By Ziki nu
Chapter-33
Zingkar atangin ka pi'n vawk no te a buaipui a, ka thawh ve atang ringawt pawhin mi pathum vel lai chuan an rawn la tawh.
Tun lai ah chuan engkim hi gpay vek an tum tawh a, keini ang tan chuan a buaithlak lam lek lek a ni. Ka pi leh pute'n gpay an khawih loh mai bakah, a awmzia takngial pawh hrilh hrep an ngai a, chuvangin ka phone ah U Mamuana'n gpay account min hawn sak ve a, ka account ah an rawn thun tlangpui thin chu ka pi in a hrethiam vaklo a ni ang, "engzat nge lut tawh" a tih loh leh "a lo bo then ange, lehkhabu ah ka chhinchhiah thlap ania" a ti reng a, ka ning ania aw...
"Mamuana chuan engtikah nge a rawn lak ve dawn a? A hual tha si a, midangin lak an tum chhen tawh ania" kawmchar atangin ka pi'n a rawn ti lut lang lang a, "Tlai office banah a thianpa nen lo kal an tum kha, hual lawk an nei theuh a, midang hualte chu awt lo se a ni mai" ka ti a, ka pu pawhin "Dik chiah" a lo ti ve sup mai, U Mamuana hi chu kan ngaina tlang a ni.
"Thianpa pawh a nei ve tawh ami? A chut hmel si, I thiante ho hi a kawm tawk lek an ni hlawm ang" áng hlawk tih tak ah ka pi chuan a ti leh hram a, ka pi chu nilo se ka ngei thei ngawt ang, a tawngkam a na si, a rilru tak tak a nilo tih ka hria a, ka ngawi thei mai mai zawk.
"A chut hmel ringawt, a chut lo" ka ti ve tlat a, a zeiloh zia ka hre chiang bawk sia, nuih a za zawk.
Ka putea te hnen atang thawm dang engmah kan hre zui lova, Vli erawh ka be pawp thei rihlo, phone an laksak anih ka ring a, a zia lo tak tak ani.
"Awi ka rei, ka beisei aiin an lian daih tawh alawm hei, karkhat chhung lekin an lo danglam hman lutuk" tia Nu Zuali nui har har chu inchhung atang ka lo nuih pui ve hak a, Nu Zuali hi chu nuthlawi ka tih tawh kha, a landan ah hi chuan nu hlim thei tak, nuthlawi nih tlin ve tak mai hi ania, a tawng duhin nuih a in peih reng emaw tih tur a ni a, a bula awm a nuam phian.
Inchhungah vawkâwt in an rawn keng lut a, a fanu Pinky nen pakhat ve ve in an keng a, veranda a an dah fel te te hnuah pawisa pe turin an rawn lut leh a, thingpui dawr nei tih tak ah ani chuan a pawisa thlapin ka pi a pe a, ka pi pawh a nui ver ver mai.
"A va han lawmawm tak, tunlaiah chuan dpay hi an ti zo vek a, pawisa faia dawn pawh kan nei manglo" a tih chuan "Gpay alawm" Pinky chuan a lo ti zauh pek a, "Aw ni tak gpay, tunlai miho hi chuan tawng thar hi in ngah tawh lutuk a, engpawh ni se a lawmawm lutuk aw Biakzual" tiin ka pi chuan a pawisa ken lai chu a chhiar tha malh malh a, "Keini deuh kan lawm Pi Sawi, a budelh te in han tia, hei kan tluan chhoh zel chuan midang vawk aiin a zahpuiawm biklo" Nu Zuali pawhin a lo ti ve a, an lawm dun hmel vur vur khawp mai.
Tlai lamah U Mamuana te chu an rawn kal a, a thianpa in min han hmu leh thut chu a meng phawk ngang mai.
Àt hmel deuhin "Ehe" a ti thum dut a, U Mamuana'n mak ti deuha en chungin "A hmeltha ka tih kha" a lo ti sup a, ka beng chak lutuk ringawt.
"Aih, aw a hmelthat leh thatloh ai chuan.. " a tih hnuah ka rilru nat a hlau leh deuh si aniang "A hmeltha alawm, mahse kan inhmu tawh" a ti bah nawk a, a palian reuh si, a át hmel tho bawk sia, ka nuih a ti za lutuk.
"Khawiah?" tih pahin pakhat chuan keimah zawk min rawn en leh a, min en chiang lutuk chu ka ngei lek lek a ni.
"Niminah ka vawkchaw zawng min rawn phur haw alawm" ka ti a, "Ka sawi kha,, nula pakhat ka lo phur haw a, I awmna min hrilh ka tih kha" a thianpa chuan a lo ti leh a, 'nula' min tih vang nge U Mamuana nen chuan kan in mit sir ralh a, engmah phei chu kan sawi zawmlo.
Kawmcharah kan inzui chhuak dial a, Bawihtei'n U Mamuana a hmuh rual chuan lo ban vatin "Apa" a lo ti ve niah niah reng a, a pa ang maia a en thei hi a lawmawm ngawt mai, ka thinlung takin ka lawm a ni.
Ka pi vawk note man tur U Mamuana'n zui thlak ve mai a tum chu vin ang reng tak hian "Lo kal ve suh Mamuan, thiam i nei leh dawn chuanglo a, I dawi bawk si, I thianpa khan min pui thei zawk ang" a ti mauh mai si a, hrilhhai hmel deuha U Mamuana'n min rawn en chuan za vak lovin ka lo nuih ringawt a, U Reubena chuan nui hawk chung hian "Ka thiam alawm ka lo pui ang che" tiin phur deuhin ka pi chu a zui thla a, kan vawk in kawnga kal thanglo chu chawhrualin an tlu ziah thin a, U Reubena pawhin a pumpelh biklo reng reng.
A mawng a thlen thlak dawnah ke vawr suau in a thal thuai a, a chapal bun lai pawh a thlawk sang lutuk ringawt.
Tuman kan nuih lova, kan tawnglo bawk a, muangchanga a rawn tho tur chu a tlukna ngai bawkah a tlu leh thin a, a thawh tum chhung a rei lutuk ringawt.
Ka pi chuan rawn buaipui vatin "A zialo mange, kan vawk in kawng hi a nal lutuk a, tlu lova kal tur chuan kal than ve deuh a ngai a" a ti bawrh bawrh a, U Reubena pa lian lutuk chu ka pi, tarchaklo bakah a cher chhe chi tan phei chuan han kaihthawh zawh chi ni heklo, a pawt ve ngial na in ka pi chakna hmang chuan a thawh ka ring vaklo.
"A nal ve deuh anih hi" a ti thum dut a, a kekawr mawng bal vek chu thlek zawkin a lu a tuai leh vut vut a, a át hmel lutuk ringawt.
"I in tihtheih man anih kha" tia U Mamuana phun sup chu "Engtinmaw?" tih pahin ka melh vat a, "A na viau em?" tia a thianpa chu au in ka thil sawi chu hria ang pawn a awm leh duh chuanglo, a va han naupangchhia thei tak.
U Reubena leh ka pi-te vawk in chhunga an luh lai chuan Bawihtei pawmin U Mamuana chu a tei kual nulh nulh reng a, "Vawk chaw tur te I lei fel tawh em? I la ringawt anga, chaw pek tur I neih loh chuan a buaithlak dawn ania" ka tih chuan "Bawnghnute a case in ka lei a, eng emaw chen chu an tla thei ang" a lo ti sup a, ka melh vak chu hriatthiamloh hmel zet hian a mithmul a lo san ak a, "Engatannge bawnghnute chu I tih?" tia ka zawh lah chuan tlaw min ti hmel fahran hian min han melh te te a,
"A note an la nih khu, chaw pangai an la ei theilo" a ti ve ngei a, awi ka beng hrep chak.
"Ka pi in kawlo a ti thin lutuk che hi ka dem tawhlo, ka pawmpui thlap tawh zawk, tinge I kuakloh em em a U Mamuan, a no te chu an la nia, hnute an hnek chhung chuan in la hranglo reng alawm, tunah chuan hnute an nghei vek tawh a, an lak hran theih tawh" ka ti hap a, a hrawkbawk che ralh khawpa chil lem dawk pahin Bawihtei chu leiah a dah thla a,
"Lak hran hlim chuan hnute an la mamawh ka ring a" a ti sup a, a inthlahrung hmel chu ka khawngaih letling tawh zawk, tiang em ema han hritaloh theih mai chu le'h.
U Reubena leh ka pi te chuan vawk âwta dahin an Rawn khai chho a, "Bank ah I thawk bawk a, nang chuan a pawisa thlapin min pe ang che, dpay vel kha kei ni tan a buaithlak, ka makpa tur ni mah la ka tlawm dawn rihlo che ania" ka pi chuan a ti nghal zung zung a, engatinge maw dpay pawh chu a tih fo le.. Ka pi chu a buaithlak thei e...
Nui hawk hawkin U Reubena chuan "Dikchiah Dpay chu a buaithlak, a pawisa thlapin pe ang che, bankah a thawk a, neih loh thu a awmlo tiraw ka pi" tih pahin ka pi darah chuan a beng thak thak a, an ni pahnih hi an in mil dawn riau in ka hria.
U Mamuana chu bawnghnute vel vang khan a rilru a la buai anih ka ring, inchhunga ka pi te an luh hnuah pawh a la ding ngawi vung vung a, "Lut phawt ang" ka tih chuan "La ringawt ila a chaw pek tur ka nei silo a" a lo ti sup a, a banah kaiin ka pawt deuh sawk a, inchhunga luh pui pah chuan "A awm mai ang" ka ti ta ringawt.
Ka pi pawisa a pek fel hnuah "A chaw tur te I ngaihtuah lawk tawh em, a in kha I sa tluk tluk ringawt in ka hria a" a ti ve ta chiah a, "A in chu duhthusam" a lo ti sup a, "A nih leh a chaw?" U Reubena'n a lo ti ve thung.
Keichu ka ning tawh, kan boruak hi ka ning, U Mamuana kawlo lutuk hian ka mood a ti off vek takngial dawn.
Ka pi vawkchaw chhum sa chu bel lian ve deuh ah kan suah ta ringawt a, vawk chaw êm han in suah chu in ti mai thei a, mahse kan suah loh chuan pek tur a nei dawnlo.
Ka pi'n a hau hrep a, U Mamuana chu a ngawi kur mai, "Naktukah office in chawlh chuan Mary nen in zawng dawn nia" a tih chuan min Rawn melhin a nui suk a, ka nui ve ringawt lehnghal.
U Reubena nen chuan vawk note chu an hawn ta chu ania, engtinnge an enkawl zui zel ang ka hre chak tawh.
Zanah Engtheii dawr kal a Rawn peng kawi zuai a, Bawihtei thil ei lai Rawn ei pui pah chuan chhuatah a thu thla hnawk a, "I ril a va tam awm thin bawk ve mawle Muani" nui chunga ka pu in a lo tih chuan choka atang ka pi'n vin fahranin "Lalmuankim, naute thil I Rawn ei pui ve tawh a ni maw?" a Rawn ti hrawk a, keipawh ka phu zawk mai.
"Ei pui mai mailo" tih paha min Rawn en in "Ka thil thar chu U Mamuana mikhual pa saw" a Rawn ti heu mai.
Âng phuau in ka nui hak a, "A mikhual tiraw, ka hmuh apiangin U Mamuana nen an lo inkawm ziah" a ti leh a, "U Reubena anih kha" ka tih chuan min Rawn thut hnaih sawk sawkin "I hria ami? Nupui a nei tawh em le? Min lo zawh sak teh aw" a ti nghal zung zung a, Muankimi hi chuan duhzawng a nei khât a, a duh tawhte vek vek chu a duh hlum lo chauh zel, tunah U Reubena a star leh phei chuan awi, a va han ninawm leh dawn tak.
"Chutiang engmah ka hrelo, tlaiah khan U Mamuana nen vawk no an Rawn la a" ka tih chuan ka dara min beng thlawp pahin "Tinge min hrilh loh" a ti a, min benna tuai vut vut pah chuan "Ka hre hleinem, hmanni ah pawh ka vawk chaw zawng min phur haw tawh, U Mamuana aiin a upat hmel zawk ka tia, nupui pawh a nei tawh mai thei" ka tih chuan a nguai nghal ringawt a, mahse a reilo rapthlak.
"Nupui pawh nei se a ho emai, keeper awm lai pawhin a pet goal theih chiang e" a ti hluai a, "An nupa in then tir I tum a ni maw" nui chunga ka lo tih chuan a lei chhuah tut in a hmui a hup nghal a, in melh ralh ralhin a tawp ah kan nui leh ta nge nge.
A haw dawnah chuan lehkha tha deuha zir tur in ka chah ve mawlh mawlh a, ka dinhmun a hran tak bik avangin ka duh leh chak tam tak ka ti ve thei tawhlo a, ka thiante hian an chance tha lutuk hi ho mai maia an khawhral ka hlau a ni.
Nun hi a hlu a, vawi khat kan pian ve manah kan duhthusam leh suangtuah ang vawi khat tal ti thei tura in chher hriam hi keichuan a hlu ka ti a, ka thlen chin atang pawh hian kawng tam tak ah hmasawn zel ka la duh bawk.
Zanah U Mamuana te thian dun chu an Rawn leng lut leh hlawl a, min hrilh lawk lo bawk nen ka hrilh hai lek lek a ni.
"Engtinnge i vawk chu?" tiin ka pi te nen an titi hmasa luam a, "Reubena a awm a" a ti mai zel a, a changkan hmel tehlul nen a thianpa Reubena chu a vawk mi phian anih ka ring.
"A hmain vawk I vulh thin em ni? I thianpa chuan a va thlamuanpui che ve?" ka pu pawhin a lo ti ve ngei a, "Vulh thin tehreng mai, thingtlang khua atanga seilian ve tho ka nia, ka nu khan vawk vulhin pa tello in min tul pui a, tihian ka inzir chhuah ve theih phah anih hi" a ti duah a, a fel hmel fu mai. Thingtlanga seilian anih chuan kan nunphung a hrethiam vek dawn a, tunah business lian tak tak nei tawh mah se a nun a tlawm hle ang tih ka ring nghal hmak, a tir atang khan a ngainatawm reng a ni.
Ka pi te mut hnuah Bawihtei chu U Mamuana malchunga bawkkhupin phone a en a, U Reubena pawhin a lawm ve viau in ka hria, a chhaih zuk zuk reng mai.
"Engtia rei nge cham ve I tum?" tia ka zawh chuan "Tunkar chu ka la awm ang" a lo ti a, U Mamuana nena kan buaina a hre ve nge hre ve lo ka hriat loh avangin chulam chu ka sawi ri duh lem lo va, thingtlang mi anih si chuan engtinnge U Mamuana nen an in hriat daih tih ka zawt a, an pahnih chuan in melh zawkin an nui dun hawk mai.
"College kan kal ho thin a, I bialpa hi a chut thei ropui sia, kan senior thenkhat inla pa ve deuhte khan an lo chhaih thin mawle, a ti let ve ngai silo a, vawi khat chu ka chhanna lamah ka hmai an hnek vûng vek" nuihzat hmel tak hian U Reubena chuan a ti a, "Chutatang chuan in inkawm chho ami?" ka tih chuan an bu nghut nghut a, an inkawmngaih viau dawn chu a.
Dar 10 rik dawna an haw tur kawtzawla ka thlah laiin ka phone ah chu a Rawn ri dar dar a, tun ang huna call ka dawng chu mak a ti deuh aniang U Mamuana pawhin a Rawn ngaihven rang khawp mai.
Number hlang atangin a ni a, ka chhan rual chuan Vli aw ngei maiin "Ka thiannu te in ah ka riak a, I mu tawh em?" a Rawn ti a, phawk deuha U Mamuana ka melh rualin speakera dah turin min lo mitmei zui a.
"Tun ang hunah tinge min lo biak a, I pa in a hria ange" ka tih chuan "Hrelo ang, FIR vel in sawi vang khan a thinrim lutuk a, ka biak loh nan che ka phone a vawm chhia alawm" a ti sar sar a, tawng rin a hlauh hmel lutuk te chuan min ti hlauthawng zo vek tawh.
"Anih chuan engtinnge min lo biak theih?" ka ti a, zawhna tangkailo tak ni mah se ka zawt tawh laklawh.
"Jacoba a tangin" a ti sap chu mipa pahnih chuan an hriatthiam loh hmel ngang mai. Ka naui hian Jacoba number a vawng tih a hriat reng.
"Aw le... Chuan I pa chuan engnge a sawi? Engtia tih zel nge a tum?" tiin ka zawt leh a, kawtzawlah ka phone chu kan din hual thap a, kan tawng ri bak thawm dang a awm tawhlo.
"Ka hre ve veklo naa, mahse naktukah U Mamuana nu leh pate nen inhmuh an tumin ka hria, a thalo zawng hlira chet lak a tum anih chuan FIR chu thehlut mai teh u" a ti khur hlak a, U Mamuana'n phone chu Rawn la in "Chiai chu Vl, FIR pawh kan buaipui mek a, a tha leh vek ang, nang leh I nu engnge I an?" a ti sup sup a, "Keichu ka tha a, mahse ka nu nen chuan an in hau nileng a ni ziah, chhungkua pawh kan ang tawhlo, chaw kan ei rual tawh ngailo a, ka nu hi ka khawngaih lutuk" a Rawn ti tiau tawh a, mipa aw meuhin a biak takah chuan a hnuk a ulh hle anih ka ring.
Ka kut ka hum ruh ngawt ngawt a, ka putea ka huatna hi a nasa zel mai chu a ni si a, a chang chuan thawk lak ngaihna pawh ka hrelo thin.
"Lo mangang tawh suh, kartawpah kan lo chhuk anga, a fel thuai ang" ti supin U Mamuana chuan phone chu a hmet hlum a, kan ngawi zui vang vang hlawm.
"Motor ka lo va turn ange" tiin U Reubena chuan min kalsan a, ka thaw chhuak hap chu min Rawn dinhnaihin ka darah a Rawn kuah a, "Pathian kutah kan in hlan thar leh anga, a tha vek ang" a ti sup a, ka dar chu a tuai hauh hauhva, "Midangin an tuar ve zel hi hrehawm ka ti" Ka lo ti hap.
"Kartawpah Reubena nen kan chhuk anga, U Mami'n a tul zawng zawng a buaipui thei bawk anga, hlauhthawnna tur a awmlo, pu Hmingmawia chuan a duh duh lo ti se la, a thiamlo zawk chu hrem lohin a chhuaklo tawp ang" a ti a, tunah chuan U Mamuana bak hi rin tur dang ka nei chuanglo, ka ring anga, ka rin leh beisei anga a thlen theih nan Pathian hnenah ka hlan bawk ang.
End of chapter-33
Nizanah site a ka luh theihloh avangin update ka siam theilo a, in mi hriatthiamna ka lo ngen leh hnuhnawh a ni e..
