LAVENDER - 14
"Eng nge itiha" Rawn ti dut thàwmah chuan ka phone chu hmet hlum nghalin ka hawilet nghala, Zodinpuia hmel fai sar mai leh a sam la huh hru mawlh mawlh nen chuan kan in hmachhawn a, kawr ahak loh avangin a taksa huh deuh hlap pawh chu ka hmuchiang ngang mai.
"Enge itih ka tih chu" Rawn ti lehin a lu ahrukna towel chu anghawngah a bat liam a, min pan hnai ruala hawi sawn nghalin, "engmah, " Ka ti bung hmuk ringawt. Ka kiang maia arawn din takah chuan a rim chuan hnar averh zar nghal, Lavender body wash a hmang ve tih ka hriat rual chuan ka khi suk a, ka rim ngainat leh duh ber anih avangin ka hai theilo, ka kiang maia adin reng vang nge kan chhehvel boruak thleng chuan ati rimtui veng veng maiin ka hria.
"Vawiin chu hna ah kal suh ang che, kalna tur dang kan nei, " A rawn tih chuan ka melh nghal kàwk a, pangai takin sawi mahse thu min pe ziah hi ka duh lo bur ani tawp. "Tu thu in maw hna ka kal loh ang, " Kiai khum sukin ka ti let a, ka melh ralh ralh bawk. "Keimah, i pasal in ka sawi chu i zawm mai tur ani", tia min hnaih leh ruak takah chuan tawlh hnung nghalin, " A tawk, min hnaih suh ka tih tawh kha, " Tiin ka kawk let va a, anui duh lek chauh lehnghal ka ngei tak tak ani.
"I pasal ka nia, ka duh chuan i taksa khawilai pawh hi khawih turin dikna ka nei, chu chu nangpawhin i hria, nizanah pawh ka fawp che ani lawm ni", tia rawn kun hnaiin chiang kek kawk chuan min en ngura, tum danga ka neih ngai hauh lo zàmna mak tak chuan min rawn tuam mup mup nghal, nge keihi ka lai zawk pawh ka in hrethiam tawh lo. Ka tih ngaihna hrelo chuan melh deuh nghekin chhan pawh chhang let lo chuan ka kalsawn zui daiha, ka thinphu ri dup dup te chu hriat loh der chi pawh anilo.
Khawilam panin nge kan tlan pawh hrelo chuan kan thu ngawi dun kara, biak ka tum lova, sawi tur pawh ka hre chuang lo. Zodinpuia pawh chuan min biak achak bikin ka ring hran lo. Car a ding tih ka hriat rual chuan ka hawi chhuak vata, restaurant ni maiin ka hria, lut leh chhuak an kat ve nuk reng nen rinthiam dan mai a awm. A chhungah lutin ka zui ve zel a, hnamdang mi ka hmuh tam tak em ah chuan ngaihdan pawh ka nei thiam tawh lo.
Room in ping dang bika Zodinpuia lut chu ka zui lut ve nghal a, dawhkan lianpui thut biala lo thu khat thup te chuan min lo lawm thiamin min lo be bawrh bawrha, mizo vek an nih avangin keipawh ka in thlahdul ve hret hret thei nghal. Zodinpuia thian tha te an nih rinawm takin an in be bawrh bawrh renga, kei erawh ka tawng tlem khawp mai, hmeichhia 3 an awm ve a, keimah nen 4 kan ni tihna anih chu abak chu mipa vek an ni thung a, atu amah lah chu ka hre der mai silo.
"Hreawm iti em? " Zodinpuia'n dawhkana ka kut nghah rawn vawn hnanin arawn ti a, midang lo 'êû' nghal thupah chuan ka zak lutuk ringawt. "Ti love, " Ka ti tha ve maia, helai hmun lehzela in hnialna chawhchhuah kher chu ka duh bik lo. Hun reilo te emaw ka tih laiin alo tlai leh zek hman tawh a, tlailam dar 2 pelh hretah kan haw thei hram ani. In kan thlen rualin ka room lam ka panding nghala, kan dam leh hnu a Cara ka long-ride na hmasa ber ani bawk nen ka sil them thum a, khumah chuan ka bawk thla zur nghal.
"Lo hawng teh Zonunmawi " Tia Zodinpuian kawngkhar arawn kik dawt dawt chuan ning zeta tho chhuakin ka va hawng deuh sawka, na hrethei se ka khawngkhar chu a t(r)e ring viauin ka ring. "Zanriah ei turin Pu Hlira te in ah kan kal angai dawna, dar 6 ah chuan lo in peih hman tawh ang che, " Tia a sana melh phah zeuhvin keiin ka ner khum duh lek chauha, vawiin ni ber khera chhuahna tur a hre lutuk te chu ka hne ngawih ngawih.
"Ka sawi chu i hria maw? " A rawn ti leh rual chuan ning zeta thawk kawkin, "ka hria, ka beng achhet lo thu min pe tawh suh, ka kallo zek tur asin, " Tih leh kawngkhar chu khar khum burin khumah bawk chuan ka bawk thla leh a, ka lo muhil ani ngei ang ka phone ri ral ral avanga in bengkangin ka pu call chu pickup ka rual nghal, "bawihi kan ram chungchangah khan ramneitu te nen inbiak felna neih that ava ngaih hmel ve,sawibuai deuh a awm tlat mai " Kapu in arawn tih chuan ka in perh tho at a, chutiang thil engtin nge athlen theih, fel fai takin kan lei vek tawh kha ani si a.
Kum lai aliam tawh lehnghal buaina nei dawn ni ila kan lei tirh lamah kan neih ka ring bawk si, thil thleng palh nge Zodinpuia alo in rawlh leh tawh zawk ka hriatchhuah vat angai ani.
...........
"Tho rawh, in peih sa turin ka hrilh che ani lawm ni? " Tia Zodinpuian min rawn kaih thawh chuan ning zetin a kut chu ka lo vai per lawpa, chhan pawh chhang lovin bathroom lamah ka lut nghal. Tih luih nan tak rei tawk ka in bual leh te te a, min lo kalsan daih se ka kal loh phah zawk anga, ka lawm viau zawk tur,reife ka in bual hnu ah bathrobe nen ka chhuak chu Zodinpuia thinrim hmaisen nen kan in hmachhawn rúna, alo la awm reng peih chu mak tih loh rual anilo, ka khum chunga thu in a khup chungah akut a nghata, kún deuh ngul chung chuan min melh na ngat ngat khawp mai.
"Minute 5 chiah hun i nei, i insiam zo hman lo anih chuan bathrooma i inkhung rei thluk zet kha ka khawsak pui ang che, " A rawn ti chher chher a, a mitmengah pawh pawisak aneih loh hmel takzet tawh, ka zam nghal em em ringawt a, hepa hian ati duh leh tak tak dawn tih hi ka chiang tawh em ani. A hmuha hmanhmawh anga lang duh silo chuan ka in thlakna tur chu ka la a, bathroom ka luh leh rual rual chuan theihpa lingkawh an tih te chu nep te, ka hmanhmawh luatah ka che buai zo vek zawk.
Ka sam towela hru nawk nawk chunga kawngkhar ka hawng chiah chu Zodinpuia kawngkhar bula lo ding rún nen kan in melh dun nghal pang a, " I tlai" Ti supin dar zat a phone a mi min en tir chuan dar 7 a pel fel der tawh. A thil tih tum a sawi kha ka hriat kar avangin ka in hum ruh nghal tunga, ka thinphu arang awp awp nghal. "chhuah lawkna tur ka neia, tun tum chu i him rih anih hmel, kawngkhar lo kalh suh ang che, " tih leh min chhuahsan aruala, abike tlanchhuak ri ka hriat tawp thleng chuan ka ding mawl tawpa, ka thaw chhuak kawk kawk nghal.
Chutia kan chhuah leh angaih tak si lohah chuan hnathawh tur ka ngah bawk nen ka in chhawp chhuak nghal zung zunga, hotel lam chu Asangi kuta ka dah deuh rih avangin ka buaipui rei lem lo, rinai tak a enkawl thei phiana, kei erawh Aizawl lama kan ram leh ka restaurant chanchin te chu bawhzuiin Gabriela lakah pawh lawmthu sawina tur atam ngang mai.
Kawngkhar kik thawmah chuan ka laptop khupin kawngkhar lam pan chuan ka tlan zui vata, kawngkhar ka hawng chu Jeremya lo niin tun ang huna arawn lang hlawl chu mak ka ti ve deuh, a landan maiah pawh ruih anei tih a hai thei loh. A kamis hak ban chu a kiau thlenga thlep tawm chho ve ve in a hmalam kilh chu a chunglam akilh kim lo nuai bawka, asam hnawk niai te chu a in hmeh letling zawk hian a hriat.
"Ka lo lut, i phal chuan" Tiin min nuih suk a, a rui bawk nen ka lawm teh chiam lo khawp mai. "Hetah te eng nge i rawn tih dawna," Tiin ka luhtir ve maia, min chhang lo chuan sofa lama kal pheiin a thu zui hnawk nghal. "Nunu," Rawn ti dutin a thaw halha, vanvadaka àwn duai anih avangin ahmel pawh ka hmu chiang lo. "Nunu, " Arawn ti leha, keilah a hmazawn daiha thu in ka laptop ka bih ngur a, chhang lemlo mah ila ka hming alam miau si avangin ka en leh zuk zuk thin.
"Nunu, pasal i nei hi hreawm iti tiraw? Adina hi i chungah asual viau em? " Tiin a thu tha sat sat a, amitmeng dul ruiha min en kalhin a khup chungah a ban anghat bawka, Zodinpuia nen in ang riau in ka hre tlat pek. "Engvangin nge chutiang te min zawh a, " Ka ti let hmaka, ka tawngkam hi chu abul ve hrim hrima, ka thinrim vang pawh ani chuang lo. "Ngati mah, englo.. " Tia ngawi datin a hmui aliak leh zeuha, min en reng avang chuan nuam pawh ka ti chiah lo.
Zodinpuia unaupa ni mahse ka thla amuang hleithei der lo lehnghal , amah Zodinpuia tal hi awmse ka thla amuang phah viauin ka ring. Engmah sawi ta lo chuan kan ngawi dun vung vunga, keipawh ka hna khawihah chuan rilru ka pe theilo, zahzel atan ka hmang mai mai zawk ani.
Jeremya pawh a ngawi renga, min en in athaw leh kawk thin tih ka hria, vei nei a ang ka tiin han biak deuh luam chu ka tum ve uk thin a, mahse Zodinpuia a awm bawk silo, min zuam phah ka hlau ve tho bawk si chu kan in melh kan in melh tawp mai ani. "Ka va haw tawh ange, a tlai tawh emai, Adina pawh alo thleng tep tawhin ka ring, " Tih leh din a ruala, aharh ve deuh tawh nge a pheikhai azang tawh khawp mai.
Kan lo awmdun rei deuh nge, nge a rawn kal tlai hrim hrim zawk ka hrechiah lo Jeremya haw hnua sana ka en chuan zan dar 11:35 chiah chiah alo ni a, hna khawih ka tui chiah tawh lo nen ka pi thil min rawn thawn thin chu hla ngaithla phahin ka chhiar zui leh ta mai mai a.
______
Hun leh ni in her zelin, sik leh sa chunga rorel tu nilo ta fam chu thlasik boruak arawn in her chhuak chho va, 'ber thla' tia miten an lo lawm thin ngei chu kan thleng ve leh ta reng mai. Keini pahnih erawh kan kal ngaiin kan kal chho bawp bawpa, Zodinpuia nen pawh ngai kan awh ti ila a sawi kim berin ka ring. Kan inneih tirh lai ang khan in khata cheng siin kan in hmu ngai lem lova, kan in pumpelh dun ni hian ka hria.
In khata chen dun na na na chu in hmuh loh tawp a theih lohva, mahse tumdang anglo takin kan in hnialin kan in bakkaih ziah tawh lo thung, kan in ngeih ta ni pawhin ka hre chuanglo, hunin arawn herchhuahpui vang maiah ka ngai. Bakah Pu Hlira property thilah thawhdun loh theih loh chang a awm fova, inhau miah lova kan tlingtlak pawh a awm ve ta fo mai, hai rual lohvin keipawhin nuam ka ti a, engtik lai pawha in hauhpui reng kha chu a hreawma, ahneawm em bawk ani.
Ka phone ri avang chuan kapi tawng mawlh mawlh chu a tawp chuta, Aizawla ka awmna pawh thla 2 dawn ani leh tawh, tun tum erawh Zodinpuia tel lovin keimahin ka chhova, vawite khatmah kan in be pawp ngailo, Ahmangaihin naute neiin hmeichhia ani a, a va thlawh zeuh zeuh thin tih pawh ka ringhlel lo, duhthlanna harsa tak ka pe a, khatih lai khan ka rilru chhungril tak chuan min then duh mai kha ka ringa, hlauhna in ka khat bawk.
Asangi nen kan in be zo chiah phone ka hmet thim tur chu whatapp a Zodinpuia messege rawn thleng avang chuan ka meng kang deuh zawka, rang takin ka open nghal. "I buai em, " Tih mai te hi ani, ka thinrim lova, ka lawm em em pawh ka hrelo, mahse chu thumal tlemte chu chhiar nuam ka ti tlat peka, hmuhnawm thlir tak te in ka thlir reng mai ani.
Hei kan mipa star deuh ten emaw min biak ringawt pawha kan laih a,nuam kan tiha ,kan khik ruk vur vur ang mai hian ka khawchhung chu a phur sarh ka ti mai, ka awmdan hi ka sawithiam chiah lo,min rawn be ngai reng reng lo tu in min rawn biak teh hlawl vang te pawh ani thei maithei.
A messege ka open tih a hmuh vang nge a phone call arawn lut zata,ka thinphu rawn phu ri dup dup leh pickup zah deuh tlatna ka nei lehnghal. Chil lem khawlhin ka pickup a, ka kalsawn zui nghal bawk. "Zonunmawi" Rawn ti thawp sapin a thaw zui halha, zu a in leh tawh tih ka hre mai. "Rui chung chuan min rawn be suh " Ka ti let khapa, ka hmui ka veng hman meuh lo.
Chutah Zodinpuia chu za lo zeta rawn nui hakin, "zu ka in tih engtin nge i hriat theih a? " Arawn ti daiha, thawm a reh duk nghal, chu zawhna chu engtin nge ka chhan dawn ka hrelo, kei ngei pawhin engtin nge zu a in a, a rui tih ka hriatthiam theih zawk ka hrelo, mahse ka hrethiam miau si, ka chik ngai pawh nisi lo hian ka lo chik viau thin zawk tihna em ni..
"Zonunmawi, ka biak che chu, " Arawn tih leh chuan ka hamhaih luatah nilo zetin ka vin let tuara, anui duh lek chauh leh nghal. Chutah ngawi vung vunga thaw chhuak leh hakin, "i ngaihawm, " Arawn ti leh sapa, asawi ring lo, mahse ka hrechiangin chhan mai ngaihna ka hre tawh lo. "Kan beng ti tlai tu ber i awm lo rei lutuka, ahreawm , " A rawn ti leha, anuih tel suk takah chuan a fiamthu tih ka hria, keipawh ka nui ve sak ringawt, khatiang baka fiamthu thawh dan dang ahre hlawl lo tih a hriat nghal vek.
Rei pawh in be lovin thut khawmna lamah ka pi chu ka va zawm leh vata, rangzet hian ka pi chuan, "Asangi ani em, i nui velin ka hria", arawn ti a, a Bible ken chu min bih san leh nghala, ka chhang duh lem lo, ka pi thutna atang hian ka va chhuahna bathlar chu chiang zetin darthlalang chhan atang a hmuh vek theiha, ka lo ngaihtuah miah lo, ka awmdan kha alo hmu vekin ka ring leh hnuhnawha, ka lai thar ta tlat pek.
"Khale min han chhiar sak leh la, " Tia Bible min rawn hmeh bel leh chuan phur lutuk lem lo chuan ka han chhiar sak ve leh maia, ka pi hi a tar ve tawh avangin amit hian lehkha han chhiar tur em chuan atlin tawh lova, abikin Bible ziak sin lutuk chu a hmu thei tawh lo hrim hrim zawk. Mahse chuti chung chuan engtik lai pawhin a kuah chawt a, keu in abih reng peih tho.
Lal Isua an khehbeh chungchang vel chu ka chhiar saka, akhat tawkin 'Amen' alo ti leh sap sap thin, dáwta an puhna leh Kraws lera a awm laia an deu sawhna tawngkam a chhanlet ngai huahlo na te chuan keimahah hian thu a sawi ka ti dawn nge, min hneh em em a, khatiang khan ka mihring puiin min tawngkhum ve nise chhanlet mai nilo, kut hial an chungah ka lek duh ngei ang.
A duhna lai thleng ka chhiar zawh hnu ah nidang ang bawkin tawngtaina ahmang leh a, hun rei lo te chhung ni mahse anuam ka tiin ka zangkhai vah zel,a hma zawnga ti duh ngailo kha ka nia, mahse hetiang dinhmuna ka pi a din tak siah leh a enkawltu ka nu berin min boral san takah chuan tiin ka han tihsak vel mai mai a,mahse engtik lai atangin nge ka hrelo tlem te tea a Pathian thu min rawn thawn ka chhiar tak atangte pawh khan aniang, Bible thu chu ngaihnawm ka tiin ka nun nen ngaihbel tur ting atam mai bawk si nen,ka chhiar leh nge nge thin ani.
"hetiang hian i nu nen khan nitin darkar khat tal hun kan hmang dun thin a, anuam thin asin aw, i nu kha ka ngai thin, " Ti vawng vawngin ka pi chuan ka kut chu min vawn saka, a hmai vun chuar tap tawh chuan a kum tam ve tawh zia ahril a, min tlin reiloh pui ka hlau thar em em mai ani.
"Pi, ka nu chungah khan tihsual ka nei tiraw, a thusawi ka ngaithla ngailo chung khan min hlat ngai lo tih ka hria, mahse enga tinge ka naupan lai, ka mamawh ber laiin ka kiangah a awm loh," Ka ti let tiau va, ka nu chu ka ngaiin ka ngei tel bawk si, ka lungchhe ringawt pawh chu ka in sum hman lo, haw viau mah ila he khawvela ahmel vawikhat mah ka hmu thei tawh lo tur hian min ti hnual em ani.
"I pu hi alawm, heng zawng zawng bul tan tu, hausak leh neihnun zawk a duh luatah a tu leh fate zawng zawng a hruai khaw lo zo cheuva, naupang te innih atangin hmelma cheibawl dan leh mi huatdan bak zirtir anei hleinem che u, keipawh ka thiam biklo, dang tur ka ni a, mahse keia thu ve te mai zawng a ngaithla duh silo, " Arawn ti a, he thu hi chu ka hre fo, ngaih khatah ka ngai tawh,bakah ka pu demna tawngkam hi chu ka ngaithla duh vak lo.
"Inu hi nu leh pa nei lovin a Nutei te bulah a seiliana, anutei te nen chuan burma kan awm lai khan inthenawm chiah kan ni thin. Chuta tang chuan ipa nen hian ipu hian a inneih luih tir alawm, Adina nena a inneih luih tir ang cheu hian, awi khang hunlai khan inu hlim hmel hi kan hmu ngailo asin, Mizoramah kan rawn chhuk thla a, tichuan tun hun hi kan thleng ta ani, inu kha hmeichhe tawrhchhelh tak ani, " A rawn ti dap dap a, ka nu chanchin ka hriat dan chuan min ti chak sawtin ka hria.
"anih pi,ka nu kha a uire tiraw," Ka ti deuh tawpa,thu han sawi mawi vak dan thiam miau hek lo, rilru a min kap tun reng ai chuan zawt chhuak vat ila a nuam zawk. "Bawihi chungte chu engtin nge i hriat a, thudik anih leh nih loh chu ka hrelo mahse ipu leh ipa khan uire chhuahin an chhuaha, a uire na pa pawh Adina pa hi ania lawm,mahse thudik ani em ka hrelo ," Arawn ti chu ka kang zawkin ka hria, ka hrilh a haiin,ka hamhaih vek bawk.
Ni thei turin ka duh lova,lo uire lo nise ka pu khan min hrilh thin ka ring bawk silo. "inu hian i pa hi mipa dang a hmangaih san daiha, chu chu uire an ti thin, hre reng rawh aw," Tiin nitin zantin min hrilh hre reng a,ka nu ka huatna bul in tanna nita berin ka hre bawk, chuan tunah ngei pawh ka thinrim thara, ngai tho mah ila ka haw thar lo theilo, chutiang bawkin Zodinpuia pa pawh ka haw thar bawrh bawrh hi a ni tawp mai, a fapa Zodinpuia thleng hian..
Aizawl lama khawsa reng thei nisi lo chu thlahnih leh tlem ka cham hnu ah ka haw a, Airport-a Asangi hmel ka hmu chu nidang zawng aia Asangi ka hmuh hmelthatna ber ani in ka hria, hmangaihtu leh ngaihsaktu, duattu neih tluka nuam hi alo awm lo tih ka hrechhuak tawh miau alawm.
In kan thlen chuan rawn lut kawi lovin alet leh nghala, inchhung ka lut chiah chu Ahmangaihi ka hmu hmasa bera, afanu hnute alo pe mek bawk. Ani pawn min rawn hmuhve nghal avang chuan a hamhaih ve hle tih ka hria. "Nunu,ilo haw maw" Arawn ti bah niai a, chutih rual chiah chuan Zodinpuia'n "I hman tep tawh em,hman hmawh ang? " rawn ti chungin aroom atang arawn chhuak ve chiah bawka,min hmu chu a meng kang deuh zawk tih ka hmu hman leh hram.
Ka ding mawl tawpa, ka bag chu hmer ngut ngutin Zodinpuia leh Ahmangaihi chu ka en reng ringawt mai ani. Sawi thiam siloh hian hmuh hreawm ka ti ta tlata. Zodinpuian kawr ahak loh danah te chuan ka rilru a vak kual zut zut bawk a,ka thin a rimin,ka taksa khawi emaw lai ber hian na ati veng veng ni mai hian ka hria.
Enga tinge hetianga ka awm tak tlat nachhan hi, mit ngeia Sex an hmang ka hmuh pawhin engtin mah ka awm lova, ka ten zawk hial kha ania,mahse tunah erawh ka thin an ti rim em em chu anih hi. In si cheta thu dun pawh an ni lova, an kuta lo invuan pawh an ni chuanglo mahse inchhunga an lo awmdun hrim hrim hi ka duhlo, hmuh dun hi ka duh tawh lo..
"I lo haw tur i sawi si lova, ka lo hruai thei che asin " Zodinpuia chuan rawn tiin a kuta aken chu sofa ah a dah thla a, nausen puan in thlep khawm ni berin ka hria. Engah mah ngailo àwm tak chung hian "Khawnge Anita i", tiin azawhna pawh chhang deuhlo chuan ka zawt let a, melh pawh ka melh duh lo. Ka tah te hial a chhuak in ka hria, ka awmdan hi ka duhdan pawh anilo asin le..
" Chawlh ala anih kha, tunkar chhung arawn kal lovang, i chau em?" Tiin min melh kara, Ahmangaihin min en kur bawka, mahse ka chhang hleithei der lo. Ka hrawkah hian eng emawin min hnawh ni mai hian ka hria..."Ka tha, " Tih leh ka luggage hnuk zuiin ka room lam ka pan sana, ka thaw chhuak kawk kawk nghal.
Kawngkhar in khar ri leh ahnu deuhva Car tlan chhuak ri ka hriat chuan ka thaw halha, ka chauh a zual ngei mai. Eng thil nge an lo tih dun anga, engtin nge an lo khawsak dun thin ang tih te ngaihtuah kualin room ah chuan ka vei tawn sek a... Engvang ber nge ka hre lo ka taksa chhung eng emaw lai ber hian nà a tiin pawm thiam harsa a ti em em ringawt mai ani. Ka thik tihna em ni??
Heiham
Like hi a tha, i uar zel ang u🥲