HMANGAIHNA MAK ( CHAPTER-17 ) BY LALNUNNGHETI TETEI

[Lalnunngheti]

HMANGAIHNA MAK





CHAPTER-18







" Nu sum chhuah hi a hun tawh viau in ka hria, " ka nu hnena ka tih chuan min lo melh vat, Bawihtea chu a pu nen sitting room lamah anin awma kan thusawi chu ka pa in a hriat phak ka ring lo. " Kum khat tawp chu kan awm hrang tawha a hun tawh viauin ka hria, " ti nawn lehin ka alu chan sa chu sil turin tuikhawihna lamah ka keng a.




" Tuna takah eng ngati nge i sawi thar leh tak, ahma a kan sawikha chuan min chhang ngai lo kha a nia, let leh tumna rilru ila pu deuh ah ka lo ngai hman alawm. " A ni pawhin a lo ti ve var a, ni e, ahma khan sum chhuah chu an sawi daih tawh, mahse keimah zawk hian eng rilru nge ka put pawh ka in hre bik lo, ka chhang ngai lo a an ni paw'n an sawi zui ngai bik lo.




" Ka ngaihtuaha Bawihpuia pawh a lo lian ve deuh tawh bawka, Ruatsanga te lamin thu an rawn neih leh chuan innei leh mai ula, " ka nu in a tih rual chuan ka hnial vat, " a teuh lo lutuk, saw inah sawn luh leh tumna ka nei lo, " ka ti teu hlar mai. Nidangah pawh inneih leh chu minsawipui fo mahse tha takin ka hnial maia, tun tum erawh a dan adang zar mai.



Keini nufa aia Lucy te nufa thlang zawktu mipa saw neih leh tumna ka nei lo, a fapa hi a that leh that loh vawite khatmah a lo ngaihven loh laiin Lucy fa erawh a duh hlum lo chauha, sawtiang mihring saw'n ka fapa pa nih a phu lo. " I mak thin em mai, tha taka sawilaia khatia lo vin vak. Bawihpuia pawh a lian anga pa tel lo a seilen chu ka ti mai alawm, " a tih leh pawh chuan ka rilru chu ala ngai reng.




" Pa tel miah lo a nu ten an fate an tulpui thak hi ka hre hnem lutuk, keipawhin ka thei bawk ang, " ti lehin ka tho a ka fapa apu nena lo infiam nui har har chu panin ka pawm kanga, " i nu nen chuan eng buaina nge in neih leh tak a, inva tawng ring leh ve, " ka pa in a lo tih chuan chhang lo in Bawihtea chu couch ah ka thutpui a, hnute ka pe dawn tih a hriat chuan ka fapa pawhin ka kawr chu a lo hlim leh sat sat tawh.




Chawei kham hnu rei lo ah Bawihtea chu mut chhuakin aham deuh bai bai a, a infiam nasa bawka a chau a ni ngei ang. Kan room-ah luhpui in khumah ka mutpuia, a dam loh lai leh lenchhuah dawn te a nih loh hi chuan kan paw ngai lem lo, amah hian a duh lo bawk nen, tihian khumah kan mutpuia amahin a muhil mai zel.




Ka taksa si cheta mu ka fapa chu ka thlir vang vanga ka duh loh ber hmel ka mitthla ah a lo lang leh ruai tawh, a fapa hi a ni chuan a lo hre chang ve der si lo. Phone chu banin whatsapp-ah ka lut a, number hlang ringawt atang message ka dawn chu hmu in ka seen nghala, ka mi rin loh tak a ni.




Ka phone ka tihbo avangin phone thar ka hmanga, SIM pawh ka thlak ta vek bawka engtin nge ka number hi a neih theih zawk ni. * I dam maw, *? Tih te hi a lo thawna ka chhiara ka reply duh lem lo, ka dam leh dam loh a ni hriat a ngai ka ti lo.




A online tih chu alang renga a message chu ka seen tih pawh a hre ngei ang, chhanna a lo beisei ngei bawkin ka ring kei lahin ka chhang duh der si lo. A hnu minute 5 vel ah, * Bawihtea hmu turin naktuk ah ka lo kal dawn, * tih hi a lo thawna, chu zet zawng ka chhang lo thei lo.




* A tul hauh lo, tum buai suh * kava ti a, a seen nghal bawk. Ka thinrim bawksi chu ka tha te a khur hialin ka hria, ni e min lo chuhpui ka hlauh vang a ni, message a min lo chhang ta lo chuan a lo call a, inngaihtuah buai lek lo in ka chhang vat.




" Engtin nge hmuh pawh i rawn tum ngam, i zak miah na nge rawn kal hauh suh, " ka tu nghal hlak a, ka âw te chu a khur deuh hial mai. " Ka fapa a nia lo hmuh theihna dan ka nei alawm, " a lo ti a nih chu! Kha leh chen a piang ve lo ang hmiaha ngai tu khan tun atakah a fa a nih thu sawiin a lo ngaihven a, ka ngaihdan a ni lo nasa.




" Ka fa chauh a ni, rawn kal hlek suh, " ka tih chuan a lo nui deuh hawk a, kei ka thutak teh reng nen a lo nui mai mai te chuan min huat tir zual sauh. " Kan hria ang chu, " a tih rual chuan ka fapa muhil pawh ngaihtuah lo in, " Remruatsang " ka ti vak a, a off zui nghal daih bawk.





Ka mu lai chu tho zawkin ka bula awm ka fapa muhil chu ka en leh te te a, ala harh lo hlauh, room atang chuan chhuakin sitting room lam chu ka pana, ka nu leh pa te chuan ka au kha an lo hria nge min lo en deuh haw mai.



" iva au ring ve eng ti zia nge, " ka nu zawkin a lo ti thuaia ka thinrim bawk nen ka tawngchhuak mai thei lo, " sawi la ngati nge a, "?an tih leh takah chuan thawk la huai in Theodorea'n min lo biakna te chu ka sawia, ka thinrim luatah ka âw te chu a khur hial mai. " Apa a nia lo hmuh theihna dan te chu a nei alawm, keini in kan lo phal loh ngawt tur pawh a nih loh chu, " ka pa chuan a ti nghet charha, keia ngaihdan leh an ni ngaihdan chu a in perhsan leh viau mai.



" Apa a nihna te chu a mahin ngeiin alawm nawt reh, a inchhung atanga min hnawhchhuah ni la la khan a fa a nihna chu a tawp vek tawh, kum khat lai a ni tawha lo hmuh emaw message emaw pawhin athat leh that loh rawn hriat pawh a tum lo, tun ataka ' apa ka ni, ' a lo tih leh vel hian awmzia a nei lo khawp ang, " ka ti phiar phiar a ka fapa min lo chuhpui chu ka duh lo bur a ni.



" I hnenah kan sawi ngai lem lo a rawn ngaihven lo tawp chu a ni bik hleinem,
Bawihpuia a pianni te pawh khan in chanchin ngaihvenin min lo phone sek a sin. Bawihpuia mai ni lo nang thleng hian a ngaihven che a i chanchin pawh min zawt reng, i hnenah kan sawi chuan kan lakah i lungawi lohna a ni leh mai dawn tih kan hria a kan sawi lo mai a ni. Hetah rawn kal a lo hmuh pawh a duh lutuk, nangman i duh dawn loh tih a hriat avangin a fapa hmuh a chak em em pawh a lo hmu duh lo a, chupawh nangmah tih thinrim leh che a hlauh vang bawk. I hriat loh hian maw a ngaihtuah lutuk che a sin, nanglahin i pawng paw huat em em ringawt mai, " ka nu chuan a ti zui luam a.



Theodore-a chanchin sawithat an tum vangah ka ngaihsak hmiah, duh tak tak se chu a lo kal ngei ang, tuntum ah pawh ka thinrim dawn tih hre rengin alawm rawn kal a tum. " Chhan awm lo a haw ringawt ka ni bik lo tih te chu nangni paw'n in hre ve reng alawm, hrilh rawh u lo kal suh se " ti lehin kan room lam chu ka pan a, ka fapa chu a lo la muttui khawp mai. Keipawhin pa nei lo a seilian tur chuan ka phal bik lo a sin, mi te'n ' pa nei lo ' an tih pawh ka phal bik lo, mahse kan hun tawn hi a harsa em a tih theih ka nei lo a ni.




" I pa nena kanin hmangaih hun chhung kha rei lo hle mahse nang ka neih phah che a ka hlim, " ti sep in a biangah chuan ka fawp a.





Zingkar atang rilru buai nuai in hun ka hmangtan a, eirawng ka bawl lai te chuan Theodore-a chu a lo kal tak tak angem tih chu ka ngaihtuah renga, ka awm chu a nuamthei zan lo. Chaweikham lamah chuan kan chhungkua in kan awm thap a, chutih lai chuan vengchhak lamah mitthi kan neih thu an lo puanga, ka nu leh pa chuan kal ve ngei athat thu sawiin insiam turin an tho zui a. Kan nufa chiaha awm chu ka thla a ngam zan lo, ka pi leh pu te lah Lunglei lama an zin phei lai a ni bawksi.




" Nu Bawihtea nen chauha awm ai chuan Ruati te inah kan lo awm anga in haw lamah min lo lam kawi mai ula, " anin siam zo room atanga an rawn chhuah rual chuan ka lo ti thuaia, ka rinlawk ang ngeiin a tul loh thu an lo sawi. " A lo kal a nih pawhin puitling takin thu insawi ang, lo vin khar khar emaw kha chu a chi loh a nia, a mawi ngai lo. I thinrim a nih pawhin insum hram hram ang che, Bawihtea hi iti phawk lek vek mai ang, " ti dap dap in in atang chuan an kal chhuaka.




Tihtur em em a awm lo bawk nen Bawihtea chuan tv a en a, kei erawh phone ka khawih tawp thung. Kawngkhar in kik ri karh karh ka hriat chuan ka tho thuaia, kawngkhar lam pana ka phei chu ka thil ngaihtuah avangin ka ding dat. Amah ngei a nih ka ring, engtianga lo hmachhawn chi nge ka hre leh pek lo.




Pangngai taka lan tum chuan thaw te ka han la leh te te a, zawimuangin kawngkhar chu ka hawnga, ka ring dik chiah Lalruatsanga lek a ni. " Lut turin minsawm dawn na nge, "? atih chuan ka mer nung nanga ka awmsawn ve mai bawk, bawihtea tv en a hmuh chuan a ding data keipawh a hnungah chuan ka ding ve bawk. " Hey little " ti sup in afapa chu a pana Bawihtea paw'n a tv en lai ngaihsak tawh lek lo in apa chu a lo en ve kiau bawk.




" Ama, " Bawihtea'n a lo tih chuan pan pheiin ka nuihsanga, " Bawihpui apa a nih hi, " ka duh loh ber chu ka sawi angai ta tlat si, " i dam maw little, " ti lehin a fapa chu a pawm kang a, bawihtea pawn a lo hnial bik miah lo, midang chawi hi a duh lo viau thin a nia, apa chu a hre hrang ve khawp mai. " Nang i damtha maw "? ka lam lo hawi paha a tih chuan dar san khum ak in ka that thu chu ka sawi a.




Kan pathum chuan kan awm a, a lo kal takah chuan thingpul tal lo lumsak ve lo chu ka ti deuh bawk nen thingpui lum turin choka lam ka pan a, an pafa chuan anin fiam a Bawihtea pawh a hlim khawp mai. In khatah cheng ila chu Bawihtea pawh hian nuam a ti zual viau in ka ring, mahse engkim a nih tur ang a ni vek tawha thil thleng thei lo tur lo ngaihtuah chiam pawh chu a sawt lo.




" Ka lawm e, " thingpui ka pek rual chuan a ti sup a, bawihtea chu a ham deuh bui buia tun ang hunah chuan a mu tawh thina tunah pawh a mut a chhuak leh tawh tih a hriat, pawm kangin hnute chu ka pe a Theodore lah chuan thingpui in pahin min en ngur a, ka zam ru ve viau mai, chu chuan kan in pawh tawk loh thin zia a ti chiang nimai in ka hria. " Ka va mut a nge " tiin Bawihtea chu ka pawm kanga kan room lamah chuan pawm lutin kan khumah chuan ka mut tir a, chhuah tuma ka inher chiah chu Theodore-a lo ding run chu hmu thutin ka phu deuh zuk.




Ka awm chu ka dawm deuh vang vanga a ni lah chuan khuma mu a fapa ngawt chu a lo thlek thung. " Ka tel lo in kan fapa hi i enkawl rei tawh mah mah lo maw ? " a tih chuan ka sa zak mai, " keiin ka enkawl lo in tuin nge enkawl se i tih a, min hnawhchhuah ni khan ka fapa pawh hi i hnawtchhuak tel ve tih i hre miah na nge, ? Kan nufa ai awh tir i thlan ni la la khan kanin zawmna zawng zawng a chhe vek, chutiang chiahin Pa i nihna pawh i chan daih tawh, " ka ti hmawk hmawka insum tumna ka nei lo.




Kha leh chen ka thinrimna ka lo up bet tang tang tawha tunah sawichhuahna hun ka nei ve ta a, insum tumna emaw ka nei lo hrim hrim, ka tuar tur zawng zawng chu ka tuar tawha engmah chan tur pawh ka nei tawh hek lo. " Ka fapa hi tuman ka nunah an luah lan ngai lo, i rilru kal sualin ngaihdan dik lo i pu a nih zawk kha. Tunah chuan ala naupang em a engmah ka sawi buai lo ang, amaherawhchu kum 10 a tlin rual rualin ka fapa a nihna angin ka enkawl khawp ang, min dan i tum a nih chuan court ah pawh kanin khing mai ang, " a ti ve nghut chu awi lo lutuk hian ka melh tlawk tlawk.




A lak atang hian eng chiah nge ka lo beisei le, ngaihdam dil chu hla tak hi a ni a chapo na te hian a mit a ti del zo tawh zawk nge, " hetiang mihring hi i nih ka ring ngai lo, " chu bak sawi tur ka hre lo, a ni ngei hi ka lo hmangaih ve hman kha chu a ni si. " Ka fapa tan chuan misual ber pawh ka nimai ang, " ti in a i her a a chhuak zui nghal bawk, kei erawh ka dinna ngaiah ka la ding reng thung. Khang hun chhung khan min hmangaih ve tak tak lo a nih te ka ringa, a khawhar hnemtu satliah mai niin ka in ngai hial, heti tak hian mihring an danglam thei dawn em ni ?







Bawihtea hmu tur chuan a lo kal zeuh zeuh thina, thil hrang hrang a lo thawn thin bawk. Khap tum viau mah ila min hnial kalhna tur a hre leh dawn tih ka hre vek a a awmdan chu ka enliam deuh tawp, Bawihtea lah thil hrethiam hma chi a ni bawk nen apa chu a lam deuh reng thina, heti reng hi chuan min laksak mai te ka hlau rum rum, Bawihtea berin a pa bula awm a duh chuan keiin phal lo teh mah ila ka lo dan theih a ni dawn miau hek lo.



" Vawin chu Lucy te an lo zin dawn a nia Mambawih, " ka nu in phur zet hian a lo ti a, kei erawh ka lo lawm teh chiam lo. Keimah hi dik lo in ka sual viau pawh a ni mahna, mahse kan hun kaltawh zawng zawng ngaihtuah chuan ka indem lutuk bik lo, bumna hlir min petu chu engtin nge ka ngaihna theih tawh reng ang ni. Chhun lam ah Lucy te nufa chu an lo thlenga a fapa pawh a fel tawh khawp mai, bawihtea nen chuan anin hmuh tirh phat atang anin nel nghal viau mai.



" I dam maw, "? Hlim sarh a titu chu nuih let sakin ka that thu chuan ka chhanga, biak vak pawh ka tui lem lo. " I cher riau in ka hria chaw i ei tha thei lo nge, "? awm ze nei zet hian a rawn ti leh reuh a ka bul hnaia awm reng tura ka duh loh laia pangrem ang maia min hnaih tlat chu ka dawhtheihna in a tlin loh ka hlau viau.





THEODORE POV : ( Ve zuks )





" File ho kha enfel turin lo la la vawinah tih fel vek theih kan tum dawn nia, " ti in ka assistant chu ka hrilha a bu deuh nghat, " i kal leh dawn em ni, "? a tih chuan a thusawi hrethiam zetin aw ka lo pawh vat a, " ka kal zin deuh loh chuan ka fapa hian min ngaihnat loh ka hlau a ni, tun atanga min ngaihnat chuan ka tan pawh enkawl a awlsam dawna, " ka ti a a ni pawh chuan ka remruat dan chu tha a lo ti ve fu mai.




" I nupui ve hi koh leh tumna i nei lo em ni, "? a lo ti ve leha, ka hnuaia thawk mah nise unau ang maiin kanin nelin kanin pawha engkim hi kanin hrilh tawn vek mai thi. " Chu zawng ka hre bik lo, koh duh mah ila a ni in a duh dawn si lo, tunah phei chuan min haw em em mai bawksi, a rilru te han hahdam fel deuh se ka la ngaihtuah tha ang, " ka ti leh sup a, bu nghatin min chhuahsana ka chair chu ka ngheng deuh dawt. " Luhlulnu engtia rei nge min hrem dawn, "? ka dawhkana kan nupa thlalak chu enin ka ti sup a.



Ka hmangaih lo chu a ni bik lo, amaherawhchu amah berin min ring miau si lo, Lucy din hmun chhiat lai ber khan puih lovin ka kalsan thei miau bawk si lo, ka la duh vang emaw lam ni lovin a dinhmun khan a zir loh em vang zawk a ni, Lucy kher ni lo pawh nise khatiang khan ka ti tho in ka ring. Keimah ngeiin in atang chhuak turin ka ti tih pawh ka hria, ni e ka thiam bik lo mahse khatia lungawi lo taka a awm reng kha kei dawhthei lo ve tak khan ka ngai thei lo a ni ber ang chu.





( THEODORE-A POV hian kan cont mai dawn nia aw, chawlh rei chuan rilru amang ve tlat zantin dah turah ngai ila )