MY HEEYA..!! CHAPTER - 4 BY : Msi, Hmeichhe naupang tereuhte ( Mira Siakmawii )

[Msi Miluhlulnui]

MY HEEYA ♡ CHAPTER - 4



Ziaktu : Mira Siakmawii





☆ RISK TO CLOSE TO YOU ☆





• Author's note : Ka phalna lo chuan khawiah mah copy paste phal a ni lo..!!









"Enge in hriat a..?" Ka ti hluai a u Mampuia nen lah chuan an nui suk suk lehnghal.







"Kan rawn surprise che a nih hi i lawm em..?" U Mampuia'n rawn tiin min rawn kuah a ka hamhaih bawk si nen chuan kuah let mai nachang pawh ka hre lo.







"In â deuh em mawni le," ka ti leh rih țhin, an nui ruh ruh ringawt a an pahnih chuan ka entawn țhin. An rawn kal ngei tih hriat nan an bal paw phuk tho bawk si.







"Min luh tir ve phawt la ka nau," u Mampuia'n a rawn tih chuan thaw hak in an pahnih chuan ka en a. Rinzuala phei chu mak ka ti nizanah a rawn zin dawn thu min rawn hrilh ringawt a tunah hetah ka hmu leh ringawt bawk si, ka awih thei hlawl lo.







"Pheikhawk phelh ang che u chhuat ka nawt mek ania," tiin ka lut a. An rawn lut a kawng chhe bawk leh khu bawk nen chuan ka chhuat nawh sa an rap te chu mawza chhan ah pawh nise an ke thla a lang tho, a paw phuk lehnghal.







"In rap bal vek," ka ti hlak a, chhungkua a chhuat nawt țhin te chuan an hrethiam viau ang.







"Sorry..!! Tui min lo lum em..?"







"Lum nang in rawn chho tih pawh hre lo hian engtin nge lum se min tih ni. Lo in lum rawh chhuat pawh ka la nawt zo lo ka nawh loh lai zel kha rap ang che," ka ti zui zat a. Thuk lam a rawn pan thleng chuan a rahna ka en zui zel hi a ni ber.







"I dam tawh tih a hriat i vin hle mai," Rinzuala'n a rawn tih chuan a lam ka hawi vat a. Kan sofa ah țhu in a khup hnih ah chuan a kiu a nghat a keimah chu min en run bawk.







"Ka dam lo tih i hria maw..?" Ka tih chuan a bu nghut a. Min en dan avang chuan ka lai lek lek dawn in ka hria ka biang a sa hat hat mai.







"I khua a sik țhin tih ka hria alawm, i zia deuh em ala sik țhin em..?" A rawn ding chhuak zui a a sang nasa mai sia kei nen phei chuan ding dun ila pafa te pawh kan ang zawk ngawt ta ve ang.







"Sik tawh rih love ka zia ve leh deuh tawh. Lo țhu la chhuat ka la nawt sia an rah balh chuan ka haw teh ania," ka tih tak ah chuan nui huk a phar zeuh in a țhu ve leh mai a. An ke thla mah tih tawh nak alaiin.







"Rinzual, a thinrim chuan i ngam lo ang nangpawn. Tebawiha nen pawh kan tawm zal zal zel," u Mampuia lah in a lo tui hnih ve leh zat bawk nen chhuat ka nawh zawm a. Ka chhuat nawt lah hi huh zet lo chuan ka nawt thiam si lova, ceiling fan leh fan pangngai ka on vut vut zel.







Ka nu te pawn an lo chhoh tur thu hi an lo hre daih tawh a keimah min rawn surprise tum an nih ve ngei avangin ka vui ta lem lo.







Tui so hmasa ah Rinzuala a inbual hmasa a thingpui sen hang an in chak miau avangin ka lum sak zui bawk a. Tlai lam a tlak tur anhling mal turin thlangra nen ka in chawi phei zui bawk.







"Enge a lo tih ve dawn a..?" Bathroom lam ka mitmei zeuh va.







"Chu DC ah chuan a kal dawn a, a nitei income certificate a buaipui sak dawn ni tur a ni," a ti a chhungte an nei tho sia heta rawn thlen daih ka ti rilru rauh rauh.







"Mize pangngai, a hmaa i mizia ang kha pu ang che," thupe aw zet hian a ti zui zat a ka lo bu deuh nghat bawk.







"Anih nang..?"







"Pu ka dil a ni nga vel chawlh amah a awm dawn lo tho a ka rawn chawl thei a nih hi. Ka awm loh chhung a ka ai awh thei an awm tho a ka lungngai lo, i damdawi kha a zo tawh iti tiraw..?" A bag a ban zui a.







"Zo chu a ni deuh mai, kan lei tlem êm a ka ei zo thuak tawh chu a ni ber," ka ti a. A bag ațang chuan sarang dum a in fun hi a rawn phawrh chhuak a, "ka lei dik em han en teh dik loh chuan naktuk lamah sumo ah kan thawn thla nghal ang a. Tebawiha a dang kan chah dawn nia," a rawn ti zui zat.







"Dik e ka ei lai nen a inang chiah chiah alawm," ka tih lai mek chuan bathroom kawngkhar ri ah chuan ka hawi vat a. Rinzuala chu towel dum chauh veng hian a rawn chhuak a a taksa nalh lutuk a in hruk hul țhat loh avanga tui tlem a taksa a la bet nen zawng zawng chuan a chhe lo vel vek.







"Ke hrukna hran in nei mial em ka lo pai lova," a ti a, a chhip sam huh lai a chal ah an bet thlar a amah lah chuan a lu a thing leh țhin.







"Hei helaiah hian ka zar a lo ban mai la, au Mampui nangpawh va inbual nghal rawh ka nu te an lo haw chuan bathroom i chang dawn lo ania," ka ti nghal sap a, Rinzuala ka melh leh ţhin a a dar pharh hlai țha zet te leh a kawng fêk rat te.







A pian nalh zet leh a âwm khauh hmel tak te, a khaberuhkual in vuah fuh lutuk te leh a ban hrawl tak kar a thisen zam rawn pawng chhuak leh țhin te chuan keima thisen te thleng hian a ti lum chho ve vek in ka hria, chil ka lem zui khalh mai.







"Room ah va in thlak la mi an lo luh palh in," ka bul a rawn thlen rual chuan room lam kawh pah in ka ti a.







"A pawi chuang lo, lotion in nei tiraw chu pawh ka ken theihnghilh a," a țhen deuh suk lehnghal amah lah chu.







"Nei e dawhkan chungah khan a lo awm mai ang. Mampui va inbual rawh ka tih chu," ka lai lutuk in zah zel ah au Mampuia chu ka tur sek ringawt a. A ni phone khawih tui lah in a lo ning thei ngang mai.







"Aw le, fai ser sawr in kan inbual ang e. Rinzual, tlai lam ah khua chu ka fan pui dawn che nia ka nu te lo thleng ve phawt sela," ti lung lung in towel bat a zai rat rat in bathroom lam a pan a. A senior tawh nen nen hian âtna lai deuh hi ala nei ve tlat.







"Vivi," Rinzuala'n ka hming a rawn lam chu ka sa nghal up up mai. Ka âwm ka dawm a ka thinphu a hma aiin a lo rang dawt dawt bawk.







"Ummm," ka ti zawi sap a, ka zam a ka thisen zam te hi an phu euh euh in ka hria.







"Lotion chu ka hmu lo," a tih chuan ka ding chhuak a.







"Dawhkan ah khan a awm lo maw..?"







"Ka hmu lo a," a tih chuan room ah ka lut zui ve nghal a room lai tak ah chuan towel chauh veng khan a lo la ding a, a taksa melh loh hram ka tum a mahse avan harsa tak em..!! A towel tê pakhat ken chuan a sam a lo hru mawlh mawlh a a rim tui zet chu ka awmna ațang pawn ka hre pha hial.







"Tah hian kan dah reng sia ava mak ve," ka zam tih thup nan a khuh zui kharh a tiin ka pan phei a, dawhkan vel chu ka enkual a chhuar te. Keimah chu ka za mer mer a lotion pawh zawng mah ila ka thil zawn ber pawh chu ka hria pawn ka hre lo, ka mit te thleng hian a vai vek in ka hria.







"Eee hei heta hi kan lo dah daih a nih hi," tiin dawhkan hnuai ami chu ka ban a. Mahse ka ding chhuak ka inher tur chiah leh ka taksa hnaih zeta a rawn ding, dawhkana samkhuih kan dah a rawn ban nen kan in nang ching a ka che tawh lo.







Ka thin a phu su dup dup a a phu nasa lutuk hi a phu chhuak mai ang tih ka hlau a ni.







Lotion ka lo lek chhuak bawk nen a âwm ka taksa in a dek chu ka la sawn vat a, "i va sa ve," min la ti zui.







"Hei aw lotion chu," ti halh in dawhkanah chuan ka dah a ka lai lutuk kal mai ka tum chu ka ban rek ah a rawn vuan ta mai, Lalpa enge ka chung a thleng ta hi ka thi thei mai dawn in ka hria kei chu.







"Enge..?" Ka ti a, ka aw rik chhuah dan pawh a dik lo ka tum ai in a chang hret mai.







"I sa lutuk a i khua a sik leh ami..?" Min rawn awm hnaih in ka pang a rawn dep a ka lungphu hi tawp tur ang mai hian a awm. Ka ban rek ala vuan reng a dak vah a ka en chho chu min rawn en ve chiah bawk nen ka sa chhuak nghal vek.







Ka khap fak fak a, a ni erawh chuan ka bek te dawm in sa min tih thu a sawi zui leh. Ka biang a sa hat hat a tomato ah ka chang zo mai dawn in ka in hria.







Ka ngaihtuahna hi a țha lo tih ka hria mahse tunah hian min fawp se tih zawng a ni ka ngaihtuah ni.







"A sik lo ka thlan a tla a lum ka ti a nih hi, inthlak rawh thingpui pawh a in theih tawh ang," ti a ka ban chu pawt lawk in room ațang chuan ka chhuak a. Ka chhuak fel chiah tih ah chuan ka âwm ka dawm a thawk harsa khawp in alawm le ka thinlung hi a phut nasat le.







Hetiang khawp a thinphu nasa tur hian tuman min la siam ngai lo amah Rinzuala chauh kha ala ni.







Ka mitthla ah taksa inhnaih zeta kan awm lai kha a rawn lang a ka mur deuh chuai thei mai. Keimah kha ka za mer mer a ka thinphu nasa lutuk khan thawhah te pawh min siam lek lek ni khan ka hria.







Thingpui so ri ka hriat rual chuan inngaihtuah harh in chu lam chu ka pan nghal vat a gas off thuai thuai a thingpui thli chhuak in kurtai nen dawhkanah ka chhawp sak a, keipawh chuan anhling bawk chu ka mal leh.







Room ațanga a rawn chhuak ka țhutna piah a a rawn țhu thla te chu rim tui chem chem tak a ni, amah chu ka melh zawk a a sam a thur siang a ala hnawm deuh chap bawk nen a nui deuh suk a, a pa ngawih ngawih tawp a ni mai.







A phone khawih in a hmet mual mual a chutah hmeichhe pakhat aw nalh deuh mai in a, "i thlen hunah lo sawi rawh aw," a tih ri chu a rawn play a hlim hmel deuh a nui sun sun in voice a thawn let zui zat bawk.







"Eng ber maw i lo tih dawn...?" Ka ti mawi hnai ve a, amah pawn phone hmet thim in thingpui chu a ban zui ve a.







"DC ah ka lo kal dawn a, nitei thil pawimawh tihsak a ngai tho sia i u a rawn chho dawn bawk nen ka rawn zui a a remchang tak tak a ni," a ti zui ve duah.







"Hetah i rawn thlen duh tak tak pawh ka ring lo a, bakah i rawn chhoh pawh kha ka ring lova," ka tih chuan min rawn en a ka lo en ve chiah bawk nen ka țek sawk mai hian ka hria.







"Min awih rawh ka tih kha," tih pah in a kiai zui suk a.







"Tak tak in, in in rawn tlawh ni pah fawm in a remchang ka ti êm a ka cham rei dawn chuang lova, min mikhual thei ang chu maw," a tih chuan ka nui hak a.







"I cher haw vek mai ang," ka ti a amah pawh a nui ve hawk hawk mai.







Au Mampuia inbual zawh ah an chhuak a ka țhiante chanchin hrilh pah in rawng ka bawl zui vat vat. Tui ka lum pah bawk a ka pa hi a harsa reuh lutuk a eng ang a khawlum ah pawh tuilum a inbual țalh hi ala tum zel.







Zanah chaw ei kham ah chuan Lawmi te in a kal turin ka insiam zui malh malh a. Kawr ban tlawn pan te ka nghawng khuh lek lek hi ka hâ a keimah hi ka uap leh churh vek tawh.







"Nu, ka hne tawh em mai," darthlalang a in en pah chuan ka ti a. Ka vun a dâng pel a keimah a sen na reng reng lang ve lo te chu hmuh hreawm pawh ka in ti țhin. Ka sam a dum bawk nen dik tak chuan in chei pawh ka peih ngai lo.







"Eee i beidawng hma lutuk a nih kha. Pathian hian kan tan a țha lo tur chu a ruat ngai lo ka tih fo țhin kha tawrh thiam kan zir hi a ngai tak zawk meuh a ni,"







"Mahse a harsa ve thei êm asin," ka ti halh a. A chang chuan ka pawn chhuak ve chak thei lutuk hi tih luih a nâ pawh tuar tawp mai ka thlang ru hial țhin.







"Ka hrethiam alawm bawihte, mahse Lalpa'n hun a tih hunah chuan ro a rel mai ang," min ti a, ka chhang tawh lo. Ka tet lai bawk ka hre chhuak leh a school kan kal laia homework kan thiam loh chang a hrem palh ah tiin, hawmhnaw kan hak thuah sa țeuh țhin lai te a ni a, ka ngai hle a ni.







"Khawiah nge i kal dawn Mambawih..?" Room ațanga ka chhuah rual in ka pa in min lo ti a, a zial tur a in zial malh malh mai.







"Lawmi te inah chhuah harh pah in ka kal dawn a vawiinah ka lehkhabu chah an inah a lo thleng sia chumi chu ka va lam pah dawn a," ka ti a tui dehna lam ah ka kal a ka hmai ka phih zui nghal sawk sawk.







"I lo dah tir mai lo nia aw," ka pa tak hi chu aw... zanah pawh hian ka chhuah hi a phal ngai lo reng reng.







"Ka inthlahrung ve alawm bakah ka chhuak harh pah duh hrim hrim a ka rei lo ang pa," ka tih zawm zat. Min ngaihtuah hi a pe na thei lutuk a hman zan ka chhuah a ka tlan haw vak țum phei chuan ka tlan haw țan na ah tak khan a va kal leh ngat.







"Ka lo kal pui dawn che em ni...?" Ka hmai ka phih zo chu Rinzuala lam ka hawi hu mai, min lo en reng tawh sa a a hmel te lah saw a țha teh hrep si.







"A ngai lo i chau palh ang keimah in ka kal thei alawm," ka ti a ka hmai towel in ka hru a, ka thin lah chu nasa mang kheng hian a lo phu ve dawt dawt zel lehnghal.







"Chau hran hleinem, ka pi te in a kal pah ka ngai tho a a remchang êm a," ala ti tho a, a rual a kal chu ka duh tho a mahse ka zak.







"Nia mambawih va kal rual rawh u zan a hmeichhia mahni chauh a chhuah a țha ngai lo," ka pa lah hi ka awmdan a hre ve thiam dawn bawk si lo chhunglamah ka hah leh hle tawh.







"Aw ka sam kan khuih lawk ang," tiin room ah ka lut a, ka sam khuih sawk sawk in ka chhuak a. Lawmi te in a kal tur chuan kan in zui chhuak ta bawk.







Kan kal ngawi dun reng a a kut a kekawr ipte ah a zen a țawng hmasak chu kan tum ve ve in ka ring a mahse han sawi tur tak kei hian ka hre bawk si lo, ka awmdan hi engkim a lai kual vel vek tawh a ni ber.







"In khua hi a lian ve khawp mai tiraw..?" Amah zawk a rawn țawng hmasa ta hlauh.







"Lian ve e a khuaa awm ni mah ila kal lohna te ka la ngah teh mai ania," ka ti zui ve zat a.







"A nih ka ring. Naktuk chu DC ah min kal pui la,"







"Ka thei lo," ka ti nghal tawp.







"Maw..?" A rawn tih chuan ka sam ka tuai ringawt a, "ka thei lo ang class kal te ka ngai dawn a nangmah a i lo han kal mai a ngai ang," ka ti leh daih a. Min sawm ve hrim hrim pawh hi ka lawm tawk tawh.







Lawmi te in kan thlen thleng in kan in be tawh lova mahni ngaihtuahna kawm in kan kal hi a ni ringawt. Lawmi lah in kan pahnih a kan in zui lut chu ramhuai a hmu em mawni tihtur khawp a phawk hian min lo en dun a.







"Enge in awmzia...?" Țhutthleng kan pan tur chu min pawt ding leh rih.







"Ka lo kal pui ang che atia a pi te inah kal ve a ngai tho bawk nen," ka tih chuan Rinzuala lam a hawi a.







"Zanah kan sawi dawn nia. Rinzual i va fel ve," a ti zui luam a, kei erawh ka awm a nuam fahran lova a ni chuan țhian ang tak tak in min bia a mahse chutiang a ka en ve theih loh vang nge ni a bula awm pawh nuam ka ti lo.







Rinzuala bula ka țhut thlak chuan Lawmi biakna chhang pah reng chung siin min rawn en zawk a, engmah thleng lo fahran ang a lang in ka hawisawn ve thuai bawk.







"Thingpui kan lum ang, awm ve rih ru aw ka chhungte an awm si lo a," Lawmi chuan a ti leh a. Ka laka a rilru put ang hi ka pu ve thei dawn lo a nih chuan hetia a kiang hnaih a awm reng pawh hi thil hreawm tak a ni.







"I nuam lo em ni..?" A tih chuan amah chu ka en a min lo en leh reng tawh, eng emaw hian min țham kual rawih rawih mai.







"Nuam e engatinge..?" Ka nui lui a, amah ka duhna zual tulh tulh mai hi han control dan pawh ka hre lo, "i hmel a danglam êm a kan kal dawn ami nen a inang tawh lo," ka hawisawn a ka awmdan a lo lang chhuak leh a ni phawt ang.







"Chutiang engmah a awm hleinem ka hah deuh aniang, hreawm iti em..?" Ka ti daih a a la kal ngai lohna ania, chutiang chiah in Lawmi nen pawh an vawikhat inkawmna chauh a ni. Nuam lo ti deuh in thawh chhuah hreh si a a lo awm ka hlau a ni ber.







"Ti hran love, i țhiannu hi a țawng duh hle mai,"







"Dengi nen an awm loh chuan ka awm thei lo, pakhat zawk zawk an awm loh chuan kan taksa peng pakhat a awm lo ang mai niin kan hre zel," ka ti a, pathum chauh ni mah ila kan awm ho tawh chuan tu dang kan ngai bik lo. Kan hlim a nuam kan ti ve lutuk țhin.







"Mahse nang chu..," a tih lai mek chuan Lawmi'n thingpui a rawn chawi a engmah a sawi zawm lo, hriat zawm erawh ka chak viau thung a.







Lawmi a țawng duh nen sawi tur a hre phian a kei erawh ka chung a thil thleng avangin ka țawng duh țhin lutuk kha ka ni tawh lova, țawng ve par par țhin tho mah ila a hmaa ngaihtuah neih loh hmel deuh ang a țawng kha chu ka ti ngai ta lo.







"Lehkhabu chhiar nuam iti ami..?" Lawmi te in ațangin kan chhuak tawh a pi te in lam pan in kan kal a, ka ngawi ngar mai ka awmdan hi a hreawm takzet. Țhian ang chiah a min en tu bulah hian ka rilru puang chhuak tawp ila eng ang in nge min ngaih ang.







"Ti e, hunawl ka neih chuan ka bih nasa thei lutuk," ka parcel pawm sawi zeuh pah chuan ka ti a.







"Ka bih peih teuh lo mai. A ziak sîn phei chu ka keu zawng ten ka lu a na thei," amah lah chu a sawi zawh rual in a nui zui huk a. Ka awih loh êm avang chuan kei lah chu ka lo ner nâng a.







"Lehkha i thiam thei aniang chu science te i la bawk si," ka tih chuan a ding dat a, a kekawr ipte a zen țât bawk si nen a chhelo hlawm phir khat tlat.0







"Science lak vangin kan thiam thei kher hleinem Arts aiin kan thlang tihna mai ania, khawi ka lo pawm ang," ti zui in ka parcel ken chu a rawn ban a a lak rual a ka kut a tawh nen chuan ka taksa ah current an kal ang mai hian ka țek chhuai a, amah lah chu chutiang chuan a awm ve hmel bawk si lo.







"Tiang a kan inkawm hi ka ring ngai miah lo," ka ti sap a, ka ti tak tak bawk. A tak ah hmuh tur a awm mahse țawngka a kan inbiak hi chu ka ring ngai lo.







"Tinge i rin loh a..?" A aw te lah hi a nalh si.







"Ah ngaihtuah la, nang Aizawl lam ah i awm a kei hetah. College kalna a lo inang lova in hriat theihna a awm lo hrim hrim palh thil a nih loh chuan, bakah kalna pawh lo inang mahse hmelhriat satliah chauh kan nih ka ring," tiin tlang tak in ka hrilh a, a nui ri deuh suk ka hre thei.







"I rin ang chu a ni lo maithei asin," a ti ve sup a, hetia a bula thlamuang taka ka awm ru ang hian midang bulah ka awm ngai âwm ka hre lo. Mahse a ni hi chuan a hre ve dawn teuh si lo.







"Ka rin ai kawm i nuam," a ti zui leh a, ka nui ve sak mai, fakna ka dawn tawh ah la rimawi ber a ni hial lo maw.







"Engtia kawm nuam..?" Ka ti zui khauh lehnghal, a nui huk a a nui ri hian ka âwm chhung ah thil che kual min siam sak a a nui ri mawi zia hi sawi dawn ta ila ka thu thiam in a daih leh dawn si lo.







"Ka sawi thiam lo, biak che in țha tak in min chhang a ka hriat theih chin ah ka mit ah tak en chung in min la chhang ziah,"







"Awihawm loh e," ka nui zui hak a.







"Ania lawm, kan inhmu tam lo mahse kan inhmuh chhun ah ania. Mi pakhat tih chauh lo chuan ka mit ah en in tuman ka zawhna an la chhang ngai lo nangmah hi ini leh mai," a tih chuan lawm avangin ka khi sang reng mai.







"Thu lawmawm ni mai teh se aw," ka ti ta ringawt.







Kan haw in u Malsawma a lo leng vang tawh a, ka rin ang aia a fel vang nge a bulah hian u Hmangaiha bula ka awm a ka tâwt țun ang in ka awm lo, ka zâng huai zawk zel țhin.







"Thingpui i lo in tawh em..?" Tiin gas lam ka pan a.







"Han lum la lo in leh ila," a ti a, a puitling ru lutuk hian ka hria. A che vel te hi a dik thlup a, engkim a țawngkam zawng zawng leh a thu vuak thlak dan te, a ngaihdan leh rorel dan zawng zawng hi zah a kai pha hial maithei, hmanni a pitar pakhat thing phur a hmu a phurh haw sak phei kha chu khua hian an sawi duh lutuk.







"Vartei chu sawrkar zem zen in a lenchilh meuh che chuan i thau kung kung mai," tiin kan țhenawmnu țawng duh ve zet hian min fiam ziah zel țhin.







"Au Mampui, u Hmangaiha țhianpa a nih hi," thingpui dah pah in Rinzuala bula țhutna awl ah chuan ka țhu thla a. A phone a hmet mual mual a rilru in duh lo sa teh mah ila ka zu mit sir hram hram tho.







Ka en ve reng a Mengmawii tih leh XOXO tih group ah chuan a luh chhawk reng mai. Mengmawii tih message chu a lo thlen rual apiangin a seen nghal pang zel lehnghal.







"Mate, kurtai lo chhawp la," au Mampuia'n a tih chuan ka tho chhuak a kurtai chu ka chhawp a, a phone khawih en leh ka tum chu a lo hmet thim daih tawh.







Hmeichhe duh ka nei a tih kha Mengmawii tih kha a ni ang em le tu hmeichhia tak ni ang maw..? Hetiang khawp a mipa țha thinlung luah tu chu.







"Nu, naktukah enge in tih dawn...?" Țhut țhat pah in ka ti zui daih.







"Ka hre lo le, feh chu ka feh dawn lova inah ka awmpui dawn che em mawni aw ka ti hei, i pa chu Hall ah a kal a ngai dawn a," a ti a, ka pa zial zuk tur a zial a a bulah la a inchhawp rum bawk.







"Pa enge hall ah chuan i tih dawn...?"







"M.H.I.P ho mawle tihtur an nei a chhuna an nei tur sawhchiar ka han siamsak ang chu. Nizanah i pi Liani a rawn kal a lehkha min rawn pe thlap alawm," ka pa in a tih chuan an tihtur bawk ka lo zawt leh.







An feh loh chang hi chuan inah min awmpui se ka duh țhin mahni chauh in awm țhang mah ila a reh thei lutuk a thawm ri hlek ah chhunah pawh nise ka hawi tang hru zel tho.







"Hna tlem khawih tur ka la nei a," ka nu te nen kan inbiak laiin u Malsawma chu a ding ta hluai mai.







"Awi ala hma em hi la leng rawh," ka ti a, a lo thawh ațangin zan khat tih loh kha chu a rawn leng ziah a ti hian hna khawih tur a ngah thu sawiin dar 9 rik hma in haw a chuh tlat zel.







"Zan dangah kan ti leh zawk dawn nia, ka țawng hnem lutuk chuan zandangah sawi tur ka hre lo palh ang," a ti ve ngei a, pawn thleng ka thlah a in be tam lo mah ila fel hi ka ti ve tawp mai ni.







"Lut la zan boruak hi a țha vak lo ania," min ti a ka hmaah a rawn ding bawk.







"Kal phawt rawh kei te chu helai mai hi alawm. U Hmangaiha hi a zin tak tak ami..?" Ka ti a a thim deuh avangin duh ang pawn a hmel ka hmu thei lo.







"Niminah khan a kal a i ngai tawh a ni maw," a nui a.







"A teuh lo mai. Ninawm viau mahse a awm loh chuan a reh ve a mahse hrilh suh aw ninawm ka tih hian a haw thei lutuk a," ka ti a amah pawh chu a nui ve hawk hawk mai.







"Hrilh love hrilh love, lut tawh rawh," min ti zui a.







"A nih muttui aw fimkhur la," ka ti a, kan in a lo leng tu pawh mipa emaw hmeichhia emaw kan chhungkaw tih țhan dan ah chuan țha tak a thlah țhin a ni.







Ka inher tur chu ka hming a min rawn koh leh avang chuan ka lehhawi a, chutah rawn pen hma hret in ka hmaah chuan a rawn ding a a kekawr ipte zen in a rawn kunhniam a.







"Tinge theihnghilh i nei ami..?" Ka lo ti deuh hû bawk, pawn light in a chhun pha tawh a a nui deuh suk pawh chu ka hmu thei.







"Nei love, muttui ka ti let ve lo che a. Muttui le," ka sam ah a rawn chul a ho ka tih êm vang chuan ka lo nui hak mai.







Inchhung ka luh dawn chuan nasa lo zet hian ka phu a Rinzuala chu kawngkhar bulah kawi sawi zet hian a lo ding a. Enge a ngaihtuah pawh hriat loh khawp hian hma lam a lo melh run lehnghal.







Ngawi reng in ka luh san a ka luh hnuah pawh a la ding reng. Enge a ngaihtuah va zawh ka chak a mahse ka ngam si lo, ka nu ten an biak pawn kawngkhar bula ding reng in inchhung lam a rawn hawi a tiang chuan a chhang ta lehnghal.







Ka lam a rawn hawi a ka lo en reng lai a ni bawk nen mit ko ka san ringawt a mahse min en reng ringawt. Ka laih hlau in ka hawisawn daih a mahse ka biang a sa hat hat tho mai, min en na mitmeng kha ka chhiar thiam lo a mahse a mi en na ringawt pawn kemah ah nghawng a nei a nia, thildang tel ngat se chuan engtin tak kei hi awm ang maw.







Dengi' ber in Rinzuala hmuh ve a duh avangin chawhnu class khat kan la neih țhulh in inah an rawn kal a, a hmuh tum pa ber lah chu a lo la haw thei lo lehnghal. Thingpui leh ei tur pawh kan vai hnem tawh.







"Nizanah kan officer-a bulah ințhen ka duh thu ka sawi a,"







"Maw..?" Dengi nen kan ti rual dun țhawt..!!







"Enge khati vak a in awm a thil mak pawh ka sawi loh kha," amah lah chuan ala ti hu lehnghal.







"Enge thil mak a nih lohna ințhen i sawi ve ngawt chu..?" Dengi chuan a ti vak a keipawh ka ngaihdan chiah.







"Enge ka hne alawm ka ngaizawng peih tawh lo. A tenawm si, kan inngaihzawn tirh ang kha a ni lo thil lah nise min lei reng a a thil min lei te khi vawikhat mah ka la khawih chhin hlawm lo," a ti zui barh barh a, a nin thu hi a sawi fo a mahse kan ngaih thutak sak ngai lo reng reng.







"Ințhen i sawi chuan engtin nge a tih..?"







"Ka hre bik lo a message pawh ka seen duh lova a call pawh ka chhang duh lo. Sum tello in ka hlu ve em tih ka en chhin pah duh mai mai," a ti a kan thil ei mek lays chu tam tawk la in a ka khat in ala hmawm țun zui.







"I sual e a, a thilpek che chu dawng lo mai la chuan nangpawn țha tak in i lungawi lohna te hrilh la khatia awm lo khan. In ințhen vaih chuan i chan ropui dawn nia aw," Dengi'n a tih chuan a ner vak a.







"Pawi ka ti lo e a. Bakah ka hne ka tih chu a bula awm pawn thlamuang reng reng in ka awm thei tawh lo, ka hne a ni tawp mai keimah pawh hi ka in hrethiam lo mahse ka awmdan hi ka tan a țha tur a nih ka ring," a ti a ințhen a duh thu a sawi hian kan lo uk sak vak ngai lem lova tun țum chu a thutak viau a nih ka ring, engmah kan sawi buai sak ta lem lo.







Zanah chuan chaw ei kham ah naktuk a ka țhiante ka thawn tur assignment ka ti malh malh a current a awm a a awm loh leh țhin avangin duh ang pawn ka ti hleithei lo.







"A harsa em..?" Rinzuala leh au Mampuia chhuak pawh an lo haw a tlaiah a pi te in a chaw a ei avangin Dengi pawn a hmu ve leh hman ta lo.







"Harsa love in va ei puar maw..?" En lem lo hian ka ti a.







"Puar lutuk kal pawh kan kal țha thei hleinem," au Mampuia'n a lo tih chuan ka nui hak a.







"Vivi," țawng ka tum chiah chu Rinzuala chuan min rawn ko a ka hming a lam ri hi ka theihnghilh leh tawh ngai lovang.







"Enge ni..?" Ka ti a amah pawh ka la en chuang lo, ka bulah pawh a țhu lova mahse min hlat lo chuan ka hria a aw hnaih dan ah.







"I inleng pa kha a lo leng leh dawn em..?" A tih chuan ka pen hum lai ka dah a amah en turin ka dak chhuak zui vat. Phone a lo khawih a eng emaw a hmet mawlh mawlh bawk.







"Ka hre bik lo, ngatinge..?" Ka ti a ka thin lah chu a phu su dup dup lehnghal, min chhanna nghak in ka ngawi reng a mahse chumi lai tak chuan kawngkhar an rawn kik a, kawngkhar bula lo ding mek au Mampuia'n lut tura a tih chuan u Malsawma pawh a rawn lut ve chiah bawk.







"Naktukah enge i tih dawn...?" U Malsawma rawn luh laia Rinzuala'n a tih chuan en lem hlei lo hian, "class ka kal dawn," ka ti ve hmiah ringawt a.







"Naktuk te chu inrinni alawm," a nui deuh reuh in ka hria.







"Nia, ka hre bik lo," ka ti leh ringawt a, ka hamhaih bawk si nen ka dik lo kual chho vel vek.







"Engtikah nge chhuk thlak i tum..?" In siam țha in a lam ka hawi deuh reuh a ka thluak lah hi a â vek hian ka hria tunah te hian, u Malsawma min biakna phei kha chu ka chhang lo reng reng au Mampuia nen an in be hlauh zawk a.







"Ka chhuk thlak hun i va nghakhlel âwm ve," min ti daih.







"Chutiang lam pawh a ni lo, au Mampuia rualin nge tih vel..," ka tih lai chuan nui vur vur in min rawn en a, "ka hria lawm in sawifiah duh suh. Dam chuan Sunday ah emaw ka chhuk thlak ka ring," a ti a hun tlem tawh zia ka hre chhuak zui zat.







"Chawlhni te chu zin nan chuan a mawi lo deuh lo maw, keini ka pa in chawlhni ah tak ngial pawh in suk a phal lo," ka tih chuan a bu nghut a.







"Cham rei pawh thil dik a ni chuang lo, naktuk zing lo thleng phawt se a hriat mai ang chu," a tih lai mek chuan a phone a rawn ri a.







"Aw țhianpa," tih pah a tho chhuak in pawn lam a pan zui nghal a ka en zui vawng vawng ringawt. Sunday ah chhuk thla lo se ka duhna chu a lian hle a mahse kei a dan theih a ni bawk si lo.







"Mate, ka rual in lo chhuk leh la," au Mampuia chuan a rawn ti a.







"Ngatimaw..?" Ka ti hu mai.







"Tebawiha pawn a ngai che a class te chu online in i kal tho a a harsa lo turah ngai ang, bakah Doctor bula kal a hun leh țep tawh tho a," a tih chuan ka îp zawk a u Malsawma ka en a ni zawk mah ber. Mahse u Hmangaiha hnen ațangin a hriat vek tawh ka ring a danglam ang in ka lang duh lo bawk.







"A harsa mai mai lo ami..?"







"Harsa love țul zual lai a pel tawh tho a khu lamah i lo hawi thawveng ve dawn alawm," a ti leh a, u Malsawma pawn ka tan a in a tawm reng a țhat loh thu te leh boruak thar hip tur ten min ti zui ve zat.







"Hmangaiha'n matei chungchang a hrilh che em ni..?" Au Mampuia'n a tih lai chuan tho chhuak in thingpui ka lum daih a. Ka nu leh ka pa erawh an leng chhuak daih thung, au Mampuia a lo haw bawk nen a leng chhuak ngai fahran si lova len an chuh ve pawh a ni maithei bawk.







"Ka hrethiam viau asin, ka cousin pawh hi a naupan deuh lai khan a vun vang hian harsatna kan tawk fo a mahse Vivi harsatna nen chuan a danglam maithei," u Malsawma'n a tih ri chu ka hria a hriat nuam lo ka tih lam tak a ni bawk.







Ka hmuh phak chin a tlem in thui tak ka thlir duh chang pawn an mawina tel lova zan khaw thim ah ka thlir a ngai a. Ka tan chuan zan arsi leh thla êng hi thil mawi tak a ni, ka nâ ka au chhuah pui a ka biang mittui in a luan min hriatpui țhin tu an ni bawk.







Ka lungngaih chang a ka thlir chhoh fo țhin te ang hian hahdamna hmuh tum a van lam thiang tak thlir chhoh va ni sâ ngei in a min chhun ên ve hun ka la nghak mek zel a, engtik hun ah nge a nih dawn ka hre lo mahse hlim taka ka la nuih theih lai hi nise tih pawh hi ka duhthusam pakhat a ni țhin.







Ka tet lai hunah bawk ka kir lo thei lo, ruah a sur a kan inkawibah chak lutuk leh kham bawk si lo khan kan in kawt ah kan inkawibah a au Mampuia leh Lawmi te nen hian ka la hre reng. Mahse kawi ka kap na lutuk kha kawr ah ka kap lut a ruah a sur tam bawk si tui hawk tam bawk si ah khan a va tla lut a.







Ka kawi tleng duh leh lir duh ber a lo ni bawk nen țe chul chung a ruah do in a lenna ni âwm ah ka zawng ngial kha ania, ka nu ten haw nghal vat tura min tih lawm lawm na pawh kha ka ngaihsak thei lo. Naupan lai kha chuan ruah mai mai te kha chuan min dang ngai teuh lo.







Ka hmuh tak loh avangin ngui zetin inah ka haw a ka ruah do avanga ka nu min hauhna ai mah khan ka kawi bo ka hmuh zawh loh avanga ka rilru natna avang khan ka țap zui bui bui a nih kha. Ruah pawh han mahse tui hawk in a len bo hneh tawh dawn lutuk bawk nen nasa mang kheng khan ka țap a ka nu pawh kha a mangang leh zawk tawh.







Naupan lai hun sawi tur ka ngah a, ka sawi theih awmchhun ni tawh bawk a ni tunah chuan, engmah kha hmaih awm lova hriat fai kelh ka duh a theihnghilh pakhat mah neih ka duh bawk hek lo.







"Thingpui a so," ka in thing harh nghal vat, ka sir lawk ah Rinzuala a lo ding kur a ka ngaihtuahna ka kawm nasa bawk nen amah chu ka melh â deuh hu mai.







"I off nghal lo a," a rawn liam rual chuan tiin min hnaih chilh zeta rawn ding in a rawn off a a rimtui tak chu ka hip kut zui kâwk mai. A khabe ruh kual te chu chiang tak in ka hmu thei tawh a engtiang chiahba nghet nge tih fiah pawh ka duh hle a ni.







"I țha maw..?" He thu hi vawithum min zawhna a ni tawh. Maimichhing in pangngai turin ka in fuih ru mawlh mawlh a.







"Țha e țha e," ti bah nuai in no chu ka la sawk sawk a. Ka bulah a ding ve reng bawk nen ka no keng kang tur te chu ka khur teh hrep a nih chu..! Ka in haw takzet.







Thil pawimawh a awm avangin chawlhni a haw tum rilru kha a tuk zing chaw ei kham ah a chhuak nghal a. Ni a sat miau avangin tluang tak a kal tura chah ve thei hek lo le, machine kan dahna hnung âwng ațangin ka bih ringawt.







Bike ah a țhu a helmet a khum mawlh mawlh lai ka hmu a kan in lam chu a rawn thlek leh zawk țhin. A bawp a sei bawk nen bike a a chuang chu a inhmeh tih piah lam a ni, a taksa in phut mawi zet mai chuan bike chu a ta bik a ni tih a hriattir hluah hluah.







Chhuah ve a tluang taka kal tura chah ve ka duh a, engtikah nge ka hmuh leh ang ka hre kher lo mahse a mitmeng tak ngul kar a ngainatawm zet mai kha ngun taka thlir leh ka chak a ni.







"A fel ve ngawt mai," ka nu te pawh an rawn lut a Rinzuala chungchang bawk a ni an rawn sawi chhuah ni.







"A nu leh a pa mah in an zir em mai a.!! A nu leh a pa mizia a chhawm a nih dawn kha. Tlangval fel tak ala ni ngei ang," ka pa in a tih chuan Rinzuala ka mitthlaah a rawn lang a hmuh leh ka chak nghal ringawt bawk.







"Mampui, i nau chu hruai thlak i tum țalh em ni..?" Ka nu in a tih chuan au Mampuia lah chuan a bag rawn ken chhoh hai rawk rawk pah hian, "tum e boruak dang te hip ve zeuh zeuh sela, awmna ngai a a awm reng ringawt zawng in a taksa chhunglam tan pawh a țha lo palh ang," a ti a.







A ni hian a sawi tawh hi chuan ka nu leh ka pa hian an hnial ngam dawn teuh lo.







"I duh em Mambawih..?" Ka pa chuan min rawn a.







"Duh loh pawh a awm chuang lo ka chak ve tho a in a awm reng pawh dik tak chuan a hneawm ve deuh a, thil thar tawn ka mamawh ve a ni," ka ti halh a. Khawi lai hmun nuam deuh thawveng bawk si emaw ah kal ka chak ber rih.







"I hreh loh te chuan i zin thla dawn nia. Ni e.. i tan pawn awmna ngai a awm reng ringawt zawng a hreawm lutuk ang," ka pa in a tih chuan lawm zetin au Mampuia ka en a min lo nuih vur vur bawk.







Chawlhni a ni a vanneihthlak deuh a ruah a tlak cherh cherh reng avangin biakin rap in ka inkhawm ve thei hram a, ka inkhawm khat bawk nen veng let liam a mi tam tak phei chuan min lo hre lo hrim hrim.







"I kawr han nalh zia hi aw nakinah tiang deuh hian ka țhui tir ve ang," Dengi chuan ka kawr chu a enkual a.







"Au Mampuia'n ka birthday a min present a nih hi rin ai ka ha tawk chho phian a ka hak tawk pawh ka rin loh kha ania,"







"I u hi chu a fel ve ngawt mai a chhe zawk zawk bawk si lo nen ka țhiannu ni lo la chuan ka star nasa thei ngawt ang," midang hriat hlau fahran a zawi hian a hian a rawn ti sar sar a.







"I lerh lutuk ler-i," ka ti zui hlak.







"Damchhung tawi te ah hian lerh thak tuk tur. Vanah zawng duh duh mah la i lerh thak tuk thei tawh dawn lo chuvang chuan i theih lai hian a tenawm lo chi in chen ang," a ti a min pawt ti tih.







"Phur hawr zel suh," Lawmi'n a rawn tih ve chuan a melh hrep a.







"Awi a chhiat loh zia saw kan conductor saw," hmalam a lo thlir zui ngawih ngawih.







"Ava mak," a mit ah ka hup a.







"Duhtawk ve em em rawh. Chhe lo i tih zawng hian mi hi thi thei ta se chuan khawvel mipa hi an tlem tawh ngawt ang," ka ti zui hlak hlak a ka țawng hre pha te lah chu an lo nui huk lehnghal, pawi sih sah lo.







"Pawi hleinem keiman ka duh chuan a tawk..!! Au Zairem," ti zui lung lung in zaipawl ho din țhupna lamah a pheikhawk sang zet nen a tlan phei a ala bun lek ta lehnghal. Zaipawl mipa ho dinna ah tak a va ding a.







"A ngaihna a awm hlawl lo," chek tlak tlak in Lawmi nen kan in en a en a rai nghal theih te hi nise chuan a rual in panga te a pai ania kan rin ni.







Kan inah lut in bawl tur kan lei khawl pah țeuh a inah chuan inleng neuh neuh an lo awm nual mai.







"Kha Vivi-i pawh inkhawm thei țhin lo mah la inkhawm thuam a han hmuh meuh che chuan i lang nula ve ta hle mai," ka pa țhianpa chuan min ti zui a.







"In nu ka hrilh dawn ania aw," ti a ka fiam tak ah chuan kan nui ho ta dar dar.







"Awi aw.. Rinzuala chu ka hmuh ve chak nen aw han kawm te pawh ka chak ve a enge a lo chhuk thawt thawt a," varanda lam ah kan chhuak phei a rumpum thak zet maiin kan bawl bawk.







"Tihtur hmanhmawh thlak a neih thu a sawi a lo zin leh a intiam alawm i la hmu em em ang," a dar a ka beng zui thak thak chu ei lo fahran a min dah thlak sak in kan nui deuh hak a.







"A la dam rei nghah thil emai, Lawmi te chuan ala kawm in ala be tal a nang lah in inah a thleng a duhthusam in i melh kim thei a. A țha lawm kei chu ka tuar thei e," ka beng nghal pawp.







"Over suh aw," ka ti zui hlak a.







"Ka luak a chhuak, uak..!" Lawmi lah in a lo ti ve bawk, kan nui zui dar dar.







Dengi hi a pa Headmaster ania amah chiah hi fa an nei a a nu hian phai ah leilet neiin a enkawl ve mek bawk. Fa mal a nih avang hian an duat in an ngaihsak hle bawk.







A mit a lerh a ka țhiannu mah nise mipa a hre lutuk. Bialpa pawh a ngah tawh țhen pawh a awlsam tumah ngaizawng thutak ngai hek lo, nitin chhe lo tih hi sawm a nei tling ziah maithei. Mahse chutiang khawp a bialpa nei zing chu a bialpa ten amah an hlauh avangin an țhen daih zel.







Lawmi ve thung hi chu a pa mistiri ania a nu hian 100 dawr a nei a kan khuaah chuan dawr hlawh ber pawl a ni ve bawk. Unau pathum an ni a amah hi a upa ber a ni a in ren reng reng a khawsa an nih avang hian kuhva thel te, mi bel nawt te leh puan su te in a hman chang in a inhlawh ve țhin.







Kan khuaa Officer pakhat in a ngaizawng a a âtchilh ngawih ngawih. Zan tin a lenchilh reng a Lawmi'n a sawi țhin ang khan a neih loh hlau hian sum a va hmachhuan a ni ber. Lawmi a duat sia thil a lei reng a pakhat lah in chu chu a ti thei bawk si lo, Lawmi a duh em em dan chu tenawm lamah a kal zawk. A ni Lawmi chhe zawk zawk a lo ni lo bawk nen, kan khaw Chapchar kut Miss pawh ni pha hial tawh a nih hi.







Nithum hnuah Aizawl lei ka rap leh vang tawh, mahse a boruak hi ngai ah ka nei thei lova hei vang hian ka cham rei peih ngai lo reilote ah kan khua ka ngai leh tho zel.







"Tumaw i bialnu chu..?" Au Tebawiha bulah ka ti a au Mampuia erawh a lo la haw thleng lo.







"Ka nei aw zawng lo e a," uar fahran hian a ti nang in a phone a hmet mawlh mawlh tho.







"I nei aw zawng e a ka hria lawm mawle han zep vaih teh," ka vau zui khar khar a.







"Ka zep lo ka nei lo tak tak, I am single, forever and ever," a phone a hmet mual mual tho si.







"A sam a dum tle siau a a hmai fang lah nise han chhia tihtur a ni lo mahse a nungchang," ka tih lai mek chuan a phone en lai a dah a ka mit sir ru reng.







"Sawi chhunzawm la," kan hnungah a aw ri ka hria a ka in la ve tlat dawn .







"Ka hre tawh ngawt hleinem, "







"Chimawm suh aw," ka ti zo chiah a phone rawn ri chu em sak tum in ka bansak a kan ral chel chul a room lamah tlan lut in a kalh nghal hmiah.







"Hawng teh Hmingchungnung," ka beng zui dawt dawt.







"A teuh lo mai," a lo ti hlur a a bialnu a ni chiang khawp rawn call tu kha nakinah a call list ka en dawn khawp alawm.







"A nih chuan pawnah ka chhuak harh dawn ania helamah rawn awm rawh thil bo te a awm ang?" Ka ti zui lung lung a kal hla lo turin min hrilh zui ve bawk.







Pawnah ka chhuak a khaw thiang leh vawt rim chu ka hnar chhungah a lut a vawt duh tak a ni. Ka inthuam lum teh lul nen pawn han kal chiah hi chuan a nuam khawp mai.







Kawngpuiah ka tei kual vel mai mai a chutih lai tak chuan Rinzuala te in gate ațang chuan bike hi a rawn tlanchhuak a tunge a nih sawi hran pa ka ngai miah lo, ka lo hre chat a tin ni.







Ka lo en reng a ka hmaah a rawn ding ta chat. A hlemet glass a ti chho vat a min hmu chu mak hi a tih hmel ngawih ngawih.







"Hey. Engtik khan nge i lo chhuk a..?" A ti hluai a ka chhuk tur thu hi ka hrilh miah lo, ti ila hrilh tur pawn a chhuk hnu khan kan in be leh tawh lo hrim hrim a.







"Nizanah khan," ka ti ve sap a.







"Wow chanchin min va hrilh lo ve, au Mampuia a lo chhuk tih kha chu ka hria a mahse i tel tih ka hre lo a," a ti zui a.







"Nia a țul hranpa in ka hre lo a khawnge i kal dawn a..?" Ka ti a a inthuam dan chu ka melh thuak a a kalna tur âwm ang ka ring rilru nghal char char.







Chutah a helmet tuk zeuh zeuh pah hian, "ka thlan ka va ti tla lawk ange ," a ti a a nui deuh suk bawk.







"A nih chu, va kal rawh," ka ti a biak zel ka duh mahse sawi tur ka hre tawh lo.







"Ko kal ve la," ka lu ka thing vat.







"A nuam dawn ania lo kal ve rawh ka rei dawn lo," ngatinge min sawm țalh le.







"A ngai lo mai va kal rawh au Mampuia a lo la haw lova," ka ti leh a mahse a seat hnung ben thak thak pah hian, "lungngai suh a lo haw hma in kan haw leh hman dawn alawm. Aizawl khawpui kan fang dawn nia zanah a mawi thei lutuk lo kal rawh a hlauhawm lo," a ti a ka hawikual a ka rilru a insual buai ngar ngar.







"Mahse i duh loh chuan ka ti lui lo che aw, i mitmeng a khawharna kha a reh ka ring a mahse ala reh si lova," a tih chuan ka âwm ah hian eng emaw hian min țham bet ni hian ka hria. Ka thup ve viau emaw ka tih pawh khan hmu thei tu an lo awm tho a nih hi maw.







Mahse a tawp a tawp ah chuan ka chuang ta nge nge a a kawng a kuah tura min tih chuan tim dai hian ka kuah a a taksa lumna chuan min ur ham ham mai bawk.







Chak zet hian a tlanchhuak zui a Aizawl khawpui ka hmuh theih chin chu a mawi țhin takzet. Amah kuah ngheta tura min tih chuan a ai nghet in ka kuah a chak mang kheng hian a tlan zui bawk.







Nakinah ka inchhir lehna tur a ni em ka hre lo mahse ka thinlung duhdan ka zawm a, hetia thil engpawh thleng palh thei huam a ka ti a nih loh chuan engtikah mah amah hnaih na hun remchang hi ka nei tawh ngai lovang.







A theih hram chuan hnaih luih hram hram ka duh.







"Kan thleng e ," music ri dum dum ka hria a mipui țawng nawk nawk leh au pawr ri te pawh ka hre nawk mai. Ka men chhuah chuan field zau tak ang mai a kual leh mam purh ah hian kan lo awm a bike ding a tam in mihring pawh tam tak hmuh tur an awm.







Zu rim a nam leh huk țhin a music an play ring bawk nen ka beng ah a lut chiang khawp mai.







"Helai hmun hi khawi lai nge..?" Ka ti a ka hawikual a light êng lian tak tak sang taka awm te leh red flag in tar thluah te hian min rap tir hial zawk.







"Kan in tlan siakna hnun a nih hi, chhuk la ka țhiante ka hmelhriat tir ang che," a tih chuan ka chhuk vat a. Ka hre ta, kei hi ka kal hi ka inchhir dawn lutuk tih ka hria mahse a tlai zel tawh.







Au Mampuia leh Tebawiha bulah țhenawm a ka len thu leh min ngaihtuah lo turin whatsapp ah ka chah ve ve a. Rinzuala'n bike a hun fel chhungin ka lo hawikual a hmeichhe tam zawk phei chu vawt an ti ve lo em mawni tihtur khawp in an in ha chhing mai.







Movies vela ka hnuh țhin nen engmah danglamna a awm miah lo.







"Hey dude..!!" Mipa pakhat a rawn lang hlawl a an kut ve ve ah an inchelh zui zat bawk. Hepa hi ka hria hmanni a Rinzuala te in a chaw kan ei ni a lo kal pa kha a ni.







"I va rawn tlai ve hmuhnawm i chan zo chiah asin,"







"Tlem in chaw kan ei tlai hret a eng hmuhnawm nge awm a..?" Rinzuala'n a tih a a țhianpa in a chhang tur a hawikual in ka lo ding reng a hmuh chuan phawk zet hian a meng a.







"What the..!! Țhianpa tunge ka hmuh hi..?" A ti hluai mai ka haiwlual a tumah lah in min rawn ngaihsak lo hlauh bawk.







"Ka rawn hruai a nih hi," Rinzuala chuan tiin min rawn nuih a ka bulah min si chet in a rawn ding a chu chuan ka thla a ti muang.







"Kan ring chhin," a khabe a dawm a.







"I rin ang kha a ni lo," Rinzuala nen chuan kan ti rual dun a kan in en a kan nui ringawt.







"Ka ring dik na nge a pawi love, ka hmu che chu ka lawm e chuan he kan Lal ram ah hian kan lo lawm a che. Helai hmun ah hian i duh duh na hmunah i kal thei a mahse i fimkhur a ngai thung, sexy tak inih phei chuan pawisa i hmaah a rawn leng chuai chuai mai ang," a ti zui leh a Mala a niin ka hria amah hi.







"Țhianpa duhtawk teh nuam lo a ti ang e," Rinzuala'n a tih chuan a inhmuam up a, "yes.. boss," a ti auh a ka nui hak mai.







"Nuam lo iti em..? I la kal ngai dawn si lova mahse thil thar tem ve la ka duh sia," Rinzuala'n a tih chuan amah chu ka en vat a kan in awm hnaih bawk nen nuam ka ti takzet.







"Ti hran lo mahse tlem chuan min rap ve deuh?" Ka tih chuan a kiai suk a.







"Ka kalsan lovang che hlau duh suh, chuan reilote kan awm dawn nia," a ti a chu mai mai pawh chu ka thlamuan pui tih a hre lovang.







Reilote ah Rinsanga a rawn lang a a hnungah hmeichhe pakhat in a rawn zui bawk.







"Hey..!" Rawn tiin Rinzuala biangah a rawn kiss a ka lo en reng ringawt. Keimah chu min rawn en a min chibai a tum chu rang zet hian a kut a la let a khawih thiang lo ang mai hian min han melh teh hrep a nih kha.







"Chuan heihi, ka hmu tawh che em..?" Rinsanga chuan min en vung vung hnuah a ti ta hram a. Rinzuala'n a hrilhfiah takah chuan a bu ta nghut nghut a min han chibai leh rih.







Hetiang hmun ah hian ka kal tih ka țhiante hrilh ngat ila chuan an țe hlum lo chauh ang mawle, an ni dream kha a ni miau a.







"A vawt em..?" Rinzuala'n a tih chuan tlem a a vawh thu ka hrilh a kacket hak chu a phelh sawk sawk a ka dar ah a rawn bat ta thun mai, ka dang buai lova ni lo, ka dang phal lo hrim hrim zawk.







"Enge kan tih ber dawn..?" Ka ti a.







"Uh... zanin tak chu intlansiak a awm dawn a mahse ka hman ve loh avangin pawisa la tur ringawt in ka kal a hei, i en ve duh em intlansiak chu..?"







"Duh lo ang haw ka duh zawk ka ring," ka ti sap a, ka ngainat zawng a ni teh fahrna lova mahse a hmun hi a nuam viau thung lawi si.







Rinsanga'n a beng bula eng emaw a rawn hrilh tak ah chuan a ding ngil a, "khawiah nge a awm..?" A ti zui zat bawk.







Chutah ka lam a rawn hawi a, "sawtah reilote ka va kal ang a kan haw dawn nia aw ka rei lo ang," a tih chuan ka lo bu ve mai.







"Ka rei lo tak tak ang," a ti leh hram a a ngaih a țha vak lo aniang.







Chutah a kal tawh chu a rawn let leh a ka hmaah bawk a rawn ding leh, dak vah hian ka en chho a, "i lo awm thei ang tiraw hei Mala a awm tho a..?" A rawn ti leh a ka nui ta hak.







"Thei ang va kal rawh mahse rei suh aw haw ka duh tawh a," ka tih chuan a rei loh tur thu sawiin Rinsanga nen chuan an in zui phei a. A t-shirt hak in a ban puam lai a phuar deuh țang bawk nen ka thlir reng ringawt.







"Chuan i rawn kal ve ngawt chhan hi..?" Mala'n a rawn tih chuan ka hawikual a hmeichhe ho mak lutuk chuan min ti hawk dak zual a ni ber.







"Intih thawven nan," ka tih chuan a nui deuh huk a.







"Mahse a thawveng lo e tiraw..?" A nui leh a a sawi dik chiah, a thawveng hlawl lo ka thaw a ti ipik zawk mah mah.







"Khawiah nge Rinzuala te kha an kal dawn a..?" Ka ti a a kalna kha ala rei miah lo mahse an rei ka ti tawh.







"Pawisa an va lam lawk dawn an lo let țep ang," a ti leh a, hmeichhe ho min kal pel tu te chu engtin emaw hian a lo fiam leh zauh zauh țhin a. A rui miah lo mahse fiamthu a duh ve a nih ka ring.







"Hey Malsawmsang..!! Khawnge Thlamuanpuia hi.?" Mipa aw ri ka hria a Mala chu a thaw zui hrawk mai.







"A awmna hmunah a awm ang chu zawng ve mai la," Mala chuan a ti awlsam then lehnghal.







"Hmu ila ka zawt nang che,"







"Keipawn hmu ila zawng ve mai la ka ti nang che," Mala chu a nui pah deuh suk a kei erawh chuan a awmdan chu ka lo en ru kar mai, pawi sak a neih loh hmel hi ka ti ngawih ngawih.







"Ka lak ațang hian bihruk theih a inring em ni..?"







"A bihruk pawh ka lo hre hleinem chutia i mi zawn i hmuh loh te nangmah an hlauh vang che a biru ang a i ngaih zel te chuan Mizoram a pa chak ber ini mai dawn asin, a awihawm loh lutuk a lem lutuk..!" Mala chuan tiin a lu a thing nghek nghek a ka lo nui ru tet tet mai.







"Zawnga chu ka hmuh hunah a chak lo viau ang,"







"Ni lo ve," Mala'n a kut ah a lo dawm beh sak a chuta a hawikual in min hmuh tak ah chuan min en ta vung vung mai.







"Wow khawi lam nula nge hei..?" A ti hluai a a nui zui huah huah ka rap lek lek zawk Mala lamah ka tawlh hnai hret a.







"I buaina tur a ni lo, kal la i pawl te va bawl leh rawh.. !" Mala chuan a lo ti veleh hmiah.







"Lo ngawi rawh nang kha. I van hmelțha reuh ve a," ti a min rawn khawih ringawt a tum chu tu emaw hian a ban rek ah a rawn hmer zui chawt. Ka thin a phu dawt dawt tawh, Rinzuala a rawn lang a chupa ban chu a hmer na tih hriat reng reng a thisen zam pawh a pawl ul mai.







"Khawih tum hlek suh ang che..!" Nelawm loh fahran hian a ti zui hmuk bawk.



☆ Hei pui hi ka zo daih tawh a, fb ah ka dah chhuak tih ka lo theihnghilh vang vang mai a, a zia lo lam khawp mai. Zanin ațang dah chho leh bek bek mai ang aw. ☆