Chapter - 27
Ziaktu : ilefi imoz
(Recap : Ka hawikual zuk zuk hnu chuan, "ka pa'n a kam thiam lo emni?" Ka'n ti leh hrâm a, a meng nûr nasa lutuk chuan min vuak a tum emaw ka ti hman hial a, mahse a sahdah bâwm hai rawk rawk chungin min rawn melh a, thâwk a la hluai bawk.
"I pa sazu thang kam ve te chu ê! An chhungkua pawhin kal se a per lovang!" A ti ta lâwng lâwng mai a. A au ring bawka ngaw kâr zawng zawngah a khâwk rum rum hial a lawm!)
"Au ring viau zel suh, miin an hre lovang tih i hlau emaw tih tur khawpa han âu kher zel! Hei chiang deuhin lo en rawh. Hetiang mai mai pawh han kam thiam loh" tih pahin thang kam dan tur vel chu ka hrilh mawlh mawlh a.
"I incheh tîr ange khati'n khawih thuak thuak suh" min kal hlat sauh paha a rawn tih chuan, "ka la kam reng reng hleinem mawle! Kha, tawlh hnung dûrh dûrh kher suh, rawn en la, thiam tum rawh." Tih leh rum fêa melh ka rual a, a lo ner nûng ringawt! A tih loh lamah hi chuan a lâktlâk loh ţhin ania!
"Ka pa pawh chu a va zei lo ve mawle.. A taimâk tehlul nen hetiang mai mai te han kam thiam loh" ka ti leh hrâm a.
"Thiam zâwng te, thiam loh zâwngte hi tupawn kan nei vek. Kan tih theih zâwngah tumah induh tur kan awm lo. I thiam zâwng tak kha tu emaw thiam loh zâwng tak a ni a, i thiam loh lam kha tu emaw thiam zâwng tak a lo ni ve thei. I tana thil harsa em em kha midang tan ho mai mai a lo ni a, midangte harsatna kha i tan thil awlsam tak a nih châng a awm ve bawk ang chu! Induha chapo thei hi tumah kan awm lo reng reng" a tih hmarh hmarh lai chuan, "kha ka zo, ka long answer zir lai i rawn tibahlah vek alawm, a bul aţanga zir leh vek a ngaih ka ring" tih leh Sazu thang chu pêk ka rual a.
"I fel e, ti kha chuan i tihdan tlêm azâwng ka hmu bawka ka ti thei ve mai tawh ang. Ţha deuhin va zir la, thingpui in hunah rawn in ngei ngei ang che. Thingpui in aia mut lum i thlan fo te hi ka hre vek ania, hriselna atan pawh a ţha thingpui hi chu in ngei ngei tur" rawn ti leh hrâmin eirawngbawlna lamah min pheisan a, ka in peih leh chuang hauh lo vang.
Corridor-a ka dawhkan dawh chu bawh ar arin lehkha ka chhiar lauh lauh a. Lalrinawma rawn tlân phei zuk zuk chu Sir-in a hmu hman ang tih hlâu fêin ka lo khap ve zuk zuk a, ani lah chuan ban phêna biru zauh zauh chungin min rawn pan zel a, ka bul a rawn thlen chuan a thaw hluam hluam mai.
"Kha, Lalawmpuia'n lehkha a thawn che! In dorm-ah ka lut dawna min lo vêng pah la, i thawn lêt tur lo ziak zung zung rawh" tih leh lehkhathem min pêk a rual a, mî rawn thawn tur an hre zêl hi mipa ho makna chu a ni! Tu emaw ber hi palâi atan an hmang ziah a, tuman an sawisel ngâi bik lo anih ka ring.
Hmeichhe dorm-a a luh rual chuan lehkha thema thil inziak chu ka chhiar vat a.
"Zanlaiah Manchester Derby a awm dawn a, ţhiante hovin Office-ah en rûk an tum. En ve ila!" Tih a lo ni.
Manchester City hi ka club ţan ber an ni a, United nen chuan hmelma ang vel kan ni. Vanduaithlak takin Op-a hi United fan ruhkawl lutuk mai ania, en dûn lo zawk ila kan inkâr a ţha rei zawk mahin ka ring.
"Tui leh mei nih i peih emni?" Tih chu thawn lêtin, "Kan inchawi dawn nia! In chak chuan exam zawhah, In vênga thingpui dawrah khân i duh duh i ei ang, ka treat dawn che nia" tih a rawn thawn lêt ve leh a, "in chak chuan min ngaidam rawh aw" ka va ti ve leh.
"Kan chak chuan biangah chuks a ni mai" uangthuang fêa a rawn tih leh chuan ka nui hak hak a, miin min hmu se ka â ta mai emaw an ti hial ang.
Thingpui in chawlh kan neih chhûng chuan Châmi hnenah inkhel en a peih ve leh peih ve loh chu ka zawt satliah a, "Inkhêl chu eng atan nge ka tih ang a? Zin châk chhuanlama hmanga tournament kan kal ţum pawn kan khaw inkhel pawh ka en ţhat peih loh kha" a ti deuh hlak hlak a. Henu tak hi chu! First eleven pawh hre miah lo thei kha ania, a âwm viau tho e.
"Hrim hrimin, zîngah thawh hmâ tho in ngâi dawna i peih mai mai ka ti" a ti leh hmarh hmarh a, "Derby a awm khât a, a awm vechhunah te chuan en ve ka duh alawm" ka tih chuan, "eng barbie maw?" A lo ti hê hâw a. Barbie ka sawilan âwm rêng rêng ka hre lo!
"Barbie ka ti lo. Derby ka ti. Manchester khaw chhunga club pahnih awm te an inkhel dawn, chu chu Manchester Derby an ti. I hrilh fin theih chuang lohva hriat ve zel tum lo mai rawh" tih leh thawhsan ka rual a, "ka hriat tam tak hriat loh i neih ve tho" a la rawn ti teh ţâlh a. A ngâwi duh lo ve ţhin ngawt mai.
Zan dar 12 a rik meuh chuan thâwm dim thei ang berin Office chhungah kan ţhu ţhap hlawm a, Office chhunga riak ţhin hmeichhe ţhenkhat pawh phûr hmel deuha phun ru sur sur chungin kan sirah an ţhu ve rân a, a dang chu mipa deuh vek an ni hlawm. Hmeichhia paruk vel bak kan awm lo.
"Bengchheng suh u, Sir a rawn thawh chuan a pawi dawn ania" tiin kawngka aţanga rawn lut tharte chu an lo hrilh zel a. Game an han ţan ta chu insûm harsa kan ti hlawm khawp mai.
Phat rual lohvin United ho chuan an ngam ngang lo a ni ber. Mancity thiampuipa KDB leh Haaland ten goal an khung deuh mawlh mawlh mai a, first half chauh a la ni chungin 4-0 a ni dêr tawh! A tam zawk chu United fan ruhkawl an nih hlawm avangin biak ţawng an har tawh khawp mai a.
"Next season-ah kan la sawp ve dawn alawm" tih angrengin an phun bul bul hlawm. A beidawng zual phei chu dorm lam panin an phun chhuak hmuar hmuar tawh. Op-a tak pawh a khawngaihthlak, a ţang ve si a, a pâwlte ho an che hleithei si lo, awmhmunah a sam a ţhâm leh nawk nawk ţhin.
"In chak mang si lova u Muanzova thingpui dâwrah min chawlhpui ngei a ngâi dawn anih hi.." Office aţanga kan chhuah lai chuan ka ti sar sar a. "A zia lo tak tak a ni. Exam zawh veleh ka rawn lêng chho anga ka treat dawn che nia, tam deuh i ei ngêi a ngâi ang. Bianga chuks lah ka hlawh thei ta si lo a" nui hul hak chunga a tih chuan ka nui hak hak a, Sir Isaac-an kan thâwm a lo hriat hlau deuhin ka han inhup leh rih ţhin.
Op-a ka ngainat em em chhan pakhat chu, phûtlêt a nei lo ţhin lutuk hi a ni. Hmangaih lêt beisei lo ang takin lang mah se a rûk chuan a beisei ţhin viau ang tih ka hria, chu lam ka sawi lo. Inngaizawng kan ni a, infawh te, inkaih te, in kuah, kal dun, a tam, keiman ka ti anih ngawt loh chuan min nawrluih leh min khawih luih a nei ngâi lo. Ka inthlahrung ţhin a, kan awmdun châng chuan ka kuah ve thak ţhin. Nghet deuhin min lo kuah lêt ve a, a hlim hlê ţhin tih ka hria. Infawh erawh tun thleng hian kan inkarah a la thleng lo thung.
Atan a hrehawmin, a tui lo vek ţhin ang tih ka hria a, mahse ka rilru zawng zawng ka la pêk theih miau loh avangin min nawrlui ngam lo. A hnena ka sawi leh ka ngen ang chiahin hun min nghahpui a, engkim a thâwidam vek huna a tâ ka nih pumhlûn theih hun tur a nghâk ve ngat ngat mai a ni. Heng avangte hian hmangaih a phû ngawih ngawih a, a châng chuan keimah kher min lo duh te hi ka lainat a, ka inthiamlo ţhin. Mahse, engtikah emaw chuan rilru zawng zawng pein, atana hmeichhe rinawm ber ka la nih ve ngei ka ring tlat a ni.
Chawlhni tlâi, In aţanga School lam pana ka chhuak chho chu u Arona nen kan intâwk hlawl a, a rawn duty ve leh tawh dawn anih hmel e.
"Lo ding teh!" Kalpelh mai ka tum lai chuan a rawn ti lauh a, min rawn nangching zui mai bawk.
"Op-a nen hian in ni ve deuh tak tak tiraw?" Mitko min sânkhum ûk chunga atih chuan dâr ka lo chhîn âk a, a bu nghat mai.
"Chuan.. Eng nge a an?" Bah deuh naka a tih leh tâkah chuan hrethiam lo deuhin ka melh chho hâw a, "Ngaihzawng han neih boruak vel chu? A hlimawm nge, a thawpikthlâk? Boruak nuam danglam deuhte a awm em?" Tiin min zawt zui leh hrâm a, "a pangngai a ni mai, nangni? Eng nge in an?" Ka ti lêt ve ngat!
Kei leh ka bialpa inkâr min zawtin thinlung a chawk tho ta sa sa, insûm ţit ţêt ka peih bik lo.
"Keini pawh kan ţha a ni mai e. Tunlai chu ka lak aţangin i hla riaua hriatna ka nei tlat pek a. Min hnar deuh riauin i hre ve lo maw? I danglam." Min dinpui dat paha a tih leh chuan nui lui hakin, "Keimah ngei kha ka la ni, Malsawmzeli, hmeichhe mâwl chhah khat tlat kha" tiin ka kalsan ta daih a. Ka thinlunga beiseina sâng lutuk rawn irh chhuak leh chu ka duh lo.
Beiseiawm takin ka lakah a awm niin ka hre tlat a, hope min pe ka ti lo thei lo. Ngaihzawng ka neih thu hriain thildang zawng aiin chumi topic-ah chuan min luhpui nghâl chat a, chiang takin a thîk thu sawi lo mah se ngaihbel tur âwm tâwk lekin mitmei min hmuh bawk! Ka ngaihbel mai mai nge ka hre lo, mahse a hmêl ka hmuh ruala thinlunga amah a lo thar leh nghâl kha ka thil duh loh lutuk a ni a, ka duh loh vang ngawtin ka titâwp thei chuang si lo.
"I va rawn thleng har em em.. Phûl hmunah Op-a te an zâi ania, va kal ve ang" Dorm-a ka luh rual chuan Châmi'n a lo ti hlut a, ka bag ka dahfel rual rualin min kâi phei dâwr dâwr a, nitin kan inhmu chung hian sawitur leh tihtur hi a awm reng tho a, kan inhne thei tak tak lo.
Piah deuh hleka mi panga vel lo ţhukhâwm laihte chu kan va hmu a, phûl chungah ţhuin Op-an guitar a lo pawm rân a, kan la inhlat deuh hlek avangin eng hla nge an sak ka hre thei mai lo. Chhûm zîng chuan anmahni a bawh deuh chiai a, thlanglama khawchhûng lang iar thlîr chunga zâi an ni bawk a, an lung a lên hmêl khawp mai.
Kan pan hnâi zel a, Zâwitê tea Op-a zâi pawh kan hre pha ta. Midang ho an ngawih ţhap laiin ani chuan thlanglam hawiin guitar a perh ri rêt rêt a.
"Mahse, he suangtuahna leh beiseina te hian,
I thinlung la hneh lo mah se nghah che an zuam!"
Zâwitêa atih lai chuan Châmi'n min rawn sik hlak a, "Hetiang em ema âtchilhtu che hi i tawn leh tawh ka ring lo, kaltir reng reng suh; vuan tlat la, thlah ngâi suh ang che" a ti sap bawk.
"Changtunu awm ve reng laia chutiang hla te han sak.. Thinlunga midang ngaihtuah chunga sa i ang riau!" An lam pana min kâiphei dâwr dâwr chungin Châmi vêk chuan a'n ti lâng lâng a, anni ho pawh an rawn hawi ţhap hlawm.
"Ka sak chhan te chu i hre reng Kâwli" ka lama a kut rawn pharchhuak dârh chunga tiin Op-a chuan min lo nuih var var a.
He mipa hi chu aw! A ţha chiang ve thlâwt a ni. Thingtlâng tlangval, Khawpui tlangval tam takte tluk loh ka ti ngam sak! A rilru a nêmin a hunah a pa em em lawi a, hmangaihna leh hriatthiamna pianpuitu emaw tih mai awl tak a ni. Ka sawi fo ţhin, tawng hmasa ni ngat ila ka rinawm lohsan phal ngâiin ka ring lo. A rawn lan hunin a zir lo êm a, rilruin âwn lam a neihsa tlat avangin a tla na tak tak thei rih lo mai zawk a ni.
"Office-ah Mizo Film chhuak thar an en a, a lem lutuk an tia ka en ve peih lo kei chu" Marina-i kianga ţhut sat sat pahin Châmi chuan a ti hmarh hmarh a, Mizo film tih leh a lem lutuk tih hi a inhmeh tawh lutuk a, film thar a chhuah châng pawhin en tinah kan tin ngâi ta meuh lo. Engtikah emaw chuan hmâ kan la sâwn ve mahna!
"Exam a hnâi tulh tulha kan inthlahdah tulh tulh vekin ka hria" ka beng sik niap niap chunga Op-an atih chuan lo bu nghat nghatin, "An thiam tawh hlawm lutuk aniang" ka ti ve a, kei erawh thiam nei mang si lova inthlahdah zîngah ka tel chiangkuang! Zanah lo chuan lehkhazir tumna rilru ka pu ngai lo.
"Class 12 kan pass hunah engtin nge kan awm chhunzawm zel ang le?" Râl lehlam thlîr vang vang chunga ka tih laiin Châmi a rawn inrawlh vat a.
"College te kan kal ve ang chu! Vawikhat pian ve mana College êm pawh kal loh chu kei ka ngaihdan a ni vak lo. Hei chen kan kal ve tawh a, bakah, Class 12 chin chauh tan chuan hna a vâng lutuk an ti zel.." A ti zat zat reuh a, College kal tumna rilru a lo pu ve hrim hrim chu a tihzia e, ka mal lutuk bik lo turah ngai ang.
"Kan kal ho vek thei ang chu, result pangngai ve tak neih tum hlawm ila, College khatah luh khâwm vek kan tum dawn nia" ka dâra a khabe nghah dat pahin Op-a pawn a lo ti ve a, duhthusâm mai la ni rih mah se ka thlâ an timuang lutuk tlat! Maltlata engkim mahnia tih vek ka ngai dawn lo va, a nuam ţhin viauin ka ring.
"Hostela awm ka châk a" nui hak hak chunga ka lo tih ve chuan, "kan awm dawn nia, hostel pakhatah, nitin zantin kan inhmuh theihna hmunah. Zîngah kaitho tur chein i room kawngkhar ka rawn kik karh karh ţhin ang a, peih lo deuhin kawngka i rawn hawng ang a, i thophang hmêl tûk tin ka hmu leh thei bawk ang a. A nuam dawn.." Nui nghawr dat chungin a lo ti ve leh zel a, min hlat a tum lo. Ka rual zêla ke pên a tum a, kan inkâr hian eng ram mah min thlen lo ta thut se tih lampang pawh a ngaihtuah hek lo. Engpawh ti ila awmduna dâi dûn zel turah a ruat vek a. Keipawhin phatsan ka tum bik lovang.
"Chaw ei a hun anih saw. Va dawh teh ang u, mipa ţhenkhat ho an chuhhelh thei sia dawh ve vat vat loh chuan a mawng kâng bâk kan chang leh lovang" tiin Châmi te ho an tho sap sap a, Op-a nen erawh ngawi rengin hmalam kan thlîr dûn a, min kuahna a tinghet zual sauh sauh bawk.
"Lo inţhen ta pawh ni ila, keimaha lal ber, thuneitu ber i ni tho dawn a. I thinlung ka hneh thei ta ngang lo anih pawhin ka thinlung hi chu i ta a ni reng dawn. I kherh a, i buan ve ngâi hauh lovin kei chu itan ka tlu sa tawh a, a pumhlûma ka neih theih hun tur che nghâkin duh leh tar kûn thleng pawhin ka hmangaih reng mai ang che. Mahse, i sawi kha ka hre reng dawn a, nghak tur chea min duh thu i sawi kha theihnghilh mai ka tum lo. Nghah chhuah tur awm dawn nganga i inhriat tâk loh chuan, ţha taka min hrilhin kan inkâr i titâwp dawn nia. Chhan leh vâng awm lova inţhatţhen ngawt ka duh ve lo va, chhan awm lova min ţhen dawn anih rau rau pawhin chhan awm lova min ţhen thu tal min hrilh ang che. Kei chu itan ka rinawm reng dawn a, buaina leh harsatna i tawh châng apianga phên tur chein i hmaah ka ding zel ang" ka beng sik niap niap chunga atih tâk sup supah chuan ka nghilh dup a, sawi ve tur rêng rêng ka hre lo.
Tenawm ka inti a, hmeichhe lepchiah tak niin ka inhre hial bawk! Heti khawpa min hmangaihtu, ka hmâ ngâia min thlahleltu en kâna midang ka beisei tlat mai hi hrehawm ka ti a, ka duhthuin ka duhna ka lalêt ngawt thei bik bawk si lo.
"Hun leh tui luangin min nghâk lo an ti ţhin a, hun leh tui luang ka nih ve miau loh avangin kei chuan ka nghâk ang che. Tu nge i lo duh ţhin a, tu nge i lo hmangaih ţhin tihah ka buai ngâi lo ang a, ka hmangaih em em che a ni tih erawh keimah hian ka vawng reng thung ang." Ti leh supin min pawt tho a, chhûmzîng kârah chuan min kâi dat datin Chaw dawhna lamah min hruai phei a, min lo hmu tute chuan min lo chhaih nak nak hlawm. Chu erawh beng arawngah a lùt lo va, he mipa, hmangaihna ngah zet thusawi khân rilru chhungril a fanchhuak vek a, thildang daih ngaihtuah chu har ve tak a ni!
"In va muang bik ve nangni pahnih hi?" Op-a nuin rinhlelh hmêl deuha min melh dûn vang vang chungin a lo ti a, thinrim mitmeng erawh ka hmu tel lo thung.
"Office-ah film kan en laklawh deuh a" nui lui hak hak chunga ka tih laiin amah vêk chuan, "Sawmzel, Study camp hi i ngeih a ni maw? I hmelţha zual sawt sawt mai tunlai hi. Lalawma te ho chuan an phû lo vai vai hlê mai che" nui hawk hawk chungin a lo ti leh a, kan inkâr a lo hre thâwi deuh tawh anih ka ring.
"Âlu min lo pêk belh lawk mai Nu Rêngpui!" Intê aţanga rawn ti bul bultu aw chu U Arona aw a ni tih ka hria! Kawngkharah dâkin min rawn thlêk vung vung a, Op-a nen min melh tawn zak zak bawk.
A hmêl ţha lutuk leh a pian nalh lutuk chu en loh hrâm ka tum a, ka ti hleithei lo. A ngaihawm tawk leka min melh dân a thiam ţhin si a, huat viau ka tum pawhin ka hlawhchham let dêr zel chu a ni e.
"Kal ang" ka beng bula rawn ti suptu Op-a chu inthlahrung ru deuha melh vatin ka kalsawnpui a, "Sir Arona ngur ngur chu, min ei zawh vek tum ni âwm hrima min en le, a hau deuh che a ni lo maw?" Engmah hre lo tih takah phûl hmuna kan thlêng kan ţhutpui lai chuan a ti khauh a. "Chutiang engmah ka va hre lo ve" tih zawngin ka chhâng!
Zanah a ngâi tê bawkin Corridor-ah dawhkan ka hûng leh a, ruah sûr tur inţham vel chuan lung te pawh a tilêng ve deuh. Thlang lawkah kan In a awm a, chuti chungin kâr khatah vawikhat chauh ka hmu thei a, min duat lo em emtu ka nu takngial pawh a ngaihawm ve rum rum a, exam zawh thuai thuai ka châkna chu lian tawh tak a ni.
"Sawmi! Sawmzel!" Principal office kawt aţanga min rawn hûi zauh zauhtu chu melhin, "eng nge?" Ka ti hû a, ngaihven leh ngaihsak tak anga lan ka tum tawh lo. Ka thinlungah hian châm reng dawn pawh ni se a lak aţanga inthiarfihlîm hrâm hrâm ka tum tawh ang.
"Mutna min lo siampui lawk hman em?" Office chhûnga thle deuh nghat pahin a rawn ti leh a. "Ka hman lo asin" ka tih pawh chuan, "a rei lovang" a ti lehzel a. A hminga kan zirtirtu a nihve na laiah a zahawm ve a, ka pan ta nge nge.
Office chhunga kan luh chuan chhuatah pher leh mutbu a lo inchap hnawk nuaih a, tlangval ve si mahni mutbu êm pawh han phah thiam loh mai chu ka ti rum rum a ni.
"Ka kut ka tinâ a" tih paha a kut dinglam a rawn lek chhuak chu menphâwk pui hrâ in, "engtin nge i tih a?" Ka ti hluai a. A kutzungţang pathum lai chu bandage vârin a lo tuam lûk a, vawiin khan engtin nge ka hmuh miah loh theih zawk ni?
"Thingzaina khâwlah ka barh tel palh a. Vanneihthlak takin ruh tliak a awm lo hlauh zawk. A zia lo tak tak a ni" tia min lo chhân chuan chek tlak tlakin, "a na dâwn anih kha, khatiang chung te chuan rawn duty loh ve mai tur che ania, Sir Muanzuala pawh a awm ve reng a, a hma pawn i rawn duty chhâwk tawh a, rawn tlâwmngaih ve mai âwm" ka lo ti hmarh hmarh a.
"I ngaihawm ve tawh reuh a" kiai suk chunga a lo tih chuan ka lâi leh ringawt tawh! Ka duh lo, heihi alawm ka duh lohva hêl ka tum ngat ngat ţhin chu! A lakah hian ka nêmin ka tuiral hmâ thei ţhin lutuk a, ka tum loh dan deuhin ka awm phah ziah! Malsawmzel, intipachang ve ta che mawle!
"Laih kher a ngâi lo ania, i bedsheet phah lai kha chhunzawm rawh. I ngaihawm ve reuh tak tak alawm. Bialpa te i lo nei vel bawk si a, chian tura rawn kal lui hrâm ka ni pakhat" a tih leh chuan thâwk la halhin, "i thîk anih kha" ka ti ve nghat a. Fiamthu titak deuhin a ni ka sawi ni.
"Dik tak chuan thîk e"
A reh nghal vung vung a. Thereng leh zâna hrâm chi rannung thâwm bâk hriat tur a awm ta lo!
A thîk tak tak! Thîk tho siin ngaihzawng atan min duh tak tak chuang si lo. Heihi a lawm ka hriatthiam loh fo ţhin chu! Engati nge u Arona hi hriatthiam a harsat em em mai le?
"Vawikhat chiah, vawikhat chiah min han hnâwl leh teh u Aron! Vawikhat chiah min hnâwl leh la ka beidawnsan ang che. Hetiang ringawta nun hi ka kham tawh, laklawh takin kan nung reng a, a ninawm tawh ka ti. I laka ka rilru puthmang zawng zawng i hre vek a, ka duhzia che leh thlah ka harsatzia che i hria, eng nge chu aia thui beisei i neih? Min duh lo anih chuan chiang takin min duh loh thu sawi la, min duh anih chuan inzawmna thûk zawk min siampui rawh. Hmeichhia ka ni a, hmabâk tih tur leh hlen tur tam tak nei ka la ni. Hetia laklawh taka min siam reng chuan ka tan a hrilhhaithlâk a, a tlâwmthlâk bawk. Zaninah hian engkim sawifel ang" ka huaisenna zawng zawng sâwmkhâwmin ka ti ta thlâwt a, a mitah chiang takin ka melh bawk.
A chal tichuar tap tap chungin ani chu inpetruh fuat a, amah ka hriat tirh aţanga a rilru buai nuaih hmêl ka vawikhat hmuhna a ni hial ang. Lu thing nawk nawk chunga thâwk a lâk halh lai te chuan chîk takin ka lo en ngat ngat a. Ka beiseina leh ka beisei ngam lohna thinlung chu a inzât reng a tih theih hial mai.
"Enteh" tih paha ka dâra a rawn hmer chuan lu ka lo bu nghat nghat a. Hnâi lutukah kan inmelh rân bawk.
Engmah sawi lova a ngawih leh vang vang hnu chuan mitchhing sawkin, "Op-a hi hmangaih rawh. Kei chu min theihnghilh la, min hmangaihna thinlungin i rilru a tihbuai châng apiangin i tana mi ţhalo tak ka nihzia te, i rilru ka tihnat ngunzia, hrehawm taka rei tak ka siam ngunzia che hi hrechhuak zel rawh. I hria em? I tan Op-a tluktu an awm phal ngâi suh. Hmangaih la, vuan la, hmalam hun atana suangtuahna i neih châng apiangin i rualin ke pên tir ve zel ang che." Harsa tih hmêl zeta thâwk la hrâwk chung chuan a ti thâm ta ţuak a. A mita mittui tling pam chu ka hmuh hmaih miah lo! Chu chuan keimaha beiseina awm hi a timit thei lo ni berin ka hria.
Op-a kianga ka awm lai khan rilru paukhauh takin amah hmangaih ka tum ang tiin rilru ka siam a, u Arona a rawn lan meuh chuan ani chu ka hrechang leh ta lo! Heti hian tunge ka duh zawk a, tuin nge ka rilru luah tam zawk tih chu a chiang ta viau a ni. A zahthlak a, a chapothlâk hlê tih ka hria. Mahse ka rilru hi ka thunun theih bâk a ni miau si.
"Anih leh engvangin nge khâ thu kha sawi harsa i tih êm êm? I rilru te kha engvangin nge a buai ve ringawt? Op-a i khawngaih vang mai maiin khatiang thu kha i sawi zawk emni? Keipawh ka khawngaih ve tho. Eng nge ani nen kan danglamna? Ani'n a duh a nghahchhuah chuan keiin ka duh ka chân hlen dawn a. Ani a nat nge kei ka nat i duh zawk? I mitmengah khân min chân hlen hlauhna ka hmu ve tho. I rilru dik tak sawi rawh, min duh nge duh lo?" A tâwp lam phei chu ka âu chhuak hial tawh a. Ka mittui rawn luang thla zâwih pawh ka hru buai peih lo.
"Ka duh che tih ka sawi ngun tawh. Hriatthiam tumin kan dinhmun hi ngaihtuah thleng ve ţhin ni la chuan ka duhzia che i hria ang. Mahse a theih loh! Ka sawi fo ţhin, duh leh mamawh a neih kawp theih loh!" Kei aia ring mah chuan a ti ve ta bawl mai a. Min thing deuh nawk bawk.
"Duh leh mamawh tih vel vang mai maia min hnâwl i nih chiah chu. Sawi tawh lo teh kha kha. Kha thil kha ka tan a tlâwmthlâkzia i hria em? Hmangaihna i dah zero zia pawh i hre lo zawk emni? I duh ka nih laiin engtin nge i mamawh ka nih chuan loh theih zawk? Kei hi mi lâktlak loh leh engmah lo mai angah min lo ngâi reng zawk tihna emni? Hmeichhe pakhat ve mai, buaina leh harsatna bâk thlen ngai lotu angah min lo ngâi zawk anih hi. A tawk e, i duhdan angin kan awm tak tak tawh ang. Kal la, keipawhin ka ûmzui tawh bik lovang che. Ka hmangaih hmasa ber nia ka hriat che avangin ka thlah thei lo che a, theihnghilh che ka harsat ţhin. Mahse kei hi hmeichhia ka ni a, inthlâk danglam thei mihring ka ni. Ka kal ve tak tak hunah chuan lo lêt turin min âu lui tawh bik lo la, ngaihzawng emaw pasal hial ka neih ve hunah pawh tuna i awm ang hian awm tawh bik suh. Beiseiawm taka min melh ţhinna pawh bansan la, zirtirtu leh a zirlai naupang ang chauhin kan awm tawh dawn nia" ţap ţuau chunga tiin ka inhersan a, ka thin chhûng tâwt lutuk avang chuan thâwk pawh ka harsat takzet a ni.
"Min hua em?" Kawngkhara ka chhuak tur chiah chu a rawn ti leh hrâm a. Ding datin, "haw lo e, a nihdan tur dik taka thil thlentirtu angah ka lo inngai ang" tiin ka chhuak zui a.
"Aih.. Min haw rawh!" Hul hek hawka a rawn tih leh tâkah chuan ding leh rihin, muangchângin ka inher lêt leh a. A kut hûm ruh ngar ngar chunga a rawn hawichhuah ve chuan chiang zetin kan inmelh tawn rân a. A mittuiin a mithmul a tihhuh te pawh ka va hmu thei hial a ni!
"Min hriatchhuah châng apiangin min hua ang che. I thinlung tikehsawmtu ka nihna hi theihnghilh ngâi lo la, engatanmaha ngai lo tu che ka nihna pawh vawng reng rawh. Mamawh ngâi lo tu che ka ni tih hre reng la, min hriatchhuah châng apiangin thinrim ţhin ang che. I ngaihzâwng tan rinawm la, vuan tlat la, chelh tlat rawh. A tâwp thlengin nung dûn ula, hmalam hun hlimawm tak nei ang che u!"
(Comment hnutchhiah ve la tiraw!!)
End of chapter - 27