By Ziki nu
Chapter-35
Ka rinna chaklo tak chunga Pathian ka belh ve hram hramna te kha a lo thlawn mai lo a, mihring mai ka ni a, ka lo ruahman lawk ve te khan min tih chhiat mai loh nan ka ruahmanna te kha a lo ti chhe fo zawk a, dawhthei taka ka nghah theih nan ka dil apiang min chhang nghal veklo a, amah ka belh hram hram theih nan thinlung na taka ka awm kha a phal zawk a lo ni.
Harsatna tam tak ka tawhte atangin tap chunga nun dan ka zir chhuak a, thinlung rum vawng vawng chunga paltlang thei tur in min lo ti chak zawk tih ka hriat tak avangin ka hlim a ni.
Ka putea lakah hnehna kan chang a, kum tlinglo pawngsuala vau zuitu ka putea chu kum 8 chhung lung in tang tur leh cheng singnga cahwi tura hrem a ni.
Kawng engkimah U Mami leh U Mamuana ten min buaipui vek a,kan cham chhung zawngin U Reuben'an min thleng zo em em bawk a, keini lam kan buai ve ngai hauh lovin min buaipui vek a, lawmthu sawi ngaihna pawh ka hrelo.
"Zanin chu a lawm nan kan in ah arsa kan kang dawn em ni? Ka nu leh pate pawhin hmuh che an duh hrim hrim a" motora a luh hma chiah chuan U Mami chu a rawn inher leh a, "Zanin ah maw?" ka lo ti sap chu nui hawk hian ka darah a rawn beng thak thak a,
"Engkim a that vek tawh hi, hlauthawng duh tawh suh u, ka nu pawh ka be tawh a, zanriah ei khamah Reubena hovin in lo kal dawn nia" tiin U Reubena zawk chu a melh zawk a, a buk tak nghut ah chuan car kawngkhar chu pawt hawngin a lut zui a, kan in vai liam hnuah inchhungah kan in zui lut leh nghal a.
"Vawiin zet chu boruak a va sang ve" tia nui hawkin U Reubena chu sofa ah a thu thla dawt a, Bawihtei'n filter awmna lah a kawh a kawh avangin tui in tir pah chuan "Ka beisei aiin a fel hma, ka lawm tak tak a ni" ka ti ve sap a, "Dik zawk na na na chuan thiam i chang vat mai alawm, I pi te hnenah chanchin i han sawi tawh em?" a tih zawm zat a.
"Umm court atanga kan chhuah rual khan ka pi ka call nghal a, Engtheii nen an awmdun lai a lo ni bawk a anni pawh an ri nghal hlut mai" tiin ka nui a, "Engtheii a?" a lo tih ha rual chuan ka hmui chip hmakin lu ka thing zui nawk nawk, a star ve ropui sia, ka sawi dan a hriat chuan min haw leh viau ang.
"Muankimi a nia, ka thiannu" ka tih chuan a bu nghut ringawt a, "In awm lovang tih ka hlau ngawt mai, nilo se chuan kan buaina te khan min kiansan awm silo a" ka ti leh sap a, "Thiante chu an in pui tawn thin alawm, khatiang zawng khan rilru dah tawh lo la, tunah chuan hnehna chang i nih tawh hi, I thla ti muang hle tawh la a ni mai" a tih hnuah "Tunah chuan inneih lam pawh kan sawi thei tawh ang chu" nui ruh ruh hian a ti leh a, ka lai nghal ringawt chu a lo hrethiam aniang Bawihtei rawn pawm kang lawp pah chuan "Zan lamah i mother-in-law te hmuh i ngaih kha, va inbual hmasa zawk rawh" a ti leh a, thlanglam bathlarah an in pawm chhuak nghal daih bawk.
Thaw chhuak hawkin ka thutna nghenchhan chu ka ngheng dawp a, tunah chuan lungkham tur dang ka nei tawhlo, ka fanu leh ka chhungkua ngaihtiahin hlim taka awm ve ka tum tawh a ni.
Ka phone rawn ri ral ral chu ka kekawr ipte atanga phawrh pahin tunge ka en nghal a, Nu Ruati hming ka hmuh rual chuan ka nui tawp leh riai riai.
Vawiin khan court ah chuan kan inhmu ngei a, Vli hmel erawh ka hmuh lo thung. Pute Hmingmawia jail lama an hruai phei nghal tak avangin kan in be hman ta lo kha a ni a, engtin emaw ka be hreh riau.
A ring tawp dawn tep tihah ka chhang ta hram a, ka rinloh deuhin zangkhai vah hian "Merte, I buai em?" a rawn ti lauh a, "Buai lem love" ka tih chuan "A hranpaa in biakna hun kan nei ta silo a, thil thleng tur ang ang chu a thlen fel tawh hi, engtikahnge in lo len ang?" a rawn ti leh a, ka beisei dan leh min lo biak dan chu a in persan khawp mai.
"Ka hrelo le,,, Vli a dam tha em?" ka ti ta daih a, a ngawih vang vang hnuah "Tunlai chu a thiannu te in ah a tap deuh chawt a, a pa chanchinte a hriat hun ah chuan a rawn haw ve duh tawh mahna" a ti zawi sap a, hrehawm ka tihna a zual sauh mai.
"Umm lo ko haw la, naktukah rawn lan hram kan lo tum ang" ka tih hnuah rei pawh in be lovin kan inbiakna chu kan ti tawp a, he thilah hian Vli'n a tuar ve hle tih ka hria, pawi ka ti a, ka thiam dan ang anga ka tih lungawi ngei a ngai ang.
Bawihtei tlei laia ka inbual sawk sawk hnuah U Reubena chu a inbual ve leh a, eirawng ka bawl laiin U Mamuana hnen atang call ka dawng a, ka kut hru hul sawk sawka ka lak rual chuan "I buai em ni?" a rawn ti nghal sup a, "Buai tih ah hei eirawng ka bawl a" ka tih chuan "Reubena nen khan nupa zawk in ang" a rawn ti pek a, "Engmaw?" ka ti vak lai chuan rawn nui chhuak hawkin "Ka fiamthu, ka thianpa kha ka call tlang thei lova, a buai em?" a ti leh daih a, "A inbual" ka tih chuan "Umm" tih ngawtin min chhang leh tawh.
"Hrim hrimin, min biak duh vang em em pawh a nilo a ni maw" tiin ka tum zui bur a, min hmu theilo tih ka hriatchhuah rual chuan ka nui leh ang pat pat lawi a.
"Aa i pi te I be tawh em?" a rawn tih leh tak ah chuan "Be tawh e, an lawm ve khawp mai, nichin khan Nu Ruati'm min lo call a, naktuk lama an ina leng turin min duh deuh a" ka tih chuan "Ka kalpui dawn che u nia" a lo ti leh mai a, U Mamuana atang hi chuan thil hi a awlsam hmel vek bik hian ka hre thin.
"I hna lam engnge?" Ka ti leh daih a, "A hma lama kan haw chu a tha ang" a tih chuan hrethiam in "Nia I zin San leh thut thut thin sia, a inthlahrunawm tawh" ka lo ti sap a, a hma lama haw tum chu a tha hrim hrim, a vawk note pawh kha a ngaihtuahawm tawh.
"Reubena chu a hman velah min rawn be rawh se" a tih hnuah kan inbiakna chu kan ti tawp a, Bawihtei chaw tur ka siam laiin U Reubena chu choka lamah a rawn lut a, U Mamuana'n a biak duh thu ka sawi chuan "A ho leh dawn si" ti hlukin a phone chu a hmet zui mual mual a, Bawihtei lawm paha "Hello" a tih hnuah a ngawi zui vang vang a, "Lo en lawk rawh" tia min mitmeiin Bawihtei chu a kalsan a, thupawimawh eng emaw an sawi duh dawn anih ka ring.
Mimal thil anih tak in tiin engmah ka zawt duh lemlo a, zanriah ei khamah U Mamuana te in lama leng phei turin kan insiam lehnghal a, ka zam leh tawh lutuk chu tihngaihna pawh ka hrelo.
"U Reuben ka zamin ka hria" ka ti chhuak hawlh a, nui sukin ka darah a rawn beng thuk thuk a, "Zam mah ta che, engtim a fel chho zel a, Nu Maawmi pawhin a rilru a thlak tawhin ka ring" a ti ve ngial naa, court ah hnehna chang mah ila nuthlawi ka nihna a bo lova, sum leh pai ka ngah ta sawt bawk hek lo. Eng dinhmun tha leh nihna mah chhuan tur ka neilo a, thingtlang mi, a hmuhsit em em nuthlawi kha ka la ni reng.
Mahse kan hmaa harsatna hmachhawn tur awm chu tlanchhiatsan lova a nihna ang anga hmachhawn ngam turin thil tam tak ka lo paltlang ve tawh a, zanin ah pawh ka kaltlang a ngai tih ka hria.
Bawihtei ka thlak fel hnuah ka hmai te chu a mawi tawkin ka hnawih ve thuak thuak a, ka inchei tûk ngai lemloh avangin simple deuhin ka awm mai thin a, inchei vak ka inhmehlo hrim hrim bawk.
In atanga kan chhuak chu ka thaw leh hawk zel a, U Reubena chuan a hrethiam a niang "Zam lutuk duh suh, I rin aiin boruak a zangkhai ang" a ti a, an in kawt kan thlen chuan kan thawm an hria ni tur a ni, U Mami leh U Mamuana an rawn chhuak vat a, U Mami'n Bawihtei lo la nghal vatin "Ka rin aiin in lo thleng hma, lo lut rawh u Mary, ka nu leh pate pawh an awm" a ti nghal zung zung a, U Mamuana chuan ngawi rengin min en a, ka zam lutuk a hlau aniang ngainatawm deuh hian min nuih leh suk suk ringawt a, inchhung kan han lut chiah phei chu ka thawk lak a sak leh talh tawh.
Pa Johana chuan a dan pangaiin min lo en leh run ringawt a, min haw hmel a pu lo va, chutiang bawkin min lo lawm vak hmel pawh a pu chuanglo. Nu Maawmi hmel erawh hmuh tur a awm lawklo a, Pa Johana ep chiahah chuan U Mamuana'n min thutpui a, Kan thutna sir ah U Reubena leh U Mami an thu ve thung a, Bawihtei chu an chhaih nui hawk hawk reng mai,
Pa Johana chu rawh khuh kharhin "I chhungte an dam tha maw Mary?" a rawn ti ve ta hram a.
"Aw dam e, in lo dam zawk em?" ka tih chuan bu nghutin "I putea nen a in chungchangte kan lo hrechiang har deuh a a zialo khawp mai" a ti chhuak ta khawl a
"Nia,,, a hriatsual ve theih khawp mai" ka tih sap laiin inchung chhohna kailawn atang Nu Maawmi a rawn pen thla khap khap a, pheikhawk keartui sang deuh a bun bawk nen a pen ri chu a ring tha khep khep khawi mai.
"In lo thleng der a ni maw Reuben?" tih hluai pahin a pasal bulah chuan a rawn thu thla ve a, min rawn melh zawk hnuah Bawihtei chu a en leh a,
"Sangbawihi em ni kha?" a tih chuan U Mami'n phur deuhin "Anih hi, kan Sangbawihi hi chu a fel ania, a tlei bawk si" a lo ti vat a.
Kan boruak chu ka sawi thiam chiahlo, ka beisei angin a rit lo va, nuam tak erawh a ni chuanglo thung.
"Reubena chu engtiknge zinchhuah leh i tum?" a ti leh daih a, "Tun thla chu ka awl ve rih ang, hlawhfa ka la a, chhungte ka tlawh kual mai mai dawn" a lo ti awlsma et a, kan khuaa a lo kal pawh kha an khaw lama a nu te a tlawh hnuah Mamuana rawn hmu kawi tur hrim hrimin a lo kal tih U Mamuana'n min hrilh tawh a, a in zir chhuak tawh a, hna tha tak a nei tawh bawk a, a duh dan danin a nung thei tawh bik chu a awhawm ka ti tak tak a ni.
"Chutiang anih chuan i awm ve lai ngeia i thianpa te an inneih hman a ngai anih chu"
Pa Johana thil sawi vang chuan meng zau vakin U Mamuana zawk chu ka melh a, hahdam hmel leh thlamuang hmel deuha min lo en ve in a nui pah suk a, tang tunga ka thu pawh ka thaw chhuak ve suai suai mai.
"Nia, a rang lama inneih chu duhthusam alawm, Reubena awm lai a ni bawk anga" phur hmel deuhin U Mami chuan a lo ti ve leh a, Nu Maawmi rawn khuh tak kharah chuan midang chu kan ngawi leh thap tawh.
"A falin kan inbe lawk dawn em ni Mary" a ti a, a thutna atang chuan a tho pah hluai bawk a, Pa Johana'n "A fal khera in biak a ngai em mawni le" a lo tih pawh chuan "Hmeichhe chungchang kan sawi dawn" a ti a, inchung chhohna kailawnah chuan a chho nghal hmawk hmawk a, "Kal rawh, ka nu khan a rilru a thlak dawn tih ka chiang" ka beng bula U Mamuana'n a rawn tih sup hnuah zawimuangin ka ding ve a, "Sangbawihi chu ka lo awm mai ang, han kal rawh" U Mami'n a lo tih ve bawk avangin huphurh ru angreng deuh chung chuan ka chho ve ta nge nge a.
Thlanglam balcony ah chuan railing bawhin a lo ding reng tawh a, a bula ka din ve rual chuan "Nu leh pa I nei tawhlo tih ka lo hria a" a ti nghal thawr a, "Aw,, accident vangin an boral tawh a" ka lo ti sap.
"A zia lo hle mai, nang leh I fanu chanchin ka la hre thui ve vaklo a, a hmasa in I laka ka chetdan leh tawngkam uluk lohna zawng zawngah khan I ngaihdam ka ngai a ni" a ti ta mai a, en pawh min en lovin hma lama khawpui êng ut chu a thlir reng a, a inchhir ve tak tak a ang hle mai.
Nui sakin "A pawilo, ka hre thiam alawm" ka ti a, min rawn melh zawk hnuah hmalam bawk chu en lehin "Ka fapa neih chhun a ni a, a tana tha ber ka duhsak reng thin,Muanpuii nen khan hun rei tak an in zui ve hman a, kan chhungkua pawh kan in pawh em em tawh tih I hriat ka ring" a ti sap sap a, a thaw chhuak leh hawk thin bawk.
"Mahse tunah chuan Pathian in kan chan tur tawk a ruat zel a, nang nen in lo intawng a, a hmangaih viau che anih chuan dan tumna ka nei lo, mahse I pute Hmingmawia leh I fanu hi" a ti a, a tawp chawt danah hriat a nei tih hrilh chawp ka ngai hauhlo.
Court hial kan thleng a, mahse thubuai kan neih chhung khan U Mamuana nu hi chu eng kawngah mah a inrawlh ve duhlo a, Pa Johana erawhin a theihna apiangah min support thung.
"I sawi tum ka hria alawm, nuthawi ka nih chhan hi ka lerh kawh vang a nilo asin Nu Maawm" ka ti sap a, za lo deuhin ka nui pah hak bawk.
"Ka hre thiam e Mary, ka hrethiam e, engkimah khan I ngaihdam ka ngai a ni, hahdam deuhin awm tawh rawh" a tih lai chuan tah chhuak hmel zet hian a in sût zui hraih a, ngam leh ngam lova a dara ka khawi chiah chu min rawn kuah ta mai a, ka mak ti leh lawm bawk si chu awmdan tur pawh ka hrelo hial zawk a ni.
In hnuaia kan inzui thlak leh chuan Pa Johana chiah a lo awm tawh a, "Choka lamah ei tur an buaipui a ni ang, va phei ve rawh" a tih chuan ka phei ve nghal a, Bawihtei leh U Mamuana an lo in pawm a, U Mami leh U Reubena ten arsa an lo buaipui mek a, min hmuh rual chuan "Ka nu nen chuan engnge in sawi?" tih zawhna mitmeng hian min lo en vek hlawm ni berin ka hria.
"In awih pha lo zawk mai thei" ka ti nghal thawr a, ngaihthat loh hmel deuha U Mamuana'n "Ka nu'n engnge a sawi?" a tih chuan nui hakin "Ngaihtha deuhin kan awm thei tawh ang" ka ti a, U Mami a nui khek tuar a, mipa pahnihte pawh an hlim ve hmel khawp mai.
Zan hlimawm tak kan hmang ho a, eitur kan siam laiin Bawihtei chu Nu Maawmi'n a rawn la ta hlauh a, ka fanu lah chuan engkim a hrethiam ve vek emaw tih mai tur in a lo ngaina leh nghal em em mai bawk si, tuna ka hlimna hi chu eng thil nen mah ka thleng phal kherlo ang.
End of chapter-35
Ads click leh comment kha aw
