Loving Mr Cavalier 2

[B.laltlanhlui]

"I hriat angin Mr Cavalier hi a ṭawng tam vak lova mahse pawi ti suh, kan client te hi mi inang lo tak tak an ni hlawm a, ṭhenkhat ngeiawm tak an nih laiin ṭhenkhat erawh an nelawm viau thung. Engpawhnise a ṭha thei ang berin kan dawngsawng tur a ni" Chamille in min hrilhfiah chuan ka lu ka bu zeuh zam loh ka tum ruh viau mai

Ka hna hmasa ka bân fel hnua thlawhna ka chuan leh hmasakna tur ber a ni a, ka thin a phut pawhin a awm viau in ka hria chutah a belh chhah tur chiah in Mr Cavalier pa sang ṭha tak nelawm lutuk lo a lo awm ve bawk nen

Kan kiang a rawn thlen chhoh chuan chibai kan lo buk a, min kal pel daih, kan lam pawh a rawn hawi lo. A chetdan chu ka ngei zawng tak, mahse chutiang hrilh hre turin tunge maw ka nih bik chiah le?

A ṭhu fel te te a, a laptop a la chhuak nghal. Chamille chuan ngaiah a nei tawh aniang, a chetdan avang chuan a buai pha eih lo

Engkim a ṭha vek tih kan chian hnuah a bul hnaia kan awm chuan ka hmui ka chip hman mai. Ka chet buai loh nana ka tih a ni. Ka thlan a chhuah loh hram ka beisei

Zâm deuh a awm hi ka duh lo mahse ka ni hmasa berah hian tihsual neih a thiang lo a ni tawp

Chamille chu Mr Cavalier bul hnaiah va kalin a hma lamah kut a suih a hawihhawm deuh hian a va bia a "Mr Cavalier, Liliana hi hmelhriattir che ka duh a, kan team a rawn tel thar ania, vawiin aṭang a thawk ve dawn a" a ti a

"Ka lawm lutuk ania" zawi deuhin ka ti sap a, ka nui sak bawk min rawn en a, rum nghut in laptop min en san leh daih

A va ngeiawm chiang tak

Chamille chuan a aw a thian kharh a, "Chhuah kan peih tawh a, i inpeih tawh em tih hriat kan duh bawk a" a zawh nawn leh pawh chuan a chhang chuang lo, Chamille ka en in nui hmel a la pu reng

A tihdan zir ka tum a, mahse midang an awm ve tih hre lo ang maia a lang chu ka ti thei ṭhak lo, a laptop ah thil a type zawh chuan ṭhu awn deuhin Chamille hnenah "Ka inpeih e" fiah fel tawkin a chhang a, min rawn en leh zeuh chuan ka tuiral vek in ka hria

Lalpa leh ka nu sawi 'Ram dang hmelṭha tak' nen khan ka tehkhin lo thei lo

A hmai chu a fai vang mai. A hnar sang vah mai leh a khabe te chu a va inchawih mawi tak. A sam chu a khuih pial zan a, a mit rawng chu a uk niin eng in a chhun phei chuan a mawi lehzual

Ka pian chu a en a ni maithei, a hawisawn leh daih, a kut in a hmui a tawk zeuh, kan inthiarfihlim nghal

Min thlek dan ringawt pawh khan ka hmulthi a tiding sung sung, ka kut a thlan nasa. A awm lohna lam apiang mai chu pan ka duh

Tunge anih pawh ka hre lo a, mahse mi ṭha tak anih chu ka ring lo
Nge ka dik lo zawk?

A hmaah kan kun leh zeuh hnuah kan kalsawn daih, Kan ṭhutna lam kan pan leh hnu ah Chamille chu ka lam a rawn hawi a, zawhna tam tak ka nei hmel a hmuh chuan "Kan zin chhuak ngun tawh a, ngaiah ka nei tawh alawm. Kan client ber a hman tawh chuan kan ṭhufel ang a *9112 kan hmet ang" phone sen chu a kawk a, hrethiam in ka lo la vat

Vawi hnih a ring hnuah Pilot chuan a rawn chhang a, kan hman tawh thu ka hrilh

Thlawhna chu a kâng ṭan a, chair chu nghengin thawk ka la a, hahdam taka awm a ngai. Ka mur chuai chuai ka thin phu ri pawh ka hrechiang viau

Zin kual hi nuam ka ti a, chhuah dawn leh din dawn tak hi chu ka ngaina teh chiam lo

"I zam em?" Chamille chuan min rawn en in a phun sup
"Chutiang deuh chu a ni" za lo deuhin ka nui a, chair chu nghet deuhin ka vuan

"Ka dem lo che, nuam tak chu a ni lo alawm, kei pawh in lama ka chhungte ka ngaihtuah ṭhin, ka pasal leh fate pahnih. Pasal i nei tawh em?" Chamille in min zawh chuan ka zang leh huai mai

"La nei lo e" lai deuhin ka nui a
"Anih leh bialpa?" Ka lam a rawn hawi a
"Aih tumah ka la tawng lo" ka lu thing in ka nui tawp

"Eng a?" Chamille in awih lo zeta min zawh laiin ka lo la nui ker ker van sang lam kan pan zel

"Mi mit ka la chiah lo aniang, ka lo la anih pawhin min ngai thutak vak lo a ni maithei" chhum kan tawh dawn chuan ka thaw halh

"Anih chuan khang hmeichhia ang kha i nih dawn chu" Chamille chu a nui hawk hawk a, a lu a thing bawk
"Eng ang hmeichhia?" Ka mitko ka san ralh

"An mahni star tu te duh thei miah lo mahse mipa chhelo deuh nghak tlat chi ang kha" a nui leh rulh rulh a, "Chutiang te chu thawnthu ah chiah a thleng ṭhin" ka lu ka thing a

"Awle i zia tawh in ka hria, kan la thlawk rei dawn si a, client chu va endik tawh rawh le, duhzawng a neih leh neih loh te va zawt la" tihdan min hrilh hnuah chanchinbu la chhuakin a chhiar mial mial

"Keimahin ka zawt ang maw? I lo kal ve dawn lo a mi?" Ka zawh lai chuan ka zam ru viau mai

"Hostess tih tur ber alawm, fakna ah pawh i ti ziah lovem ni? Training awl tak a ni ang i tih ve tho kha. Puih i ngaih chuan ka awm reng ania" Chanchinbu kar aṭang min rawn bih a, ka chhan leh hma in min chhiar san leh mawlh mawlh

Thawk la halh in ka dar ka san a, ka hnung mar at in ka khabe ka san vah a Mr Cavalier lam pan chuan ka phei

Passenger dang ang tho a ni tiin ka infuih char char. Ka thiam lam zawng ania, a duhzawng ka zawt mai ang, science ti tur pawh ka nih em loh hi

A awlsam dawn asin le

A bul ka va thlen in laptop bawk chu a lo khawih leh. Ka hre dik anih chuan hna a thawh laiin tihbuai loh tur, ka awm tih a hriat hma loh chu ka ding reng ang. Min hriat theih nan ka aw chu ka thian leh kharh

Engmah hre lo ang mai a ni

Ka nghak a, second sawmruk vel chu ka chhiar hman ang, hlim hmel put luih hram ka tum chu pawh engmah lo ang mai a ni

Chamille ka va en a, chanchinbu kar aṭang min rawn en zeuh a a chhiar zawm leh nghal zat

Ka din reng hnu ah second tin mai chuan ka thin a ur tulh tulh "Mr Cavalier, ei tur emaw in tur i duh ang em?" Ka zawt deuh tawp

Min chhang lo
A aw a chhuak lo, a thaw pawh in ka hre lo, a mit a khap lo bawk

Bang ka bia hi a ni ringawt
Beidawng deuhin Chamille chu ka va en a, a lo nui khur char char

"Min pui rawh" hmui phun in ka va hrilh a, a ban rawn vaiin hmui phun tho in "I ti ṭha lutuk ania" a rawn ti ve a, ka van awih lo tak ka meng kual lo chauh

Ni khat ni aṭang trainer chu chhuahchhal ka duh rum rum mai. Thawk ka la leh a, ka mit chhing in biak leh ka tum lai takin a ṭawng ri ka hre ta

"Ka tibuai che em ni Liliana?" Min rawn zawt a, ka meng vat min lo en kar mai
"Aih tibuai love Sir. Duh i nei ang em?" Ka sawi zo hman lo
"Wine sen a tawk mai ang ka lawm e" ka thusawi a rawn pawtchat daih, chhan let ka van chak tak

Min tihdan chu ka lung a awi vak lo Chamille awmna lam ka pan a, ka ngawih reng a ngai bawk si

Ka hming a lam rik dan mawlh chu ka bengah a ri nawn tluk tluk, ka mur chuai chuai mai, mipa chhelo tak hmelṭha tak chu a ni chiang alawm

Chamille chu a lo nui nasa mai, fiahna ṭha tak a ni ringawt, ka rum nghut a "I tih atan chuan a mawi lo ngawt mai aw" ka tum bur mai

"I chet ṭhat em kha, i ṭap lo tal a a zia alawm" Chamille chuan a thleng zing tawh tih hriat tak hian engah mah a ngai tawh lo

"Ṭap an awm maw?" Awih chiah lo deuhin ka zawt a, a lu a thing "I awih ka ring chiah lo, eng nge a duh a? Ngawi teh kan ring chhin Wine sen a duh tiraw?" A ti a

"Aw" ka nui ve leh mai, Chamille in choka lam min pan pui a. Glass leh wine awmna min kawhhmuh a, a sawi angin ka ti nghal zung zung. Mr Cavalier awmna lam ka hawi a, ka ke te hi a zawi vek

Ka thin chu a phu dut dut, ka taksa pumin a nghing lawih, kan mit a intawk chiah tihin ka hmai chu a sa pup pup. Ka hawisawn daih.

Ka khur der der, ka tihrawl chu ka mawhpuh deuh ber. Ka hriatna ve thung chuan thil dang daih a sawi thung. Chamille in wine vur bucket a dah a, glass chu tray ah chhawp in Mr Cavalier lamah min phei tir

A bul ka va thlen in laptop chu a khup a chair ngheng in a lo ṭhu. En loh ka tum viau mai. Ka lu ruh thlengin a hmu tlang vek emaw tih mai tur a ni. A kut zung laiin a hmui a khawih a

A hmui chu a nem hmel

Ka tihtur chu zawh vat ka duh a, mahse ka tiril khur nasa lutuk chuan min pui lo khawp mai. Ka tihrawl hi ka la puh ṭang ṭang

Chamille chuan chik zetin min lo en a, bottle chhin ka hawng a, glass ah ka bun chhuak leh. Mr Cavalier a'n min lo en reng tih ka hriat phei chuan ka zam lehzual

A in tur chu ka thli zo ṭep tih in thlawhna chu a rawn che leh thut

Ka hriat leh chu Mr Cavalier zuang tho zawk chu a ni, a kawr fai thianghlim tak chu wine a kai luai, a jacket a lo kilh pum loh vang vek

Min melh hrak a, ka chil ka lem khawlh. Min kalpel a, a room a luh daih laiin Chamille chu a lo ip chawih

Bottle chu ka dah thla a ka rum nghut, ka chal ka tuai vut vut ringawt ka zah lutuk vangin ka thlan in min bual huh vek

Ka hna hmuh hi ka mangṭha a va ngaih hmel ta ve

"Awle a tawn vawikhatna a ni hial ang, a kawr va la vat rawh" Chamille in a sawifiah leh zung zung laiin a ṭawngvai ta emaw tiin ka en reng ringawt

Ka thawh hmasak ber ah thil zawng zawng min tih tir vek chu ka hrethiam lo ve deuh

"Thawmhnaw chu va la rawh a bal kai lai chu kan tifai dawn nia" Chamille in min tur leh a ka hreh tawh viau asin le. Bottle leh tray tifai in choka lam a pan a

"Ti teh min awm tir mai mai rawh, kha pa khan min hua/haw tawh dawn lutuk, a kawr la leh turin min tir dawn a maw?" Ka tum bur, a lo meng ralh

"Mr Cavalier hi mi sual tak a ni hleinem, a hau lo ang che, a thutakin a ngawichawi tih mai loh chu. Kawngka kik la a kawr chu va la mai rawh" min fuih phur leh sauh a, naupang ang mai ka ni

Ni e ti tura min duh tlat chuan ka hna ka chan loh phah maithei asin

Zak lo ang deuh a awmin, room lam chu ka pan theuh theuh, ka kut chu ka tuai vut vut bawk

Muangchangin khur deuh chungin a room chu ka thleng ta

Ka chil ka lem a, ka dâng ro dan chu Sahara thlaler ang vel a ni. Ka kut thlan hlup chu ka pawnfen ah ka hru thuak a, kawngka chu ka kik a

Dawhthei takin a lo hawn hun ka nghak, a reh tlawk tlawk, ka thin a phu rang tulh tulh

Min chhan mai loh avang chuan ka kik leh a, mahse chhangtu ka nei chuang lo, thawk la leh in rilru ṭawngṭaina nen kawngka chu ka hawng ringawt

Mr Cavalier chu hmuh tur a la awm chuang lo, bathroom ah a thawm chu ka hrethei, ka awm tih a hre lo a ni maithei

Room chhungah ka lut a, zau tak pawh a ni lo, mahse a felfai lutuk chuan min hneh khawp mai. Khum chu a faiin a piah lawkah tukverh a awm a, khum sirah light a awm bawk

Khum chu zawimuangin ka pan a, a dup nuam lutuk chu ka nui ringawt

Hetiangah hi chuan mut a nuam viau ang ka ngaihtuahna chu a kal thui khawp mai, min lo thlir reng tu an awm in ka hre tlat

Ka hawi let a, tuia min leih ang mai hian ka harh chiang viau. Mr Cavalier chu kawr phelhin a lo ding reng. A hma ai pawhin ka hlau tawh zawk, ka hmai aṭang ka taksa a thlek zawh hnuah min en chiang leh viau

Ka chil ka lem leh ringawt, ka kut thlan hluam chu a hmuh loh nan hma lamah ka suih a, a khum ka lo suangtuah lai min rawn man anih ber hi

Min ban tawh ngei ang
Ka lam a rawn pan a, ka kâ chuan rilru dang a lo nei aniang

"Mr Cavalier ka tihpalh lutuk. Hei hi ka tum dan pawh a ni miah lo ania. I khum ka lo khawih a, mahse a puan hi deh nuam ka tih em vang ania, i khum ah awm ka tum lo ania, min ngai sual lo hram rawh, ka at em vang a ni" insawifiah ka tum a, ka ṭawng bah nuai mai

Ka thusawi a hriat chuan a meng zau kawk a "Tih thinur che ka tum lo ania, i khum ah ka lo ṭhu mai chauh ania min hrethiam hram ang che...." ka hmaah tak a rawn din chuan ka aw pawh a zuih riai riai

A âwm leh a pian nalh tak chu ka en lo thei lo

Awi leh dik lohna ka nei chiang alawm. Ka sa pup pup mai, a va lum tak. Ka chimawm reuh zia hi duhthawh takin a pian chu ka thlir dauh dauh, ka hmui ka liak zeuh bawk

"Liliana" a ṭawng chu a ring lo mahse a thuneih zia a chiang viau, ka mit ka chhing a. A aw chhuak te chu sava hmul deh nuam takin ka taksa a rawn dek ang mai hi a ni. A nem thek a ka mur chuai bawk

Tleirawl period lai ang mai chuan ka za cheng

Ka men leh hma in vawi nga ka chhiar a, min lo melh reng

A la awm tih a tihchian hnu chuan thawk a la halh a, a hawina lam zel ah ka lo inher ve zel thir hip thei ang mai in min hip tlat

A kawr chu a rawn khai a, ka kut hlei takah chuan a rawn nghat, a kalsawn daih bawk

Chu veleh room aṭang ka chhuak ve nghal, tui vawt a in phih harh ka ngai anih hi. Chamille awmna lam ka pan a

Ka thawh hmasak ber aṭang buaina ka insiam nghal ania chu pawh wine vang vek

****

Chhunzawm tur