KA DAMPUIA Chapter-3 By Hc Lalrindiki

Episode kal lai dah luhna

Moderator: writers

Hc Lalrindiki
Posts: 75
Joined: August 23rd, 2021, 12:12 am

KA DAMPUIA Chapter-3 By Hc Lalrindiki

Unread post by Hc Lalrindiki » September 18th, 2023, 11:39 pm

KA DAMPUIA-3
Ziaktu Hc Lalrindiki




Ka thiannu thilsawi leh hmâa nu Chhungtei'n min rawn koh tak avangin choka lamah chuan kan chhuak phei leh ta rih a. Sitting room lama ka pa lo thu khur mai ka hmuh chuan ka thiannu lam chu ka hawi vat a, ani pawh chuan mak ti hmel pu chung tho chuan minlo melh letve bawk a.



Phurlo fè in thuthlengah chuan ka thu thla a, ka pa lah chuan min rawn hruai a tum thu alo sawi nghal phawr phawr bawk a. A nam deuh tihlah a tawngkam leh hmelah chuan a hmuh theih reng bawk nen a chhàn pawh chu ka chhâng buai peihlo.



"Hmanzan kha chu duh aiin ka lo tawng tam deuh hlek a, ka ben chhan che pawh khatiang tawngkam hmangve lo tura ka duh vang zâwk che anih kha. Nang chu ka fanu chhuan em em i ni a, khatiang tawngkam hmang tùr khan ka beisei lo ve em bawk che a ni," ka pa thusawi chu ka ngaithla rân a, a insawi lungpuam deuh nge ni a tap pûr reuh leh nghal nen a hahthlak lam mah chu a ni.




Ka han ngaihtuah a, thinrim tawh hi chuan kan tawngkam hman ngaihtuah chian diak diak hi alo harsa tawh thin a, ka nu leh pate ka chhan danah pawh ka lo thiam bik veklo a ni ang; mahse, ka la inngaihtuah lungchhiat rih vang nge ni ka pa lakah chuan ka la hel em em tho a. Chutih rualin ka thiannu te ina awm reng thei ni pawh chuan ka inhre chuang bawk silo.




Han haw duhlo ve ringawt dawn ila nakin lehzelah miten engtin nge min sawi ang tih thlengin ngaihtuahnaah a rawn lut zut zut a, kan khua angah phei chuan mî sawi hlawh a awlsam nasa mai si a, a eng zawng pawh nise zahna vek tur tho a ni a, chu chu ka tuar thei kher dawn em ni?



Ka pa chu pa Zaia te nupa chuan an fuih ve mawlh mawlh a, keini thiandun erawh choka lamah thingpui lum pahin kan titi dun sap sap thung a. Haw leh mai chu tha berin ka hria a, ka thiannu hnena ka rilru diktak ka hrilh chuan a han lungawi dawnlo viau nà in ka duhdana kaltlangpui chu tha berin ka hre ta tho.




Chu lo rengah In ka chhuahsan anih rau rau chuan thisen zawm nutei te pawh ka la neive reng a, Kimi te chhungin min duhsak em em tho nachungin ka chhuak dawn anih chuan nutei te bula awm kha ka rilruk zawk tak pawh a ni a, tuna ka pa'n min rawn koh leh tak si ah phei chuan haw leh mai chu ka rilruk ta ber a ni.



Ka thiannu chuan min pawmpui lo viau mahse ka tihtak tlatah chuan, "Anih chuan naktuk chu la awm ang che, i duhleh thawhtanah i haw dawn nia," ati ve thei ta hram a. Chu êm chu ka hnial duh ta biklo.




Ka pa bulah lah chuan, "Naktuk chu la cham rawhse, a damlo lehnghal a, in inah chuan hnathawh tir phet kha in tum leh te ania nga, a retheih a zual leh awm em mai," ati tlang nghal vek a. Ka lo ip deuh nâ chu pawi lo turah ngai tawh mai teh ang, thudik tak a ni miau sia.



Nu Chhungtei te nupa chuan engmah an sawive lem lo va, min duhsak em em tute an ni a, a eng zawk zawk pawh chu thlang ila ka duhdan chu min pawmsak dawn tho tih ka hria.




Ka pa pawh chuan thawhtan lama haw tura min chahin a haw zuive ta mai a, ka pa haw hnu chuan nu Chhungtei'n, "Champui, ilo in thlahrun vangte hi ania nge, nang chu kan fanu ang chiaha kan en i ni a, i duh chen chen kan inah chuan i awm reng thei ania, kan duhdan ah tak phei chuan kan in atang hian pasal nei la kanlo ti zawk a," tiin min hrilh luam a.




A thusawi chu an rilru diktak a ni pawhin ka ring a; mahse, inthlahrunna rilru a awmlo thei chuang silo a, in nge nge chu a dan alo dang pawh ania nge ka pa min koh laia haw vat chu tha berin ka hria.




A tuk chu chawlhni a ni a, ka tho zia awm tho bawk a chawhma tal inkhawmloh chu ka tihve deuh avangin ka thawmhnaw hak tur Kimi'n kan inah minva lakpui a. In kan han lùt chu chhuat alo paw thûr a, inchhung luh atang ringawt pawh chuan thawk a ipik nghal tùn thei a, ka nu alo la tho lo hlauh zawk a, chuti nilo se chuan ka alh thei hialin ka ring.



Remremi'n rawng alo bawl mek a, ka pa awmna ka zawh chuan zingkar atanga a chhuah bo daih tawh thu minlo hrilh a, a zu in tur a zawng dawn anih ka ring thiam nghal mai bawk. Zawhna dang zawt kawi tawhlo chuan ka thawmhnaw hak tur ka va la zui ta daih a, Engmawii pawh mangchhe zetin alo la hnar kuk kuk mai.



"U engtikah nge i rawn haw dawn?" Kan chhuah dawn chuan Remremi'n minlo zawt leh rih a. A tuk lama ka haw tur thu ka hrilh chuan a bu nghat nghat a, "Lo haw vat rawh, lehkha ka zir tha theilo," atih zawm leh chuan ka khawngaih reuh khawp mai, ka nu leh Engmawii te'n engmah tih an tum lo tih hriat reng reng.



Kan let leh hnu rei vaklo ah keini pawh chuan chaw kan eizui ta nghal a, inkhawm tura kan hman hma ang aiin Kimi muan a leiah kan kal hma vak lem lo thung a. Kal kawngah chuan ka àng ve hlak hlak a, ka thiannu lah chuan fiamthu ah minlo laksak zel lehnghal a.



Biak In thlen hma deuhin Hmangaiha'n min rawn tlan pel a, kan hmaa kal tleirawlho chu an inhrilhru nghal sap sap a. An tawng zawih lutuk lem loh avangin an thusawi pawh chu a hriat ve vek theih a, a chhiatloh zia an sawi chu ka lo thlawp khawp mai. Haha   




Biak In kan thlen hnu pawh chuan zûn in bulah mipa thenkhatte nen mei anlo la zu khu hlat hlat hlawm a. Ka en rei vak lo nà in a kamiz pawl dak hlarh leh a cotton kekawr dum inbel chu chiang takin ka hmu hman ta thova, a inhmeh lo tih chi rual lah nilo chuan.



Muangchang tawh lem lovin kan thiandun erawh Biak In chhungah chuan kan lut zui tanghal mai a, camp lai a ni bawk nen zai a nuamin lam pawh an thahnem hle a, ka thiannu lah chuan tan hla ah emaw ban hla a lam ve tur chuan minlo tur et et reuh lehnghal a, ka lam hnuhnun ber pawh kum 5 liam ta vel daih kha a ni tawh ang a, zakzum chi nih bawk si chuan rang deuha lu thin a awl duh khawp mai.


Gallery-ah kan thu a, thutna pangai kan chan tawhloh avangin Asher te thuthleng rem belhah kan thu dun a, dar rik hma deuhin Hmangaiha te kha an rawn lut a, kan thutna chiah awl tawh hekle Hmangaiha ber chu ka bulah chuan a rawn thu ta chut mai a. In sang mar teuh chungin a rimtui inkah rim chu ka lo hip lut vang vang a, a hmel ang chiahin a rim pawh a pa chàk chàk khawp mai.
 


Inkhawm dar a ri a, tantu an sawm zawha kan zai leh lai chuan Kimi pek chuan lâm turin minlo sawm leh char char tawh a; mahse, lâm kher kher ah chuan min sawm hlawhtlinglo chiang khawp mai.




Ani erawh a pawt tu lam a chak ngang nge hla an lak nawn leh rual chuan a zuk lam ta nge nge a. Ka thiannu lâm chu zawi te te-a zai pah chuan ka lo en ve reng a, a lam dan dàrh dàrh chuan ka nuih ati za lek lek mai lehnghal a, Biak In chhungah chuan awm lo ila ka nuih nghek duh hialin ka ring.





"Engati nge i lam veloh a?" Hmangaiha lam chu ka melh zawk a, min rawn be ve thut chu ka han hamhaih dawn lek lek naa insiam tha lehnghal thuaiin, "Lâm lam hi chu ka ti vaklo," ka nui deuh a, ani pawh chu a khi ve suk tho.




Zai chhunzawm lam pawh a lang tawhlo, min rawn biak chhunzawm ve te kha ka ring deuh ania; mahse, a ngawi leh ang dak lawi a. Ka hma zawn chu ka va melh phei a, tlar tawp ber kilah chuan Dampuia ka va hmu hlawl a, ani lah chuan kan lam alo hawi ve reng a, keini kher chu min rawn melh em ka hrelo naa ka va hmuh rual chuan hmundang a hawi ta daih thung a.



Zai a tawp hnuah ka thiannu pawh chu lum tih hmel deuh chuan a rawn thu thla ve leh ta a, kan speaker pawh chuan thu a sawi rei vak lem lo a, a thusawi chin erawh a fiah tha in a sawi thiam thung khawp mai.




Inkhawm bâna Biak In kawta kan ding khawmuang chu an inkawt atanga Ngaihawmi'n min rawn hui zuk zuk avangin a lam pan chuan kan kal ta thuai a, ka thiannu chuan mipui haw rem deuh hnua thlalak a duh vanga la khawmuang deuh kha kan nia; mahse, thla pawh chu kan la dawn ta chuanglo anih hmel.




"Eng nge a?" A bul kan thlen rualin ka thiannu chuan ati nghal a. Ngaihawmi hi Kimi cousin Rinpuia ngaihzawng a nia, keini ai chuan an la nau deuh ang a; mahse Kimi mizia in a zir bawka Ngaihawmi pawh hian a thian ang tak takin a ngaina ve in ka hria.




"Thingpui lo inkawi rawh u," pakhati lah chuan lo ti awlsam et in inchhunga luh chu a rual nghal a, "A pawimawh hmel tehreng nen," ka thiannu pawh chuan ti bai bai in kan lutve nghal ta tho a.




Mipa nui thawm ka hriatna lam chu ka hawi nghal vat a, hai rual lohvin Hmangaiha ngei alo ni. A kut khing hniha phone vuan in kan lut chu minlo melhve chiah bawk a, kan in melh fuh em vang chu nge ni ka thawk a tawp nghal vek mai hian ka hria.





A bulah chuan Rinpuia pawh alo thuve khar a, games an khel aniang ani phei chu a rawn hawi chhuak lo hrim hrim.





Rinpuia leh Ngaihawmi hi an tleirawl chhuah atanga inzui tawh an ni a, a hranpa taka inkawm nasa lutuk tihtur kan nilo naa ka thiannu nen an in ngam tlak em avang hian kan innel pangai ve tho chuan ka hria.




Ngaihawmi lah chuan a bag chah thar, a design a duhleh chiah siloh chu min zawrh duh vang lekin ania minlo sawm luh, pawisa nei heklo kei phei chuan ka thleksak thuak ringawt chauh a.




Hmangaiha lo awmve ringawt chu mak ka han ti dawn dawn a; mahse, anlo in kawm ve reng alo nih dawn hi. 





Rinpuia chek hluk chu a bula thu pa chuan a nuih kur kur a, a tang hle aniang a phone chu a hmet nawk nawk mai.




"Lalrinpui bialnu neih vanga len reng tur tihna em ni?" An ep thuthlenga thutthlak pahin ka thiannu chuan ati vâr a.




"Inleng tur i hmuh zawhloh zia hi tilang viau lo mai rawh," ka lo nui hak a, ka thiannu lah chuan a han tlawm la em em khawp lehnghal a.




"I vahan zaklo tak, duh ila kan In a leng lo tur khawp saw ka hmu aw"





"Ni e, i hmu tak ang, in In kal apiangin i û Awia ka hmu ziah tak alawm," za lutuka Ngaihawmi a rawn nuih rualin keipawh chu ka lo nuichhuak ve hak hak a, Kimi lungawilo nuih za tho bawk si chuan, "Lalrinpui," ati ringawt a, a hnuah phei chuan a nui ring ringah a rawn tang leh ta zawk a.




Pa Awia chu kan khaw tlangval senior ah pawh a senior ber pawl a ni tawh hial awm e, zahmawh a rak hrat tak leh tawng tlahawlh zet mai hi a ni a, han biak that loh ngawt dawna kan aia upa ni si, biak that ve deuh laha mi zuam tawk hre reng reng bawk silo a ni. Rinpuia sawi dan takah hman deuh khan Kimi hi a rawn beisei ve deuh a, tunah tak phei chuan vengthlang nuthlawi a birh leh tluk tluk tawh zawk a; mahse, hei tûn thlengin inchhaih nan tak anla inhmang anih hi.




"Enteh, Ngaih...i dinhmun a derthawng teh ania, in pa hian atchilh deuh tu a nei ania aw," ka thiannu chuan nui kar kar chung hian ati ta daih a.




"I trick a thing em mai a, topic thlak tum duh suh...Kim lu buk"




"Awi Lalrinpui, khati khan min ko ve ziah suh, a thing ropui si..."




"Nangpawh i mawi chuanglo a, in inhmeh tawk lek alawm"




"Lalrinpuia min han ngam dan em em hi chu, ila hreve khawp ang," ka lo nui kar kar a, Rinpuia leh Kimi te an awmdun tawh hi chuan tireng mai hi an ni.




Hmangaiha awmve pawh chu ka lo hrechanglo lek lek hman a; mahse, nuih put put paha ka hawi chhuakin minlo melh reng tih ka va hmu chiah chu ka nui tawp chiang khawp mai.




A mi melhdan mawlh chu, ka thawk a tawp hman thelh a ni, a mitmenga nuihzatna lang chu chiang taka ka hmuh rualin ka chhungril thlenga en tlang thei khawp mitmeng fiah leh nalh a nei tih pawh chu ka hrechiang nghal khawp mai a, min enchiang bawk nen ka lai dawn lek lek hial a, ka hmui hnuai pet sawi vakin a lam chu hawi pawh ka hawi leh tawhlo.



Thingpui te kan han inkawi leh te te hnu chuan chawhnu inkhawm tur kal hma deuhin haw ka rawt ta a, kan kal chhan ber bag pawh chu ka thiannu chuan a duh bik vaklo aniang an in hnial tluan ta thak a.



Kan haw lama kan khaw tleirawl chhuak tir phir unau te pahnih kan tawh chuan ka thiannu chuan alo be khawmuang leh ta rih a, kei tak phei chuan an hmel chiah ka hria ania, Kimi chuan engtin nge maw alo hriat leh hman tawh ni.




Ramdini te unau pawh chuan ka thiannu zawhna chu tha deuhin anlo chhangve mai bawk a, chutah ka thiannu ta pek chuan, "I u Rinpuia a awm tih i hriat vang a ni chiang mai," ahan tileh mauh mai pek a.




"Naa...Lal û Kim, i sawia ka hreve chiah aw," Ramdini'n atih bai bai chuan ka thiani chu a nui har har a, Ramdini hmai sen tan tan chu ka lo en ve reng a, ka thiannu chuan chhaih nuam ati zual khawp ang le. Kan inkalsan hnu chuan, "Rinpuia kha i chhaih mai mai emaw ka lo tia?" tiin ka thiannu chu ka zawt a.




"Chhaih tho e; mahse, Ramdini kha ê ka duh reuh lutuk a hman niah Rinpuia nena an inbiakna ka chhiar ru a, Rinpuia ka fuihpawrh char char alawm... Ngaihawmi inti thei lutuk saw ka ngai theilo, " awlsam tak chuan ati phawr phawr a.




"Awi chutiang te, Ngaihawmi'n hria se a lawm lo ngawt ang," ka chek hlak a, ka thiannu lah chuan a han ngai ho khawp lehnghal a.




"A ho em mai a, Rinpuia hian a duh tak tak reng reng hleinem... A rawlthar chhuah ngaihzawng ania, Ngaihawmi'n a duh hneh em avang hian a khawngaih laklawh kual vel mai mai rih anih hi, a duh tak chu han tawng se, an inthen nghal vang vang mai ang,"




Sawi tur pawh ka hrelo, ka thiannu thilsawi chu ka lo ngaithla tawp a. Rinpuia te chu an induh viau emaw ka lo tia; mahse, Kimi hian keiai chuan a hrechiang fe zawk a, kei lahin ka thiannu chu ka hrechiang viau bawka dâwt a sawi chu ka ring miahlo bawk.




Rinpuia hmel ka han mitthla a, an tleirawl chhuah tirh atanga hmelthat lara lar hat tawh thin kha ania, a upa telh telh a, a hmeltha telh telh emaw tih mai tur a ni lehnghal a. Chutih laiin Ngaihawmi pawh hmeltha leh fel em em tho bawk a ni, pakhat hming alan tawh chuan a pakhata zawk chu langve ngei ngei turah kei chuan ka ngai hmiah tawh a, an inneih loh reng reng hi ka ringlo.





In kan thlen tak avangin chu lam engmah chu kan sawi ta lo a, nu Chhungtei te nupa pawh chawhnu inkhawm turin anlo chhuakve chiah bawk a, keini inkhawm tumlo chu min zilh pah bawrh bawrh bawk a, an liam tak hnu chuan inthlak sawk sawkin chhun ei turin atta ka hmet nghal a.




U Nghakpuia lah chu tan dar rik tep tawh hnuah room atanga lo chhuak ve hlawlin, "Ka lo muhil sek alawm le," tihleh hmanhmawh deuha chhuah chu a rual zui tanghal a.




"Awi ka nu khan 'i u a mu ania' ati reng sia, kaihthawh nachang ka hrelo reng reng," Kimi lah chuan nuih awr awr pah hian ati a, keipawhin ka hrereng a nachang ka hrebik chuang hauhlo.





"E tak a, hmanzan khan thlanmual ka awm tih engtin nge i hriat?" Kan thingpui in laiin Kimi chu ka zawt a.




Ani lah chu a han riat nawi nasa em em khawp a, "Ka hreve tawp," tia min chhan hnuah ka awih hlawllo tih a hria nge, "Englo ania, a hming pawh ka hrelo," te a han ti leh nawk nawk bawk a.



"Sawi mai mai teh Malsawmkim," ka tih takah chuan, "A hming sawi a phal hleinem, nangmah ngaihtuah deuhtu a ni tih kha hretawp mai la a bak min zawt lui suh," ati ta tlat a. A tih tawh vek vekah hi chuan engtin pawn tilui ila awmzia anei dawn chuanglo tih ka hria a, keipawh chuan ka zawt lui duh ta biklo; mahse, rilru ah erawh a cham veng veng thung a, a tu tak chu ni ang i maw?




Kan thil eina kan tihfel leh te te hnuah sitting room lamah kan thu mai mai a, zing lamah khan thawmhnaw la paha ka phone pawh hi ka lak tel nghal avangin phone chu ka han hmet ve niap niap a. Diktak chuan khawih tur hi ka hreve vak thinlo, ngaihzawng ka nei chuang bawk silo a, ka phone screen chu ka thai kual ka thai kual ringawt mai a ni.




Dar 2 bawr velah Remremi'n min rawn call a, phone ka chhan rual chuan,"U tlaiah lo haw mai rawh, tlai pek tur vawk chaw pawh a awm tawhlo, naktukah test kan nei sia, engmah pawh ka la zir hleitheilo," mangan hmel deuh hian a rawn ti a.




"Chutiangte chu ka pa te i hrilhlo em ni?" Tia ka zawh chuan, "Ka pa chu zing atang khan a rui tawh a, hrilh tlak pawh a nilo, ka nu lahin, 'chaw thing kha pe mai mai rih rawh,' ati ringawt a, chaw thing pek tur pawh a awmlo," tiin min chhang a.





Ka chek hlak a, engah nge maw an laktlakloh em em mai ni. Remremi chu ka khawngaih ve bawk nen, "Ka rawn haw ang," ka ti ta nge nge a.





"Eng nge nileh pek a?" Phone ka dah rualin ka thiannu chuan alo ti vat a. Thil awmzia ka hrilhve chuan ner zui nawng nawng pah hian, "Ka rin dan tawk vel a ni," ati duh lek a.




"Chuan haw chu i tum em ni?" Tia min zawh chuan ka lo bu nghat a, ka haw nghal mai loh chuan a buaithlak ang, "Inkhawm banah haw la?" Tia min sawmna pawh chu vawkchaw chhum ala ngai dawn bawk nen ka lo hnial ta zawk a.





Ka thawmhnaw ka lak fel te te hnuah pawnah kan inzui chhuak a, thui vaklo ka thiannu chuan min thlahin a let leh hnu rei vaklo ah chuan ka sirah bike a rawn ding dat a.





"Khawnge i kal dawn a?" Hmangaiha chuan nelawm tak hian a rawn ti a, ka haw tur thu in keipawh chuan ka lo chhangve mai bawk.





"Saw lamah in In a awm a ni maw, ka kalna tur lam tho ania, lo chuangve nghal ta che?"




A nui reng mai chuan ati nelawm zual em em a, min ngaichang reng bawk nen hnial ka han tum uk tawh pawh chu ka thulh leh ta zawk a, a darah vuana bike a ka lawn kai lai chuan ka lai ru em em mai a, nula ve uaih tawh chutia han awm chu ka in hau ru mawlh mawlh bawk.




"I chhuak ngai vaklo a ni maw?" Tia min zawh chuan chhuah ngai zen zen loh thu in ka lo chhang thuai a. Eng emaw hi hriattham mang lohvin a sawi sup a, "Eng maw?" Han tihleh hu hu kha ka hreh ve deuh avangin kan ngawi dûn ta ràn a.





"Hetah hian aw," kan in zawn kan thlen rual chuan ka lo ti vat a, ani pawh chu a dingve nghal thuai a.





"Ka lawm lutuk ania," nuih sang pah hian ka en a, ani pawh chuan minlo en letve ran a. Sawi duh nei hmel pu a ka hriat avangin ka la ding khawmuang deuh a, "I number minpe phal em?" Tia min zawh takah phei chuan ka mengphawk hra in ka ring.





Ka lama a phone a rawn lek rual chuan ka mak tihna thup tum takin ka lo ban ve vat a, ka number ka chhut hnuah ka pe let leh ta thuai bawk.





"Ka lawm e," atih chuan ka lo nuih ringawt a, engvanga ka number chu min dil nge anih ang tih ringawt ka rilru ah chuan a awm bawk.





"Nakinah lo len i phal ang em?" Eheee...ka mumang chu a ni silo a maw! Engvanga lo len chu duh nge anih ang? Min duh tihna a ni thei em? Nge nia thian ang a min kawm a duh vang? Ka thluakah chuan zawhna a rawn inchherchhuan tup tup a, ka buai nuaih nuaih ringawt mai a ni.





"Chu te chu i duha thu a nimai," in thunun tum tak chuan ka ti a, "Duh tehreng mai," tia min chhan chuan eng emaw nuam veng veng hian min tuam mup mup a. A bike tinungin kut min vai zauh a, a tlan zui tanghal mai bawk a.



Nui ver verin inchhungah ka lut a, ka nu hmel ka hmuh rual erawh chuan ka nui ral riai riai thung a. Ani pawh chuan tûm kawh luau vin minlo enve kur bawk a, room a ka thawmhnaw ka dah zawk lai chuan tihtur min rawn hrilh leh ang zuah zuah reuh a, ka awm loha buai leh hle si hi min han mil lo ve em em ringawt a, a rilru hi a mak tih piahlam a ni.




Kan huan hi a awih vak lem lo bawk nen vawk in leh vawk chaw chhumna kan sa nghal a, tui lum khai thlak zawng a ngai a, a bakah chuan a rem angreng khawp mai.






Vawkchaw ka lo in zawn lawk loh avangin huana changel la chawp chuan ka chhum deuh nawk nawk a. Tun tum chu a tuk zing leh tlai daih tur vel chauh ka chhum a, ka nutei te hian leileh buh an neih avangin favai pawh an nei reng reng thin a, vawk an vulh loh lai anih avangin keiin ka lo hmang tangtai hlauh a, tun tum erawh lakna hun a awm tawhlo bawk nen huan chang el la tuai deuh ka chhum phah ta ngawt anih hi.




Ka vawkchaw chhum hmin hnu chuan sana alo tlai leh duai tawh a, vawkchaw pe vat vatin hmanhmawh deuh chuan rawng ka bawl zuinghal a, rawngbawl pahin In ka tifai pah bawk nen a buai theih thin khawp mai.




Remremi'n room lamah a zirlai a chhiar ri malh malh a, ka nu thenawmte inah a leng daih bawk a. Engmawii leh kan mipa ho erawh khawiah nge an awm tak pawh ka hrelo, school kalloh ni hi chuan lèng reng reng thin an ni a, chawei hun awm ah chuan an rawn lang ve leh tak tak tho ang.




Râwt siam pahin Zomuanpuii hla, 'Cham rih rawh,' tih kha ka ngaithla a, Remremi lehkha chhiar ka tibuai ang tih ka hlauh avangin ka ti zawi hle bawk.




Zan tawnmang mawl mai em ni, nge, chhingmit vai zawk?



A sakhming leh hmelhriat loh kan vangkhuaah lo lawiin;



Ka thinlai lungruk dartui ang a luangral ta,



Engti'n min ngai ang maw, engti'n min chhang maw?




Ka mitthlaah chuan ka hmuhtirh atanga ka mit la em em tu Lalhmangaiha kha a châm veng veng a, chu hla kher ka ngaihthlak chhan pawh chu amah vang a ni tih ka hreru rauh rauh bawk. Ka inngaihtuah chian chuan mak pawh ka inti khawp mai, duh ka neihve theih hi ka inring ngai miahlo kha ania.




Mahni te chuan ka nui ka nui a, ka nuih chhan ber pawh chu ka hre chuanglo. Ka mipa lo vei ruk tak maiin ka number min dil vang leh len ka phal leh phalloh min zawh vang chu ni berin ka hria.




"U engati nge i nuih reng a?" Remremi rawn chhuak chuan a rawn ti hluai a.




"Maw! Keimah maw?" Ka lo ti haw thung a.




"Niang chu, ka rawn chhuah apiangin ilo nui vur vur ziah"



"Awihawm loh e a," ka lo tithla ringawt a, hetiang hian ka awm ngai silo a, mak chu a tiru khawp ang.




Tlai atang ruah a tla cherh cherh reng a, inkhawm kal dawn hnaihah phei chuan nasa tawh tak a ni. Keilah chu ka lû a na riai riai reng mai a, inkhawm ka tumve tehreng nen ka inkhap buai chhungin dar hmasa alo ri der tawh bawk nen ka thulh leh ta ringawt mai.




Kimi'n minlo call chuan ka nawmsam vakloh thua chhangin minlo inkhawm kep mai turin ka hrilh a, ani lah chu ka hrilh vatloh vangin a rawn phun nuah nuah a, amaha thiltih hi chu hrehve ngang ngang thin tak a ni.




Chaw eina ka tihfel te te hnuah mu turin room lam ka pan nghal a, tun tum chu ka nu àng thawm hriat tur a awm hranlo a, nawmloh pawh a zia awm ve khawp mai.
Chawei lai atang tawhin min be tha hluak lem lo mahse a zia a thup ve deuh hrim hrim a, engtia rei nge a daih dawn hrelo mahila awm te pawh a nawm phah ve deuh alawm.



Ka pa chuan thawhtana haw tur ka haw leh thut chu mak alo ti dawn dawn a; mahse, Remremi'n min chah haw thu alo hrilh vat a, "A that hlauh chu," ati mai a, a rui leh bual tawh mai.



Ka mu chu ka lo muhil ve zawk aniang inbe thawmah ka harh leh hlawl a. Ka thiannu aw in, "A mutthilhna a rei tawh em?" Atih chu ka hria a, mengchhuakin ka inlet tiah tiah a. Room chhungah chuan Kimi alo awmve reng a, Remremi nen anlo inbe mek a ni.




"Awi kanti harh che elo?" Ka harh tih a hriat rualin ka thiani chuan a rawn ti vat a.



"Tiharh hranlo e," tih pahin ka thuchhuak a, ka mut dawna damdawi ka ei vang nge ka lu nâ te pawh chu alo zia huai tawh.



"Eng nge i rawn tih a?" Ham bai bai pah hian ka ti a.



"Ka nuamlo kha i ti sia ka rawn ngaihven che mawle; mahse, kha i zia tho em mai ruah sur leh hma hian kan haw lehnghal mai ang"



"Midang rawn hruai i nei em ni?" 'Kan' tih a hman avang chuan ka lo ti vat a.



"Hmangaiha ka rawn inhruai tir," tia min chhan chuan ka meng phawk khawpin ka ring.



"Leh ringawt a," ka ti ringawt a, "Ka sawm em em pawh a ni biklo, Biak In khawtah minlo bia a, ka û rawn inthlahtir ka tum zawk mah a nia; mahse, Hmangaiha khan, 'ka lo hruai ang che,' atia, a ngaihven ve hrim hrim che niin ka hria," ati zat zat reuh a.




Nuam ka ti ru viau tho na in ka ner nàng tho a, "In rawn kal ta sa sa thingpui in phawt rawh u," tih paha ka tho chhuak chu a mitmeng nghal lutuk avang chuan, "Eng nge?" Ka ti zui hap a.



"Ka hrethiam ania aw," tihpah hian a nui pat pat a, a inher nghal avang chuan engmah pawh ka sawi tawhlo.



Kimi chhuah hnuah ka sam ka tuai mam thuak thuak a, Remremi a awmve avangin in en erawh ka ti ta èm lo. Choka lama ka chhuah phei chuan ka nu leh Engmawii te pawh anlo thuve khar a, ka nu chuan Hmangaiha thil alo zawt mawlh mawlh a, ka nu a chhan lai meka ka chhuak minlo hmuh chuan minlo nuih suk a, mu tho hlim ka ni nen ka en tha ngam vaklo a, tawi te chuan ka'n nuihlet ve tho kha.



"Thingpui in lawk ang aw, ruahsur hma chuan kan haw leh hman tho ang," ka thiannu in Hmangaiha bula atih chuan alo bu ve mai a, keipawh chuan muangchang tawh lovin thingpui bel chu ka chhuangkai ve ta thuai a.



Thingpui vil pahin Kimi te titi chu ka ngaithla rân a, diktak chuan Hmangaiha bula awm chu a mi uap a na nge, pangai tak hian ka awm hlei thei thin lova, chuvangin thingpui vil paha an titi lo ngaihthlak chu ka duh tawk hrih khawp mai.



"Engtin maw Champuii te nen chuan in in hriat a?" Zawt chhut tak chuan ka nu'n ati a.



Inkawm thin kan ni silova engtin nge a chhan ang aw ka tih lai mekin Kimi atanga inhria kan nih thu chuan a chhang mai a, ka nu lah chuan zawhna a'n ngah khawp mai a, midang biakna hun awm lek lovin thil a zawt a, ka lo inthlahrung angreng zawk khawp mai.



Ka thingpui chhuan a so tak avang chuan ka siam zui mawlh mawlh a, a duh zawng takngial pawh ka zawh ngam loh avangin a sen hang tlawng chuan ka pe a.



Ka nu erawh thingpui a ngainat lemloh avangin tun tum pawh a duhloh thu khan min chhang a ni a; mahse, a in lo ber chuan ka thingpui siam chu a sawisel a.



"Bawnghnute pawh kan neihve reng kha, engah nge maw i atchhah em em mai le," minti zek mai a. Nidangah lem, 'inlengte thingpui mai mai tur bawnghnute pawlh a ngailo, heksakna mai mai' ti khan min hrilh ziah thin a ni reng sia, min tih dan teh erh chu ka zak bawk si, hrehawm ti bawk si chu ka tap lo chauh a ni.



"Kei chu a sen hang hian ka duhzawk hrim hrim a," inthlahrun hmel deuhin Hmangaiha chuan alo ti vat a, Kimi erawh a thinrim hmel ngang mai, engmah sawilo turin ka lo signal vat zawk a, chuti nilo se kan buai phah viau mai thei a ni.




Kimi te pahnih chu an awm rei tawhlo, an haw hma chuan an bike dahna thleng ka va thlah a. Ka nu mintih dan vanga ka thiannu lungawilo chu a tùm bûr a, keiai mah pawh chuan a thinrim zawk niin ka hria.



Hmangaiha a awmve avangin engmah phei chu a sawilo a, "Haw hunah ka lo bia ang che," tikhan kan in vei liam ta ania.



Inchhung ka luh leh dawn lai takin Mampuia te unau inkhawm pawh an rawn haw ve ta chiah a, " In va rawn haw har ve," tia ka zawh chuan an thiante ina an pengkawi thu in min chhang mai a, kan pathum chuan kan inzui lut ta nghal a.



Engmawii reuh lah chu Hmangaiha a awm chhung zawnga choka lama awmve reng si, hmuh tur pawh alo awm leh tawh lo.



"I pa ve lah hi vakchhuak reng ringawt mai, school chawlh hi awm miahlo sela a tha zawk ang, chawlh hleka zu in tum nghal ringawt mai," ka nu chuan ati bawrh bawrh a.



Engmah phei chu ka sawi hran lo naa tun tum erawh ka thlawp rilru khawp mai, engti zia nge mawni ka pa pawh hi zu in te alo chin lehzel ni. Sana ka en chuan dar 10 alo ri dawn hlek chauh a, ka pa rawn la haw theilo chu choka lamah ka nu'n a nghak ran a. Kei erawh muhil zo chiah e ti lovin ka ham zui bai bai a, ka muhil tan dawn chauh tihah ka nu ang thawm vangin ka harh leh zawk a. Ka pa chu alo haw tawh aniang rui tih hriat deuha a tawng bui bui pawh chu ka hre nghal mai bawk.



An inhnial rin em avang chuan mutthilh theih ziazang pawh a ni tawhlo, ka mu meng kar a, engtia rei nge an inhnial ang ka hrelo, an reh hnu thleng pawh chuan ka muhil thei ta reng reng lo.



Ka mutthilh theih tak hlawlloh ah chuan lukham hnuaia ka phone dah chu ka ban leh ta zal zal a, screen ka hmeh en ruala ka message dawn chuan ka lungphu ati rang nghal hle a, a number save lo mahila tu hnen atangin nge anih ka hrechiang ngang mai.



.....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)