*ZûNLêNG* ch~2 by ~ Natasha Hrahsel

[Natasha Hrahsel]

*ZûNLêNG* ch~2







Inkhawm turin ka insiam mawlh mawlh a ,biakin awmna leh ka quater awmna hi inhlat ani miahlo mahse akawng chu duhthusamin a chhuk thung .
Puan ka bih thiamloh em vangin kawrfual ka kaihza thleng a senno lam lek lek ka ha a ,pheikhawk sang vaklo ka bun bawk .Ka sam sei hniang mai chu tihdan vak hrelo in ka thlah tawp a .
Mi thenkhat chuan 'puan ka bihthiamlo' tih vel hi an ngaitheilo thin ,keipawhin puan bih chu mawi ka ti lutuk ,azahawm ka ti bawk .Mahse bih thanloh bakah kan Mizoram kalkawng hian azirlo ka ti .Chhuk chho kara kawng lo chhe ve sek nen ,kei ang tiat lek ah phei chuan pheikhawksang bun telloh phei chuan tumtelek hi kan ang ka tia .Ka bihloh phah leh nge nge thin .






Tan dar rik hma hretin ka thleng ve hram a ,thalai lên an tih mai thin tlar hnungber ah ka thu ve ta vang mai.Inkhawm chu ka beisei ai daihin kan tam a ,mahse sunday school te a awm bawk a nu leh pa in thlalai chu min tam hneh viau hrih.
Hming te chu kan dah ve a ,ka inkhawm khât chuan azahthlak viau ang .

Kan inkhawm bang chu ka nihna chelh vang nge min be tu an awm ve nuk mai.Thenkhatin ka damdawi chawh an ngeih thu te min hrilh pah bawk a .
Rin ai takin he khua hi alo lian a ,Presbyterian kohhran pawh pahnih alo awm.Ka inkhawmna kohhran hi ate deuh zawk a ,veng chhak lam chu an lian ve viau ani awm e .Khawpui anglo takin chawlhni ah chuan lirthei tlan pawh an vang pharh a,inkhawmna a lirthei keng pawh an tam chuanglo.Lehlam kawng tak chuan ahahdamthlak .






Inthlak lemlo chuan ward round turin Hospital lamah ka pengkawi nghal a ,chawlhni hi chuan damlo han zia deuh leh dam tawh deuh te pawh kan chhuah ngailoh vangin an dinhmun hriatchian duh a ward round ani deuh ber mai .


"E Dindin i inkhawm ve nimaw" duty room ka lut chu nu Sawmtei'n alo ti var a ,ani hi helaia thawk zingah chuan a senior ber tawhin ka ring .Sister thurawn lakna ber ani an ti hialin ka hria.
"Umm Nu sawmte ward round lawk ila " thu khawmuang lo chuan kan ti a ,damlo register bu la in min zui ve nghal mai .







Helai ka thlentirh a ka thil huphurh ber mai chu kala junior si a ,staff dangte lah senior tak tak an ni tawh hlawm anga kan in milloh mai kha ka hlau a.Mahse ka rin ai daihin an fel ,nilo an fel leh lutuk zawk .Chaw ei a min sawm tu pawh hnar sen loh an awm laiin chawhmeh min rawn suah a min rawn thar sem tawk lah an tam narawh.Keimah hi rawngbawl thiam tak ni phei ila chu ka chaw ei atui thei ngawt ang .Ka chawhmeh leh thlai dawn vel athar thei mai sia ,han bazar hi ka ngai hrih lo reng reng .






"Enge in lo an ?"




"Ka pi ka nuam tawh viau mai ,naktuk hi chuan ka chhuak thei tawh mai lawng maw " ka pa ai upa tur awm vel ani.'Ka pi' minti niah!
"Pu , Dindin emaw Zodin min ti mai la ,chuan chhuah chu ala hma deuh ang tiraw .I khawsik hi ala reh lo a ,insawisel na deuh ila nei em ?" Ka ti a ,kum upa te ani tawh a hetia damlo khuma mut reng hi hrehawm ati dawn lutuk.An ni angrual phei chuan engmah tilo a awm te hi an thiamlo thin a ka hrethiam lutuk.



"Na ka neih pawh ka hre tawhlo ,ka khawsik hi ani deuh tawh mai a " ati ve chuap chuap a



"I zunkawngah hian hnai (pus) a awm amaw ,chu chu i khawsik siam tu ber ania .Vawin te i khuasik loh chuan naktuk ah test kan nei leh anga athat leh nilai emaw velah kan inchhuah dawn nia aw " ka tih leh chuan aw min pawh ve mai a.



Damlo tunah hian 8 kan nei mek a ,an vai hian zunkawng hnai awm ,typhoid leh rannung seh tihvel anni vek .Hmanlai leh tunlai hi kan tehkhin ringawt thin a ,thenkhat tunlai mi chu an tuar a zuau lo ti ringawt te lah banglo.Tunlai mi chu kan tuar te pawh a zuau maithei hmanlai anga tette atanga hnarum thawk kan ni miau lo a ,mahse tunlai leh hmanlai hi khaikhin reng theih anilo .Thiamna lam ah pawh kan insan hleih tawh lutuk.Han chhui han chhui ilang chuan hmanlai a boral tam tak te kha kum upa lo tak tak a boral an tam viau ang ka ring .A chhanchu khawsik leh natna nei pawh nise hna an thawhluih pui mai a ,an taksa in atuar leh si thin a ,thihpui hial pawh an tam ang .Hmanlai kum 60 mi leh tunlai kum 60 mite landan te hi a inang lo ngawt hian ka ring ani.






"Dindin..dindin"




"Ah aw .." Nu Sawmtei min biakna ka lo hrelo reng reng


"Engemaw i ngaihtuah vung vung ni? Pu Muana'n pangpar khawina tur vel i siamtir tih a sawi a ,ka saron par thenkhat saw i duh chuan tlaiah lo la la " atih chuan thilhriatchhuah ka nei thut.Remruatfela kha khum chungchang engmah mumal khan ka sawipui lo reng reng!

"Ka lawm ngawt ang mahse i enkawl angin ka enkawl theilo ang tih ka hlau e ,thlai vel ka dah zawk dawn emawni kalo tia .Chuan Nu Sawmte nimina ka mistiri rawih Remruatfela ania i hria em?" Kan ti te te phawt a




"Hria e ,tlangval fel lutuk anih kha .Tinge ni a "ati nghal zat a " a number ka duh e ,khum vel siamtir ka duh a " ka tih chuan a ph a phawrh a "kalo thawn ang che " atih zawh rualin ka ph alo innghawr nghal dar dar .Tower kan hnaih bawk a signal atha hle mai.






"Pangpar chu lo la rawh ,thlai te pawh enkawl awlsam deuh hei hmarcha tih vel emaw te ching tel mahla apawilo tawp ang .Eikhawp lek tal han thar ve te hi anuam duh ania ,Doctor chhuak ta te pawh khân an behlawi tih vel thlengin an chîng nual zel" a ti luam a ,keipawh ka phur thar riau mai .
Pangpar pawh tlem azawng chu phun ve tho ila ,tomato tihvel han ching tel bawk ila .






Thingpui te in in kan ti ti ta luam a ,tlaiah apangpar la ngei turin min hrilh nasa .Nu Sawmtei te hi chu quater ah awm ve tawh lo in khua ah hian in leh lo an din tawh a,Hospital atanga hla chu ani chuanglo.

In ka thlen chuan chawhnu inkhawm kal alo hun leh der tawh mai,chawhnu erawh ka inkhawm peih ta ngang lo .
Inthlakin ka ph chu ka thai ka thai a ,kan Mistiri pa chu ka call ang nge call lo ang tih ka inngaihtuah ngar ngar .Nimin te khan haw nghal daih lo khan khum chungchang te pawh chu min sawipui tur ania ,achinchang hre zawk lah a tawngduhlo bawk si .







"Hello" lehlam atanga aw thum dut in a rawn tih chuan ph dah hla in ka hmui ka hup a ka te vak ! A aw pa zia mai chu a !
"Tunge aw " a rawn ti leh dut a

"Dr . Oh..keimah ih Zodini ..U Remruata i ni em?" Ka ti bah nak ,hepa hi ka star ami? Nilo ka star lullo ang Zondinsang che chukchu thei lutuk mai .





"Aw " tehtawp chuan ! "Khum vel kha nia engmah kan sawi chiang silo a " pangai tak chuan ka sawi chhuak thei hram .
"Umm ft 4 khum i duh nilawmni "

"Aw kha kha nia " kati let thuai "ka siam zo tawh"

"Awihawmloh ee" Lalpa ka kâ ka veng hmanlo mahse tunah khan..tunah khan a nui ri ka hre deuhin ka hria! Nge ka hresual zawk? "Nizan ah ka siam a ,ka siam zo tawh " a ti sup a ,ka hamhaih dawn alawm ,engtin nge zankhat thilthu ah asiam zawh theih zawk le ? Nge ni a uluk vaklo hian alo kilhkhawm vel mai mai zawk ni ?




"Siam a awl viau ami ?" Ka ti ta thlawt ,amak ve em ani .




"A awl lo mahse,siam mai theih tur a awmsa " anih dawn chu a .Nilo se zankhat ah chuan a siam zo hmanlo tawp ang.





"Sawi duh dang ila nei em ?" A rawn tih chuan "chhuar vel kha ,sitting room ah hian thlang lamah thil engemaw han tar mawi vel na tur ang deuhin siam ka duh a chuan Choka chhak lamah hian bungbel dahna tur vel ka duh bawk a,mawihnai ve deuh in mahse awlsam deuh tho in " ka ti a ,chhuar siamna tur awm ang vel chu nizan lamah kalo ngaihtuah lawk hlauh a ava tihchi tak





"Awle" tiin amah zawkin adah hmak! Ka ph ka en hu ringawt .Hepa hi ka hrethiamlo, mahse ka be chak tlat nia mawle ! Zahthlak hian ,atawngduhlo lutuk hi ka be chak tlat.Nge ni a ka lo duh ru reng zawk ni ? A chutiang em chu ani thei lo ang.







Ngaihzawng tihvel han ngaihtuah hman hian ka khawsa ngai vaklo a ,pawl sawmpakhat ka nih laia ngaihzawng pakhat ka neive tih loh kha chu kala nei leh lo reng reng .Tunah hian kum 25 na ka hmang mek ti ila Dec ni 24 ah hian ka pum dawn chauh.Ka pa hi Mizo pa ve tak mai ania ,kan tetlai pawn mizo school min kaltir ngar ngar thin .Khatih lai khan Kg 1 ,nursery te awm ve heklo kum 3 ka nih in Mizo school class 1 ah ka thu nghal tawp a ,ka vanneih asiamin zirna lam kalo ti thei hlauh a ,tha takin ka pass chho vel zel.Kum 16 ka nihin class 12 ka pass chhuak tawh nghe nghe .Class 9 ka nih thleng vel kha niin ka hria kumkhat ah hian Class khat hi kan zo mai thin a ,tun ang laiah chuan thla laklawh ah te zirna kan tan tawh a zirchhung a rei bik .


Pawl sawmpahnih ka pass atang ram pawnah zirna chhunzawm turin ka pa in kan unau in min dah a .Ka unau te nen pawh kan zirna hmun inang lo ta chu kan inhmu khât thei ve thin khawp mai .Ka sawitawh ang khian ngaihzawng neihna hun ka neilo ,a dera min han duhtu te chu tawng ve fo mah ila zirlai nen hian ka kawp thiam velo.Pawl sawmpakhat ka zirlai pawh a ka ngaihzawng hmasa ve ber ka thenna chhan pawh ani reng a .Inngaizawng dangte anga lenchhuah te kha alo duh ve thin si ,kei in hman ka inti thin silo nen aaa keima thiamloh hi ani deuh ber mai.






Ka mutur in ka ph kan check chu whatsapp ah kan tlangval tawngmawha'n minlo be teh mial! Kan open chu ka nui chhuak phut.
'engang nge i duh' tiin a hnathawh tawhsa aniang chhuar siamsa anghi minlo thawn teuh.
"Avar ang hi" tihte in ka reply a .Alo seen nghal!

"Awle " tih te in min reply!

"Chuan" kan tilui lehkher a ,ka be chak tlat . "Avar i duh" tihzawngin min reply ! Huiha ,keichu ka hah .Nula in kan bia a thuthlum ve deuh hlek te pawh min rawn send ve tur ania .Hetiang hian tumah kala be hmasa ngai vaklo asin le ..A kaw hlawllo.





"Naktuk OPD ah ka thut angai dawn a ,tlai lamah bak ka hman dawn silo a.Pa Muana a awm dawn tho a inlo khawih mawp mawp mai dawn nia " tih chu ka thawn leh ta hram a ,a seen tawp a ka thu thawn chu like leh tawpin min reply tawhlo .Amanganthlak duh angreng viau








Ka zingtho chu ka tho nuamlo ngei mai ,ka lu ana bur a nizan ka inbual leh hnuhnawh vang pawh ani maithei.Peihlo zet chuan ka tho a ,rawng pawh bawl peihlo chuan ka hmai ka phih a makeup tlem inbelin smartpants dum leh cotton kamiz var ka ha leh a pheikhawk erawh khua alum lutuk tawh hran lo a tiin boot ka bun ve ngei.Ka insiam zawh meuh chuan dar 8:30 lo ri va tawh .Zingthawh hi chu ka harsat ve ani .





Hospital canteen ah kalin chhang leh thingpui ka in a,eitur dang la awm heklo .Duty room lam ka pan hna hna .

"Nu Madin tukchhuah nuam " ham chung chuan ka ti lut bai bai .
"Mut iva kham loh hmel ve ? " Nu Madini'n alo ti a ,ka nui mai .Mut han kham tak tak ka nei ngailo ."e taka Nu Madin ,zirlai nula ve deuhtawh awmpui tur kava duh ve rawngbawl leh inchhung chet vel khawih tur .Hahthlak phei chu ani dawn miahlo a " ka hrechhuak thutin ka ti a ,tukverh lam melh veng veng hian "Nutei khuan aduhlo maw le ? An chhungkua an harsa ve a tunah higher ah akal mekin ka hria aduh hrim hrim ang class akal phah theih dawn chuan ,kalo be chhin dawn mi?"ati a


"Lo be chhin teh ,atheih phei chuan tunkar atanga lo awm tur ka duh nghal amaw class te chu kal thei dawn lutuk harsa a awm hran dawnlo a .Mahni a han awm hi a reh sia ka ning deuh a bakah rawng te alo bawl theih phei chuan ka in ei thau ve deuh thei anga " nuih deuh pah hian kan ti a ,Nu Madini pawhin min pawmpui viau mai . "Ward round lawk ila " tiin ka tho zui a ,min zui ve mai turah ka ngai.







He khuaah hi chuan nurse an hahdam angreng phian a ,chawhma ah duty an awm a chawhnu ah midangin thlak lehin zankhua a duty turin a rawn thlak leh a .A ruala pahnih duty tum a awm ve zeuh maithei bawk .An hahdam ka tih rualin damlo tam tum chuan an hah viau thung .Khaw thenawm te pawhin an rawn pan ber ania,damlo pawh tual mi aia khawthenawm atanga rawn awm an tam tum a tam viau mai .


Ward ka round zawhah Pa Muana call in ka be leh hrep phawt a ,canteen atangin an chhun eitur an pek tur thu te nen lam ka sawi hnu ah ka dah a ,OPD lam ka pan zui zat .
Damlo hming ziak tawh zat ka bih thuak a rin ai takin vawin chu an tlem .Mahse test neuh neuh ngai an tam dawn vangin tamlo pawh nise ka thut nilen deuh chu angai leh tho ang .







"U din kalo lut " staff pakhat Azui'in rawn ti lutin ka eitur a rawn keng lut a ,chhunchawlh hun alo ni leh der tawh mai .
"Damlo anla tam em ?" Pawnlam thlek chung chuan ka ti a ,parda a inzar avangin engmah phei chu ka hmu thei vak chuanglo .
"Aih test result nghak an ni deuh mai ,la enloh pahnih chu canteen ah ineipuar turin an kal daih lawm" ka eitur dawhkan a chhawp chhuah pah chuan ati a ,ala nau angreng viau .Hospital in staff indaihlohna vanga an rawih kha nia ,atawng phawng phawng zel a alawmawm phian .





"Ui UDin i mistiri chhawr saw kan star thei rap mai " a rawn tih hluai chuan ka melh hau ringawt .
"Ka dawr kalin ka hmu lawm ,apa sia e .Kan thianho hian adawr hi nikhatah vawi nga vel tal kan kalpel thin " atih chuan kalo nui ve hak .Thian ho a star neih intawm a hetianga han thlithlai vel hi anuam duh viau ang .Keiin ka tleirawl ve lai zawng zawng inzirnan ka hmang zo a ,thiante nena han lenchhuah a han intihhlim te hi ka chak ve leh hnuhnawh.Tunah chuan thian ti a han sawitur pawh ka nei mumal ta lo.


"awi ihmaw ...lawk ibulah kalo eive dawn" tiin atho thut a ,pawnlamah hmanhmawh zeta chhuakin a eitur a rawn chawilut leh.
Staff te bulah Doctor tia min ko lo tura ka hrilh avangin ka hming pangai hian min ko mai hlawm a ,staff zingah kei ai a nau pahnih Azuii leh Nunui tihloh hi chu kei aia u vek an ni ,anni pahnih hian min u a midang ho hi chuan achangleh dindin mintia ahmun a zirin Doctor tih te pawn min ko ve tho.





"U Remruata saw maw ahma chuan doctor a zir ve thin asin" ka hriat chak em em chu a rawn sawi chhuak ta nawlh .
"Tinge Mistiri anih daih a ?" Ngaihsak hmel lemloh deuh chuan kan ti a ,ka rilru erawh in 'sawi zel rawh' ati mawlh mawlh.
"Kum thum kha azir ve in ka hria anihchak ber pawh ani thin mahse a zawm thei talo a ,achhanchu sum lam an harsa ve sia .Apa a damlo chho a ,anau zirlai vetho ala ni bawk si nen zir zawm tawhlo in alo haw tawp alawm .Anau in zirna zawm zawk se atia amah chu a rem rem ah a inhlawh chho a ,mahse kan khua angah phei chuan inhlawhna te hi avang sia maw .Apa thianpa thing mistiri hi a zui ngar ngar a ,chuan engemaw training te aneih leh hnu ah dawr khu ahawng ve thei chauh alawm." Athusawi chu ngaihnawm ti zetin kalo ngaithla a ,doctor hial zir pha chu zirna lam athei fû tihna ania .A rilru ana ve viau in ka ring ,chutih rualin apuitlin zia alang a achhungkua ahmangaih zia alang bawk.






"A naupangchhe zawk zawk tawh awm silo a tinge nupui ala neihloh le ? Nge anchhungkua anla harsa deuh ami ?" Ka ti sep a , " harsa tawh lutuk hranlo ang ,anau pawh Aizawlah inhlawhin a awm ve reng tawh a Car zawrhna angah hian Manager angin a awm ve tawh in ka hria .U Remruata saw chu maw nupui neih lam angaihsak lo ve hrim hrim tawh zawk aniang .Duhtu ala ngah in ala luck tehmai nia aw.E taka apa damlohna vel vang hian sum chu an hmang ve nual tho maithei " ati deuh luam a ,"bialnu anei em ?" Ka insumhmanlo in ka ti chhuak thut .



"I star ve deuh chiang lutuk" ati ta chat reng a "nia pa chu ka ti" ka ti ta ringawt.Ka ti tak tak reng ,nizan ah pawh ka muttheihlawk chhan pawh Remruatfela ka ngaihtuah vang vek .A tawngduhlo leh lutuk te kha pa ka ti daih a,achanchin ka hriatchian hnu leh lek ah phei hi chuan engtinemaw tak hian min khawih tlat.


"Ho lutuk keini pawn pa kanla tia lawm ,kan thiannu pakhat phei chuan "ka thihchilh duh hial ang" te pawh ati thin.Mahse nula lam angaihsak lo a ,bialnu phei chu aneilo nasa ang" a chow thial tuam tuam pah chuan ati leh a ,kei kalo thaw huai mai ..aaa ka va zaklo tak a .
Kan tawngtui lutuk a keiphei chuan eng tham mah kalo la ei ve reng reng hleinem.








Damlo ka enzawh hnu chuan inlam panin ka haw a ,ka veranda zau lutuk lo a U Remruat'an hna alo thawk mawlh mawlh chu ding meuhin ka en vang vang .Azuii thusawi kha ngaihtuahin ka khawngaih ta ngawih ngawih .Keichuan ka châk em vang pawh ni miahloin Doctor ka zir thei a ,chupawh ka pa in zirtura min duh vang chauhin .Ani erawh achâk ngawih ngawih pawh zirtheilo in a awm ania ,atan phei chuan nun hi afairlo ngawt ang .Mahse tihian mi tamzawk te phei chuan an thawh peihloh tur hna thawkin sum ahailut a !




"Zodin ilo bang tawh elaw " pa Muana'n a rawn tih lauh chuan insiamtha thuaiin "aw " ka ti vak a ,inlam pan chuan ka pen nghal thuai.

"In hah tawh awm inva thawk rei ve " tunah dar 4 a pel tawh a ,ban ahun tawh viau sia.




"Nia hei Remruata hian naktuk a hna zofel thei tur law law in thawk ang ati deuh tlat a ,i insên hnem loh dan tur angaihtuah anih hi" a dara ben nghauh nghauh pah chuan ati a ,"ka va lawm ve aw " ka ti sep ringawt.
"U Remruat khum chu zanin hian inlo dah thei angem le ?" Ka ti sep a "thei mai ang" a ti ve dut .

"Anihchuan in thawhzawh ah law law mi hlawh vel kan inpek ang ,tunah pawh ka pe thei tho che a " ka ti ban charh a ,kalo ngaihtuah miahlo a apa damlo nen sum anlo harsa ve thei viau mai .





"Hnazawh lamah " tih te a min chhangin a thilsiam chu inchhung lamah a kenglut zui a ,Pa Muana nen kan zui lut ve nghal zat. Thlanglamah chuan chhuar mawi zetin anlo siam diam tawh a ,choka lam erawh anla peihlo deuh anih hmel .Ka duhdan akhirh hranlo bawk a siam harsa anih viau ka ringlo chungin mawihnai ka duh ve tho sia thawh pawh ati buaithlak ve deuh maithei bawk.






An haw theih meuh chuan khua athim tep tawh achau viauiin ka ring ,zanah te khan khum lo dah turin kan ti ringawt a ka va â tak .Mahse Nu Madini khan naktuk tlai velah ka awmpui tur kha alo insuan lut thei mai dawn ati leh ta reuh sia ,matress vel ngaihtuah angai dawn nen buai chung chung lo turin ka inhmakhua ve angai atin ni.Hmuh pawh hmu hmasa lemlo in awmpui kala ve ngawt dawn a ,mahse nu Madinin a fel ati bawka ka ring thlap .Mi afak mai mai kala hre tlatlo a .







Hmanhmawh zetin ka ineipuar thuai a ,invel tihfel leh nen rawngpawh bawl pangai loin noodles ka chhum deuh tawp.
Ka inbual leh te te a ka hnungzâng kham lutuk pawh tuisa tha zeta inbual chuan azia sawng sawng mai .Nilenga han thut hi chuan mawng leh hnungzâng hi kham duh tak ani.

Pawnlamah motor thawm ka hriat rual chuan ka tlanchhuak thuai ,pickup hian arawn phur chu niin .Aman akhalh a ,midang tumah alo hruai lo reng reng ,akhum bera pawh chu ka hmu chuanglo .





"Khawnge khum chu ?" Abul ka thlen chuan ka ti hû,motor atanga rawn chhukin ahnung chu ahawng a thing lo let bal chu ka hmu ve chiah ."ka zo tawh iti sia " hrethiamlo zet chuan ka ti a

"Room ah kilhkhawm in a awlsam zawk a " tha deuh chuan min chhang ve mai ,ka hrethiam ta uarh mai .Khum ang tak tak hian a rawn keng dawn emaw ka lo tih vang ani.




"Kalo kenpui ang che " tiin a zâ te chu ken kalo chuh ve thuai a ,min hnial lemlo .Ka theih anga tam chu kan keng ve bawk a a ken nen phei chuan in tam hleih tak ani .
"Vawikhatah ken teuh angailo" ti thum dutin ka kensa tlawn hnih ngawt chu min laksak in akenturah adah hmak . "Hmanrua te lak leh tho angai dawn a vawikhata kenzawh vek theih ani chuanglo" pangai zawka ti chuan akal zui a ,atawngkam kha abul mah mah ati ve deuh ani maithei .



Room a kan indah fel hnu chuan amahin la turin akal leh a ,keiin kalo nghak tawh mai mai thung .
"Lo awmsawn la " a dahna hmun tura kalo thu chu arawn ti dam diai mai ,atawngkam ka hriat tawh ah ala tawngdam ve ber aniang.


"Ana " ka kut lasawn in ka kun ngar ngar ana lutuk chu ka mittui arawn hnam nghal tiam tiam ."ka ..ka tihpalh "ati ri chu ka hre ruai ruai ,anat zia mai chu amak zawk!Puih phet ka duh vangin a perek kilhna tur zawnah kalo dawmpui a ,ka kutzungpui ah a chhu chiang lutuk .


"A..apawilo" harsa zet chuan ka ti chhuak sep .Ka mittui lo luang mai tur chu ka kawrban in ka hruzui thuai .
Inthiamloh hmel zetin ka kutchu alo la melh ngur ngur a.
"Hei..ka tha ana vak tawhlo " ka ti leh nangin ka kut chu ala melh ngur ngur tho .Adik taka sawi chuan keima thiamloh zawk ani ,puih angaihloh thu asawi pawn puihluih phet ka tum a .A ke a kilhna tur lai kalo vawnpui a,ka balance hlauhin ka kut kalo tiche palh ani.Che lo ilang chuan min chhu bik miahlo ang mawle.A inthiamlo hmel chu akhawngaihthlak zawk .





"Kalo en ang "ti supin ka kut chu zawi muang hian alamah apawthnai a ,ahmu chiah chu athaw chhuak hawk .Ka tin chanve dawn chu thisen tlingin a ti duk vek ,achhu na ve bawk em a.
"Ana tawhlo a reh leh mai dawn alawm" laklet tuma ka tih chuan ka kut chu pawtbet tlatin zawite hian a nuai ne ne a ,a khawih zawng chuan na ve det mahse hrehawm ani hranlo .




"Apawi hle mai " ti thawp supin a chhem zui heuh heuh! Achezia chu hmuhnawm ka tih em vangin engmah ngaihtuah loin kalo en reng a ,achangin ka kut nuai chung chuan athaw leh hawk thin . "U Remruat apawilo ,hetiang te chu a reh leh vat mai dawn alawm,bakah kalo chet vang ania ithiamloh ani miah lo ania aw " ka ti nawn leh ta tawp.
Hrehawm ati leh lutuk chu keimah zawk hian hrehawm ka ti tawh zawk






Ka kut chu zawi te hian ka la let a ,tunah tak phei chuan anuai na vang nge a na tawh miahlo ! A duk pawh kha azia deuh in ka hria !
"Ehe ana tawh miahlo mawle " mak tih hmel zeta ka tih hluai chuan alo khi ve suk ! Lalpa tun a akhisuk inhmeh zia kha .





"Ih..thingpui kalo lum ang che aw ,pui lo che ila i che rang zawkin ka hria " ka sawitur hrelo chuan kan ti ringawt a
"Angailo ,tikhan lo thu mai mai rawh" ti supin a thilkhawih lai chu akhawih zawm a ,'nakin ah ka lum sak tho ang' ti rilru chungin a sirah chuan ka thu ta hle hle.