Chapter - 26
Ziaktu : ilefi imoz
(Recap : A nu but a. Duh leh mamawh a ngah lutuk vang nge mawni a rilruah thil dang tam tak a awm tlat a, chiang takin a ngaihtuahnaah ka lùt ve thei meuh lo ţhin anih kha! Tunah hian duhthlanna duhthlan tur ka hmaah a inchhawp mêk a, thlan ber tur hre lovin lui kamah ka ding mêk a ni!)
Ka rilru chuan âwn lam nei ta tlatin ka hria a. Chu erawh u Arona ka hmuh rih loh vang mai mai pawh a ni thei. Ka hmuh khât viau chuan a bûk a rit lo zawk ve ţhin a. A hmêl hmu a, min han biak chiah hian thinlungah a thar nawn leh awn awn ţhin tih erawh ka pha thei lo thung.
Chutiang nuaih ka nih avang chuan meng rei peih lovin batti nen dorm-ah ka phei chhat chhat a. Ruahsûr pawh a la hân lo. A sur bur bur reng a, ramngaw hual vela awm kan ni bawk nen thli thâw ringawt pawh tih fuh loh zân chuan râpawm duh tak a ni.
Classroom leh dorm hi a inhnaih lutuk loh avangin hlâu rilru tak chuan ka pên chhat chhat a, tlân mai ka duh nâin hnunglam aţanga min rawn phih dâwrhtu an awm mai ang tih hlauvin ka tlân ngam lo. Nula ve uaih tawhin thlahrang te han hlauh tlat mai chu âwm lo viauin ka hria a, mahse ka hlâu tlat si a ni.
Taksa a chak lohva bp te a han hniam hian mihring chu kan dâwih thar thut ţhin a lo ni!
"Hlau suh" tih thâwm ka hriat rual chuan phu nghekin ka âu chhuak lo chauh a, thin dawm vang vang paha hnunglam ka hawi chuan Op-an min lo kuah thak a, a taksa lum thar thar chuan thlamuanna mak tak min pe tlat! A hmaa ka hlauhna te chu an thlâwkbo zo a, him hliah hliahin ka inhre lehzel a. Ni e, tun ang hunah hi chuan tupawhin an thlamuanpui ka ring.
"Thlahrâng a awm tak tak lo. Hlau suh. Lo kal rawh in dorm thleng ka thlah ang che" tia min kawih her lai chuan ţawng tumin kâ ka âng zuau a, "sawi rih suh, insawifiahna ţha tâwk tak i nei anih loh chuan. Zung turin ka chhuaka hlauh hmel deuha i kal lai ka rawn hmu che a, ka rawn thleng phei mai mai" tiin min lo ţawng khalh zung zung a, chu zawng, ka âwih hauh lo!
Mipa Zun In chu an dorm hnung lawkah a awm ve tho a, tuna kan kal mêkna tualzâwl erawh Sikul hmalam daih a ni! Min ngaihven tur hrim hrima rawn kal a ni tih rinna ka nei tlat a, chu pawh chuan inthiam lohna nasa tak min neihtir leh ta! Op-a hi lo tawng hmasa ila chuan aw.. Eng buainaah mah ka inhnamhnawih phal ka ring miah lo. Ka chelh tlat ang a, midang ka hmangaih san ngâi lovang mawle!
"Fabiana nen kan inkarah engmah a awm lo. Ţhian ţha tak chauh kan ni. Nakinah engkim ka la hrilh vek ang che" dorm chhunga ka luh rual chuan ka ti hrâm a.
"In tih thiam loh reng ka peih lo. I remchân hunah min hrilh dawn nia, ka thiam loh pawh a ni ve reng reng a, a tir aţangin ka thîk loh tur thu ka sawi tawh? Mahse i lo sawi dik a ni, hun a kal ve bek bek a, beiseina chhetê chauh chu ka puarpui zo tawh meuh lo. Min hrethiam dawn nia, tui deuhin mu rawh!"
An dorm lamah a tlân phei zui a, a rilru ţhat dan chu awihawm lo ka ti hial zawk!
Ka dik lohna ngeiah ngaihdam min dilin ama thiam loh zawkah a puh thlu hmak duh ania! Eng ang mipa nge anih Op-a hi? A tlâwm ngawih ngawih a, a tê rawih rawih bawk. Hnuai takah a inphah lui tlat a, chapona pawh a nei ve lo hial zawk emni? Mahse keipawh eng nge ka nih bik? U Arona lakah khân hetiang chiah hi ka ni ve tho! Ka tlâwm a, ka tlâwm nawn fo a, chintawk awm lêk lovin ka inphahhniam fo! Op-a nen hian kan lo inang takzet zet a ni tih bâk sawi tur ka hre lehpek lo. Kan inang takzet a ni.
"In ţha leh tawh tak tak emni? Chiang deuhin han sawi teh!" Chaw dawh tura phûl hmun kan pal phei lai chuan Châmi'n a ti lâng lâng a. "Ka sawi chin bâk kha thil thleng a awm lo. Engkim ama thiam loh emaw a ti zawk daih a, ngaihdam te min dil" ka tih chuan min pawt ding chawihin, "engkimah hian thiamna reng reng i nei lo. Chu chu nangman i hrechiang ber ang. Tuna awlsam taka a ngaihdam tâk vâng mai che hian i namnûl a thiang chuang lo tih hre rawh!" A ti ta khar khar reuh a.
A sawi dik, ka namnûl thiang lo. Mahse engtia han tih tur nge ka la hrethiam ta chuang lo thung!
Zanah devotion kan neih zawhin lehkha zirna tur lam kan pan sap sap a, nikhua a la ţhat lutuk loh avangin a ţhen chuan dorm-ah te pawh an zir hlawm nghe nghe.
Dawhkân pakhat chawi chhuakin corridor-ah ka hûng a, chair-ah ţhuin bulb hnuaiah lehkhabu ka bih ngar ngar a. Hetianga tih ka chînna hi a rei leh deuh tawh. Thâwk khat lâi khan kan ţhiannu pakhatin a chhiar ring thei lutuk a, duh anga rilru ka pêk theih loh avangin zirtirtute hnenah pâwna zir ka dîl a, Sir Isaac-an min phalsak hnu chuan zirtirtu dang pawn an phal ve zel a, thlamuang leh chîmbuaitu awm lutuk lovin zantin, ruah a sûr loh zân chuan ka zir ve ţhin.
"A vawt sia classroom-ah zir rawh!" Mipa Zun In, classroom piaha lam chu ka hawi phei vut a. Kuangkuah âta min lo thlîrtu Op-a chu nuih var varin, "Lut vat ru Sir-in a rawh hau ang cheu" tiin ka âu lêt lâng lâng a. Bu nghatin an lût zui ve mai e.
Reilote ka chhiar leh hnu chuan ka sîrah Jerry-a a rawn ding zum zût a. Dawhkanah lehkhathem a rawn theh thla leh ta! Lehkha inthawn an chîng thar leh dawn a ang hlê mai!
"Chhiar la, ziak zung zung la ka ken phei sak leh nghal ang che. I awmna a hla bik sia midang rawn tirh tur i hmu ve lo palh ang. In dorm-a awm ho saw pêk kual tur ka la nei nuala ka pêk kual chhûngin lo ziak zo hman rawh" hawi kual zuk zuk chunga tiin kan dorm lamah a tlân phei zâl zâl a. Tun ang khawvel changkâng tawha lehkha kan lo la inthawn kual vel zak zak mai chuan nuih te pawh a tiza rum rum mai.
Lehkhathawn ka han hawn chuan, "In ha lum ţha rawh aw. I khua a sik ange" tih zawng hi a lo inziak a. A hawrawp aţangin Op-a a ni tih ka hre thei! Thinrimna nei tawh lo ang maia lehkha te min rawn thawn chu ka lâwm ru veng veng a, ka zah thar ta riau ni tein ka hria!
"I ziak zo em?" Jerry-an a rawn tih leh chuan, "Nangpawh in ha lum ţha rawh" tih chu ziak ve zung zungin ka thawn lêt nghal a. Ka lehkha chhiar lâiah ka insawrbing leh ta bawk.
"Luck khawp mai"
Jerry-a bawk a ni! Ka sana bun lâi ka en chuan dar riat leh a chanve a lo pêl thuak tawh a. Tui taka lehkha han zir hi chuan darkar khat te chu a liam zung zung ţhin rêng a ni.
"In dorm ami ho ka pêk kual leh chhûngin lo ziak leh mai rawh" tih pahin lehkhathem chu a rawn theh thla leh a, chumi rual chiahin Châmi a rawn lang ve nghal zat bawk!
"Eng nge?" Mitko sân khum âk chunga ka lo tih chuan Jerry-a lamah a thle deuh salh a. A awm loh laia sawi chi anih hmel e.
"I lo thlen hmain ka ziak zo hman ang" tiin Jerry chu ka hrilh ta ngawt a. Kan dorm lam panin a kal zui thuai bawk.
"Kha i lehkha tur. Zanlaiah lehkhathawn a lêng kual nasa ţhin tih a lo hria aniang a rawn ngampa tlat, ka peih lo chung min ko chhuaka min rawn kentîr. Chhiar pawh ka la chhiar lo" tih paha lehkhathem min hmehbel lâi chuan a ngaihna hre lo fêin ka lo melh â heu ringawt a. Dâr min chhîn khum âkin a kuangkuah fel thên a, pawisawilo hmêl a pu ni maiin ka hria.
A lehkha min pêk chu hawn hmasakah neihin ka meng pâwng hlawt hlawt a, a chhunga thu inziak chuan min ţhâwng takzet a ni!
"Beiseina chhetê min dîltu hnenah a ngen ang beiseina ka pe chung pawhin engmah lo mai a lo nia!" Tih zawng hi a ni a. A tâwi nâa min ţhâwng lo chuang lo! A hawrawp chu white board-a ka hmuh fo hnu anih miau avangin ka hai lo khawp mai a. A ziaktu hmêl ang chiaha ţha a ni! U Arona!
"Engtin nge?"
"Ka hre bik lo. Min ko chhuak a, 'heihi va pe rawh' min tia min rawn tîr phei ve ringawt"
"Engtin nge ka thawn lêt dawn?" Ka ti leh ţuau a, chu a lehkhathawn tawitê mai chu ka chhiar nawn tluk tluk bawk.
"Ka hre bik nâng i duh duhin ti rawh. Mahse buaina aţangin buai lehzualnaah inhnûk lût suh. Theihnghilh tumin i bei mêka a rawn lang lehlawi a, kei chu ka ngei zâwng tak a ni. 'A tawk e Lumam' tih paha bye bye chi a ni ka tih tawh kha" a ti charh charh a. Midangin kan thâwm an lo hriat phâk kan hlau bawka kan ţawng ring ngam lo.
"I ziak zo tawh em?" Jerry-an a rawn tih chuan Op-a lehkhathawn ka lo la hawng reng reng lo tih ka hrechhuak ve chiah a. Ka'n hawng leh rih a.
"Arsi a lang lo nâin vân thlîr dûn ila" tih hi a lo ni a. "Break-ah aw" tih chu ziak sawk sawkin Jerry chu ka pe vat a. A phei pui thuai bawk.
"Ka ziak anga i han pe dawn nia" ka sîra ding reng Châmi hnenah chuan tiin, u Arona lehkha tur chu ka ziak leh a.
"Awmzia a awm dawna a hriat loh vang a ni mahna!" Tih thu chu ka thawn lêt ve ta a.
Rei a rial lo. Châmi bawk chuan rawn keng lêt lehin, "Awmzia awm se a tih tak tak loh vang zawk pawh a ni maithei" a rawn ti ve lehzel a.
"A beisei rei ve tawh bawk alawm. A beidawng hman te pawh aniang" tih chu ka ziak leh ta ngat a. Tih thinrima tlawmla taka siam ka duh vang a ni pakhat.
"Rawn thawn lêt leh a tum pawn rawn keng tawh suh aw. Rilru a tibuai mai mai. Lehkhazir ka duh thu hrilh mai rawh" tiin ka ken lêt tir leh a. A rawn thawn lêt ta bik lo.
Thingpui lumtu ten dâr an rawn vuak rîk tâkah chuan ka puan sinlai nena thochhuakin ka lam pana rawn kal mêk Op-a chu ka lo nuih var var a. Chutiang chiahin ani pawn!
"Sikul hnungah kal ila, vân thlîr ang hmiang! Thingpui i in duh kher em?" Ka bul a rawn thlen rual chuan a ti sup a. In kher ka duh loh thua chhângin a bânah ka vuan thak a. Sikul hnunglamah inzui pheiin min lo hmu tute chuan min lo chhaih zui nak nak lehnghal, a zahthlak ve reuh khawp mai.
Thim deuh chhulh mah se office tukverh aţanga êng rawn chhuak chuan a chhun phâk deuhin avangin kalkawng chu a hmuh theih riai ruai a. Kan dorm hnung chiaha pher lo inphah duai ka hmuh chuan ding datin Op-a chu ka melh chho hâw a. A hmêl tak erawh chiangkuangin ka hmu thei lo thung.
"Devotion hmaa ka siam tawh kha ania, vân thlîr rem deuh turin ka tia, lukham ka dah sa bawka hei. Puan kan sin ve ve bawka a vawt lutuk lo turah ka ngai" tih paha pher awmna lam min panpui te chuan ka lâi ru riau a. Hetianga thil romantic hi ka nunah ka tawng ngâi zen zen lo. Tuna thil thleng mêk ang phei hi chu ka vawikhat tawnna chauh a la ni!
"Lo kal rawh" tih paha min kuai muin zangthal zâwngin kan mu ve ve a, a sawi angin arsi chu lang hauh lo mah se vân thiang kûk mai, eng rawng nge anih pawh hriat hleihtheih si loh chuan hahdamna min thlen veng veng a, khawvel aţanga hla taka awm ang mai niin min inhriattir hial a ni.
Zâna hrâm chi rannung leh sikul hmalama ţhian ţhenkhatte in âu lâng lâng thâwm chu kan hriat theih ve chhun a ni mai a. Hringnun kallai chu a châwl dûk ni mai tein ka hre hial!
"Nuam i tih zâwng a ni em?"
"Tehreng mai. Hetiang nun hi ka ngainat zâwng niin ka hre ngâi miah lo. Mahse tun dinhmunah hi chuan khawvel lak aţanga inlâk hrana chawlh veng veng nawmzia ka hre ta! Engkim, buaina leh rilru hahna zawng zawng tlân bosana chawlh veng veng mai hi ka duh a ni" nêk deuh salh paha tiin thâwk ka la ham ham a. A bân min kham tirin ani pawn chunglam a melh ve vang vang a, muangchângin boruak a thaw chhuak ve ham ham bawk.
"Ka châk ţhin a, nangmah nen. Beisei ru tak, beisei ngam chiah si lovin ka nghak ţhin che. Tunah a takin ka tawng a, ka hlim takzet a ni. Thuruk tam tak i nei anih pawhin a pawi lo, engtikah emaw chuan engkim ka la siamţha vek ang" tiin ka kham loh zâwk a kut chuan ka biang a rawn tuai zauh a, inthiamloh rûkna ka neih vang nge mawni han sawi ve tur îk ka hre lo!
Ka ţi deuh dai a, mahni insitna hlîrin ka khat bawk! Hetiang khawpa min duhtu, min thlahlel ve ngawih ngawihtu laka thuruk ka nei tlat te, ka rilru zawng zawng Ka pe thei miah lo te hi mak ka inti a, ka indem a, nêp ka inti hluah hluah a ni.
Khawvela hmangaih phû ber ka tihte chu, midangte hmangaih lêtna phût hauh lova hmangaih ţhintu te hi an ni. Keimah te, Op-a te ang hi! Nat nawn huama vuan nawntu kan ni fo va, kan beidawng tak tak ngâi lo. Thîkthu kan nei lo a ni bîk lo va, thîk tur aiin thîk loh tur kan hmu lian zawk ţhin mai a ni. Chutiang mite chuan hmangaihna dawn lêt ve an phû ngawih ngawih a, kei erawhin beidawnna bâk ka hlawh chhuak lo. A nat duhzia ka hre tawh a, keimah avanga midang an lo nat ve ka phal tawh hek lo. Chuvang chuan alawm Op-a hi ka theihtawpa hnaih hrâm hrâm ka duh ţhin ni!
Vân boruakah planet tam tak an lêng vel a, chûng zînga pakhat, Thla chu astronaut ten a chanchin zir chian tumin an hêl reng ţhin. Khawvelah pawh hmeichhe tam tak kan awm a, chûng zînga pakhat ve mai chu ka ni. Min zirchian tuma min hêltu ka nei ve ringawt pawh hian mi special takah min inngaihtîr a, hlu veng vengin ka inhriat phah bawk. Thla ang maia luhchilha zirchian harsa tak nih erawh ka duh lo thung.
"Taka, Mâpuia guitar kha ka va hawh lawk ang aw, kan zâi dun dawn nia" tâl sat sat chunga tiin a kut ka kham mêk chu a melh zauh a, ka lo inlet tap a, a tho zui mai bawk. Kan ngâwi rei a ti deuh anih ka ring.
Reilote hnuah chuan a rawn lang ve leh mai a. Guitar rawn kengin pherah chuan a rawn ţhu leh sat sat a. "Ka tho peih lo kei chu tihian ka lo mu ang" nui var var chunga tiin amah chu ka thlêk hâ a. A bu nghat mai.
Guitar hrui chu herh mil velin ama hriat phâk tawk lek lekin a zâi a, kei erawh vân lam hawiin ka ngâwi roh roh thung.
Hmalam hun tur ngaihtuaha rilru hah rual ka ni ve ţêp tawh a, class 12 ka pass hunah phei chuan mahnia inhâikuak te a ngâi ve tawh ang. Chutih hunah chuan ka kianga awm reng tur, mi rintlâk tak ka mamawh dawn a. Châmi a awm alawm ti ve bawk mah ila kan kawng zawh tur a in ang kher lo thei. Op-a hi ka ring tak tak thei ang em? Min lo chhâi kualin min lo lêm der vel mai mai ta se? Zawhna ka inzawt ru mawlh mawlh a, chhânna erawh ka kawl lo thung.
"I nunhlui vâng a,
Hlauhnain i rinna a tichâu zo anih chuan;
Min fiah chhin la,
Ka lo tling ve mial mahna!
Bul i ţan nan itan ka awm reng,
Vawn che phal la, ka thlah phal tawh lo'ng che."
Zawitê, fiah zet sî a zâi riai riai thâwmah chuan ţhu chhuak hlawlin Op-a chu ka melh vawng vawng a, min en lovin thlanglama kawngţum lian lotê chu a lo en daih a, a thinlung zawng zawngin a sa ni mai hian ka hria! A ring lo va, a chiang em em thung a, min hrilh dawt si lovin ka hriat loh erawh a hlâu viau lawi a!
"Tu hla nge?" A dâra kuah salh chung chuan ka han ti a. "A satu pawh ka hre lo. Mî Status velah ka hmu ţhin a, nalh ka tia" tia min lo chhângin a guitar chu a hûng rem a, min lo kuahlêt ve salh bawk.
"Enteh, hre tura ka duh che chu.. Ka ngaina takzet che. Nang tluka ngainat leh kawmngeih, thlamuang taka ka awm theihna mipa hi an awm lo hialin ka ring. Ka rilru zawng zawng i luah thei rih lo anih pawhin min beidawnsan lo la ka duh, min nghâk la, min chelh la, hun hi min nghahpui rawh! Engkim a thâwidam vek hunah ka rilru zawng zawngin ka hmangaih ang che. Min kalsan lo la, ka hnaih takah awm reng rawh!" Tiin a taksa si chêt chuan thâwk ka la ham ham a. Hei hi thil nih dan tur dik tak zawk niin ka hria.
"Min mamawh chhûng chuan ka tlânchhe ngâi lovang. I hnaiha ka awm loh lai pawhin ka hnaih tlat tho ang che. Thuruk tam tak i lo nei anih pawhin ka zawt ngâi tawh lovang che a, i vawn theih tawh loh hunah min hrilh dawn nia." Nghet lehzuala min lo kuah lêt ve sauh sauhin ka lu chungah a phun ve bul bul a.
Zan boruak khawhar tak pawh ani nen chuan a dân a dang a, vân thengrenga Planet inkalpêl suau suau te pawh khi keini vang hian an lo hlim ve ngeiin ka ring!
Hun chu a kal ve bek bek a, December thla kan chuangkâi ta dêr mai! Rilruin Christmas leh a vuakvêt te, Kumthar lawm dan tur leh kumhlui thlah dan tur chenin a suangtuah kual chuai chuai tawh a. Chutih laiin mahni hma zâwna tihtur awm ang ang tih kan bâng chuang lo. Zirlai kan ni a, theihtawpin lehkha kan zir a. Zânah pawh mutmû kan tuah ţha hlawm meuh ţhin lo.
"An la tho lo ka ti. Tho rang rawh u" Sir Isaac-an pâwr fêa a rawn tih lûng lûng rual chuan inperhtho zawtin ka sira Châmi thâw sêk sêk chu a blanket ka pawh hlîmsak a, "A la hmâ.. Reilote mu leh rih ang!" A mit nuai chawt chawt chunga inher tapin a chhîng zui leh hmak nia
.
"Vanlalchâm! Tho rang rawh ka ti. In ţhiante an tho vek tawh, Dorm-ah in zir leh dawn anih pawhin kawngkhar inkalhhnan tawh suh ang che u, auh êih in har dûn ropui si. Zir ula, ka rawn vei reng dawn ania" ti lehin Sir Isaac-a chuan eirawngbawlna In lam min pansan a, banga sana intâr chu melh zawkin, "Dar nga a ri ţep tawh ania tho rawh, a rawn kal leh chuan a ţêk viau tawh ang" tiin Châmi chu ka tung tho a, a tê reuh bawka a ţhu êt mai!
"Ka ning ve ngawt mai lehkhazir ngâi hi chu. Class 12 ka pass vaih chuan ka bâng chiang viau ang" ti nang nanga a lehkhabu dahna hâi rak rakin mutna lamah bawk a rawn phei leh a, bang nghengin kan ţhu dûn a, blanket lum deuh sinin kan zirlai chu kan chhiar dun mual mual a, kan chhiar zâwi tial tial a, thâwm hriat tur a awm ta lo. Ka ring thle bâwih chu ka harh hma zawnga ka hriat hnuhnun ber a ni.
"A hit lutuk!"
Kan âu rual ţhawt a, kan hmâi leh Blanket huh dup chu kan harh chian pui viau a ni!
"Tuia inleih kher kha eng nge a ţulna? Ţha deuhin min kaitho ve mai ta che!" Kan hmâi si lek leka min lo bih ngurtu Sir Isaac-a chu Châmi'n a phun khum hluk hluk a. Phak chuala a hmâi huh a nuai chawt chawt lai chuan min rawn melhin a meng nûr nâng a, a sam chuan chhim leh hmâr, chhak leh thlang an kâwk fur tawh!
"Ţha takin vawi engzat nge ka kaihthawh che u? Luhlul dûn ngît ngêt lutuk mai. Kal ru, mipa ho tui châwinaah khuan zuk kal ve rawh u. In zir peih tak tak chuang lova awmzia a awm lo, vawihnih ve ve kal ang che u" kan blanket sinlâi rawn theh hlîm sawk sawk chunga Sir Isaac-an a tih tâk hlukah chuan a thinrim viau anih ringin kan chhâng zui tawh lo va, hreh ru zetin tuikhur lam kan pan dun ta hnak hnak a.
"Sir Isaac-a hi chu ka ning tlat alawm. Anni te chuan zankhua khuain hrawk na vek khawpin lehkha an zir ve lo a, rei deuh meng ve tho mah se anni tan a hahthlak ve tak tak lo. Zingah ni se an tho a, min kaihthawh kim ţhap hnuah min mutsan leh keuh zel a. An phakar ka ti. Ka ning, mipa ho ka hmu hreh, hrem ngaia awm hi zahthlak ka ti sia ka thin a rim bawk sia" a ti hlak hlak reng a. A khât tawkin kei ka lo nui leh hak ţhin. Hrem ngâi khawpa mut kan duh dûn lutuk chu zahthlak zawk tak a ni.
"Eng, eng nge in rawn tih ve dawn? Ngawt ngawt cheu chuan?" Zawhna ngah hmêl fêa lo ti hluttu Fabiana chuan min rawn pan hnâi hrut hrut a, kei ka tawlh hnung hrat thung. Op-an min rinhlelh aţang khan Fabiana bula awm hi nuam ka ti tawh lo, a thil tihdan te kha mawi lo ka ti a, u Arona lam a ţang lutuk ţhin te hian biak minti châk lo zo ţhin.
"I ţhiannu chuan min la ei lo viau a ni maw?" Châmi melh chunga atih leh chuan, "a bialpa'n a thîk chea a be peih lo che. An inţhen hunah a be peih maithei che" tiin Châmi chuan min kâisawn hmak a, ţhianţha nih hi a tlin thei vah vah ania.
Midang laka lungawi lohna ka neih apiangin a chhan lam a ngaihtuah ngâi lo, kei aiin a lo lâwm lo zawk ziah a, ka hlimna avanga a nui ri hi bengah a châm reng ţhin bawk. 'Ti ang' ka tih apiang min tihpui vek lovin, a ţha nia a hriat chin chauh min tihpui ţhin a, ka tana ţha lo tur chu ka tih châk ngawih ngawih thil pawh ni se min tihluih tir ngai lo. Chu chu ţhianţha hlutna niin ka hria! Ani ang ţhian ka nei hi ka vannei tak zet a ni.
"Eng nge in lo tih dawn?" Tuikhur ep hnim phên aţanga rawn titu lam chu hawiin, "Sir-in min hrem lehpek tawh a" ţi dêk hian ka ti a. Op-a nuih a za khawp mai.
"In tho thei lehpek lo a ni maw? Zanin chu ka sana hi kawl ula alarm in set dawn nia" nui vur vur chunga tiin min rawn pan chhat chhat a, min rawn kuah salh bawk.
"In zaktheilo lutuk, kan awm ve ţhup laia khatianga han inkuah vel!" Châmi'n a tih lâia Fabiana lo ner sawk chu ka va hmu reng a, engahmah ka ngâi duh lo lui ve tlat! Ani hian ka hmâ ngâi tak tak chu ni se u Arona, beisei bo lutuk beisei reng turin min duh miah lovang.
"Nei ve lo ho kha chuan tui lo va thâl se" nui huah huah chunga Op-an a ti zauh chu a ngaimawh hlê aniang Châmi chuan a rawn nam deuh salh a, tuikhur bulah kalin a bucket ken lâi a va birhlût bârh a, "Ka haw san dawn cheu" tih leh kal a rual mai bawk nen, "Ding mai mai rawh Kâwli!" Tia auhzui a ngâi hial a.
Sam phe suau khawpa rawn inherin, "Duh vang rêngin ngaihzawng kan hmu zo lo bik lo. Mite chu, an duh ten an duh lo a, an duh loh zawk ten an duh a. Kei ve chu, ka duh lohte pawn min duh lo. Thlan tur eih a awm lohna ramah khawia ngaihzawng mah in hmu bik lo ang e," a ti mauh mai! A ţeu ţha hlar hlar viau bawk.
"Ka bêm lai chea min hnâwl lâi tê kha" Henry-an a lo ti zauh chu nuihpui uar uarin, "Star nghet ka neih lâi kherin min bêm anih kha Lalhen!" A ti leh lâwng lâwng a, a lungawilo rei lo lutuk chuan nuih a tiza zawk. Heihi Châmi ka duh em em chhan ania, a titau tih te hi a theihnghilh vel mai mai ţhin. Chuvang chuan a thinrimna ka ngaipawimawh ngâi lo tihna erawh a ni hauh lo thung.
Rei awm tawh lovin kan inzuichho dal dal hlawm a, kan kal laia mipa ho hmuh kan hrehzia ngaihtuahin kan hâw lam pheichheh erawh zâng tak a ni. Kan bucket ken thlâk ve chu mipa hovin min khâisak diat diat a, anmahni'n an bucket ţheuh khâi ve tho mah se, 'hmeichhe tân hetiang khai chhoh chi a ni lo' tiin an inkhaichhâwk diat diat a, hah lo deuha School kan thlen laiin anni erawh an thaw hluam hluamin ka ring.
Ka nu te eirawngbawla an duty lai a ni a, thuawih lo deuha awm chi ka ni lo. Inah ka rethei lutuk ang tih ka hlau.
"Ţang fan fan ang u aw, Chawlhni a ni ţep tawh ania" corridor-a rawn âu phei lâwng lâwngin Kan class-a lian deuh ber Michael-a chuan zun In lam a pan chhurh chhurh a, zan dar kua a ri ţep tawh a, midang ho chuan mahni awmhmunah ţheuh lehkha kan zir tawh.
Mipa ho dorm aţanga, "Thawhţan zân chauh a la nih hi" an rawn tih chuan ngaihpawimawh loh hmêl fê hian a kal tûrh tûrh a, kan indaihzai thei ania!
"Mali, rawn kal teh" tih paha ka nu'n min rawn hûi chuan ka lehkhazirna aţanga thochhuakin a dinna lamah ka va phei thuai a. A puan hnuaiah eng emaw hûm rûk a nei tlatin ka hria! Eitur min pêk rûk a tum aniang a! A tihchi dawn khawp e. Ril a ţâm huam huam reng a, a ruka min pêk nachâng a hria te chu lawmawm duh tak a ni.
"Eng nge a?" Beisei sâng ru deuha ka va tih chuan, "Heihi engtin nge i kam ţhin kha(h)?" Tih leh Sazu thang rawn lek chhuah a rual ta mai a! Khawilama eitur mah a lo ni awkawng lo! Ka room-a Sazu thang ka kam ţhin lek chu lo niin!
"Hetiang te chu ka pa pawn a kam thiam ve tho ang chu mawle, engah nge hetiangah te i rawn ken a? Keng lang vak vak suh miten min rawn hmu ang e!" A thil kenlâi a puan hnuaia dahluhsak mawlh mawlh chunga ka tih chuan, "kan Buh Inah Sazu an tam lutuk a, zawhte kan kawl ve bawk si lo. I room ami kan la chhuak a, kan kam thiam ve hleinem. I tawkhrawk bera kan chhung zingah thangkam i thiam ber. A tihdan chu sawi vat vat mai teh!" Tih leh min pêk a rual a. Tun ang zân zâna sazu thang te rawn ken reng reng!
Ka hawikual zuk zuk hnu chuan, "ka pa'n a kam thiam lo emni?" Ka'n ti leh hrâm a, a meng nûr nasa lutuk chuan min vuak a tum emaw ka ti hman hial a, mahse a sahdah bâwm hai rawk rawk chungin min rawn melh a, thâwk a la hluai bawk.
"I pa sazu thang kam ve te chu ê! An chhungkua pawhin kal se a per lovang!" A ti ta lâwng lâwng mai a. A au ring bawka ngaw kâr zawng zawngah a khâwk rum rum hial a lawm!
(Sunday zân kan âwl ang aw.. Pathianni em em chu serh ve zuk a ngai!)
End of chapter - 26