Chapter - 28
Ziaktu : ilefi imoz
(Recap : "Min hriatchhuah châng apiangin min hua ang che. I thinlung tikehsawmtu ka nihna hi theihnghilh ngâi lo la, engatanmaha ngai lo tu che ka nihna pawh vawng reng rawh. Mamawh ngâi lo tu che ka ni tih hre reng la, min hriatchhuah châng apiangin thinrim ţhin hial ang che. I ngaihzâwng tan rinawm la, vuan tlat la, chelh tlat rawh. A tâwp thlengin nung dûn ula, hmalam hun hlimawm tak nei ang che u!")
"Khatiang thu nen khan min thlah suh ka ngaithla peih lo. I duh i thlang a, i duhthlanna ka zah sak ang che. Min duhsaknaah ka lawm a, a tîr aţanga duhthlanna ka siam sual rah ka tuar deuh dawn tihna a ni mai. A rei lovang, hmalam ka pan ang a, chak taka kalin rawn hawi kîr tawh loh ka tum bawk ang. Hlim ang che u" ka mittui luang nûl thuak chunga tiin ka inhersan a, ka lehkhazirna lamah ka pheisan ta bawk.
A tawpna atan tiin duh ka thlan tir leh ngat a. Chutah pawh min thlang leh ta chuang lo. Beisei tur a awm miau loh chuan keipawh ka beidawng ve tak tak tawh ang. Ka hlim dawn emaw, ka natzual phah hlê dawn emaw pawh ni se la, ka thlan ngâi loh zawk kawng chu ka zawh ve tawh ang a, harsa hlê ţhin dawn mah se ka tlûk hlenpui hauh lovang. Ka bei ang a, nun nuam zawk tawng turin ka tuang ka tichhah lui sauh sauh bawk ang.
Christmas hmâ nî, Urlawk zân a ni a. Han tih nek nek tâkah chuan hun pawh a lo kal ve duai duai zel a, zantin mittui nen mu ţhin mah ila ka kiangah Op-a a awm reng a, Châmi'n a theih ang tâwka min hnêmin min kawm hlim a tum reng bawk a. Ka mal lo tih ka inhriatna ringawt pawh chuan chakna thar min pe fo ţhin.
"Mu vek rawh u!" Office aţanga rawn ti lâwng lâwngtu Sir Muanzuala chu hmawlh nen Corridor-ah a rawn ri phei ţhak ţhak a. A rui sual leh tawh anih hmêl.
"Sir, dar sarih chauh a la nih hi!" Hmeichhe ţhenkhatin an lo tih te chuan a thinrim phah sawt emaw tih mai tura ringin dâr a vaw ri vak vak a. "Mu rawh u ka tih chuan mu ringawt mai rawh u" a ti fiak ţhak ţhak bawk.
A buaithlak thei ania Sir Muanzuala hi chu. Lehkhazir induhthawh hunlai takah te hian a ruihsual châng chuan Electric Switch-ah te a lo off a, thim hlimah min muttir ţhap ţhin. Chhungte hnena kan sawi lahin a insawithiam hneh nasa ţhin mai si a, zir peih vak loh ţumah lawmawm viau ţhin mah se, exam a han hnaih tak tak hnu hi chuan lung a tizîng thei chhek chhek khawp mai.
"Mu rawh u ka ti!" Tih paha ka dawhkan a rawn chum rual chuan phu nghekin, ka thin zâwn ka dawm vang vang a. Corridor-a zir awmchhun ka ni bawk nen min rawn zuam viau anih hmel e.
"Malsawmzel, va mu rawh!" Chang fek fawka ka hmâi zâwn taka a rawn tih leh chuan, "Hetah hian lehkha zir turin kan kal khâwm a, hmâ deuh deuha mu tur ni lovin!" Ka ti chang ve fak a. Tunlâi tak phei chu mahni tâwka rilru hah leh nat nen, hlauh leh zah ka hre lo a ni ber a, dik ni a ka inhriatnaah a tlâwm zawka ţan ka tum lo bur bawk.
"Ve khanglang chuan, in zirtirtu ka nih hi i hria em? Mu rawh ka tih chuan mu ringawt rawh!" Min vuak tuma a tiang a vai thuak rual chuan tu emaw hian a rawn namsawn dâwrh a, hnunglamah pai khutin kawtzawla phâitual hnimah a let hlâwm nawk mai! Tâl buan buanin a rawn ding chhuak dawn ţhin a, a lû a hai nge mawni a let thla leh tual zel.
"Hmeichhia lehzel pawh kutthlâk duh mipa hi zirtirtu atan kan duh lo che. I phûr châng apianga i vau leh kut i thlâk turin hetah hian kan rawn kal lo. Hmeichhia leh lek phei chu i kut hmâwr pawhin khawih tawh suh!" Min rawn phên hmiah chunga titu chu tudang an ni lo, ka hnaih taka awm reng ţhin Op-a, Vanlalawmpuia a ni!
Sir Muanzuala rawn thochhuak chuan thinrim hmâi sen vek khawpa melh râwm râwmin a rawn pan phei chhut chhut a. A meng ling hlur bawk si a hlauhawm tak a ni.
"Kut te mi thlâk ve ngam elo? Tunge ka nih i hria em? He sikul hminga i exam theih leh theih loh hi ka kutah a innghat tih hre rawh. Naktuk lo thleng se la, eng nge ka tih theih kan en dawn nia" ti khur khur chunga Principal Office lam a pan lai chu ngawi rengin kan thlîr liam a, a luh hnu chuan Op-a chu rawn inher vutin, "Zir leh tawh rawh. Meng rei lo la, hei midang ho chu an mu deuh vek dawn ania, mahni chauha men i hreh chuan ka rawn zirpui ve ang che" tiin ka dârah a rawn hmer salh a. Duattu leh chhantu neih nawmzia ka hriat phaha ka hnuk a ulh ţeuh mai.
"Ka lawm e Op, ka tan i awm reng ţhin a. Tunlai ka thil pal mêk hi a harsa rih êm a, duh ang pawhin ka ngaihven lêt hman lo che. Keimah hi ka inngaihven hmasak phawt loh chuan ka rilru ipikna hian min hmet châu mai ang tih ka hlâu êm a, dawhthei taka min nghah hrâm hrâm reng avang hian ka lâwm lutuk. Va mu ve rawh, ka hlau lo, keimahin ka zir thei" tiin lâwmthu ka hrilh mawlh mawlh a. He mipa hi ka nunah a rawn lût lovang tih ka hlâu takzet tawh a ni.
"Ka sawi tawh kha, kei chuan ka nghâk reng dawn che, i hlimna leh i himna âia ngaihpawimawh ka ngah lo. I hlauh chuan min rawn kaitho dawn nia" ka bianga a rawn fâwh zauh hnuah inherin an dorm lam min pansan a, a luh dawn chuan rawn lehhawi leh hrâmin, "ka hmangaih lutuk che!" Tiin a phun leh sap a. Ka ringhlel lo, hetiang bâk hian tu mipa mahin hmeichhia an hmangaih bik lovang. A hmangaih hmeichhia hi ka la mumal lo êm mai pawh a!
A sawi ang tak takin ka classmate te ho chu an mu rêm diak a. Classroom tithim vekin, dorm chhung leh office pawh a thim vek tawh. Ka awmna zâwn corridor chauh chu êng awmchhun a ni tawh a. Thingpui lum tute pawh Sir Muanzuala khan a lo hnar hâw anih ka ring, eirêlna In a thim vek tawh.
Ka la thiam chian lohte ennawna ka chhiar tlauh tlauh lai chuan khawpui a rawn ri dur dur a, vân lam ka hawi chhoh chuan arsi pawh chhûmin an lo hliah vek. A thim mup a, thli thaw vûk vûk leh kâwlphe zawr zawr te chuan awm an tinuam duh miah lo. Eng emaw hian ka thâuah min man tlat a, chêt pawh ka che ţha ngam tawh lo.
Intipachang luiin ka lehkha chhiar lai ngawt chu ka melh lui ngar ngar a. Rilru lâk pên nana chhiar mai mai te ka ang tawh mahin ka hria!
"I la mu lo a? A tlâi tawh asin mu tawh rawh" tih thâwmah chuan phu zawkin, ka hmaa Op-a lo ding reng chu thâwk la ham ham chungin ka melh ralh a, "i mu tawh emaw tia!" Ka tih chuan, "Mu tawh e, khawpui riin min kaitho a, tukverhah ka rawn dâka i lo la meng sia. Ka rawn ngaihven che. I hlau em? I hlauh chuan sawi la ka menpui ang che ka tih tawh kha. A tlâi tawh a, mut i duh pawhin i mu thei" tiin ka dawhkanah chuan a rawn ţhu kâi tharh a. Ka sana bun lai ka han melh chuan dar 11 a lo ri ţep tawh.
"Heihi zaninah thiam hman ngei ngei ka duh sia, ka la meng rih ang" tiin ka lehkha chhiar lâi chu ka hmuh zauh a. "Tikhan lo awm rawh" tih leh an dorm lama tlânphei a rual a, a thang rei lo. Chair leh lehkhabu rawn keng chhuakin ka sîrah a rawn ţhu ve sawt sawt a, puannuam a rawn bah chhuah chu min sin tîr vein, "a vawt bawk si a, i dam lo mai ang. Zir leh tawh rawh, heihi ka en ve zuai zuai anga, ka chhiar ri lovang" tiin a lehkhabu rawn ken chhuah chu min hmuh ve zawk a, hepa ţhin hi chu aw!
Englai pawhin ka tana a ţhatzia leh ka tan a awm reng dan te hi ka sawi ka sawi mai dawn niin ka hria. A ţha êm a, ka phu lo ve bawk atin ni.
Rei deuh kan zir dun hnu chuan ruah a rawn sûr ta nge nge a, boruak pawh vawt ţha ver vawr tak a ni. Thli thâw chu reh mah se ruah bawhawk tih takah corridor a rawn theh thleng hial a. Ţhut rengna chî a ni ta lo.
"In dorm-ah lût rawh, dawhkan hi classroom-ah ka châwi phei ang a, ka mu ve nghal ang. Muttui aw, tui deuhin i mu dawn nia" kan puan sin laia min tuam ţha sawt sawt chunga tiin kan dorm kawngkhar bulah min kuah phei a.
"I huh vek dawn asin" ti ve bawk mah ila, "Man ka nih hi" tih leh ruahsûr hnuaia dawhkan châwi sawn a rual ta tho a. Classroom-a a dah luh thleng chuan kawngkhar bula ding chungin ka lo thlîr reng a, Op-a nge nge, a thlamuanpuiawm ţhin e.
Zingkârah tu emawin min sâwi deuh nawk nawk a, "tho vat teh Sir Muana'n Op-a a hnawtchhuak ania, an inthiar chhuak dawn!" Tia Châmi phun sar sar thâwm chu ţhut chhuahpui hluaiin, "Eng nge a hriat a?" Ka hlut a. Ka puan sinlâi theh hlîm lawkin pâwnah ka tlânchhuak vut bawk.
"Ngati nge? A hnawtchhuak tak tak che emni?" Lungawi lo fêa Sir Muanzuala melh râwm râwm chunga ka tih chuan, an dorm kawngkhar aţanga a mutbu rawn pu phei mêktu Op-a chuan lu a lo bu nghat a. Min kalpelh laia a thinrim leh lungawi lo mitmeng chu ka hmuh hmaih lo nasa!
"Chutin i hnawtchhuak thei ngawt bik lo! Eng pawi mah a khawih lova thiam lohna pawh a nei hek lo. I thu thuin school hi kaltir tum suh!" Sir Muanzuala la melh ngar chunga ka tih leh chuan hul hak hian a rawn nui a, "Zirlai awmţha duh lo enkawltu ni tura Sorkar hna thawk ka ni lo. Exam thei lo tura ka siam lo hi lâwm mai rawh u. Mahni zirtirtute pawh zah lova, namthlu duh mai mai mihring anih kha, in zirtirtu dangte pawh ka hrilh vek tawh a, min pawmpui thlap" tiin Principal office-ah a lût zui nul nul a. A thu lâk dan mai mai chu! Thil titheitu nih vang maia mahni dik lohna thup chîng zirtirtu kan lo nei reng anih hmêl khawp mai!
"Nangma thiam loh hmasak anih kha! Nizanah..." Principal office lama pên phei hlawk hlawk chunga ka tih laiin Op-an ka dulah min rawn pawm bet hmiah a, "tâl suh" tiin min khap daih a tum ngial bawk.
"Kan en liam mai mai tur a ni bik lo. Dinhmun ţha zawka awm an nih vang ngawtin an thû a kâwi a ngîla kan zawm a ngaih bîkna chhan tur ka hre lo. Ka nu ka be dawn" tia ka tâl leh aih lai chuan Châmi a rawn inrawlh ve thuai a. Che buan buan lo tur leh fîm taka inngaihtuah hmasa phawt turin min chah nghe nghe.
"Lo kal ru sawtah sâwn sawifiah ang u" tiin Mipa Zun In lamah min kâi phei dawt dawt a, ka thin chhûng sa hulh hulh leh ka ţah chhuak lutuk avang chuan thâwk pawh ka thaw ţha thei lo! Ani zurui lungpuam, thinthawk vang mai maia hetiang chen chen kan thleng hi ka ngaihdan a ni thei thlawt lo!
"A pâwngtâwng zuam ngawt chi loh ania Sir Muanzuala hi. A duhnaah chuan chhia leh ţha pawh a thliar ngai lo. Op-a nen in inkâr pawh a hre vek a, in khinsawn zel chuan thu dik lo baksakin in chungchâng a sawichhuak duh mai ang. Amah a him theihna tur anih dawn phawt chuan School hmingchhiat te hi a hlâu miah lo. Nikum hmasaah pawh Favang kût laiin kan school hming a tihchhiat hrep tawh kha. Op-a pawh exam tal a la exam thei dawn a, a lawmawm zawkah ngai ang u Sawmzel. Thinrim viau pawh ni la dawt thua in inkâr a puanzâr vaih chuan buaina zâkhua a thleng zawk mai ang" Châmi'n a ti charh charh a, keini pahnih min melhtawn zak zak chunga sawi a ni bawka Op-a chu a bu nghat nghat a, kei erawh ka lungawi hleitheilo thung.
"A ruih sual châng apiangin buaina eng emaw a thleng ve ziaha ka hnê zozai tawh alawm. Dik tak chuan khawtual mi leh sa dik tak a lo ni lo nen, khawchhung leh school mualpho theihna tur te hi a dâwn thleng duh ngai lo va, keimahni zawkin kan tuar ziah. A hnêawm tawh lutuk. Tunah pawh Op-a a awm loh te chuan Camp a nuam lo vek dawn. Ama tan tak pawh a nuam duh nâng! Hnawhchhuah han nih bik ngawt te chu!" Ti hmarh hmarha Op-a kut ka vawnsak lai chuan nghet deuhin ka mut chu a lo hûm lêt vang vang a, a thisen zâm pâwng ţalh ţalh leh a taksa insangmar ţeuhah chuan hrehawm a tihzia a hriat theih!
"Engpawh ni se ka thusawi kha ngaihtuah chiang ula, in inkârah dâltu nih ka tum lo ania, thurâwn ka pe satliah mai che u. In tih tihin ti rawh u" tiin Châmi chuan min kalsan nal nal a, hun thâwl min pêk a tum ve hrim hrim anih hmel.
"Zingah min rawn kâitho a, insiama chhuak nghal turin min tia. Thophang mood fuh loh nen ka thin a nu deuh but hman. Mahse ka ngaihtuah chhuak che a, Châmi sawi ang deuh khan dâwt hlâwm hlakin kan inkâr a thang ang tih ka hlau ve tho si a, chhuah mai ka rilrûk ta anih hi." Hmalam thlîr ngar chunga atih lai chuan a aw ah thawpikna ka hre tel tlat a, hreh tak chunga sawichhuak hrâm hrâm a ang ka ti.
"I tello chuan a nuam dawn lo êm a.. Min hrethiamtu leh min fuih kal ţhintu i nia, ka bialpa i ni bawk a; engtin nge i tello te chuan ka awm ang? Zana lehkhazir pui tur pawh ka nei tawh nâng! Zâi pui tur te, tui châwi pui tur, nuihpui tur, harsatna ka thlenna tur te, i tello chuan hrehawm ka ti lutuk ang!" Ţap ţeuh chunga ka tih sep lai chuan rawn kûn hniamin ka biangah a rawn fâwp zauh a, a rei lo hlê thung. A ding ngîl leh thuai a.
"Enteh, Vân hnuaiah ve ve alawm kan awm! Thlâ pakhat, ni pakhat leh arsi tam tak hnuaiah. Planet tam takte zînga planet pakhat, khawvel chhûngah vêk kan awm a, boruak angkhat hîp kan ni alawm. Kâwlkilah pawh awm la i hlatah ka awm tak tak ngâi lovang. I nui ri hre pha lo mah ila i hlim tih ka hre thei tho ang a, i ţap lâi hmêl hmu pha lo mah ila i lungngaihnaah ka na ve ţhin ang. A rei dâwn lo va, inţhen lailâwkna hian intawn leh hun min nghahhlelhtîr ang a, chu inţhenna vêk chuan min la intawntir leh ang" tiin ka sam a chûl heuh heuh a, a thusawi tâwi tê chuan ngaihţha taka min awmtîrin, kal lo tura ka duh lutukna pawh tlêm chuan a zia ve ta deuh e.
"Kal la, mahse hmuh zeuh zeuh tur tal awm ang che. A khât tawkin min rawn kan ve ţhin la, eitur rawn ken kher a ngâi lo. Zân dar kaw break lai velin rawn luh rûk dan i ngaihtuah ţhin dawn nia. Rawn exam ngei ngei la, Sir Muanzuala hawi lawl lawl theihna tur khawp result ţha tak neih tum ang che." Tiin ka thlah ve ta nge nge! A tello study camp erawh a khawharthlak ngawt ta ve ang!
Kil hnih aţang ngawtin khawharna leh lunglênnain min luhchhuah vêl a, u Arona lah a reh rei tawh! A duty hun turah pawh a rawn kal ngâi ta mang lo va, zirtirtu hman remchâng apiangin a hmun âwl an rawn hnawhkhat ţhin. Châmi takngial pawh a unaunu ni ve bawk mah se chanchin a hrilh ngâi bik lo va, Sunday-a a haw châng pawhin u Arona chu a ţhiante inah a riaka chaw a ei nghâl tih thu bâk a rawn keng lût ngâi chuang lo.
Tu zawk nge ka ngaih tih erawh ka hria! Kum têl tehmeuh ka lo ngaihzâwn ve tawh mipa chu a bûk a rit zâwk lo thei lo va, kan inţhen dan lah a tâwp chiang bik si. Op-a chu nakin maiah ka hmu leh ang a, inbiain titi khawchâng kan sawidûn leh ang. U Arona erawh a ni ve lo, lo hmu leh ta pawh ni ila inbiak a remchâng tawh lo ang a, hmelhriat loh mai kan ni tawh ang.
Mahse heihi ka ngaihtuahchhuak ţhin, chapo taka min hnâwl zan kha! A hmalam hun chauh ngaihtuaha kei min hnâwl dân kha ka theihnghilh ngâi lo va, kei chu a mamawh ni lova a duh chauh ka nihzia min hrilh lâi kha rilruah a thi thei tak tak lo. Hmasial taka min hnâwltu, hmangaihna dah zero êm êmtu mipa a nihna khân a laka ka beiseina a chhêm dâi tial tial a, a hmêl hmu leh chiah ila a thar leh hluai maithei thung! Ka hre lo le.
Mihringte hi chu kan lo mak êm a! Vawitam thuthlûkna kan lo siam tawhnaah pawh hian vawitam kan lo tlu leh ţhin a. Beisei a bona dinhmunah pawh beiseina chhetê tal kan zawng hmu leh tlat ţhin! Mihringte ai mahin hmangaihna hi a mak zawk lehnghal! A reh ta emaw kan tih te kha an lo ri leh hluai zel a, an thâmral ta emaw kan tihte khân thinlung hmun ril leh kilkhâwr ber an lo la luah reng lawi a, hmâ kan sâwn san viau emaw kan tih laiin, awmhmun ngâiah bawk kan lo la awm si ţhin. Chu chu hmangaihna ka hrilhfiah thiam dan ber a ni.
Exam hmain kâr khat chauh kan nei tawh a, Chawlhni tlâi anih avangin Sikul lam panin ka chho hnak hnak a, Office kawta U Arona lo ţhu rân ka va hmuh chuan ding datin ka thlêk vang vang a, teh hlawl chuan! A reh rei tawh tehlul nen engah nge a rawn lan leh hlawl chu le? Ka lungphu te lah chu! An inthumrawn tlut tlut a, hmuh châk leh beisei taka a ruka ka lo nghah ţhin mipa ka hmuh tâk vang anih ngei ka ring.
Kamis vâr, a duma spot pheuh pheuh leh Smart pant dum a ha a, sneaker a dum leh vâra ţial bawk bunin a sam chu a chhîpah a thur deuh bam a, kan awmna a inhnaih hauh lo chungin chutiang te chu ka hmu kim vek hman nia mawle!
Inthing naka kalsawn mai ka tum lai chuan min lo âu lauh a, "Lo kal lawk teh!" A la ti zui!
"Ka hmanhmawh deuh a" ka tih mêk laiin amah zawkin min rawn pan a, "i hmanhmawh pawhin ka thusawi tur hi i ngaihthlak ngei ngei a ngai. Zanah Op-a a lo kal dawn a, rei a awm hman dawn loh avangin tea break-ah in inhmu thei ang. Mahse a khawlo zâwng leh mawi lo zâwnga chêt ka remti dawn lo va, Zirtirtu dang beng a thlen loh nan fimkhur ang che" tiin ka dârah a rawn bêng thek thek a, hepa hian Op-a nena kan inhmuh theih nan rem te min lo ruatsak vel a maw? A awihawm loh zawk!
A châng leh min kalsan hreh hmel deuh deuhin a ţawng a, thu a sawi kual vel vak vak a. A châng leh mipa dang nen min thlah fâl a tum leh ţhin a. Hetiang mipa mize danglam lutuk hi ka damchhung zawngin amah bâk hmelhriat ka la nei lo! Mipa ka hriat tawh azawngah a la ngaihzâwnawm lo ber ang chu! Chuti chung chuan ka thlah hleithei lo va, mihringte hi chu kan lo mak takzet a ni.
Miten tlâwmthlâk an tih ngawih ngawih tur khawpa tlâwmin a lakah ka inphah hniam fo a, tlâwm ka inti phal tak tak ngâi si lo.
Hringnun leh thawnthu hi thil inhnaih tak, hrang hlak si a ni tiin an sawi ţhin a. Keia nunkawng ve thung hi chu thawnthu nen a inhne chiat a, ka hringnun thawnthu hi a tak ram nen a inpersan thei tak tak lo!
An tleirâwl laia duh leh âtchilh tak nei, chhan eng emaw vanga rem thei lo, star loh an tuma lo star tawh laklawh si, nun laklawh taka awm ţhin mî ka hre nual a. Anni leh keia nun thawnthu chu inrem tak a ni.
Hmangaihna zinkawngah hian inngaihzawnna te, inneihna leh chhungkaw din chauh kawng zawh tur a awm emaw titu chuan a chhût sual let dêr ka ti ve tlat! A rûka ngaihzâwn em em kan neih lâi, rem lo chung chung pawha suangtuahna âtthlâk tak tak dawhzawma kan hlimpui ţhin lâi, ngaihzawng min han neihsan tâk avanga kan lo nat ve ngawih ngawih lâi te hi kei chuan hmangaihna zingkawngah ka chhiar tello phal lo!
A thianghlim a, a hlimawmin a lungchhiatthlâk viau thei ve tho a, nuihpui tur tam tak a awm laiin ţahpui vawng vawng tur nen lam a awm ve zel bawk. Hmangaihna bul inţan nan hei aia pawimawh leh hlû hi a awm bikin ka hre lo. Chuvang tak chuan a ngaihhlutawm a, hmangaihnaa chhiar tel ve loh atan chuan a uiawm em mai. Kei chuan ka chhiar tel zel dawn. Midangte nena kan love line a lo hrang ta deuh bik anih pawhin a pawi lo. Hmangaihna chu ka nei ve tho a, ka lan chhuahtîr dan a dang deuh bik tihna a ni tawh mai.
"Ngawi vung vung suh, i hmanhmawh kha phei tawh rawh" tih thâwmah chuan harhchhuak phutin ka mit ka la sawn rang hlê a, ka kâ pawh chîp rang tak ka ni!
Suangtuahna mak pui pui nena ka thinlunga thu awm ka kawm malh malh lâi khan a mita en chungin ka lo âng phiau tih rêng ka hre lo! A kiai suk hmêl chu rei en duh lovin ka inhersan a, dorm-a ka luh leh thleng chuan ka pangngai hleithei lo reng reng. Ka ni deuh hûih a, Op-a rawn kal tur pawh ka phûr pui hleithei lo. Rilruah u Arona mawlh a awm a, min tina em em chung pawha ka la ngaihvenzia te hi hria se! Nge ni a hre reng chungin min haidersak leh hrâm zawk?
"I ât hmêl hêih hûih reuh lutuk, zir rawh thiam mang i la neih loh kha!" Rizaia inkhuhţha mawlh mawlh chunga Châmi'n atih chuan mitkhap fak fakin a mutnaah ka inthawlh ve a, Chawlhni tlâiah chuan hun thâwl min pein a duh tan a mut theih ţhin a. A taima fâl leh thiam la nei tlêm deuh hovin lehkha te pawh an zir ve ţhin. Keipawh thiam nei tlêm tih takah ka zir ve ziah a, vawiin tlâi erawh a mood-ah ka chêng hlawl lo. Muhil ve hmak ila a zia maiin ka ring.
Engmah sawi lova ka ngawih vang vang laiin Vanlalchâmi chu a che sek reng a, duh ang pawhin a mutthilh theih loh!
"Che reng suh" ka tih lahin, "ka hnungzângah hian phûrthak ka kâia inhiah ka ngâi alawm" a ti bak ve hlar zel a, a châng leh ka han hiahsak leh rih ţhin. Sunday tlâi nih man a awm lo kher mai.
"Enteh, zanah Op-a a lo kal dawn asin" kan mutthilh theih tâk ngang lohvah chuan ka sawichhuak ta nge nge a, a che hrut a, ka lam hawiin a rawn inlet nghâl tap bawk.
"Eitur a rawn keng hrim hrim ang. Ka phûr tawh e, a rawn ken chuan min pe ve ang che, mahnia lo ei zawh te kha i tum vel ange" tiin min rawn kuah salh salh a, "i zaktheilo em mai a" ka lo ti chu a la na khawp mai.
"I zak lo fê zawk. Ngaihzawng neih tâk vang maia mahni bestie te thlahthlam han tum nghâl! In inngaihzawn dawna hmâ laksaktu cheu pawh kha i theihnghilh ka phal miah lo" a ti pâng pâng reuh a, a tê ve sia a hmêl leh pian hmu lo tan chuan a hlauhawm ve reuh maithei a ni.
"A rawn keng kher lo ang. A awm rei hman dawn lo a, sawi vak tur pawh ka hre chuang lo. Op-a hi ka duh ve dawn dawn ţhin a, mahse maw, dik tak chuan u Arona hi a tla na leh zel a. Duhthlan ngaihna ka hre lo han ti dawn ila thinlung hian u Arona a thlang zel ka ti mai. A hrehawm ka ti. Op-a lakah ka inthlahrung bawk a, hetiang teh thlâwta min duhtu ka sawisa kual vel mai mai hi a suahsual thlâk ka ti bawk sia. Ka nun hi a buai vel vek a ni mai" thâwlâk hak paha tiin ka kuahlêt ve salh salh a.
"Lalbuaivêlveki i nih chu" min tih chuan ka pawm viau a ni.
"Tak takah, Amah hi a nangmah reuh ka ti. I duh chu neih ngei ngei i tum ang hian a duh chu neih ngei ngei a tum ve tho a. In inanzia hi sawi maia fiah chi ni pawhin ka hre lo. Mahse mize inang deuh chu in inkawprem leh chuang miah lo a. Mahse u Arona hi chu beisei buai tawh lo law law rawh i hlim zawk ang. Anni ang chu an puitling tawh lutuka an duh duh danin keini ang rual te chu min bum kâwi thei ang. Tiang vel chu ania thlah daih a ţha zawk." Thutak deuh zawka ti lehin thâwk a la hap a, hetiang thu hi chu a sawi zing tawh a, dik ka tihzia keimah ngeiin ka hrechiang bawk.
Mahse ka hriatchian tluk zeta pawm ka harsat erawh ka thiam loh ni tawh bikin ka hre lo a, hmangaihna thiam loh tiin ka puh thlu tawp tawh! A mak ve bawk êm asin!
Zanah u Arona sawi ang ngeiin Op-a a rawn kal a, thingpui in chawlh kan neih lai anih vangin school hnunga tanky bulah min lo nghak a. Midangin an hriat loh nan kawrlum lukhum lian deuh nei a rawn ha nghe nghe.
"I rawn kal tak tak ka lo ring lo a" tih paha ka pan phei chuan rawn inher vutin, "Sir Arona hnenah chiang deuhin ka chah kha" a lo ti a. Chiang deuhin a chaha min hrilh ngei bawk a, a rawn kal pawh ka ring. Sawitur ka hriat loh vanga zawt ka ni mah zawk.
"Lo kal teh. Sawi duh ka nei a" ka lama a bân a rawn phar tâkah chuan zâwi muanga pan pheiin a sîrah ka ding dat a, kan chhaklam chu ramngaw vek anih avangin rannung hrâm thâwm a ring angreng.
"Mipa i vei em em, ka laka rilru tluantling i put theih loh chhan mipa hi ka hria tih sawi ta ila engtiangin nge i dawnsawn ang?"
"Eng maw?" Ka ti hluai a, rang fahranin ka melh chho hâw bawk!
"Hlauthawng suh khawiah mah, tu bulah mah sawichhuah ka tum lêm lo. Mahse, ani ka ni lo erawh pawi ka ti. Lo intawng hmasa ila ka ti bawk. Ka ngaihtuah a, ka ngaihtuah nawn leh ţhin a, pawi ka ti tulh tulh zel a, mahse i thusawite ka hriatreng ţhin avangin bansan che ka phal chuang lo. Nghâk tur chea min ngenna kha ka hre reng ţhin. Ka hmangaihzia che ka theihnghilh ngai lo bawk a; Sawmzel, tu chiah nge maw i niha hetiang khawpa ka thinlung i kawihher theih mai le?" Ka dâra rawn hmer vang vang chungin a ti sup sup a. Ka khawngaih lutuk ringawt!
Chhâng lova ka ngawih reng lai chuan aw thian kharh kharhin, "Mipaah pawh pa ve tâwk tak, min duh lotu chu kalsan hmak hmak ngam kha ka ni ve ţhin a, i zûn phurh erawh a nâ aniang heti khawpa bansan che ka hreh theih danah hian. Sir Arona te meuh kan khing hneh lo anih pawhin i rilru dam hun tal ka nghâk ang a, ka nghâk chhuak bawk ang che. Rilru lamlêt tawh ngai lo turin ka siam ngei bawk che ang a, i tana mipa ţha ber ni turin theihtawp ka chhuah bawk ang. Tunah rih chuan a hming chauha ka tâ i la ni a, nakin lawkah erawh ka ta i ni pumhlûm ang. Beiseina sâng tak nen ka nghâk reng dawn che a, ka beiseina hi min tih beidawnsak loh hrâm ka beisei reng ang."
Rawn kûn hniamin ka biangah a rawn fâwp zauh a! Hetia min fawhna hi ngâiah ka neih hleithei lo.
U Arona zawk ni se tiin duhthu ka sâm hman leh hrâm pek a, ani chu ni se lâwm luatah ka let tawp tawp thei ang!
"Malsawmzel! Khâ rilru kha pu tawh reng reng suh, tiang vang hian alawm tun thlenga i la theihnghilh theih loh ni. Midang tupawh amah nen i khaikhin zel a, amah ni zawk se tiin an inkârah bûklung i khâi zel a, a bûk a rit zawk lo thei si lo. A tawpah theihnghilh harsa i tih thu i sawi leh a, hmangaihna thiam lohah te i puh vel thûl. I thiam loh liau liau a ni" tiin keimah leh keimah chu ka inhâu ru mawlh mawlh a.
Tun atan chuan Op-a hi a tâwk. Midang tellovin, kan pahnih chauh kan ni a, hmangaihna chhiarkawpah hian pakhat leh pakhat belh pathum kan nih a rem rih lo. Ka bianga min fâwptu chu Op-a a ni a, u Arona erawh tlâwm vawng vawnga min siamtu ve mai a ni! Theihnghilh mai a phû lo va, hriatchhuah châng apianga huat zui vawng vawng a phû!
(Comment hnutchhiah ve leh hrâm la tiraw?)
End of chapter - 28