Chapter - 13
Ziaktu : ilefi imoz
(Recap : Lalrinawma ka ngei thar leh sawt bawk, a kut hlei leh uangthuang lutukin min lo siam sak ve ringawt kha ania, hming thlâk dân ka hriat ve miau loh avangin ka nu fanu duat tak ang maiin facebook khawlaiah laitual ka lêng ta vel mai mai rih anih hi!)
Lalrinawma chhuahchhalh dan tur ngaihtuaha ka thinrim tet tet lai chuan ka nu phone notification chu a rawn ri ral a, whatsapp lamah message lut thar a awm anih hmel.
Rang deuhin whatsapp ah chuan ka lut nghal a, hriat ngai loh number aţangin "Au Sawmzel" tih message a lo awm mial mai!
A dp ka en nâk chuan u Arona a lo nia! Jersey ban nei lo, a dum haa chhe lo deuha a ding lai hi a hmang nghe nghe a, mite angin photo editor a hmang ve lêm lo, chuti chung chuan ka mitah erawh a Pa hliah hliah tho a, chhe lo ngawih ngawih tak a ni.
"What?" Tih zawng hi ka thawn lêt a, chhân lêt dan tur ka hriat loh êm vang a ni. A seen har lova, a number zâwnah chuan 'typing' tih a inziak nghal kalh mai.
"I nui leh ver ver tawh em?" Tih a rawn thawn lêt avang chuan a ngaihna hre lo deuhin ka hawi â heu ringawt a, ka nui lo chiang khawp mai.
"Nui teh nâng, Lalrinawma ka ngei lutuka nuih pawh ka nui thei lo" tia ka reply leh na pawh chu a seen rang leh viau a, rei deuh a rawn type. A rawn thlen har êm avang chuan let tawn sekin ka che leh ţhin a, hetiang em ema hun nuam hi ka nunah ka la tawng ngai lo, ka tawn leh pawh ka in ring tawh lo hial a ni.
Tu emaw message lo thlen hun chânga khurh dar dar te, a number hnuaia 'typing' tih inziak ka nghahhlelh em em vawikhatna liau liau a ni ve a, nuam ve duh deuh asin.
"Khawvela make-up man tlâwm ber chu nuihmel ania, a to ber bawk. Nang phei chuan make-up hran i mamawh lo, i nuih ver ver hian make-up hlâwm i ni tawp mai a, i thawh hlimin nuih theihnghilh suh. School kal tura i insiam lâi pawhin nui sâng reng la, hna hahthlak i thawh dawnin khawvel runluih nan nui ţhin rawh, i mut dawnin nui fo la, ka bula i awm phei chuan nui reng rawh" tih hi a rawn thawn teh duah a, a message ka chhiar zo chu awmhmunah ka khi hûih reng mai!
Nuimawi minti tihna nge? Nuih tam a support ve hrim hrim pawh ka hre chuang lo. Eng zawk zawk emaw pawh chu lo ni se ka lawm tho tho, duhsak takin a mize lawm zâwng min hrilh a, ka tan a duh dan anga awm a awlsam phah sawt dawn tihna ania.
"Aw le, muttui aw" tia ka chhan lêt ve chuan, "tui deuhin mu rawh" a rawn ti a, nuam ka van ti tak ka mutui viau ang.
Inrinni tukah chuan Châmi'n min rawn call in, an Lova feh ve turin min rawn sâwm teh mial a, "kan tam dawn avangin motor hman kan tum a, dar kua velah chhuah hman kan tum ang, i peih chuan lo telve rawh Nutein atia, buh kan seng dawna a nuam ngawt ang, Fabiana te ţhian thum pawh an lo telve dawn a, nuam i ti ngawt ang" a rawn tih avangin ka nu hnenah feh ve chu ka dil chung chung a.
"A ţul lo lutuk, an sawhthing te i pal chhe zo ang, vawikhatmah feh ngai lo i nia kawmthlang huana i luh rikngawt pawhin eng eng emaw i thâi chhe rem rum zel, feh lovang" ti mah se ka dîl ngawrh bawka feh tur chuan min insiampui leh ta tho a, fimkhur tur erawh chuan min chah uluk khawp mai.
Sawi tawh angin thingtlâng Lo nei ngai miah lo kan ni a, he khuaa kan awm chhohna pawh kum 5 dawn ni tawh mah se vawikhatmah ka la feh lo hrim hrim. Mi hian Lo an nei ţhin tih chu ka hre ve tho a, eng ang hmelhmang nge anih tih pawh you tube velah chuan ka hmu ve ţhin tho, mahse a tak takin vawikhatmah ka la feh lo va, chuvanga châk ve em em chu ka ni.
U Aron-a te Lo a lo ni kher bawk nen ka phûr vut vut hle a, dar riat a rik chuan ka inpeih fel dêr tawh!
Ka nu chuan awmdan mawi leh ţha, mî thil chîn te zah sak a ţulzia thupui fûn deuhin min hrilh mawlh mawlh reng a, bu ve nghat nghat mah ila ka vawng zui lêm lo khawp mai, a thil min hrilh ho chu a awmzia pakhatmah ka hriat miau loh vang a ni.
Dar riat leh a chanve rik hma deuhin Châmi te in ka thleng thla dêr tawh a, an lo buai luai luai khawp mai. An insiam chu an ri chêl chûl hlawm a, u Aron-a pawhin Sipai form, hlui hmel angreng tawh deuh hain lukhum parh dum a khum a, hunter boot a bun chhah ţuk bawk.
Ka zuk thleng thla hlawl chu mi an lo lâwm der thiam khawp a, "Vawiin chu Sawmzeli hovin buh kan vaw zo vek dawn anih hi" pa ber pawhin a lo ti ve hlut mai.
Ka ţangkai dawn lo hlê tih hre tho mah ila an ţawngkam ţha ringawt pawh chuan min nuihtir vur vur mai alawm. An chhungkuaa ka lawiluh ve tak tak hunah phei chuan nuam ka ti thei ngawt ang ka ring. Mi pali lek an chêng chung pawhin an ri huau huau reng a, an inngeih tlângin an taima tih a hriat ngawih ngawih.
"I lo telve dawn a ni maw Au Sawmzel?" Ka ţhutna ţhutthlenga rawn ţhu thla ve datin u Aron-a chuan min rawn kheuh zeuh a, "Châmi'n min lo sâwm a" pangngai deuhin ka lo ti ve a, "hmân zan khan sâwm che ka tum a, muttui i rawn ti daih sia ka sâwm hman lo che a" nui ruh ruh chung chuan a ti deuh vel ngei a, nuam ka ti leh hlê tawh, ka inthlahrung angreng viau bawk.
"I duh chuan bike-ah i lo chuang daih dawn nia, motor-a insawh thlâk chu a nuam zawk zawk lovang" tih zawm leha a thawh thurh avang chuan ding ve vatin, "a ngai kher lo" ka ti ve tak na a, "min lo zui rawh" tiin pawnah min chhuahpui ta tho mai.
"Awi Sawmzel a nuam dawn hawr hawr vêl e, ka star deuh pawh alo tel ve dawn a, incheiparh ka ngâi" ti chûla min lo panin Châmi chuan a bag-a make up a ah ţât ţat chu min hmuh thuak thuak a, "fehnaah tuin nge make-up te keng ngâi? awi i hmel te kha, feh tur pawh i ang lo, zin tur i ang" lo ti ve bawk mah ila awlsam zet hian, "Ka zin tlang nghâl maitheia a hriat loh, ka duhpa hi khaw ţhenawm lawk ami saw ania, u Aron-a te nen an inhre ţha lutuka a lo telve dawn, min rûk haw te tum thut ta se make-up tel lova kal ringawt te chu a dik thei lo, mo thar tûkah miin min hai ve luai luai dawn asin, englai pawhin make-up hi chu pâi reng a him" a ti liam puat puat a, make-up a sawi tâkah chuan hman zana u Aron-a message kha ka hrechhuak uar uar mai, 'make-up man tlâwm ber chu nuihmel ania, a to ber bawk' a tih tak kha mawle.
"I inhnawih ve duh em? Lo kal rawh ka chei ve lawk ang che" tih paha min kaihsawn mai a tum chu ka lo ţang deuh a, "Make-up man tlâwm deuh ka inhnawih alawm" tia ka lo chhân lai chuan tu emaw hian ka dârah min rawn kuah thakin min pên sawn pui ta daih a, a rim aţang ngawt pawhin u Aron-a a ni tih ka hre thei.
"Make-up man tlâwm ber chi chu i rawn inhnawih maw?" Nui lek leka atih chuan khi ver verin lu ka lo bû nghat a, "Good, make-up ka hriat tawhah chuan ila inhmeh ber. Lo zuk kal hmasa ila, motor-a rawn kal hote in turin thingpui kan lo lum fel diam dawn nia" tiin Bike-ah min hlâng nawlh a, a lian ţha ve pangngai bawka tha pawh a ngah hmel khawp mai, a thlamuanthlak ngawt ang!
An kawmthlanga ramngaw aţang chuan min tlân puiin feh kal tur, kea kal kan tawh apiangte hnenah chuan Motor lo nghâk turin a chah thla zel a, a chhan ka zawh chuan, "Ke a kal nan chuan Lo hi a hla tham ve a, motor hmang fuh an awm châng chuan beh tel ve hrâm kan duh ţhin, mihring te chu kan rit tham lo bawka tumah kan inhuphurh lêm lo va, tunah keini chhungin kan hmang fuh ve dawn a ni a, midangin kan zâr an lo zo ve dawn tihna a ni mai" tiin min chhâng a, thingtlâng nun mawlmang ru zet kâra induhsakna leh Mizo tlawmngaihna nun chu ka hrethiam ţan ta riai riai mai.
Rei tâwk fang kan tlân hnuin bike chu kawng chhak lamah a hûng a, kawng thlanga tlângsam buk deuh chu thliakin a bike khuh nan chuan a hmang zui zat bawk. A chêt dan ka lo thlîr reng lai chuan ka lam rawn hawiin, "helai chin chauh hi motor-in a thleng thei a, a mawng lamah kan awm ka tih tawh kha, kea kan kal mai a ngai tawh dawn a, i hreh em?" Hawihhawm takin min zawt a, ka hreh loh thu uar deuha ka lo sawi chuan bu nghat nghatin hma a hruai a, a hnungah ka zui thla ve dat dat bawk.
Ke pawh chuan rei tawk fang kan chhukthla leh tho a, ka rin âi fêin thingtlâng Lo chu a lo hlâ. Haw hunah kea chho leh tur kan ni tih ka hre kar bawk nen ka hreh ru angreng ta viau mai.
A tawp a tawpah an Lo chu kan thleng thla ve hrâm a, a thengthaw nuamin a zau ţha asin aw!
"Hnim avan tam em em, engtikah nge in thlawh dawn?" Hawikual thuak thuak chunga ka tih chuan, "hnim a ni hleinem, sawhthing leh Buh anih hi" a lo ti a, "e.." Ka ti chuai raih ringawt, ka hre miau lo a ni, ka vawikhat fehna ka tih tawh kha.
"Saw saw kan thlâm ania" tia Di hmanga sak, in tetaktê a kawh zauh tâkah chuan phûr fê hian, "a van cute em em" ka ti lâng lâng a, chak deuhin Thlâm lamah chuan ka tlân phei nghal dâwr dâwr bawk. Hnunglam aţang chuan, "i tlu ange" a rawn ti leh ţhin a, ka bengkhawn duh lo, a boruak a nuamin, thlifîm thaw her herin min han chhêm dai seng seng te chu nuam ka ti lutuk tlat!
Thlâm luhka ka rap chiah tih chuan ka hnungah a dawn ding chawpchilh ve a, an kawngkhar siam dan chu ka hrethiam chiah lo. Dâp hmanga siam niin a chungah a kham phei zâwngin Mâu an dah a, calendar ang mai hian.
"Nawr tawlh rawh" tia min hrilh pawh chuan han tih vak ngaihna ka hre dêr lo va, amah zawk chuan rawn hawngin, a chhung ka han hmu chiah chu changkâng ka ti leh hlê tawh..
Thlâm chhungah chuan inzuilutin a chhûng chu ka melh kual dan dan a, a thim deuh khup avangin ka hmu chiang thei lo, u Aron-a chuan thlanglama an thil suih chu a phelh mawlh mawlh a, chutah dâp bang chu a thlep thla hnawk a, kei ka lo ţê ţhat thung.
"A chim emni?" Ka tih chuan lu lo thingin, "Namthlâk anih hi tihian, changkang i ti viau lo maw?" Tia nui hak hakin dâp chhuatah chuan a zuk ţhu a, thlâm chhûng pawh a êng ta uar mai.
"Avan mak em em, dâp hi bangah hian in suihbet a, in phelh chiah hian varenda chhuatah a lo chang ta tihna a ni maw?" Zawhna ngah tak chunga a bula ţhut ve pah chuan ka ti zel a, 'aw' tih nan lu a lo bu nghat nghat mai. Mizopa them thiamzia ka hriat belh ve leh ta chiah e.
Thingpui so rual velin Lâwm rualte chu an rawn thleng thla nak nak a, mi 20 aia tam mah kan ni bawka thâwm a ţha ham ham khawp mai.
Tlangval pakhatin ring zeta, "A va nuam dawn ve u Kâwlte, Lo in nei nuam hle mai" a tih chuan Châmi chuan, "khatin min ko ve ziah su, U kâwltei pawh ka ni lo, kan Lo i fak duh anih chuan min sawichhe tel kher lo khân fak ve mai rawh" a lo ti hlak hlak a, thingpui a thli zui mawlh mawlh bawk..
Ka sem kualpui a, thlâm chhung chu a len lutuk loh avangin a ţhente chu pâwnah kan ţhu far hlawm a, u Aron-a erawh ramngaw lamah a kal phei chhut chhutin ka hria. (Ramngaw ka tih hi, Vau tihna aw, kan Sawmzeli tan chuan Vau e Vau lo e, ramngaw a ni vek miau sia - imozi)
"Awi i lo hmu em? Kha pa kha alawm ka star chu, i hmu tiraw? U Tom-a anih kha a chhe lo asin, min duh ve se chuan aw.. Eng khaw sawi set set lovin ka zui haw nghâl rap rap duh ang mawle, mahse 'U Kâwlte' min ti kher zela a nuam duh miah lo, ţhianten min han auh nawmnah hi chuan palzam dan dan a awm mai a, star te berin uluk lo deuha min koh fawl fawl hi chuan hnâr hmuh len a awl over" ti chung chungin Châmi chu ka sirah a rawn ţhu thla ve a, a zah thu a sawi mawlh mawlh emaw ka tia zak hmel a pu leh chuang miah lo mawle, a mak thei ania henu hi chu.
"A hmel ka lo en chiang miah lo va avan chhe lo âwm em em" ka lo tih ve chuan, "chhe lo lo e, kei chu hmelţha deuh leh chhe lo deuh hi ka star duh lo, miin min lo duhpui ve zela kan chang lo leh nge nge zel. Chu vangin tumahin an duh vak loh tur ang chi hi ka star hmak a, ngaihngam taka awm hi a nuam ber zawk alawm" a lo ti zat zat a.
"Kan kal dawn khan a chhe lo lutuk i ti vel emaw ka tia" ti leh hrâmin ka melh ralh a.
"Awi.. I timak ve ê, mi reng reng hi kan duh bur tawh chuan hmelchhe viau mah se kan hmu ţha vek zel tih hre ta che! Dum paw ve phak te pawh a tirah hmu hmelchhe viau mah ila, hmangaihna mit aţanga kan thlîr tawh hnu hi chuan tumahin an tluk thei tawh ngai lo, chutiang zawnga chhe lo chuan alawm ka sawi" a ti ta daih a, a saw awmzia pawh ka hrethiam lo ve a.
Nu Dingmawi chuan hna tur a sem diat diat a, keini ţhianho chu buhphal pu tura min tih avangin kan kal hrang a, buhphal chu enge anih pawh ka lo hre ve lehpek lo.
Fabiana'n min hrilhfiahin kan thawh dan tur te chu a sawi zung zung a, buh zaituin an zai thluk sa kha midangin an lo têl zel ang a, an têl sa chu keini'n kan theih ang tawka tam kan lo pu ang a, hruih zâwlah kan va chhêk ţhin ang a, hruih lama awm hoten an lo vaw zel dawn a ni âwm e! Kan indaih hlawm bawka nikhat thilthua zawh vek an tum ruh khawp mai.
Kan hna chu kan ţan sang sang a, ka ţhianten buhphal an put tâk sap sapah chuan an tihdan entawnin ka put tur chu ka la kâng ve ngei a, ka dâra ka nghah hma chuan an pît thla leh ţhin!
"Khatin a ni lo, heti hian i tia nga hnunglamah i vawrh dawn nia" dam dapa rawn titu chu u Aron-a a ni! Engtiklaiin nge a rawn thlen phei hman ka hre miah lo, ka hmuh hnuhnun ber kha chuan hruih zâwlah a awm sia!
"Ka hre lo alawm, min hrilha ka lawm e" tiin a sawi ang chuan ka han ti chhin a, a lo awlsam phian sia, ka hnungah rawn pu vein hruiha ka dah thlak rual chuan a thil put chu a dah ve a, "ka vuak pui dawna ka vuakna lamah zel i lo dah dawn nia" tiin min nuih var var a, kan induhsak dan te chu le! A ril dan a hahthlak duh hmel.
"Ka va zung lawk dawn" tih paha Châmi'n thlâm lam a pan phei hnak hnak chu Tom-a a tih pa khân nui huk huk chungin a zui phei ve a, an rawn lêt leh chuan an rawn ri phei nasa bian bian khawp mai.
"Delete rawh i ţhing lutuk, mî zung ţha hle hle lai thlâ lo inlâksak te chu" Châmi'n atih laiin U Toma thung chuan, "i engmah a lang lo, puanin i inhliah tlat tho kha" a lo ti ve tlat a, Châmi chu a tûm bâr bâr mai.
Chawhma chhung zet chawlh nei mang lova kan thiar tâk tlut tlutah chuan a zahve kan zo dêr a, chhun chaw eia kan ţhut muan leh hnuah kan bung ţan leh a, thim dawnah kan zo ve ta hrâm!
Ţin eng emaw zat an thar a, an sawi fak loh avangin a zât tak ka hre mai lo, 'kan tam tho bawka' tiin kawngpuiah kan thiar chho hlawm a, ţîn khat ve vein Châmi nen chuan kan phur chho ve ngei bawk.
Sawi tawh angin kawng a chho ulh angreng a, kei, ke a hmun hlâ kal ngai eih lo tan chuan chauh thlâk duh tak a ni. A hnung berah u Aron-a nen inchhawm chhovin kalkawngah chuan vawi 6 vel ka chawlhpui tawh! Buara ip khat tlatin a pu chho a, kei angin a thaw ve hlâwi hlâwi lo reng reng!
"I hah tawh anih kha, i phur kha hetah dah la, ka lêt leh anga ka zuk la leh dawn nia" ti ve bawk mah se ka duh bik lova, vawi sawm kan chawlh chuan kan thleng ve êm ang!
Thaw hlâwi hlâwi chunga kawngpui kan thlen chhoh chuan khua a thim chhulh tawh a, ke a haw tur kan ni lo bawka tumah kan phun buai lêm lo. Ţhenkhatin kan chhawp chhuah bâng an lo zuk la leh mêk bawk.
Motor-a buh an load mawlh mawlh laiin u Aron-a nu chuan thlâmah a phone a theihnghilh thu a rawn sawichhuak ta lauh a, haw kan hman vek tawh bawk nen kan 'ê' dual hlawm nghe nghe.
"Bike-in in rawn haw dawn tho bawka Ron-a, zuk la leh lawk mai ta che nang" tia u Aron-a, a pain a tirh tâkah chuan ka lo meng deuh hrek hrek a, keimah chauha kawngpui thim thama min hnutchhiah an tum bîk êm lovang chu maw?
"Kan kalsan mai ang che u, Lâwm te an hmaizahawm si a, Sawmzel, i nu ka phone anga in ngaihtuahawm loh thu ka lo han hrilh dawn nia" nu Dingmawiin a rawn tih lehzel tâkah chuan fel hmel deuhin ka lo bu nghat nghat a, chhungril takah erawh ka ţap titih lo chauh a ni. Keimah chauhin kawngpuiah ka awm duh lo.
Motor chu a tlân chhuak ruai ruai a, kawng kâwia an liam thleng chuan mittui parawl kuangin ka thlîr reng a, an thâwm a reh rual chuan ka insût deuh hrâih bawk.
"Nangmahin awm tir che ka tum lo, ka hruai thla ve ang che, i hah lutuk tih ka hre tho nâ-in, helaia nangmah chauha i lo awm chuan a ngaihţhat thlak dawn loh em mai, ka rualin rawn chhuk la, ka paw chho dawn che nia" u Aron-a chuan ka bianga piai zauh chung chuan a ti a, a thim deuh tawh avangin a hmel ka hmu chiang thei tawh lo.
"Puak chhoh kher ka ngai lo, chhuk ang" ti ve bawk mah ila ka hreh tawhzia ka hrechiang! Ruaka chho tur pawh ni ila a chhoh ulh zia ka hre tawh a, ka huphurh ngawih ngawih tawh, ka taksaah hian na lo lâi a awm zeuh zeuh a ni ber a, ka no thar ta lutuk te chu u Aron-a ka star hnua thil thleng vek a ni a, ka duh lo hlê a ni.
"Sorry lutuk, kan chhoh dawn khân thlâm ka en kual theihnghilh daih alawm mawle, ni dangah thil theihnghilh kan nei ngai miah lo" tih paha a phone rawn phawrh chhuakin flashlight a on êng pap a, a kut chu ka lamah rawn pharchhuakin, "thla a êng ţep tawh a, a hmun kan thlen hmain kawng a hmuh chian theih tawh ang, en la saw, sawlai râl lehlamah sawn, thingbuk kârah sâwn thlâ a awm tawh a, a rawn thleng har dawn lo" a ti sup a, min ţawng thlamuan a tum em mawni?
Thlan tur dang nei hek lo le, a kut chu ka lo ban dê de a, an Lo lamah bawk chuan kan inzuithla leh hnak hnak mai. Chhuk lam chu a tawlh thlâk puat puat theiha a zia deuh tal a, chhoh lam ka huphurhzia chu pui tak a ni!
Thlâm kan thlen thlâk chuan a sawi ang ngeiin thlâ a rawn êng kulh tawh a, phone light tel lo pawhin chiang deuhin kawng chu a hmuh theih tawh.
Thlâm kawngkhar a hawn lai chuan kei chu pawnah ka lo ding zum zât a, zâna hrâm chi, zan danga ka hriat ngai miah loh thâwm te chu ka hre hnem lutuk mah mah tawh. A ţhen te chu hlauhawm deuh deuh an ni a, a ţhen erawh an bengchheng! Ka thlâ a ngam lo ni berin ka hria, ka che sek a, ka hawi kual leh zuk zuk ţhin; thil ţha lo ka hmu ang tih erawh ka hlau ru viau thung.
"Au Sawmzel.." Thlâm chhûnga thil ri dawt thâwm leh min ko thâwm a inrual chiah avang chuan phu zawkin, "enge?" Ka ti tang hrâ a, u Aron-a chuan nui hak chung hian, "lo lut ve lawk la, chhoh leh nghal chu a hahthlak lutuk ang" a rawn ti a, ka hawi kual zuk zuk hnû chuan ka lut phei ve thuai a.
Nichina thil ri dawt kha enge anih ka hrethiam ta mai, thlâm namthlâk kha a lo nam thla a, a lo ţhu thluang duai a, thlang lam a hawi ngul bawk. A bul chiahah chuan tîm deuh daiin ka ţhu ve a, a kut chu chêtin ka dârah min rawn kuah thak mai.
"Ka hlauhawm loh, i hria" engmah ka sawi hma chuan a ti sup a, hre tho mah ila tun ang dinhmuna mipa nen chauha awm chuan thlâ a muang thei tak tak lo!
U Aron-a mizia hi chuti lutukin ka la hrechiang lova, ka hriat ve chinah a ţhatna ka hmu zel tih mai a ni. A lang lo ruamah hian a lo nasa ve zêk thei tlat!
"Lo kal teh" tih leh a lama min pawh hnaih a rual a, ka thinphu chu rang dawt dawt tak a ni! Ka hrethiam lo, hlauhnain ka khat a, ka ţah a chhuak nghâl ringawt bawk! Tenawm takin min khawih chhiat te tum ta se ka hneh dawn hauh lo va, tun ang hunah leh tun ang hmun rehah hi chuan ka âu thâwm hre pha an awm dawh hauh lo tih te chu ka ngaihtuah kual zut zut mai.
Hneh zeta min châwi kângin a malah min ţhuttir dêr a, a ţhu thluang duai bawk nen kan hmâi a insi lo chauh a ni!
"Khawi maw, min thlah teh hetianga awm hi ka duh miah lo ania" talsawn tuma ka tih chuan lu thing nghutin nghet lehzual hian min pawm bet tlat a, ka pêr bâwih lo chauh a ni, enge a duh ka hrethiam lo!
"Thâwk min lâk tir lawk rawh" ti supa a che leh chiah chu ka eu zawk a ni ber! Ka âwm zâwnah a hmâi chu a awm a, a thaw lum hâm hâm avang chuan ka talbuai zo vek! Nem sawn tumin a lu chu nam ve bawk mah ila awmzia a awm thui lo lutuk tlat!
"Au Sawmzel, ţang ţung lo teh hah i ti dam lo ania, thâwk min lâktir ringawt rawh eng dang mah ka phût lo" ti lehin na zet hian thâwk a la kâwk kâwk a, a aw hnawk ru riau chu ka lo hriat hmaih lo nasa mai.
"Ngati nge hetiang hian i awm a? Haw tawh ang!" Ka tih pawh chuan engmah a sawi zui tawh lo va, kan awmna vel chu a reh vung vung ringawt tawh, ni lo, rannung hrâm chiah chiah te bâkin thâwm an chhuah lo a ni zawk tak e!
"Pasal nei tawh la" rei fê kan ngawih dun hnu chuan a rawn tichhuak phawng a, a lu pawh a thle sawn tawh, min rawn enin za lo tih hriat deuh hian a nui ro halh a, ka chhân hun ngaichâng ni âwm hrimin a mit chu ka lak aţangin a la sawn miah lo.
"Engati maw?" Tiin ka zawt lêt a, "i la duh lo emni?" A ti lêt ve leh thung.
"Ngaihzawng pawh neih hma hmaa pasal neih lo sawi te chu a" nui lui hak haka ka tih chuan min lo pawtchatin, "Bem che ka tum hauh lo ania" a ti teh daih a, a thusawi dan kalhmang hi ka hrethiam lo, zanina a chêt dan pawh hi a awmzia ka man pha lo reng reng.
End of chapter - 13