"Min thlah I ngaih kha aw" tih pahin room ah a lut zui nghal a, ka thlah dawn tih te chu ka hre ve reng a, ka theihnghilh a hlau ni berin ka hria.
"Hei hi ha ila a ṭha ang em?" Tiin a thawmhnaw ho chu a enkual a,tukin chu eng nge maw a hriat le?
"I duh duh kha ha rawh,a ṭha vek"
"Hei hi kan ha teh ang" tiin kawrfual a la chhuak a, a hak zawh chuan ka chek hlak. Saw tiang hna thawhna ah a hak chuan damlo abikin mipa phei chu an dam var var ang! A ngawng vâr thianghlim zet chu sawi loh a awm bawr tawn tir pawh a lang pha vek!
"I kawr kha thlak teh"
"Kha..I duh duh ha rawh I tia,ka hak zawh ah inthlak turin min ti leh a" tiin a thil inhnawih lai chu a dah ri hrawk a, tichhe chiah se chuan min puh leh vek ang!
"A nghawng zim zawk ha rawh!"
"Inhmeh ka lo inti ve asin bakah awmpuinu emaw te min ti hial a, ka inchei ve deuh tawh dawn" Tih leh a sam siamna nen a sam siam a rual a, tuk dangah te chuan tihkir te chu sawi loh a hnawng chung te'n kal ṭhin kha nia.
"Keiin ṭha ka ti che chuan a tawk mai alawm,inchei vak pawh I ngai hlei nem chuan kawr kha thlak rawh"
"A teuhlo! Ka ha dawn tho tho"
"I thlak loh chuan ka thlah lo ang che,ka kal dawn a nia" tiin ka inher vut a.
"Ka thlak dawn!" Rin aiin a sawi rang phian, nui suka ka melhna chu rum em emin min melh thung. Keimah ngeiin a hak tur chu ka thlan sak a, a ner nawng mai a ni.
A hmai a chei chhungin door bell a ri a, hawng turin room aṭang ka chhuak zui nghal a.
"I inpeih tawh ami?" Kawngka ka hawn rualin Rekha in a rawn ti lang lang a, a ri hlut zel mai.
"Ka hna ah min hruai dawn!" Ti ri ah chuan hnunglam ka hawi a, kan lam panin Sangpuii a rawn phei nghal.
"A lo ni maw?A pawi hlei nem,tlai ah kan haw rual leh thei tho a" tiin kei chu min melh a, pakhat lahin ka banah rawn kuah nghalin min uai ti tih a.
"En teh ka pasal hi duh aiin I hnaih mah mah I ti ve em?A tello in kha chen class ilo kal tawh a, chutiang chuan kal chhunzawm zel ta che tiraw?"
LAWMSANGPUII POV
Ka hma a zam hauh lo a ding nu chu ka melh ve kar.
"A lan dan chuan Sp thil hriat sual I neih a nih hmel, mi pasal em duh tur khawpin ka mit a hniam bik hlei nem. Rema te chu ṭhian angin ka en a,building 1 a cheng kan ni bawk nen a remchang ka tia, ka kal mai alawm...I rilru a tê lutuk emai" tiin a nui suk a,a nui hmel te chu ka tan chuan ngeiawm tak a ni.
"Nanga vai rilru ai chuan a zau zawk!"
"Huh ka awih thei lo,lehkhathiam tak I ni emaw ka tia, mi hnam hmusit ching ilo ni maw?I hniam reuh zek mai"
"Rekha a tawk, chhuak tawh rawh chuan ka nupui ṭawngkam vangin ngaihdam ka dil e" Remsanga'n a tih chuan fel ber leh rilru zau ber awm ang zia zangin a nui sang a, a awmdan leh hawiher hrim hrim hian Remsanga hneh a tum tih chu ka hrechiang lutuk tlat.
"Ngaihdam dil a ngai reng reng lo, a zia a thup mai mai a nih hi"
"A pawi hlei nem mahse Rema ani ang nupui I neih hi chu ka khawngaih ngawt mai che..ka kal phawt ange" tiin a chhuak nghal a, eng maw a sawi kha? Kei ang hmeichhia nupui ah a neih vangin a khawngaih vel a maw?
"Hmeli mai mai chu" Zui chhuah ka tum lai chuan Remsanga'n min dang leh tlat a, ka tal chiam ringawt.
"Min thlah teh! Mi pasal melh ngam tawh lo turin kan zirtir hlak ange"
"I buaina a ho emai! I ṭawngkam lah a chhe si, lo haw ta se engtin nge nih anga?" Aw ki pangngai taka a tih chuan rum lutukin ka melh nghek. Kan inhnialna ah khan ka ṭawngkam chauh maw a lo chhinchhiah?
"Duh leh haw rawh se, ka hlau ther te lo" Room lam ka pan nghal a, zing aṭang ka mood a tichhe vek. Zoremsanga pawh hian a ṭan lutuk a, a ngam pa vek tawh a nih hi.
Insiam thuai thuai in ka bag ka ak a, mahni paw'n ka kal mai ang.
"Lo ding teh,ka thlah ang che" In aṭang ka chhuak chiah min rawn um pha a, ka banah a chelh run bawk.
"Ka duh bawk lo" tiin min vawnna chu ka thingthla hlawk a,a rum nghut.
"Luhlul viau suh,ka thlah ang che"
"Zoremsang I thlah ka ngai lo!" Ti tuarin elevator inhawng ah chuan ka lut nghal a, a inkhar dawnah pawn a bawlhlawh bawm kan dah chu a chhir zui chu ka hmu a, chhir chhe vek rawh se.
In lama buaina neih a hna kal chu ka engtih mah a nuam lo! Ipik ṭunin damlo te ka en a, ka mimal thilin hna a tihbuai hi ka duh ngai lo mahse tukin chu min tibuai tawh a nih hi.
Cabin a ka ṭhu mai mai pawh chu ka chau hluah hluah! Dar 1 aṭang emergency in naupang ka zai a, zai dawnah pawh a la tal fat fat a, a hlei vanga insawh a nih ka ring bawk.
"Scalpel min lo pe rawh" Ka sira nurse ding hnenah chuan ka hrilh a.
"Lancet ka ti lo!Scalpel I hre lo em ni?" Ka vin tuar a, awm ve ho zawng zawng chuan min en dawrh mai. Scalpel ka ti mawlh mawlh a lancet min lo pe hram a nia, mawlh leh lutuk. Ka vin chak vang hrim hrim pawh a ni lo, zai kan ṭan dawnah pawh a lo chiu sual leh a, ṭul lo ah naupang thi a tichhuak ringawt tawh bawk.
Dar 3 rik dawnah kan inzai zo a, naktuk aṭang zai pangngai kan neih dawn zui a, a hahthlak dawn hle mai. Ka haw a, in ka thlen chuan Zoremsanga pawh a lo awm reng a, class a kal lo nge a haw hma zawk le?
Ka thawmhnaw te thlakin inbual hma tiin fridge hawngin in tur ka insiam a, eirawng bawlna tur tui ka la lum lo tih hrechhuak lehin kitchen island ah ka thei tui chu ka dah a, tui chu ka lum nghal zat.
"Khaw nge?" Inherin ka thei tui in mek kha ban ka tum a,a lo awm tawh hauh lo.
"A va tui reuh e" Titu chu ka melh haw a, no ruak chu tui khawihna ah a dah nghal a, a lo in zo vek a nih chu! Chu pawh tui ka lum chhung lehnghal!
"Ka thei tui I in ringawt a nia" Siam sa pawh a ni lo, ka mix nasat nen a.
"Insiam leh mai rawh" tiin room ah a lut zui hmak a, a awmdan chu ka ngei takzet.
In siam buai peih tawh lovin chaw chu ka chhum a, ka tum burin ka ring! Eirawng bawl laklawh laiin ka ril a ṭam leh tlat a, bawl pahin chhang leh bawnghnute te ka in leh phawt a, tiang hian ka awm ngai pawh ka hre lo. Puar thleng chuan ka ei a, keimah ka ni lo emaw ka ti hial. Chaw ei dawnah chaw chu ka ei thei lo ta reng a, Remsanga'n ka titau emaw a tih phah hial.
"I zir dawn lo ami?" Khumah ka mut laiin a rawn mu ve ringawt a, zan dangah chuan tun ang hun hi lehkha a zir ṭan lai a ni ṭhin a, zanin erawh ka mut rualin a rawn mu ve hmak!
"Umm ka chau lutuk a,ka zir peih thlawt lo" Mut thlak pahin ka dulah min rawn kuah nghal zat.
"Zan dangah I meng rei ṭhin sia, chumi vang chu a ni ang" A sa hmin lai chu dim te tein ka ṭham sak a, hahdam hmel takin mit a chhing chial bawk.
"Tihian zaninah I bulah ka mu anga, ka dam sawng sawng mai ang" tiin min kuahna a tinghet salh a, awih lo lutukin ka nui har har bawk.
Ka bulah a mut ringawt vanga a dam thei a nih chuan a mak hle ang!
Gynae doctor bulah thla tin in check up in ka kal ziah a, ka taksa a in fit tawh thu te min hrilh a, hma ka sawn chak thu min hrilh bawk. Damdawi eitur min chawh te pawh a tlem tial tial a, tunah phei chuan chi 1 chauh eitur a awm tawh.
Remsanga pawh class a kal nitin a, a rawn chau thei khawp mai! Rekha nen paw'n an la in kawm a nih hmel a, kan inah erawh a rawn kal tawh ngai lo hrim hrim.
Ka awm a nuam lovin ka chau ngawih ngawih a, ka thin a chhe em em bawk! Ka thinchhiat vangin Remsanga nen paw'n kan intithiam lo hial tawh. Thil ka dahna hmun min zawt a, ka hrilh hnuah a hmu lawk lo a,keilahin vin hrep inpeihin ka chang reng a, vawi 1 chu ka vin nghe nghe! Ani lah mipa inla pa ve tawk tak a ni a, hmeichhia zawkin ka vin chu a pawm thiam lo deuh a,'Vin ziah suh!A dawngsawngtu nih reng pawh ka ning' a ti ve hrawk a,chumi tlai phei chu biak pawh kan inbe lo!
*Tinge vawiin ilo kal lo a?*
*I dam lo ami?*
*I awm si lo a, class kal pawh a nuam lo* zawngte hmai hup a rawn dah tel a, phone lock screen ah a lan vek vangin ka hmu chiang ngang mai. A hming ka en chuan thinrim luatah bathroom aṭanga lo chhuak mek vawm nan ka hmang nghal a! A inring bik si lo nen a dar ding lamah fuhin phone chu chhuatah a tla ri chuai a, a hmai vel a keh ngei pawh ka ring.
"Eng nge ni leh ta?Ka phone i tihchhiat ringawt le" A phone chhuat ami chu chharin phone screen keh chu a en a, a on a, a nung thei mahse a screen a chhe nasa lutuk!
"Tinge kha vainu kha ila biak?"
"Ka be lo!" A message ka hmu hnuah pawh a la pha ngam a nih chu!
"Dawt min hrilh tawh suh,inla inkawm zui zel tih pawh ka hria"
"Ṭhian satliah alawm! Ṭhian angin en ve mai ta che, a fel a, ani paw'n kawm ve a duh che a, nang lah chu i vin chiam zel a,tuma'n an kawm tak tak peih lo ang che!"
"Ka kawm ang maw?Huhh ani kawm ai chuan ṭhian neih loh ka thlang zawk!"
"I kawm duh lo paw'n ṭha takin be ve mai rawh. Ani a nih vangin thik tur 1 mah a awm lo,Lucy ka kawm ang hi a nimai. A bak engmah a awm lo" A vin tawh lo a,ṭha deuh chuan a sawi ve mai a mahse kei chu ka ni ve lo,ka sa zual sauh.
"Lucy en danin en ve che se lang ka hrethiam ang,mahse a en tlat lo che! Ka thik tih I hriat te chuan kawm ve lo mai ta che! Ani ṭan zawng hlirin I ṭawng a,in inngaizawng hial em?" Ka au a ni ber! Ka hrawk pawh a thip hlur a, ka mittui ka biangah a luang thla nghal pap.
"Lawmsangpui ka ning ta hle mai! I ṭawng leh a nih chuan ka beng ang che!Thil vawi 1 mah tichhe tawh bawk suh" a ti hrawk a, kei ai naupang zawkin benah min vau a nih chu!
"Ka duh duh ka tichhia ang,ka lei vek anni tho alawm!" Ka thusawi chu ka sawi zawh rual rualin ka inchhir chawpchilh nghal! A hre pha ve bawk! A phone chu humin chhuah a tum a,chhuak lawk lovin min hnungchhawn zawng chuan a ding reng bawk.
"A ṭha, I lei zawng zawng chu I tichhe thei alawm, hei pawh hi I lei a ni tak e" tih leh khum lam rawn pan a rual a, phone chu khumah nghat chawrhin a bday a ka tshirt pek a hak mek chu a phelh nghal a, mittui kar aṭang room a chhuahsan chu ka en reng bawk.
Khumah chuan ṭhu thlain ka thusawi ṭul lo zet vang chuan ka sam chu ka ṭham vak a, ka au chiam bawk! A thusawi ai chuan a kawr hak lai ngei phelh a min dah khum khan min tinâ takzet.
Tho vatin room aṭang ka chhuak a, pawn chhuahna kawngka lam ka pan nghal zat. A chhuah daih ka rin vang a ni mahse a in lock thlap a, ka thaw huai bawk. Room lam ka pan a, a lehkha zirna room ah chuan a awm lo nghal pang. Room lehlam hawn leh ka tum chuan a lo inkalh tlat a, ka kik dawt dawt.
"Remsang lo hawng teh"
"Ka tihpalh aw?Kawngka lo hawng teh khawngaihin" Mittui hru mawlh mawlh chung chuan room kawngkhar chu ka beng a,thawm a reh tlawk tlawk. Trixie lo kalin ka bulah a rawn ding a, mak tih hmel zetin min melh haw bawk.
"Remsang lo hawng teh" Dar kâr 1 dawn ka ṭhut hnu paw'n a lo la hawng lo a,bang nghengin ka ṭhu a,Trixie ka bulah a bawk than bawk.
ZOREMSANGA POV
Zingah chuan mit kham ṭunin ka harh a, tho chhuakin ka hmai vel ka phih a, khum bul vela beer can let hlawm reng ka hmu chuan nizan thil thleng kha ka hrechhuak zawk! Thinrim ai mah chuan a thusawi duh dan khan a lakah engmah ka nih lohzia a tichiang a, min tinâ hle bawk! Beer in nghekin min auhna pawh ka mang hriat ruai ruai tawh a nih kha.
Room aṭang ka chhuak chiah Trixie rawn tho tharh a, ka phu zawk nghe nghe. Bang nghenga muhil chu ka en a, nizan khan room a pan leh tawh hauh lo tih ka hre nghal.
Thinchhiain ang nasa ṭhin mahse a hnuah a inchhir ziah a, nizan a thusawi vang pawh khan a inchhir tih ka hre bawk mahse mipa ka nihna angin a thusawi khan min ti tlawm a, ka zak bawk!
"Khumah mut tur che lawm" Pawm thoin room lam ka panpui a, harh pawh a harh lo. Dimtein khumah ka mut a, harh chu khawi lam a kâ a tep chiap chiap ringawt. Puan sin tirin room ka chhuahsan a, eirawng bawl lehna hun ka neih tawh miau loh avangin class kal turin ka insiam a, restaurant velah kan inhnawh puar mai a ni ang chu.
Gate bulah ka din laiin parking lamah Rekha chu ka hmu leh a, ani pawh hi buaina min thlentu bak a ni lo! Min biak tumin ka lam a rawn pan leh a,a lo thlen hmain cab ah chuan ka luhsan hmak bawk.
LAWMSANGPUII POV
Ka harh meuh chuan dar 9 a lo hnai tawh a,ka pum a ri ruk ruk bawk. Mak ti deuh chuan room chhung chu ka en a, nizan khan ka mut luh awm pawh ka hre si lo. Puan ka sin thlap danah Remsanga'n min muttir a nih ka ring. Tho sawk sawkin a room hman lam ka pan a, a lo awm tawh miah lo. Bathroom leh balcony ah pawh a awm chuang lo! Chahbi dahna ka en lahin chahbi chu a awm reng a, khawiah nge a kal daih le?
"Khawiah nge I kal a?" Ani hi ka thusawi vang khan thinrimin min chhuahsan daih a ni ang. Ka ngaihtuahna vang chuan ka mittui a rawn tla leh a, tunlai ka awm dan hi ka hrethiam bik lo. Chhan awm lovin ka chau em em reng a, ka thin lah a chhiain mi ka vin reng a, ka period lai bakin ka thin a chhe ngai lo asin le? Ka damdawi ei vang a nih ka ring ta ber a, doctor chu hmu leh ngei ka ngai. Inbual sawk sawkin ka insiam nghal a, chaw pawh ei lovin hospital lam ka pan a, ka cabin lam pawh pan hmasa lovin dr Shweta cabin lam ka pan a, inentir an lo awm lo hlauh.
"Hei hian va in test la tiraw dr?" A tih chuan mak ti deuhin dr Shweta chu ka melh ringawt. Ka awmdan engkim ka hrilh a, ngawi renga a ngaihthlak hnuah pregnancy test kit min pe ringawt a nih chu!
"Dr hei chu a ni dawn ami?"
"Test phawt la tiraw?" A tih tlat vang chuan amah toilet ah chuan ka lut a, in ring lo deuhin ka in test a, thin phu dup dupin test kit chu ka en a, a lan dan chuan ka rai!
"Woww congratulation!" Result a hmu chuan min kuah chuk chuk a, ka la ring thei chuang lo.
"I awi thei ngang lo a ni maw? Ultrasound ka tihsak ang che" tiin mutna lamah min kai phei a, ka kawr hlimin ultrasound tih dawn a an hnawih ṭhin gel vawt thler chu min hnawih a, khawlah chuan a en nghal zat.
"Helai hi naute chu a nia,thla 1 leh chanve a ni tawh lehnghal" a ti leh zel a, thla hmasa ka period lo tih ka hrechhuak ve chiah.
"Ka lawm lutuk a nia aw dr"
"Pathian vang vek zawk alawm, ka tih theih engmah a awm hlei nem..ka lawmpui lutuk che aw" Roman catholic a ni a, cabin chhungah pawh Mari thlalak a tar nghe nghe.
Ka cabin a ka awm hnu paw'n ka za cheng maiin ka hria, ka dul puar pawh la puar lo chu hlimin ka en leh ringawt ṭhin. Remsanga hrilh tumin ka call a, phone pawh a keng lo tih ka hre leh chiah. Remsanga ka hrilh hma chu tumah ka hrilh duh lo avangin Amy takngial pawh ka hrilh ta lo.
Ka thinchhe em em te,Remsanga takngial pawh ka milh theih loh chhan te kha ka rai vang lek a nih chu!
Remsanga hmu atan tiin pregnancy test kit ka lei haw a, kan pahnih inkar pawh a siam ṭhat ngei ka beisei.
Inbual pahin ka in test a, a positive leh tho! Ka khi vur vur reng a, thla tlem te mah ni se mihring tak tak angin ka be hial tawh.
"Babe thil hrilh tur che ka nei" A lo luh rual rualin ka lo be nghal sawk sawk a, min melh run bawk.
"Eng nge?Nizan thil bawk kha i rawn ṭan loh ka beisei" A tih chuan ka nui tawp riai riai a, engmah ka sawi hma a chutiang zawnga a ṭawng ringawt chu ka la nâ ve det.
"Theihnghilh rawh engmah a ni lo" tiin chola lam ka panin ka kal daih a, hnung lamah a thaw ri hrawk.
Ads click