Political nupui

[Cck Lalchhuanawmi]

Political Nupui Hring nun
Political Love Story_Fiction
Ziaktu: Cck Lalchhuanawmi
Chapter-6


Biak chhiat ngawt theih ni hek lo, Sammy-an, "Lo lût rawh", dam zetin a ti a.


"Ni e, lo lût rawh", ka han ti ve a.


Ṭi dakin Manoi pawh a lo lut, "In pahnihin in inhre tawh tho a, lo inkawm rawh u, ka hna a laklawh em mai, ka zawh(zo) hunah ka lo zawm ang che u", Sammy-an a ti a.


A no sil lai a chhunzawm, Manoi chu tv ennaah ka ṭhutpui a, inhriat ṭhat leh lutuk chuan sawi tur a vâng.


"Ngati teh thut nge, zanah te?", chhan ṭha tâwk tak a awm ngei tur a ni.


Ka ngei tawh em avangin biak ṭhat har ka ti tawh. Tihlan loh erawh ka tum, ka ṭang nasa bawk.


Sammy-a awm lo ngat se chu, ka pawr ngawt ang.


Manoin, "Ka fa te hmu turin ka lo pêng zuai, veng ṭhenawmah sawn tih tur ka nei lawk a", a hawi kual a, "An va reh ve, an mu tawh em ni?", nui sângin a ti a.


Ka fa te a ti chuan min khei zak, "Ka fa te i tihna mi?", tia ṭawng ka tum laiin, "In titi tui bawk maw?", Sammy-an a rawn ti hman.


Sammy-a ka ngei lutuk chu a rukin ka ner khum nak.


Manoin, "Titi tui thei mai, Siamtea te unau hmu turin ka lo pêng lawk a nih hi. An lo mu tawh si a, hlawhchhamin ka haw dawn chu a nih tak ber hi", a ti a.


Ṭawngkam a thiam e, ngaihzâwng melh dan tak tê hian Sammy-a a melh a, a intinui mawi vei phian bawk nen.


Kei aiin a zei hmel ngar ngar tawp.


Sammy-an, "Zanin chu an mu hma, i lo lan takah chuan", hma lama kun deuha a kut pahnih suihin, "Sawi dun tur kan nei, a hmasain, biak hleih theih loha i awm chhan hi min han hrilh phawt teh", a ti a.


A private dawn riaua ka hriat avangin leh, ngeih lo mah ila ka awm kur chuan Sammy-a bulah Manoin dâwt a hrilh ka hlau si a, "Sam, Lal Fanu a lo harh palh takin ka va en lawk ang e", ka ti a.


Ka mawng ka kân(kâng) uk tawh chu min pawt ṭhu, "A muhil nghet alawm, a harh mai mai lo ang", awm ve reng tura min duhna chuan min tilawm.


Thil pawi an sawi dawn pawh a ni lo a, chu loah, pindan aṭanga ngaihthlak ruk ka tum tho tho.


Ngaihthlak ruk aia ṭha zawkin a hmun ngeia awm a ṭha.


Manoi chuan, "Phone hi nia, chian lohna a nei ṭhin a mawle", a ti satliah mai a. Ka awih lo ve ringawt.


"Hmannia i lo lan hma zawng khan khawiah nge i awm?",


"Kan inah lo, awmna tur ka nei hleinem", Manoin a ti a. Sammy-a ngaih dan a ni chiah lo, a insum nasa lutuk chu ka ngei hman.


Manoi chunga a lungawi lohna te chu min chelh ta sa sa, han hrithla hmiah hmiah se ka lo ti.


A chunga âwka vin emaw te a hmang duh lo chuan a la hmangaih reng emaw tih mai a awl.


Ni, a la hmangaih reng dawn tih a chiang em asin.


Manoi tlanbo lo se chu, a ngaihdam bakah tunah hian, kei ni loin Manoi zawk a nupui a la ni reng ang chu!


Sammy chuan, "Siamtea te unau i hmu tawh reng em?", a ti leh a.


"Hmu lo, Lal Fanu erawh ka hmu. Lehkhabu dawr pakhata ka kalin ka hmu alawm. Chhuanpuii ka hriatna pawh a nia. Zaninah Siamtea leh Freddy-a hmu tur chauhin ka lo kal. Inṭhen tawh mah ila, ka fa te hmuh theihna ka nei ve tho", Manoin hniak phawi miah loa dâwt a han sawi chu mak ka tihzia chu!


Dawrah lo kalin Lal Fanu a hmu ngei, a dik.


Siamtea leh Freddy-a a sawina erawh a dik lo hulhual. Thu ṭha lo tak tak hrilhin, Siamtea phei chu a vua a nih kha.


Ṭawng chhuak thut thei dinhmunah awmin, insehruh nasa tak ka ni.


Ka ṭawng chhuah a mawi chiah loin ka hria, ṭawng erawh ka duh. An inṭhen tawh thu leh a fa te hmuh theihna a neih thu te a sawi leh ta nghal a.


Hun a la awm alawm, kan pahnih chauha inbiakna hun a thlen hunah ka la chhuahchhal khawp ang.


Sammy-an, "A nih chu, Chhuanpuii bulah min rel nasa ngawt lo maw?", a han ti a.


Manoi ṭawng hmain, "Rel ngai lo, i felzia thu ngawt a sawi", ka ti a. Sammy-an ka khûpa a kut lo nghatin, "Anih nang? Nang chuan min rel nasa ngawt ang?", a chal a tichuar.


"Rel nasa e, rel ngaiin i awm a", Sammy a khi suk.


Manoi bulah Sammy-a chuan, "Naktukah i lo kal leh dawn nia, zanin chu an muhil hman tawh a, kaihthawh a chi tawh lo", a ti a.


Manoi pawhin a hnial lem lo, "Sam, number thar ka nei a, chu chuan ka lo bia ang che. Chuan", min en zawkin, "Nangmah nen chauha inbiak ka duh, a rem ang em?",


"Chhuanpuii dil phawt la, a phalna lo chuan kan samzai pakhat pawh a tlu ngai lo", Sammy-an a ti kher chu, ka hau nek dawn mawni?


Manoi chu nui deuh senin, "Nih chu, ka haw phawt ang e. Mangṭha ule", a haw ta a.


Ka phalna lak a hreh nge, a duh lo hrim hrim nge, tlawmah a la nge ni?


Ka phalna min dil pawh nise, ka phalsak dawn lo nasa a ni.


"Lehkhabu i va chhiar ta lo ve", ka chhiar ngam rih lo a ni e.


Sammy bawkin, "Pathumah pakhat chauh i la chhiar a nia", a ti a. Ka hre reng.


Puan hnuaia inthawlh luh pahin, "I zin chhuah huna chhiarah ka khêk", ka han siai zauh pah.


"Min zui dawn alawm", a ti chu, "Awihawm loh, Siamtea leh Freddy-a hi engtia awm turin nge i tih?",


"Ka nu leh pain an lo awmpui mai ang chu, Lal Fanu hi chu hruai ngei ngei a ngai a", ka peih lo mang e.


Zui loh ngawt dawnin a nupuiin a ṭawiawm lo an tih a hlauhawm tho si a. Ka hriat chinah, ṭawiawma han zui ka la nei miah lo.


"Ka zui ral ṭhak dawn che, keimah avangin i tling chiang var bawk ang",


"Ṭha lutuk, ka duhzâwng tak a ni".


Manoi lam reng ngaihtuah zui loin Serchhip Biala zin dan tur ruahmanin, kan phun sû sû.


Dawr kan thleng a, Lal Fanuin Hriati a ngaina teh tlat a, an pahnihin an inkawm tâwk vel lutuk.


Manoi biak ka tum a, rik chu a ri, min chhâng thei lo.


Sammy-a nena an inbiak rinna chuan min tihlauthawng. Hlauhthawn tur a awm loh tehreng nen, Sammy-an a la hmangaih reng tih a hriat a, Manoin thiam taka a thlem chuan a nêm mai ang tih ka hlau.


Ni lo, ni lo, ka ring tur a ni.


Ka âwm dawmin boruak ka hip lut kâwk kâwk, Sammy-a chungah rinna nghat phawt teh ang.


Manoi chu a reh leh hmak.


Khawiah tak awm bo leh ta ang maw. A duh hunah lo langin, a duh hunah.a bo leh daih zel mai.


A bo avang tak hian ngaihngam taka awm har ka ti tawh.


Chuvang chuan a rukin Siamtea ka bia, "Aih, ka hmu lo reng reng. School-a a lo kal lohna a rei tawh lutuk, ka hmu tawh ngai lo", Siamtean a ti a.


Dâwt a sawi lo chiang.


Freddy-a pawh a rukin ka bia a, Manoi nen an inhmuh miah loh thu a sawi bawk.


An nu ka ni a, dâwt an sawi leh sawi loh chu an mitmeng aṭangin emaw an chezia aṭangin ka hre thawkhat ve viau.


Dâwt an sawi miah lo a, Manoi chu khawiah tak awm ang maw?


Min lo biak hmasak loh chuan va biak hmasak ka tum lo bur si a.


Sammy-a nen te hian an lo inbe ru reng te pawh ni mahna. Lo inbia pawh nise, Sammy-a a let tawh dawn chuang lo. Chutah chuan innghat hmak ila, ring tawp ang.


Siamtea leh Freddy-a te School chawlh aṭanga ni hnih hnu, Krismas bazar hun lai takin kan chhungkuain Serchhip bial kan fang.


Khaw tin deuh thawah keimah lam leh Sammy-a lam aṭanga laina hnai te an awm nuk ve avang hian, tlem chuan ngaih a ṭha deuh.


Keima lam aṭang hian laina hnai kan ngah tih chauh a ni.


Ngaihngam taka awm erawh tih loh tawp tur a ni a, ṭan a ngai zual zawk.


Ka hmuh chhuah tak chu, mipui hi kan fing thei lo tih hi ni. Pawisa chauh lungkham ang maiin kan inpêl suau suau chu a ni si.


Nitin khawsak phungah pawisa a pawimawh lo thei lo, kan dah pawimawh lutuk erawh a ṭha lo.


A ṭha lo tiin han sawi kur ngiai nguai mah ila, pawisa mamawh tak tak chhungkua han hmuh erawh hi chuanin, Vote leina pawisa an lo dawng mai ṭhinte pawh an demawm chuang loh.


Nimahsela, chu chuan Ram hnuk a khawih ta ṭhin a, Ram mai bakah naupang hian an tuar nasa.


Vote leina pawisa avangin dikna kan rap bet a, dikna chawinung turin kan thawk chhuak ngam tawh meuh lo.


"Eng nge i ngaihtuah vung vung a?", a bekah a indawm kang a, min en chhuk run.


Thenzawlah kan awm tawh a, naktukah Sammy-a te awmna Hnahthial kan pan ang a, Kum Thar hman zawh hunah Aizawlah kan awm leh ang.


Sammy-an motor a khalh a, khalh chhawk turin ka thiam si lo, a chau tih ka hria.


"Pawisa, pawisa ka ngaihtuah, dik takin kei pawh hian pawisa ka duh tho. Vote hlu tak pakhat man erawh dawn(dawng) ka duh lo thung. Campaign-ah hian pawisa an theh chhuah ṭhin chhan hi hriatthiam har ka ti.


Inthlana ding tur te hi Kohhran leh Khawtlanga mi fel tak tak te an ni a, Vote zawn nan erawh dik lo takin pawisa an che lek leh thung si a, ka hre thiam mai lo. Pathian hming an lam chhen bakah, Pathian hmingin intiamna te an la nei zut zut leh nghal", Sammy-an min ngaithla kar.


"Politics chungchang i sawi chhuah hmasak berna a ni, i ngaihtuah thûk hle mai",


"Mi zawng zawng ngaihtuahna alawm, hetiang hi tu rilru pawh a ni. Kan Ram hruai turin mi dik leh fel kan duh, chutiang mi an dinin thûm dawt khawpin kan tlak tir a, kan iai em em te chiang tak maiin kan chawisang leh lawi. Inthlanah hian kan huaisen leh huaisen loh a lang a nih ber ta hi maw".


Ka tuiral ngang a ni, ka luang liam zawih zawih mai.


Ngaithlatu ka neih ṭhat vang te pawh ni fahmiang.


Sammy-an, "Luang liam zawih zawih rawh, i luan(luang) ral erawh ka phal lo", a ti chu nuih seihin, "I tan te chuan luan(luang) ral ka pawiti hleinem", ka ti a.


A ṭum khatna atan Sammy-a lâi hmel ka hmu.


A khap sak sak, "Sam, kei pawh ka lâi fo alawm, a ho lutuk",


"Ka lâi mai mai lo", ti chung rengin nui ṭha ngam loin leh min en ṭha ngam loin a khap sak sak.


Chhe hei le! Tu pawh kan lâi fo a, zahna tur a awm lo chiang em mai.


Siamtea leh Freddy-a chu a pi leh pu bulah an mu a, ka vahte hoin ka pindan an luah tawh avangin leh, naupang mai an nih avangin Lal Fanu leh Sammy nen Sitting room-ah kan mu.


Ka vahte hoin pindan ken min tum reng, Sammy-an chhuata mut a pawi tih loh avanga mu kan ni.


Chhuata mut ka hnial lem lo, a chang chuan khuma mut reng ai hian chhuatah te han mu zeuh ṭhin ila, taksa hi a hahdam zualin ka hre ṭhin.


Sammy-a lâi a pangngai tial tial.


A mut naah Lal Fanu sawnin, "Tawlh phei rawh", min ti a.


Kut vawt tâwkin ka kekawr chhung a zen mai a nih kha, "Intihlum a ngai ngang mai, ka mu lum zo dawn lo, a vawt lutuk a",



"A phakar thu hla em mai", ka tihsak a, a duh ngang lo ni ang chu ka hmui hnuai a seh vak.


A banpuam ka sik sawk, min thlah rang lutuk, "Seh ziah suh, ei theih a nih loh hi", ṭawng rin(ring) chi tawh loh.


Chhungte chu an muhil vek tawh, ka pa hnar ri phei chuan in chung a thlawh chhuah tir hial ṭep tawh.


Sammy chu ka beng bulah, "Zanin chu ka chhaih peih tlat lo che, min hre thiam rawh", a phun sup a.


Peih vak lo mah ila, hriatthiamna nen ka puibawm tho.


A sawi ang takin a zawh(zo) hnuah a muhil chiah chiah. Vawrtawp thleng lo pawh ni ila, min tihchauh ve em avangin ka muhil ve thuai.


Hmingin min lo thlah a, "Lalhming, min vote loh chuan i hre khawp ang ka tih kha aw",


"Keini akara kan vote in duh te chuan, pek in ni mai zel ang chu le", he nu tak hi chu aw...


Chhungte nen invai lawm lawmin, Hnahthial kan pan ta a.


"A nuam e, Apa, zin leh ang u", Freddy-an a ti a. Sammy-an bu nghatin, "Nakinah, Krismas kan hmang dawn nia", a ti a.


Freddy-a te ai mahin ka lawm.


Thenzawl hi chu, kan khua a nih avang pawh ni loin a nuam em asin. A zâwl cham duai mai a, Dil a tamin, duhtawka Dil Sangha ei tur a tam.


Puanah lah kan intodelh.


Mizorama Puan Tahna hmunpui leh Zawrhna hmunpui a ni bawk a, ka fak ve em!


Sawisel ka phal lo, Thenzawla Hmeichhia tih ni tawh phawt chuan Puan Tah kan thiam vek.


In tinah Puan Tahna a awm bawk a, hei aiin Sawrkar hian min han dawmkâng zual sela chuan, tun ai hian Eizawnna hlawk leh tling a ni ang.


Sammy-a a awm a, lungngaihna tur a awm tawh lo.


Kan tlin ngei ngei a ngai tawp mai a ni.


Lunglei thlengin, Hotel Malawm Hotel-ah zan khat kan riak.


Siamtean, "Anu, he Hotel hi Rose film mi kha tiraw?", a ti a. Ka ngaihtuah neuh neuh.


Sammy-an, "Ni chiang e, Room Number 304 dawt chiahah kan awm", a lo ti hman.


"Room Number 304 kha tiraw,.Haris Barachi-a Changtupain a thahna kha?", ka ti a.


"Haris Barachi-a a?", awihlo zetin Sammy-an a ti. Lal Fanuin a hrethiam ve chiah lo a, Siamtea leh Freddy-a an nui nasa mai mai khawp a.


Towel phawrhin Sammy-an Lal Fanu a pawm a, "Insil fai ila, chaw ei turin kan chhuak dawn nia", a ti a.


Freddy-an, "Apa, lêng ila, Lungleiah kan la kal ngai miah lo", khuma a mu phar duai chu thoin, Bathroom-ah a pa a zui lut.


"A nih chuan, kan lêng dawn nia", Sammy-an a ti a.


Siamtea nen erawh chuan Room Number 304 chhunga luh kan châk thu kan sawi niah niah.


"Anu, chhuak chhin ang",


"Ngam maw?",


"Ngam chiang lutuk".


Kan nufa têin kan chhuak ru ṭhem ṭhem, Room 304 hmaah kan ding ren rawn a, uluk fahran lutuk tak maiin number chu kan han thlêk kûr nasa mai a nih kha.


"Anu, kei chu ka hlau e. A chhungah kan awm lo hi ka lawm",


"Kei pawh ka lawm, film mai mai ni mah se, ka hlau deuh tlat", ka phun sep.


Kan hlauhna tibelhchhah turin Room chhungah bungraw lian tham tlu rawk thawm a awm leh ta nghal.


Siamtea nen kan phu nasa lutuk, min kuah bet thlawp.


Ka pawm a, rang lutukin kan Room-ah ka tlan luhpui.


Khumah kan tlu thal ṭhuai, inenin kan nui vak vak.


"A hlauhawm e", Siamtean a ti a. Pum dawm meuhin kan nui vak vak.


Sammy-a te rawn chhuakin, "Ka nui ve duh", Freddy-an a ti pek.


"Intifai ula, chaw ei tura chhuah a ngaih kha", Sammy-an Towel min rawn pe.


Nui huah huah chungin Siamtea nen Bathroom-ah kan lut.


Hotel-ah chaw ei tur a awm reng, han chhuah vah hrim hrim kan duh avangin Hotel pawna ei turin kan chhuak.


Lunglei chuan an Kâwn an chei ve lo a, In ṭhenkhat hian an chei tlangpui. A hmuhnawm tur ang ang chu a hmuhnawm tho.


Chaw ei ta chuang loin Restaurant-ah kan inhnawhpuar ta vel mai mai.


Kawmzawlah kan lêng a, Sethlun Helipad-ah kan lêng bawk. Vâwt tak a ni, vâwt tak.


Inha lum hle lo ila chuanin, kan khawng thei ang tih tur a ni.


Lên kual chiam lah ni hek lo, zinga kan chhuah a ngai a, dar sawm hmain Hotel kan thleng.


Chaw, Buh kan ei loh avangin Sammy-a ngaih a ṭha thei lo.


A hmingin chaw kan han ei ṭha leh, Restaurant-a kan inhnawhpuar el ul tawh avangin ei ṭeuh a har.


Ei tur leh in tur kan lei ṭeuh bawk, zanah chuan kan ei thei tawh dawn lo a, zinkawnga ei atan.


Kan puar tlang nge, kan chauh avang nge ni, lukham kan deh rual rualin kan chatthla nghal hlawmin ka hria.


Sammy-an min kaitho sang sang, Freddy-a leh Lal Fanu chu an harh thei thlawt lo.


Lal.Fanu ka pawm a, Sammy-an Freddy-a a pawm.


Siamtean bag zâng deuh deuh a khai bawk a, kan ṭangrual em asin.


Tichuan, Hnahthial panin kan inkhalh chhuak leh ta a.


Lunglei leh Thenzawl nuam a tih thu Freddy-an a sawi chhuak leh zeuh ṭhin.


Hnung lama inherin, "Bawihte, Lunglei nge Thenzawl nuam i tih?", tiin ka zawt a.


Phur lutuk maiin, "Thenzawl, a chhan chu Anu khua a nia", Freddy-an a ti hluai a.


Sammy-an, "Anuin sawi turin a ti che mi?", a ti chu, "Ti mai mai lo", lungawilo zet hian ka ti.


Freddy-an, "Anu awmna apiang chu a nuam ka ti vek", a ti a.


Min tilawm lutuk ringawt.


Omomi Khiangte- Tui leh Mei kan sakpui tluk tluk. Lal Fanu pawhin sakpui thiam tawh tak a ni.


Tluang takin Hnahthial kan thleng.


Kan chau tawngkhawng a ni ang, Sammy-a te pafa chu thlen rual rualin an muhil nghal ti ila ka sawi sual lo mai thei.


"I duh hun hunah mu rawh aw, Aizawl aṭang chuan a hla tham a. I chau dawn lutuk", Sammy-a U Hmangaihin a ti a.


Nu ber mut daih thu a awm lo, ka inthlahrung.


"Chau lo e, kan rawn chawl phei zel a, chauhna hun a awm lo", ti liam puat mah ila, ka chau ve khawp mai.


U Hmai hi upa ber a ni a, pasal a la nei lo. Sammy-a hi a chhang chiah. Sammy-an kum sawmli bang a su tlang tawh a, U Hmai kum tur chu a rin thiam theih mai.


Sammy-a chhang chiah Lalfela leh a nupui leh a fanau te Phaiah a awmpui, Phaia hnathawkin a awm a, kumin an lo haw thei dawn lo.


An naupang ber Hriatpuian nupui la nei loin, Primary Headmaster niin School a ṭhutchilh mek thung.


An fel hrim hrim, u Hmai hian a vahte a duat thiam a, haw phei tawh chuan keimah chawp chawp hian min duat.


Nula Senior thinchhia, mahni thu duh tih ang zawng zawng a nei ve vek tho, mahse; a bulah hi chuan nuihna tur a tam ka ti a, nêlawm ka ti tlat thung.


In khata kan inchenchilh loh avangte pawh a ni mahna.


Inchenchilh pawh ni ila, a nelawm ka tih tho ka ring.


Hrisel ṭha tak leh dam takin Krismas leh Kum Thar kan hmang liam a. Aizawla kir turin kan inpuahchah ṭan leh ta.


Kan châm chhungin Politics kan sawi lo, a changin ka nu leh pa hian Sammy-a an sawipui ve zeuh.


U Hmai phei chuan a sawi lo tluk a ni.


Siamtea te unau bulah a awm char char. Hriatpuia nen hian an sawi dun nasa ber.


An sawi tak erawh ka hre pha lo thung a, an ṭawiawm ṭhain an phurpui ngawih ngawih tih erawh hai theih a ni lo.


Lal Fanu chu an tunu dik tak angin an ngai. Hriat chhuah hun an nei ang em le?


Lo nei palh hlauhin, an thlahthlam mai ang em aw? An thlahthlam mai ka ring lo, ka awm tawh a, keiin ka thlahthlam dawn lo.


Ka fanu neihchhun bik liau liau a ni tawh.


Hnahthial aṭangin Lunglei kan thleng leh ta a, Hotel Malawmah bawk kan thleng.


Murray Kitchenah kan inhnawhpuar a, Sobji Bazarah te kan lêng. Ni khat kan châm nghe nghe.


Thenzawl kan thleng leh a, châm rei duh thlawt a theih tawh loh.


School ṭan a hnai tawh.


Dam leh tluang tak bawkin Aizawla mahni in ngei kan thleng ve leh ta.


Duhtâwka mut a ni mai, Sammy-an min kaitho ngai lem lo bawk a, duh chen chen ka mu.


Ka inthlahrung duh bik lo.


Mut nasat poh leh, mut a chhuak ting mai thung.


School ṭan a ni tawh bawk a, Sammy pawh Party Office lamah a inreport ngun thei khawp.


Dawrah ka kal hman tawh lo, Hriati bakah Nancy min pui turin kan la leh.


Freddy-a School bâng hruai pahin ka tlawh ziah thung.


Ina awm deuh tawp a ni ta ber a, inlêng kan ngah zut tho.


School Final Exam-in min nangchho mai si a, lehkha zir nen, ei rawngbawlah Nu Papuiin min ṭanpui mah se, mahni tâwkah chuan buai leh hah ka inti ve tho.


Buai leh hah taka hun hman chhoh zel hnuah kum chanve kan thleng der mai a.


Inthlan kum a nih angin kan ṭang nasa hlawm tawh mai si a, Social Media leh Youtube-ah te pawh a ni ang chu, Candidate turte chanchin leh thlalak nen lam a darh chuai chuai tawh.


Sammy-a chu, Pathlawi, fa pathum nei nei tiin a lar a. College-a a zirlaite ni fahmiang ka ti mai, amah ṭan zawnga thu hnutchhiah an awm leh ṭhin.


Ka en ṭhin a, a Candidate pui teah Pathlawi an awm lo.


Chona nasa tak erawh a ni.


Ka nu leh pa, Sammy-a nu leh pa zawkin min lo awmpui ta a.


Campaign ni chiah si lo hian Serchhip bial kan va fang ṭhin.


Siamtea leh Freddy-a chu ka nu leh pain an awmpui a, School kal ve lo Lal Fanu leh kei leh Sammy nen kan ni tlawng mai.


Loh theih lohin Driver nen mi pali lai chu kan ni ve. Kan ṭhahnem ve em mai a!


Phone thar ka neih avangin Fb leh ig tihah te account ka nei lo hrim hrim. Sammy-a hriat lohin account lem ka siam a, chumi hmang chuan Social Media-a Sammy-a an sawina ka hria.


Ka account hluiah ka lut zauh zauh ṭhin bawk, Sammy-an Social Media-a active a phal lo, thlawtin a!


Amah pawh hian Fb-ah chauh account a nei. A khât tâwkin post a nei zauh zauh a, Party thil lam vek.


Zan khat chu, "Sammy, ih maw, Hnahthiala ding loa Serchhip Biala i din chhan hi eng nge? Hnahthial chu kan khua a nia, hneh takin i tling awm si a", hei hi ka ngaihtuahna a rei tawh.


A din hmasak berin Hrangturzo a ni a, a tling lo a nih kha.


Ṭum hnihna atan Serchhip Bialah a ding a, Hnahthialah ding se, a tling var varin ka ring.


Sammy chuan, "Mahni khuaah hi chuanin Hnâwn(hnâwng) a awl em asin, Hotu te thua awm a ngai ve bawk a ni", a ti thâwp sup a.


A nih duh hmel riau.


Lal Fanu nen min kuah. Tunlai chu a chau thlu ngang a ni ang, nupaa inpawm chial kan nei ta mang lo.


Ka thiam lo lo, a rilru leh taksa a hmang rim dawn a, a chau dawn.


Ka thlawp tlat a ngai zawk a ni.


"Chhuanpui, i hman em?",


"Hman e, eng nge ni ta a?", Chhuat ka nawt reng sia.


Hman anga insawi a ngai ve tlat, phakar thiam a ṭul ve lawm.


"Chhuanpui, khawngaihtakin File min lo pe, College-ah ka awm. File Eng(yellow) a ni ang aw, i Dressing Table-ah ka dah, ka manghilh palh", a rawn ti a.


Chhuat nawh lai dah felin, ka nu bulah ka sawi.


Ka nu pawhin kal turin min ti a, insiam sawk sawkin File kengin College ka pan.


A chetfel thlip thlep tehreng nen, a theihnghilh chu a mak angreng. Ni bawk tak e, keimah hian ka insiampui a, keima thiam loh zawk a ni.


Mak thei em mai a, a dah tih ka hre lo, amah thiam loh zawk.


College ka thleng a, Class an la kal tih hriat takin a reh diak a, Classroom chhungah an phu mur mur.


Office-a kalin, Sammy-a hmuh tur awm lo chu a awmna ka zawt.


"Library-ah a kal lawk", an tih avangin, a dawhkanah File dah mah ila, hmu loa haw ka duh loh avangin Library awmna zawtin, ka tlan lo chauh.


Library pawh a reh diak a, Librarian hmuh tur a awm lo.


Class lak hlanin chawlh a nei nge mawni?


Sammy-a koh ka tum hman, mahse; "Chhuanpuii bulah Lal Fanu hi i fanu a ni lo tih ka hrilh mai tur asin, heng thil zawng zawng thlen chhan chu Politics vang vek. Nang pawhin i hria, Politics luhchilh lo la chuan kan inṭhen miah lo ang", Manoi a ni chiang lutuk.


"Politics ka luhchilh hma pawhin ka ngaidam ngun tawh che", Sammy-a âw hi chu ka hai thei lo.


Tun hma zawngin Manoin a lerhsan ṭhin tihna mawni le?


"A chhan i hre duh em? A chhan chu, ka hmangaih lutuk che, ka hmangaih em che avangin ka ring che a, rin ngama i awm ka rin avanga ring che ka ni. Mahse, tunah chuan, rin ngam i nih lohzia nangmah vêkin i fiah a, ka ring ngam tawh lo che a, ngaihdam chu ka ngaidam che, kuangkuah leh tur erawh che chuanin i lakah hian ka Thinlung ka khar tawh".


"Sammy", Manoi chu a insût hlawp hlawp.


An awmna ka hre lo a, ka hmu thei si lo, lungchhe takin Manoi a awm tih leh, Thinlung na takin Sammy-a a awm tih bak hriat ka nei lo.


Ka mitthla thei.


"Min ngaidam rawh, nangmah lo chuan ka nung zo lo ang, i hmel hmu loa ni khat lek hman ral pawh harsa ka ti",


"Chuti, engvanga khatianga awm nge i nih?", ka mittui a tla ve hmiah.


A chhan pawh ka hre lo.


Manoi chuan, "Politics vang ka tih kha, Politics i luhchilh aṭang chiahin min hlat a, Politics avangin chhungkua pawh kan hlim lo. Politics-in a nih hi min ṭhen hrang. Sammy, engtiklai pawhin ka hmangaih che, ka hmangaihna che hi a nghing ve ngai lo asin", a ti a.


A ṭap nasa mai si a, Sammy-a ngeng a chhun tlang thei dawn tawh lo tih erawh ka chiang thung.


Manoi chu lainatawm hle nachungin, Politics a puh fai vek erawh ka dem lo thei lo.


Sammy-an, "Politics ka luhchilh hmain Politician nih ka tum tih i hre vek, hre reng chunga min nei i nih bawk kha. Haw tawh rawh", a ti chu, inhruhul thuak thuakin, thawm nei lo thei ang berin ka chhuak.


College ka chhuahsan fel hnu, taxi chhunga ka lut chiah tihin Sammy hnen aṭangin call ka dawng.


Ka chhâng lawk lo, vawi thum rik hnuah chauh ka chhâng.


"Aw, Sam?",


"Khawiah nge i awm?",


"In ka thleng ṭep, File ka lo dah aw, i lo awm si lo a, ka haw ta mai. Hmu lo chea haw ka duh loh nen", ka ṭah a chhuak lutuk chu hrehawm tak a ni.


Sammy-an, "A nih, tlaiah kan inhmu dawn nia", a ti a.


Manoi a la hmangaih reng si a, Vote zawn nan chuan min nei tak tak a nih ber ta hi maw?


A pawi chuang lo, a duhthusam tipuitling theitu ka nih phawt chuan ka lungawi mai a ni ang chu.