MANAGER MAMUANA Ch-32 by Ziki_nu

[Ziki_nu]

MANAGER MAMUANA

By Ziki nu



Chapter-32


"Awi thil thar ka nei ania Mary, Pekhlu thil thar ka nei" tiin Engtheii a rawn au lut rawng rawng a, bual in ah Bawihtei ka bualfai mek a, ka chhang buai peih rih lo.



Ka pi bulah Vli awmna a zawt ri te chu ka hre reng a, ngaihtuahna a Kal thui nghal lutuk thin hi ka hne ngawih ngawih.



"Sangbawihi chu a inbual a ni maw" tih pahin bual in kawngkhar chu a rawn nem kau deuh a, "Engnge I thil thar chu?" ka tih chuan "Nakinah" a ti leh daih lawi a, a rawn au rin pui tehreng nen.




"Tinge Vli chu a Haw thut a?" a ti a, chhan vak ngaihna ka hriat loh avangin "School a la Kal ve lawm" ka ti ringawt a, kan boruak a hre vek a, min zawt zui lo.



"Vawiin chu in va bang hma awm ve, vawk chaw ka la a, ka chau lutuk" tih pahin Bawihtei chu ka hru hul mawlh mawlh a, "Khumah a hak tur ka dah kha lo va in buaipui teh u, chaw chhum a hun tawh" tiin ka hmehbel chawt chawt a, "Anu chuan a dimlo hle mai che" ti nang nangin pindanah an in luh pui a, a bei rei leh viau ang.



Chaw chhum ka siam sawk sawk a, gas a ka chhuan kai rualin Bawihtei rak tuar ri ka hre zui nghal a, Lalmuankimi nen hi chuan an in ti tap ngei ngei zel, ka ning ania.

Ngaihven duhlo luiin eirawng ka bawl zawm nghal a, ka pi lah vawk buaiin a la buai a, lak hran an hun dawn tawh hlawm avangin rawn en Tu an awm neuh neuh reng a, ka pi pawh a phur tawh khawp mai.
Ka putea te nupa chuan vawk note chungchang engmah an sawi ri tawh ngai lo va, sawi ri ngam tur pawh an nilo.

Vawiin khan U Mamuana hmelhriattu khan min phur haw ta kha a ni a, bank awmna lam min zawh khan ka kawhhmuh ringawt a, U Mamuana nen kan la in be leh bawk silo, chanchin ka la hre zuilo reng reng.



Ka ngaihtuah lai tak in U Mamuana hnen atang call ka dawng a, ka chhang phur khawp mai.



Ka kut huh chu ka kekawra hru sul sawk sawkin ka chhang vat a, "I buai em?" a rawn ti nghal ringawt chu mak ka ti deuh.


"Buai lem lo, ti ila eirawng ka bawl a" ka tih chuan "Tunge Bawihtei awm?" a rawn ti leh a, "Engtheii a lo leng a, an in ti tap mek" ka tih chuan "Zanah ka lo leng hman dawn lo va, hei ka thianpa a rawn kal a" a lo ti thum leh dut a, "Vawiina ka hmuh kha em mawni le" tia ka phun sap chu "Engtin maw?" a rawn ti vat a, "A... Engmah, I lo len hman loh pawn a pawi hleinem" ka ti a, ka bah deuh niai mai.



Kan in biak zawhah pindan atangin Bawihtei te chu an rawn in pawm chhuak a, Lalmuankimi hi chuan ka sawi angin thil a ti ngailo reng reng, "Khumah a hak tur ka dah sa ka tih kha" ka lo ti vak a, henu hian ka sawi loh hlir alawm a lo hak tir leh tawh.


"Hei hi a birthday a kan pek kha ania, a mawi alawm" kei aia vin mah hian a lo ti a, "A mawi vang tak chuan awm hmuna hak tir ka phal hleinem, va thlak leh rawh" ka tih laiin kawmchar atang ka pi a rawn lut a, "E.. Muani I lo kal hlauh chu a va tihzia e aw,,, vawk ek khawro ip a ka thun khah sa saw kawtzawl lamah hian min rawn dah phei sak teh" a lo ti nghal zat a, "Awi ka pi chu I ti mak thei e, thuamhnaw fai nen ka lo kal hi, I tunu hi tir ve mai rawh" pakhat chuan a lo ti hlar mai.


"Ei rawng a bawl hi, naute kha dah la rawn la vat mai teh" ka pi chuan a ti leh hmak a, keimah ah chauh pawh ni lovin ka thiante ah pawh hian a in ti thu thei ania aw,, a theihna apiangah chuan min tirh a tum.


"Thuamhnaw fai ka ha ka tih chu, vawk ek khawro rim nam huama haw ka duh hleinem" ka thiannu chuan a la ti talh a, "A khawro ni na na na a rim a na tawhlo, rawn la rawh a dahna tur ka lo va siam rem ang" tiin ka pi chu a chhuak nghal daih a, Bawihtei chu chhuatah dahin "Ka ning eee i pi hi chu, min hmuh tawh chuan min tirh ngei ngei a tum" a ti hlak hlak a, kawmchar lamah chuan a chhuak zui ta tho.



Ka chawhmeh chan lai ka chan zawh rual chuan Judy a rawn lut leh hlawl a, pawisa puk min dil atang khan damdawi in kawng chiah kha kan la inhmu leh a, kan boruakin a zir ta lo bawk nen han inbiak leh na khua pawh a kaw ta lova.




Sil hmuna ka awm lai anih avangin min lo nghak lawk tur in ka ti a, Engtheii'n a rawn hmuh chuan a ngaihdan a nilo khawp ang, school kan kal ho lai atang khan an inmil ngailo hrim hrim a, an in rel tawn reng mai a ni.



Ka thil tih lai ka tihfel zawhah a bulah chuan ka thu ve a, "Engnge I rawn kal ve teh mial a" tia ka zawh chuan "A hmaa ka lo kal chhan kha" a ti zawi deuh sap a, thaw chhuak hapin "Nangmah lo chu han dil ngam ka nei thlawt lo a ni, thian mumal ka nei lova, ka chhungte ka dil ngam bawk silo, tunah phei chuan Nu Zuali nen kan inti thiamlo leh nghal a, nimin leh vawiin chu dawr ah ka kal tawhlo" a ti deuh duah a,
"Tinge in in tihthiam loh a?" ka tih chuan a sawi hreh deuh nge min chhang lawk lova, kawmchar lam atang Engtheii'n ka pi vawk ek dahna ip chu a rawn khai lut tuah tuah a, "Min rawn pui vat teh Mary" a tih tak hlak ah chuan tho vatin ka zawn pui ve nghal a, Ka pi sawina hmuna kan dah thlap hnu chuan "Engnge Judy khan a rawn tih?" a ti nghal zat reng a, ka rin dan chiah a ni.





"Ka hrelo, a pawimawh ve deuh aniang a thutak lutuk" ka ti dek dek chu "Ring hlek suh" min ti nghal ringawt a, "Dawt sawi thiam award sem dawn se dawng hmasa ber tur anih saw, I rin vaih chuan ka sawisa hrep ang che" min ti zek a, "Tun tum chu a thutak ve tak tak alawm, a hma pawn a lo kal tawh a" ka tih chuan "Engnge a sawi?" a ti a, min din hnaih tawh lutuk ringawt.




"Pawisa te.. " ka tih chuan ka sawi zawh hma chu a nui chhuak hawk a, a nuih zat loh zia chu ngeiawm tak a ni.

"I tih tihin ti teh, mahse hre reng rawh, mi rinawmlo chhungkua an nih saw" a ti a, In chhunga a lut chu ka zui lut ve nghal a, Judy chu melh hrek hrekin dawhkana a phone chu a la a,
"Ka Haw dawn lehkha zir ka ngai, ka thil thar pawh kha ka sawi leh peih rihlo" tih pahin a chhuak leh nghal hmak a, ka nuih a ti za zawk.



"Ka pi'n a tir a, a lungawi lo anih kha" tih pahin Judy bulah chuan ka thu thla leh a, za lo deuha lo nui sakin a bu nghat ringawt.


"Engnge Nu Zuali nena in buaina chu?" tiin ka zawt tha leh a, "A.. Ka lo che fel vaklo aniang, mi bula min lo sawi dan hi ka hre ve leh zel sia, kan inleng tlangval ho bulah min lo rel thin a ni awm e, ka lungawi lo in ka û bulah ka hrilh a, Nu Zuali nen an lo in hau hrep a, ka tan han kal zawm zel pawh a nuam tawhlo, ka û lah chuan 'thawk tawh suh' a ti ringawt a, lehkha ka zir tawh lova, hnathawk lova awm mai mai ka duh bik bawk silo, zu man min lo dil ve sek hlawm bawk si, ka tal buai anih ber hi" a ti melh melh a, ka ngaihbel nge a mittui te chu tling pamin ka hria, ka khawngaih a, han tih vak ngaihna ka hre bawk si lo.


Ka pi rawn lut chuan vawk ek kan dahna a rawn sawisel lut leh tawh a, "I sawi na ah thlap kan dah kha" ka tih chuan rum deuha min melh pahin "Ka duh thu a la sam lo, Lalmuankimi zawmthawt lutuk vang vek ania, a rawn kal leh hunah ka barh hrep ang, I hman hunah va hûng tha ang che" min ti a, ka pi hi chuan ka thiante awm lai pawhin min hau hreh lo reng reng.



"Engtinnge kan tih ang, pawisa ka nei bik miah silo a" zawite hian ka ti sap a, a thaw deuh halh te chu hrehawm ka lo ti ve ringawt a, Engtheii sawi kha hre reng mah ila ka khawngaih loh phah lo, an rinawm lo tih chu ka hrechiang a, hman atanga chhungkaw awmho leh rinawm lo tia hriatlar an ni. Mahse keichu min rul dawnlo tih hre reng mah ila ka khawngaih zel a, ka duhlo ngawt mai.



"Ba hi rul fel ila chuan Aizawl lamah hna dang nghet zawk thawh tur zawnga kal ve te ka rilruk a, mahse leiba nei reng chung chuan khawimah ka kal thei lo, ka chhungte an lo dil emaw a nia nga, a buaithlak" a ti deuh hlak a, a thut ve reng si avangin pindanah ka luh San a, ka pawisa neih ang ang chu hai khawmin cheng 350 zawng ka hai chhuak thei a,
"Hei zawng hi ka nei a, a daih lo viau anih pawhin I neih ang ang pe phawt la, I rul zo vat mai ang" tih pahin a kutah ka pe a, "Min rulh a ngailo ania, tikhan lo va hmang phawt la, tha deuha nun tum tawh rawh, zu hian eng rahtha mah a chhuahlo ania" ka ti ve a, phut let neia ka pek chuan hrehawm ka ti mai mai dawn a, chuvangin engmah phut let nei lovin ka tanpui ah ka ngai a, ka hahdam zawk ang.



Judy Haw hnuah Bawihtei chaw tur ka siam zui nghal a, ka pu a nawm loh zual avangin a rawn tho chhuak peihlo bawk nen khumah a chaw ei tur ka chhawp sak bawk a, ka pi a che chau thin si a, indaih loh a na ve thin lutuk hi a chang chuan pasal neih san chu ka hreh thar leh hle thin.



Zanriah kan ei kham fel meuh chuan dar 7 a lo hnai kuar tawh a, ka pute chu ka pi nen towel huhin an in zût fai a, pindan ah an in vin leh hlak hlak tawh mai.



Ka pu'n "Aiah, aiah" a tih tuar tuar laiin ka pi chuan nem lo fe hian "I nep lutuk lo 'aiah' tuar tuar suh ka zo tep" a lo ti hlak a, "A na alawm maw" a tih pawhin "Lo tuar ve la, I che zuk zuk reng a, a nat loh ten" an in ti a, in vin reng chung hian an in duatin an in ngai a, an thawm hi chuan nuih a ti za thei ania aw...



U Mamuana nen pawh mumal in kan la inbe leh lova, a thianpa a sawi kha vawiin lama min phur haw Tu kha a nih ka ring nghet nghal hmak bawk.



U Mamuana ka ngaihtuah laiin U Mami'n min lo call zawk hlauh a, ka thinphu a sak leh nghal talh mai.


"Hello" ka tih chuan "I dam maw Mary" a rawn ti dam thlap a, "Umm i dam zawk em?" ka ti ve sap a, ka zam em em reng hi ka duhlo ngawt mai.


"Kan tha e, Mamuana nen in inbe tawh em?" a tih chuan "Aw bia ti ila, han sawi dun vak ngaihna kan hre bik lo a, FIR te kan sawi tawh" ka tih chuan "Aw, kha kha ania lo sawi ka tum tak chu, I putea a ni a, I laka a chetdan zawng zawng hre Tu tan chuan a huatthlala takzet, mahse I pi leh pute tan a na dawn lutuk a" a ti malh malh a, ngawi rengin ka lo ngaithla tawp.




"Nangman tha deuhin vawi khat chu I putea pawh han be leh la, helamah ka nu leh pate a hmin hneh ropui bawk si, hma kan la vat anih loh chuan Mamuana nen in inkar in a tuar phah ngei ngei dawn" a tih leh lai chuan "Ka pi bulah chuan ka sawi tawh tho a, a tul anih chuan FIR theh luh pawh pawi an tilo, mahse putea emaw, Nu Ruati zawk pawh biak ka lo tum leh hrim hrim anga, kan boruak azirin ka rawn be leh dawn che nia" ka tih hnu ah Sangbawihi chanchin min zawt leh a, kan in be rei hrep mai.





Ka pi in kan inbiak zawh chuan "Tunge?" a lo ti vat a, putea te chanchin kan sawi tawh hi chuan a lo ngaihven ve thuai thuai zel.



"U Mami ania, U Mamuana u kha, FIR vel bawk kha a lo sawi a, mahse chumi hma chuan putea te lam vawi khat tal lo biak leh phawt a, boruak azira FIR thehluh mai chu a pawi tawhlo ang" ka tih chuan a bu ve nghauh nghauh a, engmah sawi lo mahse an ngiahtuah thui ve viau chuan ka ring thin.




Dar 8 a ri dawn chauh a, U Mamuana message chu chhiar in Bawihtei ka awi mu pah a, *Reubena a lo zin a, ka thianpa, zanin chu min hrethiam mai rawh aw* tih a ni a, *Aw hrethiam e, ka putea te biak ka tum a* tia ka thawn let chu *Chanchin ka lo ngaichang ang, min lo hrilh ve dawn nia* a lo ti vat a...




Ka phone ah chuan pute Hmingmawia hming chu ka hmetchhuak a, call ka tum ngial na in ka be peih hlawllo chuan Nu Ruati zawk ka call ta nge nge a.





Rei ang reng deuh ka nghah hnu ah "Hello" a rawn ti chang deuh bawl a, "Putea awm em?" ka tih chuan "I be duh mi?" a lo ti leh tawp a, "In pahniha biak cheu ka duh a, chumi hma in engkim I hre ve vek tawh tiraw" ka ti hmasa leh te te a, a ngawih reng avang chuan hrethiam in,
"I hriat tawh tho chuan a that chu, putea chu ko la, speaker ah dah bawk la, thil hrilh tur cheu ka nei" ka tih chuan a ri deuh rak rak a, speaker ah a dah ta a ni ang, "Sawi tawh rawh" a ti leh ringawt a .


Thawk la vakin, "U Mamuana chhungte bulah engthu chiah nge I sawi?" ka ti a, ka in petruh nasa viau mai.

Putea nui ri chu ka hre vuai vuai a, a hmel landan tur zawng zawng nena ka mitthla rual chuan ka in hum ruh ngawt ngawt a, ka haw lutuk a ni tawp mai.



"I chan a chhe hle tih ka hrilh tawh che a, I chungchang an hriat dan a pawinawh berlo" a tih chuan nui lui ve hakin "Ka tlawm mai mai bik I ring em ni a? I thlen chin chin ka thleng ngam,zanina kan inbiakna hi a tawp nan a ti ka ni, I tihsual hi I theih chin chin I siam tha dawn nge, FIR ka theh lut dawn" ka tih khum ve sak a, a reh zui vang vang hnu ah ngeiawm deuh bawk hian a rawn lui leh a!




"In hnukdawk leh mai mai turin hei chen hi ka thlen pui bik hleinem, ka thu I awih lova, I duh duh ti la, ka hlau lo ve" a ti chiah chu ka thaw chhuak hrawih a, ka lungphu su dup dup chu ka kawr chhanah dawm hnanin "Hei hi I cho chhuah a ni, I suahsual lutuk avanga I nupui leh I fanu ten an tuar ve tur hi pawi ka ti, mahse a tawp thleng ka tang ang, jail bang chu ka zût tir khawp ang che" tiin phone chu ka dah zui a, ka thaw chhuak hawk hawk a, ka tah pawh a chhuak tawhlo, ka thin rim lutuk ka puakkeh lo chauh anih ber hi.




Ka pi te hnena chanchin ka sawi hma in U Mamuana message ka thawn hmasa a, a lo ngaichang ve tak tak a ni ang a seen hma emai.


Min reply lovin rei vak lovah call a rawn lut nghal a, pawnah tlanchhuakin kawtzawla ka thut fel hnuah ka chhang ta chauh.




"FIR theh luh mai a ngai dawn anih hi" ka tih chuan "Kan pu Hmingmawia chu a luhlul viau a ni maw?" a lo ti sup a, "Mihring pawh a ni lovang" ka lo ti hlak thung.



"Umm hahdam la, tiang kan thleng ta ro ro, chhel taka kan awm a ngai, U Mami ka lo bia anga, ani'n hmelhriat tha te a be kual anga, nangmahni tan rilru hahna tur a awm lovang" a ti sup sup a, "Reubena hian a hmu ve chak che a" a rawn tih zawm daih chu ka lo nuih hak a, "Khawi lama I thianpa nge?" ka tih chuan a la sawi tha duh chiahlo, naktuk ah tlangah kan leng ho dawn nia, a haw leh vat a ngai dawn a, I pi lo dil lawk rawh" a rawn ti ve thlap a, kan inbiak zawh hnu chuan dar pawh a lo kal leh duai tawh.


Tunah chuan heng thil zawng zawng hi bo vek tawh se ka duh a, a tawp thleng ka tang tlang anga, thiam lohna ka neih miau loh avangin hlauh ka tum tawh biklo, hrem ngai chu an hrem mai turah ka ngai a, midang rilru tur ka ngaihtuah tel chhung chuan engmah ka ti thei dawnlo, chuvangin misual chuan a sual man tel se la, rem taka awm ho dial dial ka duh tawh.









End oh chapter-32