Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-8
Ziaktu: Cck Lalchhuanawmi


"Hello?", a rawn ti chu, eng dang sawi loin, "Hei hi lo hre rawh, ka fa te leh ka pasal chunga kut lektu apiang chu an ruang a chhuak nghal ang", phone ka off zui hmak.


Thu sawi awm a nih leh nih loh hre mah suh i, rilru luahtu ber ka sawi chhuak tawp mai.


Sammy-a la harh loin, a bek kak lai ṭhuiin an tuam.


Lal Fanu nen Sammy-a kan riahpui, misual ho awm zel dan ka hre lo. Kan nufain a bulah kan ṭhu ngawi reng.


Party dang thiltih tura ngaih kha, a nupui hlui thiltih lek lo ni reng a.


Nu huaisar tak a ni.


Lal Fanu ka pua a, Nurse Duty ten khum ruaka mu tura min tih pawhin ka duh lo. Muthilhsan ka phal thlawt lo.


A harh huna a hmuh hmasak ber nih ka duh.


Lal Fanu hnung puakin ṭhutthlengah ka ṭhu a, Sammy-a kut vuanin, a changin a biang ka chul heuh heuh leh ṭhin.


Ka lo en uluk ngai lo a, a Tar buai mai. Kum sawmli vanglai a hmang ṭan chauh a ni a, kum sawmruk hmel a pu tlat.


Inthlan hi zo sela, ṭha tâwkin ka enkawl ang.


Sammy-a kut ka vawn tawk ran chungin ka lo muhil mawni, a che dat datah ka harh a.


A mit vun phu uih uih ka hmu nghal zat, a kut ka vuan nghet sauh a. Ka hmuiin ka tawk vang vang.


Ka kut chu a rawn vuan nghet thut ve ta a, men a tum tih ka hre mai. Ka kut chu, vuan nghet ṭha tak a ni.


A rawn meng chhuak hliai chu, ka thaw huai.


Lu tiche loin a meng kual ruai, "Chhuanpui?", a ri chhuak eih lo naa, ka hming chiang takin a lam.


Ka kut chu nghet mangkhengin a chelh.


Hnaihin a biang ka tawk a, "Sam, i kianga hi ka awm", kei pawh chu, ka âw a ri chhuak chang chang.


Min hmu chu thawl huai niawmin a han thaw chhuak ham ham a, chil a lem khawlh.


"Lal Fanu a ṭha tawh lutuk a nia, a muhil tawh a, a mu tui lutuk ringawt", thei leh thei loin a hmui a tiche a, a nui.


A kut ka vawnna chuan ka biang a dawm a, sawi duh a nei, a mitmeng ka chhiar thiam.


A nupui leh a fa te a hmangaihna mitmeng chu hmuh nuam tak a va ni kher em!


Zingah ka u leh kan pa te an lo kal, Inspector pakhat hi a rawn tel ve bawk.


Sammy chu a ṭhu chhuak thei a, Lal Fanuin a ngai em a, a pa a harh tih a hriat aṭangin a laksawn theih tawh lo.


Inspector chuan heti hian a sawi ta a, "Khami te pali khan Party pakhat hnen aṭanga pawisa tam tham tak dawngin, inthlan aṭanga inhnukdawk tura vau tur chein an lo ti a ni awm a. Party hming leh pawisa petu, an ngal roll sak pawhin an puang zar duh meuh lo. Rinawm fumfe lo tak an ni.


Party pakhatin pawisa pein vau tur chein an ti tih an sawi nameuh mai, Party hming leh tihtirtu an sawi leh duh si lo. Dâwp chhuah theih an ni hlek lo, an ṭang ve tlat a ni".


Party thiltih a ni lo tih hre chiang bertu ka ni mai awm mang e ka ti.


Misual pakhat khan 'Manoi' hming a lam ri zeuh a nih kha. Manoi a ni phawt ang, amah bak rin tur a awm lo.


A thuhrimah, Sialsukah min lo nghak tihna nge?


Kan chawl dawn tih an hre ru tihna a ni phawt ang a, Sammy hian Manoi hnenah kan zin chhuah te hi a hrilh ve mawni?


Sammy pa zawkin, "Party inbeih hun lai tak a ni tih kan hai lo, nimahsela; tharum hial thawh zâwnga inbeih hi chu", a chek hlak a, "Tharum zâwnga inbeih hi chu, Dika pa, i ngaih dan han sawi ve teh", tiin, keima pa zawk chu a han rawn a.


Ka pa chuan, "Hma-i pa, nu leh pa nihna angin kan thin a rim tehmeuh mai, nimahsela; a tuartu kan fapa kutah a chinfel hna i dah zawk teh ang. A thutlukna chu engtiang pawh nise, i thlâwp mai ang hmiang", a ti charh charh.


Inspector pawhin, "Thil pawi a ni lo tih ngawt theih ni mah suh se, thisen hial a chhuak ta mai si a, hrem ngei an ṭul khawp mai. Campaigne hun tawp hnai a ni lam tawh bawk a, Party hminga bei i tawk kher nen, Police ho hian kan thu hmang pawhin kan manin hremna kan pe thei a nia", a lo ti ve a.


Chu chuan min tilawm.


Inrawlh tur ka ni lo a, ngawi rengin Sammy bulah ka ding.


Sammy-an heti hian a ti ta a, "Chhuanpuii nen kan lo sawi dun phawt ang e, ka pa", Pa pahnih an awm a, tu ber nge a koh hriat mai a har.


"Ka nu ten an lo thlahlel ang che u, lo va haw mai ta che u. Inspector, chanchin kan hrilh theih nan che, i number min han hnutchhiat la", a ti a.


Inspector number chu a phone-ah ka save a, ka pa te nen inzuiiin an chhuak ta a.


"Chhuanpui?", Manoi thiltih a nih avangin misual ho chu hrem kher ṭul ka ti lo.


A ni thei bawk si lo, pawisa an duh avanga khatianga min vau an ni a, an thiltih man an hmuh ngei a ngai.


Sammy-an, "I ngawi reng a, ngaih dan han sawi ve ta che", a ti chu, "Ka inthlahrung", ṭi dakin ka han ti a. A ner salh.


"Inthlahrung thei i ni lo, ka bulah ngat phei chuan ngampa tur i ni. I hria maw?", nelawmna pakhat mah a awm lo.


Nui hmel a pu ta hauh lo, a thinrimna a thar mai a nih ka ring.


Sammy chuan, "Chhuanpui, han sawi la", a ti leh. Kei chuan, "Dik takin, an sual man an hmuh ngei a ngai. Sam, Party dang tihtir a nih i ring em?", tiin, zawhna ka zawt let.


Min thlêk ngun chiang hle, thle sawn duh loin, ani pawhin Party dang tihtir a nih a ring chiah lo tih a chiang reng.


Sammy chuan, "Vai Ram a ni lo a, tharum thawhna an kalpui duh lo ang. Mai thei bawk", Lal Fanu a en a, a muhil tui nasa mai.


"Hrem ṭhaa i hriat chuan tuar rawh se, mahse; an tâng rei thei lo ang", chu chu hriat sa.


"Khaw'nge phone?", a phone ka pe a. Inspector a bia. "Sir, i kutah kan dah e", a ti tawi fel ât roh mai a.


Inspector chuan a tifel chiang khawp ang.


Thenzawl Police Station-a FIR thehlut kan ni a, kan chhungten an thehlut. Misual ho chu an sim nan tala hrem an tuar a ngai.


Manoi bul ṭan a ni a, amah ngeiin han tuar se ka ti.


Sammy a harh ṭha tawh a, a lu tuamna erawh Aizawla phelh turin kan ti ta mai. Haw hmaa Misual ho hmuh duh viau mah ila, Sammy-an an ruala kal a phal lo.


Ka pa te pahnih leh ka u nen an kal a, Lal Fanu piahah a u te pahnihin min pawm chawt a ni ber e.


Hmingi a lo kal a, an Dil-a Sangha rût tur a ni a, min lo lên a duh avangin a ṭhulh phah.


Kan tawhsual tawh lam reng a leng lo, "In Driver-in a chhan lo che u em ni? Ngawi rengin a awm mi? A ti awm lo e, Tlangval tha ngah a nia, a ṭangkai dawn tehreng nen, a ṭangkai hun a hre lo em mai", a ti niah niah.


Aizawla a lo awm theih dan tur ngaihtuah a ngai.


Driver a hmel duh tih hre ngat ila, Dawra thawk turin ka sawm phei tawh ang. Hre har mah mah bawk atin ni.


"Driver-an misual a hnek ve em?", Phurthak a kai thu sawi nen a inang chiah chiah.


"Driver ti ziah suh, Duhsaka a nih kha. A hnek nasa lutuk, amah avangin misual ho an tlanchhia alawm", min bêng hlak hlak.


"Over e a", lâi chem chemin a tithlarawk.


Chhaih nan a la hma, amah ngei inpuan hun nghak ang. Chhimbudawi pawh a ngai lo.


Nakinah, amah a inpuang leh mai ang.


Sammy te rawn hawin, a Ni la lain Aizawl kan pan. Hmingin Duhsaka chu thlahna ṭawngkam hlan a duh viau.


Duhsakan Hmingi a awm tih hre lo hmak angin a phe zut chu ni si.


An inbiak theih dan kawng zawn a la ngai.


Aizawl thlen hnuah Social Media-ah min la sawi bânglo tih ka hre chauh. Chanchin tharah min lambun thu an puang ngei a.


Fb group hrang hrangah min la khêl chhunzawm reng.


Fb account fake ka siamah ka lut. Office-ah Sammy a kal a, Lal Fanu leh a pi leh pu muin, Freddy-a leh Siamtea School an kal.


Kan tawhsuala min lainatna leh min demna a inpawlh niaih nuaih.


Pawi ka ti lo, a pawimawh ber chu kan chhungkuain him dam takin kan awm a, khang misualte khan an thiltih man an hmu bawk.


Fake account haw(hua) ber intiin, fake account ka nei bawk si. Chanchin lawmawm hriattur a awm lo.


Account ṭhiatin, Fb app pawh chu ka mangṭha ta a.


A ṭul dan azirin, Sammy-a hnenah ka account hlui password hlui ka hriat thu leh, chumi hmang tura min phalsak turin ka la dil ang.


A thu hmu loa ti ka ni tih a hriat hunah, min ṭim leh nghek palh ang.


Mahsela, tawhsual tawh aṭangin Sammy-a mizia a dang hlawk. Thenzawla cham chhung kha chu a zia.


Aizawl thlen hnu erawh, "Inthlan hnaih avangin a rilru a hah a nih dawn hi", tia namnul mai chi a ni lo.


Biak hmasak emaw lo chuan ṭawng nachang a hre lo.


Kan hriat loh turin ka pa hian a zilh zauh zauh. Ka nu pawhin mak a ti. "A beka an vuakna khan a thluak a khawih pawi hman emawni aw?", ka nu phei chuan a ti a. A mit tui a tla hial.


Siamtea leh Freddy-an a nungchang aṭangin an ṭih deuh hlek a, Lal Fanu hi chu, a Lal Fanu a ni miau a.


Chumi avang takin Lal Fanu hnenah, "Apa inpawmtir char char zel la aw", ka hrilh ru keuh keuh.


"Chhuanpui, thudik takin min han hrilh teh, in nupa nunah hian in hlim lo viau em ni?", ka nuin a ti thlawt.


Nufaa nupa nun han sawi duh lo sateh mah ila, a ṭulnain min urthlu tawh ngang a ni e.


"Ka nu, pindan pawna ka ngaihsak ang chiahin pindan chhungah pawh theihtâwp ka chhuah ve bawk asin. Tawhsual tawh aṭanga hetia a awm tlat hi ka hrethiam tawh bik lo. Zawh mi hian a awm lo a, thil awm dan han zawh ka ngam ṭhin ngang lo a ni", ka nuin min hre thiam chu ka lawm.


"A thluaka hriatna thazam te hi a chhia ang tih ka hlau. Ih e, Chhuanpui, tun hnai hian a nunhlui an phawrh chhuah sak nasa mai si a, hengte avang pawh a ni mahna", ni tak e, chu lam ka lo hre tawh hleinem.


Ka nu chuan, "Inthlan hi zo sela, a pangngai thuai i ring teh ang", a ti leh.


"Han sawi law law ila, Samuel-a hi chu mahni tâwka induh ve tak a ni a, Manoi khan engtin nge a duh duha a tihkual theih ka hre mai lo",


"Nu, Sammy-an a hmangaih alawm", ka nu chu a nui mai a, "A hmangaih tan nasa takin a thawk a, a duh tinreng a pe a. Manoi nen inṭhen an tuma ka biak fal laiin heti hian min hrilh a, "Hmangaihna min chênpui dan a thiam hlawl lo, i fapa hian nupa nun hman dan a thiam lo alawm. Ka duh tinreng min pe, mahse; ka mamawh tak min pe thei tlat lo", a ti tawn tawn a. A fala ka bia chu ka inchhir teh asin", Manoi thla ka hau mawlh mawlh.


" Ka fapa ṭhat lohna lai min hrilh hi an awm fo, a nupui thu thuin a awm min ti tâwk an bo lo. A nupui kâ ngeia chutianga a ṭhat lohna han ngaihthlak chu a nuam tehchiam lo. Nupa nun hman dan a thiam lohzia chungchangah a la ni zui", ka nu chuan sswi a hreh hmel takzet.


"Thiam ang tâwkin an nupa a hlim nan Samuel-a, a rukin ka hrilh fo. An inṭhen chhanah hian Samuel-a thiam loh chu a ni ta der, nupui tilawm thiam loah a chhuak ta a nih tak ber hi maw", a han nui tak naa, Nu hmangaihna chuan a fapa a vuipuiin, a ṭan bur.


Nu Papuii a rawn thleng a, sawi zawm theih a ni lo.


Ka pa leh a tute an lo thleng chawpchilh mai bawk. Nu Papuii leh ka nu chu an inbe tui thei khawp mai.


Zana an zirlai tibuai lo tura homework tihfel pui hmain, Serthlum Tui leh, Freddy-a dan takah Dâwt ka ei tir phawt.


Chumi hnuah homework kan ṭan ta a, Siamtea hian a pa a chhun a nih ka ring, a homework hi tihpui a ngai mang ṭhin lo.



Uluk theihtâwp hian Freddy-a ṭanpui a ngai. Rilru chak lo tak a rawn ni chho hian min ṭhawng.


School kal rual la ni lo Lal Fanu pawh hi, a rilru a chak vak dawn loin ka hre ta bawk.


School kal a hun hma hian Alphabet tih ang hi lo zirtir beuh beuh ila ṭha mai thei. Tv-ah leh Lehkhabu-ah Naupangin a zir theih awm ang hi ka thlirpui fo a, a man chak chuan ka hre ve.


Inthlan hi zo vat se, Sammy-a a pangngai ang a, a ṭha fel vek mai ang.


Zanriah ei laiin ka pain, "Sangpui, tunlai i zia hi a dang tlat, harsatna a awm em ni? Candidate aṭanga inhnukdawk tura vauna i dawng leh ta nge? I nu leh pa min hrilh duh lo a nih pawhin, i nupui tal i hrilh hre tur a ni. Misual ho kha engtin nge an awm zel tâk?", a ti a.


Sammy chu a ngawi ngal, ṭawng chhuak tumin a lang lo.


Hrehawm ka tih ṭum ber a ni ang.


Ka nu a khuh kharh, Sammy chu tihian a ṭawng chhuak ta a, "Kan Party chhungah inhmuh thiam lohna a awm hlek a, a la fel hleithei lo. Candidate zinga hminghliau ber ka ni a, inhnukdawk tura min duh an tam em avangin inhnialna a chhuak deuh reng mai. Hre lo ula ka ti a, ka mizia dang ta chu pawi ka ti lutuk, min ngaithiam dawn nia".


Tu te pawh kan thaw huai.


Ka pain, "Inhnukdawk theih hun chhung a zo tawh a, Campaign hun a inṭan chiah. Inhnukdawk tura duhtu che tam mah se; tilui zel rawh. Engtik aṭangin i thawh chhuah dawn?", a ti a.


Sammy-an, "Naktuk tuk leh aṭang khian", a ti bawl a.


A ṭawng chhuak leh tawh lo, ka pa lahin thu dang han zawh zel.a tum lo a, ka nu nen phei chuan 'ṭik' kan ti ngam lo hrim hrim.


Lal Fanuin a be buai reng zawk a, a zia.


Mahse, chu pawh ka zahna thlentu a ni. Ka pa nen tv en laia an inbia chu Lal Fanuin a bawh chung a, a be buai chhen bawk.


Sammy-an, "Lal Fanu, awm ṭha hle hle teh, Apu nen kan inbiak hi", chang deuh hlek hian a ti ta mai a.


Ka lo phu zuk, Lal Fanu lakah âw zâng vah leh nêm tak a hmang ṭhin.


Lal Fanuin a hlau lo, "Anuin inpawmtir reng tur chein min hrilh alawm". Sammy a ngawi reng.


"A nih leh, Apu nen thil pawimawh deuh kan sawi a, Anu lo va inpawmtir thung la tiraw?", Lal Fanu a kuah bet a.


Lal Fanuin a duh lo, "Anuin inpawmtir tlat tur chein min hrilh alawm, Apa, tv ka lo en char char ang", a ti leh.


Sammy chu ka melh ṭawk a, thil thar teh vak hmuh tur a awm lo.


Politics lo thildang avanga buaina a nei nge le?


Lal Fanuin min puan ta si a, zahthlak reuh mang e. Freddy-an, "Anu, lo kal teh", tiin min rawn au a, ka him hlauh.


Hmanhmawh lutuk tak maiin ka kal a, a thiam loh lai a sawi chu uluk leh muang fahranin ka hrilh keuh keuh.


Helh ka nei avang nimaw, zan dang aiin an zir zo hma ka ti tlat.


An hmatiam an thiam vek chung pawhin, "In la thiam lo, ennawn rawh u", ka ti ṭalh.


Ka nu a lo lut a, "In zo dawn tawh em? Mut a hun hnai e", a rawn ti a.


Dar kua a ri hnai reng mai.


Mutna siamsakin, Sammy leh Lal Fanu pawh inpawmin kawngka bulah an inchhaih nui ar ar.


Lal Fanuin min puan kher kher kha chu, zia lo thei em mai.


Sammy-an min chhaih zui emaw, eng thu mah a sawi lo. Politics avang chauha buaina nei a ni lo chiang alawm.


Biak theih pawhin a awm lo, Lal Fanu a kuah chial a, min mangṭha loin a chhing zui daih.


Sawifiah theih si lo hian ka na veng veng, chhungkaw hlim tak kan ni naa, nupa hlim tak kan ni thei ngai dawn lo a ang chho riau.


Lal Fanu nen Dawr kan tlawh, Hriati leh Nancy tan ei tur bakah, hlawh pek a hun tawh a, hlawh kan pe pah.


Lal Fanu an chhawnchhaih thiam a, a nui uar uar zel.


Lehkhabu chah ngai te min hrilh a, Lal Fanu u te pahnih School bân hun thleng Dawrah kan awm.


An bân hnaihah Dawr aṭangin kan chhuak a, "Lal Fanu, naktukah lo kal leh la aw", Hriatin a ti a.


Lal Fanuin nuam a tithlu ngang mai.


An bân rualin School kan thleng a, Manoi lo ding vang ka hmuh erawh chuan min tilawm tehchiam lo.


Kan inhmachhawn ta ran, Lal.Fanuin a Nu tih a hre tlat lo a, "Lal Fanu, Chibai ti rawh le", ka tih angin, nui sen sen hian, "Chibai le", a ti a.


Manoin a lawmna tihlan hreh tak chungin, "Chibai, i lo va lian tawh em!", a ti ve a.


"Phone-a i lo sawi kha", chutiang sawina hun a ni lo.


Siamtea leh Freddy-an Manoi nena min hmuh chuan an hamhaihin, tu bulah nge kal tur an hre dawn lo.


Manoi hnenah, "Siamtea leh Freddy-a an lo chhuak ṭep tawh, hruai haw tum lo la, thu ṭhalo hrilh hek suh. Saw lai aṭang sawn ka lo thlir reng dawn che. Phone-a ka sawi angin, ka fa te pawi khawihtu apiang ka zuah dawn lo a nia".


Min hmuh theih loh nan ka biru, chiang takin ka hmu pha vek tho.


Siamtea leh Freddy-a an lo chhuak ta a, Freddy-an a ngai a ni ang, a hmu chu a kuah nghal chung.


Siamtea thung chu a hawi kual ruai thung, Manoin an pahnihin a kuah a. Siamtean a kuah let ve miah lo.


Freddy-a thung chuang a kuah ngawih ngawih. Ka va lainat tak.


Chutih rual chuan, Manoi thiknain min tuam ve bawk. An ṭawng hre thei lo mah ila, an chezia aṭangin ka hrethiam.


Manoin hruai haw tumin an bânah a pawt a, ngai viau e ti loin Freddy-an a duh bau lo. Siamtea chu chiang sa.


Lainatna, huatna leh thiknain min tuam rawn a, che phut lo turin ka inthunun nasa viau bawk.


Ka rin loh lutukin Sammy-a a rawn lang tlat.


Siamtea leh Freddy-an an pan thuai a. An sawi ka hre thei si lo, kal kiang zawka ka ṭang chu â ka inti lutuk a.


Siamtea lu thing nawk nawk leh hawi kual ruai chuan min zawngin min nghah a duh tih a hai theih loh.


A nu ka ni a, hriat theihna keimahah a awm tlat.


Sammy-an Siamtea a sâwi hrep, pên khatin ka tawlh hma a, ka au chhuak ṭhelh a ni.


"Anu, a u te bulah kal tawh ila", Lal.Fanuin a ti chu, "Reilotê nghak ang aw", ka ti a.


Dik takin, va kal mai ka duh.


Motor chhungah Manoi a lut a, thuawih takin Freddy-a a lut mai. Siamtea erawh, a pain a nam lut, ani pawh a ṭhu lut a, an tlan chhuak chu a ni ber mai.


Ka phone a ri nghal thuai bawk, Sammy-a a ni a, chhâng rang tak ka ni.


"Aw, Sam?",


"Naupang School bâng hruai a ngai lo, ka lo hawpui ang",


"Sammy", phone a off daih.


Ka call let ngat, min chhâng ve mai bawk.


"Hello?",


"Sam, i lo sawi har em mai, School ka thleng tawh, lo kal duh suh. An classroom aṭanga an lo chhuah thuai ka ring, an nu leh pa nghaka la awm khawmuang pawh an la kat nuk", ka ti hmiah.


Dam takin ka sawi thei lo a ni e, ka âw kha a chang fak tih ka hria.


Tun ang hunah, dam taka ṭawng chhuah a har. Siamtea duh lo chung an kalpui khan min tidam thei lo.


Sammy-an, "Ka hruai tawh, in kan thleng ṭep, lo haw nghal rawh, Lal.Fanu i hruai tel em?", a lo ti chu, "Ka fanu ka hruai tel lohin, a u te pahnih School bâng kan hruai dawn alawm",


"Lalchhuanpui", phone aṭangin mi rawn vin nghek.


Manoi hmuhah min han vin ngam chu le.


"Sawi dik loh ka nei em ni? Ka fa te School bâng ka hruai", ka ti ngat.


"Ka hruai tawh, lo haw nghal rawh u", a thinrim mitmeng leh hmel awmdan ka lo hmuin ka tuar tawh a, tuna a awmdan tur mithlaah a lang.


Siamtea leh Freddy-an an Pa âw vin leh thinrim hmel an hriain an la hmu lo a, pawi ka ti.


Manoi hmuha min vin avang hian pawi ka ti zual.


Nui hul hakin, "Sam, dâwt dâwt sawi suh, an bâng chauh alawm. Inah haw zawk mai rawh, phone ka dah".


Min lo call nghal, ka nui hak.


A nupui hlui hmaah a inti huai hle mai maw? A nupui hluiin a chhuah chhiatzia hre hawt lo chuan!


Naupang an haw darh sang sang hlawm a, kan Sir hluiin, "Chhuanpui, i lo thleng chauh tihna nge?", tiin min rawn bia a.


"Good Evening Sir", ka han chibai hmasa tê tê. "Thleng chauh lo e, tihian, an bâng fel tawh em ni?",


"Fel tawh e, School an rawn kal tiraw? A pain a rawn hruai khalh che mile aw?", a nui vur vur.


"Hruai khalh lo ang, tunlai chu a buai thei lutuk", a mawiah ka han nui ve mai.


Nuih har tak a ni.


Sir chuan, "Sammy chu han bia la, nakinah, in nupain min lo la tlawh rawh u aw. Kan Zirlai hluiten min la ngaihsak reng tih hriaa in lo lan te hian kan lawm ṭhin a nia aw", a ti a.


"Lutuk ele, min nin rak khawpin kan lo la tlawh ziah ang che u", ka ti a.


Sir chu, a ngai tein a nui huah huah.


"Sammy chu be rawh, a lo hruai khalh che a ni ang. Chhuanpui, ka hawsan mai ang che u aw. Lal Fanu, bye bye...",


"Bye bye", Lal Fanuin a bye bye nasa.


Ka pawm ngawih ngawih, ka neihchhun takmeuh meuh a nih tak ber hi!


Sammy-a laka tihtauh ka duh avang hrimin ka haw tlai dawn.


"Lal Fanu, KFC i ei duh em?",


"Yesss, duh duh duh", a kut a phar chhuak a, a ha lang vekin a nui.


A biangah ka fawp ngawih ngawih, ka Fanu hmangaih leh duat em em. Ka chanvo a ni tawh a, tu min chhuhsak ka phal dawn lo.


School aṭanga hla fe kan kal hnuah Sammy-a hnen aṭangin call ka dawng.


"In haw tawh em?",


"Kan thleng daih tawh, khawiah nge in awm zawk?",


"Lalchhuanpui, dâwt sawi hlek suh. Khatiang thawm bengchheng lutuk kha-", a lo ti a, pawtchattu an awm.


Hmeichhe âw hian, "Sam, tu nge i biak? Victoria Secret thuama i duh ber min lo thlansak ta che", a lo ti. Manoi ngei a ni bawk.


Victoria Secret thuam maw?


Chutiang hre lo khawpa â ka ni bik lo e.


Thlansak turin a ti vei maw, a ngampat danah Sammy hian a khilai zauh ṭhin a ni phawt ang a.


Hmei min nihtir an tum vaih chuan, Man kan inhlan fel tawh a, Hmei ka ni thei lo.


A lo ṭhen tawh chu a Hmeiah a siam tihna a ni ang em? An pahnihin infiamna mualah min hnuklut ta.


"E he! Anu, i ṭap", Lal Fanuin a ti khauh.


Ka ṭap tih ka inhre miah lo.


Eng thu mah sawi loin phone ka dah zui hmak.


Khang hun chhung zawng khan bum ka ni tihna em ni? Sialsuka tawhsual te kha, ka ngaihtuah kir lo thei lo.


A nupui ni tafam chuan ka zui zel a, a thu hnial hi ka la nei mang lo. Ani chuan, min bumin, min uiresan tihna maw!?


Kawngpuiah ka mit tui a tla zawih zawih.


Sammy-an min rawn call ngat ngat, ka chhâng duh lo.


Lal Fanuin ka mit tui a kutin min hruksak, "Anu, ṭap tawh suh, KFC kan ei dawn nia. I ṭah chuan kan ei miah lo ang", a ti ve reuh.


"Lal Fanu, Anu thinlung hi maw, a na lutuk a. KFC tam tâwk ei ang aw",


"Anu, keiman ka lo tidam ang che. Doctor, mi thinlung tidamtu ka nih hi", pawisawilo, thinlung thianghlim tak hi chu aw...


Phone ka silent daih, Sammy-an min call nasa lutuk. Ka chhâng duh lo.


KFC-ah kalin, a dawrah kan ei chilh.


"Lal Fanu, puar tâwkin ei ang aw", a sa nêm lai sik thlain ka eitir.


Kan nufa chauh hian kan hlim a, tu dang kan ngai lo.


"Chhuanpui, i ni tiraw?", ding lamah ka hawi a. Ka High School kal laia ka Star pa a lo ding.


Awiii....


A biangsum pahnih lang ṭhatin a nui sun sun, "I nih ngei hi, ka lo ṭhu ve thei ang tiraw?", a lo ṭhu a.


A hmelṭhat tawh sa nen, a biangsum hian a tihmelṭha zual. Chuta karah, a ha ṭo thuah nalh lutuk tak mai hian a tipa hliah hliah.


Lal Fanu biang a piai zauh, "Fanu i nei hmelṭha mang e, nangmah ang chiah chiah a nih hi", a ti leh zel.


Min tikhûrin min tizâm a, thin a phu dup dup.


Ka la Star reng a nih hi!


"Nu nih i ngeih a nih hmel ve, i thau kung kung mai alawm. Fanu i nei hmelṭha si", ka va han zak tak aw...


"Fak derna mah nise, ka lawm lutuk e. Taitit",


"Va han mak ṭhin tak, nang tal chuan khatiangin min ko teh suh",


"An la ko reng che maw?", Lal Fanu ngaihsak ka ṭhulh chuang lo.


A hming tak chu Lalhriatchhunga a ni a, Taiṭit tiin kan ko ṭhin. Classmates a nih piahah, ka Star pa a ni a, High School kal chhung zawnga ka ṭhian ṭha tak a ni bawk.


Ṭhiante an Star ngai lo ti mah se, kei chuan ka Star.


"La ko reng e, ka chhungte takngial pawhin min ko tawh. Nupui hmu zo loin ka lêng ka lêng ta a nih hi", dawthei e.


"Dâwt sawi suh",


"Thudik alawm ka sawi, Taiṭit tia inkoh kher",


"I inhmeh", ka ti pek.


A nui ta mai mai. Ṭuaiṭit lam a tumna lamah Taiṭit a ti pek a, kan Mizo Zirtirtupain Taiṭit tiin a ko a, chuta aṭangin kan ko chho ta zel.


"Minister nupui i han ni ta mai chu a nia, a mak ngawt mai",


"Minister nupui ni em lo e", ka ni lo tak tak si a.


School kal lai te kan sawi a, kan nui bâwk bâwk.


Lal Fanu a chhaih pah zel a, Lal Fanu a lâi nasa thei lutuk.


"I hmelṭha e", a ti ta phawng a.


Taiṭita nui za lutuk leh lawm bawk si chuan a pawm tharh. Hmuhnawm dun tak an ni.


"Ka Lal Fanu i ni duh em?", Taiṭitan a ti a, Lal Fanu sen ṭawn ṭawn chu thlir ninawm loh a va ni chiang tak.


Lal Fanuin zawi sepin, "Duh", a ti a. A irh zui. A zak lutuk chu a hmai a hup.


Taiṭitan, "I puar tawh nimaw? Ice cream i ei duh em?", a han ti a.


"Duh", a kut a phar chhuak.


Taiṭitan, "I nu i chhun a, i duhawm ru tlat", min rawn melh zauh pahin a han ti a.


Ka lo lâi ve ringawt.


Chutah, Lal Fanuin, "Apa?", tiin ka hnung lam hawiin a han au ta mai a. Ka phu chiang lutuk.


Sammy-a chuan a hmaa awm apiang a rawn pal phei pawp pawp.


Taiṭita sawisa tura rawn kal a ang mah zawk.


Kan awmnaa a rawn lut chat chu, a mak reng reng.


Lal Fanuin, "Apa", tia a ban avangin Sammy chuan Taiṭita mal chung aṭangin a pawm sawn a.


Taiṭita nena kan inkarah kher a ṭhu bawk.


Dawhkan hnuaia ka mal a rawn hmer nghal vang vang mai a nih kha. Hmer na tak a ni.


Taiṭitan, "Pu Samuela ngei mai, hmaichhana ka hmu che chu nihlawh ka va inti tak", a ti a.


Chibai tumin a kut a phar chhuak a, Sammy-an a kut a phar chhuak lawk lo chu ngei tak ka ni.


Taiṭita beidawn hnu, a kut laksawn a tumah Sammy-an a chibai hram.


"Nihlawh inti tur khawp kan la ni hleinem", a ṭawngkam chu a dangzar mai.


Mi hmaah chuan nelawm thei ang berin a inlan a, kei, a nupui hian a nelawm lo tih ka hre nasa.


Lemchang thiam tak a ni.


Taiṭita chuan, "A tlai tawh em mai, ka hawsan teh ang che u. A nih u aw, Lal Fanu, bye.aw", a ti a.


Ka ding a, "I ngaihawm em mai, tluang takin le", ka ti ve bawk.


"Chhuanpui, la inbe ve zel ila tiraw? Classmates hlui zingah i ngaihawm ber", Taiṭitan a ti a.


Sammy thinurna a chawk tho tih ka hria.


Taiṭita min thlahna thu chuan min tilawm. Min bum man hi a hmu ve khawp ang.