Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-10
Ziaktu: Cck Lalchhuanawmi


Hei erawh ka chiang, engtikah mah Sammy hian min ṭhen dawn lo.


Kan chhuahsan tawp te a nih loh chuan, kan inṭhen ngai lo ang.


Sammy cousin Police nupa chu kan bulah an awm ve a, ka nu leh pa an la haw lo bawk.


An inkawmngeih nupain, an inngaihsak tawn ve ve a, ka awt thei a nia aw...


Accident kan tawh lai ti ila, accident lem a ni zawk mah. Chumi lai bawrin an lo thleng a.


Kan accident tawh dan u Venpuii pasalin zawh min tum apiangin Sammy-an thu dang a lo rawlh ziah.


U Venpuii pasal, u Ngaian chhûi ṭhat a tumin Sammy-an a phal tlat lo.


Ka nu leh pa pawhin, "Ni e, Police fapa kan nei reng alawm, chhûi ṭha ngei ngei rawh se", an tih pawhin, Sammy-an, "A fel vek tawh, hun kal tawh a ni a, thar thawh a ṭul tawh lo", a ti tlat.


Sammy nen kan inkar ṭhat lohna thup hram hramin, mi hmuha a bula ka awm pawhin amah ka hlauhna ka dah bo hram ṭhin.


U Venpuii te nupa chu an fel em em a, an bula awm a nuam. U Ngaia erawh, ngawi rengin a nui ve suk suk chauh.


Mahse, u Venpuii a ngaihsak dan leh a duat dan chu, awh tham a ni.


Ka nu leh pa te thlah pahin Hnahthialah kan kal ve dawn a, MLA tlin lawmna ruai khawtlangin min buatsaihsak an tum.


Sammy-an min hrilh zanah, "Naupang School chawlh hma chu, zin chhuahpui ka duh tawh lo, i duh chuan kal rawh, kan nufa chuan zui che kan tum lo", ka ti hmak.


Huaisen taka awm ka tum tawh a, ka awm reng bawk ang.


Kei leh ka fa te ṭhatna tur chauh atana thawh ka tum tawh a, theihtawp ka chhuah ang.


U Venpuii te nupa chu châm rei lo hle chungin, an haw a hun ta mai a.


Dik takin, u Venpuii biak ka kham lo.


An haw dawn zanin, kan pahnih chauhin titi theihna hun kan nei hlauh mai a.


U Venpuiin, "Chhuanpui, Serchhip-a in accident tawh kha a der a ni tih ka hria a nia", a ti mai chu, marble tiat tiatin ka meng bial kâwk kâwk.


"U Venpui?",


"I u Ngaia hi Police zingah pawh fing leh remhre tak a ni tih i hriat kha, tin; Police hna hi a lo thawk rei ve ta a, Vai rama tal tam a ni bawk a, kan chezia leh mitmeng aṭang ringawt pawhin a hre thei tawh. Khami zana thil thleng dik tak min han hrilh teh", Police nupui a ni bawk a.


Min dâwp hi a ang ber.


"Sammy-a sawi ang khan a ni mai, a hmain anmahni khan Sialsukah min vo tawh a, FIR kan thehlut nen, phuba an la a nih ka ring, tifuh lo chai chai tak erawh an ni", ka nui lui hlek bawk.


Chutia Sammy ṭan zâwnga ka ṭawng chhuak ta mai chu, mak ka inti lutuk.


Thil thlen dan engkim hrilh vek tur ka ni a, Sammy-an min nghaisak dan zawng zawng sawi chhuak vek tur ka nih vei nen.


Ka inngei hluah hluah.


U Venpuii chu a nui a, "Kan pasal te hi eng anga sual tak pawh nise, an sêlna kan hriat erawh chuan kan ṭanin an thlavang kan hauh hlur hle chu a nih hi tiraw?", a va han sawi dik tak em aw...


Sammy suahsual tukkhum pâwn, u Ngaia hmangin ka tuk lawl thei.


A thlavang hauhin ka ṭan bur chu a nih si hi!


U Venpuii bawk chuan, "Kan lo thlen hma hauhin, Sialsuka buaina in tawh aṭang khan i u Ngaia chuan dik lo a awm niin a hre tawh. Nangpawhin i hria ang, khatiang kha chu Vai ramah thleng se a inhmeh tâwk chiah", a ti a.


Ka khi sâwng ringawt.


"Kan lo thleng a, i pasal i hlauhna leh a bula awm i pehhel char char dan te kha, kei aiin u Ngaian a man chak zâwk. Sammy-an eng mah a sawi ṭha duh si lo. Mahse, lungngai miah suh, i u Ngaian a zilh hrep a, "Tun ṭum chu ka mit ka hup ang a, a lehpek a awm a nih ngat chuan Chhuanpuii chet hmain ka che tawh ang", a tih kha. Ngaihngam deuhin awm la. Nangpawh, huai takin awm rawh, thil dik loah chuan pasal te ngei pawh nise, hremna pek hi a pawi reng reng lo", a thiam ang tâwkin u Venpuii chuan min fuih sauh sauh a.


Ka lawm asin aw...


Hetiang hi ka duh fo ṭhin, u Venpuii te lo zin chu ka lawm ngei mai.


U Venpuii nu leh pa te inah an nupain min kalsan ta a, an awm lo chu a ruak huai mai.


An ngaihawm lutuk ringawt.


Ngawi renga nui suk suk u Ngaia a ngaihawm zualin ka hria.


An haw tak tak dawnin min lo kan zawk a, u Venpuii chu ka kuah vawng vawng.


Number te kan inpe.


Airport thleng ka thlah ve thei lo, Sammy pawh a kal thei bik lo. U Venpuii nu leh pa bakah, a ṭhiannu Nghetpuii, leh ka nu leh pain an thlah.


Rajasthan-a an kal ṭul tak têin a ṭul tawh a, u Ngaia te khua Shillong-ah takngial pawhin an kal thei tawh lo.


An thlen ve leh u Venpuiin min lo bia a, tluang taka an thlen thu hriat a nuam lutuk.


Ka nu leh pa te haw pawh a lo hun ta a, "School chawlh fel hma chu chhuahpui ka duh tawh lo, an zirnaa an tlakhniam ka hlau", ka ti a.


Sammy ngaih dan a nih leh nih loh ka hre lo, eng mah a sawi si lo a.


Ka nu leh pa pawhin pawi an ti lo, hun eng emaw ti lai khan Siamtea leh Freddy-a ten School an chawl zing hlek.


Politics avanga chawl an ni a, Media hrang hrangah naupang pawisawilo pawhin sawisel an hlawh, School-ah lah naupang ṭhenkhatin chhaih an ching kher nen.


School chawlh tak takah lo chuan chhuahpui ka tum tawh lo.


Ka nu leh pa, leh Sammy-te chu an kal ta a, kan nufa zain Inah kan awm.


Noodles leh Kimchi ka lei ṭeuh.


Freddy-a lawm lutuk chu, "Noodles leh Kimchi ka ei châk tawh lutuk", ṭah nuih chungin a ti a.


Dul na urh khawpin kan nui.


Sammy kal bo zan chu, kan nufain kan hlim a, kan puarin kan fân bawk.


Ka nu zawk ka call a, "Hnahthial thlen hmain Serchhip bial kan fang lawk a, kan thleng har ngawt ang", a lo ti.


Serchhip bial an fang chhuak a, Thenzawla ka nu leh pain, "Ngati nge i lo zui ve loh? Nupuite awm dan tur a ni lo, khawhar takin i pasal i awm tir a, ni dangah chuan ching tawh ngai suh ang che", min lo ti zêk.


Naupang School chawlhtir ka duh loh thu sawi mah ila, "Chutiang chhuanlamah hmang hlek suh, ni dangah chuan ching tawh suh ang che", min lo ti tho tho.


Ka duh lo a ni ve mai a ni.


Tin, Sammy-a lak aṭanga chawlh hi ka mamawh.


Hnahthialah pawh Ruai an lo buatsaih chuang lo. Ka nuin, "In nufain in awm dawn si lo a, Samuel-an a hnial ta a nih kha", a lo ti a.


Ka nu chu, a lawm vak lo tih a hriat.


Lawm lo pawh nise, a awm tho. Ngeng ṭalh tawh dawn, Sammy-a phei chuan ka sualna hlir a hmu ang.


Chhantu ka nei ṭha tawh em mai a, u Ngaia a awm alawm le.


Sammy-a ka be ṭhai lo, ka nu char char ka bia. Ka nu hnen aṭangin engkim ka hria.


A fa te nen an inbe char char thung a, "I nu ka lo bia", a lo tih hian, "A inthiar ti rawh u", ka tih loh leh, "Dawrah a kal ti rawh u", ka ti ṭhin a.


Ka be duh lo hi, naupang hnenah chhuan lam ka sawitir ṭhin.


Nuihzatthlak hian.


Sammy pawhin a tilui bik lo. Min lo call a, Siamtea leh Freddy-a an awm loh chuan, Lal Fanu ka biak tir hrep zel.


Ani lah hian, a pa hi a ngai kuang kuang thei em. Min biak a duhin chhuanlam ka siamtir zel si a, a lo thaw ring thei a nia.


"Thlen la lain a lo.phei nghal", ka nuin a lo ti a, peih hi ka ti khawp a.


Rei deuh châm se tih nak laiin, "Chhuanpui, in inhau deuh em ni? Min hrilh tawp rawh, i lamah ka ṭang dawn alawm, ka hau ang", a lo ti chhuak hlawl a.


Ka nu ka lainat asin aw...


Ṭha takin, "Ka nu, inhau lo e. Kum nga tehmeuh a la awm alawm", ka ti a.


Phone kaltlanga inbia ni mah ila, ka nu ngaih a ngam dawn lo tih ka hria.


"Nu, naupang School chawlhtir ka duh loh avangin a nia, an chawlh hunah kan lo haw dawn tho a", ka ti leh a.


Ka nu ngaih a ngam ta deuhin a hriat, "Ni e tiraw, in inhau emaw ka ti a. In inhau a nih chuan min lo hrilh vat dawn nia aw", a lo ti chu, "Aw le, ka lo hrilh dawn che nia", ka ti a.


Hrilh ta ila, a hau tak tak ang em le?


A hau ngeiin a rinawm.


Sammy hian, engvanga MLA tlin nana thil ṭha lo lutuk tak a tih mai le?


MLA nih te chu tu pawhin an duh ang, kan tlin leh tlin loh tur erawh chu Mipuite kutah a awm.


Tling theiin a inhre ngang lo ang a, hetiang lemchanna a kalpui ta mai chu a ni a.


Pawisa nena vote zawn aiin a tenawm.


Keimah vanga tling chu a ni ngei mai, ṭha taka hna a thawh loh chuan a nihna dik tak ka hailang a ni mai.


Eiruk maw, a thawi pawha hriat a nih chuan, a nasa lo khawp ang.


A lo thlen chin zawt tur pawhin Siamtea ka biak tir.


Siamtean an inbiak zawh hnuin, "Anu, Apain a hau che mi?",


"Hau lo e, zanah kan inbe nasa thei lutuk alawm",


"Dâwt i sawi", a ti mauh mai.


Fapa fing neih hi a manhla dawn nge dawn lo?


Manhla tur chu a ni.


Siamtea lehkhathawn kha ka dah ṭha tlat, a pa a hmangaih a, kalsan a duh lo tih ka hria. Mahse, a chhe ber thleng ta ila, a pa aia min hmangaihna ai mahin min lainatna a tam zawk avanga khatiang lehkhathawn ziak a ni.


"Siamte, a lo haw hunah a fel vek mai ang", ti mah ila, dik takin; a ring hlawllo.


"Aw le, dar sawmah a lo thleng dawn a nih chu", a ti a.


Pindanah min luhsan daih.


Freddy leh Lal Fanu erawh an infiam. Nu Papuii a awm tho tiin, thlêm turin pindanah ka lut thuai.


A lehkha zirna dawhkan a lo bawh a, Freddy-a ṭhutthleng hnûk pheiin a bulah ka ṭhu.


"Siamte?", a lu ka chul a, lo hawi chhuakin, "Anu, accident kha ka hria a nia, a Nupuii nena in sawi kha ka hria a", u Venpuii a sawina.


"Siamte, i pi leh pu bulah sawi suh aw",


"Apa nen chuan in inṭhen dawn em? Inthlanah a tling sia, Freddy leh Lal Fanu te nen i bulah min hruai dawn em?", a hlauthawng nasa mai.


Kan inṭhen dawn lo, chhuahsan loh chuan inṭhenna a thleng ngai lo ang. Tin, chhuahsan ka tum mai mai lo bawk.


Siamtea chu kuahin, "I pa nen kan inṭhen dawn lo, nupui dang lah a nei dawn hek lo. A chhan chu maw, Apa hian Anu hi a hmangaih alawm. Accident kha chu, theihnghilh daih rawh. Nang chuan maw, tuar phah dawn pawh ni la, dik tak leh rinawm takin awm tlat zel ang che aw. Min tiam rawh",


"Ka tiam che", kan kutzungtê kan kuaisapir.


"Anu, Apa hi i hmangaih ve em?", Siamtea zawhna chu âtthlak ti takin ka han nuihzat tak naa, "Lehkha zir chauh ngaihtuah la aw", tia a pindan aṭanga ka chhuah pawhin, min tikhûr thei.


Nu leh pa hmangaihna mah hriatthiam a har nak laiin, ka pasal ka hmangaih leh hmangaih loh chhâng turin zawhna ka dawng.


Tu dang ni loin, mahni fapa ngei hnen aṭangin!


Sammy-a a rawn thlen har dawn avangin chaw kan eisan.


Lehkha an zir zawhah kan pindan zawkah mutna kan siam ta thung.


Sual chu sual vêka thungrul lo turin leh ṭhatna hmang zawka hneh turin Bible meuhin min hrilh a, zawm a har ṭalh ṭalh khawp mai.


Mahni hmelma te tana Ṭawngṭai hlei hlei. A va han har tak. Ringtu ṭha leh ṭha lo tehna ber a ni lawi si.


Rilru ṭha te hi a put theih hlawl loh.


Siamtea leh Freddy-a chu an mu tawh, Lal Fanu thung chu Thawnthu ka hrilh keuh keuh.


Dar sawm rik nan minute hnih a awm tihah a muhil ve ta.


Phone banin ka tho a, Sammy ka call, "Aw, Lal.Fanu", a lo ti chu nuih a za duh asin.


Ṭawng hma hmaa chutia a lo tih, Lal Fanu turah a ngai a ni chêk ang, "Apa, i lo thleng ṭep tawh em?", ka han ti mauh a, "Maw?",


"I lo thleng ṭep tawh em?", ti lehin, "Ka lo thleng", a lo ti a. In chu êngin a lo chhun paw phût nghal.


"Ka lo chhuak", phone ka off a. Kawngka hawngin a biang nghengin ka ding.


Sual taka thung rul lo hian, ṭha tak takin be ta ila, amah hi a inthiam loin, hrehawm a tih zawk ngei a rinawm.


Ni e, sual chu ṭhatnain thungrul zawk teh ang hmiang.


Driver seat aṭanga a lo chhuk chu, va panin, "Sam, khawiah nge Duhsaka?", a bag khai ka chuh a.


Mak ti zetin min en, "Khawiah nge Duhsaka?", ka ti leh a. Garage a khar ṭhat hnuah, "An inah a awm, an in aṭangin ka lo haw", a ti ta a.


In chhunga lutin kawngka ka khar ṭha a, "Heta aṭang pawhin a haw thei tho a", ka ti leh hram.


"A nu a dam ṭha chiah lo", mak ti takin min thlêk vang vang.


Ka biang dawmin, "Khati khan min en suh, night cream ka la inhnawih lo", lâi deuh takin ka ti a.


Ka chal lo dekin, "I nuamsam meuh lo em ni?", a fuh chho dawnin a ang.


"Nawmsam lohna tur a awm lo, intifaiin mu ang. I chau dawn lutuk", êng tithimin, a hnungah ka nam kal dat dat.


Chhuata mu a fa te a hmuh chuan a ding chawt a, "Kal teh, mut a hun tawh. I lu tihuh loin insil la aw", ka nam leh a, a kal ve mai.


A intih fai zawh hnuin, "I fai tawh sia, a nuam var tawh lo maw?", Lal Fanu chu lukham kham ṭhat tir pahin ka ti a.


Towel awrhin mak ti takin ding khawng meuhin min thlêk.


"Khatin mi en vung vung suh, lo mu rawh", a lukham ka beng thek thek a, towel dahin a lo mu thla.


"Min kalsan dawn ta mai emaw ka ti alawm, tui deuhin mu rawh aw", tih zawh rualin a lo ṭhu chhuak, "Sam, i ṭha maw?", a bân bulah ka vuan a.


A lu thing nawkin, "Lal Fanu lo muttir teh",


"Ngati maw? Ka ngai che alawm, min ngai ve lo nimaw?", fiamthu zep tel zauhin, mahse; Sammy chuan, "Freddy-a bula mutna hun i nei tawh lo ang, Lal Fanu kha lo muttir rawh", min en loin, kun ngâihin a ti a.


Hnial chi a ni lo, kan inkarah Lal Fanu chu ka muttir ta a, Freddy-a lam hawiin ka kuah daih.


Ka muhil thei chuang lo, a inthlahrunna chuan min lainattir.


Tawpsan erawh ka tum lo thung.


Naupang hoin zing an harha an Pa mu an han hmu chu, an bawh nghek.


Lal Fanu phei chuan, "Apa, ka ngai tawh lutuk che, Elsa min lo hawn em?", a ti pek.


Freddy pawhin a ngai thlu ngang a ni ang, a pa chu a bawh ngawih ngawih. Siamtea pawh chuti tho.


Tichung hian, inṭhen ta ila, ka bula kal a ngen chu a ni si maw!


Sammy pawhin a fa te chu ngai tak a ni. An pafain an inkuah khawm a, an inpawm chial.


Sammy chu a ṭhu chhuak a, "Apa lo haw e, Apa lo haw, kan mut laiin a lo haw daih", Lal Fanuin a ti chûl.


An bulah ka awm ve reng a, min hre tawh lo emaw tia thawh ka tum chu, Siamtean, "Anuin a ngai ber che", ti pahin ka bânah min lo pawt.


Inring hman hek lo, Sammy kapa hmai phum zâwngin ka tlu mai a nih kha, tho rang tak ka ni.


Ka hnung aṭangin Siamtea nge mawniin min nam a, Sammy âwmah ka intauh nghek.


Siamtean a Pa âwma bei thlawp khawpin hnung lam aṭangin min bawh a, a Pa nghawngah a kuah.


Chhangchhiatthlak ngai a nia aw...


Freddy-an, "Apa leh Anu an inhmangaih", nui vur vurin a han ti lehnghal.


Lal Fanu lahin, "Apain Anu a chuks dawn e", a ti a. A kâ a hup ṭai ṭai.


Ka inla hrang a, "Chaw chhum a ngai tawh, tho ang u", ka ti hluai a.


Mut dawna Pajamas ka hak pawh thlak tawh loin ka tlan chhuak daih. Min tizak em mai.


An unau thumin min nuih vak vak.


Siamtea leh Freddy-a School kan thlah hnu pawha Office kal tura a insiam loh avangin, "Sam, Office-ah i kal dawn lo em ni?",


"Kal dawn lo",


"Ngati nge?",


"MLA-in Office an ngei ngai hleinem, Party inhmuhkhawm kan nei dawn a, chutah ka kal ang", Lal Fanu pawmin pindanah a lut a, kawngka a khar phui loh avangin zui lut turin min duh a ni ang.


Lal Fanu nen khum chungah kan ṭhu a, a Pa phone a en.


Bathroom-a a kal hlanin a thawmhnaw hak ka lo la chhuak, Sammy phone ri chu, "Anu, miin an lo call", tiin min lo ko a.


*Manoi* deuh ngei chuan a.


Engtikin nge a hming a lo thlak kawi kual vel a?


Ka beng bulah dahin ka ṭawng lo, "Sam, Zanin chu inah lo kal ta che", nô fahran hian a lo ti.


Ka ei lo lutuk chu ner nasa tak ka ni, luak a pawt.


"Bathroom-ah a awm, a lo chhuah hunah ka lo biak tir ang che", phone chu Lal Fanu ka pe leh.


Sammy-a kawr hak ka ken ka hrawm nawk nawk.


An pahnih hian an ṭang rual ngei ngei ang.


Zuamawm tak tura min ngaih vaih chuan, a chi loh khawp ang. Thawnthua misualnu angah ka intichang thei.


Sammy a rawn chhuak a, ṭha takin ka lo bia, "Party inhmuh khawmnaah Lal Fanu nen kan lo kal ve dawn lo em ni?",


"Hei hi chu, kan Party aṭanga Minister-a kaiten Office an luah kan va ṭawiawmna a ni dawn", a bân ka ban a.


Kamis a hak chu kawrkilh ka lo kilhpui, "A nih, engtikah nge inhmuh khawm in neih ang?",


"Kar leh khian nih hmel",


"Lal Fanu nen min hruai dawn em?", ka nuih seih.


Nizan a lo haw aṭangin inthlahrung takin a awm a, min en ngam thlawtlo.


Ṭha taka ka lo hmuah avang a ni mahna.


A thiltih kha a ṭha lo, a ṭha lo tih a hria a, a ṭi dâk mai alawm.


Manoin lo be lo se chu, tawpsan mai ka pawiti tawh lo asin le. Hnung lam aṭanga Sa min barh hmaa ka barh hmasak an ngai ang.


Necktie a nghawnga vêtin ka suih pah a, tûm bâr chungin, "Sam, i pawi ka sawi em ni? Nizan i lo haw aṭangin min be duh lo a, en pawh min en lo", ka han ti a.


"Chutiang a ni lo", Lal Fanuin phone a en ring nasa mai sia.


"A nih leh eng nge? Inthlanah i tling tê tê a, min induh khum nghal ringawt mai", mi pawh en loin ka biang a tawk a.


Muangchang hian min kuah, ka kuah let a, a thin a phu nasa lutuk, a khûrin ka hre bawk.


"Chhuanpui, ka, ka...", a inla hrang a, "Ka'n kal tawh ang e".


Aw...min ngaih thu han sawi mai sela.


"Kekawr i hak loh kha", a leather bag lak a tum ringawt.


"Ni tak", ti pahin a ha sawk sawk, "Pheikhawk i bun lo", pheikhawk a han bun leh thuai thuai.


Amah chauh pawhin a buai tâwk em em.


Lal Fanu a va chuks zeuh a, kal leh mai a tum. Phone...


"Sam, ding teh", pindan aṭangin a chhuak hman, "Theihnghilh i nei", a phawk hra.


Nui sen senin, ka hmui ka kâwk.


Rei rial loin min rawn fawp thuai. A duhthawh hiam hiam khawp a.


Min fawh dan aṭangin min ngai takzet tih ka hre thei. Min tihlim, duh takin a kâwngah ka pawm a, min fawhna chu duhthawk takin ka chhâng lêt.


Ka hmui a hlat deuh a, "Sam, ka ngai lutuk che", a der a ni lo, ka ngai em a ni. Ka beng hnuai tawn tawn dawmin, kan lei an insual nasa mai.


A kâwng aṭangin a nghawngah ka kuah.


Min fawh dan, a thâwk danglam dan leh a taksaa danglam awm aṭang hian min ngaiin min thlahlel ve tho.


Aw...ngaihdam min dil mai se, a fel vek tur hi a nia.


"Chhuanpui, ka thiltih kha a ṭha lo, ka inchhir lutuk, khawngaihtakin min ngaidam rawh", tih hi, vawikhat chauh tal han sawi se.


Vawi tam ngaihdam min dil ka phût lo, vawikhat chauh tak tak.


"Ka tihpalh lutuk", emaw, "Min ngaidam rawh", emaw tih chauh pawh ka pawm nasa dawn khawp asin.


Min thlah a, a chal leh ka chal nawrbetin, a thaw chhuak ham ham.


Inpaih thâwl a tum.


"Ka kal aw, ka lo bia ang che",


"Sam, i fanuin i phone a kawl", ṭhen sakin pindanah a lut a, Lal Fanu a lo pawm chhuak.


Lal Fanu nen kan bye bye a, hmuh phak loh an ni ta maw tihah, Sammy ka call, "Sam, ka theihnghilh daih",


"Han sawi la",


"Manoin a lo call che a, call let rawh aw. E, takin, dar engzatah nge i lo haw dawn?", Manoi hming lam hi ka kham.


Sammy chuan, "Zanriah ei nghal.an ti dawn a, ka hrilh theihnghilh daih che. Dar kua bawrah ka lo haw ang", a lo ti a.


Manoi nen hun an hmang dun ni ngei ang chu.


Rin loh lutukin Taiṭita ka ngaihtuahnaah a lo lut.


"A nih chu, Taiṭitan KFC min khilai dawn a, Naupang School bân ve leh KFC dawrah kan kal ang. I lo haw dawnah min lo hrilh rawh aw. Bye".


Taiṭita ka hnûk lut ta mai chu, ka indawm kun ngâih.


A hriat hunah a thinrim lo ang chu a.


Taiṭita ka hrilh loh chuan a hre dawn lo. Ni dawn tak e, ka biak lohna rei tawh lutuk.


Phone ka en a, hman zana kan inbiak bak chu inbiak kan nei leh lo.


A number chu ka han save ṭha leh tê tê.


Siamtea leh Freddy-a hruai turin Lal Fanu nena insiam mek laiin, Driver a lo lang hlawl.


"U Chhuanpui, u Sammy-an hruai tur chein min ti a",


"A buai a ni lo'm ni? A bulah awm ta che", Duhsaka chuan, "Min lo tir a, hnial lo hram rawh", a ti a.


Dik takin, chhungrilah nuih a za tlat.


Taiṭita hming ringawt pawhin a tihlau chu a nia.


In aṭanga kan chhuak chiah tihah Sammy-an min lo call.


"Aw, Sam?",


"School bân hunah pêng kawi loin inah haw nghal rawh u", a âw chu a chang ta fak e.


A thu lo em mai.


"Hotel-ah zanriah ei turin kan chhuak dawn. Nu Papuii ka hrilh tawh a, ei rawngbawl a ngai lo ang. KFC dawrah pawh zanriah ei khamah kan kal dawn nia".


A lawmawm ni teh se.


Manoi nen hun an hmang dun thei lo ang a, "Sam, Party chaw eina-",


"Ka sawi ang chuan a ni mai", thutawp a ni chiang ta bal e.


Zothangmawii (Manoi) pov...

Sammy ka call ngat ngat a, min chhâng thei lo.


Lalchhuanpuiin ka call kha a hrilh lo nge ni, min lo call tawh tur a ni.


Dar sarih a ri tawh a, chaw leh chawhmeh a dai vek tawh.


Ka tihngaihna hre loin Duhsaka ka call.


"Sammy bulah i awm em?",


"Aw",


"Min lo biaktir teh",


"I â em ni? Sammy-an min that duh mai ang", hepa dâwih lutuk hi chu aw...


Ka kuttin ka seh niah niah.


"Tunah, khaw'nge in awm? Ka lo kal dawn", phone chu loud speaker-ah ka dah a, pindanah lutin ka insiam sawk sawk.


Duhsakan, "Hotel-ah an chhungkuain chaw an ei mek, Restaurant-ah ka inhnawhpuar mek thung", a lo tih chu, "Khawi Hotel-ah nge?",


"Lo kal suh, tikhan awm mai mai rawh. An chhungkaw hun hman i tibuai mai mai",


"Hmela, min tham lo viau suh aw", a lo nui hak hak.


Hepa hi, engtin nge ka tih dawn?


Dam deuh zawkin Duhsaka hnenah, "Hotel hming min hrilh rawh, ralkhat aṭangin ka thlir ringawt dawn",


"Zanin atan chuan inah khan awm rawh. KFC dawra Chhuanpuii mipa biak information i duh kha, ka nei tawh. Inah i awm dawn phawt chuan tunah ka lo thawn ang che", khum chungah ṭhu thlain ka thaw halh halh.


Chhuanpuii mipa biak.


Duhsakan, "Ṭawng i hria em?", a lo ti a.


"Hria, Sammy-an a thîk tih i chiang maw?", a nui leh hak hak. "Chhuanpuiin mipa a biak tawh phawt chu a thîk vek. Nangin i biak erawh a thîk ngai lo", nuihza takin Duhsakan a lo ti leh.


Sammy-an ka mipa biakte a thik ngai lo kha mak ka ti thei lutuk.


Chhuanpuii erawh, a thîk ṭhin maw?


Au chiam chiamin bedsheet ka hrual nawk nawk, "Zawnga, Chhuanpuii aiin ka mipa biakah a thikthu a chhe zawk aw", ka ti vin hlur.


Ka thinrim lutuk chu, ka âwm a insêp awk awk.


Lalduhsaka min nuihzatna thawm chuan beng a tithlep.


"Kan hriat kha", ti chauhin min chhâng.


"Information chu", chhuatah ka ṭhu thla a, "Tihian ka sawi mai ang, Synod High School-ah an intawng chauh a, ṭhian angin an inzui chawt a ni awm e. Mahse",


"Sawi vat rawh",


"Thil chah a lo thleng tlat, ka han ei phawt teh ang",


"Lalduhsak, sawi vat mai rawh", khum ka chum vak vak.


A rawn nui huah huah, "Ṭha lawm, an ṭhiante aṭanga ka hriat danin, an induh ru ve ve a, mahse; an sawi chhuak lo. Kum tam hnuah an intawng leh a, Chhuanpuii leh Sammy te hi inhmangaiha innei an ni lo bawk a, hmanniah Accident a awm bawk nen. A bak chu, ngaihtuah ve tawh mai rawh. Information chu ka lo thawn tho ang che", a ti nuah nuah.


Ka thaw huai huai.


Kha accident kha maw ni a? Sammy-an Chhuanpuii a sawisak lai hmuh tluka nuam a awm lo ang.


Mahse, a sawisak hmaa a puan a pawhthlaksak erawh kha chu...


Lukhamah hmai phumin ka au nghek.


Duhsakan pdf min lo thawn chu ka hawng.


*Lalhriatchhunga*


Ka chhungkua ka neih let theih nan chuan eng pawh ka ti ang.


Sual titur pawh ka ni lo, High School-a a ruka inhmangaih tak te pahnih ka suihzawm mai dawn a ni.


Lalchhuanpuii pov...

Kum a thar a, Sawrkar hna ṭan a hun ta a.


Sammy pawh, in aṭangin hna a thawk mawp mawp ta bawk.


MLA ni mah se, Office a nei ve turah ka lo ngai a, chutiang a lo ni miah lo. Bakah, MLA pawh hian In an nei turah ka ngai.


"Office-te chu, Minister ho leh Chief Minister chauhin an nei. CM Bangla chauh a awm bawk. Lirthei erawh kan dawng thei", lirthei ber kher, ṭul lo ka ti khawp a.


Lal Fanu lukham ka siam rem leh tê tê, "Lirthei te chu, kan neih hi, Driver pawh kan nei a, In emaw Office emaw ni zawk se kan ṭangkaipui zawk daih ang", ka ti khauh.


Mi pawh en loin Sammy a nui hak, "Lirthei Driver chhawm min pe dawn a, a nuam ting a ni mai alawm", nuam ka ti dawn lo.


Ṭul lo zeta lirthei Driver chhawm kawl te chu a, man chawiin In kan luah a nia.


"Ee, Sam, i hna hi?",


"Ka chawl dawn",


"Hlawh in nei dawn tho tiraw?", an neiin ka hria. "Eng ber chu?", bo zet hian a ti a. "College-a i hlawh hi?",


"College chu ka nei thei lo ang",


"A nih, MLA hian hlawh an nei tiraw?",


Sammy chuan, "Nei e. Mahse, College ka ngai ngawt ang", a ti a.


A ngaih chu ka ring, a thawk rei ve tawhin ka hria. MLA hlawh hi kham inring phawt mai ila.


Ka Lehkhabu Dawr a awm alawm, kan kham lutuk tlat.


"Sam, hlawh awm lo ta se, Politician nih i duh tho em?",


"Hlawh avangin Politician nih ka tum lo", a ti bur.


Ama tâwkah chuan pa a inti ṭheng ṭheng dawn asin.


Hlawh a awm loh chuan a nih duh ring chiah lo mah ila, ka bu nghat. Muhil tura min tih avang leh a maimitchhin zui daih avangin, ka maimitchhing zui ve daih.


A tuk zanah, Taiṭita hnen aṭangin message ka dawng hlawl.


*Chhuanpui, in dam ṭha zel maw?* Sammy-a a lo haw tlai dawn a, ṭha tak takin ka chhâng.


*MLA nupui i ni ta mai sia le, a nuam awm mang e*


*Nawm chu khawilam, mihring ni ve lo ang maia zaidam reng a ngai a, a hahthlak lutuk*


A hmaa a message hmu renga ka chhân loh te chu a lo sawi chhuak a, thu dangin ka khuhmawi ringawt.


School kal lai sawi ṭan dawnin Sammy-a a rawn haw a, File a rawn pawm lut ṭun.


Ka ṭanpui vat, Pindan pakhat siamin chu chu Office atan a hmang. Kan pindan bul lawkah a ni nghe nghe.


Chutah chuan kan dah a, "A va han tam ve, Exam paper ang mai",


"Exam paper ang a ni mai", a han ti a.


Chhuak tura min tih avangin ka chhuak. File pawimawh tak karah, eirukna tur File-te a awm ka ring tlat.


Hlawh, pawisa avanga Politician nih a tum lo a nih chuan, a eiru lo turah ngai ang.


Sawrkar aṭangin Lirthei Driver chhawm kan dawng ta ngei mai.


Duhsaka lah thlahthlam mai theih a ni lo. Kan nufa chanpual a ni ta mai. Nimahsela, Sammy-an a ring tam zawk tho, a hma aiin a hah zual.


Taiṭita nen kan inbe zeuh zeuh a, Sammy-an phone min ensak mang ta lo a, a Office-ah a inkhung deuh chawt hi a ni ber.


Office-a a awm hma leh lehkha zir hmaa Tv en lai hi chhungkim lai ni tawh mai.


Naupang leh inchhung enkawl hna ka kuta awm a ni ta a. Lehkhabu Dawr nen. A hmain a awm lo tihna a ni lo a, ka kutah a awm pumhlum hmak tawh tihna.


Sammy ai pawhin ka hah.


A thuhrimah, a mizia hi a inthlak leh hlawk ta a. Buaithlak tak tak a ni.


Lui tui ang hian a luang dêm dêm mai a, mahse; Lui tui hi a luang dêm dêm ngai tlat lo. Suar a awm tel tlat a, Suar thlen a huphurhawm angin, amah Sammy-a Suar thlen ka huphurh.


A thikthu a chhiat a, min hauh khur khur a, phone hial tihchhiat a tum lai aiin, tuna a nunnemna hian ngaih a tiṭha lo zawk.


Thinthawh thut hun a nei ngei ngei dawn a, chumi lo thlen hun nghahhlelhawm loh lutuk tak a ni ta ve ang.


Tlai khat chu, chaw ei lai takin mipa pakhat, pa valai aia upa lam hret, Pastor ang maia inthuamin file pakhat kengin a lo lut hlawl.


"Lo lêng rawh, eng nge ni ta? Ṭanpui theihna che kan nei em?", tihṭhan tawh a ni a, zei ve tawh reng.


Ka tho a, kut silin ṭhutna ka kawhhmuh.


Sammy pawh chuti tho. A ṭhut fel hnuin, "Pu Sammy-a biak lawk ka duh mawle, a hmanhmawhthlak angreng khawp a", a nui huah huah a.


Ka mi rin zâwng a ni hauh lo.


A nui huah huah ang hi, Zephyr Drama hoin an chang tawh. File te a keng a, "Eng nge i duh tak a? Office lamah inkâwm ang hmiang, min lo zui la. Chhuanpui, thingpui sen hang No hnih min lo pe teh aw", Sammy-an a Office-ah a hruai lut.


Ka ring miah lo.


Eirukna tur an buaipui dawn chiang a ni. Kum khat êm pawh a la vei lo a nia, eiruk hi a ṭha ka ti lo.


Duh lo tak ka ni.


MLA hna thawh ṭan chauha Eirukna tur buaipui nghal a fuh ber lo ang.


"Anu, chaw i ei dawm lo mi?", Siamtean min lo kohah harh chhuak zawkin, choka ka pan.


"Ei leh dawn e, i pa pawh a la puar lo ang. Ei mial mial ula, thingpui ka han lum sak lawk ang e".


Thingpui sen hang ka lum a, an thusawi hriat ka châk mai mai khawp a.


Small Tray-ah No hnih hungin, Kurtai ka dah tel bawk.


Office kawngka ka kik a, "Lo lut rawh", Sammy-an a rawn tihin ka lut a, thingpui leh kurtai hung felin ka chhuak.


Kawngka ka khar chîp lutuk lo, ka ngaithla ru ta a, "I signature min peksak theih chuan lawmman a tlêm chhe lo ang",


"Lawmman tlêm ai chuan a tam nge nge leh, hlawkna awm thei a nia kan zawn tiraw?", Sammy-an a ti chu, ka so bulh bulh maiin ka hria.


Ka ngaithla tih an hriat hlauin ka kal sawn daih, ngaihthlak reng ka peih lo.


Chaw ka ei a, ka ei ṭeuh nghe nghe.


Sammy-te pawh inkuah chungin an lo chhuak khi vur vur. Min hmuh lohin, nerkhum nasa tak ka ni.


A signature a peksak a ni phawt a, a inlêng a haw hlimtir em mai.


Kei chauh chaw ei tawh ka ni a, "Sam, eng lam nge a?", a lo ṭhu thla chu ka zawt nghal zat.


Dâwt a sawi dawn khawp alawm.


Dam deuh hian, "Hna lam a nia, a ho lutuk, hriatthiam loh lai a neih kan inhrilhfiah mai mai", a ti duh chauh lek.


Rilruin, "Dâwt sawi kan ching ṭan dawn maw?", ka ti mai a. Ka sawi chhuak kher lo.


A chaw ei a tui tehchiam lo a ni ang chu, a tho daih a. Chaw ka ei zo vek.


Ka puar lutuk chu, ka che ṭha hleitheilo leh tawh zawk a. Lal Fanuin min nuih min nuih.


Ṭhutthlengah ka ṭhu a, harsa ti fe hian thâwk ka la halh halh.


"Anu, i pum chhungah nautê a awm mi?", a ti a. A hmui hup ṭai ṭaiin a nui sen sen.


Ka hau phal lo.


"Nautê tê tak tê tê ho an awm alawm", ka ti a. A nui uar sauh sauh. Freddy nui uar fal thei lutuk lah, hnung lamah a dak awr awr a, a thal tawp.


Chu chuan ka nuih a tiza a, thei leh thei loin ka nui ar ar.


Pum a tina zual.


Sammy pawh a nui suk suk. Mahni pasal mah nise, hriatthiam a har.


Ka hrethiam thei lo, a mizia hi a inthlak hlawk hlawk mai zel a. Ka ṭih ru riau tawh.


Taiṭita hming lam nawn a chi loh bawk.


A chhan chu, engtin nge a awm dawn tih ka hre lo.


Hetia nêm taka a awm hian a hlauhawm zawk ta mahin ka hre tawh.


(Chhunzawmna)

Freddy leh Siamtea te final exam hun a thleng hnai a, inbuatsaih nasa tawk tak kan ni.


An School bân veleha Homework an nei emaw nei lo emaw lehkha kan lo zirtir leh, zantin deuh thaw lehkha kan lo zirpui bek bekna kha a lo ṭangkai riau.


Exam dawnah hmanhmawh taka zir ngai loin, ennawn ang chauhin a kal theih a.


A fuh tlat.


Siamtea ka ngaihtuah lo, a Pass dawn tih ka chiang var var.


Freddy-a hi ni. Sammy bulah ka sawi tawp.


"Hetiang hi a ni ngai si lo a, a mak e. A rilru a chak theih ṭhin tehreng nen. A rilru hi a chawmawlh tlat tawh",


"Muangchanga zirpui chi a nih chu, exam a hnai tawh viau em? Keima'n ka han zirpui ang e", Sammy-an a ti a.


A ngaihtuah tak tak nge, a sawi mai mai?


A sawi mai mai lo turah ngai phawt ila.


A tuk zan aṭang chuan, a sawi ang tak takin Freddy-a chu lehkha a zirpui.


Ka hrethiam thei lo, keimah hi ka â zawk nge ni?


Nge ni a, Sammy-a hian min fiam mai mai?


Mahni inrinhlelh a na duh ngei mai.


Theitui leh Chhang ei tur Tray-ah ka dah a, keimahni pindanah zawk an zir. Ka lut chu, Freddy-a mit tui a tling piau a.


Ka khawngaih lutuk chu, pawh chhuah mai ka duh rum rum.


Sammy chu intimitak deuhin a ṭhu khawng at a, Freddy-an a hlau lutuk.


"Sam, chawl lawk ula", dawhkana Theitui leh Chhang dah pahin ka ti a.


Chhanchhuah beisei takin Freddy-an min melh piau. Nu Thinlung aṭang chuan a va han na ngawih ngawih tak em aw.


A tana ṭha tur a ni bawk si.


Muangchanga zirpui tur nih laiin, a innawrhlui ang zâwng chuan...


Sammy pawh hi a!


A beka hliam khan a Thluak a khawih hman mawni aw?


A mizia leh awmdan hi a mak thei em mai.


Lem a chang nge ni ang a, chang lo ang. Lem chan reng hi a peihawm loh a, a changin ka ring bawk si lo.


Ka fa te aiin, ka pasal hian ka thluak a tibuai.


Siamtea leh Freddy-an exam an ṭan ta a.


"Thiam loha entawna Pass aiin, thiam lohna ang anga Fail a ṭha zawk. Mi dik leh rinawm chhuahna bul a ni a, tuna dik taka exam in hmachhawn hian in nakin huna in awm zel dan tur a hril dawn a ni", tiin, ka fuih nasa mai.


A chhan chu, an Pa hian a hrilh ka ring lo. Eirukna lehkhaah a signature a pe chu a ni ta mai a.


MLA-a a tlin theih nana a nupui hial a tihmualpho hreh loh danah, eiruk te lek lek, a tan chuan a bei tham.


Khawvel hi a ninawm hrim hrim nge, kan phunchiar hrim hrim?


Zawhna intuha lo tak a ni e.


Siamtea exam chu a chhâng ṭha mai zel a, Freddy erawh, "Anu, ka fail mai ang", ṭap chung hian a ti ṭhin a.


Lainat taka kuahin, thiamna zawng zawng nen ka fuih.


Nimahsela, a pawi zo ta vek a ni.


Freddy chuan Fail a hlauh luatah a entawn ta tlat!


Principal-in min rawn call a, ka va han zak tak.


Sammy nen min rawn call rual rualin kan thleng nghal. Principal Office-ah Freddy leh Sammy nen kan ṭhu.


Hnar a hmuh len theih ngaih ngaih khawp mai. Ka zak lutuk ringawt.


"Entawn hi chu, hnawhchhuah tur a ni a. Exam chhunzawm phalsak a ni bawk hek lo. Vawiin la la chhuak tura tih a ni a, khawngaihin min lo chhuahsan mai ta che u", Principal-in a ti ta a.


Freddy chu a kun ngâih.


Principal chuan,,"Politics-ah in buai nasa lutuk a, a ṭha lo. Politics chauh lo pawh, nu leh pa dang pawh an ni. Kan fa te aia ngaihpawimawh hmasak tur hi an awm lo", a ti chiam a.


Sammy pawh a zah ngei ka ring, inhmuhchhuah nan hmang zui se ka ti a nia.


Hnawhchhuah tâwk tur em chuan ka inphal lo.


Principal hnenah chuan, "Khawngaihtakin min hnawtchhuak lo hram rawh. Kan bawhnawn mai ang. A thleng nawn ngai tawh lo bawk ang tih ka tiam a che. Hun vawikhat chauh min pe rawh", tiin ka dil a.


Ka ngen ngawih ngawih.


"Min ngaidam rawh, kan thiam loh a ni. Min hnawtchhuak loin, min bawhnawn tir hram rawh", Sammy ngawi ngal pawh a rawn ṭawng chhuak thei ta hram.


(Chhunzawmna)

In kan thleng a, Lal Fanu leh Siamtea chu pindanah awm tirin, Sammy nen Freddy-a kan ṭhutchilh ran.


A mit tui tlakna lai chu a belkang niaih mai a, han pawm vawng vawng châk hle chungin, a dik lohnaa zilh tur ka nih angin intingeng ngala awm a ngai.


Entawn lo turin ka fuih nasa asin.


An zirlai lah theihtâwp chhuahin ka enpui a, zirpuiin ka ṭhutchilh hial ṭhin.


Principal-in nu leh pa mawhphurhna min Sermon khum chu dik vek mah se, theihtâwp chhuah ka nih avang tak hian min tina zual.


Freddy-a hmaa ka ṭhu chiah chu, "Anu, min ngaidam rawh", ṭap hlawp hlawp chungin a ti a. Min kuah bawk.


Sammy-an a pawt a, a kokia vuanin, "Engvanga entawn nge i nih? Khawi aṭanga i zir nge?", chang fak hian a ti ta a.


A âwki erawh a zawi.


Chutia a thiltih hre lêk loa a fapa thu a zawh dan chuan min khei zak.


Eirukna lehkhaa a hming chhû hnan khan, a fapa hnenah khawi aṭanga entawn a zir nge tih a zawt maw?


Freddy-a chu phih lawkin, "Darkar nga Bathroom chhungah i awm ang", ka ti chhuak hlawl.


Khawi aṭanga lo kal nge ka hre lo.


Sammy mitmeng a dang zarh nghal bawk, "Darkar nga a? Bathroom chhungah maw ni a? Chutin naupang an hrem ngai em ni?", a ding chhuak a.


Cho leh cho kan inhmachhawn ta ni maiin ka hria.


Freddy-a hnena a thu zawh dan khan min tithinrim a, hremna ka pek khan a tithinrim thung.


A eiru a, a fapa hnenah a entawn chhan zawt ngam tur a ni lo.


Sammy chuan, "Hnawhchhuah aiah bawhnawn min phalsak tawh tho, hrem kher a ṭul lo", lungawilo tak hian a ti a.


Kei chuan hrem ngei ka duh.


"Ni lo e, entawn hi sual a ni. Hremna a hmu ngei tur a ni bawk. Bawhnawn aiin hnawhchhuah a ṭha zawk. A bawhnawn ang a, exam naa a entawn leh a nih chuan School a chawl ang", meng ling tak a ni.


Min rawn din hnaih deuh a, "I fapa dik tak, thisen chhuaka i hrin ngei ni tase, hetiang hian i hrem tho ang em?", ka hnîm rawih rawih.


"Sam, engvanga chu thu-", awihlo zetin ka nui hak ringawt.


Freddy-a hi ka fapa dik tak, thisen chhuaka ka hrin a ni lo nameuh mai.


Mahse, nufa inlaichinnaah hian thisen kher a ngai em ni?


"Min chhang rawh", ka phu zuk.


Suar kan thleng dawn hnaiin a hriat bawk.


Tlawm erawh ka tum lo, ka dik tih ka hria a, mi dik lo ang maia chhuanlam siama né né kual ka tum lo.


Amah bawkin, "A exam thei dawn chuang lo a, hrem a ṭul lo. I pindanah kal rawh", a ti a.


Ka duh hauh lo, "Ni lo, hrem ngei a ṭul", Freddy-a hmaah ṭhingṭhiin, "Bawiha, ngaithla rawh, exam naa entawn hi sual a ni tiraw? I entawn a, man i ni a. Chuvang chuan, i tihsual i hriat a, i tihsual nawn tawh loh nana i nuin ka hrem che hi a ṭul a ni. Tunah, Bathroom-ah sawn va kal rawh le. A tâwk ka tih hunah ka lo ko ang che. Bathroom-a i awm chhungin i tihsual i hriat chhuaha i sim ngei ngei a ṭul bawk", ka ti a.


Freddy-a insût hlawp hlawp avanga nêm ka tum bau lo.


Nu ka nihna angin ka fapa chunga hremna lekkawh ka duh bik lo, ka duh lo chang ni loin ka ngaihtuah ngai lo.


Lehkha ka zirpuinaah entawn hi ka zirtir tlat lo atin ni.


"Anu, ka tihpalh, ka ti nawn tawh lo ang", hmai belkang niaih chungin a ti a.


Ka thu zûk leh mai te pawh ka duh rum rum.


Ding chhuakin, "Tunah kal tawh rawh", ka ti a.


Rang lutuk tak maiin a lamah Sammy-an min kuai her ṭhuai, "I-", a ti chiah chu, "Kha thu kha vawikhat mah sawi tawh suh", ka aukhum nghek.


A sawi tur ka hrechiang em a ni.


"Kha thu kha vawikhat mah sawi tawh suh ang che. Ka fapain thilsual a ti a, kei, a nu hian hremna ka pe dawn. A ṭhiante nu ten ka fapa hi a tihsualah hremna an lo pein an lo zilh dawn lo. Kei, i hmaa ding i nupui leh i fate nu hian ni hremna pea zilh dawn chu", ka thaw hlawp hlawp.


Sammy pawhin min en tawp.


Ka sam chhâwllêng lah hmaiah an bet, "A zir ni miah lo entawn hi khawi aṭanga a zir nge?",


"I ṭawng tam hret a nia aw",


"A pa hian zir miau hek che", ka ti chu, a che hrut. Min bêng dawn emaw ka ti hman.


Eirukna lehkhaa a signature a pek kha ka sawi tih a hrethiam ngei ang.


Freddy-a a rawn inrawlh, "Anu, Apa, inhau suh u. Ka entawn tawh lo ang", kan inkarah a ding a, a pa nen kan kut a chelh ve ve.


"Bathroom-ah ka kal nghal dawn, inhau tawh lo ula, ṭha deuhin lehkha ka zir ang a, ka entawn tawh miah lo ang. Anu, Bathroom-ah ka awm dawn, ka entawn tawh miah lo ang", ṭap ṭeuh chungin Bathroom chhungah a va lut.


Umzuia han kuah vawng vawng ka nâp a, inhnukkir thei ni hek lo le.


A lo chhuah hunah, lungchim takin ka kuah ang, khawngaih thlâ a la takzet. Ka fapa a ni a, a nat ka phal lo.


Exam naa entawn tura zirtir a ni lo a, mi dik leh rinawm taka nung tura zirtir a nih laia, exam naa a entawn thu han hriat mai chu(h)!


Sammy pawhin chelh a tum lo, Freddy-a reng reng a che rang em a ni.


"Nichina i thusawi kha", cho takin min en bawk a, cho tak bawkin ka melh kar.


Ka mit laksawn ka tum lo. Shin Ae Ri ka ang ang chu aw...


"Nichinah eng nge ka sawi? Sam, kut min thlak ngai lo, kan pahnihin kan hria. Mahse maw, i ṭawngkam hmang hian vawi engzah nge kut min thlak tawh nang chuan i hre kher lo ang", a meng phar nasa mai a, cho takin min en leh thuai.


Chumi pawh chuan min tina thar.


"I nupuia min la pawm lo a nih pawhin, i fa te hian an nu-ah min pawm tih hria la, ka enkawl danah lo inrawlh loin, lo laina thar hlek suh ang che. Ka fate thlavang ka hauh ang bawkin, an ṭhatna tura hrem hi ka hreh reng reng lo", ti hmak hmakin, ka kalsan nal nal.


A inngaihtuah chhuah hram beisei ang.


A nupui hlui lakah a thlavang ka lo hauh vel a, ka zak hnuhnawh.


Ka fate chauh ka tan an awm a, an tan chauh ka awm ve tawh thung ang.


Bungrua ang chauhin min ngaiin, bungrua tiin min ko bawk a, nupui angin min en hek lo.


Duh leh eiru se, a nupui hlui va tawmpui dûk dûk pawh nise, a tuh rah seng hun a la nei ngei ang.


Darkar nga pawh tling loah Freddy-a ka hruai chhuak a, puan lumin ka tuam nghal vat vat.


A dam loh nan lum takin ka thuam.


Ka âwmah ka pawm vawng vawng a, hrehawm ka ti.


"Bawihte, entawn hi a ṭha lo. Entawna pass aiin thiam loh ang anga fail a ṭha zawk ka ti a ni lo'm ni?", mit tui tla ṭeuh chungin ka ti tawh.


Hrehawm ka ti em a ni.


"Anu, ka tihpalh lutuk, ka entawn tawh miah lo ang, ka thiam lo sia, ka fail chuan min hauh ka hlau a, ka ṭhiante tihdan ka hmu a, ka ti ve mai a nih kha. Anu, min ngaidam rawh", ṭap chungin a ti ngawih ngawih.


Kan nufain kan inpawm a, kan ṭap dun.


Chhangchhiatthlak dan duhawm tak a ni lawi si.


Exam naa entawn tawh lo turin kan intiam mawlh mawlh.


Ka ring a, ka ring sual dawn lo tih ka hria. Nu te hian hriatna ṭha tak kan lo nei ru reng a nih hi!


Sammy hnenah Freddy-an ngaihdam a dil ṭha leh.


Zanriah ei lai a ni a, Freddy-a chawhmeh duhzâwng hlir ka siam bawk.


Siamtea lehkha zir ka enpui a, entawn ṭhat loh bakah, thiam ang tâwk tâwkin ka zilh malh malh bawk.


Lal Fanu hi mak ka ti ṭhin, a u Siamtea bula mut a chuh leh tlat.


Sammy nen chauh pindanah kan awm.


Pajamas hain, khumah ka lawn a, "Tlaia i thusawi kha",


"Tlaiah sawi ka nei lo, ka fapa ka hau tih chauh ka hria", ti hmakin, lehlam hawiin ka mutsan zui hmak.


Min kuaiin min bawh nghal rawk rawk, "Sam, min tihlau dawn alawm", a nui duh chauh lek.


Ka pasal ngei hlauhnain ka khat.


Ka kekawr tlâng a pawt a, nupa titi dun chu sawi loh, pawngsual case kan inawrhtir lo chauh.


Min thawhsan a, insil tur pawha tho chhuak ve loin puan sin ṭha ringawtin ka mu kawm ngal.


U Ngaia hnena va thlen vek ka duh, zan khat tal chu Jail-ah riak se ka ti.


A nih loh pawhin, naupang ho nen kan chhuahsan mai dawn mawni?


A hlauhawm ṭan tlat, a mizia a inthlak hlawk hlawk a, hriatthiam a har. Psycho an tih ang Pasal te hi kan lo nei ru reng ang tih te a nia ka hlauh tawh.