Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-7
Ziaktu: Cck Lalchhuanawmi


A pawi chuang lo, a duhthusam tipuitling theitu ka nih phawt chuan ka lungawi mai a ni ang chu.


Ka nu leh pain Lal Fanu hruaiin a U te school bâng an hruai a, Sammy-an Driver a lo tir vang vang.


Nu Papuii lo thlengin, ei rawngbawl ka pui a, dik takin, tunah tak hian inbun ruahna ka mamawh.


Mit tui tlak tir zawih zawih ka duh naa, chutiang thleng turin sawi chhuah tur apui ka hre lo.


Thinlung thawl hawk khawpa inbunruahna ka mamawh hle laiin, ipik ṭun chungin ka ruak hle thung.


Vote zawnna han nih tawp mai chu(h), bungrua ni loin mihring ka ni.


Manoi leh Sammy-a inbiak hriat hnu aṭang phei chuan, bungrua chu ka ni chiang alawm.


Ni lo, ni lo, bungrua ni loin mihring ka ni. Mihring azawnga hlu tak ka ni.


Pathianin duh taka a anpui ngeia a siam nakruh aṭanga siam chhuah ngat ka nih hi, ka hlu vet vet êm!


Zan dar sawm hnu lamah chauh kan in a reh.


Lal Fanu u te pahnih lehkha zir chhung ka awmpui a, inthlan a la hlat angreng nen, an ti mah mah ka ti tawh.


An over hlawm em asin.


Serchhip Bial mipui an ni lo a, Aizawl mipui an ni.


Sammy-a an tlawn tih a chiang reng mai sia, kan awmna Bial-a dingte tlawn zawk awm tak a nih vei nen.


A tling a nih chuan Khawtlang mai bakah, mimal leh chhungkua ang zâwng pawha hman ṭangkai an tum tih Siamtea takngial pawhin a hre thiam.


Freddy-a a muhil tawh a, a biangah ka chuks zeuh.


Siamtean, "Anu, Apa hi tling lo turin ka duh", a ti chu, hmâna Manoin a lo sawi ṭhaihna ka hre chhuak.


"Tling turin duh zawk ta che, nangpawhin Dream i neih kha, i Dream a hlawhtlin nan theihtawp i chhuah a. Apa pawh hian a Dream tihhlawhtlin nan a theihtawp a chhuah alawm. Apain a Dream a tihhlawhtlin theih nan kan ṭanpui tur a ni. Kan ṭanpui ang tiraw?", bei lo zetin, "Ka ṭanpui ang", a ti a.


Lainatawm reuh hian!


Ka nu leh pa an lo lut a, mutna ka siam fel tawh avangin an mu thuai. Inlêng neih chuan an ṭhu ve reng zel a, tin; Sammy-a ai mah pawha an biak duh an ni zel nen.


He Vengah hian an awmna a rei tawh a, "In Khaw hluiah in lo haw leh ta maw?", an ti hial reng a ni.


Ka nu leh pa te nen inmangṭhain, Sammy-an Lal Fanu muhil tawh pawmin kan inzui chhuak a.


Khumah an mu duh mai si lo, Matress pahnih ngawt ka thuah.


Upa lam an ni tawh a, ka ngaihtuah em a ni.


Sammy-an darthlalanga inen chunga Night Cream ka inhnawih chu, "Zanin hi i ṭawng duh lo tlat, a chhan han sawi teh", ka hnung aṭangin min kuah a.


Darthlalang a en kuau avangin, Darthlalangah kan inmelh tlawk tlawk.


Amah zawk a lâi chu ka nuih chiam, ka kâ a hup rang lutuk.


Lal Fanu a muhil tawh tak e.


Ka hawi phei a, a harh em lo. Min tithawveng huai. Huizz....


Sammy-an khabe chuar nungin min mitsir, Darthlalangah chuan a mit a fuktir ngam tawh lo a ni ang.


Vawihnih a lâi tawh, chiang kêk kâwkin a mitah tak ka en kar.


Thle sawna kalsawn a tum chu ka pawt ding a, "Khawia kal nge i tum? Cream ka lo hnawih ve ang che", a lu a thing nawk nawk.


"Wipes ka la dawn",


"Nga-", wipes la lawkin ka hmai a hru nawk nawk.


Chawlin a thle bak a, "A la fai lo",


"Nga-", tih chauh ka sawi thei, a hru leh nawk nawk. Min dim lo si, min hruk ral a tum mawni?


Nui varin, "A fai ta e, zana cream hnawih ka phal lo", a ti teh tlat.


Zan dangah pawh ka hnawih ṭhin tho sia, "Zan dangah pawh ka hnawih ziah a, thunawi i neih ngai loh kha maw", a chal a tichuar.


"Chuvang a nih chu, i biang a khâk theih em em", ka biang a rawn chuks zeuh.


Awihawm loh thei e.


"Tui i tih avang zawkin a eiin i ei kha aw",


"Dâwt a nih chu", ti hlakin min pawm kâng nawlh. A nghawngah ka kuah a, hnai set sawta min rawn enin, "Tun lai chu keimah avangin i chau tih ka hria alawm, duat namenin ka han duat teh ang che", a ti chu, "A chauhthlak zual hmel", ka ti sep a.


A duh ngang lo, "I hre ngawt lo", a ti thûm dut.


"Eee, ngawi teh", chhuatah min nghat hmanhmawh, a hui pap a, "Thil dik lo a awm mi?", ka kokiah a kiu rawn nghatin, a kâwng a dawm.


"Sam, dik lo a awm ta em ni?", a hui leh pap. Hah hmel takin a thaw hluam mai bawk si.


Hlauthawng ru taka ka nghah laiin, "I rit lutuk a, ka kâwng a tliak lo chauh a ni", a han ti mai chu, ka koki, a kut a nghahna tisawnin, a tlu lo chauh.


"Min pawm zawh loh avangin khatin sawi hlek suh", Lal Fanu a muhil tawh si a, ṭawng rin ngam loh.


Bathroom-ah lutin, ka hmai ka phih ṭha.


Hmai nung neih nan Cream kan inhnawih ve em em a, a tichhe vek alawm.


Bathroom aṭangin ka chhuak a, phone a lo hmang.


"Naktukah ka lo kal ang", a ti ta mai a.


Phone a off zui mai avangin, "Naktukah chuan khawiah maw i kal dawn?", tiin ka zawt a.


Towel banin hmai hru chungin khumah ka ṭhu.


Sammy chuan, "Tun lawk khan Serchhip-a kan Party Branch Leader nupui a boral tih min rawn hrilh a nih hi. Zing khawvar hmaa kal a ngai dawn a ni. Driver ka han hrilh lawk ang e", a ti a.


Driver hnenah, zing dar thuma lo kal turin a hrilh a, thum leh a chanvea chhuak hman turin.


Serchhip chu a hnai tho a, mahse; zanin tut tuta kal a rem chiah lo a, dar thum leh a chanvea kal pawh chu a ṭha tho mai.


"Sammy, thawmhnaw tihfel a ngai ang em?",


"Ngai lo mai rawh se, hak thlak pahnih a tawk ang".


Ragksack-ah hakthlak pathum ka khung.


"Sam, file pawimawh ken tur a awm dawn em?",


"Awm lo turah ka ngai".


Bathroom-ah lutin a ha nawhna leh Colgate thar hlak lain ragksack-ah ka khung.


Towel theihnghilh miah loh tur, ka hnawhlut tawp tawp. Ka rem fel thlip thlep peih tawh thlawtlo.


"Chhuanpui, lo mu tawh rawh",


"Mu zawk rawh, thawh hma i ngaih kha", a phone a hmet nuap nuap a, "Alarm ka set alawm", min hmuh tir kher.


Ka mut fel hma mut a tum dawn loa ka hriat avangin ka mu ta ngawt a.


Tihfel ngai ka tifel tawh tho bawk.


"Hnar nghal tluk tluk mai rawh", ka fiam zauh pek, "Thawh hai suh aw", a la ti.


Alarm a set ngei kha, "Hai dawn lo, ngaihngam takin muhil rawh", a mit a chhing mai a.


Kei pawhin mit ka chhing fel chiah tihah, "Chhuanpui, ka ngai dawn lutuk che", ka bulah a rawn mu fel thân.


A chep chepa a inrawlh manah, Lal Fanu ka tawlhpheitir duh bau lo.


Suahsual chhuah tlat nun ang kha!


A bân min kham tir a, chu chuan nghawng lam aṭangin ka kawr chhung a zen a, ka hnute a ṭham.


A kut kham loh lamin ka kekawr chhung a zen a, "Nghal ka chhuah miah lo ang", inbeng kâng deuhin min fawp zauh.


Nghal a chhuah lo tak naa, hetianga ka taksa khawiha mut kan la neih loh avangin min tikhawlhkham.


Ka muhil thei lo, thihna avanga zin chhuak tur a ni a, a châm chhung tur a hriat loh.


Chuta kara lo hnial ka duh lo.


Mut erawh, ka muhil thei lo a ni e. Ka mit ka chhing a, ka awm thiam hlawllo. Sammy-a kut chu laksawn hial ka duh.


A phone a rawn ri leh tleng tleng.


Rang taka thoin a chhâng a, "A va rem loh hmel ve aw...Kan lo tum ang", a ti a.


Harh chiang ngang ka ni a, ka tho, "Buaina dang a awm leh em ni?", a rawn ṭhu a.


"Serchhipah chuan kan chhungin min rawn beisei deuh a ni".


Kan chhungin kan kal thei lo phawt mai a, ka nu leh pa an awm tho a, Lal Fanu nen zui ta mai ila, a ṭha ang.


"Ngaihtuah ve vak suh, ka sawifel ang a, min hrethiam lutuk ang",


"Sam, chutiang ringawt a ni thei lo, Lal Fanu nen kan lo zui ang che. Ka nu leh pa an awm tho, Siamtea leh Freddy-a an hautak lutuk tawh lo a, kan haw hma chu an lo awm thei mai ang".


"Kei min beisei chu chiangsa a ni a, min rawn zui phei chuan an lawmna a zual hle ang chu",


"Ni chiah e, chhungkuain kan kal theih loh pawhin kei leh Lal Fanuin kan zui ang che. Dar ngaah chhuak ang, Driver hrilh ṭha leh lawk la".


Driver hnena a sawi ṭhat chhungin, Trolley medium-ah kan pathuma thawmhnaw ka khung mawlh mawlh.


Hakthlak pahnih thum bak a ngai lo ang.


Ka tan, puan bih tur rawng dum ken a ngai ngei ngei, kawr dum nen.


Kan mu ṭha leh ta a, min zen tawh em lo. A chep chepin a inrawlh tho. Inherin, keimah zawkin ka kuah a, a âwmah ka innghat hle hle.


Siamtea leh Freddy-a ten min zui châk lutuk chu kan inthlêm thei mang lo.


Freddy phei chhuatah a ṭap nuar vak vak.


Ka nuin, "An lo haw leh vat dawn alawm", a tih pawhin, "Anu bulah ka kal duh", a ti tlat.


Nuar ngam chiah lo Siamtea pawh a insût feih feih. Min kuah tlat mai bawk.


Han kalsan mai hreh tak ka ni.


Sammy-a chauh kal tira, kei talin ṭawiawm loh ka ngaingam ngang si lo. Rilru na taka ka fa te pahnih siam ka duh nahek lo.


Ka nuin Freddy-a a kuah tlat a, a ṭap bâng thei lo, "Anu bulah ka kal duh", tih a ṭah hlaah a hmang.


Sammy-a ka en a, Lal Fanu pawm a nih avangin an pafa hmela thu zawh tlak loh lang chuan min tibangbo zual.


Ka pain, "Hruai ve mai rawh u, tlaia lo haw nghal tur in nih loh avangin hetia, lungchhe vankaia inngena inṭah khum rawih rawih zawng a ṭha lo em mai", a ti ta a.


Chu thu zet chuan Freddy-a mit tui a hultir chiang mang e.


Hmanhmawh takin kan insiam leh zung zung. Ka nu leh pa te hruai kan tum a, "Kan tel loin in fel zawk ang", ka pain a ti tlat a.


Ka nu chuan kal a hnial hranpa lo, ka pa thu a awih a ngai ve tlat si a. Kan inthlah liam ta a.


Freddy-a ṭah hla mawlh khan kei zawng, min tilawm a ni.


"Anu bulah ka kal duh", he thu hi a lo va han mawiin a lo va ropui tak.


Ka tet laiin, "Anu bulah ka kal duh", ka ti ve ṭhin a. In chhung han luha ka nu ka hmuh mai loh te hian ko ruaiin, in chhung dung tinah ka zawng kual vak ṭhin.


A chhan chu, ka nu a ni a, ka tan a hlu a, ka tan a pawimawh a, ka nu a ni tlat atin ni.


Chutiang chiahin tunah, "Anu bulah ka kal duh", min titu ka han nei ta a. Nu ka ni thei hi ka inchhuang tharin, Nula nihna ai mahin Nu nihna ropuizia leh hlutzia ka chhar chhuak thar.


Tluang takin Serchhip kan thleng a, New Serchhip lamah kan tlan zel.


Kan thleng a, zing dar sariha chhuak thei chauh kan ni bawk a, sawmpakhat leh a chanve bawrah kan thleng.


Driver hi a thiam em a, a khalh chak tih hre miah lo hian a khalh chak thiam.


Pangpar te kan han dah a, kan chhungkuaa min han hmu chu an lawm hlawm kher mai.


Ka nuin puan dah tur min ken tir chu Sammy-an, "Nangmah ngei khan dah rawh", min ti a.


Nu Valai a ni a, a uiawm kher mai.


A fa te an nula tlangval fel hman a, an ngaihtuahawm lutuk dawnin ka hre lo.


Ṭawngkam thiamna zawng zawngin a fa te hnenah Thlamuanna thu, "Hahdam takin a chawl tawh a, a dam fel tawh e", zawi sepin ka han ti ve rawih mai a nih kha.


Inzir nasat ka la ngai hle a ni.


Kan chhungkuain thlalaknaah min tel bawk a, a zahthlak rualin a lawmawm.


Party Branch Leader dangte pawh an ṭang ngei mai. Lusûnna hman ṭangkaia a awm tur chu ka lo helh.


A rukin Sammy-a bulah, "Politics lam reng sawipui suh aw", ka ti thlawt.


Lusûnna ema Politics inrawlhtir hi chu ka duh lo, duh lo chiang bal tak ka ni.


Ka duhdan ang erawh chuan a kal thei si lo, Politics an sawi tih ka hre leh tho. Sammy-a chhuahchhal ka han tum deuh ngei.


Inthlan a hnai tawh a, ṭan a na ngang bawk si. Party dang an hrâng hmiah hmiah a, chuta kara lo Chengkawl ngawi kar Sammy-a pawhin a duh lo a ni ang.


Chaw min ei tir a, kan nufa zain kan han ei ṭeuh a nih kha, ril a ṭam tawh em a ni.


Sammy-an, "Thenzawlah kan tlang dawn em ni?", a ti chu, "Yess, Papa, kal ang u", Freddy-an a ti.


Thenzawl hi chu a ngaina em a ni.


Kan duh tlang vek si a, a tuk chawhnu herah Thenzawlah kan kal.


New Serchhip mipui an lungawi thawkhatin kan hre tawh. Nimahsela, mi zawng zawng a tihlawm theih loh.


"An fa te School an chawlhtir mai chu a nia, zirna aiin Politics an dah Lal zawk a ang hle mai", tih chu ri nasa tak a ni.


School chawl meuhin kan zin chhuak ve bawk a ni.


Vuivaina tur a awm reng reng lo.


Chawlh dila an Zirtirtute kan biak pawhin an phal lo kha a ni a, ka ngen ngawl em avang leh, Aizawl kan chhuahsan fel hnu chauha bia kan nih avangin min phalsak mai kha a ni.


Sammy-an, "Thu vaivir hna thawk an tam ṭan tawh a, dâwt leh thudik thliar hmasak aia mahni ngaih dana thu kal kualtir kan tam tawh. Chulai kara thudik chauh hmachhuana ngawi kar finthlak hun lai tak a ni", a ti a.


A dik hmel viau.


Thenzawl kan thleng a, ni khat lek cham thei kan ni tawh lo.


Zanah Hmingi lo lêngin, midang lo lêng an kat nuk bawk. Sammy-a be duh te vek an ni.


Hmingin, "A chhe zawngin Social Media-ah an sawi nasa lutuk che u, Sammy-a an dem rualin nangmah an dem ber che. Siamtea leh Freddy-a hmer telh loh theih loh a ni zel nen, Siamtea leh Freddy-a hruai loh tur alawm", a ti dap dap.


"Hei, en la", a phone min hmuh.


Facebook group hrang hrangah, Sammy thlalak tarlangin, caption-ah, *a nupui hlui takngial pawh a lawmna pe zo lotu hian, kan ram min tilawm hian ka ring lo ve*


Fake Account a han ni leh ta nghal a.


"An nun hlui zawng zawng an chhui ṭhin tih i hriat kha, Fb i khawih lo te hi a lawmawm", Hmingin a ti leh.


Sammy-a tan a lawmawm loh, a ngawi thei mang e.


Hmingin min hmuh lo sela chuanin, ka hre dawn lo a nih hi.


Group pakhat thungah chuan, Sammy-an kan inneih thlalak pakhat, kan pahnih chauha Biak In kawta kan lakna a post screenshot-in, caption-ah hetiang hian a ziak a *An inneih lai hian kum sawmli a ni tawh a, ani erawh kum sawmhnihpakua chauh, Tlangval duhtu a ngah dawn tehreng nen, Pathlawi lehnghal a nei duh a nia, Mizo nula lo Gold Digger hlawmzia hi, uakkk*


Fake Account aṭang bawkin, ka luak an tichhuak zawk mang e.


Vai leh Sap pasala nei ho an diriam a, Mizo pasala neih ngei pawh, Gold Digger chhuahin min chhuah a.


Khaw hawi hi a tawi ṭhin. A pawi chuang lo, Mizo Pa ngei neiha Gold Digger a la thlanawm alawm.


Nuih hi an tiza thlawt ṭhin asin.


Inlêng kan nei rei phian mai a, Sammy-a ka lainat.


Chuvanga hmâ taka Driver muttir reng pawh ka ni.


Sammy-a phone thai thla pheuh pheuh chu ka en reng, *a nupui hlui* tih te, *tuna a nupui hi a tilawm zo ngut ang em?* tih te a tam mai.


Fakna lam aiin sawiselna a tam.


"Sam, phone dah tawh rawh, naktuka chhuak tur kan nih kha, i lu a na bur mai ang", phone a en reng ka duh lo.


Chanchin lawmawm a awm lo em mai.


A dah ve mai bawk a, min rawn kuah a, ka nghawngah inphumin a thaw halh halh.


Ka inher a, a tawlhthla hret, ka âwmah a hmai a phum a, kuah vawng vawngin a lu ka chul heuh heuh.


Nunhlui chhui tlak loh leh hriat reng tlak loh kan nei ṭheuh tih hre rana, midik a nih phawt chuan tia ngaihtuah an awm tih ka hriat avang hian ka lungngai lo.


Chutiang mi ho chuan an Vote hlu tak duhsak takin min pe dawn a, kan tling dawn tih hi ka chiang hle a ni.


Hmingin min rawn thlah leh a, hetah hian ka hrethiam chiah, kan Driver a hmel duh tih.


Ka sawi chhuak lo naa, lo ngawi tak rawh se, hun a la awm dawn chauh. Ka la sawirem khawp ang.


"Tluang takin le, Bial fang hian lo kal zing thei ula a ṭha, Party dang ho Ngal tha a chak nasa mai si a. Lehkha rawlhruk tur lah an ngah nasa mai si a", ka pain a ti a.


Lehkha rawlhruk, pawisa a sawina a nimaw?


Aizawl kan pan leh ta a, Siamtea leh Freddy-a te School kal hunah ka thawveng huai zual ang.


Sialsuk thlenin kan chawl lawk, zun ram te kan thiar a, ei tur te lamin kan ei.


Titi phunglengah pawh inthlan hlir.


Khawi hmunah pawh inthlan hlir a ni tawh mai.


Kan nufa zaa kan chuanna kan pan laiin, mipa pathum hmai tuam leh chemtê kenga min tin ran chung hian, an zinga pakhat chuan, "Pawisa kan duh, min pek loh chuan kan vit ang che u", a ti a.


Siamtea leh Freddy-an min kuah nghet nasa mai a, Lal Fanu lahin ka nghawngah min kuah tlat a, "Apa", tiin a ṭap vak bawk.


Anni pathum chuan min hual mai a, hlau anga awm erawh ka tum lo.


"Hey, hey", tih thawm a awm ṭan a. An rawn pawh ngam bik mai lo. Chemtê an keng ṭheuh si a.


Sammy rawn kal thuaiin, an zinga pakhat chu a inring lo nge ni, a rawn phih tlu tawp.


Mi pahnih te chuan kan nufa zaa kan tlanchhe tur chu min nang hmanin, min man bet.


Pakhat chuan Lal Fanu a tin ran tawh mai si a, Kung Fu thiam ka châk lutuk.


Ka fa te an tihnat ka hlau ber, "Min chhuah ula, in duh zat zat pawisa ka pe ang che u. Ka fa te hi min tihnat sak suh u", ka ti thlawt.


Sammy-a mitmeng chuan remchang a zawng, misualte pahnih tukzalna tur a ruahman a, hun remchang a zawng tih a sawi.


Mahse, Lal.Fanu chemtea tintupa chuan, "Pawisa kan duh lo, kan duh chu, Samuel-a saw, inthlan aṭang hian inhnukdawk rawh se", a ti a.


Party dang aṭangin an nih hmel.


Chutianga an tih chhan tur a awmin ka hre si lo.


Sammy-an pawr deuhin, "Chutiang a theih loh, tuin nge tir che u? Pawisa engzah nge in dawn? A letin ka pe ang che u", a ti a.


A phih tlukpa chu a la hnungkhirh reng bawk.


Pakhatpa chu a khur tih ka hmu ta a, an duh renga ti an ni ta hauh lo mai le. Tihtirtu an awm ngei a ni.


Pawisa avang a ni lo a, inthlan aṭanga Sammy-a a inhnuhdawh theih nan min rawn vo vel mai mai a ni.


Chemte an ken avang maia hlauh tur an ni lo bawk.


"Inhnukdawk lo ta se", ka ti a. Ka tukhhum sama min ṭham dak awrhin, "Khawih reng reng suh", Sammy-an a rawn ti.


"Anu", Siamtea leh Freddy-an min kuah bet thlawp a, Lal Fanu hlau lutuk chu a ṭawng chhuak thei tawh lo a ni ber.


"Thih i duh tihna mi?", ka hrawkah tak Chemte a tawhtir.


Ka thaw ngam ṭawk ṭawk ta, chil lem phei chu ka ngam tawh lo.


Eng ang pawhin min vo se, Inthlan aṭangin Sammy-a a inhnukdawk ngai lo ang.


Leiah ka tlu thut a, Siamtea leh Freddy-an min bawh chung chung.


Chemtea min tintupa chu Sammy-an a rawn phih chhuah lai ka hre reng reng lo.


Leiah lo nawrbetin Sammy-an a hnek siah siah.


Driver khan pakhat a lo buaipui a, Hotel-a chawl Pa ṭhenkhatin pakhat an lo buaipui bawk.


"I va khawih ngam zawk ve", Sammy-a thinrimna chuan khua a hmu tawh lo. Thisen a chhuak nasa tawh lutuk.


Siamtea leh Freddy-a thawhsan chi an ni si lo. Lal Fanu phei phei chu, a khawngin ka hre tawh.


Kan awmna aṭangin, "Sam, Sammy, duhtawk tawh rawh. Lal Fanu hi lo en vat teh", ka ko chul.


A kut leh kawra thisen kai hnuangin a rawn phei, a meng sen rum a, thinrimna leh Lal Fanu hmangaihnain a meng pawlh sawp niaih.


Hlauhawm lam a pâwl ti dawn ila, hmangaihna a lang chhuak tho bawk si.


"Ka Lal Fanu, i ṭha em? I bulah Apa a awm a nia", âw khur hlawk hlawkin a ti a.


Hlauthawng, mangang thlabar leh khura siam theitu chu Lal Fanu chauh a ni. A awmawh letling.


Lal.Fanu a pawm a, duat takin a chul.


Lal.Fanu chu a meng fiah kâk a, a hmui a khur dar dar. A taksa a khawng em lo naa, a ṭawng chhuak thei lo.


Chutih lai takin mipa pakhat, hmai tuam ve lo hian Sammy-a chu, a hnung aṭangin Thirtiangin a bekah tak a rawn hlap zawt ta mai!


Driver leh midangin an rawn man bet nghal thuai.


"Apa, Apa",


"Sa, Sa, Sam, Sammy?", Lal.Fanu a thlah chu ka pawm thuai.


Hnung lamah a tlu thal der mai a, thisen a luang nguai nguai.


Ka thin phu nasa lutuk chu, ka thunun theih piah lam a ni tawh.


Misual zinga pakhat chu, "Manoi chu a hahdam tawh ang", a phun sup.


Chu chuan ka thin tiso phutin, a sawitupa chu ka va hnek a, ka chum vak vak thul. Ka pêt bawk.


Lal Fanu pawm chung chuan a harsa lam hret. Thu kam khat mah ka tichhuak lo.


"Sammy, tuar fan fan rawh aw", Siamtean a kawr hak lai phelhin, a bek hliamah kan hmehbel tlat.


"Police lo thlen hma chu kan lo phuar ang", an ti.a.


Keini chhung chu chak mangkhengin Thenzawl kan pan leh.


Emergency takin min buaipui a, ka chhungte pawh an lo thleng thuai.


Lal Fanu chu ka nuin min pawmsak theih hlauh mai a, remchangah lain ka kal kiang deuh a.


Aizawla ka nu leh pa, Sammy-a nu leh pa te zawk biain, thil thlen dan ka hrilh.


Hmanhmawh tak bawkin an rawn kal nghal ang, ka hnial duh lo. Doctor hnen aṭangin thuchiang kan la hre thei lo.


Manoi number hmet chhuakin, ka call, Sammy-a chungah thil pawi tak a thlen vaih chuan, Manoin a tuar hmasa ber ang.


Amah avangin Sammy-an Diriam a tawk nasa tawh a, tunah; tharum thawh zawngin a che leh ngat a.


Kal thui tawh tak a ni.


"Hello?", a rawn ti chu, eng dang sawi loin, "Hei hi lo hre rawh, ka fa te leh ka pasal chunga kut lektu apiang chu an ruang a chhuak nghal ang", phone ka off zui hmak.