Siaha lata

[Cck Lalchhuanawmi]

Siaha Lata (Saiha lamah)
Bu Khatna
Ziaktu: Cck Lalchhuanawmi

April Beirangia & Kulhpuingheta

"I ruat a nih ngai zawngin... "
Welsh Mara Missionary:
Rev. Violet Louise Anne Mark


Chapter-5

A thleng nawn leh a nih chuan, ka ngawi mai mai tawh lo ang.

"Sarah, hrehawm ka ti e",

"Hahdam deuhin awm rawh, a ṭha leh vek mai ang", min hnem chu a ni ve si a. Ka hahdam pawhin ka hre lo.

Hnathawk tura chhuak loin ka tawm a, khapa hri hre khan thil ṭul lo tak a ti a ni.

Awmzia awm lo, khatia a lo chet ngawt chhan tur a nei lo. A kalthui tawh mah mah.

"April, inkhawm hunah, ṭan hmain i hmu ang a, thil awmzia i hrilhfiah vek dawn nia, insiam rawh",

"Inngaizawng turah min ngai a, chubakah, hmuh pawh ka hmu ngam tawh lo ang", ka hmu ngam tawh lo.

Sarah-in kawra min lo vawmin, "Insiam mai mai teh, i hrilhfiah ang a, a fel vek mai ang", a thawveng bawk sia maw.

Inkhawm turin ka insiam ta malh malh a, Paul-a pawh a lo thleng.

Kan pathumin kan kal a, inkhawmna hmun thlen hma hauhin ka khûr. Mak thei a nia.

Hnung lam aṭangin u Nghetan min lo ko leh tura ngaiin, ka han hawi let.

U Ngheta chu sawi loh, tu mah ka hmu lo, "Eng nge ni ta?",

"Eng mah, kal ang u", kal hmasa zawkah ka ṭang a. Sarah leh Paul-an min hrethian ngawt ang.

U Nghetan min koh lai khan an pahnihin an awm a, Chakao-an buaina a siam vei nen.

Mit na vek khawpin u Ngheta ka zawng leh, a inkhawm ang em le? Ka hmu lo phawt a.

Bân rual rualin ka tlan chhuak a, toilet-ah ka lut. Zun a chhuak tawh lutuk.

"April, i awm em?", Sarah lah hi, "Awm", ka ti vak. Nui ri ka hria a, min nuih a nih ka ring. Ka au ring em a ni.

Ka chhuak a, "Min lo ken teh", a bag leh Bible min kentir nghal.

Puan ka siamṭhat hma hmain, hmanhmawh leh lutuk.

A lo chhuah ve leh a insiam ṭhaa, ka bag leh Bible ken tirin ka insiam ṭha mawlh mawlh.

"Tu emawin i chungchang min zawt a", intithei takin a la ti zui. "Paul-a bak a ni leh lo ang, a Assignment ka ziak peih tawh teuh lo", a ner zui nak.

Paul-a chauh lo pawh, Sarah nen hian Assignment min ziah tir an hrat thei lutuk.

Min kaiin, "Tu emaw, tukina i zawn nasat deuh kha",

"Zawn ka nei lo", awihlo lutukin min ner khum. Zawn ka nei reng sia. Sarah-in, "Va kal rawh, Inkhawmna chhungah a awm aw", Sarah chu.

"Nang hi",

"Kal vat mai rawh, a haw hmain", min nam ta ang zui a.

Thawm dim thei ang berin, thil ru tur ang maiin ka kal dem dem a. Min hmu apiangin, mak min ti ngawt ang chu.

Kawngka aṭangin ka thlir a, u Ngheta ka hmu nghal zat. Nimin aiin a hmelṭha!

A kamsir ka hmu pha tawh si lo a, a dam nghal ka beisei.

Ṭhutthlengah ṭhuin, a u pasal nen an inbia a. A u pasal hian tukinah thu a sawi nghe nghe.

Naupang hoin u Ngheta an bawr a,,"Putê, i hmelṭha e, i hmelṭhatna thuruk min lo hrilh", an ti a.

U Nghetan, "Ka hmelṭhatna thuruk chu maw, Pathian thu ka awih a, nu leh pa thu ka awih bawk a, Pathianin mal min sawm a, "Lo hmelṭha zual zel ang che", Pathianin min tih vang a nia", a ti a.

Angel Âwmawia chiah chiah.

Ka lo hlim veng veng, naupang hoin, "Yess, Pathian thu ka awih ve tawh dawn", an ti tliar tliar a.

U Nghetan, "Pathian thu in awih ngai lo maw?", mak tih hmel zetin a han ti a. Naupang ho an hlauthawng tawh.

An va hmuhnawm tak.

"Aih, awih ṭhin e, anu leh apa thu pawh kan awih lutuk", an ti leh tliar tliar.

U Nghetan, "A ṭha lutuk, Pathian thu leh, anu leh apa te thu awih tlat tur", dam zetin a ti a.

Naupang ho an thaw sang sang, u Ngheta chu a kiai deuh sak a. A ti hlauthawng hman viau a ni.

Chutia ka bihthla chu mi rawn hmu ta, ka inthiarfihlim rang teh asin.

Sarah ding ṭha hle hle lai ka kuah thlu lo chauh, "He nu tak hi chu", tihngaihna hre lo zetin min en a. Ka nuih tlawn daih.

"April", u Nghetan min ko.

"Sarah", zawi têin ka ko a, "Ṭha deuhin awm rawh", ring tâwkin a la ti zui.

Paul-a nen min kalsan daih, insangmar ṭung chungin u Ngheta ka en a, a nui reng mai hi, a awhawm ṭhin.

U Nghetan, "I lo inkhawm maw, i ṭhulh mai ka lo hlau deuh a", naupang ho ai mahin min tihlauthawng nasa.

Hlauhthawnna tur thu a sawi azeng pawh ni si lo.

"Nimin kha, pawi ka ti lutuk, pawi ka ti takzet", ka hmu chiang ta bawk a. A kamsir pawh chu, niminah hnek a tuarin a thi tih a lang tawh lo.

A ṭha zawk.

"Pawi tihna tur a awm lo, in inrem thei ta em? In inhrilhfiah thei ta em?", mak bawrh bawrh thei.

Ṭanin kan inngaizawng angin a sawi tih a chiang ta.

"Kan inṭhen daih", ka ti chu, "Tinge? Keimah vang a nih chuan ka lo hrilhfiah ang, khatiang sawi fel theihah an inṭhen ngai lo. April, ngaihtuah chiang la, thutawp siam zung zung loh tur a nia aw", a thutak ṭun bawk sia.


Za em emin ka nuih chiam dawn mawni?


A thinrim a hlauhawm si, ni tak, a thinrim ve ngai lo tak e.


Kimki chiaiin, "A sual em mai, ṭhen mai loh chu tih theih a awm lo, inṭhen a ṭha zawk tlat", ti thawrin, "April, i ho set sut em mai", a tih chuan, min nuih chhuahtir chiang lutuk.


Ṭani a lo lang a, "Min lo hawsan mai rawh, April-i hi ka han Ṭawngṭaisak lawk ang e", u Nghetan a ti chu, ka lawm a nia aw.


Ṭani laka hnehna chang zawk angah inngaiin, ka lawmna thup erawh a ṭul lawi si.


A duh thlawt lo, "U Thangi te pawhin min nghak reng a, nidangah ni rawh se", Ṭani chu nui seih mah se, min ngai thei lo takzet zet.


Inthiarfihlim hmasa zawkah ṭan a ngai, "Min Ṭawngṭaisak turin Pastor pawh i ni lo, i ho set sut daih zawk. Ka haw dawn", ka kut ka vai a.


Pastor i ni lo ka tih khan a ṭhawng ngei a ni ang, a hmel kha a dâng sawp sawp.


Thu ṭhalo lutuk ka sawi ta mawni?


Inthiamlo hnuhnawh mah ila, kan haw daih tawh si.


Ṭawng phawng phawng ṭhat lohzia, ka hmui ka bêng hlak hlak, "Nawk nawk che hian aw", a hmai cheina hru fai chungin Sarah-in a lo ti a.


Thatchhe zet hian, "Sarah, thudik takin min hrilh rawh aw, min ning em? Ṭawng phawng phawng ka ching si a, induh min ti fu lo maw?", min chhân dan tur hre ranin ka zawt.


"Ning e a, ṭawng insum i neih loh chuan hautu che i la tawng ngei ang. Keiin ka hrilh che hi awih la, i sawi tur fim takin ngaihtuah hmasa zet ṭhin rawh. Induh tak i ni, ka sawi tam buai peih lo. I induha i induh dan chu e", darthlalang hmaah a ner vak vak.


Ka hmu thei vek sia.


U Ngheta ka ṭawngkhum dan te kha, Pastor i ni lo ka tih khan a ngui nghiai chiang a ni.


Ṭani hnar nan fiamthu leh ṭawngkam mawi hnai a hmang a, keia ṭawng dan erawh, tihelna leh hmuhsitna rawng te a kai deuh a nih kha maw!

"Aw...Lalpa le!!!", ka indawm vawng vawng.

Ṭanin Pastor zir tur a tih kha mawle.


Sarah bul hnaiah dingin a hnung ka chum vak vak, "Sarah, min khung bo mai teh, bo pil vang vang ka duh", min nam lêng rang lutuk.


"Ṭha takin awm rawh, ka khung bo tak tak mai tur che asin", a ti bak hlur a.


Ngawi rengin ka awm, ka tibuai ve em a, thinrimah lak ka duh lo.

U Ngheta hmuh a inthlahrunawm zo leh vek ta.


Sarah nen Canteen-a kal kan tum chu Ṭanin min hruai pêng. Sarah ka melh ṭawk ṭawk.


Min hrilh tur a chiang sa mai sia, zahthlak dawn ngei mai.


"April, ka awmna u Thangi nau ka duh thu ka sawi kha i la hria em? U Ngheta nen in lo inhre reng chu ni sia, i rilru dik tak min hrilh turin ka duh che. I duh ve tho em ni?", ka duh vea a rin avangin a rilru a na tawh saa.


Ka duh ve thu ka hrilh chuan a nat belh zual dawn.


Dâwt sawi duh lo sateh mah ila, "Min ṭanpui avangin ka be ve ṭhin mai chauh alawm, duhna rilru ka pu reng reng lo", a mitah tak ka en ngam lo.


Ka dâwt sawi min man chhuak ang.


Min man pawh nise, a la thutak lo ang. Ngaihzawng inchuh te chu a, a zahthlak. Inthiarfihlim hmasa zawkah ṭang mai ang.


Sarah-in min kuah thut a, ka phu nasa em em lehnghal.


Zawi muangin ka hrilh ve ta a, "Ngaihzawng inchuh te chu a, a zahthlak. U Nghetan kei aiin Ṭani a hmang ṭangkai zawk ang",


"Hmang ṭangkai a?", a bo hû mai pek a, "Pastor zir tur a nia, Ṭanin a ṭanpui thei zawk ka tihna",

"Huh", ei lo zetin a ti pek a. Kan inhrilhfiah thei dawn lo a ang riau mai ni.


Sarah chuan, "Missionary atan inpe mai rawh, a nih loh pawhin, chan loh hlau chea tei tei a awm tho", a ti chu, a nghawngah ka rek.


Ka rek na chuang lo, a nui tet tet. Ka thlah a, "Min hmusit ṭha duh lo em mai aw", ka ti tau nghawng nghawng.


Chutia Sarahin a sawi takah chuan, Chakao chinchang hriat tur a awm ta mang lo.


U Ngheta a hnek ringawt kha a inthiamlo a ni ang.


Kan inngaizawng tawp si lo.


Chu pawh nise, khatia a lo chêt chhan tur a awm lo hrim hrim.


Ngaihtuah mek lai laiin, Anita-i kuahin min tâwk zawngin a lo kalpui. Hepa awm dan hi hriatthiam a har.


Fapa duat rawn a ni a, fel taka awm tur a nih vei nen.


Lei hrehawm tak hi chu a!


Paul-a leh Sarahi te nen phone-a movie enin, popcorn kan ei a. Centre table chungah Zirlaibu tîangin, JF Dictionary rinchhanin Paul-a phone kan dah a.


Sarahi leh keia phone-ah movie kan en ngai lo.


Paul-a lakah hi chuan, ka intihotu larh zel. Min hrechiang ve thawkhat tawh a, min enliam mai bawk a.


An pahnih lakah hi chuan, ka intipangchang thei hrim hrim.


Horror movie en kan ni bawk a, phut zuk zuk awl ngei mai.


"April", tia Paul-an min ko pawhin popcorn thlauh baw niaih khawpin ka phu.


Sarah nen min han nui nghek ang ta zui a, ngei tak ka ni.


"Hmun intifai vek ang", ka ti pek a, "A tifai ziah ang maia i ṭawng le", Paul-a a diau bik lo.


Hmmm, tlawm chiang tak ka ni.


Paul-an min ko leh a, "Sawi thuai thuai rawh, movie mood-ah min hruai lut thei lo",


"The End hunah sawi zawk mai ang", pawi ka ti lo chiang mai.


The End a inti ta a, Paul-a chuan, "Kan inkhawmnaah khan Ṭawngṭai turin zan tin a kal ziah, zan tin ka ti naa, zing, chhun leh tlaiah pawh a kal ṭhin. A ṭawngṭai rei thei bawk si. Chham tur a hre ngawt mai. Tlai khat ka hmu pawh, a lo chhuah vat ka rin avangin pawnah ka nghak a, a lo chhuak thei bawk si lo kha, ka hawsan leh daih. Hawrualpui ka tum tehreng nen", hmanhmawh miah loin a ti nê né a.


"Hawrualpui chhan tur i nei ngawt em ni?", ka lo zawt let khauh.


Paula chuan, "Nei chuang nang, kawm a nawm(nuam) hmel em a, bakah, Pastor zir tur an ti si a, Thlarau chaw dil ka duh", Sarah kheuh zauhin a ti roh a.


Sarahi ngaihdan ni lo tura ka rin nen, "Kan pahnihin kal zawk ang, min Ṭawngṭai turin ti bawk ila", a ti ta khiah mai a.


Anni pahnih chu induh tawnin an inen vang vang.


Mak ti lutukin ka en vang vang ve bawk.


Hetiang hian an la awm ngai si lo a, a ruka buaina deuh hi an nei mawni le?


A ni chiang ang, a rukin buaina an nei a ni. Min hrilh lo mah se, vui tur ka ni lo. U Ngheta chuan lo Ṭawngṭaisak ngei teh se.


Kulhpuingheta pov....
"U Nghet, chaw ei a hun, lo chhuak tawh la", Bible dahin ka chhuak a.


Ṭani a lo ding reng, "Min nghak nimaw?",


"Nghah loh ten le, tlanbo tur ang mai hian i awm tlat a", ka nuih var a.


Chaw ei fel hnua bathlara ka ṭhu chhuak chu, Ṭani a lo ṭhu chhuak ve a.


Kan pahniha titiin, "Bible zir hi ka duh thei lutuk, Missionary-a kal ve te hi ka duhthusam ber a ni ṭhin. Ka têt lai aṭangin Missionary te hi ka ngaisâng a, an chanchin ka chhiarin ka ngaitla ziah. Missionary-a ka duh berte pawh Adoniram Judson-a te nupa", a nui seih a.


"Missionary-a kal tur pawhin, chhungkua hian a zir ve a ngai, chhungkuain a zir loh chuan Missionary ka ngaihsanzia leh Missionary nih ka duhthusam a nihzia sawi chhuahte hi a inthlahrunawm. Chhungte hnenah takngial pawh ka sawi ngam lo, tun hi ka sawi chhuah hmasak berna", a lo hawi a, "Sawi chhuak suh aw, zahna khuarkhurumah min thlak tihna a ni dawn si a", sawi chhuah chu sawi loh, keimah zawk hi zahna khuarkhurumah min thlak zawk.


Ṭani nen chuan kan inang lo hle mai.


Zâwlnei Jona nen pawha inanna nei ta riauin ka inhria.


A duhthusam Missionary nih pawh, an chhungkuain a zir loh avanga tipuitling lo mai chauh a ni a.


Ka duhthusam ni miah lo, Pastor ni tura kawng sialsak ka ni thung si.


Ṭani hnenah, "Kan Pathian hi a mak khawp a, chhungkuain a zir lohna leh, chhungkaw bakberh aṭanga seiliante hi a rawngbawl turin zu ko tlat ṭhina mawle!", ka ti a.


"A ni vek kher lo asin, chhungkaw bakberh aṭanga seilian i nih loh tawp hi", min dang deuh tlat.


Nui varin, "I tidik, chhungkaw bakberh aṭanga seilian ka ni lo, mahsela; nang leh keia hriat leh hmuh theih chinah pawh, Pastor leh Missionary ṭhahnem tak te hi, chhungkaw bakberh leh chhungkaw rik bung bungna kar aṭanga lo chhuak an ni tlangpui asin", ka han ti a.


Ka thusawi chuan min hneh mah zawkin ka hre ta mai.


Ṭani thlamuanna ṭawngkam ni mah se, ka ṭawngkamah ngei ka inhmu chhuak zut zut.


"Ni e tiraw, i sawi azarah a fiah kuar ta mai", kei tak hian fiah ka ti.


Min thawhsan hnuah pawh ka ṭhu ta reng. Hun reilotê chhung Khawvelah rilru ka pe a, Lal Solomona meuh pawhin engmah lo mai a tihna rilru ka ṭawmpui thei ta hial.


Engmah lo mai a ni.


Hlim zawk tura inngaih ngawt theih a ni lo, kei phei chuan hlimna ka tawng mang lo zawk.


Ka koa mawhphurhna tla tlanchhiatsanin, Fapa tlanbo ang maia Vawkin an ei englo mai pawh ît duhna ka nei ta hial a.


Ṭawngṭaia ka ṭhingṭhi reng rengte pawh, Vahchap ang mai hian Nî-in min êm ro em em mai chu a ni si a.


"Nghetpui, lo lut tawh ta che, hritlangin a man palh ang che", awm rei min ti deuh nge ni, u Thangtein min lo ko a.


"U, khawngaihin reilotê min lo ṭhutpui lawk teh", ka bulah a lo ṭhu a.


Ka kut a rawn vuan a, min kuah bawk a, thlamuanna namen loin min tuam. "Nghetpui, Pastor zir chu i duh ngang lo a nih chuan ka nu leh pate bulah ka sawipui ang che. Rilru bul bal lo taka i awm hi ka hmu thei lo", a ti seuh seuh a.


"Ṭha takin kan sawi anga, an hrethiam lutuk ang. Kan mipa neih chhun i ni a, Chi thlah lo zawnga awm tur chuan ka phal bik lo che",


"Tak tak maw?",


"Tak tak e", a lo ti a. "Pathian pawi kan sawi si a nge?", ka ti a. U Thangtein, "A mawh phurh ka ngam e", inringtawk takin a ti sep.


Mawh ka phur tir lo ang.


Pastor ni turin ka u te ho pawh hian min duh tih ka hria.


"U, Pathian hian a Rawngbawl turin min duh chiah em tih hi ka hre lo a ni. A mi kohna lo chuan mahni thua Rawngbawl ka ngam lo a ni. Tling tawk ka inti lo, Pastor nihte hi namai lo tak a ni si a",


"Pathian hian a mit tlung leh a Rawngbawl tura tlingte chauh thlang dawn sela, emaw a mittlungte chauh chhandam turin a fapa lo tir ta sela, nang leh kei hi engtin nge kan awm tak ang?".


U Thangtein min luhsan hnuah pawh la ṭhu ngat ngatin, a sawi dik chiah a ni.


Tu mahin Pathian Rawngbawl turin tling tawk kan inti lo a, Pathian pawhin tling a tihte chauh a thlang ngai hek lo.


Tling a tihte chauh thlang dawn se, tu mah tling kan awm lo ang.


Haiderin chhuanlam ka siam mai mai zawk te pawh a ang alawm le?


Mut hmunah theihtawp chhuahin ka ṭawngṭai leh a, "Lalpa, ka ngeng hi min chhun tlang sak hram rawh", mahni leh mahni dik lohna hmuh chhuaha, insiam ṭhat tluka thil harsa leh khirh a lo awm lo a nih dawn hi!


A tuk tlaiah Ṭawngṭai turin ka chhuak a, ṭhingṭhi ve tak bawk mah ila, chham tur ka hre lo.


Ka tuiral hleithei lo.


Chãn tur chuang nei hauh si lo hian, thinlung a sak ṭun a.


Tlawm taka Pathian ke bula ṭhingṭhia ṭap zawih zawih tur si hian, chapona Tlâng sâng tak aṭangin ka la chhuk thei meuh lo.


Chapopui tham sum leh pai nei lo, chân tur nei chuang si lo, eng hian nge ka ngeng chhun tlang thei lo ni?


"Aw ka Pathian, he khawvela chhuan tur ka neih chhun i ni a, eng ber hianin nge i âw min hriattir thei lo chu ni? Ṭekin min deng mai rawh, ka mangang tawh em mai".


Mangang tawh tak ka ni, ṭekin min deng se, ka ṭha chhuak mahna.


Ṭeka den erawh, ka zuam si lo!


"A tharin i kutah ka inhlan leh e, Amen".


Rei tak tak ṭhingṭhia ṭawngṭai fo ka nih avangin, khûp lama insawisel ka nei tawh ngai meuh lo.


Ṭhutthleng paw laite hrufaiin ka rem ṭha a.


April-i ṭhiante pahnihin min rawn ko, "I lo haw hman kan hlau lutuk a, a tlanin kan lo tlan", Sarah-in a ti a.


"Haw ka lo tum hnai deuh chu a ni, eng thu hla nge ni ta? Ṭawngṭai tura lo kal in ni ve ang chu a?", an inen a.


Sarah-in, "I hnen aṭangin thurawn kan mamawh a ni, biak che kan duh a", inthlahrung tak hian a ti a.


"Ṭhu ila", ṭhutna tur kawhmuhin, inhmatawnin kan ṭhu a.


Sarah zawkin tihian a sawi ta a, "Sawi tawp mai ila, Paul-a hian Sex hman a rawt ṭhin a, a chhan chu kan inngaizawng rei tawh a, kan inngaihzawn tirh angin kan inkarah eng inhip tawnna mah a awm tawh lo, inneih kan la duh bawk si lo a, kan inkar a ngheh zual zel nan Sex hmang ṭhin ang a ti a.


A tirin ka duh chiah lo, mahse; a hnuah chuan kei pawhin a ngaih dan ang chiah ka nei chho ve. A chhan chu, Paul-a ka hmangaih lutuk a, Sex ka hmanpui duh loh chuan min ṭhen ka hlau bawk si a, keiin ka ṭhen thei lo tih ka hre chiang".


Paul-a a lo ṭawng chhuak ve a, "Sex min hmanpui duh loh avang ngawtin ka ṭhen dawn hleinem che. Ho tak takah pawh kan inṭhen fo kha",


"Ka hria alawm, mahse; Sex chu a tawpna tak tak a ang em a, ṭhen che ka duh hleinem. Kei chuan inneih a, dam chhunga invuan dun tlat turin ka duh",


"Sex ringawt ka ngaihtuah bik lo, i duh ang chu ka duh ve tho. Sex hman ka sawi chhan chu, kan pahnih inkara inhip tawnna a awm tawh loh avanga inhip tawnna a awm leh theih nana sawi mai chauh ka ni", Paul-an a ti a.


An mamawh dik tak zawk chu kei ni loin anmahni ngei an ni.


Inṭhut chilha an hun tawn sawi dun keuh keuh an nei ngai lo tih a hriat mai.


Sarah-in, "Engtiklai pawhin nang chuan min hip reng asin, nangmah zawk a nih kha, a chang chuan April avang chauha inṭhen hlen lo ni maiin ka hre ṭhin. Kan inṭhen chuan April-in a be duh dawn lo che a, ṭhian i ngah si lo. Tunah hian Sex hmang pawh ni ila, hmeichhe easy-ah min chhuahin min kalsan lo ang tih pawh a sawi theih loh", a ti a.


A ṭap tawh, Paul-an a kut a vawnsak a, "Sarah, ka hmangaih lutuk che, April-i avang chauh a ni lo, ṭhen hlen che ka duh loh avang maia kan inṭhen pawha ni ṭha leh tura ka sawm ṭhin che.


I hria em, kan awm dun apiangin kim lo awm ṭhin hian ka hria a, kan inngaihzawn tirha kan hlim ṭhin zia ngaihtuah hian khami hun anga awm kha ka duh ṭhin.


A kuma kum chuan kan inngaizawng tawh a, kan inkar a ngheh lehzual nan Sex hman ka rawt mai chauh a ni. Sex hman luihpui che ka duh reng reng lo",


"Mahse, Sex chu nupa nih hnu chauha hman tura Pathianin a siam a ni a, inngaizawng kara hman tur a ni lo. Ṭhen che ka duh loh avanga pawmpui che ka ni alawm",


"Ka hria, min hmanpui duh loh pawhin ṭhen che ka tum lo, ṭap tawh suh. Kan inkara kim lo awma ka ngaih Sex a nih avangin ka sawi mai mai a nih kha. Min neih duh i tih kha i ti tak tak em?", Paul-an a zawt a.


Sarah-i a bu nghauh nghauh.


Kan hmaah duh takin an inkuah ngawih ngawih. An inkara kim lo awm chu Sex ni loin, Lal Isua zawk a ni.


"In inkara kim lo awm chu Sex ni loin thildang zawk a ni",


"Chu chu eng nge ni?",


"Kan bulah Thlarauin a awm reng ṭhin", ka ti a.


An inngaihtuah rauh rauh, a tawpah, "E...ka hre ta e, Isua a ni maw?",


"Ni chiah e, Isua tel lo inngaizawngte inkarah kim lo a awm ṭhin reng asin. Inneih ngei in tum te a nih phei chuan, Isua hnenah in pahnihin inhlan ṭhin rawh u. Inneih hmain Sex lo hmang ta ula, in hlim tak tak thei chuang lo ang.


Isua kutah in inngaihzawnna te hlanin, inneih hun a thlen hma chu invawng tlat bawk ula, in inneih zanah in Thianghlimna han inhlan tawn ve ve bawk ula, Isua ai mahin in lawm dun zawk ang a, Api leh Apu in nih hun thleng pawhin in inchhir loh thu in sawi in sawi hian ka ring a ni".


"U Nghet, min Ṭawngṭaisak la", min tiphu kher mai.


Kei hian ka Ṭawngṭaisak ang maw?


"Ni lo e, in pahnih ngei khan Ṭawngṭai zawk rawh u. Ṭawngṭai tur che uin mihring ve mai ka ni a, theihna ka nei lo",


"I nei alawm, a hun takah kan tan Pathianin a lo tir che a nih hi. Min Ṭawngṭaisak ngei ngei rawh".


An pahnihin ka hmaah an ṭhingṭhi a, an lu chunga kut nghah zawng, ka thei thlawt lo a ni.


Fel takin ka hmaah ṭhuttir zawkin, an pahniha kut belhbawmin chhungrila khûr dar dar chungin ka Ṭawngṭaisak ta a.


Min hawsan hnuah pawh ka la awm reng.


Hei lo liama Pastor ni tura, Pathianin min kohna a awm leh tawh chuang lo'ng e.