TEENAGE DREAM Chapter-5

[Diana Dais]

Chapter-5



Ka meng diar diar a, ka biang khawng vek chu ka mittui tlak na vang a ni tih ka hre mai. Thli in min chhem rualin ka thu chhuak nghal hluai.

"i mu rei reuh lutuk" a ti sup a, ka en hu mai. A mal chungah bawkin ka tap kha a nia, ka lo tap mu hil a nih dawn hi.

"dar eng zat nge, khaw nge Nunmawii" ka ti a, khua chu a la thim a, dar zat tur awm ang ka chhut thiam der lo.

"dar 3 a la ri lo deuh" a tih chuan Nunmawii awmna ka zawt leh vat,

"kan in ah" a ti leh sup, ding chhuak hluai in ka zir mar nghal talh talh.

"Lalnunkim" a chek zui hluk a nih chu,

"ka chhuk dawn a sin" ka tih chuan min chhang lem lo in a lo tho ve a, min kal pelin hma a hruai zui zat.








Ka pi chu vui liam a ni a, ui tu a ngah in pangpar leh puan a dawng nual a. A tana ni hnuhnung berah chuan chhungkaw kimin thla kan la a. Ni e, thih ni ah chuan chhungkua kan kim thin, mahse chu mi ni chu chhungkaw kimloh na ni in tan hun tur chu a ni.



A ni chuan natna awm tawhloh na hmun panin a rawng a bawl sak thin Lalpa hnenah a chawl tawh a nga, a kalsan tak a chhungte erawh kan hrilh a hai in tuar dan kan thiam meuhlo chu a ni.



Nunmawii'n sikul kal lovin ka pi min thlah liam pui ve a, nizan ah a tlaivar tawh bawk si a, a chau ve ngawt ang. Ka tan a in pe zo a, chu chu tun huna ka mamawh awm chhun a ni rih. Ka tan a awm reng tu leh min hnem tu tur



"in ril a tam em?" u Sangpuia a ni, thlan atangin kan let chho mek a, u Sangpuia pangai lutuk chuan min ti hrilh hai. Nizan ah kha chuan a biak tlak loh a, be mah ila min chhanglo, ngawi rengin ka pi bulah a thu a, a tho sawn eih lo bawk.


"kei chu tam viaulo, mahse Ruati hi a tam ka ring, engmah a la ei lo" Nunmawii'n a ti a,

"eng nge in ei chak" ka u bawk a ni, min ngaihtuah hmel lutuk chuan ka nuih a ti za lek lek.

"min lei dawn mi,?" ka ti ve a, a lo bu ve mai.







In thlak turin in ah kan haw a, haw kawngah noodles chhum tur u Sangpuia'n min lei sak a. In ah kan siam a, ei chak viaulo mah ila ka ril chu a tam ve reng.


Thil kan ei mawlh mawlh lai in ka phone a ri a, Malsawmkima a ni. Chhang lovin ka ring ral tir a, a rawn ti nawn lo bawk.

"nimin khan engtin nge Nunkima nen khan in lo awm dun theih a?" ka ti a, ka hmuh tirh kha chuan an in ngaizawng emaw ka ti a, mahse mi tawng an lo ngaithla dun reng kha a lo nia.




"kha lai hmunah khan a lo awm sa alawm, kei chuan Malsawmkima leh Hruaikimi in zui kha ka hmu a, ka zui ve a" a ti a, Hruaikimi chu pawl 11 a mi a ni a, te reuh te a ni nghe nghe.



Malsawmkima chanchin ka sawi zui peihloh avangin ti ti dang kan vawr zui a, Nunkima chanchin te kan sawi kai.



"zung tur a ka luh khan a lo chhuak tur nen kan in tawk a, i awmna min zawt a, ka hrilh a, 'in chung zawlah ka awm pui dawn, nang chu tah hian lo awm rawh' a ti a, engmah ka sawi ve hma in a kal daih leh nghal, rei ka tih zia che u chu" a ti niah niah a, Lalnunkima thusawi nen kha chuan in per san tak a ni.

"ka bulah chuan i ke nat vangin an in a i awm tur thu a sawi mai a sin" phawk fe in min en a, engmah phei chu a sawi lo.


"Ruati" ka en vat a, min en ve lem lovin a thil ei lai chu a ei zui mawlh mawlh,

"engnge i mipa duh zawng?" ka rin loh lam daih a ni,

"eng tia duh zawng" ka lo tih vat.


"an mizia, an hmel tih ve, eng ang chi nge i duh " a tih leh chuan ka ngawi vang vang. Duh zawng a hran pa a ka neih pawh ka hrelo, Malsawmkima kha ka duh a, a mah a nih chuan a thil tih engkim, a mizia te kha ka ngaina vek zel thin kha a nia.


"lian deuh ni se, kei ai in sang bawk se. Sport lam ti thei em em se, a thik thu chhe hle bawk se la, chuan min ta neih bur se ka ti, tawng tam viau lo se, cool deuh, a hun ah pa hle se, ruihtheih thil ti lo bawk se,chutiang in mipa duh zawng vak pawh ka neilo,, zaithiam se, guitar te perh thiam se, chu chu ka mipa duhthusam chu a ni mai" ka thusawi lai mek a ka rilru a mipa lo lang avang chuan ka nui nghal hak bawk.

"chutiang chu Malsawmkima nih dan a ni miah si lo a" pakhat chuan a ti niah niah. Ni e, a ni lo, ka mipa duhthusam thin ang mizia kha pakhat mah a neilo. Kei ang chuan a sang a, a sang viaulo, sport a tui lo hul hual a, ruih theih thil duh viau lo a, mahse zu a in thin. A mizia chu a cool hlawl lo, a tawng thei hran lova, a tawng tam ve thung. A zai lai ka la hmu ngai miahlo bawk.







Nunmawii a haw a, kei pawh in ti fai in ka pu te in lam bawk ka pan leh.


Ka pu te in a ka luh rualin u Sangpuia'n min lo hui zeuh a, a lam ka pan nghal bawk.

"tlai ah tah chaw kan ei dawn" a lo ti nghal var a, ka rin lawk dan a ni.

Ka ni nen In leng te thingpui semin kan buai ve viau a. Lydia hmel erawh hmuh tur a awm leh tawhlo. Nizan pawh khan a tlai var lo.











Thalai hun a nih avangin Nunmawii pawh a rawn tel phei leh a, Malsawmkima pawh ka hmu. Khawhar hla sa in mawi takin kan zai a. Thailai hun a zo a nga, in leng an rem a nga, kan khawhar na erawh a zual sauh thung ang.


In riak tur pawh ka rin ai in an tha hnem, ka ni in Nunmawii nen riah pui ah min sawm a, kan hnial lem lo.



In thlak turin kan haw a, Nunmawii chu a chhungte ka dil sak a, a nu in a rem ti chiahlo na in a pa thung erawh chuan
"va riah pui la, zingah pawh puih an ngai nasa dawn a, tih tur te kha tih pui zung zung ang che" ti in riah chu a lo phal hlauh a, Nunmawii inthlak chu nghakin a zawh ve leh ka pu te in lam kan pan leh thuai.










In riak tur ho mutna lai te chu phiat faiin chhuat kan nawt leh thlap a, kan mut fel meuh chuan dar 10 a ri thuak tawh. Ka ni room ah Nunmawii leh khual khua atanga lo kal vawin lam a haw hman lo nu Biaki te nupa nen kan riak ho a. Ka ni erawh ka pu te room ah a mu in ka hria.


Nunmawii phone khawih chu ka en pui a, game a khel a,
"eng game nge?" ka tih chuan ml a nih thu a sawi a, thil ka hre chhuak zawk.

"Hanabi a awm ti raw, eng nge a story " ka ti vat, Lalnunkima khan kan story a in an thu a sawi kha maw le.

"Hanabi maw, awm e, lawks aw, random noob lutuk, kan chaklo dawn" ti in a phun hlak hlak a, ka lam rawn hawi in "hanabi te chu a khawngaih thlak reuh lutuk, mipa duh a nei a, ml a mi tho hi a nia Hayabusa, mahse Hayabusa chuan ml hero tho kagura a duh zawk a, Hayabusa leh Kagura chu an in ngaizawng a,Hanabi tan chuan a na ve ngawt ang" a tih chuan ho ka lo ti khawp a, Lalnunkima'n in ang min lo tih chhan awm pawh chu ka hre thiam.




Zing ah kan tho hma hle a, in riak ho in tur thingpui te lum in kan buai ve viau.
Chawi ei dawnah Nunmawii a haw chauh a, chaw ei ve nghal tur a kan sawm ngial pawhin 'school kal chhuanlam in min hnial deuh tlat a, he tah chaw pawh ei se a tlai awm chai si lo. Mikhual la awm ang ang leh kan thenrual hnai deuh te nen tuk thuan chu kan kil tlang a, kan ri ve laih laih mai.




.
.
Thlan nghah ni a ni a, school kal lovin ka pu te in lamah thingpui sem in ka buai ve hle a. Thingpui in ruahna no chu khawm leh in ka ni nen kan sil leh vek bawk. Dar 1 a pel thui tawh viau a, engmah pawh ka la ei lo, biscuit chiah ei tura awm a, ka ei duh der lo thung. Biscuits hi chu ka ngaina miah lo a.









"i chau tawh em?" nu Lucy-i a ni, min nuih ver ver a, nu nelawm tak chu a ni.

"chau lo e" ka tih chuan nui chung bawk hian " i ril te a tam em? kan in ah han kal la, ei tur a awm ang, han dap rawh" a ti leh a, ka lu ka thing mawl tawp. Ka rilru chu a tam viau a, mahse mi tawngkam tha na zawng um dun dun ka duh teuhlo.




"han ei rawh" ti in ka kalsawn tur chu min vuan ding a, a phone phawrin tu emaw a call zui zat.



A biak dan atang chuan Joshua Lalnunkima a nih ka ring,
"lo hruai rawh, ka lo chhuah tir ang" ti in in biakna a ti tawp a.

.
"Bawiha'n a lo hruai dawn che, a rawn lut hreh deuh a, pawn ah lo chang mai rawh" ti in min vawn behna a thlah a,



"a ngai hleinem, he tah pawh ei tur chu a awm reng alawm" ti ve bawk mah ila kal tur chuan min nawr lui tho. Ei tur ah zawng mi ka hnar rei thei hauh si lo, in thlahrung tak chung chuan pawn lam pain ka chhuak hnu hnu.



"nangmah in lo kal mai ta che,hruai kher ngai khawp a naupang chhia i ni tawh lo" a bul ka thlen rualin a ti hmuk a, engmah pawh ka sawi ve hma in a in lam panin step ah chuan a pen zui nghal pawk pawk.








"engmaw i ei duh" chaw ei na dawhkan bula ding chung chuan a ti nghut a,
"ka hre lo" ka ti sap ringawt. Min melh run tak avangin hnuai lam ka melh thla riai riai, let leh mai te chu ka duh rum rum mai.



"i zak em ni" a tih chuan ka hawi chhuak vat a, min lo la melh reng avang chuan ka riat nawi ta vel mai mai. Ka zak tih a hriat te chuan min zawh kher a ngai em maw ni.



"zak mah la in ei puar rawh, riltam deuha zah ai chuan, puar pen pawng a zah chu a hreawm dan a nuam zawk ang" nuihza in sum deuh chung a a rawn ti leh lek phei chuan ngei tawh tak ka ni.




Noodles chhum tur a rawn la chhuak a, chhum turin a buaipui nghal zung zung, a che vel chu ngawi rengin a lo thlir a. Thingpui sem a ka vei kual sek vang khan ka ke chu a kham tawh hle a, Lalnunkima lah hian thu rawh tih na chang a hre bawk si lo.


.
Ka din ngai a ka din rei deuh vang nge ka ke te lah chu a mu ang chuah chuah a, hah deuh in ka ding ngawi reng, a rukin ka tang ru teuh bawk. Ka awmdan hahthlak zia hi.




"rawn ei rawh" ti in a thil siam chu dawhkan ah a chhawp a, muangchang a pan phei ka tum nen ka duh ai in ka kal chak.



A ep chiah ah chuan thu in a thil siam chu ka en a, tui hmel viaulo mahse a ei tlak tho ang.

"i ei ve dawn lo em ni?" ka tih chuan a bu nghut a, a phone chu a bih nghal ngur. In Hma tawna thu kan nih avang chuan ka tim deuh a, ka en leh zawk thin. Min ngaihven lem loh avang chuan ka awm a nuam deuh, a phone bak saw chu a ngaihtuahna ah a lut lo tawp ang, ka awm ve a ni tih pawh hi a hre tawh tawp nang. Chuvang chuan ka ei puk puk thei.


"ti nge i school loh" min chhang dawnlo emaw ka tih hnu a bung zet hian " ti mah" a ti a, ka be chhunzawmlo chiang a sin.





Lalnunkima ei tur siam chu a tui vang ni hauhlo in ka ril a tam tawh em vang zawkin ka ei teuh a,ka thil eina ka sil lai chuan a thutna ngai ah khan thuin a phone a la kheuh reng a, game a khel a nih ka ring.


.



"Nunkim" ka tih rualin a thutna atangin a ding hluai a, "lo khel rawh, ruah a sur dawn in ka hria, in suk zar ka han seng lawk" ti in a phone chu min pe a, a chhuak zui nghal daih bawk. Ka lawm e tih ka tum a sin le.



A game khel chu ka khelh zawm a, ML ni in ka hria. Game ka khelh ve pawhin Subway Surf leh Candy Crush vel bak ka nghal ngai si lo, ka game khelh thin te nen kha chuan a khelh dan a in per(h) san si, thiamlo tak ka ni, ka thi nghek nghek ringawt.








Nunkima a lo let chuan in thlahrung zetin a phone pek ka tum a, "lo la khel rawh, thuamhnaw hi thleh ka ngai" a ti mauh mai si a, ka khelh chhunzawm leh.



Ka khelh lai chu min rawn en pui leh zauh thin a, tih dan tur te min han hrilh chawp leh ang lawp lawp a. Kei erawh ka bo tulh tulh .

"hyper i nih kha, buff te kha bei ta che" a ti a, "eng nge chu chu" ka lo ti mai mai thung .

A beidawng ngang a niang,

"ka rank i down tak ngial dawn, hei lo tih chhunzawm teh" ti in a phone chu min lak sak a, thuamhnaw a la thleh zawh loh ho chu ka lam ah a rawn dah hnai bawk, in thlahrung lo mai Sia.

"nang ai chuan computer pawh an lak tlak zawk ang, i thi hnem ropui si" a ti zui nuah nuah.


Ka duh vang a khel pawh ka ni tawp si lo.

"ka vawikhat khelh na a nia, tu nge vawikhat thil tihna ah thiam nghal awm ngai" ka ti ve ta kher a.

"a lem ropui si khatiang games" ka ti leh erawh rum fe in min lo melh thung.


"i zah zel a ho" a ti nghut nih chu. Tu nge maw ka zah zel ti ni, tawng tamlo mahse a tawng chhun hi mei a nei, min kher ngat ngat mai a ni.


Thuamhnaw chu ka thleh zawh sak a, in chu ka chhuahsan zui nghal bawk.


In tih fai ve ka duh thu ka ni bulah ka sawi a, let leh har lo turin min chah bawk. U Sangpuia call a min lo hruai tur a sawm ka tum zet na in a tlaivar zawn sia, ka tum chu ka thulh leh rih.






Kan in lam pan chuan keimah in ka haw zui hnak hnak a, dar 3 a la ri lo deuh. Kan chhiat tawh boruak ka ngaihtuah a, kan chunga mi an that zia leh an in phal zia te, khawtlang hruai tu te, kan thenawm khawveng leh laina hnai chen in, kan phu loh leh kan beisei phak hauh lovin min tuam hlawm a. Kan chung a an thatna hi kan rul seng hauhin ka ringlo. A bikin Nunkima nu, nu Lucyi leh lek phei kha chu, na chang kan hriat hauhloh leh a tur a kan ngaih loh thil te kha min tih sak zung zung a. A bengvarin nu hawihhawm tak a ni, a ni awmlo se chuan sawi sep kaina lai tur kan ngah hle ang, mahse a ni a awm hlauh a, kan mawiloh na lai leh kan famkim lohna lai min thup mawi a, nu tha tak a ni. A fapa erawh mi sual tih tur ni lo mahse a nu ang em chuan a nel awm loh.




Ka in bual zo chu ka harh kawk in ka hria, thli a thawt vuk vuk avangin tukver ka kalh tha vek a. Ka pu te in lam ah phei leh hma ka ngaih avangin kan in a tih tur awm ang ang chu ka ti zung zung.




U Sangpuia leh ka pa an mu hil a, ka nu erawh ka pu te in lamah khan a la awm thung.


A room ka tih fel lai a u Sangpuia thaw ri hawk chuan min ti hlau thawng hle a, a mutna lam ka pan vat. A khum ah chuan a mu sai sir bam a, a lan dan chu a khawngaih thlak lek lek.



Kan in hau fova, kan awm dun tawh chuan kan in hnial in kan in ti thiamlo ziah bawk. Chuti chung chuan kan in ngai hle thung a, khawvel a u zaidam leh fel ber ni lo mahse ka u hian min hmangaih in min duhsak a, chu chu a tawk viau bawk.


Ka en reng lai chuan a rawn meng a, a la phu ang zuk zui.

"engnge kha tia mi lo en reng, min ti hlau a lawm" a ti nghal hluk hluk, thawh hlim ah pawh a vin nghal hlur thei chu a nia, a thinchhiat dan hi a chhia.



"u,, hreawm i ti em?" ka ti ta thlawt, kei pawhin he thihna nunrawng takin Kan chhungkua a pawt then hi na ka ti a, ka tuar thuamlo hle bawk. Tap bawrh bawrh se, a natna te, a lungngaihna leh hreawm a tihna te hi in tap thawl hawk se ka ti a ni. Mahse chutiang ni lo a a awmdan pangai a a awm leh thei mai hian min ti hrilh hai a, ka khawngaih ve hle.


"tihna hi eng chiah nge ka hria a lawm, a kal tawh te chu kal tawh an ni a, a la dam te hi kan pawimawh…" min lo en a,

"ka pi chu ti khan natna awm tawhloh na hmun ah hahdam takin a awm tawh dawn a, he khawvel ai a hmun nuam ah, a mah vang a hreawm kan tih hi a duh hauh lovang" a ti leh sup a. Chutiang a puitling tak mai a tawngkam a chhak chhuah avang chuan ka hnuk a ti ulh in ka lung a ti chhe lek lek.









Thalai hun tawp zan a ni a, kal an tha hnemin zai pawh a nuam a, Kan zai kar lak a lawmthu sawi na neuh neuh nei a ding te chu ka haw hlur mai. Zai hi nuam ka ti a, chutiang a mawi tak leh tui tak mai a ka pi thlah nan a kan zai chu hlu ka ti a, hun chu ka ui a ni.








Chelh din rual lovin hun chu a in hre liam ve zel a, ka pi thih atangin ni thum lai a liam leh tawh a, keipawh school ka kal leh tawh bawk.





Malsawmkima nen a kan in kar pawh a ngai ngai in a la thalo reng, min biak a tum thin a, kei in min biak loh dan ngawt ngaihtuahin ka peh hle thung. Ka hnen atanga a thil duh kha ka hre miau a ni. Kei chuan ngaihsakna te, hlim na leh hmangaihna, a lak atangin thil tha hlir ka duh a, a ni erawhin chuan chutiang rilru chu a pu ve lem lova, a pu ngai bawkin ka ringlo. A lakah hian ka beidawng fo thin a, mahse beiseina chhe te ka neih te vang khan ka beidawng hlen ngailo. Tunah erawh ka beidawng hlen tawh ang.








Teachers day hman na tur buai pui in kan class assistant C.R Ruatfeli te in ah kan class ho chu kan kim thap a. Tih dan tur te rel in stage chei na tur pangpar te kan buaipui a, kan bengchheng ngang mai.
.



Ruatfeli te in hi ka vawi khat kalna a ni a, ka tlang nel lem lo. Chhuat ah pher phahin kan thu far hlawm a, hmeichhe tih tur leh mipa tih tur kan in sem a. Tha hnem ngai taka tih tur ti an awm lai in lo pawt mai mai tawk an awm bawk a, an thenin phone te khawih in lo in hnial thinrim tawk lah an awm, kan in daih zai hlawm khawp mai.





Ka zun lah chu na men lo in a chhuak, tui ka in nghek vang kha a nih ka ring. Nunmawii chu zun pui ah ka sawm a,

"nangmahin va zung ve mai rawh, ma ni lo mah a tih zawh hma duh nak lai a" a ti hlak a, ka ngei reuh a nia. Bathroom awmna chu midang ka zawt a, an sawi na lam chu rang zetin ka pan vat bawk.



Ka zung zo chu ka thawl hual thei. Bathroom ka chhuah rual a tawng thawm ka hriat a avang chuan hmalam ka pan chu ka in her leh rih. Bathlar lam a thawm awm na lam chu ka pan nghal dan dan mai.


In hnaih zeta Nunkima leh kan class C.R Ruatfeli te lo thu dun chu ka hmu a, games an khel dun a nih hmel. Ka thawm hriat kha an mahni ngei an ni. Min hmu ve lem lova, ngawi rengin an awmdan chu ka thlir reng.


" bush ah khan an bi ru a nia" Nunkima chuan a ti dut a,


"lo tlan rawh, min that dawn a nia" pakhat chuan a lo ti chul mai,


"kha ka thi" Ruatfeli bawk chuan a ti hluai a, Nunkima phone chu a bih pui zui nghal zat bawk.


" nangmahin lo push tawh suh, ka bulah zel lo kal tawh rawh" Nunkima âw ki chu a dam hle a, min biak ve te kha chuan a tawng nghut nghut a, min hua emaw tih mai tur a ni.




Ka awmna atanga kal sawn in Nunnawii te awmna lam ka pan a,
'kan tih tur tih zawh hman loh hlau a buai em em a kan phet sup sup lai a games lo khel vel mai mai. Awm ang lo lutuk, hah tak a kan thawh lai a lo in chhai kual vel kha a tullo lutuk' ti in keima hriat tham lek a ring chuan ka phun zui hlak hlak.

"i va rei" a bul ka thlen rualin a lo ti nghal var. Ruatfeli leh Lalnunkima awm dan chu ka hrilh ve nghal a, a thinrim ka rin ve teh lul nen "midang pawhin phone a khawih tho hi" a lo ti mai mai si.

"chutiang a ni ngawt lo, Ruatfeli ngat phei chu assistant cr a nia, min tih pui lova mipa game lo khelh pui daih kha a awm in a anglo" ka ti leh hlak hlak,


"nichin zawng pawh a midang awm mai mai eng atan mah ti mang si lo tun atak a Nunkima leh Ruatfeli games khel chu i va hmu mawh em em" a tih chuan ka hawi heu mai, ka rin loh dan deuh a min chhan chu.



"ka ti ve peih tawhlo, ka awm mai mai ve duh tawh" ka ti hluai a, "khawi i phone" ka ti nghal zat bawk.

"ngatan" a tih chuan, thil in thawn ka duh thu ka hrilh a, min pe ve mai bawk. A phone a rawn lek chhuah chu ban vatin Xender ah Ml chu a in thawn a.



Lalnunmawii chuan ka thil in thawn chu a lo hmu ve pek a,

"khel ve rawh ka ti ka tia, a lem e mai, de de dei dei i ti kual a" ti in a phun zui nghal char char.


"ka khel ve chak thut a ni mai ni, khelh dan min zirtir rawh aw, ka thiam dawn miahlo a nia, a khelh ho theih a ni lawm ni, kan khel dun a nga, awi, nuam dawn e" ti in ka sawi pui chiam a, a phur ve ta deuh a niang a phun tawh em bik lo.





Dar 9 pelh a Ruatfeli te in atangin kan haw chauh a, stage chei na tur chu kan buaipui zo thei hram a. Kan class ai awh a item nei tur zingah Nunmawii nen kan tel leh pek a, drama a nia, naktuk zan a zir ah kan dah rih. Haw kawng mawlh chuan ka rilru a luah. Ruatfeli te in atangin Nunmawii te in hi a hla lova, kan in erawh a hnai hran lo. Haw rual pui tur ka zawng ru deuh a, kan veng lam a haw ve tur ho lah chuan len kawi an tum pek a, min sawm ve zat bawk. Chak ve viau mah ila Malsawmkima a tel ve dawn miau a, hreh zetin ka hnar, ka leng ve chak reng a sin le.



Nunmawii te in chu kar lovah kan thleng a, min thlah tur in ka sawm ngial a,

"ka thlah che nga, chuan keimah in ka haw leh a nga, awi, ka duh bik teuh lo" uar zetin a ti chiam a.


"ka thlah leh ang che" ka tih lah in "min thlah leh a nga, thlah leh che i ngai ang, zan khua a in thlah kual ka peihlo" a ti hmak mai si.



"a hlauhawm loh, i tlan char char mai dawn nia, ruah sur hma in, in In chu i thleng hman mai ang" a ti ve tak na in a hlauh vang a ni reng sia min thlah ngam loh.







Vana arsi te chu chhumin a hliah lek lek a, thli thaw vuk vuk chuan ruah a hnai tih a en tir. Ruah sur hma a in thlen hman ngei ka ngaih vangin hmanhmawh zetin hma lam chu ka pan a. Thla leh huai te te ai chuan mihring ka hlau zawk a, zu ruai leh misual tih vel chu ka tawng ang tih ka hlau ber.




Hlau lo tur a in fuih ka tum ngial a, ka in sawi thaih ting mai si. Thil ni lo deuh deuh ka ngaihtuah kual a, Lalnunmawii thlal chu ka hau hle ringawt thin. Min thlah ve mai si ni tur.







Ka hnung a pen thawm ka hriat rualin ka kal chak sauh a, ka hnung a mi lah chu a kal chak ve sauh emaw tih tur a ni. A thim bawk nen chak zetin hmalam ka pan sawk sawk a, kan in lah chu ka la thleng dawnlo nasa mai si,ka hnung a mi lah chuan mi lah chuan min la zui char char bawk nen. A tawp phei chuan ka tlan ta tawp.





"a nah" ka ti that rualin kawngah chuan ka bawk nghal thlawp, ka hnung a mi khan min hnaih tawh hle tih ka hria a, thawh tum a ka ke ka tih chet rual in ka rak leh nghal that, ka ke rek hi, a na lutuk ringawt.






Ka awmna lai thim zet te, thli thaw ri vuk vuk leh ruah mal tla te, ka ke na ut ut te, ke pen thawm lo hnai zel te chuan ka thau ah min man a, ka chi ai tawh tak zet.






Kawngah chuan ka thu sawp niah a, ka mittui tla chu dan buai ka tumlo. Ka chungah hian thil tha lo, thalo tak thleng thei a ni a, pawngsual, sawisak leh in thah thlengin. Ka hlau a ni, ka hlau tak zet.








Continue