BEISEINA NEITU CHAPTER - 3 ZIAKTU : MIRA SIAKMAWII

Episode kal lai dah luhna

Moderator: writers

Msi Miluhlulnui
Posts: 281
Joined: October 18th, 2019, 7:46 pm

BEISEINA NEITU CHAPTER - 3 ZIAKTU : MIRA SIAKMAWII

Unread post by Msi Miluhlulnui » February 11th, 2024, 8:25 pm

BEISEINA NEITU CHAPTER - 3



Ziaktu : Mira Siakmawii





☆ DINO ☆



Hmeichhe ho bazar pui hi chu a lo ninawm a nih hi. An thil lei apiang min khai tir a, tereuhte tak tak ho pawh hian mamawh an lo ngah ve thei phian zel bawk nen, an lei țeuh hnuah pawh an la duhtawk ngai chuang lo.





"Lo kal rawh helai ami hi en leh lawk ang," ka nu lah ka thil khai bawr hre chang lêk lovin a duh duh na ah min kawi pui thul.





"Ava mak e aw, pheikhawk chu i lei tawh kha," ka ti zui hluk. Min chhang lem hlei lova, pheikhawk dawr ah lut in a enkual leh thlap thlap tawh.





Ka melh kual a, pheikhawk pakhat chuan ka mit a la nghal chat mai. Ka la kâng a, a var rawng a ni a a chhip ah love awm in a tle sep sep bawk. Bialnu ka neih lai ni se chuan ka lei sak in ka ring a ni.





"A mawi khawp mai heihi," ka nu bulah ka lek hnai a.





"Hei chu, Bawihpuii mawi tih kha a nih hi. En chian hian a lo va mawi ve," a rawn bih kual ve a.





"Bawihpuii maw..?" Ka ti deuh sup.





"Ni e, kan bazar ni khan mawi a tiin a lo en vung vung a, bun pawh kha a bun tawk chiah a, a lei duh ta lo mawle a uiawm khawp mai," a ti a, pheikhawk chu ka thlêk vang vang a. A vun nung sarh nen khan engtin emaw tak in a inhmeh phian ang.





"Engzat man nge..?" A nghak tunu chu ka zawt a, a bun lai tur ka mitthla vang nge ka lei chak tlat pek.





"Bawihpuii size chu hrilh la, ala awm chuan lo pack tir rawh," ka nu bulah chuan ka ti sup a, "i lei dawn em ni..?" Tiin min zawt a ka bu deuh nghut.





"Ka lei ang ka lo ti rilru a, i lei dawn chuan a țhat chu. Size 38 kha ala awm chuan min lo pack sak rawh aw, hemi rawng ah ngei hian," ka nu in a tih chuan pheikhawk dang ka enkual a, an mawi em em vek na chung in ka mit la erawh an vang viau thung.





Ka nu in Bawihpuii haw chhoh hnu a a sawi, a thawmhnaw tur engmah lei ve lova a chhungkaw tan chauh a a lei thu khan min hneh reuh riau a. Ka nu phei chuan thawn chhoh turin puanthan a lei sak fel dim diam tawh.





"I puanthan thawn tur rual khan i thawn chho mai dawn nia," ka ti a. Kan haw mai dawn emaw ka ti a a la kal kual ta cheu mai. Lei duh tak tak si lovin a enkual țeuh a, a ha chhin vela a inhmeh leh hmeh loh en ve sek a ngai bawk nen, hetiang reng hi hmeichhe bazar dan a nih chuan ka sim nghal chiang khawp e.





"Kumin chu hmundangah mass kan hmang dawn em ni ang..?" Chaw ei lai a ka pa thusawi avang chuan ka nau a khêk deuh raih a, Biaktluanga lah a bang lo.





"Nang i hman ve dawn em Bawiha..?"





"Khawi a hman nge i tih a..?" Ka ti deuh sup a, ka nu behlawi bai ka hâwp chu Bawihpuii bai ka hrechhuak a, a bai tui ang khan ka nu hian a bai ve hauh lo.





"I pi Ruali te khuaah kan hmang dawn em mawni ka ti, i pi pawh in a hmang chho dawn a nizan lamah i nu a rawn bia a," a ti leh a.





"Ka pi lah hi, a tar a tar hian a zin kual peih ve ngawt mai. A kum ang rual ho te chu chhuah pawh an peih tawh lo ania, a ni ve chu hmundangah mass ala hmang sawn ham ham," Kimkimi'n a tih chuan kan nui ta dar dar, ka ngaihdan chiah a ni bawk.





"Vai kal a țha dawn em ni...?" Ka nu in a rawn tih chuan awmzia a nei lo, ka pa in ka nau te ho in thuthlukna a lo siam fel hmak tawh.





"Bawiha a hman theih loh leh amah in inah a lo awm ang a ni mai, mass kan la hmang sawn ngai lova thil thar tih ve te hi a țha ania.!" A ti zui duah.





"Hman chu ka ring ka la chiang ngam chiah lo, zin thut ka ngaih dawn chuan ka hman lo dawn a kan in hrilh țha leh dawn nia," ka ti a, department tana kumthar project kan siam bawh zui ka kutah an dah a, zin ka awlsam an ti deuh nge ni charge min hlan fel hmak bawk.





Kan lo upa telh telh a hunpui pawh ka ngai ho ve ta zel a. Tleirawl laia nuam taka kan hman țhin lai kha a tâwp tak meuh meuh ta a ni. Kum 30 ral kai tawh meuh chuan huau huau mood a chen chu har țalh țalh tawh tak a ni bawk.





Ka mu thei lo chu balcony ah chhuak in ka Phenglawng ken chu ka hmui ah ka chuk tuah a, ka rilru a hla rawn awm chu ka tum zui nghal hlarh hlarh. Music ka ngaina a, School kan kal lai phei kha chuan band ang deuh reuh hi kan din a, guitarist ka ni a, kan School bil bik ah kha chuan function hman dawnah sawm kan hlawh ve fo zel bawk.





Phenglawng tak hi chu ka thiamna ala rei lova, ka pa țhianpa min zirtir a ni a dik taka ka tum thiamna pawh hi la rei lo tak a ni.





Ka phone message rawn thleng mawlh mawlh chu ka en a, țhianho group a an thil sawi chu ka chhiar thla ve mial mial. Ka hman tur thu sawiin room chhung ah ka lut zui a, a vawikhat nan krismas ngaihzawng tel lova ka vawikhat hmanna tur a ni a, a danglam khawp ang le.!







"Khawdang a mass hman chu in tum tlang ta em ni..?" Ka bula Fakawma rawn țhu chu ka melh zawk a, "ka zin dawn loh chuan kan vai chhoh ang," ti sup in ka chawhmeh vil chu ka chawk zui nghal sawk sawk.





"Ni e, hman chhuah theih chuan a țha. Bakah helaiah chuan nuam i ti lovang, hmundangah te han hmang thawveng la nangmah pawh i hahdam ang a hmeichhe dang te pawh i tawng mial mahna.!" A nui zui hawk hawk a.





"Amah avanga rilru nâ a indawm kun reng tur chuan min ngai lo teh," ka ti zui hluk.





"I duh ve țhin sia ka ti mai mai mawle, saw a lo thleng e," a tih chuan ka hawi let ve zawk a. A chhe lo leh pek hle mai, ka ten tih mai loh chu a hmel pawh țha tak a ni.





"A bul a mi pawh a hlim khawp mai," ka ti a, ka ten tih bak sawi ngaihna ka hre lo. Chutih rual in kan țhiante an ni a ka be chhe ngai lova ka be țha bawk hek lo, an ni mah an inthlahrun loh chuan ka inthlahrung bik lo bawk.





"I țha maw..?" Ner sawk in a ban ah ka hnek zui țawlh.! A nui huah huah a, "mipa tak in aw țhianpa," tiin ala tho zui thurh lehnghal. A ve a.! Engah mah ka ngai lo, an chaw pawh ka ei hek lo.





Kan sa chhuan ka vil a, a țawng lar lar ri ka hre leh țhin. A nui ri mawi tak țhin kha ka beng ah erawh a rik dan a dang tawh a, min hmuh a a in thiam lo mitmeng la lang fo țhin vang erawh chuan ka huatna ka thup hram hram țhin zawk.





A hming chu Hlutei a ni, tet lai ațanga inkawm tawh kan ni a, kum nga tal tawp kan inkawp a han in tih thiam loh chang leh neuh neuh nei țhin mah ila, ka țhen theih miau loh avangin ngaihdam ka dil a kan țha leh mai țhin. Kan inkawp rei a tu mai pawn kan inneih an ring vek a, hmeichhe dang duh ka nei lo nen keipawh in a ka rilruk a ni.





Inneih chungchang te kan sawi dun ve fo țhin a, fa engzat nge kan neih ang tih te thleng in mawle.! Ka hmangaih em ka hre lova duh erawh ka duh thung a, kan țhiante phei hi chuan, 'Hlutei mei i nih hi,' an ti leh nulh țhin a chutiang khawp chuan kan in zui tam.





Mahse, chutiang khawp a in zui tam. Mi pawh in a innei tura min rin vek leh inneih pawh ka sawi pui hial tawh hmeichhia chuan, zan khat thil thu lek ah kan pahnih inkar chu amah ngeiin inzawm leh thei tawh ngai lo turin a sat phel phawk thung a!.





Kan țhianpa pakhat nena khum khat a tui ti taka an mu dun ka hmuh țum a, engmah ka sawi lo kha tun thleng in mak ka la in ti. Ka țhen tawp a reilote ah Afaka nen an in zui thu kan hre ta bawk, kan țhiante dang kâ ațangin an khawsak dan ka hria tih a hre zui leh a ngaihdam min dil zui ta bawk.





Theihnghilh teh ang, nunhlui avanga in dawm kun reng tur rual ka ni lo tlat.





"A hmin dawn tawh em..?" Afaka a rawn țhu thla veleh, "a hmin chu a ni mai e, in rawn thlen na a rei tawh em..?" Ka ti zui ve zat a. Chaw eikhawm an ti a, Fakawma te inah bawk a ni kan kal khawm leh ni.





"Rei vak lo, a hmin chuan arsa chhuan an ti deuh mawle. Ka va hrilh ang e, thuk dang siam leh mai tur a ni," ti a a ding uaih chu ka ko leh.





"A ngai leh lo," ka ti ta zawk a, "ava ho e aw," ti zui nung nung in a lut ta bawk. An mu dun tih ka hria tih ala hre lo tih min kawm dan ah a hriat a, hrilh hriat ka tum lova a hriat hunah erawh engtin nge a awm ka hre chak viau thung.





Chaw eikham ah mei zu in pawn lamah ka awm a, mahni a ka awm chang hian zuk leh zauh hi ka ching a tam erawh phei chu ka zu thei chuang lem hlei lova, a tui na pawh ka hre chuang hek lo, tih dawk lak a ni.





"Hetah i lo awm reng a..?" Hnunglam ka hawi zawk chuan Hlutei a lo ding a a nui var var bawk.





"Eng nge ni..?" Ti ve mai in zial chu ka fawh chhunzawm a.





"Eng ni love, kan zawng che a hetah i lo awm daih sia. I la zu țhin elaw..? I sim tawh emaw tia.?" Ka sir ah a rawn ding a, a rimtui tak pawn ka hnar a luh leh hle tawh, a rim ala ngai reng bawk, amah nena inhmeh tak rimtui tak țhin kha.





"A sim hleih theih loh a nih hi, i puar maw i ei tlem riau in ka hria," zial nawr hlum nawk nawk a tiin thlang lam kawr ah chuan ka paih thla zui a, a dang phawrh ka tum a ka țhulh leh, ka zawngchhang dawn tlat.





"Puar tak ka ni, i sa siam kan hmeh hi chuan chaw tlemte a ei theih loh,"





"Avan lawmawm ve," ka ti deuh sup.





"Eng lo ania, ngaihzawng i nei leh tawh em..?" Pehhel kual lem lovin min zawt tlang tawp a, a tihdan țhin ve reng pawh a ni.





"Kan la nghak ve mek zel chu ania hei, mass hma te chuan kan hmu turah ngai ang," ti a amah ka en chu a lo ner sak a, "ka țhiannu hian a duh tawp che a, i number min dil a," a tih tak ah chuan ka chhang ta lem lo.





"Ka pe duh ang em..? Ka thawhpui ania, a ni pawn a neih loh lai ania," a ti zui leh, "i duh leh pe la, mahse ngaihzawng ka zawn loh lai tak ania a duh ang chhanna ka pe thei lovang i lo hrilh tel dawn nia," tiin sana ka en a a lo tlai viau tawh, ka let a hun tlat.





"A pawi lo, biak hrim hrim che kha a duh a ni mai, ka pe dawn ania aw," a tih chuan ka bu nghut a.





"Ka let san ang che," tiin in lam pan in ka phei zui ta bawk. Ka hnungchhawn leh kalsan tawh te ah hawi kir leh tumna ka nei tawh ngai lo. Pen khat a hma ka sawn thei lo a nih pawh in pen khat pawh a hnung tawlh ka tum hek lovang.









Pi Ruali te khua kan thleng a, an khua ala lian lovin in pawh a la tlem hle a kawng metal phei chu a awm lo tluk a ni. An in kan chuang kai a, naupang an lo tam in an lo ri chûl a ka pi pawh a țhiannu duhtak nen inkawm in an lo hlim ngang mai.





"Khawnge midang hi an awm vek a..?" Ka nu in pi Ruali a zawh tak ah chuan ka zawh tum rilruk a lo ni nen țhutthleng ah ka țhu thla a, ala ri țâwt zui a ka bula naupang phone khawih a țhu in min en ta kur bawk nen ka in sawn ta ringawt.





"Huan ah mass lai vel ami tur hmarcha lawh pah in chawhmeh an va la a nih kha," a ti chuar chuar a, keini unau ho chu min chibai a. Ka nau te hi chuan an hre ve lutuk lem lova kei erawh ka tet laiin min awm nasa a ngainat pawh ka ngaina viau bawk.





"Signal a chhe rapthlak," Biaktluanga'n a rawn ti sur sur, ka phone ka en chu a sawi ang tak tak in a lo chhe ngei mai message pawh a tlang thei lawk lo.





"Ka pi, signal hi a chhe reng em ni..?" Biaktluanga hnung ah ka beng zui deuh thlawp, "chhe reng love, vawiin chu tower an siam a chuvang a nih kha, hei inbual ta che u tuilum a awm sa asin, Dino Bawiha," a tih chuan ka nu te inbual hmasa turin ka hrilh a.





"A ro e, a phut si heti te chuan ka ro haw vek dawn asin sunscreen ka keng tlem ropui si," Kimkimi ka bula rawn țhu thla chuan a ti zui noh noh a, naupang awm ho lah chuan min en duh bawk nen, "țawng zawi rawh a nih loh chuan heng naupang ho hian an seh mai ang che," ka ti deuh sup, a enkual ve a.





"Ka hlau lo, kei ai an tê vek lehnghal ka sunscreen hman zawh ah in ta ka hmang ve mai ang," a ti leh nuah nuah a, ka pi in a lo ko ve sek bawk nen phun nang nang in a pan phei ta hnu hnu bawk.





Thaw hawk in in chu ka enkual a, bang ah chuan Abc te lo inziak in lem inziak te pawh a lo awm tel bawk, a lian lem lova kan chhungkua in kan fin leh dawn bawk nen thaw pawh a ipik viau dawn a nih hmel khawp mai, kan țhutkhawmna pindan tiat lawih chauh a ni.





"Bawihpuii nau te vek in ni em..?" Naupang țhu tlar țhap chu ka zawt a, mipa pahnih tleirawl ve uaih tawh an awm tel ve bawk a chumi te pahnih erawh chuan ball an chei mial mial thung mai.





"Hemi te pahnih chauh hi, keini chu kan leng a," naupang pakhat in a laia țhu te pahnih kawh pah chuan a ti a, mipa ve ve an ni a phir an ni em mawni tih tur khawp in an inang.





"Ka țhianpa te inah kan han leng lawk dawn em ni..?" Ka pa in a tih chuan ka hnial hran lo, kan in zui chhuak a, in kha a tê lutuk bawk nen a chhung a awm kan tam bawk nen a phui mup a, thaw a veng lo ngawih ngawih.





"Kawng hi metal vat se a țha ang," ka ti a, pen zawng in vaivut pheikhawk chungah a kai nghal a, chapal nena chhuah mai mai chi a ni dawn lo tawp mai.





Field zau zet kan kal pel a, naktuk mai hi mass inrinni a nih tawh avangin a tu a mai pawh kan buai tlang tawh a, a țhen in buh ni ngei tur chhangban tur an lo deng mek tihte ka pa hnen ațangin ka hre chho leh ta bawk.





Kumdang ang lo tak in bialnu ka nei lova, khawdangah ka hmang dawn bawk. A khua chu engpawh nise ka hmang nuam tur a ni ringawt a bak eng dang mah a awm thei lo. Ngaihzawng kan nei lo a nih rau rau chuan hman nawm tum hle tur a ni mai.





Kan let thlak leh lam in kawt barrel ațanga tui lo khai chhuak hmeichhia te chuan ka mit a la hmasa ber. A sam a chhip ah a bâwk tawm fel hmak a, hnathawh thawmhnaw a ha a, hnunglam ațang pawn tunge a nih ka hai miah lo mai.





"Bawihpui," ka pa in a koh ri a hriat rual in rang zet hian a rawn hawi a.





"Awiha..! In lo thleng tawh elaw..?" A ti zui chul bawk, a hmai a bal niai a a biang ah chuan bel mang ni âwm tak dum hi a kai leh pheuh pheuh țhin.





"Kan lo thlenna a rei tawh mai, min lo feh san daih a," ka pa chuan a ti zui luam a, a te na vâng vâng in a țawngkam te hi a felfai thlap roh va, thingtlang a awm e ti lo chuan a vun hian hâng lam mah ai chuan ngo lam a pawl mah zawk.





"I zawh chuan ka lo khai lut dawn em ni..?" Ka pa luh hnuah bucket chu kâwk in ka ti a, "aih a ngai lo, ka ti thei alawm a harsa lo, i bal ang," a ti tlat a, a thusawi chu zawm lem hlei lovin bucket pakhat chu ka chawi sawn zui nawlh.





"A dang kha thal leh tur em ni..?" Ka tih chuan min rawn en zawk a, a hmai dum lah chu a inhmeh reuh phian lehnghal.





"Ka lo ti mai ang, inchhungah lo va lut rawh," ti a bucket chu la in barrel a tui chu a taksa nen zawng zawng a kûn thla meuh in a thal a, a tlak luh ka hlau chu a kawr hmawr ah ka vuan ta ngawt.





"Awi..!" Hmai sen vek a tiin a rawn hawi chhuak a, a bucket ah lah chuan tui a chanve pawh a awm thleng lova, ka nuih a ti za ang reng.





"Khawi ka lo ti ang e, i ban pha hlawl lo a nih kha," nui suk a tiin a bucket ken lai chu ka lak sak a, "a ngai hleinem i kawr hak a var si," a ti na chung in a sir a ding turin ka hrilh a. A barrel a len loh nen a la thâl pha lo tho a nih hi.!





"I bal vek dawn a nih kha," a tih chuan bucket khat in tui ka chawi chhuak nawlh a, bucket a hun tlar țhap naah chuan ka chhung nghal thuai a, "khawi ka lo ti ang, i bal vek ang," ti a bucket rawn ban a tum chu.



"Thal pawh i thal phak loh kha, barrel chhungah i tla lut lo chauh alawm," ka ti a, a ner nâng mai.





"Ka lo ti ang, a khat ho kha inchhungah lo va khai lut rawh," ka ti zui leh a, pakhat ka thal chhuah leh lai pawh chuan a lo la ding reng.





"Bawihpui, kha tunge ni..? I bialpa em ni..?" Sir lam ațanga an rawn tih lauh lauh chuan min rawn melh zawk a, ka lo en ve reng bawk nen a hawisawn vat a, engtin nge a chhan ang tih ka ngaihtuah rauh rauh lai chuan.





"Ni nang nu Mațha, ka u a nih hi. Mass hmang turin an lo chho a," ti a chhang in a nui zui hak hak a. A chhanna chu ka duh loh a ring deuh nge ni țhen sak in min rawn en a, "a țawng duh teh ania," a rawn ti nghal sar sar.





"Ekhai Bawiha, tunge i pa le..?" Kan bulah rawn kal in a rawn ti a, ka sawi a a hria nge ni inchhung lam a pan nul nul bawk.





"Khai lut rawh," ka ti a, a khai luh chhung in bucket hnih ka lo chhung hman a, a rawn chhuah leh meuh chuan ka lo chhung khat zo lek lek tawh. Ka nau te ho in an rawn khai luh pui a reilotê ah chhun sa chu an khai zo ta vat bawk.





"Connection in nei lovem ni..?" Ka ti a, a biang a tai hlar a hah avangin a thlan a tla deuh hlap bawk.





"Nei tho e mahse pawn ami hi hman zawh hmasak kan duh țhin a, i kawr a bal vek a nih kha a zia lo hle mai.." ka kawr hmalam chu a rawn kâwk a, ka en thlak ve chuan a lo dum kawi niai mai.





"A pawi lo, a reh thei mai ang, lut rawh a tawp pahnih hi chu ka rawn khai ang," ka tih tak ah chuan a lut ve mai a, a pheikhawk kan lei sak kha ka nu in dawhthlak tur ni âwm taka siam sak a tum a, mass tuk a a hmel awmdan tur pawh ka hmu chak ang reng viau a ni.





A tukah mass chhang tur kan deng a, a nu ban a țhat loh avangin ka den pui a ka rin aiin thâ ala ngah zek lehnghal. Ka nu in den chhawk a tum pawh in a hnial tlat a, amah chauh pawn deng se chawhma ah a zo fel vek ang.





"I ti țhang a ni maw..?" Ka ti a, ka nau te chuan tluk lo han han tak an ni, den khat pawh an deng thiam lo. Keiin ka thiam bik tihna ni lovin, a tihdan min zirtir a keipawh in ka ti ve thei sawih sawih thei chauh.





"Ti țhang bik chuang lo, kum khat a vawihnih vel den chuan ngai ah neih a awl," a ti mai a, a che reng reng a chak in tuman engmah kan tih khalh hman lo a ni ber a, tihpui tura Kimkimi ka melh pawn awmzia a nei lo, a ti ngai lo bawk nen a din tlawn zum zût chhung pawh in a ti țeuh hman.





"Bawihpuii chu i fel hle mai," ka pa chuan a ti leh dût dût țhin a ka ngaih dan chiah pawh a ni. Chuan thil pakhat, a chawhmeh siam hi ka zawngchhang dawn tih ka chiang hle bawk. Kan cham chhung hian ka rihna a pun belh țeuh ngei pawh ka ring.





"Ka hmet ang a, pawn lam a thuk ah kan chhuang ang a a hmin vat mai ang, a sat laiin chini emaw kurtai nen in ei dawn nia a tui duh lutuk," a ti siam siam a, a deng vek a aman a hmet leh vek bawk a, hah avangin a hmai te phei chu a sen deuh ap ap tawh.





"Ka lo pui dawn che em ni..?" Ka va ti a, ngawi reng a lo țhut kha nuam ka ti miah lo bawk.





"Aw a pawi lo, hnah kha mei ah min lo hliau sak la," ti thâm chhal in hnah awmna chu a kâwk a, ka ban ve mai a chu a tihdan a pawh chu ka thiam leh chuang der lo.





"Engtin nge ka hliau dawn..?" Ka tih chuan hah tih hriat zeta thaw hak in hnah chu a rawn ban a, "khawi bawiha hetah lo keng rawh ka lo hrilh ang che," a nu in a rawn ti ta hlauh va. A tihdan te min hrilh in vawithum vel ka tih tak ah chuan hrilh ka ngai ta lo.





"Chuan tihtur dang te ala awm em..?" Tiin hnah chu dawhkanah ka chhawp sak hnur a, "pawn a bel lian deuh a fai sa kha min lo chawi luh sak leh mai," a ti leh, kan kal zel mai aniang chu, midang leng ka zui peih lova signal a chhe bawk nen awm mai mai chu a hneawm zawk tlat.





"Ka lo kilh dawn che em ni..?" A sam rawn uai thla chhen mai a kut a a hui sawn leh țhin ka hmuh chuan, a ning a nih ring in ka zawt a, "aw, min lo kilh sak mai ka bakilh kilh sa kha hmang mai rawh," nui hak in a ti a.





Dîm zet a a sam chu khawm sak in ka kilh beh sak vek a lawmthu a sawi zui ve sap. A chhumna tur thing a awm tam loh avangin thingkhawn ami ka lak pui a, an khua chu a phut nang in mass hman a nawm theih thu a sawi zui ve siam siam bawk.





A che a rang in tihtur awm ang ang a ti zung zung a, tlaiah lah rawngbawl pah in a nau te a bual fai vek bawk a. A nau ten an lo ko buai ve sek zel bawk nen leng tur te in a hrilh leh țhin, țhutthleng a țhu chung in a che vel chu ka lo thlir a ni ringawt, popcorn leh drinks awm phei se chuan movie en ang chiah chiah ka ni mai.





Zanah min inkhawm pui a, kan unau a kan țhu tlar țhap mai chu min rawn en leh țhin tih ka hria. Member an tam lova mikhual chu langsar tak kan ni, inkhawm banah pawh chibai tu kan ngah a, pi Ruali tu te tih in min hre bawk nen min lo dawng sawng țha hlawm takzet bawk.





Bawihpuii nghak in kan ding reng a, a tawp a tawp ah chuan mipa pakhat leh hmeichhe pakhat nen an rawn in zui chhuak a, a nui leh var var țhin. Nalh lam pawh a ngaihtuah lo niin ka hria, tuna a kawrlum hak leh a puan bih saw a in chawih eih lo, a lum lum a thlang ni maiin a lang.





"Lawk aw, ka lo kal leh ang," a țhiante bula a ti ri chu ka hria a, kan lam pan a a lo kal chu ka en reng bawk. Thli thaw in a sam a chhem leng a, vawiina a chet nasat teh lul nen a mitmeng ah chuan chau hmel pawh a lang chhuak eih lo bawk.





"Lo va haw ula, haw kawng in hria ang em..?" Kan pathum chuan min enkual a.





"Eng nge i tih dawn..?" Ka lo ti deuh sup.





"Zaikhawm naah ka kal dawn a," a tih lai mek chuan, "i țhiante ho nen chauh sawn maw..?" Ka lo tih khalh a, a nui hak a ka nau te ho pawh an bang bik lo.





"Ni nang, krismas zaikhawm hi biakin thlang lawk a inah a thleng alawm, lo kal ve ula a nuam thei lutuk asin," a ti zui zat, ala nui reng a ka thusawi ah khan eng chu nge maw nuihzatthlak awm ni.





"Kei chu ka peih lo e ka haw duh," Kimkimi'n a rawn ti a, Bawihpuii'n a sawm luih ngial pawh in a duh lo.!





"A nih chuan lo va haw ula zaikhawm naah chuan ka zu kal ve ang, ka nu te in lo hrilh mai dawn nia," tiin Car chahbi ka pe a, sawi nawn ngai lovin biakin gate lam pan in an tlan zui nghal nal nal.





"A nih chuan kal ila," a rawn tih chuan ka bu nghut a. Kan rual in a kal a, amah chauh a rawn haw nan chuan a kawng a thui ve hret a, an khua mah nise tu mipa pawn harhfim lovin an lo be buai thei, ka nau a nihna ang in ka sawi a nih chu.





A țhiante chu min in hmelhriat tir a, an hming pawh ka hre zawm lem lo. Zaikhawmna hmun kan thlen chuan ka tih țhat thu sawiin min lo chibai nak nak hlawm a, khawpui lam nen ka tehkhin lo thei lo.





An hawihhawm chu thuhran, khawpui ah chuan inkhawm aiin leng kan tam zawk a, thlasik khaw vawt ah pawh in lum aiin pawn khaw vawt tuar kan thlang zawk bawk, khaw vawt tuar thei lo tam tak pawh kâwn chei fan tum a chhuak an tam tho, helai nen chuan danglam tak a ni.





Hetah erawh Biakinah leh zaikhawmna ah țhalai hmel hmuh tur a tam zawk a, an hawihhawm in an mipa te pawn min be bawrh bawrh a, an titi lah nise khu lam a titi ang, nula leh zu leh thildang ni lovin vawk chanchin te, ram vah leh ram chanchin te, meihawl chanchin te pawh a ni vel vek ang.





Nula pawh an bang chuang lo, an incheina lah nise zanin a ka hmuh danah a nalh ai chuan a lum an thlang tih a hriat a, ka thil hmuh leh keini in a kan lo hman tawh dan ka tehkhin lo thei lo chu a ni e.





Zanin chauh ka la inkhawm nang in tehkhin tur leh hriat belh tur ka ngah a, khu lam a țhalai in ti changkang na zawng leh hausa, nei si ai chuan an nun hi a awhawm zawk dawn mah in ka hre bawk.





"A hreawm i ti em..?" Thingpui min rawn pek pah in ka bulah a rawn țhu thla a, "ti love, an fel hlawm khawp mai," ka ti ve sup bawk.





"Saw lai a guitar khawih mek saw, Aizawl a college pakhat ah a thawk ve a i hria em..?" A tih chuan chupa chu ka melh vang vang a, "hre chiah lo, ka hmuh hnu chu a ang tho mai," ka ti a.





"A ni chuan a hria che a, mahse i hriat ve a ring lo aniang a be ngam lo che a," a nui hak hak a, a hlim hmel nung sarh mai hi hmuh a nuam țhin takzet.





"Zanin chu hla hril ta che," pa upa ve tawh lam hi a rawn țhu a, Bawihpuii erawh nui hak hak in lu a thing a, "ka hril thiam lo lutuk pa Zamte, saw Nunui te pawh an awm alawm," a ti a.





Chu pa lah chuan, "khawhar inah pawh i hril țhin a ka hria alawm," a ti teh tlat.





"Zanin chu Nunui te ho sawn hril se duh leh zandangah kan ti zawk dawn em ni ang..? Hei ka u hi, a vawikhatna a ni sia țhutpui loh chuan ala tlangnel si lo nen," a ti a, chhuanlam atana min hmang chuan a eng emaw ti kawng zawng tak in ka nuih a ti za reuh phian mai.





"A nih chuan zan dangah lo in ring la aw," tiin a tho zui thurh a. Hla a hril țhin em tih ka zawh zui zat chu a chang chang a a hril ve țhin thu min hrilh a, thiam loh pawh hi a nei lo a ang dawn dawn mai.





Zai an țan a, "saw lamah lo țhu ve la," mipa pakhat in a rawn tih chuan Bawihpuii ka melh zawk a, nui var var a kal tura min mitmei tak zeuh zeuh ah chuan tho chhuak in ka țhu phei ve a, amah nen pawh a kar hla mahse kan in hmachhawn ran mai.





A kutzungpui a rawn tih pir vah chuan ka nui suk a, mipa pakhat in a rawn bia a tho vat a thingpui bel a ban takah chuan ka hawisawn a, "guitar i perh thiam em..?" Ka bula țhu in a rawn tih chuan ka bu deuh nghut.





"Lo perh la, ka va zung lawk ang e," tiin min hlan a, ka lo ban ve mai bawk. A ki te siam rem zung zung in an hla sak chu ka thiam ve zawng a nih avangin ka tum rem ve maithei a, hla hi ka thiam em em lo bawk nen ka hre zul ringawt a, Kristian Hlabu a hla te hi zêp loh chuan hre zul siin thiam chhuah ka nei pawh in ka hre lo.





Dar 10 pelh ah kan bang a, in lam pan in ngawi reng in kan in zui phei hnak hnak bawk.





"Naktukah i inkhawm dawn em..?" Ngawih reng ai ah tiin ka zawt a, engtin emaw boruak hi a zângkhai rual rual in a kal lai ka en apianga min delh rit tu awm erawh hi chu ka hrethiam lo viau thung.





"Khawm lovang, ka thingpui lum hun ania," a ti a, "chu kawr thar pawh i ha ve hman dawn lo a ni maw..?" Ka ti zui zat, a nui hak a, "mass velah hi chuan kawr thar pawh nei ila la ha ve hman ngai lo, ruai ni ah lah ka fatu daih zel bawk sia," a ti ve niap niap a, a nih chuan a pheikhawk thar kha a bun hman dawn lo chu a ni phawt.





"Tinge i va buai bik ve..?" Ka ti leh sup a, kûn ngal in kawng laiah a kal bawk nen motor rawn tlan ah chuan a ban bulah dawm in ka sir lamah ka pawt phei a, ala petek nawk nawk zui ta lehnghal.





"Nula hi kan awm vak lova, pung leh chuang tur kan awm lo bawk nen kan ko ah a tla ve a, ti lo bik nih kha chu a nuam lo," a ti a, a vawt a ti nge ni a kawrlum iptê a zen a a kal kun deuh ngur reng mai.





"Eng nge kan khua chu ang i tih..?" Rei fe kan ngawih hnuah dâk vah a min rawn en in a ti zui sap a, kan ding a, thla êng hnuai a a nui chu engtin emaw ni tak hian hmelțhatna riau a nei.





"A nuam, a phut deuh tih mai loh chu," kal ta mai lo chuan thle deuh hâ in a nui hak a, ka in rin hma in a biang puar ve pâk chu ka va khawih a, a lo vawt var bawk nen zah zelah, "thil a kai a," ka ti ta ringawt. A bu nghat a.





"Nakinah an metal hunah in rawn zin leh dawn nia, a phut lai tak laih zawhna pawh a rei loh laiin in rawn kal a," a ti dam thlap a, thla êng hnuaiah chiang fak in ka hmu thei lo nâ a chu a țawng zawng a a hmui che niap niap chu hmuhnawm ka ti tlat.





Kan kal leh a, eng emaw sawi zui siam siam in krismas tlai a len na tur te min hrilh a, min len pui tura ka sawm lah chu ka sawi zawh rual in a peih loh thu in min chhang nghal a, ka nui ta ringawt.





In kan thleng a, puitling ho chauh an lo meng tawh a naupang erawh an mu vek tawh thung, tap mei hual in kan țhu țhap a. Bawihpuii nu in a nau te dawhthlak tur la chhuak tura a tih chuan polythene khat țun hi a rawn khai phei a, a nau te ta tur ni âwm tak chu a dah hrang nghal thliah thliah bawk.





"Bawihpui i la dawh thla ve ngai em..?" Ka nu in a tih chuan a nui hak hak.





"Nikum thleng kha chuan ka la dawhthla a, tun kum chu ka dawhthla tawh lovang," a nui zui sen sen a, a zak nge ni a sen tan tan bawk.





"Nula ve uaih tawh si hi dawhthlak a ngen ve ziah a," a pa in a rawn ti zui hlut.





"Eng nge i dawhthlak țhin a..?" Ka zawh chuan sen ap ap a rawn hawi chhuak in min rawn en a, "eitur a ni mai, ka pa ten min lei a, ka in dah sak a chu chu a ni mai," a ti zui sap.





Ka nu a tho chhuak zui hluai a, "a nih chuan heihi lo en teh, i hak tawk ka ring a ka lo leisak che a han ha chhin la," ti a kawr pakhat a rawn lek chhuahna lam chu a hawi vat a, ka nu kawr leisak ni ngei tur a dum rawng a hmuh chuan a nui nghal hak a.





"Lo ha chhin rawh," ka nu in a tih chuan, "a ngai lo asin, engatinge hetiang te in rawn tih duh a..?" Ti hliai in a pan phei a, kawr chu a âwm ah hmeh bel a ka nu en rân in lawmthu a sawi a, ka pa bulah pawh a sawi bawk.





"Avan mawi em em ve..! A mawi lutuk ringawt," hlim tih hriat zet hian a ti leh hliai a, a hlim hmel chuan min nuih tir ve suk mai. A lawm tih hai rual a ni lo, a pheikhawk nalh tih em em mai naktuk zinga a hmuh leh hunah ngat phei chuan engtiang tak in lawm ang maw..?






Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)