MINE ALL MINE

[Kennelly Bawitlung]

Chapter-14

Daniel's pov

Ka harh chuan ni a lo sa uar tawh, ka bula mu U Rinzuali chu a lo awm tawh lo. Ka kawr pawh ha lo chuan room atang chuan ka chhuak nghal. U Kima chhuak liam chiah chu ka hmu hman.



Choka lamah chuan ka phei nghal a.U Rinzuali chuan ei rawng a lo bawl mek. Va pan hnaiin a kawngah chuan ka kuah a, a darah chuan ka khabe nghatin a ei siam lai chu ka en "U Kima a lo kal ang e... " ka kut phelh tum chuan atang "Nichin khan a chhuak tawh hlauhthawng a ngai lo" ka ti vat. "I mutui em?" ka tih chuan a lu bu nghatin min rawn enin a nui hmel chuan min ti tuiral lo chauh!



A hmuiah chuan ka fawp zeuh a, lo inring hman loin a meng deuh kawk. Nui deuh hakin a kun hniam, ka lam hawi a ka her chuan "Kawr pawh i la ha lo a nia.." tiin a melh thla zeuh "Chuan... " ti deuh ralhin a kut chu lain ka awm atang chuan ka zut thlak tir a. A mit hmul chu ti sang at in min en chho vah!



Chutah a kut pahnih chuan ka nghawng rawn kuahin min fawh tumin a dingdihlip arh a, ka lo kun hniam vat. Min fawp zeuhin fawh let ka tum chuan a in la hrang nghal zel chimawm takin a nui nghal bawk.




Mahse ka dawh rei lo, a kawng atangin a mawng bawr chu ka zut thla a, a malpui ah chuan man betin ka chawi kang lawp. A tre deuh thawt bawk! Nui sukin dawhkan ah chuan ka thut tir a. Ka fawp nghal tawn tawn, a lo hnung tawlh deuh darh mahse a kawngah vuanin ka lamah ka pawt hnai sauh sauh.A hnung chu ka zut chhuk chho riai riai a. A ni pawn min kuah nghet sauhin a theih ang tawkin min chhang let ve a.



Rinzuali pov

Kan in ei puar hnuin Daniela chuan thleng a sil a. Ka nau hnen atang phone call ka dawng avangin kan roomah be turin ka lut a. "U ka kawr chah che kha rawn hawn theihnghilh miah suh!" a la rawn ti fan "Mmm.. Ka hria lawm ka hria... Kan chhuah veleh ka lo zawng dawn ania" chiang tak chuan ka ti a.




Ka phone hmang zo chu ka chhuak a, sofa ah chuan Daniela chu thu in Tv ah game a lo khel a. A rilru a pe ngang aniang a bula ka va thu pawh chu hre miah loin a khel chhunzawm char char.



En deuh vang vangin tihbuai chu ka chak ta tlat. Ka kut chuan a pum chu ka zen a, a abs te chu ka kut chuan chiang takin ka hre thei. Ka kut chuan a pum chu ka dek a, mahse eng nga tan mah a ngai lo.Chutah zut chhoin a hnute hmur chu a za thei tur ang berin ka dek a. Eng nga tan mah a la ngai lo cheu!




A bengah te chuan chhemin ka kuah thul!
"Ka khel laklawh lutuk" tha deuh chuan a rawn ti a. Tawp mai chu ka la tum bik lo, ka kut chu a kekawr kawng ah ka rawlh tep tihah chuan min rawn bawh bet thut! Ka tre chhuak tuar."I kut hlei lutuk mai!" tiin min dek chiam a. Dek haw chi ka lo ni bawk nen "Ka ti tawh lo ang!!!! Tawp teh!! A za a nia!!!!" ka ti ruai tawh mai.





A tawpah chuan min dek tawpin ka thaw huai,ka hmui ah rawn fawp leh zeuhin a tho a, games chu a khelh chhunzawm leh nghal. Min dekna lama ka nui chau chu ka mu reng, ka ke chu a malpuiah ka nghat a. A ban nghatin a games khelh kai chu a hmet mawlh mawlh.Engmah ti lo mahse ka bula a awm hi chuan nuam ka ti veng veng zel. Ti hian kan pahnihin awm dun reng thei i la ka ti ngawt mai.




Chawhnu lamah chuan Lily leh U Bena te chu U Kima chuan a rawn hruai hawng a. Lily pawh a that hmel tawh viau. "Vawiin chu chawl hahdam phawt mai la,naktuk lamah kan chhuak mai dawn a nia"Daniela'n a tih chuan "Naa...Zanah tal i leng chhuak ang u.... Mawh!!! Ka tha tawh lutuk ringawt! Min en ula" tiin Lilyi chu a that tawh zia tih lang nan a zuang deuh tuk tuk a.




"A nih leh va chawl hahdam phawt la zanah chuan kan chhuak dawn a nia" U Bena'n a tih tak ah chuan Lilyi lawm lutuk chuan U Bena chu a kuah nawk nawk,a hnuah lai leh deuh siin bedroom ah a tlan lut daih a.




"Ngati nge i nghawng chu?" Lily ka en zui na lama ka hawi chu U Kima chuan min lo zawt vat.Hrilhhai deuh chuan ka en deuh ha a, chutah ka hre chhuak zawk ka nghawng chu dawmin "Aw... Hei hi maw? Nizan ah thosi nghal deuh a rawn lut a..." nui hak pawh chuan ka ti.Daniela chuan min rawn melh no lo nasa mai! U Kima pawh chuan awih ve mai in a room lamah a phei a.Daniela chuan "Chu.... thosi in maw i nghawng chu lo zuk duk a" a rawn tiru su su "Ngawi mai teh!" a awmah chuan beng thukin ka kal daih.




Room ah chuan lutin Lily chu a lo mu zal a. Ka nghawng chu darthlalangah chuan ka va en da da "Chu thosi mai mai chuh! A duk lian em em lehnghal...." phun mur mur pah chuan ka samin ka hliah khuh sawk sawk.



"U Bena hi ka bem tawp tawh mai dawn maw ni..... Mahse min duh lo ang tih ka hlau sia.... " Lily chuan a ti chuai deuh raih
"I zawh chauhin a duh leh duh loh che i hre thei dawn alawm" ka tih chuan rawn thu chuak zak in "A nih leh nang mipa i duh thu i hrilh hmasa tawh ngai em?" ka ngaihtuah deuh vang vang "Aih.....Star chu ka nei ve thin a mahse hrilh ka tum buai ngai lo" ka chhanna avang chuan Lilyi chu ner deuh nangin ka lo nui tawp.



"Mahse tunlai chu Daniela bulah hian i mizia adang riau in ka hria...." a tih chuan ka meng kawk "Teuh lo mai!I hre sual a niang" za lo deuh a nui pah chuan ka ti bah nak "A nia lawm motor ah te khan in inngeih hmel bawk si.Kawngtluanin a darah i mut thlurh thlurh kha... " a la rawn ti deuh deuh "Khang te chu ka mut a chhuak lutuk a kham a rem em a,Bakah nangpawh U Bena darah i muthilh ve thlurh thlurh tho kha! Mi dar a mutthluk chu a pawi viau a mi?!" ti bah nakin ka tang ve nasa.Lily chuan min lo en kar "Aw aw aw ka hrethiam e...." a tih chuan ka thaw huai.




Zan a leng chhuak tur chuan kan insiam hlawm a.Party na a kal pah tur kan nih bawk avang chuan ka silk kawr cream rawng, khup pawh khuh pha lo chu ka ha a. Ka combat boot dum chu bunin ka leather jacket dum chu ka ha le bawk. Dawt sawi loh chuan chhelo chu ka in ti ve thlawt!



Lilyi insiam zawh hnu chuan kan room atang chuan chhuakin mipa ho chu an lo hman der tawh. Ka mit chu Daniela chuan a fu chat, kamis var hi ha in a kawrkilh chu a inhawng zau ang reng, a kutin a jacket a keng bawk. Min lo en vatin a mit ko lehlam a san zeuh, lang vak lo chuan a nui zeuh bawk. Chhelo min ti tih chu ka hai lo. Ka nui suk.



Written by
Kennelly.B