Politician nupui

[Cck Lalchhuanawmi]

Politician Nupui Hring nun
Political Love Story
Chapter-5
Ziaktu: Cck Lalchhuanawmi


School ka thleng a, taxi din rual rualin ka tlan chhuak.


Break lai a nih loh avangin classroom aṭang chauhin thawm a awm. Ka hawi kual a, Manoi leh Siamtea te awm reng hmuh ka nei lo.


"Min lo hre thiam lawk, pawisa", ni dawn tak e.


"Min ngaithiam rawh, eng zah tur nge ni?", taxi chuan(chuang) man kan inpek fel hnuah, Office-ah ka kal.


Zirtirtu ka hmuh hmasak ber hnenah Siamtea leh Freddy-a an chhuah leh chhuah loh ka zawt a, an chhuak lo hlauh.


Siamtea leh Freddy-a te Class Teacher ka hmuh bakah, Principal ka hmu tel.


"Keimah ngeiin ka lo hruai a nih loh chuan lo kal tir tawh suh u", tih ka sawi zing ber.


Principal nei phei chuan kan inhnial titih, "En teh, an Nu i ni a, ka hre thiam. Pakhat pawh kha an nu a ni tho a, chuti ringawtin kan dang thei lo", Principal-in min ti zêk.


"A ni maw? Chutiang chuan lo ni se, School Hour a zawh.hmaa hruai chhuak loin a duh phawt chuan kan inah a lo kal thei. School Hour laia hruai chhuah an nih chuan attendance-ah an tlakhniam phah ang a, tin; duh angin zirtirna an dawng thei dawn lo.


School Hour laia hruai chhuah i phal ṭhin avangin an zirlaiah an mamawh ang hmu loa an fail chuan, kei min dem thei lo ang.


An Nu ka ni a, thihna a thleng te a nih ngawt loh chuan ka fa te hi School Hour laia hruai chhuah ka phal lo bur.


Tin, a hruai chhuak theitu pawh kei mah chauh. Ka hmel hi chhinchhiah kar rawh, mi tu pawhin an Nu anga insawia hruai chhuah tum tu apiang lo hnar zel ang che.


Chutiang ni lo a i lo hruai chhuah tir a, ka fa te chunga thil.pawi tak a thleng a nih vaih zawngin, Fa te tana Nu inpekna leh inhuamna i hmachhawn a ṭul khawp ang".


Ka phone a ri, Hriati a ni a.


Off-in, Principal hnenah, "Sir, i zirlai Siamtea leh Freddy-a te Nu ka ni a, kei lo Nu dang an nei lo. An Nu anga insawi hnena i lo kal tir tih ka hriat leh chuan, ka ngawi mai mai tawh lo ang. Hun min pek avangin ka lawm e", Office aṭangin ka chhuak nal nal.


Lehkha ka lo zirna hmun a ni a, Hostel-ah awm ṭhinin, ka kal laia kan Zirtirtu ṭhenkhat te chu an upa hlawm tawh a, a ṭhen an pension tawh.


Hetiang zâwnga ka hmachhawn a ngai mai hi pawi ka tiin, inthlahrunawm duh khawp mai.


Siamtea te chu an Classroom pawn aṭangin ka thlir.


Ka lo chik ngai lo a, a dâng bel nia mawle! A cher riauin ka hre bawk. Rilru nuam lo leh hah takin a awm dawn a, ka hre thiam lutuk.


Freddy-a pawh an Classroom pawn aṭangin ka thlir. Ani hi chu a sen suah mai ni.


Hriati ka call lêt, "Au Chhuanpui, nu pakhat a lo lêng a, i ṭhiannu angin a insawi a, Lal Fanu pawhin a hria",


"Tu nge ni?", ka tih zawh rualin rilruah Manoi a lang nghal.


Ani chu a ni thei lo ang.


Hriatin, "KFC lei turin a chhuahpui asin, ka lo call che khan hrilh che ka tum a, min chhâng si lo a", a ti chu, "Ngati nge i chhuah tir?", School hmaah ka la ding a, a auin ka au.


"An chhuahna a rei tawh em?",


"Rei lo, tun lâwk khan",


"A hming a sawi em?", taxi phar din tur an awm loh avangin Two wheeler taxi ka phar ding tawp.


Hriatin, "Zothangmawii a inti", a rawn ti zawi sep.


Lal Fanu chungah eng pawi mah ka thlen tir lo ang. Thil pawi a thlen tir a nih chuan aw...


KFC dawrah tlan lut pawpin, Lal Fanu ka zawng ruai.


Hawi kual nasa min ti deuh a ni ang, Waitress hian, "Ka pi, he lamah hian ṭhutna awl a awm asin", min lo ti.


"Ni lo, mi zawn ka nei a. Hmeichhe naupang leh nu pakhat lo kal an awm em?",


"Hmeichhe naupang leh nu chu an lo kal fo, tu ber nge i tih?", a hre lo chiang bal a ni e.


An haw tawh nge, Dawr hi an lo pan mek zawk ni ang?


Dawr lo pan an nih chuan ka thlen khalh thei lo. Hmun dangah a hruai zawk nge? A hruai bo tur a ni lo.


Zawnna tur melh kual ralh ralh laiin Hriatin min lo call, "Au Chhuanpui, Lal Fanu te an lo thleng chiah".


Taxi driver hnenah tlan chak turin ka hrilh chhen.


Chuan man pein, pawisa kir hun nghak thei tawh loin Dawr chhungah ka tlan lut.


Lal Fanuin min hmuh ve leh, "Anu", min ko a. Tlan pheiin ka pawm vawng vawng. Manoin Siamtea a vua tih ka hriat avangin Lal Fanu taksa ka en kual.


KFC ka hmuh chuan Lal.Fanu nghatin, KFC chu bawlhhlawh bawmah ka paih. Ka order nghal zat bawk.


Lal Fanu hnenah, "Khawiah nge in kal?", ka ti a.


An kalna pawh sawi thiam loin, "Saw tah, KFC kan lei", a nawi mai mai. Lal Fanu hi chuanin a hringtunu a ni tih hre lo se ka duh.


KFC a rawn thleng a, Hriati hnenah phone aṭanga ka ânkhum avangin hriatthiamna ka dil.


"A pawi lo, i phal lo tih hria ila chu ka hruaitir miah lo ang. I ṭhiannu angin a insawi si a",


"Ni e, ka ṭhiannu pawh nise tu kut maha kalsan hi ka duh lo. Hmanhmawh taka School-a kal a ngaih thut avangin i kuta dah mai chauh ka ni",


"Ka hre thiam e, pawi ka ti lutuk", ka thaw hap.


Hriati thiam loh a ni lo a, hmanhmawh hle pawh ni ila, Lal Fanu kal san tur ka ni lo.


Sammy hrilh ve ngai a ngai dawn a nih hmel e.


Hrilh ta ila, min thinrim khum zawk ang em aw? Min tibuai mang e Manoi chuan. Siamtea leh Freddy-a a hruai leh hruai loh en tura ka kal ringin, Lal Fanu a hruai chhuah theih nan Dawr kawtah min chang reng tihna a ni thei mai em?



Lal Fanu hruai tel ve ila chu, a hruai thei kher lo ang a.


Manoi nena hmaichhana inbiak kan ngai a ni e. Vawiinah chuan call ta lo ang ila, a chhan chu min zuam palh ang.


A duh huna a tihmangan theih a, a duhna lam lama min tirhkual theihah te min ngai ringawt ang e.


Vawiin chauh hlauthawng leh mangangin min siam tawh ang a, a tawpna a ni chiang bal tawh dawn.


Sammy-a rawn hawin a inthlakna dah chhuak pahin, "Manoi a lo kal a", a banreka kamis kawrkilh phelh lai a ni a, tawp meuhin che chang loin a thle bak a, min thlêk vung vung.


"Siamtea leh Freddy-a School aṭanga a hruai tur thu phone aṭangin min rawn hrilh a, ka hmanhmawh em avangin Hriat bulah Lal Fanu dahin School-ah ka kal thuai. A tum tak erawh, Lal Fanu chhuah pui a lo ni a, School-a ka awm laiin a lo chhuahpui",


"Engtin zel?", ka chungah a thinrimin ka hria.


"Hmaichhanin inbe lo mah ila, number thar hmangin chuta aṭangin min rawn bia a, vawiin chu min tihlau hle a ni. A tawpna erawh a ni tawh ang", sawi chhawn hian thinrimna a thar.


Hetianga awm lo hian ṭha takin a sawi fel theih.


Siamtea te unau a hmu duh a nih chuan mi dawihzep ang maia a ruka thilti kual loin, huai takin lo lang mai rawh se.


Chuta karah, Siamtea a han vaw(vua) kher kher phei hi chuan min tingaina thei lo.


Sammy.chu han thaw hrawkin, "Number thar a hman avang a nih dawn chu ka biak tlang theih loh. Number thar chu min lo pe teh".


Hnial emaw phal loh emaw chi a nih loh avangin ka pe a, a number chu ka save hnuhnawh.


Siamtea bulah Lal Fanuin mut a ngen leh tlat a, Sammy-a a thlêm takngial pawhin a duh lo.


"Papa, khum ka duh ve e, Elsa khum ni se, Frozen tam tâwk ka duh", nui sen senin a pa a hrilh.


Manoin a hruai chhuah chu a sawi lo, a hre tawh lo a ni ang.


A hriat hun hunah a sawi chhuak leh nawlh mai ang, Lal Fanu hi chu a Cial thei hrim hrim.


Theihnghilh tawh tura kan ngaihte hi a rawn sawi chhuak leh nawlh zel.


Lal Fanu a awm loh chuan reh thei tak a ni.


Kan bula mut reng a peih loh hun a awm dawn a, chutih hunah chuan a reh zual dawn lutuk.


"Sam, Lal Fanuin khum a duh tawh si a, Frozen tam tâwk nen", a khi deuh suk.


Khum bang nghengin a ṭhu âwn deuh a, a khûp vei lam tunin, a kut dinglam a chalah a nghat a.


"Lal Fanu hi chu", a kiai sak a, "Ka thisen a ni lo", a ti chu, ka khûrin ka hria!


Chutiang a ni thei dawn mi?


"Sammy, thil ni lo lo sawi suh",


"A ni alawm, Kum khat chuang Politics vel avangin ka buai thei em em a, zanah inah ka awm ngai meuh lo. Ka awm chhunah hi chuan mut hahchawlh nan ka hmang ṭhin. Ka chauh theih em avangin nupa nun châkna ka nei ngai lo a, amah lam reng ka lo ngaihtuah ngai lo bawk.


I hua pawh a ni thei, tun hnu hian hreawm a lo tih dan tur ka hre chauh. Ka lainat ṭhin, nupa nun kawngah lo zeiin keimah chauh ni loin amah pawh lo ngaihtuah tel ila, Lal Fanu thisen hi ka thisen a ni ngei ang", dawn sawn dan tur ka thiam lo.


Sammy chuan sawi chhun zawmin, "Kum khat hnua nau a pai mai kha hriatthiam har ka ti a, a inzêp bik lo, ṭha takin a sawi ve mai. Siamtea leh Freddy-a ka enin Nu an mamawh a, Nu tel loa enkawl tur chuan ka inzuam lo.


Chuvang chuan ngaidam lo mah ila ka ṭhen chuang lo.


Siamtea leh a nauin eng mah an hre lo, zan tin chhuatah hian ka mu ṭhin. Min awmpuitu tur ruaiin, a mamawhna tinrengah a puibawm ṭhin. Huhh", a kiai sak.


"Inthlanah ka tling lo a, chumi hnu lawkah Lal Fanu a lo piang bawk si. Chumi belh chhah turin, Lal Fanu thla hnih a tlinin a chhuak daih bawk.


Chumi aṭang, Lal Fanu kum khat a tlin thlengin mu leh mal nei loin ka awm. Pu Hrekima enkawlna hnuaiah ni tin hun ka hmang.


Zan khat erawh, Lal Fanu ṭap ngak ngakin min tiharh a, ka nuin lo âwiin thlêm bân a tum a.


Ka nuin mu tura min tih avangin ka inher a,.chutah chuan, "Pa", tiin Lal Fanu chuan a ṭah hlaah a chham tel.


Ka nuin a ṭawng hmasak berna leh a ṭawng chhuah hmasak ber pawh, "Pa", tih a nih thu a sawi a.


Chumi zan aṭang chuan Lal Fanuin Nunna min pe kir leh ta a ni.


Ka nu leh pain ka thisen kai a ni lo tih an hre lo a, hrilh ka tum lo. Ka fanu a ni a, ka fanu a ni kum khua dawn. Lal Fanuin a kut têreuh têa ka kutzungpui a vawn(vuan) zan kha ka ngaihtuah kir ṭhin.


Nunna thar leh Beiseina thar ka neih zan a ni a, a ṭum khatna atana ka Lal Fanu ni kum khua tawh tur ka ṭanga ka pawm a, a ṭap a bân hmak zan a ni bawk.


Lal Fanu hmelah hian kha zan kha ka hmu ṭhin a, nitin hian Nunna thar leh Beiseina ka nei ṭhin", a tana Lal Fanu hlut dan tur ngaihtuah thiam a har.


Lal Fanu hmelah Manoi ni loin, amah leh amah a inhmu ṭhin tihna a ni a.


Ka lawm a ni!


A âwmah ka kut ka va nghat a, a nghah chhan thuai a, a thuai heuh heuh.


"Sam, a ṭha leh vek mai ang", tih bak sawi tur ka hre lo.


A lungdam nan eng thu nge ka sawi ang aw... Hetiang hunah tak hian sawi tur a vâng thei mai sia maw, hreawm thei em mai.


A bulah tawlh hrat hratin a âwmah ka lu ka nghat, "Kumin chu inthlanah i tling ngei ngei tawh ang, ṭha takin hna i thawk ang a, nakinah chuan Mizoram CM hi i la ni dawn alawm. CM i nih hunah chuan kan Ram hian nasa takin hma a sâwn hian ka ring tlat.


Hun liam tawh theihnghilhin nakin hunah chauh lungkham rawh", hei zawng hi zanin atana ka sawi theih chhun.


Lal Fanu mu tho hmel ṭha tak ka thlêk vang vang.


Nunna thar neihna khawp a ni chiang a ni!


"A u te lehkha zir laiin apa kaitho ang",


"Good luck!", a ti a. A u te pahnih an nui vur vur.


Lal Fanu ni awm hliah hliah a nih ngei hi.


Sammy-a kaitho tura kal si kha kan hlawhchham, a lo tho daih tawh.


"Sammy?",


"Apa?",


Bathroom aṭangin, "Eihhh", tiin a lo au.


Lal Fanu a kal a, puan ka thlep.


Sammy-a phone ri enin, 'Zothangmawii' tih a lo ni a. Manoin a rawn call chhan eng nge ni ang?


Ka chhâng a, ka ṭawng hmain, "Sammy, Thangmawii, phone dah miah suh, hrilh tur che ka nei. College i kal ang tiraw? Inhmu ang hmiang, inbiak ka duh", Sammy-an a la be lo a nih dawn hi.


"Dawrah lo kal zawk ta che, keimah nen inbia ang. Sammy-a tibuai suh",


"Sammy-an a phone khawihpui hi a duh ngai lo, engtin nge call hi i lo chhân theih?", a lungni vak lo tih sawi a ngai lo.


Hriat thar ka nei leh ta, Sammy-a phone Manoin a khawih theih ngai lo, kei thung chuan ka khawih a, call pawh ka chhâng.


"A danglam tawh alawm, Mano, Dawrah lo kal ngei la aw",


"Eng a? Engtin nge min hriat?",


"Dawr i lo thlen hunah kan sawi dawn nia", phone dah hmasain, Sammy-an Screen lock a dah tawh loh avangin, Manoin a lo call-na history ka delete.


Bathroom-a inchhaih nui ar ar thawmah ka nui ver ver.


Manoi nena kan inbiakna Hriatin a hriat ka duh loh avangin, Sammy-a te School kal tur thlahin, "Vawiin chu inah kan lo awm ang",


"Anu, min lo hruai dawn em?", Freddy-an a ti a. "Hruai dawn chiang, KFC kan ei ṭeuh dawn nia", ka ti a.


Freddy-an, "Yess", au chulin min kuah a.


Lal Fanuin, "Apa, i bulah ka lo kal ve", a ti pek a, Sammy-an, "Naktukah ni mai rawh se aw, hna a tam dawn a, ka ngaihsak ṭha hman lo ang che", dam thlup hian a ti a.


Lal Fanuin a ngen lui ta bik lo, a fel thei a nia aw...


Ka phone aṭangin Manoi ka bia, "Engtin nge Sammy-a nupui ka ni tih i hriat?",


"Nupui ni loin nupui hlui mawle", ka lo ti a, "Eng maw i sawi?",


"Nupui hlui ka ti, keimah hi a nupui zawk chu aw", Manoi thinur hmel ka mitthla thiam.


Sammy-a nupui a inti ve ngawt a nih kha, a nupui hlui zawk alawm a nih.


"Inah lo kal zawk ta che, Dawrah ka kal hman tlat lo mai, i chhuahsan hnua a danglamna te i lo hmu ve ang chu. Ka lawi luh aṭangin ka duh danin in chhung ka chei a, min hmuhpui ve ang chu. Ṭhian kan nihna angin lêng turin ka sawm pah che a nih chu", a kut a hum ruh nasain ka ring.


A duh loha a kalsan hnu hi rawn beisei lehin, chutah pawh, kawng dik lo lam aṭangin a rawn kal.


Chhan ṭha tak a nei ngei awm si a, ṭanpui a lo ngai ru reng zawk te hi a ni palh reu reu ang a!


Manoi chuan, "Inbiakna hun kan la nei ngei ang, chumi hmain Sammy-a biak phawt ka duh", a lo ti a.


Phone a dah daih a, call nawn pawhin min chhâng duh tawh lo.


College-ah kalin, Sammy nen inbe phawt mai teh se.


Zothangmawii(Manoi) pov...

Chhuanpuiin dawra an kal dawn loh thu a sawi ta si a, kal pawh nise hmuh ka tum lo hrim hrim.


Engtin nge min hriat chhuah theih le aw?


Darthlalang bawm la kângin duat takin ka âwmah ka pawm vawng vawng. Samzai pahnih tlawng a awm.


Samzai satliah ngawt a ni lo, Lal Fanu samzai a ni tlat. Ka fanu ngei mai kha!


Kum tam tak hnuah ka ṭangah pawmin, duat takin ka chul a. A Nu ka ni tih pawh a hre lo chu a ni si.


Reilotê tal han pawm leh thei teh ila chu aw...


Lal Fanu nena kan thlalak dun ka print tir chu la khawmin, Album-ah ka khung a. Siamtea leh Freddy-a nena kan thlalak te pawh ka dah.


Tun hnaia kan thlalak dun te an ni.


Sammy-a nena kan inngaihzawn lai aṭanga inneih ni thlengin.


Kan chhungkaw thlalak a kim ta, chhungkua kan kim tawh e. An vaia kuah vawng vawng ka duh mang e.


A bikin, Sammy-a nena kan inneih thlalak thlêk ngawih ngawihin, helai huna kir leh ka châk lutuk.


Mo Kawr Var nalh tak leh Coat suit dum tliang nalh tak nena, Biak In hawng ngata Maicham hmaa Pastor-in min inneihtir lai kha ka ngai ṭhin.


Tun hnu hian kha ni chauh kha ka chhûi nasa ber.


Min lawmpuitu tam tak karah pawh Sammy-a chauhin ka mit a la. Ka pasal a ni tawh a, a ni kum khua ang a, ani chauhin ka mit a la ber zel ang.


"Mano, ka nupui i ni ta e. He zan ka nghahhlelh theihzia i hriat kha, fa engzah nge kan neih ang aw?", min pawm kâng a.


Dim takin khumah min nghat, "Volley ball bêng thei tham i enkawl seng ang em?", a nui hak hak.


"I inhuam meuh ang maw?", ka hnar a piai zeuh.


"Football khel thei tham thlengin ka inhuam mawle", ka ti chuan a nuih a tiza ngang mai.


Duh taka inpawmin kan infawp a, inneih hmaa kan inserh ṭang ṭangna chu, inneih zanah chhuah zalenin a awm ta a ni.


Siamtean hlimna tam tak a rawn thlen a, mahse; Politics-in kan hlimna a tichhe vek.


Politics a luhchilh hma chuan min ngaihsakin min duat a, chhungkua pawh kan hlim.


Politics-ah zuang lut loin Professor ni ṭha hle hle se chu, chhungkua kan kehdarh lo tur a ni a.


Chhuak tura insiamin, College-a kala Sammy hmuh pawh ka phur lo.


School aṭangin Siamtea leh Freddy-a hruai chhuakin, inah awm nileng mai teh ang.


School ka thleng a, hruai chhuah an phal tawh lo.


"An nu ka ni a, in phal tur a ni. Ka rawn hruai chhuah ṭhin kha, tuna taka phal loh ngawt a theih loh",


"Ni lo e, tun aṭang chuan i hruai chhuak thei tawh lo. An Nuin a phal tawh loh piahah, School Hour chhunga naupang hruai chhuah Principal-in a phal tawh lo", chutiang chu maw ni a?


Lalchhuanpuii chu a va han che rang ve.


"Sir, an Nu ka nihna a bo hleinem",


"An Nu Chhuanpuiin a phal lo atin ni, min hrethiam dawn nia", Office aṭangin ka chhuak a.


Ka intimualpho let der chu a nih kha.


Siamtea leh Freddy-a chu an Classroom pawn aṭangin ka thlir ngawih ngawih.


Mahni fa te bulah takngial pawh han awm theih loh chu. Lalchhuanpui, i remruatna vek a ni tih ka hria.


Ka fate Thluak i su thei a ni mahna, nang aiin Sammy-a ka hre chiang a, ka chênpui rei tawh bawk.


Nuamsain i awm bik lo ang.


Sammy-a hmangaihna i dawng thei ngai lo ang a, a ngaihsakna chu i dawng pawh a ni ang.


Ngaihsakna aiin hmangaihna dawn a thlanawm zawk daih.


Sammy-a a rawn kir a, a hnawh chhuah theih nan che hian ka ṭang dawn alawm. A hma angin, ka pasal a ni leh ang a, kan fa te nen chhungkaw hlim tak kan ni leh ang.


Lalchhuanpuii pov...

Nilengin Manoi a biak theih loh a, inah a rawn kal si lo.


Sammy-a bulah a kal ta zawk nge?


Kal pawh nise ka ngaihven tehchiam lo, an thusawi erawh hriat ve kil kel ka duh.


Sammy-a rawn haw hunah zawh a chi miah lo ang. Manoin min lo call-na History ka delete tih hre sain a lo haw mai thei, Manoin, "Ka lo call che", a ti te a nih loh chuan a hre lo thei bawk.


Ngaihtuah neuh neuh laiin a rawn haw, "Lal Fanu, Apa lo haw", a u te nen an infiam lai thawhsanin an unau thumin an hmuak a.


Sammy-a pawhin a faten an hmuah hian nuam a ti bik.


Keiin nuam ka tih lai chu, "Khawiah nge i nu?", tia a fa te a zawh hian. In chhunga a rawn luh hma hauhin, "Chhuanpui?", tiin min rawn ko a.


Nui sângin ka hmuak ve ta ṭhin, a chang chuan Lal Fanu te rualin ka hmuak ve tho a.


A chang chuan min rawn koh hun nghak hian ka hmuak duh lo ṭhin.


Min koh kha a nuam ve hrim hrim.


Chhungkaw hlim takin zanriah kan kil a, a Politics zinkawng ka zawt, "Nakum aṭang chuan zin chhuah deuh char char a ngai tawh ang. Inah ka awm tam hman meuh dawn lo a ni",


"Mipui hmaah Dâwt ni loin Thudik tak chauh sawi la, kawng dik lo hmanga tlin aiin, kawng dik hmanga tlak a ṭha zawk. Mipui hmaa dâwt sawia dâwt tiam zuah zuah turin ka duh lo.che", mipui hmaa dâwt sawi turin ka duh lo.


An tana a tihsak theih ngei tur chauh hmangin intiamna nei rawh se.


Mipui duhthlanna pawisaa leisak ka duh lo bur bawk. Vote ka neih tirh aṭang phatin mipui hmaa an thusawi hi ka zir chiang a, chuta aṭangin tling tura duh ber hnenah ka vote ka pe ta ṭhin.


"Sawrkar hnaah kan inthun ang a", tih emaw, "Contract hmangin kan inṭanpui ang a", tihte emaw an sawi rik tawh chuan ka thle sawn hmak zel.


Sammy-an, "Of course, dâwt ka sawi ngai lo ang", a ti a.


Naupang lamah thlein, "Anu thu awih ula, dâwt sawi ngai loh tur aw", Sammy-an a ti leh a.


Freddy-a leh Siamtea an bu nghat nghat.


Lal Fanu pekin, "Apa, dâwt ka sawi duh", kan inhrilhfing thei em ang chu a!


Siamtean, "A ei theih loh, ei chi a ni lo", a ti a. Lal Fanuin a fiana khawn a tum.


Freddy-a inrawlh ve lehin, "McDonald angin a tui lutuk, Lal Fanu, nakinah Anu lei tir rawh".


Lal Fanuin, "Yess, Anu, min leisak rawh aw", beisei takin a han ti mauh mai a.


Sammy-a nuih a za ngang mai bawk a, Siamtean a chal.a beng dat.


"Apa, nangman lei zawk la, tunah", Freddy-an a ti leh. Chaw ei nachang an hre tawh lo.


Dâwt tui dan inhrilhin, Sammy nen leisak turin min ti sek bawk.


Sammy-an, "Chaw in ei loh chuan kan lei lo ang", a ti ta a.


Chaw an bar tun tun, leisak loh an hlau teh u.


A thuhrimah, dâwt an ei ngai reng reng mi aw?


"Bawihte, dâwt chu engtin nge a awm? I ei tawh chuan a awmdan han sawi teh", ka ti a.


Ka hre duh dâwt ei theih chu.


Freddy-a chuan, "Anu, i ei tawh kha, kan vaiin kan ei tawh, in hre tawh lo mi? Kan ei tawh kha", hahthlak ti zetin a ti a.


Dâwt kan ei lai awm reng reng ka hre lo.


Sammy-an, "Engtin nge a awm?", a tih chuan Freddy-an dawhkan beng hlak pahin, "Kha, a kual a, a lai a pawp kha, Dâwt kha, Zero angin a awm kha, kha kha", a ti hmiah hmiah.


Zero ang a nih chuan Donut a sawina lek niin.


"Donut a nih chu", Siamtean a lo ti vah.


Sammy nen kan inen, "Dâwt ei tur chu lei ila", Sammy chu a nui nasa lutuk.


Freddy-a chuan min timangang hman alawm mawle. Donut avangin kan va han buai nasa rem rum tak.


Chaw ei kham ve leh Sammy-a leh Lal Fanuin an va lei.


An lo haw thuai a, Sprite an lo lei tel bawk. Tv ennaah kan inchhawp a, kan ban mawlh mawlh.


Sammy-an, "Dâwt tui tak a nih hi", a ti chhuak a. Kan chhungkuain kan nui fai vek.


Lal Fanu nuih pawh a za lutuk, ama nui ber hi kan nuih leh tawh zawk.


Mahse, a pa mal chungah a muhil thuai.


"A phak tawkah min ṭanpui nasa a, a chau ve hle a ni ang, khumah va muttir mai rawh", ka ti a.


Siamtea leh Freddy-a te pawhin, "Anu, kan mu hma thei ang em? Kan chau ve e", an ti a.


An ham bui bui, Sammy-a ka melh zauh a, a ruka nui sakin a bu nghat.


"A ṭha alawm, mahse; in hnar nghal bawrh bawrh tur a ni",


"Ka lawm e", an khi vur vur.


School bân veleh homework an ti nghal a, zan khat chauh chawlhin a nghawng em lo ang chu a.


Ka mut fel tir zawh hnuin kan Donut, ni tak; kan Donut eina vel ka seng hawi a.


Lal Fanu mut fel tir zoin, Sammy-an min pui. Sprite inna no a sil a. Kawngka an lo kik.


"Tu nge le? Keiman ka han hawng ang e", Sammy-an a ti a.


Donut bâng ka dah ṭha mek bawk.


Kawngka inhawn rik hnua thawm dang a awm tak loh avangin, "Sam, tu nge a?", tiin ka va kal ve a.


Manoi lek lo niin!