Chapter - 25
Ziaktu : ilefi imoz
(Recap : Thîkna vângah ka ngâi thei angem? Midang nena kan chanchin a ngaihven dan te, midang an lo telve aţang chiaha hmêlhmâi hmuh hrehawma a awm ta mai te, ţawngkam mei nei tak taka min chhâl ta fuk fuk mai te hi thîkna vang a ni thei mai angem le?)
Thim hlim aţanga ruah a sur cherh cherh avangin power supply kan nei lo thuai a. Batti ken nachâng hre hovin an neih ang ang chhîin classroom leh dorm-ah lehkha an zir hlawm a. Keini dorm chhunga awm te pawhin batti hnuaiah lehkhabu kan inchhawp ve far hlawm.
Zan dar 9:30pm a rik hnu phei chuan U Arona'n duh duh dana awm a phal thu sawiin Principal office-ah min luhsan daih a, zirna lama ţang fâl deuh tih loh chuan mut kan tum vek. Ruah pawh tla cherh cherh tawh lovin a sûr buan buan a. Khua a vawt angreng bawk nen lehkha chhiara ţhut reng chu thil peihawm a ni lo.
Mu tura mutbu kan kaih pharh mêk laiin kan dorm kawngkhar an rawn kik karh karh a, kan kalh tawh vanga rawn kik deuh thlap an nih ka ring. Marini'n kawngkhar va hawng dêk dêkin pâwnlama mipa lo ding chu a va chhâwn a, min rawh tlêk zeuh paha, "Sawmzel, classroom-ah i lo kal lawk hman em an ti che!" A rawn tih chuan a ngaihna ka hre lo khawp mai.
"Tunge a?" Ka va tih chuan, "Michael-a, a kal leh tawh" a lo ti mai a. Min mamawhna an nei anih ringin ka thochhuak thuai a, classroom lam pan chuan ka phei nghâl bawk.
Corridor chu ruahin a nan huh avangin bang kil lam chuhin ka pên hlawk hlawk a, a thim bawk nen kawng pawh ka hmu hleithei lo, indapchawp takmeuh meuhin a ni ka kal ni!
"Tu nge awm?" Classroom kawngkhara dâk lût heu chunga ka tih chuan thâwm engmah hriat tur a awm lo va, a thim chah mup a, ruahsur ri a bengchheng hlê ringawt! Hlauh erawh ka hlâu hauh lo thung.
"Michael!"
"Keimah zawk" tih ri leh lighter ri khep chu ka hre zui a, reiloteah tlar hnung ber dawhkan chu batti êngin a rawn kâp sêt sêt a, Op-a lek chu lo niin!
"Eng nge? Tun ang zân zânah te min koh a?" Tia a lama ka va phei chuan a ţhutna bul bêng thak thakin min lo ban a, chu erawh ka hnial chiang khawp mai! A ţhutna hmâ chiaha ţhutthlengah chuan a lam hawiin ka ţhu thla dat a. A kiai suk ringawt.
"Sawi rawh, tinge min koh? Mipa leh hmeichhia kan nia mite min hmuhah pawh a mawi lo" chîk deuh zawka a mita melh ralh chung chuan ka ti ţha leh a. Ka sawi dik chiah bawk. Engmah ti miah lo pawh ni ila mite min sawi leh dan tur kan hre lo. Kan thang chhe viau thei a, mî nu leh paten an fate zilh nan tak te pawh min hmang thei. Hetiang hun hi fimkhur a ngaih hun lai tak a ni tih ka hria.
"Ţhian kan ni tawh tho a, bestfriend te pawh.. Mahse ngati nge tun thleng thlengin kan la inngaihzawn loh le?" Nui deuh, thutak hmel deuh si hian a sawi a, a thûm bul bul mai!
A ţawngkam chuan ka awm a tinuam lo va, han inngaizawng tak tak tur anga ka ngaihtuahin u Arona ka ngaihtuah tel lo thei si lo. Chutih laiin Op-a lakah inthlahrunna chin ka nei ve tho a, tuilairap an sawi ang tak tak hian ka awm!
"Ih.."
"Min hnawl dawn chuan engmah sawi lo law law rawh. Ka hre duh lo. Ngaihzawng i la nei ngâi lo tih ka hria a, a hmasa ber nih ka duh. A theih phei chuan a hnuhnung ber nih pawh ka hnial miah lo" ka ţawng ve hma chuan a lo ti leh zung zung a. Hnâwltu nih hrehawm khawpin alawm a ţawng le! Engtin nge ka tih tâk ang?
Rei fê inngaihtuahin ka ngâwi vang vang phawt a, rilru chuan hmun tin hmun tang a dap kual ruai ruai a ni ber mai. Châmi chuan Op-a nena inngaizawng turin min duh a. U Arona theihnghilh nana han ngaihzawn ve chhin reng reng pawh ka duh ve tho. Mahse midang theihnghilh nan maia han ngaihzawn chu ama tan tak pawh a tlâwmthlâk dawnin ka hria a. A lakah ka inthlahrung a ni.
"Ih maw Op, hmâna ka sawi kha i la hria em? Duh ka nei ka tih tawh kha?"
"Hria e, pawi ka ti lo. Ka theihnghilh tir thei chein ka ring tlat! Ka chiang bik chuang lo va mahse, min fiah chhin turin ka duh che Sawmzel, a rei anga, i hmangaihna ka la hlawh chhuak ve ngeiin ka ring tlat!"
"Nakinah i inchhir lehsi lovang maw? I bialnuin a rilruah mipa dang vei a nei tih hre reng chungin i hlim thei tak tak dawn emni?"
"Kei aia duh leh hmangaih a nei anih chuan a thu alawm, a nun a ni miau a. Inrawlh theihna dân ka nei lo. Mahse tum chhin ve hrim hrim ka duh, kei min neih chuan thil dang a mamawh bîk lohzia hriattir a, hmuhtîr ngei ka duhna hi a lian lutuk a. Duh dang a nei tih hre reng chungin ka thlah phal lo chu anih hi!" A ti leh fan a.
Kan in ang hlê mai! Keipawhin ka mipa hmangaih hi chelh beh tlat ka duh a. Midang nena inlaichinna thûk tak an siam lai pawhin nghah fan fan a, nghah chhuah duhna thinlung ka pu tlat a, engtikah emaw ka tâ a la nih ve ngei beiseinain nî ka vui liam ve ţhin. Op-a nen hian kan inang ta hlêin ka hria a. Kan danglamna erawh ani chuan a mi duh tak chu a nghâk chhuak a, kei erawhin ka nghah mêk hnen thleng lovin min nghâktu hnen lam zawk ka pan dawn ta a ni!
"Sawmzel!"
"Kan ni dawn nia! Mahse thil pakhat hre turin ka duh che. Hun inher zêlin a laka ka rilru puthmang a kuai her tel thei ve lo anih a, ka thinlung zawng zawng i hlawhchhuak thei lo anih pawhin kei ni lovin nangmah indem ang che! Mahse chutiang thu ka sawi vang ngawt chuan ka duh lo ta viau che a, hmanrua ang lekah ka ngâi che tihna erawh a ni lo. Ka ngainat zâwng tak mipa i ni a, kan inkawma kan han innêl chhoh tâkah phei chuan ngaihzawng atana ka duhzâwng tak i ni tih thlengin ka hrethiam ve zel bawk. Kan ni dawn nia" ka ti ve ta nge nge a. Zanina ka thuthlûkna siam hian nakinah inchhîrin hun min hman tir loh hrâm ka beisei takzet a ni.
"Eng maw?? In ni ringawt maw?"
"Bengchheng suh midang ho hi an harh ange!" A hmui hup behsak chawt chawtin Vanlalchâmi chu ka kuai mu lawp a, mak a tihzia a aw kî-ah a hriat theih vek! Batti kan chhêm hlum tawh avangin a hmel ka hmu thei tawh lo mai pawh a, a meng pâwng hlawt hlawt ang chu!
"A dinhmun ka ngaihtuah a, ka dinhmun nen a inang lutuka ka khawngaih alawm, kei ka beidawng anih pawhin ani tal chu beidawng ve lo se ka duh. U Arona laka ka chan ang hi chang ve turin ka ngâi ngam lo a ni ber. Op-a chu a fel a, a rilru pawh a ţha. A duh tak neih hi a phû ve rêng ka tia chuvang chuan ka chhâng. Bakah ka rilru put hmang zawng zawng zêp lovin ka hrilh a, a hre vek a. Chuti chung chung pawha min la pawm theih tho chuan ka tan chubâk a awm chuang lo. Tihian keipawhin amah chauh ngaihtuah tum ila u Arona pawh ka hlat ve tial tial mai ang" tiin ka chhâng ta duah a.
"A dik chiah alawm. Rem lo tur a rem hun nghâka awm khawtlâi vel chiam ai chuan a remsa pan chat kha a ţha zawk daih. Lo ngâi reng mah rawh u Arona'n a hriat hun chuan maw, nuam a ti bik miah lovang. A rilru a na ve dawn chiang lutuk, tuar ve deuh hlak rawh se hei chen i nghâk tawh a, i nghâk chhuak zo lo ania, bansan a hun chiah tihna anih kha" tiin min rawn kuah thak a, ţhianţha neih man a awm ţhin e.
November thla kan chuangkâi dêr mai, u Arona duty hun pawh a rawn inher chho lehzel a, a karlaka thil thleng te chu han sawi chhâwn leh tlâk pawh a awm hlawm lo. Zirna lam kan bei ngawrhin kan chêr chhe tawh hlawm viau e tih a ni mai.
"Sawmi, Op-an a nghâk che ania, ka rawn kal ve tawh lo mai ang kei chu, ka châu tawh" school hnung aţanga min rawn au lawng lawngin amah Châmi ber chu a rawn tlân phei hlawk hlawk a, dorm-ah a rawn bawk phêk thler mai!
"Ka châwi kêp peih miah lo che ania aw, insûkna tur i neih ve loh pawn min dem thei lo ang" tih paha kalsanin school hnunglam chu ka pan phei chhat chhat a. Bucket pahnih khâi chungin Op-an nui var varin min lo thlêk hâ a. Tui châwi dun chu a romantic viau pawhin ka hre lo e a.
"Sahbon keng ila, kan insil nghal daih dawn nia" a tih vangin ka lêt leh rih a.
Ţhâl lai ni hran lo mah se kan school-ah tui connection a chian loh avangin thlanglam ramngaw dur khupa tuikhurah tui kan châwi ţhin a, inbualna leh insukna tiang reng chu kan châwi ngah ve mai zel. Class 11 ho an exam zawh tawh avangin class pangngai kan kal tawh hlawm lo va, chhûn lamah chuan kan âwlthâwng phian a. Lehkha zir loh kârlakah pâwnah mutbu te phovin kan mu dar dar ţhin.
"Hmangaihmawia te an kal tawh a, an lo thâl kang leh vek hmain kal thla ve vat ila a ţhat ka ring" a bul ka va thlen rual chuan a lo ti zung zung a, min kuah nghâl thak bawk.
Tuikhur lam pan chuan kan inzuithla hnak hnak a, kan hnunga rawn kal te chu an han khuh lui deuh vak vak a, kei takngial pawh ka lâi chhe ve ţêp a ni! Hetiang tak hian inngaihzawnna boruak hi a lo dangdâi ang tih rin ngaihna ka nei ngâi lo!
"I lû su hmasa ber rawh, chuan i insil ang a, kan chho dawn nia. Sir-in rei min lo ti lutuk.ang" tuikhur aţanga tui min khâi chhuahsak paha tiin sahbon leh tuino min pe a, ani pawh ka ţhutna sîr chiahah rawn ţhu vein a ke a leih huh nghâl phar phar a. Rei kan la awm lo, kan hnunga kal ho an rawn thlen kim meuh chuan lêt leh turin kan inpeih diam tawh!
"Malsawmzel, i va vâng ve! School-ah kan zawng vak vak che a" rawn tithla bawrh bawrhtu chu tudang ni lovin Fabiana a ni.
A sam buk zet chu mawi lo fêin a tibuang thûng a, a ro hmêl rep rup si, inhmeh lo tak a ni. Chhelo a intihpui ve viau chu a ni phawt ang a, a mit ang kan lo nei ve lo chu pawi ka ti ru vawng vawng mai.
"School-ah min zawn vang anih chu vâng min tih" uangthuang zeta ka lo tih chuan min rawn mitmei ralhin piah deuha ramngawah chuan a petek lût thurh a, Op-a lam ka va hawi chuan min ngaihsak lovin a ţhiante nen an lo nui dar dar a, Fabiana chu ka zui ta nge nge.
Thui vak lo a kal hnu chuan ding vutin a rawn inher thut a, thil pawimawh tak sawi tum hmêl a pu nghe nghe. A ţawng hun ngaichângin keipawh ka ngawi ve reng a, tun ang rênga Fabiana thutak hmêl hi ka la hmu lo.
"U Arona'n in chanchin min zawt! Op-a nena in inkar leh thil dang dang, min zawt ţeuh. Thudik takin ka chhâng vek bawk. Hmuh che a duh a, ko tur chein min tîr. Nang lah helamah i lo awm daih a, ka zawn nasatzia che i hria em? Vanlalchâmi lahin min hrilh ţha lawk duh lo va" chu thu a sawi chhûng zawng chuan chal tichuar nângi nângin ka lo melh reng a, ka rilru puthmang inlehthal zut zut leh insual buai leh nuaih nuaih ţhin chu ka ngâichang a ni ber.
"Chuan, min hmu ta se eng nge min hrilh a tum?" Rei fê ka inngaihtuah hnu chuan ka tichhuak ta hrâm a, Châmi sawi ang chiah khan thil a thleng niin ka hria. Thîk hun a la nei ang tih a sawi kha! A thleng tak tak tihna emni?
"Ka hre bik lo"
"I hriat bik loh te chuan min zawn loh mai tur alawm, zirtirtu nih tâk vang maia zirlaite han tirh kual kher" ner nâwng chunga tiin ka kalsan hmak a, ngaw kâr aţanga ka petek chhuak hlawl min lo hmu chu Op-a ngaihdan a ni zân lo a ni mahna, "eng nge saw lam lamah i va tih?" A lo ti chat a, ka chhân hmaa Fabiana rawn chhuak ve chiah chuan boruak a tibuai ta vek!
"Engmah" pha deuh daia tiin kaih sawn mai ka tum a, a ngaihdan a la ni lo khawp mai.
"Enteh, ţhian in nia, in inkawmngeihzia pawh ka hria. Sawi buai ka tum ngâi lo. Mahse hei kher chu thil dik niin ka hre lo, mipa leh hmeichhia, ngâw-ah eng nge in va tih dun? Tuman kan hre lo. Engmah ti lo tur ngawt chuan in va kal ka ring miah lo" chang fek fawkin a ti ta mai a!
Kan thil sawi kha sawi chhuah leh chi nia ka hriat bawk si loh avangin ka inngaihtuah mûk hlê a, han phat mar dan tur eih ka la hre lo zui!
"Insawifiahna tur i hriat hunah min hrilh dawn nia" tih leh min kaihsawn a rual a, chutih laia Fabiana lo ţhen sak hmêl chu ka va hmu hman! Ani hian eng nge tih a tum? Engati nge ka buainaah a lo nuih?
School kan thlen chhoh thleng chuan a ţawng leh ta miah lo va, tanky bulah ka bucket min dah sakin an dorm lam min pansan ta daih! A thinrim ve tak tak tih ka hrethiam a, chu zawng, nuam ka ti bîk ta hauh lo!
Ni e a tirah kha chuan mipakhat theihnghilh nan maia kawp ve chauh kha ka ni a, mahse thlâ hial a han ral hnu chuan tu emaw aiawhtu ang chauhin ka en ta bik lo! Kawng engkimah min support em em ţhin a, ka mamawh chângin a tlânchhe ngâi lo. Ka sawi lan loh tam tak hi kan kârah a thleng a, tu emaw vanga ka ţah ţum pawhin ka mittui min hrûk hulsak tawh! Mahse kei chuan a lakah thuruk ka lo la nei cheu a. Zêp ka la nei! Chu chu ka thiam loh liau liau niin ka hria. Tunge ka duh a, ka hmangaih tlat mipa hi tu nge anih a la hre lo!
A tirah engkim a pawmzam vek theih tur thu sawi mah se mihring ve bawk a ni a, lâk nat chin leh tawrh theih loh chin te chu a nei ve bawk ang. Ka dem reng reng lo, demawm ber ta chu thla hial a vei hnu pawha u Arona ka la theihnghilh thei tlat lo hi a ni!
U Muani nen an la ni reng tih pawh ka hria! Phone call-a an inbe lai ka hriat rûk vanga ka ţah ţum pawh kha ka la theihnghilh reng reng lo. Ni e, khami ţumah khân a lawm, ka ţah chhan hre hauh lo chunga Op-an ka mittui min hrûk hulsak ni! A tîrah kha chuan thil thleng ve tur rêngah ngâiin thil nihdan tur ve rêng emaw ka ti a, mahse a lo ni hauh lo!
Inzawmna ka siampui tawh anih chuan a tâwp thlenga rinawm chu ka tih tur, ka kova lum ve rêng a ni. Chu chu engtikah mah a danglam ngâi hek lovang!
"Eng maw? U Arona chungchang in sawi a, chu chu i hrilh ngam si lova in inkâr a buai zo ta tihna maw?" Corridor-a kan kal phei laiin Châmi chuan a ti deuh ţhat a, a hmêlah chuan lungawi lohna lian lutuk a lang thei hial a ni! Kan chanchin chu ka hrilh phei mawlh mawlh a, ani pawn kei ang chiahin Op-a ni lovin keimah min dem! Thil nih dan dik tak a ni bawka a âwm ve rêng e.
"Engpawh ni se Op-a hnenah chuan engkim sawi la a fuh ang. I rilrua i vei em em ţhin, kalsan i harsat em em kha u Arona hi a ni tih hrilh la. Vawiina Fabiana nena in thusawi te pawh kha hrilh rawh. Chuan amah chauh i duh thu te hrilh tel la, in ţha leh nghal a ni mai dawn a, inngaihzawnna kawngah hi chuan thuruk a tam poh leh inţhen a awlsam a, tlang taka inkawp a ţha ber" zawi deuh sapa a tih leh chuan bu nghat nghatin, "amah chauh ka duh thu hrilh tura min tih tiam loh khân ka pawm vek" ka ti nghat a.
Ni e, thil dang kha chu theihtawpa ka beih chuan ka sawichhuak thei mai ang. Mahse amah chauh duh anga insawia dawt hrilh leh chu ka duh tawh lo! A nuam lo a, chubakah kan inkar tinghettu ni lovin kan inkar tingêttu bak anih ka ring lo. Ka thinlung hi a inbuktawn chhên a, hawi lam leh pan lam tur hre lovin kawng laklawh takah ka vân ruai rih a ni.
"Awi enteh nikhua hi, a ngeiawm leh mai mai asin! Tui kan chawi zo chauha ruah a sûr dawn anih hmêl! Lo kal rawh office-ah zâi va ngaithla ve ang" tih leh office lama min kaih phei a rual a. Hnial hman pawh a ni lo, a duhnaah hi chuan a tê zawk e ti lovin min hruai phar dawr dawr zel mai!
Office chhûnga kan va luh chuan TV an lo on a, mipa leh hmeichhia pawh kan sawi lo, duh duhnaah ţhuin kan inkalpel suau suau reng a, hmeichhe ţhenkhatin dorm atan hmang mah se mutbu an têl fel thlap ţhin tho a, office pangngai nen a danglamna a awm tehchiam lo.
"Thli a thaw vûk vûk bawk sia current pawh a thim leh ţep tawh ang" Hruaisanga'n atih mêk laiin current chu a rawn thim tak tak a, TV-a kan zâi ngaihthlak pawh a tâwp daih! Thingtlang chu hetiang reng hi ania, electric ban a huh kim hma hma hian curent a thim tak tak ţhin.
"Ka hrechhuak! Bual In piaha kan underware zâr ho kha tuman kan la seng lo ania, ka va seng lawk ang aw" ti hluaiin Châmi chuan tlânchhuah a rual ta mai a, ruah bawhawk a sûr ta chiah bawk nen a va inseng kim hman loh hlauvin chhuah ve nghal mai ka tum a.
"Keiman ka va seng pui ang, intihuh suh"
"I huh vek dawn asin nangmah kha!" Tia Fabiana dan beh ka tum chuan tâl pît hmanin Châmi tlânna lamah chuan a tlân phei ve nghal a. An awm rei vak lo. An rawn lêt leh thuai a. Mak ti fêin kan lo thlîr ţhap hlawm!
Châmi chuan mipa ho towel leh underware a rawn pawm bâwr lûk a, Fabiana'n hmeichhe ho thil zawng a rawn pawm bâwr ve thung!
"Ka hmuh hmasak sak ka seng tawp a!" A thil ken ho dawhkana nghah dat paha tiin Châmi chu a nui deuh tet tet a.
"Heihi tu bra nge? A sen lehnghal a va sexy reuh ê!"
Fabiana lam kan hawi ţhap a. Sâng veh vawhah Kawrhnuai sen tâi hlar mai hi khaain a lo thên deuh lauh lauh a. A la nui ţhen thâw zui!
"Awi Lalkham!" Tih paha Châmi tlân phei ţuang ţuang chu umzui vatin Fabiana Bra ken lai chu ka phih thlâksak sawk a. "Mî privacy thil khatiangin an khâi lang huang huang ngai lo Lalkham!" Ti hlaka dorm lam a pan tâkah chuan ka ûm phei ve hnuai hnuai bawk.
Anni pawh an mak reng reng, a hmeichhia zawkin mipa ho thil zawng a rawn seng a, mipa zawkin hmeichhe thil a rawn seng ve thung a. An tihluih ti dawn ila anih ka ring chiah si lo! Mak ve tak chu a ni.
"A ti zahthlak thei ê Lalengzuala hi chu! Ka tâ lo ni lo tehreng pawh ni se khatianga khâi phar vak vak kher kha a ngâi lo. Mâwl chhah thei lutuk!" Dorm-a kan luh rual chuan a ti hmuar hmuar a, nuih insûm zeta ka thaw leh hak ţhin chu a hrethiam nge mawni, "Towel hnuaiah mipa ho hmuh hlau deuhin ka zâr ve em em a" a ti leh rih a. Towel hnuaiah te han zâr reng reng!
"Ruah pawh chu a va han tam em em ve, hetiangah te chuan tuman kan zir thei miah lo ang, kan batti ken ve chhun pawh hmân zanah kan chhi ral deuh vek tawh a. Zanin chu mutna hun min siamsak se ka ti tawp" kawngkhar aţanga rawn tilût lâng lângtu Âengi thusawi chu pawm zetin an bu tliar tliar hlawm a, kei erawh ka bu ve lo!
Camp kan neih tirh lama ka lo inthlahdah vak kha a pawizia ka hrechhuak tawh a. A theih hrâm chuan ngawrh ve deuh taka lehkhazir ka tum ve tawh a ni. Chutiang anih tal loh chuan 'an study camp a chhiatpui' te min lo ti reu reu ang.
"Sir-in a duh duh mut theih a ti" pawn aţang chuan an rawn ti lâng lâng a, kan dorm ami te pawh an rawn tlân lût ţak ţak hlawm!
Kei erawh ka batti neih chhun tawi tê nen Classroom lam panin ka phei ve thung a. A chhung ka va luh chuan mi panga velin batti hnuaiah an lo chhiar lauh lauh tawh a. Inhlat deuh deuha an ţhut hlawm avangin tlar hnung ber ka pan ve mai a, tumah kan inbe lêm lo, mahni zir zirin kan zir a ni ber e. Hmeichhia vek kan la ni zui.
Ka Political science note chu phawrh chhuakin ka chhiar mawlh mawlh a, ka thiam aia thiam loh a tam zawk hrim hrim te chu ngaihţhatthlak duh lo tak a ni! Phêk hmalam ho chu ka thiam ve zul a, ka keu hnem telh telha thiam tur ka la ngahzia mawlh ka hrechhuak! Heti hi chuan rilru te pawh a hah ve ţan ta bawka lehkhazir mood-ah ka chêng ve deuh tawh ang chu.
"I batti kha a ral teuh tawh sia helamah rawn zir phei ve daih rawh!" Tlar hmasa ber aţanga rawn ti lâng lângtu chu Diktei a ni! Ka lam hawiin a rawn nui var var a, ka teithei vak lo thung. Ka nu'n min kawm tawh lo tura a hrilh vang maia hei chen min thlahthlam thei hi mak ka ti a, ka ngaina hleithei tawh lo. Ka tilang ngâi lêm lo nâin thinlung taka pawh ka harsat ru riau a. Ka tana mi ţha an nih loh vang te pawh a ni mahna!
"Ka mu hma mai ang duh leh."
Ka lehkha chhiar lâi ka bihsan daih a. A sawi ang tak takin ka batti chhit chu a ral lek lek tawh! Ruahsûr leh current thim hi chu a inhmeh leh lutuka a buaithlak! Thil inhmeh tak, kawprem tura ka duh loh ber te zîng ami an ni.
Ka bul vêl rawn êng zual tial tial chu mak ti zeta melh kualin hmalamah ka dâk chhuak haw a. Batti sei deuh nena ka lam rawn pan mêktu chu Op-a niin ka hria!
Thli thâwin a chhêm hlum hlâu taka a kuta khuap chungin min rawn pan zel a. Ka batti chhit zawk chu rawn chhem hlumin ka dahnaah chuan a batti rawn ken chu a dah thak a. Lawmthu hrilh ka tum mêk laiin amah zawk chuan, "zir rei lutuk suh" ti hmasain min kalsan zui a! Ani hi a la lungawi lo emni?
"Op!"
A ding dat a, a rawn inher lêm lo thung.
"Enteh vawiin kha, ka sawifiah thei, mahse tunah lo.. Min lo nghâk deuh lawk rawh! Thinrim tawh lo la, ka tihpalh lutuk takzet" Ngenngawl zet chuan ka ti ta thlâwt a. Mipa hnena ngaihdam ka dil hmasak ber ţum a la ni nghe nghe!
"I sawifiah theih hunah. Tunah chuan harsa ka la ti, hei pawh hi hriat ka duh, Fabiana hi emni i tana mi danglam tak chu?" Ka chhânna pawh ngaichâng zui tawh lovin a chhuak daih bawk nen ka hawi âu heu ringawt! Fabiana leh keimah min lo ringhlel tihna a ni maw? Ka hrethiam ve ta chiah a ni! Ni e, mipa leh hmeichhia, ramngawa inzuilût te chu a ringhlel rêng ang chu mawle. Rinhlelh tur dik tak a ringhlel a ni, a ring dik lo tih mai chauh ania!
Engpawh ni se min la ngaidam rih lo tihna chu a ni phawt ang a, engtin nge maw ka han insawifiah ţan dawn ni? Bul han ţan mai dan tur ka hre lo. Ka thinlunga u Arona a la châm ve reng vang pawh hi a ni mahna!
Mahse, 'mahse' a awm. Ka laka a thinrima a lungawi loh viau lâi pawhin min ngaihsakzia a tilang leh ta tho mai. Ni e, a tilang ngêi a lawm. Chumi tichiangtu chu ka hmaa batti pakhat inchhi êng vâ vâ hi a ni a. Thim thama ka zir hlauvin min rawn pe hrâm hrâm chu anih hi!
Heihi alawm ka tana Op-a a hlut em emna chhan! Min ngaihsak fo ţhin a, u Arona lak aţanga ka dawn ngâi loh thil chu ka ti ngam chiah lo, a chhan chu u Arona pawhin thil tam tak min tihsakin min thlah ve thlap thlap ţhin. Mahse Op-a a danglamna chu thil pahnih a tih kawp ve ngâi lo!
U Arona kha chuan a kawp! Min ngaihsak em em chungin kei lo hmeichhe dang pawh a thlahthlam chuang lo va. Duh leh mamawh a nei hrang thlap anih kha! Op-a erawh a ni ve lo. A rawn lan hun la rei lo mah se chiang takin a thinlung ka hmu tlang nghal thei a, chu pawh chu u Arona laka a danglamna leh bawk a ni. U Arona chu theihtawpa ka beih pawhin a thinlung ka hmu tlang thei ve ngâi lo.
A nu but a. Duh leh mamawh a ngah lutuk vang nge mawni a rilruah thil dang tam tak a awm tlat a, chiang takin a ngaihtuahnaah ka lût ve thei meuh lo ţhin anih kha! Tunah hian duhthlanna duhthlan tur ka hmaah a inchhawp mêk a, thlan ber tur hre lovin lui kamah ka ding mêk a ni!
(Kan chawl rei hlê naa i lo chhiar leh hrâm hrâm avangin ka lawm e. Comment i lo hnutchhiah ve ngêi dawn nia)
End of chapter - 25