga sâng techu bun loh mai tur a nia" ka tih chuan,

"Kiki-i'n bun turin min ti tlat alawm" alo ti ve mai a, ka kut leh lam chu a mal chungah chuan ka va dah a, ka kut chu lo la sawn vatin alo hûm zui vang vang mai, "Hetia kan pahnih a kan awmdun reng a, i awm loh chiah hian ka ruak huai zel" arawn ti a, car khalh pah chuan ka lo nui suk, "Min ngai nghal ringawt zel a ni maw?" Ka tih chuan, "Ka hre bik lo, ka sawithiam dan berah chuan, keimah hi ka keimah lo" arawn ti a, ani pawh a nuih aza niang a nui ve hak,

"Naktuk zan kha ka pa Birthday a nih kha aw ilo kal ngei ngei angai dawn nia" arawn tih chuan ka huphurh nghal kher mai, "Ka rawn kal ve kher a ngai em ni?" Huphurh ru zeta ka tih chuan, "Aw sawm tur che in min tia, bakah, ka pa nen pawh kan inkar aṭha chho ve zel a, tunah chuan pafa ang tak tak khan la awm lo mahila, a nih ve duh hmel tawh lutuk,hun serh te i hmang anga" a rawn ti a, "Thil pek pawh a phut hran lo a nia aw, rawn kal top la, i kawm anga, i ṭawngṭai anga chu zawng chu ni mai" a tih chuan "Awle,a rilru hneh ngei ngei kan tum dawn nia" tiin ka lo ṭawng thlamuan a, mahse ka chhungril takah erawh ka huphurhin ka zam takzet a ni.

In kan thleng chu Malsawmi pawh rawn lut kawi tawh lovin a haw tlang a, Zanriah ei lai chuan "Bawiha hei in tlangval ve tak tak tawh a, kum 25 in tling ve tawh a, ka sawi duh chu, i tumah chiang la, Malsawmi nen pawh thianghlim taka in inkawp hi ka duh takzet a ni"

A rawn ti a, ka lo bu ve nghauh, nichin ka awmdan hrethiam ang zia zanga aṭawng chu nuam lo ka ti rum rum mai, A him chin zela hmangaihna tihlan hi keipawh ka duhdan vetho a ni, vawiin tlai erawh ka insum zo lo teuh hle thung,

"Naktuk zan hi a pa piancham ania, kal turin min sawm ve a"

Ka tih chuan, "A ṭhat hlauh chu mahse Bawiha ka hlauthâwng a ni, Malsawmi chu nula fel leh rilru ṭha tak ni mahse keini cho rual a ni dawn em ni? An khawsak alo sâng bawk nen, i natna tur mai mai a ni ang tih ka hlau khawp mai" ka nu chuan a ti a, ka chaw bar lai ka tâwp chat, chutiang chu ka ngaihtuah thleng duh ngai lo, tun hun zel hi keichuan hlim taka hman ka duh a, hma hun tur ngaihtuah vak vaka inti lungngai chi ka ni lo bawk nen, mahse ka chhungrilah erawh nuam tih lohna in ka khat ru ve fo mai,

"Nute, lungngai lo la, U Mali hian a duh êm hi, a u tan chuan engpawh a tih duh ka ring, a hmelṭha si" Bawihtei chuan alo ti ve a, "I hre ve mawni" ka nu chuan alo ti, kan nui ta ringawt.

MALSÂWMI POV

Zan ka inkhawm chu min lo be ṭha hlawm hle a, a nuam pawh ka ti chho ve zel a, mahse ka ṭawngtam lutuk ngai lo, mi hi ka nel har hrim hrim a,bakah an bulah chuan ka duh ang hian ka awm thei ngai lo, an sual vang erawh a ni chuang lo,

Ka inkhawmna thlalak techu ka va thawn thlap a, ka inkhawm apiangin ka thlalak hi min dil ziah a, zan mut dawnah a lo len loh phei chuan min rawn video call ziah bawk, phone aṭang chuan kan inbe ngun lem lo, zingah morning leh, zan lama in call zeuh a ni mai, ṭul bikah lo chuan kan in be khat viau a, mahse biak hmasak erawh ka chang ngai lo thung, a tawk te a mi care dan a thiam a, ngaihzawng la nei ngai lo ah chuan Vannunzira hi chu a zei viau bawk, a bulah chuan naupang chhia ang mai hi ka ni ṭhin, hetianga awm hi ka duh hauh ngai lo, mahse ka tum lawk pawh ni lo hian min care na leh min duat ṭhinna tehian min ti pangchang lo thei ṭhin lo a tin ni, tunah chuan hmeichhe tam tak an bialpa te bula an han pangchang vel ṭhin hi ka dem talo, in la cute erawh ka ni ngai chuang lo.

A message tur ka type lai chuan min rawn call a,

"I haw tawh em?"

"Hei ka haw mek, enge ni ta?"

"Ka lo leng châk a"

Arawn tih chuan ka nui hak,

"Mmm...Ka pa awm lo lo leng rawh, Delhi ah a kal a, naktukah chauh alo thleng dawn" ka lo ti a, kan in biakna chu ti tawpin a rang rang chuan ka tlan haw zui.

Sana ka en chu dar 9 alo ri ṭep tawh, room ah chho in ka inthlak zung zung a, vawiin ah kan inhmu tawh a zanah chuan arawn len peih tawh pawh ka ring lo sin le, ti rilru ka inthlak nui var var reng mai.

Pawna ka lo nghah lai chuan scooty hian hmeichhe pakhat hi arawn phur a, ka nui hmel chu ka va han tâwp chiang tak, kan in thlanga Private hospital lam chu an pan ta daih a, min hmu ve lo bawka tiin ka lo thlir ta reng, ka lungphu a su nghal dup dup a, ka hriatthiam loh hian ka chhungril chu a muang lo takzet a ni, rei vak lo hnu ah chuan arawn let leh thuai a, gate chhungah chuan tlan lutin arawn lut tur min tawk thut chu alo phu nasa em em zui.

"Min ti phu nasa lutuk" phâwk hru hian alo ti, kei erawh chuan inkuangkuahin ka lo enkar thung,

"Enge?"

Tiin min rawn pan hnai a,

"Tunge a, i rawn phurh kha?"

Ka tih chuan min rawn en vang vangin, "E...U Shelly nih kha, kan ṭhenawmah hian in arawn luah thar ve a, emergency in a duty lok dawn nih kha nurse ania" arawn tih chuan, chhang lo in ka lut ta daih a, min rawn zui lût ve nghal.

Ngawi reng chuan kan inzui lût a, Pi Mawii chuan "Thingpui in duh angem? Nge thei engemaw eitur?" Alo ti nghal, "A ngai lo mai, ka lawm e" Vannunzira chuan alo ti a, "Hei ka han thlem lungawi lok ang'e" tiin ka room lamah chuan min nawr chho ti tih a, ka room ah chuan min nawr lûtin kawngka a khar ri rak hnu chuan ka hnunglam aṭang hian min lo kuah nghal, "Khatiang mai maiah thinrim lo la" tiin ka nghawng zawnah chuan arawn thaw lum ham ham a,

"Ka thinrim aw zawng lo e aw" tiin min kuahna aṭang chuan ka in la hrang zui vat, khatiang vanga thinrim nih ka duh lo na chungin a rim takzet a ni.

"A nih, zan in chu ka chau lutuk a,min kuah la, ka dam hawk ka ring" awki hniam ruih hian arawn ti a, sir lam en in ka lo la tûm deuh hmak, "Min en tehhh, ka chau teh mai nia" ngen ngawl zeta tiin amah en thei tur chuan min kuai her a, "Ngati nge i chauh vak a?"

Ka lo ti ve ta nge nge a,

"Ka thluak ka hmang nasa lutuk a, ka ngaihtuahna ka hmang ve reng a" arawn ti a, a mit meng pawh a val raih mai, vawiin khan tinge maw ka lo hriat loh le? A chau chung chung kha ka lo hruai chhuak chu ni sia, ka inthiam lo rilru leh kher mai,

"Khawi le, min han kuah vang vang la ka dam mai ang" tiin a ban arawn phar a, ka lo kuah ve vat, a taksa lian zeta han bei thlawp chu keipawh ka thla a muang veng veng mai,

"Mali"

"Huhh!?"

"Ka hmangaih che"

Awki hniam ruih hian arawn ti a, ka lungphu chu ka duh aiin a rang, chhan mai dan tur pawh ka hre lo, min kuah na chu thlah rih lo se ka ti, a hmel ka en ngam lo, ka zak bawk si,

Ka hlauh ang ngei chuan min thlahin ka chalah chuan arawn fâwp leh vang vang a, rawn kun hniamin hnai zetah hian min rawn en a, ka lo hawisawn vat, a nui hak rí ah chuan ka lo chhing sawk thei, ka lai chhe vel lutuk chu ka in ngei zawk.

"Min chhan kher angai lo"

Tiin min rawn kuah leh vang vang a,

"A nuam e, ti hian khawvel hi tawp daih se" ka tih chuan,

"A chi nang, fa te kan la nei anga, chhungkua te kan din phawt ang chu" alo ti, kan va hlim si em, heti lai tak hian, he hmunah ngei hian hringnun chu tawp ta mai se tiin duhthu ka lo sam leh hmanhmawh tawh.

Guitar chu perhin "Zai la" a tih chuan ka hla duh em em, Leng dun zel ila tih chu ka lo sa a, zai pawh ka zai ṭha thei lo, a guitar perh lai hmelṭhat sur sur zia chu.

"Music hi i ngaina ve ngawt mai" min rawn en a, a nui sak, "Ngaina tehreng" a lo ti mai a, a chhan erawh ka zawt tawh lo, zan in hi thla bial zan alo ni awm a, ka lo la hre miah lo zui, ka room balcony ah chuan ṭhu dun in thla rawn eng dulh raih chu kan thlir vang vang a,

"Thla chu a mawi hle mai" tiin ka en vang vang, ka nunhlui min hriat chhuahtir, Thla arawn bial a piang hian ka lunglen a zualin ka malzia min hriat nawn tir a, mahniin thla eng hnuai ah ka ṭap fo ṭhin kha nia, "A mawi khawp mai" min rawn en reng lai chuan a ti ve sup a,

"A nih ngati nge min hmangaih a?" Tiin ka zawt leh, hetiang zawhna âtthlâk deuh deuh hi ka zawt ṭhin, mahse hetiang thil ho te te aṭang hian min duhna te ka hriat theih phah a, a chhanna ka hriat sa reng tehi ka zawt ṭhin, dawt min hrilh ngai lo tih ka hriat phah bawk, "Thla khian kil li a nei" pawh ti se ka awih ang,

"Ṭha ka tih vang che in ka hmangaih che a, i ṭhat lohna ka hre leh zel a, a ai nasa in ka hmangaih che"

Arawn ti a, thu tam chu a ni lo, mahse ka pian a hnu lamah zan in hi ka hlim ber ṭum ala ni rih, ka nui a, ka tâwp hlei thei lo, ka hmui hup a, ka chalah arawn fawp zui zauh, chhan let ngaihna pawh a awm lo, Hlim hi ka phu reng vang nge? Ka tana Pathian lo ruat sa ni ang le? Hmangaihtu ka neih tluka ka tana hlimna hi a awm theih tawh ngai lovang, ka hriatthiam tawh chu, Hmangaihtu thinlung chuan engzata tam nge kan dawn lam a ngaihtuah lova, engzata tam nge ka pek chhuah theih ang? Tih a ngaihtuah zawk ṭhin, a chhan chu hmangaihna chu dawn a ni lova Pek chhuah zawk a ni.

"Mahse hmangaihna chu chet zia a lantir a ṭha zawk, sawi sawi aiin" a rawn ti leh a, ka hmangaih alawm, ka sawithiam phak bakin, mahse ka sawi ngam ve tlat lo thung, hmangaihna ka lo hriatthiam dana lantir a, ka inpum pek dan tur ngaihtuah chu ka duh ta zawk.

"A nih nupui atan chuan min nei duh tak tak ang maw? Hmeichhe dang anga wife material ang kha ka ni ve silo a" in sit ru tak chuan ka ti a, "Chutiang nih kher angai hleinem, hmeichhia chu in puilting hma a i inzir thiam ve zel mai ang" alo ti sam êt a, engkim a êng zawnga athlir ṭhin vang hi nia abula awm a hahdam thlak em em nachhan, "A nih pasal atan min duh ve dawn em ni? Kan inchhung khawsak dan i hria a, ka hmangaihna lo hi chu pek tur ṭha che engmah ka nei lo ania, a hrehawm iti maithei a, tuna i nawmsakna zawng zawng hi kalsanin min pan duh dawn em ni?" Arawn ti ve a,

"Ka hria lawm, chu chu ka tan a pawimawh ber tawh lo" ka tih chuan min rawn kuah a, ka lo nui ver ver thung, Hausakna te nawmnsakna tehi engmah alo nih tak tak loh zia te, Nitin eikhawp min pe turin kan dil a, nitin eikhawp kan neih chuan a tawk viau in ka hria, nawmsakna tinrengin a hual vel pawh hi khawharna leh thinurna, natna te'n nitin min chim buai a, he tlangval tlawm tak hian chung lak ata chu min chhanchhuak a, ka tan chuan hausakna hi engmah alo ni lo, ka hmu fiah thiam hi ka tan chuan hei tluka malsawmna hi a awm thei lo ang.

Dar 10 pelh hretah chuan haw tumin a in ruahman a, mahse ka la phallo,

"Zai lamah hian kal la, milar bialnu ka nei a ni mai lawm"

Fiamthu hian arawn ti a, nui chung chuan "Milar nih hi ka chak hran lo" ka lo ti, ka chak lo tak tak bawk, "Bakah ka luck dawn sia, i dinhmun a derthawng lutuk palh ang" nui hak hak pah chuan ka ti a, "Het...chutiang sawi loh tur" fiamthu bawk chuan arawn ti veleh, "Tak takah, hna ṭha tak thawh ve a, ka pa hausakna tello a khawsak zir ve ka duh, ka chawm vek ang che, i nu pawh ka chawm vek ang" ka ti leh, ka thusawi vang chuan a nui nasa mai, ka duh zia a in hria a,in hria pawh ni se a pawina awm lo, thudik tak a ni miau a.


Kan kut ringawt techu la in status ah techuan kan han hmang dun a, a hlimawm ve reng reng , tunah chuan ka nun chu rawng chi hran hrana chei mawi kha a ni leh tawh a, chu pawh Pathian hmangaihna vang leh Vannunzira hmangaihna vangin.