Politician nupui

[Cck Lalchhuanawmi]

Politician Nupui Hring Nun
Political Love Story_Fiction
Chapter-11
Ziaktu: Cck Lalchhuanawmi



A hlauhawm ṭan tlat, a mizia a inthlak hlawk hlawk a, hriatthiam a har. Psycho an tih ang Pasal te hi kan lo nei ru reng ang tih te a nia ka hlauh tawh.


A tuka Freddy-a pang a sat em avangin Siamtea pawh School-ah ka thlah thei lo.


Damdawite ei tirin, a bulah Lal Fanu nen kan mu ve a, Lal Fanu a muhil thei si lo, a ṭawng char char.


Freddy erawh a muhil a, Damdawi hnathawh langin a thlan bawrh bawrh.


Bathroom chhunga awmtir ka tum a ni lo, Sammy ṭawng lo se chu ka awmtir miah lo ang.


Sammy-a ṭawng chhuak kher kher khan min tithinrim em a ni.


A thu zawh dan lah kha, a ṭul lo ber ang.


Hnahthiala ka nu leh pa te nen kan inbe tawh bawk a. Ka hrem dan chu an ngaithiam lo hle.


"Ka fapa a nia, a ṭhatna tur atan chauha hrem mai ka ni e", ka ti a.


Sawi theih an nei lo, a chhiatna tur atana hrem pawh ka ni lo.


Sammy pawhin engmah a sawi tawh lo. Freddy-a entawn chu tumahin kan sawi chhuak tawh lo a ni ber.


Hun liam zelin, Siamtean Pawl a sawn a,,Freddy erawhin a bawhnawn ta thung.


Lal Fanu pawhin School kal a châk tawh khawp a, a kum a la tam tâwk loh tih avanga kal lo mai a ni.


Kum ruk emawah School ṭan chauh se a ṭha.


Sammy chu a zin chhuak deuh reng mai a, School chawlh laiin kan zinpui ve ṭhin.


Bial a zau a, khua a tam bawk nen. A phone lah a ri reng bawk.


File a inchhawp nasa bawk si.


Session an zo chiah a, School chawlh a ni bawk a tiin, kan chhungkuain Bial kan fang.


"Pu Sammy-a te chhungkua chu in mawi mang e", tih hi kan dawng reng a.


Nuih reng a ngai a, harsa ve det. Nui duh takah a chhuah theih mai dawn.


Mahse, Bialah hmasawnna tam tak hmuh tur a awm.


Mi zawng zawng tihlawm theih loh ni mah se, Sammy chuan a Bial mipuite lung a tiawi ṭha khawp.


Inthlan dawt leh atan a huphurhawm loh, a phurawm mah zawk a ni e.


Sammy chu a inthlak leh hlawk a, Lui angin a luang dem dem. Hlauhna deuh pakhat ka neih chu, chik zeta min thlêk vung vung ṭhin hi a ni!


Vawikhat chu ka zawt tawp, "Sam, engvanga min thlêk vung vung ṭhin nge i nih?",


"Ngati mah, i hmelṭha em a", a nui suk a. Min tihlau zual.


Lehlam min hawisanin a muhil zui maiin ka hria. Lal Fanu ka kuah a, thâwk harsa ka ti mang e.


Sammy chu nui suk sukin, a nêm ta em em mai a. Ka pasal lakah inkiltawihin, ka ṭih deuh bawk nen.


Kan inneih tirh angin min ngaihtuah lo lêkin a duh hun hunah min bawh ringawt zel bawk.


Taiṭita nen kan inbiak tam phah.


Amah ka biak tawh chuan ka thawl huai zel a, ka hahdamin thlâ a muang thei ṭhin hle bawk.


Phone aṭanga inbia ni mah ila, ka thlamuanpui ngawih ngawih.


***Chhuanpui, ṭhiannu chhe lo tâwk ka nei asin***


***va han intithei tak*** ka va ti a. A lo nui nasa mai.


Taiṭita nen chauh kan in-text, Sammy-an lehlam min hawisan a, Lal Fanu nen an hnar thlawrh thlawrh tawh.


Zan dar sawm a pêl tawh a, bula pasalte mut laia mipa dang biak a mawi loin a ṭha lo tih hre kur mah ila, kei ngei pawh hian ka duh lo.


A dan a dang tlat, khua a har em a ni.


Chhuanlam a tling lo tih ka hria, Taiṭita chu ka thlamuanpui em a ni.


Sammy ka thlêk a, engin nge a rilru her danglam ka hre châk. Loh theih lohin Manoi rilruin a tinzawn.


Kei aiin a tilawm thiam a ni mahna. An inneihna bakah, an inngaizâwng rei a, Sammy-a chêng man tawh tur reng chu a ni.


Taiṭita chu, ***thawh hma a ngai ṭhin sia, mangṭha mai le*** tiin, min chhân hun nghak loin phone ka dah.


A tuk chu, Lal Fanu nen Dawrah kan kal a, Lehkhabu en fel bakah, chah ngai te ka ennawn zung zung.


Hriati leh Nancy ten Lal Fanu an chhaih a, ka lo hlim ru veng veng.


In aṭanga chhuah zeuh zeuh hi a lo ṭha a ni.


Taiṭita hre chhuak thutin ka call a, "KFC dawrah inhmu ila", ka ti naa, ka inchhir hnuhnawh.


"Pawi ka ti lutuk, ka hman tlat lo, nidangah ni zawk se", a rawn ti a. Min hmu lo chu ka lawm, ka thaw huai thei.


A lo duh ang tih ka hlau.


Siamtea leh Freddy-a te nen in kan thleng a, Nu Papuii a lo kal thei dawn lo a, Puipuii lah a hman lo.


Kan nufa zain ei rawng kan bawl.


Siamtea leh Freddy pawh chu chokaa dawhkanah Homework an zir pah a, Theitui leh Chhang ka chhawpsak bawk.


Siamtea tan chuan a buaithlakna a awm lo a, Freddy thung chu a zir hnu a ni ta si a, a zir peih lo hi a eu ngang ngang tawh mai.


"Anu, ka zo", a ti thuai zel a.


A zir hnu a ni a, hriatthiamawm tak a ni. A zir zoin a thiam zung zung tawh ṭhin.


Zir peih loah a tlak mai hlauin, nawrluih châng a tam.


Sammy chu a hnaah buai hle mah se, a fa te ngaihsak a ṭhulh chuang lo. A mawi tâwkin min ngaihsak ti ila, a sual lo ang.


Psycho, rilrua lainatna leh hriatthiamna nei lo ti dawn ila, a fate a ngaihsak ṭha tho si.


Kei zawk hi, min hua emawni?


A nupui ni ve ta chuan, a ngaihsakna dawn te ka lo duh ve a.


Kei hi, ka rilru a dik lo emawni ka ti tawh.


A hma khan Manoi nen ka hua a, mahse; ṭhatna hmanga hneh ka tum kha a ni a.


Tunah lêm, engtia awm tur nge pawh ka hre tawh lo. Sammy hnena sawi tawp ka duh si lo.


A chhan chu, inring reng leh invêng ran chunga awm ka ngai.


A thinthawk hun tur hriat a ni lo a, Taiṭita pawh hi biak chintawk hriat a ngai dawn a ni.


Reilotê chhung emaw chu, ka nu leh pa bula awm ka duh mang e.


Taiṭita ṭhiannu thar chu Sangsangi a ni a. Taiṭita nena inbiak zat apiangin a chanchin ka hre ziah.


A thinlai lungrukah hmun a luahtir a ni hrim hrim.


Ka biak tawh hi chuanin ka hlim lawi si a ni.


Chutiang chuan kum khat kan kal tluan a, Sammy nen kan inkar a ṭha nge ṭha lo ka hre lo.


A ṭha lo ti dawn ila, a ṭha thoin a hriat si. A ṭha tih tur ni leh chuang bawk si lo.


Taiṭita nen kan inbiak tam phah thung a, kan inhmu zeuh zeuh bawk.


Lal Fanu leh a u te pahnih pawhin an hmu tawh a, an nel a, a bula awm nuam an ti bawk.


Kei ngei pawhin ka pha thei tawh lo, Taiṭita chu ka ngaina ta takzet ta.


Inbunruah nan ka hmang ta zauh zauh, ka pasal nena kan inkar hrilh dawt si lo hian, a thawi hian ka sawi ta ṭhin.


A ṭhiannu Sangsangi a sawi apiangin ka han thik tumhrang zui a, "Kan inhmu ṭhin a, min ngaina ve chuan ka hria. Mahse, nun hlui duhawm lo tak a neih avangin hma lam pan harsa a tih thu a sawi ṭhin. Chumi avangin ka rilru puthmang dik tak hrilh ka ngam lo, engtikah emaw chuan ka hrilh ka ring", Taiṭita chuan a ti a.


Ka chhuat nawt lai chu chawlin, Taiṭita thusawi chuan min tina ka ti mai.


"Taiṭit, tunah hrilh ta mai la, nunhlui duhawm lo tak kan nei ṭheuh mai, chhanchhuaktu i ni thei asin", ka han ti a.


High School-ah a ruka ka lo star ṭhinna zawng zawng ka nei lêt vekin ka hre mai.


Taiṭita chuan, "A sawi hi chu a awl ṭhin alawm", a lo ti a.


"Nia",


"Nang zawk hi, i pasal neihnaah min sâwm duh lo, i timak em mai", a rawn ti leh chu, pasal ka nei tih hriat thartirin ka awm ta ale!


Nghilh dupin chhuatah ka ṭhu thla riai riai.


Pasal ka nei tih hre tharin, ka pasal nena kan inkar zau zia leh, nupa awm dan tura kan awm lohzia leh, pasal nei reng chunga mipa dang laka rilru hrang ka putna zawng zawngte chu, Taiṭitan a ṭawngkam khat lekin min hriat chhuahtir vawng vawng.


Na ka ti lutuk!


"Anu, i ṭap elo?", Lal Fanuin min lo kuah a, ka pawm vawng vawng.


Ka ṭap tih pawh ka lo inhre lo.


Phone banin Thenzawla ka nu ka call, min lo chhân ve leh, "Nu", tiin, insum zo ngang loin ka ṭap khûr zawih zawih.


"Chhuanpui, Matê, engtizia nge ni ta a? Nutling pui, han ṭah hluam mai chu", ka nuin a rawn ti a.


Hlauhthawnna leh min ngaihtuahna âwka bakah, min hmangaihna han hriat chuan min tinôin, min tipangchang zual a.


Ṭah lai ka bâng thei mawlh lo.


Lal Fanuin, "Anu, ṭap tawh suh", a lo ti bawk a. A mit tui a tling piau tawh.


Ka nuin, "I pasal nen in inhau em ni?", a rawn ti ta a.


A thlâvang hauh lehin, "Hau lo e, vawiin chu ka ngai lutuk che a", ka inawihlo.


"Keini pawhin kan ngai lutuk che alawm, nakinah, lo zin leh rawh u aw. Nangni in lo thawh chhuah loh chuan, inhmuh tik ni kan nei thei dawn lo", ka nu âw dam lutuk tak mai chuan min fan raih.


Sammy-a âw han ni zawk se, min kuah ngei bawk se!


"Nu, Sammy bulah ka sawi ang a, Chawlhni hmang turin kan lo kal ang aw",


"Eee, lo kal ngei ngei rawh u. Kan ngai tawh lutuk che u. Chhuanpui, dah tawh ang hmiang, hei, Puan tah ṭan a hun dawn a",


"Aw, Nu, a nih aw".


Lal Fanu hnenah a Pa bula sawi lo turin ka ti a. A sawi lo ve mai.


Taiṭita chu kar khat chhung ka be lo a, a message ka dawng leh nawlh ṭhin. Phone khawih ka peih hlawllo.


Hriati leh Nancy te hian min lo call a, kan inbia a ni mai.


Zan khat chu, Sammy-an min kuah ve tehmial.


Siamtea bulah Lal Fanu a mu leh a, a âwmah min kuah betin, ka lu a tuaiin a khabe a nghat a, a changin ka hnung a chul heuh heuh bawk.


Rang lutuk tak maiin mit tui a chhuak a, ka pasal ngei mai chu nghet takin ka kuah vawng vawng.


A âwmah ka hmai ka phum a, Taiṭita chunga ka rilru dik lo lutuk tak khan min deng dawt dawt.


Sammy-an bum lo tâwkin uiresan a lo hlawh tawh a, kei lahin, rilruin ka lo uiresan ve leh bawk.


Chung zawng zawng ka ngaihtuah chuan min ti â dawnin ka hria.


"Chhuanpui, i ṭha maw?", min tung tho a, muangchangin thâwk ka la.


"Sam, Sam?", a kawr âwmah ka ṭham ṭawk ṭawk, ka hnung a chum dat dat.


A hahthlak a nia.


"Chhuanpui, tui in rawh aw",


"Aih, ka duh lo, min kuah leh rawh", harsa ti fahranin ka ti a.


Tui in aiin min kuah turin ka duh zawk.



"Tui in phawt rawh", a tho a, tui min lak.


A ngaih ṭhat nan ka in sak a, min kuah ta nge nge.


Nghet takin ka pawm vawng vawng.


Khang hun chhung zawng khan ka khua a va han lo har hman tak. Ka ngaihzia ka hre thar bawk.


"Sam, nghet takin min pawm rawh",


"Of course, nghet takin ka pawm che".


Han chhuahchhal zawt zawt tak ka nâp a, mahse; tun dinhmunah chuan a thiam lo zawk ka ni tlat.


Taiṭitan a duh a hmu tawh a, keiin pasal ka nei tawh bawk.


A laka ka rilru puthmang thlak ka ngai a ni.


Chu loah, keimah chauhin ka duh kha a ni a, ani chuan min duh ve lo.


Sangsangi a nei tawh a, lawmpui tur a ni.


Rilru Doctor pan ngei ngei ka ngai ta a nih hi!


(Zawmna)


Zinga ka harh chu, ṭhu chhuakin Sammy ka thlêk vang vang.


Ani hi chu, engtiangin awm mah se, mipa a ni a, mualphona leh hmingchhiatna a nei ve thei lo.


Sawi mam sak zel a ni dawn a, kei hi; tuna ka awmdan hi ka lo ngaihtuah ṭhin ang a ni lo.


Ka lo ten ruk em em ṭhin, "Hetiang hian ka awm ve hauh lo ang", tia ka lo vawn(vawng) ruk ṭhin a ni a.


Sammy chu ka bawh a, che hlakin min kuah ve mai bawk.


Rilru siam thar leh a ngai a ni!


Siamtea leh Freddy-a te School-ah thlah zoin, Dawr lam kan pan. Chawhnua zin chhuak tur a ni a, Dawr min tlawhpui zuai dawn.


Ka nu leh pa awm se chu, Lal Fanu nena zui ka tum nen.
Dawr panna kawngah, "Sam, dil duh che ka nei a",


"Han sawi la",


"Chawlhni hmang turin Thenzawlah kal ila, khawngaihtakin", seat hmaa ṭhu a ni a, darthlalangah ka lang kuau mai si a, darthlalangah chik zetin mi melh kiau.


"Chawlhni tlaiah kan haw leh ang a, Siamtea leh Freddy-a te pawhin School an chawlh a ngai dawn lo a", ka ti leh a.


Hnung lam rawn hawi zawkin, "Zirtawpni tlaiah kan kal dawn nia, Thenzawl khua bik tlawh ka tum hrim hrim alawm", a ti ta a.


Nui sen senin, "Ka lawm lutuk e".


Sammy pawh a nui suk suk. Nupa ni loin, unau niawm kan ni. Ni lo, nau awmtu, a fate awmsaktu niawma mawi ka ni.


Dawr kan thleng a, kan awm rei lo.


Kan haw leh thuai thuai, lehkha pawimawh a ken tur a thliar fel laiin, a thawmhnaw ken tur ka lo thliar sak thung.


"Engtikah nge i lo haw theih ang?",


"Zirtawp zingah, Thenzawla kal turin ka lo hruai ang che u".


Thenzawl boruak hip vang vang ka duh tawh.


Sammy chuan Motor-a a chuan luh hmain, "Noodles leh Kimchi lo ei hlek s'u aw", nui suk chungin a ti zauh a.


Lei ka chhuah tut ringawt.


Noodles leh Kimchi kan va han ei dawn chiang em aw...


Zanah Sammy-an min rawn call a, Noodles ei lai tak a ni a, "Apa bulah sawi s'u aw", tiin ka hrilh hlawm si lo.


Lal Fanuin, "Apa, Noodles leh Kimchi kan ei", a han ti mai a nih kha. A kâ ka hup rang a nia aw.


Siamtea leh Freddy-an, "Kan ei lo kan ei lo", an ti hluai a.


Kan ei dawn tih a hre chiang a, "Tui deuhin lo ei rawh u, in pum a nat chuan ka hau nasa viau ang che u", dam zet hian a rawn ti a.


"Okay", naupang hoin an ti a. "In nu kha lo duat ula aw", a ti leh chu, ka sa chhuak nghal vek.


Siamtean, "Ehhh", a han ti lehnghal a. Sammy-a tak awm phei se chu, zah avangin ka tlu thûm dup thei ang chu mawle.


"In pa thusawi kha in hria maw, min duat hle a ngai ang", inkuangkuah thânin ka han ti a.


An nui nasa mai.


Naupang muthilh hnuah Sammy hnen aṭangin message ka dawng a, Taiṭita hnen aṭang pawhin ka dawng.


Sammy-a message zawk hawngin, ***Naupang an muhil tawh em?*** a rawn ti chu, ***muhil tawh, muhil ve tawh rawh, a tlai tawh hi***


Taiṭita message chu chhun lamah chauh chhân ka tum tawh.


***i ngaihawm lutuk a, ka muhil thei lo*** a rawn ti chu, phone ka thloh lo chauh.


Ṭhu chhuak ngatin Sammy-a message ka en.


***i muthlu a ni maw?*** a rawn ti leh.


***muthlu lo e, min ngai tak tak maw?***

Ka ringhlel deuh tlat.


***Sam, i thawn sual a ni lo maw*** ti ngatin, a thawn sual thu a rawn sawi ang tih ka hlau hle thung.


Sammy message lo thleng thuaiin, ***thawn sual lo e, nang lo biak tur dang an awm chuang em ni?*** a rawn zei vel lutuk chu, ka mutna mattress ka beng hlak hlak.


***Sam, nangmah i ni takmeuh maw?***


***Victoria Secret Brand zinga ka duh ber min hâksak duh ang em?***



***mu rawh, i chau a nih kha*** ka va ti.


A rawn nui nasa ngang mai.


Zanin a awmdan chu mak em a ni. A dam ṭha lo nge, nge ni a, midangin a phone an ruk sak ang a.


Chutiang zawng a ni thei lo, thleng thei a ni lo.


Mi la call zui, phu chiang tak ka ni.


"Nge?", ṭawng ring ngam loin ka phun hluk.


"Nge mah", a rawn ti. A âw ngei a ni bawk si, a dam ṭha lo a nih hrim dawn hi le.


Inenkawl ṭha tura ka hrilhin, "Dam ṭha lo chungin ka rawn haw ang a, ka Doctor-ah i ṭang ang", a rawn ti ta.


A intizei kual lutuk chuan ngaihte lam a tiṭha lo dawn dawn.


Lawmawm rualin ngaih a ṭha lo zawk alawm.


"Muhil tawh rawh le, thawh i hai palh ang", loud speaker-ah ka dah a, lukham hnuaiah, a âw ka hriat theih tho turin ka dah.


"Sam, off suh aw",


"Off lah lo e, i muhil hnar ri ka lo ngaithla ang", ka nui ver ver.


Chutiang chuan, a lo haw hma zan chu call-in kan inbe ziah. Call kan off ngai lo a, zinga a harh hmasa zawk zawkin a harh ve lo kan kaitho ṭhin.


Tleirawl inngaizâwng nen ka intehkhin, a nuam lawi si.


"Anu, Apa a lo haw ṭep tawh em?", Lal Fanuin a ti chu, "Chhunah a lo thleng ang", ka ti a.


"Chuan, Tlaiah Thenzawlah kan kal leh nghal dawn",


"Yess, Thenzawlah kan kal dawn", an unau thumin an zuang awr awr.


Sammy a rawn haw mek a, a lo thleng thuai turah ngai ang.


Epilouge...


Sammy-a chu Aizawl a rawn lut ta a, mahni in lam pan hmasa loin, Restaurant pakhat kawtah chhukin, a chhungah a lut ta a.


Taiṭita, Hriatchhunga chuan a lo nghak reng tawh.


Sammy chuan panin, a hmaah hmanhmawh takin a ṭhu thla ta a.


"Ṭhut rei ka tum lo, ka han sawi zung zung ang e. Sangsangi tia i hmelhriat kha Zothangmawii a ni a, ka nupui hlui a nih kha", Taiṭita chuan a ngaihna hre lo takin a ngaithla tawp ringawt.


Sammy-a chuan sawi zelin, "Tun thleng hian min beisei a, Chhuanpuii nena kan inṭhen theih nan nang hi hmanrua atana hman tum chein a lo bia che a nih kha. High School-a Chhuanpuii i duh rukna kha hman ṭangkai tumin, Chhuanpuiin min uiresan anga lan tira ka ṭhen theih nan ruahmanna fel tak a siam a ni", Taiṭita chu â a meng hra a.


"Chhuanpuii nen in inkarah engthil pawh lo thleng rawh se, engtikah mah ka ṭhen dawn lo. Nang hi a lo thlang ta che a nih pawhin, ka khung bet tlat ang a, tu hnenah mah ka kaltir dawn lo. Chhuanpuii chu khumkhuain ka bulah a awm reng dawn. Chu zawng ni rawh se", a ti a.


Taiṭita chuan insawifiahna hun a nei meuh lo.


Sammy chu tho tharhin a chhuak zui ta daih mai si a. Taiṭita thung chu ngawi rengin a ṭhu ngat ngat a.


A thu hriat zo chauh chuan a ṭhawng hle ni tur a ni.


High School-ah Chhuanpuii chu a duh ṭhin ngei mai. Zirna an zo a, Zirna Run a dang ta nen.


Chhuanpuii biak pawhna tur a nei mai si lo, ngaihzâwng te han nei ve lâwp lâwpin, kum tam hnuah, Chhuanpuiin pasal a neih hnuah an inhmu leh a ni a.


Taiṭita thinlungah a thar ṭha leh hle a nih kha.


Chhuanpuii bula, a ṭhian thar Sangsangi a duh thu a sawi te chu, Chhuanpuii a chang tawh si lo, a inhnemna leh insawitheihna mai a ni.


Sammy-a hnen aṭanga a thu hriat chuan, a rilru ngaihtuahna tizing muai muaiin, Sangsangi chu engtiang takin hmachhawn ta ang maw?


"Duhsak, Zothangmawii inah kal rawh", motor-a chuang lutin Sammy chuan a ti a.


Duhsaka chuan Manoi in panin, darthlalang aṭangin Sammy-a chu a melh leh zauh ṭhin.


Sammy-a chu thinrim hle mah se, Manoi lakah âwka vin a hmang dawn lo tih a hria.


Sammy-a chu rang taka chhukin, Manoi kawngkhar a chum dawt dawt.


Duhsaka mak ti chu, a thinphu a rang ṭhelh a ni.


Manoi chuan a rawn hawng a, Sammy-a hmaisen a hmu thut chu a tawlh hnung dawrh.


"E he! Sam, engtikin nge i lo haw?",


"Infiamna hi titawp tawh rawh. I tawp lo a nih pawhin i thu angin ka awm tawh dawn lo. Kum khat chhung tehmeuh ka nupui khawhar leh mal takin ka siam a, i duh ang chhânna i hmuh phah chuang lo. Tun aṭang chuan, ka nupui chunga thil ṭha lo thlen tir i tum emaw, i thlen tir emaw a nih chuan, ka fa te nu i ni tih theihnghilh ṭhak khawpin ka che ang", tiin, a chhuak zui nal nal.


Duhsaka chuan Manoi a melh zauh a, Manoi mak ti phawk hra chu va bawisawi hman ni hek lo, a Pu Sammy chu a zui chhuak ve ta a.




Lalchhuanpuii pov...

Ni hnih khat lek cham tur kan nih avangin thawmhnaw kan keng âm lo.


Thenzawl kal lohna a rei tawh lutuk a, kawng chhe lai a awm mang ta lo. Hmun ṭhenkhatah kawng siama inhawr an awm tho.


Sammy chu a chau a ni ang, seat hma lamah ṭhuin, seat hnung ngheng ar arin a muhil bawrh bawrh.


Hla kan play bawk si a, naupang ho pawh an mut chhuakin, "Muhil ula, thlen hunah ka kaitho ang che u", ka ti a.


Thu an awih a nia, an muhil thuai.


Duhsaka nen chauh meng kan awm. Hmingi a lawm ngawt ang. Duhsaka a hmu thei dawn a.


An pahnihin ka inbiaktir tawh ngei ang.


Zana thleng kan nih bakah, hrilh lâwk loh kan ni a, an phu nasa hlawm ngei mai. An nui ṭhaw.


Chaw ṭhing ei khawp an lo nei lo hlauh mai, kan han chhum chawp rawk rawk a, chawhmeh siam belh a ngai lo hlauh thung.


Ka vah te hoin Alu kan(kang) leh Dal kan(kang) an duh ve tho avangin a hranpaa siam a ngai lo bawk.


Puar peng pawnga kan ei khamah, ka nuin Fridge aṭangin Strawberry Ice Cream a lo la chhuak a, kan nufa zaa kan lawm dan chu, Khiang rah tla ang mai kan ni.


Ka pain, "Naktukah a tharin kan inkawm dawn nia, in chau dawn tih chiang sa, han mu hahdam phawt teh u", a ti a.


"Apu, i bulah ka lo mu", Freddy-an a ti a. Ka pa bulah a va ding zawi hnuang.


Siamtea pawhin, "Keipawh", a ti ve a. Lal Fanu thung chu a Pa bulah. A pa hi a ngai thei hliah hliah bik em.


Lal Fanu leh a pa chu an mu tui ngang mai. Lal Fanu hian puan sin tlawh thlak a ching ṭhin a, ka muhil lawk thei lo chu ka siam ṭha reng mai.


Engtikin nge ka muthilh ka hre lo, "Anu, tho tawh rawh", Lal Fanuin min sâwi nasa mai.


Tep chapin, "Apa tho tawh em?", ka inbeng kang a, Sammy ka en, a bek veilama a kuta innemkhalhin mi melh kuau mai.


Hnuaichhiahna tel miah loa Min nuihzatna a lang hle bawk.


Ka zak chu puanin ka han inkhuh ringawt a, Sammy-an puan a rawn pawt hawng ṭhuai, "Anu, tho tawh rawh, dar sawm a ri hnai", a ti chu rang lutuk tak maiin ka ṭhu chhuak chiang lutuk.


"Tak tak maw?", ka ti a. Hawi kualin, tukverh aṭangin ni zung a rawn lut tawh chu niin.


In chhung thawm a reh diak thung.


Inrinni a ni a, School kal a ngai lo a, chhungte hian mut an âm deuh a ni ang.


"Dar sawm a la ri lo ang", tithla rawkin, "A ri tuin nge ti?", a ti hmuk a. Lal Fanu a nui sen sen.


Lal Fanu chuan, "Dar ruk", a ti reuh a. Banga sana intar enin, Dar sarih a ri hnai.


"Ka tho dawn", tih leh thawh ka tum chu Sammy-an min pawt thlu, puanin min tuam hlun, Lal Fanu a nui ar ar.


Sammy chuan, "A la hma, tho pawh ni la tih tur i nei lo", a ti a. "Nei, chaw chhum a ngai", ka ti deuh hmak.


A ner nasa mai, "Ngai lo, ngai lo, tho tura ka hrilh hma che chu i tho dawn lo",


"E, i thu lo ber ang", tia thawh ka tum chu ka âwm chungah a kut a kham ruah mai.


"Kuah bet tlat i ni mai", a han ti ta ang a. Min kuah ka ti thei lo, Thingtuluang ang maiin a Ban khauh zet a inkham ruah mai chauh.


Lal Fanuin, "Apu te bulah ka kal duh", a lo ti ta a. Ka nu leh pa te pawh an la tho lo.


Pindan kawngka a hawng thiam dawn si lo a, "Ka lo kalpui ang che", Sammy zawk a tho a, "Tikhan lo mu reng rawh", lei ka chhuah tut.


Mo kan nei a, a lo thawh huna mut reng bik nuam ka ti dawn lo.


Sammy-an phal lo sawmsarih mah se, ka inperh tho zat.


Mo ai pawha thawh hma a ngai hrim hrim. Mikhual chan chang kan ni ve ta reng mai.


Mutna thleh fel laiin, "Tho suh ka tih che kha", hnung aṭangin ka kâwngah min pawm a, ka kokiah a khabe nghatin, ka nghawng a fawp kual dûn dûn.


A kut beng hlakin, "Uang uang suh, chaw chhum a ngai ka tih kha",


"Uang ve ang chu, uan chhan ṭha tak ka nei che a", ka hmulthi a ding thei!


Ding nghet thei dawn loa inhriain ka tal chhuak phut a, "Mutna lo tifel la, chaw ka va chhum ang e", a nui zui hak ri chu, ngei zetin ka melh rawm rawm.


Kan Mo, u Dindini pawh an pindan aṭangin a lo chhuak chiah.


"Chhuanpui, min thawhkhalh elo? La mut tur che alawm, Inrinni a ni sia, mut ka âm deuh a nih hi", u Dindini inthlahrung hmel chuan min intithlahrung.


"Nizanah kan lo thleng tlai si, a ho em mai. Ei rawngbawl dun lohna a rei tawh em mai", ka lo ti a.


A inthlahrunna a zia deuh.


Kan pahnihin Chokaah kan ri dun ker ker a, Ni a tlangsâng chho zel a, in chhunga thawm lah a sâng chho ve zel bawk.


Ka vah te ho hi chu upa lam ṭhuau an ni tawh a, an bulah chuan ka fa te ka awm tir ngam, thla a muang.


Sammy a lo kal tih an hre darh thuai a, inlêng an lo pungkhawm ṭak ṭak.


Chawlh hmang tura kal, chawlh theih si lo ang vel kan ni.


Sammy-a ṭanpui theih dan ṭha ber chu, ngawi renga awm a, inlêng lo biak ṭhat a ni mai.


Ka nu hnena Puan Tah zirte chu ka Nu aiin ka han zirtir ang lâwp lâwp a. Hmingi lahin nilengin min awmpui.


Duhsaka hming lam ri kher lo mah se, a rukin a zawng reng thung.


Ka u te chhungkua leh Siamtea te unau thum te chu kan Dil-ah an kal a, Sangha an lo hawn ṭeuh beisei ang.


"Chhuanpui, chhuna ei tur eng nge in siam ang? Hmingi nen han ngaihtuah teh u", ka nuin min lo au a.


Kan in bul lawkah hian Puan Tah zirna ka nuin a hawng.


"Ka lo chhâwk ang che u, lo lut teh u", ka nuin a lo ti leh a. In aṭangin a lo chhuak.


Doormat bulah Chapal a tam ang huin, pheikhawk bun chunga in chhunga tei tei lah an tam.


U Dindini te lo haw hmaa chhuat tihfai vek a ngai dawn a nih hi.


"Hming, eng nge kan siam ang?",


"Atta kang ila ṭha mai lo'm ni? Hmarcha kan siam bawk ang a, Thingpui paw thlum tui tâwk nen", ka nuih sen sen.


Ṭhiannu Hmingi tak hi chu aw...


Thingpui a siam tui thiam alawm le. Tihdan ka hre tak.


Belbawma Atta zawng ang deuha awmin, ka thukru hmak. "Hming, Atta kan nei tawh lo, engtin nge ni ang. Tam deuh nuaia kan(kang) a ngai dawn bawk si a", ka ti zeuh.


"Awihawm loh eee, zawng ṭha teh",


"E hei, Polythene khat chu a awm", panga lai chu a awm. Pakhat chauh ka khai chhuak.


Inlêng awmna lunghnur takin ka han melh a, "Kan kham lo ang, Purunsen leh Hmarcha muh te, Amul Taaza te. Takah", Hmingi kaiin pawnah ka chhuahpui a.


Ka nu bula awm Duhsaka chu koin, "Duha, Hmingi nen hian Dawrah han kal lawk ta che u, Motor hian, a rang zawk ang", Hmingin min sik ru hlawk hlawk.


"Aw le, chahbi ka han la lawk ang e", in chhunga lut tura min kalpel chu Hmingin min kuah thlu lo chauh.


"Pawisa ka han la lawk ang e aw", ka ti a, engmah a sawi thei lo, ka bânah min kuah bet a, kalnaah min zui mawl tawp.


A va han lâi chhe rem rum tak.


Duhsaka a lo chhuah chuan, "Ni leh si, Motor-a kal a ngai lo, kea kal theih chauh alawm. Lo haw har lo ula", Hmingi kutah pawisa dahin ka luhsan daih.


Hmingi leh Duhsaka chu an kal ta a, inbe miah loin an awm thei dawn lo rengss.


Hmingi pov...

Lalchhuanpuii mai mai chu, ka ngei rualin ka lawm.


Ka duh tih hi a hre ru mawni? He nu tak hi chu, a fing leh lutuk a, a hria a ni hrim hrim ang.


A ngawi ngal mai si a, a kal chak bawk si. A kekawr ipteah a kut a zen lut fel thân nen, kalpui a hrehawm lam chu a ni.


Mahse, ka duhna bo chuang lo. Mahni induhtâwk ve tak a ni tih ka chiang alawm.


"Khawi dawrah nge kan lei ang?", ding meuhin min thlêk. Min biak vawikhatna a ni a, tiril a khûr nia!


Ṭang ṭeuh chung hian, "Sawlai deuhah sawn", ka kâwk ringawt.


"Lei tur i hria ang maw?", kiai sak chungin ka lu chungah a kut a nghat thawk a, la sawn leh thuaiin kal hmasaah a ṭang zui daih.


Zui nachang ka hriat loh avangin, "Hmingi, Min lo zui ta che", a rawn ti chu, "Ka lo.zui che", a bulah a tlanin ka tlan.


Ka hming tein min ko vel nia, ka hming a hria tihna! A va han nuam tak. Lum ti tak ka ni.


Pu Thianga dawrah Purunsen leh Atta kan lei a, "E hem, Hmingi chu, kalpui chhe lo khawp mai", Pu Thianga a ti chu, "I chawh", ka han ti ngawt pek a.


Duhsaka a awm tih hre chhuak thutin, ka hmui ka hup rang lutuk. Mitmu chhuak tur khawp khawpin ka meng pawng bawk.


Pu Thianga chu a dan ngai tein a nui huah huah a, dawr chhunga midang awm te pawh an nui huah huah.


Duhsaka melh zauhin, a nui ve suk suk.


Chet chhiat theih ngei mai.


"Kan hmanhmawh, kan lawm lutuk e".


Duhsakan kan thil lei a khai a, ka kalpui hlawk hlawk.


A hmaah ka kal a, ka ngaichang tawh lo. In kawng a hre tho a, a lo thleng ve thei em em ang.


Lalchhuanpuii pov...

Atta nuai mial mialin, "Lalchhuanpui", Hmingin mi han sik hlawk chu, Atta nuaina ka thloh chiang lutuk.


Chhuata tla chhara tin uaihin, "Silfai rawh", ka ti a. Min chuhin a silfai mai bawk.


Purunsen leh Atta khaiin Duhsaka a lo lut a, Dawhkanah a dah.


"Khawiah nge hmarcha muh? A awm miah lo a nia", Duhsaka hawihai nasa lutuk chu, "Hmingin a theihnghilh nimaw?",


"E he!", Lalhmingin Atta nuaina sil chungin a lo ti.


Duhsaka bula a awm chu, a hriatna a hloh ṭhen ta a ni chêk ang chu.


"Ka va lei lawk mai ang e", Duhsakan a ti a. Hmingin, "Ngai lo, ka va lei ang, pawisa chuang a tam danah mak ka ti reng a ni", ti nuah nuahin Atta nuaina dawhkanah dah chawrhin a phit chhuak nghal.


Mak tih hmel deuhin Duhsakan a en zui a, a nui sak ta mai!


E hiau hiau le.


A pui chho dawnin a lang ru tlat.


Duhsakan ka en reng tih a hmuh chuan, âw thian kharhin, "Ka pi bulah ka va awm leh ang e", a ti a.


Nui ver verin Atta ka nuai.


Hmingi lo thleng thuaiin, engkhaw sawi set set tawh loin, ngawi rengin Atta min nuaipui a. Amul Taaza kan theihnghilh leh ta.


"Hming, Amul Taaza",


"Aw ka Lalpa, va han hahthlak thei tak", thaw chhuak ham hamin a tlan chhuak leh.


Mamawh kan fawmkim tawh bawk a, puar el awlin kan inhrai ta a.


Ka u te pawh lo haw ta bawkin, Sangha an lo hawn ṭeuh nghe nghe.


Dila Sangha hi a Sen a ni a, kan Dil tui hi a thianghlim bakah, kan Sangha te hi a tui thei bik.


A hangin a ṭhen kan chhum hluah a, a.ṭhen baiin, a ṭhen tui nei chep chawpin kan kang bawk.


Chhunah inhraipuar el awl tawh mah ila, theihpatawpa puarin chaw ka ei leh tho mai a nih kha.


Ṭhutthlenga ṭhu chawl mai maia inngai kha, ka han meng chhuak a, chhuatah muin Lal Fanu kut ka kawr chhungah a lo awm heu mai.


Khua a êng deuh ruai ruai tawh.


Sammy ka hmu lo chu ka mit ka lên ruai. Ka muthilh lai ka hre lo reng reng.


Lal Fanu kut laksawn zawh rualin Bathroom-ah thawm hriain, Sammy a nih ka ring thiam mai.


Amah a ni ngei bawk, lo mu thla pahin, "Puar tak hian chaw ei ngai tawh lo la a ṭha ang",


"Timaw?", puanah a inthawlh a.


Min lo thlekin, "I duhna hmunah muthilh nan i hman phah ringawt a",


"Ni lo ang", ti mah ila, a nih ngei si hi.


Inlêng kan nei ngei awm si a, Sammy tan a mualphothlak lo turah ngai ang.


"Sam, tihpalh lutuk",


"A ho lutuk, mu leh tawh rawh", min piai zauh.


Phone enin, Dar nga a ri hnai der.


Hetiangah hi chuanin men(meng) tlang a ngai. Muthilh nawn chi a ni tawh lo. Lal Fanu pawh a harh ṭep tawhin a nia ka rin. A harh hma thei si, a harh vek vek chuan mut mai mai a duh bau si lo.


"Muhil rawh, kei chu ka meng tlang tawh zawk mai ang. Lal Fanu a harh ṭep ang",


"Muthilh nan hun a la tam",


"Sam, mut ka kham",


"Mut inkhamtir zawk ta che", nui chhuak lo turin ka hmui hnuai ka pet.


Ka chunga ṭhat a chhuahna hian min tihlau tawh si a, nuam erawh ka ti.


A der nge a tak ni ang tihah ka buai ṭhin.


Heti hian, ṭhat a chhuahna hian tawp chin a neih leh ka hlau a ni.


Sammy muthilh tum lo chuan min thlek vung vung, "Nge, muhil ta che",


"Thuruk ṭha deuh ka nei a",


"Chutiang a ho", ka tihsak a, a duh lo ngang mai.


A mit ko a san ak ak, "Nge?", ti zawi sepin, ka hmui rawn tawkin a tuai ne ne.


Hrethiam ta chiah, tun ṭum chu, phalna min dil tlat. A hma zawngin phalna a dil ngai si lo.


A chezia hi chu, maksak thei mang e.


"Khua a var tawh, Lal Fanu a harh ṭep ka tih kha", ka hmui a hmer vak.


A kut beng hlak hlakin, min thlah ve mai.


"Please", intikhawngaihthlak fahranin a han meng kual vel. Ka seh sawk sawk châk lutuk.


Vawikhat chauh bu nghatin, ka hmui rawn bawh thuahin, ka chungah a bawk fel nghal chu a ni mai.


Chawhnuah Vantawng Khawhthla lamah kan lêng a, Hmingi hruai telin, nuam a ti fal pang pang bik.


Duhsaka nena Atta lei tura an zinkawng min la hrilh lo na chu, a fuh hlein a rinawm.


Sammy-a nen lung pakhat chungah ṭhu dunin, a kokiah ka lu ka nghat a, min kuah hle hle.


Engtikah nge, a mizia a thlak leh dawn ka hre si lo. Min duat lai hian sawisel lo teh ang.


Aizawl kan thleng leh ta chu a ni a, buai a zualin ka hria.


Nilêngin, Sammy-an hna a thawh chhungin in tihfelfai nan ka hmang. Lal Fanu nen a nih ber chu.


Pang a dam a, Pasalte an fela min duat bawk chuan hun hi a kal zung zung, a uiawm.


Kum te lah a ral chak.


Siamtea chu Rawlthar nun a hmang chho ṭan dawn ta a, Freddy-a pawhin a hlat tawh lo.


Lal Fanu pawh School kal tawh turin kan ti a, Sammy-an, "Chhuanpui, Lal Fanu hi School kal turin ka duh tawh, eng nge i ngaihdan?", bathroom kawngka nghengin, a khabe hmul ziahna keng vû chungin a ti a.


A hmui sir a la fai ṭha lo lutuk, tihfai hmasak phawt tur a nia.


Pindan chhuat ka nawt a ni a, khum chungah Lal Fanuin a Ṭhiannu Elsa-i a inkhualtelempui.


"I sawi har ka ti reng a ni, naktukah School-ah kan kal nghal ang", nui hak hakin, intifai turin bathroom-ah a lut nal nal.


School kaltir kan tum a, a kal tur ber Lal Fanu lah hian School lam reng a ngaihsak lo.


Chhuat nawh fel hnuin, Sammy pawh bathroom aṭanga lo chhuakin inhru hulin a inthlak mial mial.


Lal Fanu bulah ṭhuin, "Lal Fanu, School kal ve tawh rawh aw, a u te angin. Chuan, KFC dawrah kan chawl.ziah ang a",


"KFC hmanga thlêm awih loh", a pain a lo ti.


Melh nghekin, "Inthlak mai mai rawh", a nui duh chauh lek zu nia.


Nuih a ching riau a, ngaih ṭhat loh laklawhnain min man tawh nen, amah tawpah hian ngaih ṭhat lohna lian tak ka nei ṭan tawh.


Zawh mi ni nghal lo chuan, zawh ngamin awm ngai hek suh.


Lal Fanu chuan, "School maw? Yess, Anu, School ka kal duh. Bag nalh deuh min pe dawn em?", phur lutuk tak maiin a han ti a.


Min tiphur, "Elsa Bag ka pe ang che, School-ah chuan ṭhian te i nei bawk ang a, a nuam dawn lutuk",


"Yesss", Lal Fanu chu khum chungah a zuang tawr tawr.


A va han hmuhnawm tak em aw...


School ṭan a ni leh ta a, Lal Fanu pawh School a kal ve leh ta.


Sawi tawh angin, Siamtea chuan Rawlthar nun a tem chho dawn ta a, hriat tur pawimawh tak pakhat a nei.


A lehkhazirna ṭhutthlenga ṭhuin, a hmaah ka ṭhingṭhi a, a kut pahnih chu nghet takin ka chelh belhbawm.


"Siamte, thil pakhat ka hrilh dawn che, ngun deuhin ngaithla rawh aw. Chuan, zawm ngei ngei tum la, theihnghilh miah suh ang che",


"Aw le, Nu, ka theihnghilh lo ang a, ka zawm ngei ngei bawk ang", fapa thuawih thei tak ka nei thei a, a lawmawm tih piah lam a ni.


"Ih maw, Rawlthar i ni chho dawn ta a, i taksa a puitlin chhoh ṭan dawn bakah, i ṭawng thûm dut dut ṭan bawk ang a",


"Ka pa angin maw?", a ti chu, ka nui chhuak ṭhelh.


Bu nghatin, "Dik chiah, i pa ang hian. Chuan maw, thil pakhat pawimawh deuh chu, i classmate hmeichhiate pawh Tleirawl an ni dawn a. An hnutê a pâwng chhuak dawn a, chu loah, ṭhan thi an nei ṭan dawn bawk",


"Chu chu eng nge?",


"Keimah ang hian an hnutê a lian dawn tihna a nih chu, tunah chuan an hnutê a la pâwn loh avangin an âwm a phek vek ang tiraw?", ka ti a.


Nui sâwngin a bu nghat nghat, "Pathianin hmeichhia chauh hnutê pâwng chhuak tura a tih avangin a pâwng chhuak ṭhin a",


"A lian maw?", ka bu nghat. "Ni e, a lian ṭhin. Chuan, chutah chuan kawrhnuai an hak a ngai a, chhaih nan emaw fiam nan hman miah loh tur. Ṭhan thi an neih hunah pawh, Pads an hren a ngai a, buaithlak deuh chu maw, Pum hnuai hi Tai kan ti a, chu chu a na thei lutuk", Siamtea mitmeng a fiahin, a beng kum loin a kî vah mai.


Min ngaithla tih a chiang a, lawmnain ka khat.


"Ṭhan thi aṭang chuan, Thla tinin, Thla tir emaw thla tawp lamah emaw Thi kan nei ta ziah a. Thi neih hi 'Period' emaw 'V' tiin kan sawi ṭhin aw. Thla khatah vawihnih kan nei tihna a nih chu", a meng bial ta deuh.


Thla khata vawihnih Thi neih chu a ti a ni ang, "Khawi aṭangin nge Thi chu a lo chhuah a?", a inthiamlo chu, a sen ṭawn ṭawn.


Zawhna tur dik tak a ni.


"Kan kap aṭangin a lo chhuak ṭhin. Nakinah, in Zirtirtuten an la zirtir dawn che u a, kei ai hian an la hrilhfiah ṭha zawk bawk ang che u".


Mi pawh en hlei loin A han ngawi deuh vang vang a, zawhna a ngaihtuah mawni?


"Min zawh duh apiang min zawt la, ka hriat chu ka hrilh zel ang che", a kut tiche dat dat pahin ka ti a.


Siamtea chuan, "Nei lo e, sawi chhunzawm leh tawh la", a ti zawk a.


Ka han insangmar hlek a, "A chang chuan, Thla khat emaw te hi kan âwl ve ṭhin. Chuan, buaithlak lehna pakhat chu, Pads hren a dik lo emaw, Thi neih ṭantira Thi a chhuah tam hian kan kekawr hâk emaw, pawnfen fen mawngah a lo tlang ta ṭhin a. Chutiang chu, khawlaiah emaw, in Classroom-ah emaw pawh nise, an zah lohna tur berin ṭha takin i hrilh ang a, i ṭanpui ṭhin tur a ni".


Chutiang chuan Siamtea nen kan inhrilh malh malh.


A ngaithla ngunin, zawm ngei a tum bawk. A chalah a inziak kuau.


"Chuan maw, bialnu la neih miah loh tur a nia, Pawl Sawm i pass hunah chauh i nei thei ang a, Pawl Sawmpahnih i pass hunah Phone i nei thei chauh bawk ang", ka ti leh a.


Siamtean, "Bialnu ka nei peih lo e a", a intihtir a. Tomato angin a sen ṭawn ṭawn.


Tunlaiah chuan, Pawl Li zirlai lek lek pawh hian Bialnu leh Bialpa intihneih an ching lutuk tlat.


Kum naupangtêa bialnu, bialpa buaipui hi ṭha ka tih zâwng a ni ve lo.


Siamtea bulah chuan, "A ṭha lutuk, tunah rih chuan bialnu neih a la ṭul miah lo. I zirlaiah chuah i rilru i pe ang. Chumi pah chuan hna i thawh duhna ber emaw, i dreams emaw te i ngaihtuah pah zel ang a, Hobby te pawh", a dulah ka dêk a.


Khi ṭhawin a tawm chawih chawih.


"Pakhat leh chu maw, mahni ṭhiannu te pawh nise, hmeichhia reng reng chu kuah thuak thuak emaw, an hnutê leh mawngte khawihsak ringawt zel loh tur aw",


"Ngati nge?",


"Sawrkar hian Hmeichhe venhimna Dan ṭha takin a siam tawh a, thil ho te teah Jail i tâng thei. Chutin, bialnu i neih hunah pawh, an duh loh chung chunga kuah luih tlat te tum loh tur aw".


Fapa thuawih thei tak tur ka nei a, hmai a uang.


Ka thu chang awih tir ka tum lo.


Mahnia thutlukna siam ngam tur leh, mahnia ding chhuaka a tum ram thleng ngei tura huaisenna leh tumruhna nei turin ka zirtir fan ang.


Siamtea ang bawkin, Freddy-a pawh ka hrilh a, ani hi chu, tu nge a chhun hriatthiam a har, Pawl Sawm pass hnuah chauh bialnu neih ka phal thu ka sawiin, "Naaa, Nu, i phakar e", a ti hmiah mai ni.


A pa a chhun ti dawn ila, aaa, a pa a chhun a ni mai.


"Pawl Sawm pass hmaa bialnu i neih vaih chuan aw", ka ti hram a, "Naa, Nu", a ner zui sâwng a, "A ṭha alawm. Pawl sawm pass hnuah chauh bialnu ka nei ang. Mahse, min nghak thei ang em aw?", a han ti pek a.


Nuihza hle mah ila, ka nui duh lo.


Min fiam nge a thutak pawh ka hre lo e a.


"Bawihte, Pawl Sawm pass hma ka phal lo, i lo nei lui ang e. Pawl Sawm i pass thleng nghak theilotu che chu a ṭha lo tihna a ni mai",


"Niaaa", a ti muang fan ruih.


Kan inkuah a, Freddy-a hi chuan ka kalsan hlau niawm taka min kuah hi a tihṭhan a ni a.


A nuam vei phian.


Sammy-a hnenah ka hrilh leh vek ang a, tiṭha min tidawn nge, min hau zawk ang?


Min hauh ka ring lo, kan fate hi, "An naupang em mai", tia namnul mi an ni tawh lo.


An hriat loha kan rin te hi, a rukin an lo hre fur tawh zel.


Keinin, kum sawm, sawmpakhat, kum sawmparuk thleng pawhin a ni, ngaihzâwng neih nachang kan hre lo.chu thuhran, a hmei a pa khan Marble kan innâp zak zak a nia.


Tunah zawng, kum sawm an tlin rual rual hian ngaihzâwng neih tawh turah an ngai ka ti mai.


Ka fapa te pahnihah, Siamtea ka ngaihtuah lo. Freddy-a hi, ka vengthawng ta deuh ta...