Lunglawm Tikimtu chapter-17

[Kimkimi tlau]

" Nu tete, i va tho hma ve " Inla tho zing fahranin choka ah ka lut a, Nu tetei alo tho diam tawh kanu'n atho hma ṭhin atih avangin thawhkhalh ka tum ve ngei a alarm pawh ka set ve thlap mahse, nizanah ka pum anawmloh avangin duh ai rei ka menga Fela leh Nu tetei erawh ka kaitho duh talo kha ania, tunah pawh hian reh fel hmak chu ala nilo.

" Ka harh laklawh a, mut leh nan atlai leh tawh sia, ka tho hma mai mai anih hi " Ati zung zung a, silhmunah a che rak rak reng bawk eng nge atih phei chu ka hrelo

" Thingpui ka siam kep ang che aw " Ka tih chuan

" In lo zawk teh ang " A ti a keipawh ka pum anawm chiah loh avangin ka in ngam rihlo, chair pawtchhuakin ka ṭhu a dawhkan chu ka bawh hnak, na vut vut ni silo a ana riai riai chuan chet ati nuamlo khawp mai

" I ṭha em? " Chutia ka bawk zawi reng chu Nu tetei ngaih aṭhalo nge min zawt ta nge nge a, ka chhan hma chuan Fela pawh Vari pawm chungin alo lut

" Na i nei ami? "

" Ka pum hi anuamlo deuh a nizan aṭangin mahse, na vut vut chu anilo " Ka ti a ka ṭawng ring hranlo

" Chutiangte tinge i sawi vat loh, na nei chungin tinge ilo thawhchhuah, Bawiha room ah va hruaila va mut tir rawh, pum anat chuan chelo in mu ila azia ber alawm " Nu tetei'n ati chul, Fela chuan min pawm nawlh a, inpawm kual angaih loh nen chuti lutuka na pawh anilo ania, Nu tetei'n kan hnungah minlo zui lut ve bawk, dim te in khumah chuan min nghat a puan min sintir nghal bawk

" Pumpui chakna kalo la ang i ei anga, ala na viau em? " Nu tetei'n ati zung zung, Fela chu ngawi rengin kan bulah ading a, min en ngut ngut ringawt

" Ana lutuklo tihian kamu anga areh leh mai ang " Min ngaihtuah lutuk chu anawm rualin ka inthlahrung

" Chakai kha i ei ve hlek tiraw? " A tih chuan ka bu nghat, nizan khan eipui loh tawp chu ka tia tlemte ka ei ve

" I ei ngai silo a i eisual pawh ani maithei, i luak te achhuak em? " Nizana ka thil ei daih daih tuna ala effect chu ka ring vaklo mahse, engmah ka sawichhuak chuanglo

" Nizan kha chuan ka kua hi ano nghulh a mahse, tunah chuan chutiangin ka awm tawhlo "

" In checkup hrim hrim chu angai dawn anih hmel, engpawh nise Damdawi ei phawt rawh " A tih hnuah room aṭangin a chhuak a, Nu tetei achhuak chiah Lalruatfela'n min lo hnaih ruak

" Princess " Ati a phawk zetin min en bawk si, ngaihṭha lo zet chuan ' Eng nge ' Ka ti a

" I rai ani thei mai ang em? " Ati anih chu! Lalruatfela em em hi chu aw

" I mawl ami? Kan chetsual hnuah pawh ka period a, period lo ta pawh ni ila symptom lanchhuhna hun ala nilo hrim hrim " Na neih nen a inrem lo ṭhin asin aw

" I chhiat emaw kati hman alawm " Ala ti hram mawle, sawi tur pawh minti hrelo e a, tiang em em a hetiang lamah a bo chu alawmawm nge alawmawm lo pawh ka hrethiamlo, Nu tetei'n damdawi alo keng tak taka pum damdawi hi chu atuilo si ka ei huphurh ngang mai.

" Bawiha tui lo thlitsak rawh, damdawi hi atui vaklo " A sawi ang tak takin damdawi chu atuilo ngang mai, a kha pawh anilo ahiar in ka hria, ka inzawh rualin Fela'n tui min pe nghal, damdawi ka ei zawhah Nu tetei chuan min chhuahsan a, Fela chu ka bulah ṭhu in ka kut akhalh niap niap

" Ala na reng ami? " A tih chuan ka bu leh nghat, ka ka pawh ka ang peihlo ahma ai mahin ana zawkin ka hria, ka kut chu thlahin

" Ka reilo ang " Atih hnuah room aṭangin a chhuaka, ka pum dawm chungin ka mit ka chhing vang vang, a hma aṭang tawhin pum nat ngawt hi ka nei ziaha, vawikhat phei chu damdawiin ah karkhat chhung ka awm phah, ei ka insum ngai chuang silo a, ka pum hi ka ti rim ve em ani, ka mit chhing chunga ka mut vang vang lai chuan room kawngka alo ri leh rak

" Ka ṭhianpa hna kal tur alo kawi lawk hman dawn, i boss pawh ka biak sak tawh che " Ka sirah alo ṭhu leh a ka kut bawk chu a khawih leh nuap nuap

" Engtin nge ka boss number i neih " Ka tih sep chuan

" Ngaihtuah buai suh, ala rehlo ami? " Ka pum ka dawmna ka kut chu alo vawn hnan ve a

" Ana lutuk lo mahse, ana chu ala reh miahlo " Ka aw te chu a tham chhel tawh, ngawi reng chuan kan awmdun renga, pawnlamah Nu tetei'n thawm anei rak rak alo zin ṭum bera ka nuam samlo chu a inthlahrunawm khawp mai, Muhil chuanglo in ka mit ka chhing leh vang vang

" Princess, Doctor hruaizela alo thleng aniang " Fela'n ati zo chiah room kawngka alo inhawnga

" Chakai a eisual anih te ka ring a " Nu tetei'n alo ti lut bawrh bawrh

" Kan Ruatfela'n min lo tur nasa lutuk a, kalo hmanhmawh lutuk alawm " Chupa chuan ati a Fela chu anuih vur vur

" Ana ala rehlo a, a chhan i hre thei ang em " a tih chuan

" Kalo en phawt ang e " Doctor chuan nuihza insum deuhin ati

" Khawi lai vel tak hi nge na " Ka puan sin chu atheh hlim a, ka dul chu a anemkual dan dan ana lai tak anem fuh chuan ka inrin hmain thawm ka chhuah

" Dim ta che " Fela'n alo ti hluk

" Nute, Lova chhuahpui teh aninawm tlat " Doctor chuan ati a, na viau e tilo chuan ka ṭhen ve sak

" Nodless thak deuh deuh ang chi i ei ngai em? " Chiang deuha min en pahin ati a, ka chhan hma hma in

" Ei nasa tak ani " Lalruatfela bawkin alo ti leh

" I ninawm ka chhang ve thei reng " Na neilo ngat ila chuan ka kuk lawlh tawh ang

" Lalruatfela hi aninawm tlat tiraw? " Doctor chuan alo ti ve a

" Nachhawkna in ka chiu che anga, i pum na azia deuh hunah ka clinic ah lokal ru, Ultrasound tila aṭhat ka ring, rin thu a damdawi in chawh ngawt chu ka duhlo "

" Ka clinic awmna i hria tiraw? Lokal pui rawh aw " Lalruatfela chu abu nghat nghat

" A serious em? " a tih chuan

" Chu chu alawm check ka duh, Chaw tih loh thildang lo ei suh se " Ati a, Nachhawkna a min chiu zawh hnuah Nu tetei nen chuan an inzui chhuak, Fela pawn a zui chhuak ve a mahse, reilo teah Fela chu alo lut leh nghal keipawh chu nachhawkna chuan min chhawk ve ta deuh nge ka pum na pawh chu azia ve ta huai huai mai chutih rualin mutchhuakin min zem chiai chiai bawk

" Muhil phawt la, ilo harh leh hunah incheck up tur chuan kan kal dawn nia " Fela'n ati ri te chu ka mang hriat ruai tawh. Ka harh leh meuh chuan ka dam kawk in ka hria, ka pumna pawh nachhawkna in minla chhawk vang nge na ka nei tawh rihlo a

" A mah chu Damdawiin ah duty turin a kal leh tawh ang, Ultrasound tihte chu a theih reng atih kha, result achhuah hunah Hruaizela chu kan hmu leh mai ang a " Nu Tetei'n rem aruat leh zung zung a, ka pum na areh leh tawh tho sia in entir pawh ka ti leh vak tawhlo

" In entir pawh angai tawh lo, ka pumna areh tawh tho a " Ka tih chuan an nufa in ' A ngai ' an ti rual ṭhawt, engmah ka sawi ngam tawhlo, Doctor hruaizela clinic ah chuan kan kal ta ngei a, Doctor hruaizela erawh alo awm tawh lo

" Lalthansangi ini em? " Hmeichhe pakhat hian min lo chhawn a

" Akal hma in Doctor Hruaizela'n lehkha ahnutchhuah alawm, Ultrasound pawh atih nghal theih ang mahse, chumi hma chuan i zun a chhuak em? " A ti zung zung, kalu ka thin chuan

" Tui kha lo in la, i zunchhuah hunah kan ti dawn nia, zunchhuah loh hi chuan duh angin a fiah lo ṭhin a " A ti leh siam siam, a ṭawng duhin a ṭawng felfai thlap thlap bawk si

" Ava mak leh zel ve " Ka ti hliai ringawt, Damdawiin hi ka thleng khat ve a, a kalphung vel pawh ka hre lutuklo Damdawiin ah hi chuan ka khawr vel vek, Damdawiin chinchang hrelo lutuk thei khawpa kan dam anih chuan kan vannei ah ka ngai mai, tui in tur chu Fela'n min pe a ahma zawngin ka zun a chhuak zung zunga ninawm khawpin a chhuak zinga, tunah lem mamawh veleh ka zun lah chu a chhuak thei derlo, bottle thum lai ka in hnuah ka zun chu alo chhuak ve ta hrama, Hmeichhenu chu ka hrilh vat

" Minlo zui la, nangni chuan hetah hian inlo nghak mai dawn nia " Room pakhat ah hian a lut a ka zui lut ve nghal

" Hetah hian lo mu la, i kawr kha i hlim dawn nia " Atih chuan ṭha deuhin asawi ang chuan ka ti ve mai, ka dulah chuan thil vawtthler hi atat kuala ka ip deuh zawk nghe nghe, eng eng emaw asawi a ṭha deuh chuan ka chhanglet ve zel

" Kan zo tam, kha hei hian i dul kha hru fai rawh " Puan lian vaklo hi min pe a, ka dul chu ka hrufai mawlh mawlh

" Naktukah Doctor hmu turin inlo kal anga, in result pawh ahriat nghal ang " A tih hnuah

" I zun pawh test angaia, sawlai ah sawn washroom a awm va zungla " Ati a, ka zun dahna tur bawm lian vaklo min pe bawk, rang deuhin Washroom ah chuan ka lut a

" A hma in zun lamah harsatna te i nei ngai em? " Ka zun ka dawh chu ka pe a

" Nei ṭhin e, ka in entira chuta doctor damdawi min chawh chu ka ngeih khawp maia, khata ṭang khan insawiselna ka nei talo zawka " Ka ti a zawhna dang chu min zawh belh tawhlo hlauh, Room aṭang chuan kan inzui chhuaka, Pawnah chuan Fela chiah alo awm tawh

" Naktukah Doctor inlo hmu anga, result chu ahriat chauh ang " A ti a, Pawisa te kan impek fel hnuah Lawmthu te hrilhin kan kalsan a

" Khawnge i nu "

" A ṭhiante tlawh kawi tur anei a akal hmasa anihkha, i rilṭam em? " A ti duah, ka rilṭam loh thu ka hrilha kan motor dahna kan thlenga in lam kan pan leh nghal vang vang

" Class i kallo ringawta " Ka tih chuan

" Professor hnenah ka sawi vek alawm " Hahdam rawh ti ang hrimin Ka kut alo vuan a mahse, motor akhalh avangin a chelh rei theilo thung, inchhung kan lut nge lutlo ' Mu hahdam rawh ' ati leh nghal ringawt a

" Ka mu reng peih biklo " Na ka nei pawh ani tawhlo a, mut hi ka ning tlat, ka damṭhat in mut ka nin loh ṭhin nen, mihring lo makzia hi chu aw

" Mut hahdam aṭha ber, kan pahnihin mu ang " Ka kutah achelh a, ama room zawkah min luhpui nulh leh nghal

" Ka mu ning tawh asin " Puan minlo sin tir laite chuan kati nang nang a

" Nang meuhin mut i ning chu thil ṭha nge thil ṭhalo pawh ka hrethiamlo " Nui hawk hawk chungin ati ve ngei, inla ṭawngkam thiam ve sia

" Damlo vela maw mut ining ve tho ang " Puan chu pawt sawkin a awm lohna lam ka hawi hmaka, alo mut ve rualin min kuah nghal hlu hlu, min kuahna aṭanga talchhuah ka tum chuan

" Tal vak vak suh i pum ana leh ang " Ati dam thlupa akut pakhat min khamtirin lehlam chuan ka dul akuah bet run

" I phakar ve sia " Ka ti hlak, ka beng kawm a thawk khum lum ham ham a ka za chhuak vek thei

" A za alawm mawle, i mut ṭhat dawn loh chuan tho rawh" Ka ti a ka za ti chu ka nui pah awr awr

" Ka mut ṭhat hi " Ati a ka nghawng kher athawk khum ṭhin bawk si ka nghawk sawk

" Min dim ve deuhla " A tih chuan alam ka hawia, alam ka hawi nge hawilo min lo fawp nghal chawt, a awm ah nam mahila ka namsawn thei lo nasa ani nge ka tha ka thawh tawklo zawk, chu erawh sawk kher chi pawh anilo.

" Vawiin chu In pahnihin va kal mai ula, ka kal ve kher angailo ang tiraw? " Nu tetei'n thleng ka sil mek laiin ati a, Nimina ka pumna bak kha ana leh talo a, ka lawm khawp mai

" Keimah pawn ka kal thei alawm, hna pawh kal tawh ka duha Clinic ah chuan ka kawi zuai zawk ang " Ka ti zung zung

" Vawiin te chu i awm hahdam rih ang chu "

" Ka ṭha tawh alawm " Ka ti ve tlat, Fela pawh class chawlh tir reng chi anilo

" I ṭha takzet maw " Chik fe a min en chungin ati leh a

" Ṭha tak tak, vawiin chu keimahin ka kal ang " Ka ti ve tlat

" Chawl rih la ani mai sia " Hna kal tura ka insiam chu Lalruatfela'n ati a leh seka

" Ka kal dawn ani leh mai a " athlukdan ang chiahin ka ti let ve a, a lu min thin khum nar nar. Dr hruaizela clinic thleng chu min thlaha, hming ziaha nghah la ngai tur anih avangin reilote min ṭhutpui hnuah min kalsan, Dari ka msg a hna ka kal tlai deuh tur thu ka hrilh. Vawiin a min lo dawngsawngtu chu nimin ami kha ani tawhlo a mahse, biak anuam em em tho

" Doctor alo la thlenglo deuh a, khatah khan lo nghak rawh pa3 naah i awm a, nghah rei angailo ang " A ti a, doctor nghak chuan ka ṭhu ve ran, ka awm hnuah lo kal thar an awm ṭak ṭak a, Doctor hruaizela chu a luck khawp mai. biaktur awm heklo phone ka khawiha reels ka en vel mai mai ' Doctor alo thleng ' an tih takah chuan ka hawichhuak a, room ah alo lut fel diam tawh, min5 vel hnuah a in dawt danin an ko a, ka hming ka ziak hma ve bawka ka hun athleng ve thuai

" Lo ṭhu rawh, Fela'n alo hruai lo che mi? " Min hmuh rualin alo ti var a, ahmel en aiin a ṭawng duh daih

" Ummm, class chawlh reng atheih siloh a " Ṭhu pah chuan kati a, abu nghauh nghauh

" Pumpui ulcer i nei anih hi mahse, ala hlauhawm lutuklo damdawi i ei ṭha anga, thil thak leh hang lutuk eitam lo la" Atih chuan ka ner nang, ei in sum hi ka tih theih loh ber ani miaua

" Pumpui ulcer hi ngaihthah chi anilo ania, pumpui cancer tamtak hi pumpui ulcer aṭanga inṭan damdawi eiṭhat loh vang ani tlangpui, ei in te hi fimkhur angai teh mai ania. Tihdam theih ala nih laia tihdam tluk a awmlo, nakinah tihdam theih loh stage akai chinah chuan beidawn ngawih ngawih bak tihtheih kan nei tawhlo ang " A ti duah, ka ner nang kha alo hrethiam pawh ani maithei

" Kalo hria ang " Ka tih chuan anui suk a

" I hmel en aiin i hrisello daih lehnghal, hrisel hmel deuh si" A ti a ka nui chuai ka nui chuai ringawt

" Tikhan atawk ami? " Ka tih chuan

"I va hmanhmawh ve " Nui vur vurin ati a

" Hmanhmawh lutuk lo e " Ka ti sep a mahse, ka hmanhmawh ve tawh reng

" Tah hian damdawi ka ziaka, a eidan tur kha i hriatthiam loh leh Chhani kha i zawt dawn nia " A ti a lehkha min pe a Lawmthu te ka hrilh leh hnuah room aṭang chuan ka chhuak a, Damdawi ka lei zawhah Company ka pan nghal nal nal

" Boss in ahmu duh che " Office ka lut nge lut lo Bawihtei'n ati nghala, luh mai ka tum laiin

" Founder te lokal dawn vang emni inla hna ngaipawimawh deuha ilo kal vel " Ati leh hrama athilsawi hi ngawihbo pui ava har ṭhin tak

" Founder te anlo kal dawn tih ka hre hauhlo " Ka tih chuan ngeiawm deuhin anui ri hak

" Phakar lutuk mai " A ti kher a

" I phakar lo bik ami? I pawi ka sawi loh nen hian min chhal ve chhen lo mai rawh aw " Ka ti fak a Boss room ah ka luhsan nghal

" Eng nge i an? " Min hmuh rualin alo ti nghal

" Keimah kala ang reng " Uang deuha ka tih chuan dawhkan a ti ri kauh a

" Tak tak ka ṭha tawh lutuk, result lamkawi ka ngaih avangin kalo kal hma theilo a, Sorry boss " Ti duahin ka kun a

" Founder te anlo kala ka phatsak thei hram che anihkha, tunah Direcrtor room ah an awm a, i va hmu ve dawn nia" A tih chuan ka bo ang reng

" Hmuh kher angai ami? " Ka ti hu

" I hmuh veloh ten hmuh che an duh alawm, i product siamte khan an lung adum a, company tana thawhhlawk tak ini tih pawh an hria alawm " Boss chu ka en reng ringawt, chutiang em em chu amah aṭang hian ka beiseilo ani

" Kalpui i ngailo ang tiraw? " A tih leh takah chuan ka inthing harh a, angaih loh thu ka hrilh

" Founder te anlo kal tih ka hrelo a, Bawihtei sawn hre lawk ang maiin min puh a " Chhuah ka tum uk tawha Boss hian eng rilru chiah nge aput tih ka hre chak ve hrim hrim

" A rilru akalsual anih saw ngaih khatah ngai rawh " A ti leh then

" I ṭanlo ami? " Ka tih leh hram chuan anui a

" Ka engmah ani hleinem, huatpui vak chhan tur ka neilo " Ati leh mai bawk si an in ngaizawng emaw ka ti ania

" A hmel en aiin a rilru a chhia " Boss bawk chuan ati leh, chhang tawhlo in room aṭang chuan ka chhuak a, an inkar aṭha viau turah ka ngai ania amak ngawt mai mahse, an in ngaizawnglo chu aṭha kati Boss hi ning ṭhin mahila min duhsak ve tho a hmeichhe pangai ang takin awm thei se kati Bawihtei pawn min ngei viau mahse, khawlo taka akhawsak chu ka duhpui chuanglo a, chuvang ania an in ngaizawng lo chu aṭha katih ni. Driector room ah chuan ka kal a

" Puih theihna che ka nei em? " Director P.A in min hmuh rualin ati a

" Founder ten min hmuh duh thu an sawi a " Ka tih takah chuan

" Lokal rawh " Kawngka chu a hawng a, achhungah chuan anlo ṭhu khap mai, zamawm duh tak ani in hum ruh ngar ngar chungin P.A chu ka zui lut a

" I lo kal maw, hetah hian lo ṭhu rawh " Director in min lo be nghal siam siam a, ka hahdam huaiin ka hria tim deuhin chair ah chuan ka ṭhu a, Midang ho chuan an titi lai an la chhunzawm mawlh mawlh, an thusawi chu uluk deuhin ka ngaithla ve reng ringawt.

" Sir, Hei hi Miss Lalthansangi chu anih hi " Directorin atih chuan kan C.E.O Pu Vanlalhlana chuan ka lamah akut alo phar a, rang zetin kalo vuan ve nghal, midang pawh chuan min chibai diat diat a, tun hi kan company founder te leh pawimawh chin ho a hu ho a ka vawikhat hmuhna ani a, ka tha te hi a khur der derin ka hria

" I lakah beiseina ka nei sang ania, minti beidawng lovang che " Pu Hlana'n min chibai pah khan ati a, ka nuih vur vur ringawt ka at hmel ngawt ang.

" Naktukah minlo hmu dawn nia, sawi dun tur kan nei " Ka kal dawnah Director in ati a, Director office aṭangin hlim zetin Kan office chu ka pan

" I va lo let hma ve " Miriami'n min lo hnaih ruaka

" An hawng tawh alawm " Ka tih chuan hre chak zetin ka kalna chanchin min zawt sek, engmah tak tak thleng a awm miau loh avangin sawi tur pawh ka hrelo

" Engmah athlenglo, an titi ka ngaithla ve renga ka mawng te hi akham vek " Ka ti a

" A va ho leh si, an hrem che anih chu " Dari'n ati hlak

" Sangi, inluah tur kha i la duh em? " Ka seat a ka ṭhut hnuah U zira'n min lo din chilh a

" Duh e " Rang zetin ka chhang

" Thla thara insuan chhuak tur te kha nimin ah an insawnchhuan chuk chuk a, tunah hian in chu aruak ani tawh, i duh chuan tlaiah ka enpui che anga in neitute nen pawh in inbe ve hrim hrim anga "


" Ava tih chi dawn ve, min kalpui hman ang maw " Beisei nei deuha ka en chuan anui a

" Ka kalpui dawn che nia, i sawi danah min phut tih ka hria" atih chuan ka nui vur vur, nileng chuan ka awm anuam lo a, Fela'n min lo call erawh chuan dawt ka hrilh thung, tlaiah nidang aia ka tlai hlek tur thu ka hrilh a, zawhna min zawt chiamlo in ' Aw le ' ati ve thliam. Zawhna min zawh chiam kha ka hlaua, zawhna min zawh sek chuan dawt ka sawi leh theih ka rin loh vang ani, inluah tur ka tihfel vek hnuah ka sawipui ṭha leh mai ang.

" Inluah tur chu in en dawn ami? " U zira nen kan kal hrang chu Dari'n min au leh hram

" Aw kan en lawk ang, U zira hi chu ka type anilo ania " Ti a ka fiamlet chuan Darkimi a ṭeu hlar

" Lalthansang hmelchhenu " A ti chiam a, U zira nen kan nui dun hawk hawk, An in ngaizawng lo na a an in endan ah thil ka hrethiam ve vek

" Ala a bet bet mai sia " Kan kalsan fe hnuah U zira chuan ati a

" Dari chu afel alawm, a rilru atluang si " Ka ti ve ngei, kal chhungin an chanchin ngawt kan sawi zawma, kei ve tehlul hian eng eng emaw ka hrilh ve nual kha, in ngaihzawnna lamah hi chuan hre zul lo mahila ka hriat chin hi chu a rintlak tlangpuia midang hnema thurawn pek pawh ka tim vaklo. A ṭhianpa tein chu kan thleng a, an mahni in tak pawh alian in a changkang khawp mai

" Inluah tur kalo zawnsak kha ania Sangsangi anih hi, Sangsang hei hi ka ṭhiana Saia " Saia atih pa nen chuan kan in chibai a

" Ṭhianpa hian alo sawisak nasa che a, luah man pawh tih hniam sak deuh turin alo sawi diam lehnghal, nang chu midang kan luahtir aia hniam deuhin kan ti anga "Nui huah huah chungin ati a, U zira chungah lawmthu awm rawh se, an chhungkaw chanchin te min hrilh thuak thuak a, in chenchilh dawnlo mahila Pathianin rem atih chuan an inhnuai ka luah dawna an chanchin tlangpui hriat chu aṭha hrim hrim, a nupui ni ngei turin thingpui te minlo siamsak leh nghala, keini a karah ati zahthlak khawp mai.

" Kannu nen khan in chu zu en ula tiraw Duhi, Chumi hlanin Zira nen kanlo inkawm ang e " Thingpui kan inzawh chuan Saia'n ati a

" A pawi hleinem, Sangi kan kal dawn ami? " Nelawm deuhin a nupui chuan ati, hmeichhe lian lutuk chu a ni biklo, a ngo a ahmelfang adik fu rauh lehnghal

" Kan inluah hmasa tu te kha an ṭawp lutuk a, zanah an bengchheng thei si, U saia hi mi han hau bawrh bawrh chi anilo a, hauh ka tum lahin U saia'n min khap tlat zel sia, ṭhian lo hruai hawn an ching si, zanah naupang mulai an ti harh ziaha, U saia dawhthei tawhlo in ' indang luah tur zawng mai ru ' Ati a, inluah tur in hmuh hma chu inla awm thei ang ati chung pawn an thinrim a an insuan chhuak chuk chuk anihkha " Hmeichhia zawk chuan thil a sawi kim zawk nge nge e, Mipa hi chu an in tipa ve a thil han sawi duah hi an ti ngailo ṭawng thei deuh erawh hi chu an awm

" A van nuam em em ve, hetianga inṭha luah tur ka hmuh pawh ka ringlo a " Ka ti chiam, a nuam ve em bawk ani zau lutuk erawh ani chuanglo a mahse, mi pakhat tan chuan alian mah mah tho

" Anuam ve lutuk, kan pa nau mipa tana kan sak ani mah zawka mahse, anni lah Lunglei lamah an awm tlat bawk sia luah theihin kan siam ta ngawt anih hi " A ti ve siam siam, choka leh inpui a hranin a awm a, room zau vak lo pahnih a awm bawk, min enkual pui thuak thual hnuah an in lamah kan inzui chho leh a, a ṭawng siam siam reng lehnghal chutih laiin a pawi ka sawi palh ang tih ka hlau, hmeichhe ṭawng siam siam ṭawngkam thiam leh fel deuh ho hi chu inhauh pui an hlauhawm bik tlat.


" Rin aiin aluah theih hma leh bawk sia, engmah kala inlei bawk silo, kalo luah lut nghal tut tut thei dawnlo a, luah man hi ka pe lawk mai dawn mi? " A luah man vel kan sawifel tawh a, ka rin ai tak chuan min hrethiam U zira hian an bulah engtin nge min sawi erawh ka hrelo a, Call girl anga min sawi loh phawt chuan aṭha vek turah ngai ang


" I lo buai em Nu tete " In ka thleng a, Nu tetei'n inkawta thing hnah tla ho alo phiat fai surh surh

" Buai teh nang, nichinah Fela alo hawng tawha iva tlai bik ve " A ti a, thudik ka hrilh ang nge dawt var ka sawi ang tih ka ngaihtuah rauh rauh atawpah chuan

" Inluah tur ka hmu a, ka ṭhianpa in min en pui a duh aiin kan tlai " Ka ti ta nge nge, a thil phiah lai chawl meuhin min en a, a nuih loh hi chuan angainat awm lo ve ania

" Tinge kan in chu anuam vaklo ami? " a ti khauh, a nui bawk silo a thinrim anih ka ringa hreawm ka ti leh deuh

" Chu..chutiang lam anilo, Fela nen chendun reng chu atih chi loh in ka hria a, chuvang zawk chuan alawm " Ka ti a, ka sawi zawh rualin ka chil ka lem khalh

" In chesual tawh tihna ami? " A zawhna avang chuan ka meng kawk

" Ka..ihh " Ka lei hi ka hawl dik theilo ani e

" Zawhna chhan chi loh tak ka zawt che ani maw, Engpawh nise ka hrethiama, i duh phawt chuan indang chu i luah thei ang. I ngaihdan kha adik lutuk, hmeichhia leh mipa chendun reng hi thil tih chi tak anilo a, i inluah tur chu thlatin a chanve ka chawipui ang che " A tih chuan

" A ngailo, luah man ato hran hleinem ka hlawh pawn a pha ve lutuk " Ka ti zung zung

" Min mamawh leh i sawi dawn nia, Bawiha pawh ṭha deuhin sawipui la "

" Aw le, zaninah sawipui ka tum hrim hrima ka chhungte pawh engmah kala hrilh chianglo " Ka ti niah niah, inchhungah chuan kan inzui lut a, kawngka ka hawng nge hawnglo Fela thilsiam rimtui lutuk anam nghal ram ram Nu tetei nen chuan ka hnar kan len nghal dun dun

" Inti fai rawh chaw te hi ei hma teh ang u " Room ah ka lut a, ka damdawi lei ho chu ka dahchhuak, ahmel ka hmuh ringawt pawh hian ka hne tawp ani mai, Ning zeta Damdawi ka en ngawt ngawt laiin Ka room kawngka alo inhawnga

" I result chu aṭha em? " A ti dut dut, eng nge ka hriat ni fiam ka chak leh tlat, ahma zawng aia inla cool zual in

" Engtin nge ka tih tak ang Doctor khan natna khirh tak ka neih thu min hrilh a, enkawl dam theih ani tawhlo " Ṭah aw deuhin kati a, ka mittui tla hleilo chu ka hru der vel

" Tak tak ami " Ti hluaiin ka bulah alo ṭhu ve, damdawi ho chu a enkual a, doctor lehkha pawh chu ala kanga abih ngur ngur

" A kutziak chhiat dan chu " Doctor hruaizela kutziak hi amaksak ve em ani, doctor nih avanga kutziak han tihchhiat kher

" Ka ti mai mai anihkha, Pumpui ulcer ka nei atia damdawi eiṭhat chuan ala dam var thei mahse, damdawi ei kha ka ning zawka " Ka ti zung zung a, Lalruatfela'n min en run run

" Damlohna thilah dawt min hrilh hmasa tawh suh " Ati hluk a mangang leh hman hle anih hmel, min kuahin hahdam deuhin thawk ala suai suai a

" Ka fiam chak thut che alawm, damdawi ka ei ṭha anga ka dam leh vat mai ang " A hnunga ben sak thak thak chungin kati a

" Kei aia i thih hmasak phal anilo " Atih chuan za deuhin ka nui

" Iti anglo e a, thih leh dam chu kei a duhthlan theih ani hleinem " A hma aia Nghetin min kuah a, 'min thlah rawh' ka til chul mai alawm, tlem a tlema ah ka thaw theilo ṭep ani, Lalruatfela han at bet but dan hi chu, Inluah tur ka hmu tih hrilh ila kan inhauh phah leh ang em? Diktak chuan hrilh hriat hi ka huphurh ani.

" Inluah tur kha ka hmu tawh a, vawiin ah kan en chhin a" Zanah Nu tetei room ah a awm laiin Fela chu ka hrilh a

" I va hmu hma ve " Ka rin loh dan deuhin min chhang

" I thinrim lo ami? " Khap fak fak in ka ti a

" Kanu'n min hrilh daih tawh alawm, atir khan kalo ngaihtuah chianglo ani " A ti dam thlap

" Ka van lawm tak i thinrim chuan ka tan anuamlo a "

" Engtikah nge luah luh itum " A tih chuan

" Karthar velah luah thei ila kati, tunah pawh aruak tawha mahse, mamawh tur ho pawh kala in lei fel silo a, mamawh ka lam khawm zung zung anga ahma thei ang berin luah lut ila kati deuh " Phur deuhin ka ti siam siam, kan thil duh leh kan ruahman angte min phur puitu an aewm hian nuam kanti ṭhin a, kan tana mi pawimawh ber ten min phur pui hian mi nawlpui min phurpui aiin nuam kan ti zual zawk

" In neitute chu an fel em? "

" Fel chuan ka hria mahse, Pu Saia nupui kha chu inhauh pui a hlauhawm, a fel lutuk a " Ka ti a ka thilsawi dan ki a hrethiam nge abu nghat

" Fimkhur angai anih chu " A ti leh thliam a, kan ngaihdan hi a in ang ṭhin si kan inhmeh ngawih ngawih

A tukah chuan company ka thlen veleh Director hmu turin ka kal leh nghala

" In boss nen in inkar ava ṭha tawh awm ve " Min hmuh ruakin Director chuan ati nghala

" Ka hrelo tinge " Ka ti ha

" Ka ti deuh mai mai mawle, lo ṭhu la thil kan sawi dun lawk dawn nia " A tih chuan rang deuhin ka ṭhu ve nghala

" Min ban thu chu ani em lo tiraw? " Ka tih chuan Director chu anui a

" Thu lawmawm zawk mawle " A tih chuan a sawi hma hauhin ka rilru a dam nghal sawng sawng thei, Director thil sawi hun chu ka nghaka, amah lah chu a ngawi vung vung lehnghal

" I team te hi i ngaina em? " A ti teh daih lehnghal

" Ka ngaina alawm " Ka ti a

" Promotion i hmu e, tunah chuan i ngainat em em i team te i enkawl chhunzawm thei tawh ang " Director in atih chuan ka tho kang zawk mai, ka awmdan chu hrechhuakin ka ṭhu ṭha leh nghal vata

" Tak tak emni Director "

" Ni e, hei hi i lehkhamawi anih hi, thlathar aṭangin i dinhmum hi i luah thei tawh ang " A ti a, hlim lutuk hian mittui alo hnai kuar thei anih hi

" Anih leh boss hi "

" Ani pawh Asst Director ani ve tawh ang, In boss pawn i vanneihna zar ala zo tel hram anih hi" Ati nghata ahmel ah erawh alawmpui tho tih ka hria, ka ṭawng veleh hma hauhin

" In boss hi misual anilo ahma pawn ka sawi tawh kha, amizia erawh ngaihtheih chi vak anilo ṭhin, Mihring hian duhsak bik kan nei a tilang ṭhin lo mahila kan duhsak bik hi chu kan en bik riau ṭhin. In boss pawh hian a duhsak che chu chu hria la " A ti ta a, hetiang vanneihna dawng tur hian engthil ṭha mah ka tih loh nen

" Ka lawm e Director, nakinah rem itih chuan thil kan eidun thei ang em? " Ka tih chuan ari meuhin anui a

" Tehreng mai chutiang te chu keihian ka hnial phal nang, ahun chu nakinah kan sawi ṭha dawn nia aw, in boss pawh tel ve se aṭha viau ang chu " Dam thlapa atihna phena min thurawnna chu ka hrethiam lutuk, boss pawh ka sawm ve ngei angai dawn anih hmel.


Hna kan bang hma deuh bawka, ka mamawh tur tlem te lei pawh aṭha kati a, hna kan ban veleh bazar ah ka tlang a Msg in Fela pawh ka tihtur ka hrilh, Lalai te lah ka indan tur vel kala hrilh lo a, zanah ka hrilh law law mai ang ka hrilh har chuan anlo vui veleh dawn bawk sia, kanu te erawh nizanah ka hrilh diam tawha, Nu tetei lo zin pawh lenna tur ahre khawp a, in ah pawh a awm hman tak taklo atei chhuak ve sek mai ani. Han bazar takah chuan lei tur mai pawh ka hre leh silo, In ka luah hrang ngailo a hetiang lamah hian ka bo khawp mai. Nitin mai hian mihringte hian bung thar kan kai ngawt lo a, achang chuan thla1 chuang hi kan nunah thil pangai vek athleng ṭhin mahse, hetiang anih lai hian kan nikhat hmanral hlutzia hi kan hriat aṭha kati, keini in awlsam taka nikhat kan hmangral emaw kan tih lai hian mi ṭhenkhat chu damdawiin hmunah oxygen nen nikhat hun hmangral turin an bei a, hengte ka ngaihtuah thlen chang chuan, ka chhungkua keimah leh ka nitin hun neitu Pathian hnenah hian lawmthu ka sawi ṭhin, thlarau mi tak ka nilo a ṭawngṭai taima tak ka nilo bawk mahse, mal min sawmtu laka lawmthu sawi erawh ka theihnghilh ngai biklo. Lei tur ka hrelo ti mahila in ka hawn chuan ka in keng bawr em em tho, Nu tetei leng pawh alo la hawnglo a Fela pawh alo la banglo aniang in chu a reh ṭhiap mai. Ka thil lei ho chu a hnawk theilo tur ang berin ka dahfel a, ka sum hmanna ho ka ziak diat diat bawk, heipawh keima thulunga ti pawh ka nilo kanu'n nizanah ' I sum hmanna te kha ziak fel thlap thlap rawh, engkim felfai deuha tih aṭha ' alo ti a, chuvang ania chimlim ber ang maia ka ziah ve diat diat ni.


" Eng nge ilo hawn em em a " Fela lo hawng chu alo bawr lutuk a

" I mamawh tur " A ti sam et, chhuatah a thil lo khai luh ho chu a dah a

" Eng em em nge ilo lei a "

" En la " A ti leh maia, chhuata athil dah ho chu ṭhutchilhin ka en a

" Tinge hetiang hlir ilo lei " Inchhung cheina hlir alo lei a, amaksak hlawm bawk si

" Khatiang bak lei tur ka hrelo " A ti hlauh lehnghal, CCtv te alo lei vel hepa em em hi chu aw

" Min ringhlel nghal tihna ami? " Ka tih fiam chuan

" Fimkhur tluk a awm hleinem " a ti a, a thil lei ho chu lungsi zetin a en leh ṭhin, ṭangkaipui vak dawnlo mahila min ngaihsakna alawmawm em em tho

" Naktuk te chu weekend alawm, kan pahnihin kan bazar dawn nia, Bawiha thil lo lei lah chu ava ṭangkai dawn ve tih chi lah ani der silo " Nu tetei'n ati a, Alo hawn veleh Inti thei zetin Fela'n alo hmuha Nu tetei beidawng hmel lutuk khan ka nuih ala ti za

" Keipawh ka hman kalo kal ve ang "

" Ho deuh deuh bak lei tur i hre lehlo ang, kal velo mai rawh " a nu in atih chuan Fela chu alungawilo khawp mai

" Ka thil lei ho saw a nihna tur diktaka an awm hunah chuan mawi inti viau ang " Ati a Nu tetei nen chuan kan in ena kan innuih tawp. Ka mut hmain Lalai te ka call a in luah ka tum thu te chu ka hrilh ve

" Fela chu a thinrim tawhlo maw " Alo ti a

" Thinrim tawhlo, vawiin ah i amamwh tur atia thil alo lei nual a, a thil lo lei ho chu aṭangkaina pawh ka hre chuanglo" Ka ti a, Lalai alo nui hawk hawk

" Nakinah i luah dawn hunah kan lo kal ve ang " A lo ti a, dah mai ka tum laiin

" Puia'n bialnu anei tih kha i hria em? "

" Lawmi nen maw " Ka ti a, Lawmi chu a hlawhtling ta ah ka ngaia ka lawmpui

" Nilo, chu chu alawm kan buai, Lawmi rilru na hi akhawngaih thlak " Lalai'n alo tih chuan amak ka ti khawp mai, an in zui ngawrh ve viau khan ka hre si a.

Cont..