AIZIAL - 24 By CVL Awmpuii

[CVL Awmpuii]

AIZIAL
By CVL Awmpuii


Chapter 24



A biang tawn tawnah chuan chelhin ka melh chhuk run a.



"I chungah hian eng chiah nge maw thleng le?" ka ti sup a. Ka ban chu a lo chelh ve nghal a, a mittui a dir zawih zawih mai.



"He ina chên leh ai chuan thih pawh ka duh zawk" a rawn ti ṭiau a. Ka âwmah chuan ka kuah bei leh nghal hle hle a.



Chutia rei tawk fang ka kuah hnu chuan a inla hrang dat a. "Dawnga kha a lo kal leh a..." a tih rual chuan ka sa nghal phat mai. Ka ngaihtuahna ah thil tam tak a rawn inlar nghal zut zut a. Thinrimna in ka khat nghal vek a tih theih ang.



Rara-i chuan ṭap zawih zawih chungin min lo melh a. "A khawih che em ni?" ka ti chang nghal fal a. Ṭap chhuak hawk chung hian a lu a lo bu nghat a. Ka nghing lawih mai, ka puak keh lo chauh a ni.



"A khawih che a maw?" ka ti fiak leh ṭhat a. Rara-i chu a rawn ṭap chhuak nghal rawng rawng a. Ka thisen a so bulh bulh a, thinrimna vangin ka puakkeh mai dawnin ka hria.



Rara-i chu ka kuah bet leh nghal chawt a, chhuak zet hian a ṭap hlawp hlawp a. Ka nghilh deuh dup mai.



"Min khawih a...mahse ..." a ti a, ka âwm a rawn nawr vak a. Ka inhumruh nghal ṭeuh mai.



"Eng thil pawi nge a khawih chu ka hriattir khawp ang" ka ti chang fal a. Tunah tak hi chuan Rara-i hnem ai mahin Dawnga ka khawih châkna chu a nasa zawk a. Ka kawchhûng hi a so bulh bulh maiin ka hria.




"Min khawih a, mahse a puitlin hman lo..." ka âwm a hmai phum reng chung chuan a rawn ti ṭawk ṭawk a.



A khawih a, a puitlin hman lo anih chu ! Lawm tur nge pawh ka hrethiam tawh lo. Mahse chutia thil pawi a ti hman lo hlauh chu thawk khat a veng huai mai. Chutihrual chuan kha mihring pa kha ka chhuah hauh lovang. Pawi lian tham thleng hman lo mah se ka hmeichhia a lo khawih hman tlat a ni.



Tlema a pangngai deuh hnu chuan thil awmzia chiang zawkin min hrilh ta a.



"Ka nu chhuah hnu lawkin kawngka an rawn kik a. Ka va hawn chuan Dawnga kha a lo ding a. A hmaa thil thleng tawhte avang khan a luh ka remti lo nghal a. Chuloah a mitmeng aṭang khan a harhfim lo tih ka hrechiang ngang si a. Tum nei sa rana lo kal a ang hi ka ti ber. Kawngka khâr leh nghal mai ka tum kha min lo dang hman a, a rawn lut nghal bawk a. Sitting room ah min nawr pheiin kan in chai buai ta nghal a. Rui mah se rui chhe lutuk ang kha a ni lova. A thâ a zawi phah lo reng reng. Theihtawp chhuahin bei mah ila mipa thâ chu ka lo hneh bik si lova. Ka kawr a pawt thler a, ka kekawr pawh min pawh thlak sak vek a. Theihtâwpin ka ṭang ve, mahse ka hneh ngang lova. Ka thawmhnaw inbel zawng zawng min hlih sak a. Saruak ngal ngata ka awm hnu kha chuan a hlawhtlin loh kha ka ring lo reng reng. A inphelh ve ṭan a, ka la ṭang ve char char. Mahse a taksa a len bakah a chak ṭha ropui si a. Ka hneh mai thei bawk silo. Chutihlai tak chuan vanneih thlak lutukin kawngka a rawn in hawng a. Zawma a lo lang hlawl a. Min rawn chhan ti ila a dik ber ang. Dawnga kha a phih hrep a, a sawisa zui hrep bawk a. Mahse a tâl chhuak hram a, a thawmhnaw lakhawmin a tlan chhuak zui a. Ka thâ a zawi tawh bawk nen chêt ngaihna reng reng hre lovin ka lo awm mâwl tawp a. Saruak in ka awm tih hre mah ila ka che thei silo. Tichuan Zawma chuan min thing harh a, sofa khuhna in min khuh in ka hria. Ka hrechiang tawh bik lo. Phone a hmang zui a, ka hriat sual loh chuan ka nu nen an inbia in ka hria. Ka chungchang ah an inhau hrep nghe nghe. Chumi chhung chuan ka lo harhfim ve tial tial a. An inbiak zawh meuh chuan ka ngaihtuahna a lo fim hman vek tawh a. Zawma chuan min ngaihtuah ve zia a mitmeng aṭangin ka hria. Lawmthu ka hrilh a, min ngaihtuah chung chungin ka haw luih tir a. Chuan, ka lo call nghal che anih kha. Hetah hian ka awm duh tawhlo. Ka him loh bakah nuam ka ti lo" a ti duah a.




A rilru a chiai thar leh bawk nen a sawi bah deuh niaih a. Thil pawi thui zawk a thleng lo chu lawm tak ka ni. Chutihrual chuan Dawnga chu ka chinfel turah ka dah nghal hmiah thung a. A vawikhatna pawh a ni tawh lo leh nghal a. A châk lo khawp ang.




"A pawi ka ti lutuk" ka ti sup a, mahse Rara-i chuan a lu a lo thing vat a. "I thiam loh a awm hlei nem, tunah chuan ka bulah i awm tawh a. Ka him tawh dawn tih ka hria alawm" a lo ti vat a.



A vawi tam tak chuan ka kuah leh ta thlawp a. A samah chuan ka fâwp vang vang a. Ka bulah hian thlamuanna leh himna hmu se ka ti ṭhin a. Chutiang a lo hmu thiam chu ka lawm a ni.




A luggage thlek zauh pah chuan "I bungrua mamawh tur ang i la kim em?" ka ti sup a, a lo bu nghat a. Ka rilru chu a buai ve nuaih mai. Engtia han tih chî nge ka hrethiam mai lo tlat a ni. Han inru ngawt dawn ila ni theiin ka hre bawk silo.




A luggage chu ka khai nawlh a, ka kut lehlamin a banah ka chelh bawk a. Ka bike bulah chuan kan va phei ren rawn a. Ka ngaihtuahna a buai takzet a ni.




"Engtia awm nge i duh ber?" ka ti ta ringawt a. An inah a awm duh tawh lova, hmun dangah han dah ngawt dâwn ila a baih vai ve ang reng bawk si. Ka zawhna chu zawhna âwm lo tak pawh a ni. Mahse a rilru in eng chen nge a huam hriat hrim hrim phawt ka ngai a ni.




"Ka hrelo, i thu thu a nimai" a lo ti tawp a, a kun deuh ngal a. Ka lainat thar ngang mai. Naupangtê ni si a nun sual chhuah a ngai bik lutuk hi ka khawngaih a ni.




A luggage nen chuan Bike ah kan in phur thei dawn lo hrim hrim a. Ka phone ka phawrh chhuak tê tê a, ka rilrua lo lang hmasa ber Arama chu ka call ta ngawt a.




A hma ang kha chu ni se Dina ka call hmasa ngei ang. Mahse tunah chuan ka ring zo tawh lo. Rara-i a mil lo sa em em a, Rara-i pawhin a ngaina hek lo.




Phone a lo lak rual chuan Rara-i chu hmui phunin ka bia a "Ka'n be lawk ange, tikhan lo awm lawk rawh" ka ti sup a. A lo bûk nghat rual chuan kan dinna piah deuh, thingbuk hnuaiah chuan ka va kal a. Kan ṭawng a hre lo turah ka ngai.



"Aram, i puihna ka mamawh" ka ti nghal tawl a. A ham haih ve viau in ka ring.




"Eng nge ni?" a lo ti hluai a. Ka ṭhianpa a ni a, Dina tih loha ka rin ber a ni bawk a. Tunah chuan Dina ai pawhin ka ring mah tawh zawk.




Ka buaina te chu tawi fel takin, a hriatthiam theih dan turin ka hrilh nghal zung zung a. Rara-i harsatna tak erawh ka sawi thui duh chuang lo. An hmuhsit ka hlau a, ka vêng thâwng a ni ber. Mahse chutiang mi chu Arama hi a ni lova. A zawng zawng in ka hrilh lo mah ila ka hrilh thui khawp mai.




Car nen a lo chhuak mai turin ka ngen a, Rara-i te in awmna chu ka hrilh nghal bawk a. Ani'n a lo hre sa hlauh a, a tihzia phian mai.




Ka beisei ang chiahin Arama chuan a lo hrethiam khawp mai a. Chanchin ka hrilh hriat loh lutuk ṭhin avangin min rawn hau nghal nghe nghe a.




"Zawh loh che hi chuan engmah i sawi ṭha duh ngai lova. Hetiangte hi in hrilh hriat tawn vek a ṭha a. Mipa nih vanga thil sawi ho loh lutuk te hi a ṭha ngailo. Ṭhian nihin awmzia a nei nang. Tlang deuhin lo sawi ziah tawh rawh. Harsatna ah phei chuan in pui tawn zel tur kan nia lawm" a rawn ti duah a.




Vui vai tur pawh a ni ve bawk em a ni. A chhan chu ka ngaihzawng chungchang ka hrilh hre em em ngai lova. Ka bula thil an sawi ang hu hian ka sawi ve ngai lo tlat a tin ani. Chutia a rawn sawi takah chuan ka inhmuchhuak ve uarh uarh mai.




A car nena a lo kal nghal tur thu sawiin kan inbiakna chu kan ti tâwp a. Ka thaw nghal huai mai.



Rara-i chu ka pan leh nghal vat a. "Ka ṭhianpa car nen a lo kal dawn a, nghak lawk ang aw" ka ti a. Min han melh deuh vang vang a, mahse engmah sawi buai lovin a lo bu nghat a.




Reilotê ah Arama chu a rawn thleng a. A falin kan han inbe leh rih a.



"Engtin nge in awm dawn?" a ti sup a, a meng buai ve nawk mai. "Ka hrelo, engtia tih chi nge ni ang le?" ka ti hulh a.




Chutah Arama chuan "In inru dawn tihna em ni?" a lo ti hluai a. A hmêl aṭang chuan chutiang ti duh tur angin min ngai lo tih lah a chiang reng mai si.



Chhan dan tur hre lovin ka ngawi reng a. Dik tak chuan tun hunah hian in ruk mai lo chu kawng dang kan nei lovin ka hria a. Mahse chutiang thlen tir em tur chuan mipa mah ni ila ka thisenin a zuam lo a ni ber.




Arama bawk chu ṭawng chhuak hmasa ah a rawn ṭang leh a. "In rûk hi ka thlâwp zawng a ni viau lo na in in dinhmun a khirh khan ve bawk si a. Inru pawh ni ula ka dem lovang che u, ru tawp mai rawh" a lo ti churh a.



Kan han in melh ren rawn a, hriatthiamna a khat mitmeng hian min lo melh a. Ka rilru a mang duk mai.



Rara-i chu ka va melh ṭhin a, ka bike hunna bulah chuan kun ngal chung hian a lo ding a. Ka lainat bawk si, awm ngaihna ka hrelo a ni ber e.




Inngaihtuah rei na hun a awm si lo, ka rilru a awm ang a chêt leh tawp loh chu tih theih a awm rih lo.



Chutihrual chuan ka rilruin thil tam tak a chhui kual a. Ka ngaihtuahna a vâk vel a. Lo inru ta ila engtin nge miin min sawi ang. A hmasa berah chuan 'Pastor fapa ve si' tih a ni nghal dawn a. Ka nu leh pa te hming ka ti chhe nghal pang tihna a ni dawn a. Keimah leh keimah pawh ka in dem nghal dawn a ni.




Ka ngaihtuahna lehlam chuan mahni leh mahni ka in thiam chawp a. Midang tih loh dan pawh a ni hlei nem tiin ka inhnêm chawp a. Keini aia dinhmun khirh khan lo zawkte pawh an lo inru fo tawh a. Keini phei chu a khirh khan si a, min dem lovang ti têin ka inhnêm a.




Rara-i hmel ka en chuan ka lainat a, humhim ka duh a, dinhmun derthawng a dah ka phal tawh bawk si lo.




A tâwpah chuan thuthlukna ka siam ta tawp a. Mahni in thiam chawp chungin ka ta ni tura kan inchhung rah pui chu ka thlang ta zawk a.



Keimaha inthiam lohna rilru a rawn awm dawn apiang chuan ngaihtuah zui duh lovin Rara-i ka duhna chauh chu ka dah lal a. Ka hriatchian tak em em a chu Rara-i hi ka hmangaih a ni! Ka hmangaih vangin ti ve tura ka inngaih ngai loh thil ka ti dawn a. Ka hmangaih luat vangin engkim huamin ka chetpui dawn a ni.




Rei fe Arama nen kan ngawih dun ren rawn hnu chuan "Ka ru mai ang" ka ti ta tawp a. Awih loh hmel zet hian min lo melh a. Mahse a insiam ṭha leh nghal vat a.



Bu nghut chung hian "I duh dan a nih chuan a ṭha vek mai e. Kei chuan ka dem lo che ania" a ti a. A car châbi chu min pe nghal a. Keiin ka bike châbi ka pe thung a. Zanin chu motor kan inkawl thleng rih dawn tihna a nimai.




Rara-i awmna lamah chuan kan va in zui phei ta a. Arama nen chuan an han in chibai leh hnuhnawh a.



"Engmah hlauhthâwn na tur a awm lo ania aw Rara. Hriatpuia hi a rin tlak a, ring tawp mai rawh" nelawm zet hian a ti a, ngainat awm zet hian a nuih suk bawk a. Rara-i pawh chuan a lo nuih ve seih a.




"Ka tibuai hle mai che u" a ti hap a, mahse Arama chuan "Buai lah lo e, ka tih ve theih tawk alawm" a lo ti vat a.



Kan inthlah liam hma chuan ka darah a lo beng thuk a "Tluang deuhin aw" a ti churh a. "Ka lawm tak tak ania" ka lo ti ve vat a. Ka rilru zawng zawng in ka lawm miau a ni.




Ṭhian hlutna min hriat thar tir a. Midang mamawh ve ka nih zia min hriat nawn tir bawk a. Arama bulah hian lawmthu sawi mawlh mawlh ka ba ani.



"Lawmthu in hrilh a ngai lo, man tak khan che tawp mai rawh" a ti zâng vuh a. Min nuih vur vur bawk a.




Tlan liam hmasa zawkah a ṭang a, ka bike chu a ngaihtuah awm dawn loh tih ka hria. Naktuk emaw velah kan in thleng leh mai turah ka ngai.




Rara-i kut chu ka chelh a, motor ah chuan ka ṭhut luh tir nghal a. A bungrua pawh seat hnungah kan dah tawp a. Luggage pakhat leh air bag pakhat chauh a ni a. A rit tham vak lo.




Ngawi rengin ka che zia chu min lo en mawl tawp a. A nguai vek maiin ka hria. A nun hahthlâk lutuk chauh pui pawh chu a âwm ve reng a ni. A chhel tawh zawk ngawt asin.




Kan in lam panin motor chu ka khalh mawp mawp a. Ka ngaihtuahna a vak kual leh ruai tawh a. Tum loh deuhin Pathian duh loh zawng ka ti dawn chu a ni si a. Inthiam lo viau mah ila kawng dang a awm tlat si lo a ni.




Rara-i nen chuan kan inbe lova, ka va melh apiangin pawn lam a lo thlir vauh vauh zel a. A ngaihtuahna a vak kual nasa ve viau anih hmel. Tunah chuan be lum lam turin chakn ka nei thlawt lo a ni.




Kan vêng penga ka tlan luh dawn lai chuan "Au Hriatpui" a rawn ti sep a. Ka va melh zawk a, a awm nawm theih dan tur ang berin ka nuih suk a.




"Engtin nge kan awm dawn?" a rawn ti sap a. Inthlahrung dek aw hian min zawt ka ti mai.



Ka lo thaw chhuak huk a, ka chhanna chu min han ngaichâng ren rawn a.



"Kan inru dawn" ka lo ti tawp a, ka va melh zawk a. A lo meng buai nak mai. Mahse a insiam ṭha vat a.



"Ka...kan inru dawn maw..." a lo ti bah niai a, a hamhaih ve hle anih hmel.




"I duh lo em ni?" ka tih chuan a ngawi nghal dak a. Kei hian ka nawr deuh em ni aw ka ti hman a. Mahse "Nangin ṭha i tih chuan ka pawm vek" a lo ti ta sep a. Ka lo thaw huai mai.




In rûk chu duh lovin inthiamlo hle mah ila min lo hnial mawlh ka hlau tawh.



Kan in chu kan thleng ta a. Dar 12 a rik thuak tawh avângin ka chhungte chu an mu vek tawhin ka ring. A nih loh pawhin ka nu in an room ah meng chungin min lo la nghak mai thei.



Zan ka len rei deuh pawh hian ka haw hma chu mu lovin min lo nghak thlap zel a. Ka pa nena min lo nghah châng pawh a tam mai. Chumi vang chuan chêp ta viau ah ka inngai ngai lova, hetiang taka min ngaihtuah tu nu leh ka nei hi vanneih ka inti a, ka lawm em em ṭhîn zawk a ni.



Mahse zaninah chuan an rilru ka hliam dawn si a. Ka inthiam lohna leh hrehawm ka tih na chuan ka ti ril a ṭham a. Ka hlauthâwng ve takzet ani.




Rara-i hi ngaina in lainat viau mah se hetianga kan awm hi an duh dan a nih dawn loh bakah an rilru a na dawn lutuk. An lo thinrim viau mai thei bawk a ni.



Rara-i chu ka kai nghal a, ka kut lehlamin a luggage ka keng a, ani'n a kut leh lamin a air bag tê fel at chu a khai ve bawk a. A kut a khur ve dar dar mai, a zam ve hle a ni mahna.



"Min ring em?" tiin chiang zetin ka melh a, min lo melh let ve kar bawk a.




"Ka ring che" a lo ti nghet ve charh a. Chu chuan inrintawkna tam tak min pe a ni.



Kan in hi light kan off thim vek ngai lova. Zan lai ṭhan harh eng emaw a chêt a harsat lutuk loh nan choka light hi chu kan on tlaivar zak zel.



Zan dang ang bawkin choka light pawh chu a la êng a. Pawn lam aṭangin a lang chiang ngang mai.



Kawngkhâr chu dîm thei ang berin ka hawng a. Rara-i chu ka chelh nghet sauh bawk a. Vanneih thlak lutukin ka ti dawn nge tumah an lo meng tawh lo hlauh a.



Mahse tih tur ka nei tho, ka nu leh pa te kaihthawh a, thil awmzia ka hrilh hmasak ngei ngei a ngai.



Choka ah chuan Rara-i bungrua chu ka nghat a.



"Lo awm lawk rawh" tiin ka nu leh pa te room lam chu ka pan san a. Kawngkhâr chu ka kik karh karh a. Rei pawh rial lovin an rawn hawng khep a.



Ka nu nen kan inhmachhawn ta rân mai, mitmeng dam dap hian min lo melh a.



"I lo haw chiah em ni?" a lo ti var a. A landan aṭang chuan a lo la muhil miah lo anih hmel.



"Eng nge ni ta Hriatpui?" ka pa âw ka hriat zawm ve nghal a. An lo la meng ve ve chu niin.



Kawngkhâr phên aṭang chuan ka pa chu ka va melh a, dawhkanah Bible leh notebook a lo in chhawp a. A ṭhutna bulah chuan chair ruak a lo awm bawk a. Ka nu nen Bible an lo zir chiang leh tawh tih a chiang reng mai. Chu chuan ka inthiam lohna a ti zual sawt a. An rilru ka ti na dawn si a.




"In lo chhuak lawk hman em?" ka ti sup a, ka hmel thutak lutuk chuan ka nu a ti ham haih deuh a. Mahse engmah min zâwt buai lovin "U Sangzual" a ti a. Ka pa chu a lo hawi vat a.




"Hriatpuia hian sawi duh a nei anih hmel" a ti dam diai a. Min lo dawngsawng ṭha mai bawk si a. Ka kawchhûng hi a khur ru ngat ngat mai.



Choka ah chuan kan inzui phei a. Rara-i an hmu thut chu an hamhaih ve ngang mai. A bungrua an hmu tel leh zel si a.



Rara-i lah chu a lo kun ngal a, ṭum danga hmel hmuh nuam em em ṭhin, ka nu leh pa te bulah phei chuan hlim hmel pu reng ṭhîn kha a zâm a. A kun ngal mai a.




A kutah chuan ka va chelh nghal a. Ka huaisenna zawng zawng sâwm khawmin ka Nu leh Pa te chu ka melh tawn zak sak a. "Nu, pa, Rara-i nen hian kan inru" ka ti mâwl tawp a. Ka zawi zawh rual chuan ka sa chhuak vek thei nia mawle.




Rara-i lo îp chawih pawh chu ka hre reng, mahse sawi tlang nghal tawp hi thil ṭha ber a ni tlat si a ni.




Inchhûng chu a reh ṭhuap a, ka nu chu a hamhaih hmel ngang mai. Ka pa erawh chuan min melh ngur a. Thinrim hmel leh lungawi lo hmel pawh a pu lo. Hamhaih hmel lah a pu hek lo. A mitmeng chu ka chhiar thiam lo.



"Hriatpui..." ka nu zawk chu a rawn ṭawng chhuak hmasa a. Sawi zui tur a hre hlawl lo aniang a kut a phar chhuak hluai a, a dah thla leh a.



"Eng nge i sawi awmzia?" a ti leh hap a. Ka nu hamhaih lutuk chu ka hrethiam, mahse ka pa awmdan chuan ka ngaih a ti ṭha lo takzet a ni.



"Kan inru" ka ti leh tawp a, ka paltlang tur ang ang chu patlang pawp pawp mai ka duh.




Ka nu chuan "U Sangzual..." a ti hluai a, ka pa chu a melh a, thinrim ai mah chuan ṭah chhuak ṭeuh hmel a pu.




Ka pa chuan ngawi rengin min la melh tawn zak zak a.




Kan ngaichâng ṭhup a ni ber.



A hnu deuhah chuan "I ṭhu phawt teh ang u" a ti dam thluam a. Ka beisei ai daihin a ṭawngka chhuak a dam a. Ka lo thaw huai mai. Mahse ka ngaih a ṭha ta nghal vek tihna erawh a ni hauh lo.




Sitting room ah chuan kan ṭhu khawm ta rân mai a. Vantei pawh an kai tho ve nghal a, kan lo awmdan aṭang chuan thil a hrethiam ve nghal mai a. Ka nu ang chiahin a hamhaih hmel ve khawp mai. Engvanga tel tir ve kher nge an nih pawh ka hrelo.




Ka pa in "Hriatpui" a tih chuan ka en nghal vat a. Mitmeng tak run hian min lo melh a, "Ka beisei lo asin" a lo ti khauh a. A aw a nghet churh a. Rilru na emaw thinrim hmel pu lo mah se hrehawm ka ti em em tho si.



"Pa, kawng dang kan nei lo alawm" ngenngawl zet hian ka ti a. "A ṭha lo asin Hriatpui " ka nu chuan a lo ti vang vang a. A rilru a nat hmel ta khawp mai. Mahse Rara-i ka Hmangaihna ka la dah lal fan a. Hnungtawlh san thei ka ni tawh lo.



Chutah ka pa chuan "Chhia leh ṭha hre rual i ni tawh a. I naupan têt aṭangin Pathian hriatna nen kan enkawl ṭhin che a. Ka thin tih rim chu sawi loh i awmdan apiang khan ka lung i ti awi em em zel a. Ka chhuang ru veng veng ṭhin che. Tuna i thuthlukna ah hian i chiang viau turah ka ngai a. Tu pawi nge i khawih i hrechiang a. I nu leh pa te rilru hi i hliam satliah lo. Pathian rilru i hliam a ni. Mahse engah mah nawr luih che ka tum lo. Dan zawhkim i nih rual khan i chunga kan mawhphurhna chu i nu nen hian kan hlen tawh. Tunah chuan mahni kawng i thlan ve a hun tawh a. Tuna i thil tih hian min ti thinrim lova, Rara-i chungah pawh thinrimna ka nei lo. Mahse Pathian Thu vangin min hliam tih hria ang che u. Chutihrual chuan in chunga sual hi ka tum lova, khirh lutuk pawh ka tum hran lo. Puitling in duh in thlang tawh a, sawi zui vak ka tum lo. In pa ka nihna ang chuan ka dem che u, mahse mawhphurhna ka hlen ang" a ti duah a.




A thusawi mal tin chuan awmngaihna min ti hre lova. Ka rilru natna tur leh hrehawm ka tih ngawih ngawih na turin ṭawngkam chhak chhuak lo mah se min dem ruala min pawm thiam lutuk chuan min vit sawk sawk a ni ber.




Ka lawm a, hrehawm ka ti a, ka in thiam loh em em a. Ka pa thu chu puitling ka ti a, rilru a ti buai map tho si.




Mahse duhthlanna ka siam tawh a, tawpsan laklawk chu ka duh tawh bik lo.



Kan pa a nihna anga mawhphurhna hlen a tum tlat erawh chuan min ti thlamuang takzet a. Chu chuan ka inhnêm tawp mai ani.



Ka nu erawh chuan rilru nat hmel lutuk hian min melh ngawih ngawih a. Rara-i a lainat ve tho si a, min dem pum hlum duh ta bik lovah ka ngai tawp mai.




Ka pa bawk chuan "Va indah lut rawh u, Vante, nangpawh mu leh tawh rawh, i û te chanchin hre nghal tura ka duh che avângin kan kai tho che anih kha. Zuali, keini pawh mu ang" a ti leh zung zung a.




A ṭawngkam dam thlup te chuan keimahah inthiam lohna nasa tak a thlen zual a. Ka thuthlukna sawh sawn erawh ka tum hauh silo.




Vantei chuan min han melh tawn zak zak a, ngawi rengin room lam a pan ta hram a. Ka nu la ṭhu reng chu ka pa in a hnungah a beng dat a "Hawh le, Duati" a ti sup a, a kai tho nghal bawk a.



"Harsatna in neih chuan in sawi dawn nia, muttui u" ka pa bawk chuan a rawn ti leh a. Ka hamhaih lek lek zawk a ni.



Kan chhûngte ho chu room ah an lut bo ta diak a. Rara-i nen chauh kan awm leh ta.




A pangngai hlawl si lova, a inthlahrun hmelin hrehawm a tih hmel si a kei talin pangngai taka ka chhawn a ngai tih ka hria a.



"Lo kal rawh le" ka ti sup a, ka nuih lui suk bawk a. Ka room-ah chuan kan han indah lut ve ta poh a.



Khumah chuan a ṭhu zum zât a, "Lo mu la, hmai ka phih zawhah ka lo mu ve ang" ka ti a. A lo bu nghat a.




Hmai phih tur chuan bathroom lam ka pan nghal a. Tun atan chuan eng thil mah ka ngaihtuah thui duhlo. Rara-i nen kan inkar chiah ka ngaihtuah duh.



Hmai ka phih zawh a ka va chhuah leh chuan lukham nghengin a lo ṭhu mu deuh a. Min hmuh rual chuan a lo meng buai nak a. Ka nuih suk a, lai zet hian a lo nui ve ta mai bawk a.



Ngawi rengin ka hmai chu a ka hru hul zung zung a. Ka tshirt hak lai chu hlipin drawer ah ka bâng a. Khumah chuan ka va inthawlh ve ta a.



Kan pahnih chiah kan ni ta bawk si a, inru kan ni bawk a. Ka lai ve huih mai.



Ka va inthawlh rual chuan a lo mu ṭha ve vat a, mahse sir deuhah chuan a lo tawlh nghal hrat hrat a. Ka nuih a tiza zawk mange. A lai ve tho tih lah ka chiang ngang mai si a.



Tichuan khum sir tawn tawnah chuan mu in kan inhawi tawn a, kan inmelh ta ran mai.



"Au Hriatpui, ka tih palh aw" a lo ti sep a, "Eng vang ngawt chuan maw?" ka lo ti nghut a. Tun atan chuan inthlahrung hmel hi pu tawh lo sela ka duh.



"Buaina ka thlen reng zel che a, tunah pawh i duh loh dan deuhin i awm a ngaih phah a" a lo ti halh a. Ka awmdanah khan inruk ka hreh zia a lo hrethiam ve vek anih hmel.



"Ka hmangaihna che hi a pawimawh ber" ka lo ti churh a, mitmeng buai nakin min lo melh nghal a. Awih lo hmel a pu bawk. Ka vawikhat sawi na a ni miau a ni.



"Ka hmangaih che" ka ti leh sup a, a mittui a parawl nghal kuang mai. Rang zetin ka va tawlh hnai nghal ruak a.



Ka kuah rual chuan a lo ṭap khur ngat ngat a, "Ka lawm e aw" a rawn ti ṭiau a. Ka lo nui huk a.



"Inneih zanah i ṭap nghal pang mai a, in thlêm zin kan va ngai awm ve" ka lo ti fiamthu a. A rawn ṭah nui ve hak mai.



A inlahrang dat a, kan mit leh mit a intawng ta siah mai. "Kan inneih tawh tihna maw?" a lo ti ha a. A ṭahna avangin a mit chu a de sawr sawr a, hnar sen tek te chuan a ti lang ṭha zual ngawih ngawih.



Chutah nui suk chung chuan "Ka nupui i ni tawh a, i pasal ka ni tawh bawk" ka lo ti nghet charh a. A rawn nui ta var var a.



Ka fawh hmasak ngai lovin ka hmuiah chuan a rawn fawp zeuh a, a inlahrang leh nghal vat a.



Ka âwm zâwn aṭang chuan min lo melh chho kiau a, a hnara ka zuk seh zauh rual chuan a lo nui hak a.



Ka hrawk bawk chu a rawn khawih kual riak riak a. Rilru kawi pu a khawih a nih loh zia hrechiang mah ila keimah zawk min tidanglam ta tlat a.


Zanin hi kan inneih zan ang a ni a, ka ruk tawh ber chuan insum a ngaihna ka hrelo a. A kut lah chu a hlei zek bawk si a, ka lo kuah hnai nghal sauh a.



Ka taksa danglam ta chu a hrethiam ve aniang a chil a lo lem ri khalh a. Zam hmel zet hian min melh kiau a "Kan ti dawn mi?" a lo ti heu mai. Ka lo nui chhuak hawk a, min ti zau thau vek thei.



"I duh em?" ka ti sup a, a lo meng buai nak a. Min hnar ka hlauh zia mai chu ! Ka taksa a danglam nasa tawh mai si a.




Mahse "I thu thu" a lo ti ta a. Hrilh nawn ka ngailo chiang kher asin. Ka thu ngeiin ka fâwp nghal siah a. Chhanna pawh ka dawng ṭha ngang mai.



Ka room chhung chu kan pahnih thaw halh halh riin a luah khat nghal a. A mitmeng phelh phang te, a thaw ri ve ham ham te chuan mipa ka nih zia min hriat nawn tir a. Tawp chin nei lek lo khawpa khawsak pui hrep min ti châk ber mai.



Kan thuamhnaw te chu hnawk tiin kan phelh darh nghal nuaih a. Ka taksa a lo chûl kual ve na te chuan min ti zau thau zual kher mai.



Saruak ngal ngata Rara-i han hmuh meuh chuan rapthlak khawpin ka thisen a ti lum. Zah hmel deuh hian a lo sen ṭan ṭan a, ka zuk fawp leh nghal a. Rang zetin min lo chhang let a.



A tâwp ka thlen pui tur chu eng in nge min mawlh ka hrelo, ka tawp thut a. Rara-i pawh keimah ang thovin a lo meng buai nak a.



Chiang zetin kan inmelh a, ka kawchhûng a che dawt dawt mai. Mawlh tu ka hriat si loh hian a tâwp thleng theilo turin min siam ti ila ka sawi sual lovang.



Rara-i chuan harh chhuak thut ni awm tak hian min nam dat a. A bulah chuan ka let thla nghal tawp a.



Rang zetin kan puansin theh hlim tawh sa chu a ban khawm a, a inkhuh ṭha nghal sawk sawk a.



"Au Hriatpui...ka ngam lo, ka thei lo, kan ti thei lo, a dik lo" a ti nghal nawk nawk a. A chiai hmel ngang mai.



A awmdan chiah hian ka awm ve a ni. Pathian pawi lian tak khawih tur angah ka inngai a. Ka tisa châkna te'n min kian san nghal duak a. Engtin nge a tâwp thleng ṭep tawh chunga ka tâwp san theih kha ka hrethiam lo. Ka thisen lum vanglai tak a la ni zui a. Hmeichhe îtawm tak a ni tho bawk si.




A bul ber chu Pathian a ni, Rara-i nen chuan kan inmelh vung vung a. Engmah sawi lovin reife kan inmelh a. Kan thinlung a inhmutawn viau in ka hria.



A tawpah chuan a rawn ṭap chhuak ta hak a, "Pathian a awm" a rawn ti chhuak hak a. "Kan tih theih loh chhan kha Amah" a lo ti leh a. Lawm em em hmel hian min melh a, ka kawchhûnga hmangaihna awm zawng zawng hi a phawrh chhuak vek maiin ka hria.




"Ka rilru ang hi i pu ve tho tiraw?" ka tih chuan lawm hmel zet hian a lo bu nghat nghat a. A ṭap zawih zawih bawk a. Zanin a mittui tlak hnem tawh zia hi ! Mahse chhan hrang hrang vang ani.



Tuna a mittui tla hi chu a thuk bik ngawih ngawih a, thinlung a fan zual raih mai.




Inru tura inhruai haw si kha ka room chhungah ṭhingṭhi in kut inchelh rialin kan ṭawngṭai dun a. Pathian hnênah lawmthu kan sawi a.




Rara-i ṭawngṭaina min hneh em em tu chu "Min rêl fel sak dawn, engti kawng zawng pawhin min rêl fel sak dawn. Ka ring tak tak tawh ang che. Ka mihring chhelna ah innghat tawh lovin, ka tawrh theih na ah innghat tawh lovin nangmahah ka innghat tawh ang. Ka phur rit mah se min phurh zui zel dawn tih ka hria. Ka tawrh reng i phal dawn lo" tiin Pathian hmaah a ṭap zawih zawih a. Min hneh asin aw.




Kan ṭawngṭai zo chu kan thawl huai ve ve in a hriat a. Mahse eng eng emaw kan lo ti ve hman nual si a, a lai tlat pek a. Keipawh ka ni ve tho. Mahse mipa zawk na na na chu ka inthunun thei khawp mai.




"Hnute nalh nu" ka tih chuan min lo chûm ṭalh a, a lai ngang mai. A va han inhmeh lo tak. Kan nui dun ta hawk hawk a.



Tlai khaw hnuah kan chhungte kan tibuai leh chûk chûk a. Ka pa chu a lungawi hmel ta ngang mai. Ka nu lah bang lo, hlim zet hian min nuih dun var var a.




Ka pa chuan "Ka rindan vel ania" a lo ti sam then a. A ngaihna hrelo fe a ka lo melh lai chuan "I inhriat chian aia nasa in i pa hian ka hrechiang che. Chu aia nasa chuan Chunglam, Pathian khian a hrechiang che" a lo ti nghet charh a. Ka harh ta kuar mai le.




Kha leh chen Pathian tana ka lo inserh ve tawh na te, a tana ka thil lo tih tawhte avang khan Pathianin a hun takah min hriat zia a rawn lan tir a ni. Lalpa mi hriat nih tluka thil hlu hi a awm reng reng lo.



Inru ve si kha Rara-i ber chu Vantei room ah a mu ta daih a. Inthlahrung dâk tawh bik lovin a hmel a zâng vah tawh a.




Ka nu chuan "Rara, i mu thei ang tiraw?" a lo ti fiamthu a. A laih ve ka rin tehlul nen "Au Hriatpuia bula riah chhin hrim hrim chu ka châk a, mahse a tih chî bawk si loh a. Ka mu thei mai ang" a lo ti duah a. Ka chhungte nuih a ti za ngang mai.




Zanlai laiah kan chhungkua in kan nui dar dar a. Dar 2 a ri thuak tawh si a, thawh kan hai hlawm ang tih chu a hlauhawm khawp mai.



Ka pa chuan "Mu phawt ila zing lamah Rara-i awm zel dan tur pawh kan ngaihtuah dawn nia" a ti a. Kan lo pawm tlang khawp mai.



Ka nu leh pa te chu room-ah an inzui lut nghal a. Vantei lah chuan min lo fiam ve ngei a "Ka lo va mu ang, tikhan lo inthlah ru" tiin a nui kar kar a. Room-ah a lut zui nghal a.



Chu velah Rara-i chalah chuan ka fâwp nghal vang vang a "Biakin hawngin kan innei dawn nia, Kohhran dan thianghlimin " ka ti nghet churh a. Lungawi hmel zet hian a lo bu nghat a.



Kan duhna te kha ti puitling in lo inru ta ila chu kan hlim tho ang a, mahse dam chhung hriat reng tawh tur Pathian pawi sawi kan nihna chuan kan nun a tibuai ve tho in ka ring.




Heti hian Pathian duh dan zawm mah ila harsatna chu kan la tâwk tho ang, mahse Pathian vangin kan hneh zelin ka ring.



Tukṭhuan ei laiin ka pa chuan ro a rêl zung zung a. Rara-i harsatna tawhte pawh a bo a bang awm lovin an hrethiam ve vek tawh a. An ina let tir leh chu an phal tawh bik lo.




Kawng khat chiah a awm a, chu chu a nî te tu emaw ber ina awm rih a ni.



Nunmawii ka ngaihtuah chhuak lo thei lova. A chhûngte zingah Nunmawii te lo chu hriat tlangnel sa ka nei lova.




A huat hlau deuhin ka sawi a, mahse rin ai takin a lo hrethiam khawp mai.



"Ani Nêmi te in chu a fuh berin ka ring" a lo ti ve thlap a. Chutia a duh ve tak berah chuan a nî te zînga ziaawm ber ni hmiang ka lo ti mai.



An phone number te chu ka pa nen an inpe a. Ka pa chuan a buaipui sak vek a. A ni Nêmi te pawhin an lo hrethiam ngang mai. Chuti lutuka sual chu an ni bîk lo aniang.




Rara-i chu an rawn hruai nghal chûk chûk a. Nunmawii pawh a lo tel ve nghe nghe. An fanu Lawmi tuitor ka nih avangin Pi Nêmi te nen pawh kan inhre ṭha sa a. Tun atan chuan ngaih a ṭha rih khawp mai.




Pi Nêmi chu nêlawm deuh hian a rawn ṭawng nghal bawrh bawrh a "Ramtei awm dan hi chu kan en liam tawp tawh alawm. Marema dam lai pawh khan sawi buai en ah kan en tawb lova. A vahpa Dawnga pawh chu a ṭul dan ang zelin a chungah action kan la ang. Rara-i hi ngaihtuah chûk chûk ngai lo mah ila ka vahnu a nihna a bo lova, ka hmangaih asin. Ramtei'n chhûngkua min chin let dan em em hi chu a la hre khawp ang" a ti hmarh hmarh a.




Rara-i thlavang a hauh ve zia leh a thinrim zia chu hai theih a nilo.



Chutah ka pa chuan "Thil awmzia engkim in hre bawk a, Rara-i pawh kan fanu ang tho a ni a. Kan sawi a mawi ni lo mah se in kutah a him dam turah kan ngai a, nang ni lo han bêl bul tur vak a nei si lova. Kan han sawi khawm nak nak khan 'Ani Nêmi ' a lo ti ve vat a. A beisei awm chhun in ni tih in hrethiam ang chu maw" a ti chuar chuar a. Ṭawng sual hlau deuh hian a ṭawng a.




Pi Nêmi chuan a lo pawm thiam khawp mai "Ngaihsak ngawih ngawih tur kan nih laiin kan lo ngaihsak tawk lo zawk a. Nangni in lo awm hlauh a, theihtawp chhuahin in lo buaipui ṭhin a. Kan tluk lo ngawt mai che u. Ka pa vângin chhungkhat ang tho kan ni a, kan in hrethiam tawn aniang chu" a lo ti ve thliam a. Kan boruak chu a ṭha khawp mai.




Rara-i pawhin nui hmel tak tak a pu veleh thei ta a. A lawmawm takzet a ni.




Heti hian Ani te a ngaihdan pawh inthlak ve hret hret sela, in hrethiam tawn takin inhmangaih tawn sela tih chu ka duhthusam a ni.

___________*____________*____________*_____