SOFIA CHAPTER-8

[Omega Hmar Tlangte]

Khabe dawm meuhin Sofia-in min duh thu a sawi chu ka ngaihtuah neuh neuh a, Didika ka phirpui anih vang chauh a ni ngei ang phir tih takah kan inang em em mai si a, a hranpa taka min duh ngawtna chhan tur ka hre lo. Pathian zarah kan dam chuan nakum lawka nupui nei tur ka ni Sofia eng nge i hriat? A han in bun thawl takah chuan a zia ve viau tawh chuan ka hria, pi Zami bulah engmah a sawi ngamlo leh naupangte a ka unaupa tenawm lutuk vanga atawrhna zawng zawng ka ngaihtuahin ka khawngaih bawk si.


"Dindin kawngkhar hawng vat teh" pa Rama chuan ka kawngkhar chu a rawn chum ri dawt dawt a, ka phuzawk nghe nghe engthil chiah nge thleng le aw a hmanhmawh hmel si, ka hawng thuai a, pa Ram eng nge thil awmzia? Hlauhthawn hmel zet hian "Dindin bawiha kan Sofia-i a buai leh a..." A sawi zo hman lo pa Rama chu ka nawr chhuak rawk rawk in ka kalh tur te chu ka tha a khur deuhin ka hria pa Rama chuan "I hmanhmawh lutuk anih kha bawiha" a lo ti mawlh mawlh a.


Sofia-i te in ka thlen phei chuan no a lo keh rum mai Sofia-i nu pi Zami chu a lo ṭap tlawk tlawk a, khawiahnge Sofia? Pi Zami chu a rawn dak chhuak a, "Dindin i lo kal a ni maw ka fanu chu bual pindanah tuiin a inleih char char no te a paih keh a, hlauh nei ni awm tak a ni" pa Rama chu bathroom-lamah a phei vut a, ka zui ve nghal Sofia-i chu ngawi reng hian a chhip aṭangin tuiin a lo inleih mawlh mawlh a. Sofia-ka lo kal i ṭha tawh emaw ka ti a, ka ṭawng ri hriaiin ka lam a rawn hawi a ṭahna mit bui vek chu ka hmuh hmaih lo.


Min rawn kuah thut a, "Dindin ka hlau ka mumangah Didikan min thah a tum min chhan rawh" anxiety-disorder-nei a ni tih ka hrilh ngam silo a ṭha sawt viau emaw ka tih lai a, a zual thut chu awih harsa ka ti awlsam taka ṭha chhuak chi a ni lo tawp mai damdawi ka chawh ngei a ngai dawn awlsam taka ṭha chhuak tura ka ngaih avangin damdawi engmah ka lo keng silo. A samah chuan ka chul a, tuman an ti na tawh lo ang che Sofia engmah hlau suh ka ti a, min kuah nghet sauh "Dindin i bulah chuan ka hlim ang tiraw?" Chhân ngaihna ka hre lo i nu i ti mangang ania inhru hulla va inthlak rawh ka lo kal tawh hi aw engmah hlau suh ka ti a, "Lo kalbo miah suh aw" tehreng mai ka thaw halh a, a hmelṭhat mai bakah a hmel a innocent-bawk si hetia anxiety-nei mai atan chuan ka ui ngawih ngawih.


Sofia-i inthlak chhung chuan pi Zami hnenah chuan hreh deuh chungin Sofia-i chungchâng chu ka hrilh a, lu dawm vawng vawng chung hian "Ka pasal kha pa ṭha tak nimah se zu vangin a buai a, ka fanu leh zel a ngaihzawng hlui vanga hetia a awm hi ka khawngaih em a ni" a ṭap nghâl a, nau a chhiat thu hrilh ngam lêk a ni lo damdawi la tur a ka let chhungin Sofia-i chuan eng harsatna mah tawk lo se ka duh ngawih ngawih. Sofia-i lo chhuak chu a rawn nui deuh sâng; a zia dang leh vek tawh "Didin ka lawm e min enkawl dam a" a darah chuan vuanin kan khuaah ka haw lawk dawn a, Sofia-ṭha taka i lo awm ka beisei ania ka ti a, a hmel a dur nghal khup "Min kalsan ang maw Didika siar siar min bum tum reng reng suh" pi Zami chuan a rawn buaipui nghal, a damlo tak zet ka lo kir leh ang ka ti a, ka chhuak nghal a, ka hminga min au lawm lawm chu ka hrereng hawi let lo chuan ka kal nal nal a.

*********************

Sawi lawk miahloa in ka thleng leh tawp chu ka nu chuan min melhno lo kher mai Thelma-i a lo la awm ve zui, mak tih hmel zet hian ka nupui hual chuan min en a, "Dindin i lo haw thut zel a, engmah min hrilh lawk ngai silo i hna hi chu ka duhpui lo takzet che zeploah chuan" ka nu chu a âng deuh hlawk hlawk a, engmah ka sawi lo room-ah ka lut a, Thelma-in min zui lut nghal khumah chuan ka bag-ka nghat chawrh a, "Duat, ka nu khan a sawi dik chiah i lo sawi lawk ngai bawk silo a i enkawl lai chu tu chiah nge a nih a?" Ka chhang lo damdawi ka dahna chu ka hawng rawk rawk a, Thelma-i chu a lungawi vak lo aniang nem lo zet hian "Ramdinpui ka sawi chu i hre lo a mi" a lam ka hawi a, ka buai anih hi Thelma chuan ka hming hi Ramdinpuia a ni ziah lo Lalramdina tunah damlo enkawl lai ka nei a, a rang thei ang ber a ka kir leh angai ka buai anih hi min hmu ve reng lo a mi ka âng ve deuh buan buan a, Thelma-i chuan ngawi rengin min en a, lungawilo tih hriat zet hian room-aṭangin a chhuak a.


Zanriah ei lai chuan ka nu chuan "Dindin ka fapa i ni a, i hnaah i buai tih chu ka hria mahse i awmdan hi chu a diklo deuh a ni Thelma-i pawh lungawilo zeta a kir leh kha" a ti a, Sofia-in min duh thu a sawi lai leh ka kal tur a phalloh zia hlir kha ka rilruah a awm ka nu thusawi pawh engmah ka ngaihtuah hleitheilo "Dindin eng nge i awmzia le" min rawn sâwi a, e ni tak ka nu ka damlo enkawl lai hi anxiety-nei nasa tak a ni a, naktukah ka let nghal angai ka ti a, ka chaw ei pawh a tui lo ka tho daih a, ka nu chuan min en vung vung ringawt a. Ka mut hmunah chuan ka inngaihtuah nasa khawp mai Thelma-i ka nupui hual khatia ka ṭawngkhum kha ka inthiam chiah lo lehlamah Sofia-ka puihna mamawh em em leh ka unaupa tenawm tak thiltih ka hria nen mut a har khawp mai.


Ka inthiam thei nganglo chuan Thelma-i chu call-ka tum a, ka hmet tur chiah chu amah zawk chuan min lo call-a "Hello, ka duat ka tihpalh lutuk min ngaidam rawh i hna hi a pawimawh alawm ka hmangaih che" ka thaw halh a, ka nupui hualin min hrethiam tak chunga ngaihdam min rawn dil chu ka inthiamlo zawk lutuk engkim hrilh tlang vek ṭhain ka hria mahse, Sofia-in min duh thu a sawi leh ka unaupa chungchang erawh hrilh ka tum lem lo thil awmdan ka han sawi chuan a nui chhuak hawk a "Mi mawlpa hmanah min hrilh daih tawh loh ṭanpui ngaite ṭanpuitu ka pasal hual ka chhuang lutuk che chu hmeichhe khawngaihthlak chu ṭanpui phawt la kan innei dawn nia ka hmangaih che" ka nui suk a, keipawhin ka hmangaih che Thelma-muttui aw phone-ka dah a ka maimitchhing vang vang a.


Ka zing kal avangin pa Rama chu chaw min lo chhum kep turin ka chah tawp pa Rama chuan Sofia-i nu pi Zami a lo hrilh chu niin an ina chaw ka ei ngei a ngai dawn a nih hi. Kawngkhar chu ka kik karh karh a, damdawi ka ak ṭeuh bawk a, pi Zamin a rawn hawn chuan a ngui deuh bur mai engmah sawi lo chuan ka lut a, "Dindin a ṭha tawh viauin ka hre si a, i awmlo hlek a, chaw pawh a ei duh lo a room-ah a mu tlat" Sofia-kei tehlul min thlahlel tlat hi eng nge i awmzia le? Sofia-chu ka be thei ang em? "I ril a ṭam viau tawh ang chaw ei ka lo siam ang a ka fanu pawhin i awm chuan a ei duh mahna" Sofia-i be tur chuan room-ah ka lut nghal a.


A lo inkhuh hlun a, ka va Khawngaih reuh tak Sofia-ka lo thleng tawh ania, lu thur deuh hian a rawn tho chhuak a, a sam chuan a hmai a hliah deuh a, chiang lo deuh hian a rawn meng a, min hmu thut chu a meng zau kawk a, a sam chu a tuai nghal thuak thuak a, "Dindin khawiahnge i kal daih a, ka dam i duh kha min kalsan suh i unaupa Didika ka hlau a nia" tuman an ti na lo ang che lo kal rawh chaw i ei ang. A nui sen sen a, hmelṭha tak a ni ka en deuh ngawih ngawih chu a chhan ka hre bik lo "Ka bulah chaw i ei dawn maw ka va lawm" a rawn tho a, ka banah chelhin min kai chhuak a.

Chaw ka eikham chuan dam hmel zet hian Sofia-i chuan a han ti fel nghal zung zung a. Pi zamtei bulah chuan ka ṭhu vat a, damdawi chu ka phawrh a, heihi a mut dawnah i pe ziah dawn nia mum khat te te in, a man angai lo ang a, a thlawnin ka lo pe ang che ka ti a, pi Zâmtei chu a lawm khawp mai "I zarah ka fanu hi a dam leh em em ang ka lawm takzet a ni" a ti a, chhuah ka tum chu ka leh hawi zuk a, Sofia-i chuan thleng a la sil mial mial a, ka kal tur thu chu hrilh ngei ṭhain ka hre tlat ka awmlo tih a hriat hunah a buai leh vak ka hlau. Ka pan phei a, a dar a ka vuan chu a phu zawk "Dindin.." hlau suh keimah ka nih hi i nu damdawi ka pe a, i mut dawn apiangin lo ei la i ṭha mai ang ka kal phawt ang aw ka leh hawi a, chhuah mai ka tum chu min rawn kuah a, "Khawngaih takin ka dam ṭhat hma chu kan khuaah hian awm rih rawh ka tiam a che ka dam ṭhat hunah chuan ka duhna che hi a bo ve tawh mai thei a ni" pi Zâmtei chuan min lo melh ralh a, rang takin Sofia-i kut chu ka dahthla nghal a, tehrengmai ti ringawtin ka chhang a, ka chhuak ta a.


In ka thleng chu ka ṭhu deuh hnawk a, Sofia-i nula hmelṭha tak ka unaupa ka phirpui Didika buma a han awm mai leh tikhawp a anxiety-nei a a awm chu ka ngaihtuah chiang neuh neuh a, a mumanga ka unaupa a hmuh vanga atak ramah pawh hlau ta em em kha a ni si a, oneirophobia-a ni thei tih chu ka hriat chian em avanga damdawi pawh chawh ka ni reng a ni.

Ka phone-ka en chu Thelma-i miss called-a lo awm leh tuarh tawh Sofia-i bula ka awm chuan phone-in min tih buai ka hlauh avangin ka silent-zel a, Thelma-i a thinrim leh viau mai thei a ni. Ka call back-vat a, a ring-rei hle mai "Hello, Lalramdin" engmah a sawi zui lo ka hming tak takin min ko ve ta, kan inkawpna rei tawh nen hming diklo hlirin min ko a, ka tihpalh ka ti ringawt a, "Min ngaihsak lo sawt viauin ka hria" nilo e ka damlo enkawl lai hi a serious-em a ni. "Karleh lamah ka rawn zin dawn i bulah ka awm chuan ka khawhar hi a reh mahna" engtinmaw hetah maw? "Eng nge ka bula awm i duh lo a mi" ka thaw halh a, han khap em turin ka nupui hual a ni si a, Sofia-i ka ngaihtuah bawk si rilru buai zet chungin aw ka ti thei hram a.