Story a nihna ang in a tak han an loh riau chang te a awm dawn a ngaihdan tawk te min lo thiam sak ula, chuanin ka sawi duh ber pakhat chu story kar laka thil zeh hi rawn sawi in awm zauh zauh a, ṭha ti pawl leh pawl lo te mahse le hetah kher hichuan ka thu hi kan ti tlang ve tlat teh ang. Kum naupang tak tak story rawn chhiar ve te an awm ṭhin a, chung ho tana nun hruaitu a nih theih hlauh takin tih thu ah ka rawn zep tel ṭhin a ni a, eng he hu nilo mahse hlawkpui pakhat tal an lo awm chuan ka tum ah ka hlawhtling hle ah ka ngai bawk dawn a ni
A tawp ber ah chuan love story ngawr ngawr a nih theih loh lai te a awm dawn a, thil a kual thui tih te hi ngaihdan lo siam zung zung mai lovin, nakin ah pawimawh na an la nei vek dawn tih min lo hriat sak ula, tuna character rawn lang te hi la pawimawh hmel hrih lo mahse nakin ah story puitling a min siam sak tu tur te an ni dawn zawk zuk nia. Chhiar tui vek ule
#################
Keimah ni in zawk ah kan phei veleh a Mampuia pawh a rawn in sawn fel tawh a, hna pawh a zawm tawh a ni awm e. Ka thil hawn te chu ka phawrh a an lawm thiam hlawm khawl mai, Au Mama te chhung thil tur ka hawn bawk a, Hruaia te nen kan inkar ṭha vaklo mahse ka hmaih bik lo, eng ang a intithiamlo in thinrim khum mahila ka nau neih chhun kha ala ni reng a, alang in ngaihsak hluak tum tawhlo mahila thlahthlam erawh ka tum chuang lo
Khum ah chuan kan mu fel der tawh Liansanga ban chu ka kham a a dan lehlam in ka dul vel chu a thai riak riak a, ka period vang nge mawni Liansanga hi ka thla hlel tlat pek, hetia a bula a mut mai mai te hi nuam ka ti in hahdam thlak riau hian ka hre tlat zu nia, "Liansang" ka tih dan chuan min rawn melh chhuk nghal vat in a mit meng in zawhna min rawn zawt nghal a "Martha-i i duh tawh siloh chuan, hmeichhe duh dang i nei miahlo ami" ka khabe hmul ṭo deuh siar siar chu ka khawih pah niap niap a
In ngaihtuah ve niawm tak hmel hi a pu, a ngawih deuh vang vang hnu chuan "duh chu ka nei ngei alawm" a rawn tih sup rual chuan engtin emaw ka danglam nghal zawk mai, ka zawh zui zel chuan ka duh ang chhanna hmulo ta ila ka awm a nuamlo zawk dawn tih hria in zawt zui tawhlo in ka thil dang ka sawipui ta daih a, ka rilru lehlam chuan tunge a duh chu niang tih ringawt a ngaihtuah thung
Liansanga hi ka zep lo ka duh tawh ni ngeiin ka in hre ta, ngaihzawng ka la nei ngai lo a mipa duh ka neih ka la hre hek lo, tuna ka awmdan ai hichuan an danglam vak ka ring ta biklo, hmeichhe dang leh a hming ka hriat dun rual a ka danglam ṭhin te hi ka thik a ni ngei bawk in ka ring, ni e ka duh ta a nih pawn hriat tir loh hram hi ka tum tur a ni
Chakloh na ka insiam mai mai a nih dawn bak ah a intithei tur vel kha ka hmu phei lo. Tihian ka duh nge duh lo hrechiang theilo tur hian dah reng ka duh zawk.
Hun a kal chak khawp mai kan inneih aṭang thla khat a liam leh tawh a, kan zin kan haw aṭang pawn karkhat lai a liam leh tawh bawk, Liansanga nen kan boruak chu a la nuam rih khawp mai, Martha-i leh a chanchin engmah ka hre leh tawh hrih lo a, ka period zawh aṭang nupa nun pawh kan hmang lehnghal, Liansanga a infit in a inpeih at zel reng nen ti hichuan pasal ka neih chhan pawh a hlawhtlin vat ka ring ania
Ka class lak lai chuan tlar hnung lam aṭang chuan an rawn ri hak a ka va hawi phei chuan naupang zing a pakhat chu nikhaw hrelo in a lo tlu hi ania, an zirtirtu mah ni ila ka phili ve lek lek mai, class cr chu ka ko vat a staff room a midang ko turin, rei vaklo ah chuan Sir Benedict-a leh Sir Amos-a an lo tlan lut nghal a, Sir Amos an ambulance a koh tawh thu te an lo thlen ṭep a rin thu te min rawn hrilh chuan ka thla muang huai mai
Kan naupang tlu chu a hnar leh ka aṭang thisen a chhuak tel tlat bawk si nen ka rawmawl ken chuan a theih ang ang in ka hru nghal vat a, Mary pawh lo lut in kan first aid box neih chu a rawn keng a, lapua chu ka phawrh tir nghal ṭeuh bawk a, a hnar leh ka chu a theih ang ang in ka han hru nghal mawlh mawlh a
Ramthanpuia hi ka class te ah pawh fel pawl midang tibuai lo em em hi ania, a zirna lamah pawh a ti ṭha thei khawp mai, an ni section bik phei hichu keima class te an ni nen ka hre chiang ve thawkhat hlawm a, a ngawi chawi a lehkha mai bak ah sport thleng in a ti thei phian mai
Ambulance a lo thleng a kei chu an class teacher ka nih angin ka zui ve nghal a, Sir Benedict-a a awl ber a ni bawk a min rawn zui ve nghal bawk a, kan HOD in chanchin hrilh tura min tih chuan aw tia chhang vatin kan tlanchhuak nghal a, Liansanga te hospital lam kan panpui tih kan kalna kawng aṭang chuan ka hre thiam mai, call ve ka tum zet na a tih buai ka hlauh vang chuan ka call ta lo a
Emergency room ah chuan kan hruai a an lo buaipui vat vat a, chutia an bula kan din lai chuan "Mamte" rawn ti tu ah chuan ka in her riai riai a, Liansanga chu a doctor coat fual ha ngei chuan a lo ding zuar a, a inhmeh kher mai, clinic ah hian a coat var hi a ha ngai lem lo a, a khai daih zel sia atak a a hak ka vawikhat hmuh na a ni bawk nen a inhmeh ka ti lutuk chu ka en deuh vang vang a "Mamte" a rawn tih leh sup chuan harh zawk in min biakna chu ka ngaithla ṭha nghal a, kan kal chhan min zawh chuan ka hrilh nghal zung zung a "keiman kan en ange" ti in Ramthana lam chu a pan ve nghal a
"Ava mak ve aw, a dam ṭha viau emaw ka lo tia sports vel te hi a tui ve sia" Sir Benedict-a chuan a rawn ti nuah nuah a, ka lo bu ve nghat nghat a, reilo ah chuan Liansanga chu a rawn chhuak a a hmel ah chuan dik zan lo a awm tih a hriat bawk, "Mamte tunah kan zai nghal a ngai dawn a, a chhungte emaw lo bia ula, chuan FIR in theh luh sak ngei a ngaih hmel riau bawk, dan ding lai kan neih sa angin police te kan hriattir tawh a, in zirlai hi a naupan lai aṭang tawh a nasa taka sawisak ṭhin a ni ngeiin kan ring, a ruh tliak amah a inzawm leh ṭo kawi dan aṭang te, chuan tuna a awmdan aṭang te pawh hian hun rei tak a lo tuar tawh a nih hmel" Liansanga thusawi chu Sir Benedict-a nen chuan mak kan ti kher mai
Ka mak ti lutuk leh min ṭhawng lutuk chu ka pai deuh khat a, Sir Benedict an min rawn vawn a tum chiah Liansang an min rawn pawt ve dawrh thung, Benedict-a lah chu Liansanga ngei tur tawk lek hian a nui reuh a, hepa hi eng nge maw a hriat ni, "ka nupui hi sik pawh sik tum tawh suh ang che" chang lutuk a Liansang an a rawn tih hlawl chuan ka mang ti chu ka phar awn awn in ka ring
Benedict-a lah chu a nui duh lek chauh leh nghal a, chu chuan Liansanga thin chu a tirim zual nge a rum nghut a, ka mitmei in ka lo khap nghal vat bawk, buaina chawh chhuah na hun pawh ni nghal lo chuan. Liansanga chuan min rawn kai hrang a "in students case hi a serious hmel riau a, hetiang ho hichu an mahni chhungte ngei emaw aṭang a thleng hi a tam ṭhin avang hian nangmah nin FIR chu theh lut ula a ṭha zawk ang" a tih chuan ka bu nghat a
"Tunge an class teacher " a rawn tih leh chuan keimah ka nih thu ka lo hrilh vat a "ok nihchuan engmah hlauhthawn awm a awmlo ania, tuna police lo kal tur hi ka ṭhian hnai tak ania, engmah sawi vak pawh a ngailo duhleh class a a mizia leh nungchang vel te kha i sawi ang nga" aw ki ngaihthlak nuam deuh hian a rawn ti leh a "Liansanga i chiang maw, a chhanchu ka class te an nih ang hian ka hre chiang ve viau emaw ka intia, Ramthanpuia tak phei hichu han buaipui ngai ang leh harsatna nei hmel hi a pu ngai bawk silo a" ka ti ta duah a
Liansanga chuan ka thusawi hriatthiam hmel tak chuan lu rawn bu nghat in "a nak ruh hi a hmain a ti tliak tawh nge a nih hmel a, a lan dan chuan in college a a rawn luh hma a ni tawh ang, enkawl lo a dam tih hriat takin a inzawm na hi a kawi viau bawk, a taksa kan han en khan ser leh tunhnai a mi hnuhma ka hmu nual bawk, chuan tuna a tluk chhan hichu a lu ah hian thil rit taka khawn emaw vawm a ni a thluak ah hian thi a tling bawk"
Mak ka ti hle mai hetiang te chu mipa ania lo inven ve theih awm tak hi ania, hmeichhia chauh hi tih duhdah na tuar an lo ni biklo tih te ka hriat thar phah "mak ka la tih chu mipa ania mahni in veng thei khawp a ni tawh tho bawk sia" ka tih hap chuan min rawn chhang leh vatin "a tet te aṭanga rilru lam nen a nghaisak ṭhin tih a hriat a, kha khan a hneh tur reng pawh hlauh na a pe a, an mahni an hmuh rual khan hlauh vangin engmah an ti thei ta lo ṭhin a, a lo harh chhuah velah mental health hi kan test bawk ang"
Sir Benedict-a nen chuan kan la awm a kan HOD pawh a lo kal ve tawh bawk a, thil thlen dan te chu kan hrilh nghal a, keinin FIR kan theh luh chuan kan college hming pawh tam taka a lan tur thu te chu ka hrilh tlang nghal vek a, kan HOD hi pa ṭha thluam mi dik kohhran a rawngbawltu pawimawh tak ania, kan thehluh chu a ṭul a ti ve bawk a, "mahse keimah ni thu mai in kan ti thei ngawt silo a, Principal hi ka han rawn der ve hrim hrim ang nga nangin lo buaipui la Miss Rin, an class teacher i ni bawk a"
Kan HOD pawh chu awm rei lo in principal nen inbiak kha an ngai sia, Liansanga te pawn Ramthanpuia chu an zai nghal a, Sir Benedict-a nen chuan kan ṭhu dun ta reng a, ka hmel ngui lutuk a hmuh vang nge mi fiam leh zeuh zeuh a "ka ṭhut hnaih ngamlo che inpa strict emai" tih pah te hian ka ṭhutna aṭang a sir thei ang ber ah hian a ṭhu vel a, kawng lehlam tak chuan ka rilru ala peng khawp mai
Chutia kan lo awmlai chuan Ramthanpuia nu leh pa ni awm tak hi an rawn lut ta a, min rawn pawh nghal vat a, a nu leh pa ni lo in a ni leh a pasal te an lo nia, nu leh pa a lo nei tawhlo hi alo nia , a ni te hian an lo enkawl a ni awm e, FIR chungchang te chu kan sawi chuan an ngaihdan a nih loh hmel ngang mai, a ni zawk phei chu a rawn pawr nghal khawp mai "a hming a zirtirtu ve mai mai in nih kha, engvang in nge in duh duh a thu inlo tih tlang ringawt, FIR chu kan la let nghal ang, tuman chutiang a kutthlak tur kan awmlo, tlangval a ni ve tawh a thian te nen an insual buai ve te pawh a niang chu" tiin a ang hlawi hlawi mai a
Chutia a lo an vel lai chuan Liansanga te ho chu an rawn inzui chhuak a, Ramthana ni ang lai pawh chu an rawn hre hman thuak ang, "Kan rin aiin thil hi a serious riau mai a, police an lo thleng tawh a, kawt ah sawn an awm tawh bawk a, keimah nen kan inbe hmasa phawt ang nga FIR chu in lo ziak fel dawn nia" Ramthana ni chuan Liansanga thusawi chu rawn pawt chat in "ka pu eng FIR mah theh luh kan duh lo, kan nau hi tlangval chho tha za rual a ni ve tawh a, ṭhiante nen intihbuai palh an nei te aniang, ama tan thleng a hmingchhiat thlak dawn a" kei ni min biak dan nena inthlau zet awka nem zet a a tih chuan mak ka lo ti ngang mai
Lemchan chu a thiam dawn phian kha, keini bulah lem a ang nasa phiar phiar emai "Ka Pi in nau hi a ṭhianten nen an lo insual a nih pawn hei kan hospital mai bakah Doctor leh mihring ka nihna ang in FIR hi theh luh ngei ngai ka ti, an zirtirtu ten an thehluh loh pawn keiman ka theh lut mai ang, a chhan chu tuna in nau case hi abuse satliah emaw kan tih kha 'attempt to murder' mai bakah 'rape' case a ni" Liansanga thusawi avang chuan kan meng phar nasa hlawm kher mai, Sir Benedict-a pawh a ang deuh pham mai
Kan mak ti hmel Liansang an a rawn hmuh chuan, min rawn en in a rawn bu nghut a "ni e in nau hi mipat mipat na lam hawi zawng a khawih thin a ni, chuan a hliam en hian tun hnai mai nilo hun rei tak aṭang tawh in a ni" rapthlak hi ka va han ti tak em, he kan khawvel han ṭawp tawh zia mai hi
Police an rawn lut a Liansanga chuan min ko tel ve nghal a, Liansanga room ah chuan kei leh police te leh Liansanga chu kan inzui lut a, Sir Benedict-a chu kan thawhpui te ho chanchin lo hrilh turin ka hrilh nghal bawk a. Liansanga room ah chuan kan ṭhu ṭhap a Liansanga chuan "Mamte Ramthanpuia ni pasal kha FIR thehluh chhan ah i ziak dawn nia, rape case bik ah khan, kut thlak vel kha chu a ni nen hian ani dawn a an pahnih a man ve ve chu an ngai bawk, a khawih ṭhin tih erawh a ni khan a hrelo a nih kha, an hmel kha ka lo chik a, a ni kha chuan mak a tih hmel a, a pasal erawh kha chuan hre lawk hmel a bu tlat"
Liansanga chu police ho nen chuan an in be mawlh mawlh a, x ray na te leh test result neuh neuh te chu thil tel tur chuan a pe nghal a, a hliam awmdan te chu kimchang takin a hrilh nghal vek a kei in a ka tih tur zawng chu FIR theh lut tu a ka hming hman leh court hearing an neih huna thu hre tu nih kha a nimai
Liansang an amah nghak tur a min tih avang chuan ka nghak nghal a, Benedict-a pawh a haw tawh a, tih fel ngai vel ala awm neuh neuh nen Ramthana ward ah chuan ka awm ve ta reng a, Ani te nupa pawh thana lamah an hruai phei nghal a, a nutei te thingtlang lam a awm te kan hrilh a an nin an rawn buaipui dawn a ni awm e
Kristian rama thleng theilo tura kan ruat hi a thleng ta mawlh mawlh mai chu a ni sia, eng ang a rapthlak tak hi lo la thleng ang maw. Liansanga chu a rawn lut a, haw tur chuan kan inzui chhuak ve nghal a ka rilru ka lo kawm nasa deuh nge Liansang an min rawn biak chuan ka phu deuh zawk mai "eng nge i lo ngaihtuah a" a rawn tih sup chuan chhang mai loin ka thaw leh hak a "amak ka tih ala reh theilo, engtin nge mahni mipat pui hi an it theih ṭhin le ka ti, piansualna lian tak leh Pathian pawi khawih na lian tak a ni" ka thusawi chu dik tih hmel zet hian a lo bu nghauh nghauh a "ngaihtuah lutuk duh suh pawngsual hi khawvela ka thil huat ber a ni, chuta kar ah ka mipat pui chung a thleng lehnghal ania rorel na dik a hmuh theih ngei nan ka pui dawn alawm" a tih nghet churh chuan a thusawi chu ka ringhlel chhin lo
In kan thleng a U Liani pawh a lo haw tawh aniang, a lo ruak huai mai chaw ei chu kan siam nghal mawlh mawlh a, ka chaw ei a tui lem lo khawp mai, eng tham mai ei lo chuan ka kham ta daih a. Liansanga pawn ka awmdan chu a hrethiam nge min be buai zui biklo, room ah ka chho a ka intleuh zo ka chhuak leh chu Liansanga pawh a lo awm vang tawh
"Mamte thil sawi lawk ang hmiang" a rawn tih chuan a bulah chuan ka va ṭhu ve nghal a , "i inbual hlan khan ka ṭhianpa kha min rawn call a Ramthanpuia ni leh apasal chu non bailable in an hreng nghal a, kar leh h court hearing na ah hian i kal ve a ngai dawn a, mahse lungngai lo la keipawh thu hretu angin ka rawn kal ve dawn tho ania" a tih chuan ka lo bu nghat nghat a
Ramthanpuia case chu court a kan inlanpui ni a ni tawh a, tun kar chho kha chu zirtirtu te kan buai cher cher khawp mai, Youtuber ṭhenkhat lahin FIR theh lut tu ka ni nen min rawn kawm tum a min rawn be tawk lah an tam, mawi hnai takin ka lo hnar zel thung a, kan HOD leh principal te thawhpui dang te pawn an mahni kawm tum tu an tawn hnem thu te an sawi ve malh malh hlawm mai. Tunlai ah chuan content kan duh lutuk na lamah hian duh ai chuan midang nundan kan va zah sak lo mah mah em aw ka ti
Class chawlh tawp a theih bawk siloh chawhma kan kal a, court ni hmasa ber a ni sia kal kim vek kan duh si nen chawhnu lam chu kan chawlh tir ta a. Naupang ho pawn an lo hre ve lo theilo a, chanchin min zawt tu lah an tam engmah chu kan hrilh ngai chuang lo a, Ramthanpuia thian kawm ve ber pawh kha thu hretu ah a rawn din sak ve dawn bawk a, kan rualin ka car ah kan phur tel bawk a
Kei, leh Mary leh Benedict-a leh Ramthanpuia ṭhianpa kha kan chuang a, Sir Amos-a leh Miss Aremi an inphur a, kan HOD te pawh an rawn kal dawn bawk. Ka sawi hmaih pakhat chu Ramthanpuia kha ni thum hnu ah a rawn harh chhuak a, mentality test chu an neih tir a, a lo ṭhalo tel khawp mai. Depression nasa tak aneih bak ah anxiety te pawh a nei tel a ni awm e, a nute te kha an lo thleng tawh a, ṭawng mawilo nilo se thingtlang mi nu mawlmang ve tak mai ania, an pa phei chu ram lam hna an ṭul sia a rawn kal velo nghe nghe, a nutei khan min biak fal khan thil kal hmang an hriat loh thu leh lan kut a a innghah thu kha min hrilh tawp a, kha khan min ti paukhauh nge a tawp thleng a ṭan ka tum ve ta tlat
Hearing vawikhat na chu kan zo a kan chan chu a ṭhat hmel khawp mai, Liansanga pawh an ko ve a Doctor a nihna ang takin a medical term ang zawng te thil a sawi nual a, a sawi lai phei kha chuan ka ṭang lutuk a ka lo thlan hluam thei. Ka thawhpui te ho nen chuan thil te kan ei ho a Liansanga pawh kan bulah chuan ala rawn tel ve zel tho, ka lai deuh riau pek a hetia mi hma a inzui vel hi kan nei ngai mang silo a, awmdan ka thiam lo ang reng
Kan thawhpui te ho chuan min fiam zauh zauh a Benedict-a lah huan Liansanga ngei tur tawk lek hian a strict a tih thu vel lampang hi a sawi a sawi a, Liansanga lawm lo hmel vel chuan ka nuih a ti za ngang mai, han nui chiah ila chuan a thinrim zual khawp ang le. Thil kan ei lai chuan dawhkan hnuai a ka kut dah chu Liansanga chuan a rawn vuan vut chu amah ka melh deuh kawk a, hrelo ang hmak hian a thil ei lai chu a ei mawlh mawlh bawk si, ka hrelo der ve ta tawp a, mahse le khawr tak hi ka ni midang in an hriat ka hlau si, nuam ka ti ru tho bawk si ka awmdan chu lai kual vel tak a ni
Ṭhiante ho an chhuak sap sap a College ah let leh a meeting neih kan la ngai sia Liansanga nen chuan kan inṭhen leh rih a, thawhpui te ho nen chuan college lam chu kan pan nghal a, meeting kan zo a haw tur a ka inbuatsaih lai chuan kan ka phone a lo ri leh ri a, parking lam pan pah chuan ka chhang nghal a "Mamte zanin tlai chu chaw in lo eiphei dawn em mi, Bawiha kha chu ka be tawh a Mamtei tih dan dan kha a ti mai a" ka nu Liansanga nu zawkin a rawn tih chuan aw tiin ka chhang a, tlawh te pawh kan tlawh khat hrim hrim a pawi ka tilo khawp mai
Liansanga hi thil hi a ngaihtuah thui riau a, anu te ina chaw kan ei te hian haw lamah reilo te tal hichu kan in hi min tlawh kawi pui ziah a , fanu mal ka nih vang nge mi hi an ngai ve thei riau a, min rawn bia in phei turin min sawm ngai lem lo na a, kan va len phei chang hichuan an hmel a an lawm zia hi ka hai biklo, pasal ka neih tawh chu thuhran ka hna nen tunlai phei chu case kan nei ve bawk nen ka buai cher cher lutuk a khawi ah mah ka peng hman lo a ni ber
Ka inkhalh haw nghal a Liansanga pawh clinic ah a awm leh tawh ania a car pawh garage ah a awm vang tawh, ka indah fel lai chuan clinic kawngka atanga a Martha-i ang zet mai rawn chhuak chu a hmu thuak a, en nawn ka tum lai takin a lo bo hman daih a, a nih ring deuh ring chiah silo chuan inchung ah chuan ka chho nghal a, ka in thlak sawk sawk a inbual tur chuan ka lut nghal a
Ka inbual lai chuan thawm ri rak rak ka hriat chuan Liansanga a lo haw tih ka hre mai, ka hmanhmawh deuh a ka chhuak ta vat a, ka rin ang ngeiin Liansanga pawh a lo awm ngei bawk, min rawn en zauh a "Mamte tih tur hmanhmawh thlak deuh hlek ka nei a, ka va dah zuaih che ang nga ka kal leh ang nga chaw rawn ei hman hram chu ka rawn tum ang aw" a ṭawngdan aṭang chuan diklo a awm em tih chik zet hian ka lo en a, mahse a hmel ah engmah a lang lo
An in a min drop zawh chuan hmanhmawh zetin a inkhalh chhuak lehnghal a, eng nge maw mi mawlh ni ka ngaih a ṭha vaklo tlat mai eng mah chu ka sawi lem chuang lo a. Ka nu lah chu Kohhran hmeichhia ho an lo leng a an inkawm ta daih a, Muanpuii nen chuan eirawng bawl pah chuan kan in kawm leh chawt a nimai, Muanpuii hi mi fel tak zawng a ni a rilru te hi a tluang purh mai a, a ṭawng duh ve hle bawk, ka rilru ah Sangtei a lo lang daih thung, Muanpuii nen chuan inang lo tak an ni
Mo sual kan tih te pawh hi an pasal te mawh tam tak hi a lo van tel tak em, Hruaia hi ka nau mah nise mipa nep chi ka ti mai, hmeichhe thu thu a awm thei chi hi a ni tlat hi a buaithlak a ni, a u te pahnih a tluk lo khawp mai, Au Mama lah mipa ah pawh pa tak hi ania, an nu pawh duat viau siin a tih dan dan in a awm bik miahlo, Mampuia lah ni se a pa leh lutuk hi kan buai zawk ṭhin tih tur vel a ni bawk si, Hruaia nem bik lutuk hichu a mak hi ka ti ve ṭhin
Hruaia hi Au Mama ang hichu ni se Sangtei hi hetiang hian a awm miahlo ang mawle, Au Mama lah tleirawl sual nei miahlo Pathian ṭih em em mi ania, Hruaia leh Mampuia hichuan an tluk lo fai vek chu a ni.
Liansanga chu tun thleng in a lo la let lo a tunah dar 10 a ri dawn thuak tawh, ka nu ngaihdan ni lo chuan call turin min ti sek tawh, ani phei chuan a call mawlh mawlh tawh, min tur tak sek ah chuan a tawp a tawp ah chuan ka han call ve ta a, a ring vang vang a ala tawh dawnlo emaw ka tih hnu chuan a rawn pick ta hlawl mai "Liansang " ka ngai vang vang a hmeichhe awl tliang ral hian min rawn chhang ta
"A buai hrih a" hi a rawn ti dap a mak ka ti kher mai "tunge i nih" ka aw erawh ala dam dap tho "Martha-i ka nia U Liansanga chu bathroom ah a lut lawk a ka lo hrilh dawn ami" zangkhai vah hian a ti ta a ka chhungril ah chuan che dat hi a awm, ka sa deuh pup pup bawk "ngailo mai engtik nge a lo haw ang tih ka hre duh mai mai mawle" ka theih tawp a zang khai chuan ka han ti leh a chunu chuan min rawn chhang leh in "zanin ah a rawn haw dawnlo tih a hrilh lo che mi, zankhua in tih tur kan nei a" nui zui har har a a tih tak ah chuan phone chu ka dah ta daih a
Ka nu chuan engtin nge a tih tih min rawn zawt nghal vat a, zep a ṭul na ka hrelo ka hrilh fai ta kelh a, a thinrim lutuk chu a sen vekin ka hria, "kan Liansangpuia chu ava han chak dawn lo tak, Martha-i tei vet pawh saw la kam khat hlek a ngai ani, mîpa a ni tawh tih te hi a hre ve awm sia" a tih hlawi hlawi chuan thildang ka lo ngaihtuah daih, engtin nge Martha-i a ni tih a nghal theih
Hmeichhia in a lo la tih bak ka sawi bawk silo a, a fapa nun khawlo zet hi a lo tawng ngun tawh a a lo hre chiang viau a ni ngei ang. A tlai tawh em avang chuan kan inlam ah pawh haw ta lo chuan Liansanga te inah chuan ka riak ve ta tawp a, ka bet lo ngei mai.
Liansanga awmdan hi hriatthiam a har ka ti khawp mai, Martha-i chanchin kha chu min hrilh vek tawh chuan ka hria a mahse ka rilru leh lam tak chuan engthil emaw ka lakah hian zep ala nei tih rinna hi ka nei tlat, chuthil chu eng nge niang tih hi ka zawn chhuah chu a ngai a ni. Martha-i tak pawh hian eng rilru nge a put ni ang aw, thlakhat dawn a reh tawh a tuna taka a rawn inlan leh hian chhan chu a neih ngei ka ring bawk, nge ni a tunah chauh nilo ka hriat loh hian ka hnung lamah min lo thlim ṭhin reng zawk
Thil chi hrang hrang chu ka ngaihtuah a Liansanga chanchin tak tak a chhungten an hriat pui bak hretu hi pakhat tal an awm dawn ka hriat chian ngei chu a ngai a ni, he mihring ka duh ṭan mek hian a thil zep zawng zawng leh a nun diktak hi hriat ngei ka ngai takzet a ni, nakin a mi â ang mai a ka nat loh nan. Chung zawng zawng hre tu tur a rin pakhat chiah ka nei, ni e Alex-a kha a ni Liansang an best a a hman kha, kan zin lai a a lo call pawh khan Martha-i chunchang kha a rawn sawi tak alawm, hepa hian thil hriat thui tak a neih ka ring hmiah bawk ka rinna hi a sual ka ring hek lo, ka la dawp deuh chu a ngai ngei ang.