Chapter - 29
Ziaktu : ilefi imoz
(Recap : Tun atan chuan Op-a hi a tâwk. Midang tellovin, kan pahnih chauh kan ni a, hmangaihna chhiarkawpah hian pakhat leh pakhat belh pathum kan nih a rem rih lo. Ka bianga min fâwptu chu Op-a a ni a, u Arona erawh tlâwm vawng vawnga min siamtu ve mai a ni! Theihnghilh mai a phû lo va, hriatchhuah châng apianga huat zui vawng vawng a phû!)
"Min haw lo tihnaah ka ngâi dawn ania, break a zo ţep tawh ang phei leh tawh rawh. Exam nî ah kan inhmu dawn nia" tia min thlah tâkah chuan inherin kalsawn mai ka tum a.
"Ka theihnghilh ţep!"
Ka ding dawt a, amah hnungchhawn zâwnga awm ni mah ila min rawn pan tih ka hre thei!
Ka hmâah tak rawn dingin a kuta polythene a khâi chu min hmehbel rawk rawk a, "Zir nasa lutuk ţhin suh i châu chhia ang a, exam hall-ah i muthlu lâp lâp mai ang" tia inherin min kalsan zui a. Ka kuta ka thil khâi ka melh nâk chuan eitur eng eng emaw leh energy drinks tih vel a ni. A rawn ken tak tak ka ring miah lo kha ania, Op-a hi chu aw!!
"Eng nge a pêk che khawimaw ka lo en chhin! Ehe.. Ka rin ai daihin a zei. A ngaihsak che bawk sia a nuam âwm vel e! U Toma theihnghilhin class-ah hian ngaihzawn tur mipa ka zawng ve zawk teh ang!" Dorm-a ka luh rual chuan Châmi'n a lo ti chûl a; bengchheng lo turin ka khap thuai a, a kâ erawh a chîp thei meuh lo.
"A nuam dawn hian ka hre ê hrehawm. I dinhmun angah hian ding ve ngat ila chu u Arona te mai mai, ka theihnghilhna a rei tawh ngawt ang!" Ti leh hrâmin Mutbu a kaih pharh duaiah chuan min pawt ţhu hnawk a, eitur ho chu a duh duh a thlang zat zat bawk. Ka ui lêm lo, ei ve ngei ngei turah ka ngai tawp zawk a, ani pawhin a inngai tawp tih a chiang reng.
"Enteh, hmâna u Arona'n lion (energy drink) min leisak kha ka la kawl ţha reng asin. Ka room-ah ka dah a, ka nu'n a lo inru zui! A hawng tawh tawh ka tia ka inzo vek a, a bûr ruak ka dahţha thlap!" Lays bâwm hawng rak rak chunga ka tih chuan lo nui hakin, "A chî atan dah i tum deuh tihna a ni maw?" A ti har har a, min hauh ka rin tehlul nen fiamthuah min lâksak daih a, a lawmawm zawk.
Kan tih nek nek chhûngin kâr a lo liam ve zung zung a, exam pawh kan ţan dêr tawh! Kan khaw piah chiah hi exam center atana hman avangin keini ho pawh kan va exam ve a, Practical kan tih nî chuan a awl bawka kan hlim sârh hlawm.
A hran hrana kal lovin School-in 407 kan hire a, exam tur e ti lovin min bâwng phurh a ni ber mai. Khaw kâr kawng a chhiain a phut si a, a hmun kan va thlen meuh chuan zingkarah kan inbual vel thlap tih rêng a hriat tawh loh! Tumahin puana lu tuam nachâng kan hre si lova, kan hmâi leh lû chu vaivutin a bawh khat lêk lûk a, kan uniform pawh paw ţha thêr thâwr tak a ni. Pheikhawk te phei chu a dum nge off-white tih pawh a hriat tawh loh reng reng!
"Eng nge in an hlawm?" Exam hall aţanga kan chhuah kim hnuin Miss Mafaki'n min lo au lauh lauh a, toilet panna kawnga ţhutna an siamah ţhuin nilum a lo âi der der a, nui sâng chungin min lo hûi zauh zauh reng bawk.
"Hetiang vek chu ni se Mizorama pakhatna tih vel chu ka khing hneh hlawm viau ang!" Piah deuh hlek aţanga Fabiana'n a rawn ti lâwng lâwng thâwmah chuan nui hak hlawmin, miss Mafaki lo ţhutna lamah chuan kan kal phei ve a.
"Practical te chu har hek lo mawle. In zuam sual anga next exam-ah hian in hawi lawl lawl mai ange aw.. Zanin aţang chuan in zir nasat a ngâi khawp ang. Khawiah nge Op-a te kha? An haw tawh emni? A rawn chhuahna a rei tawh nen" tia miss a hawi vual vual lai chuan hmeichhe pahnih, khaw ţhenawm lehchhâwng ami te chuan min rawn pan a, "Heihi i lehkha tur ania" tih paha lehkhathem min rawn pe ringawt chu a ngaihna hre lo fêin ka lo la mâwl ve tawp ringawt!
"Luck deuh ve" ka beng bulah rawn phun sur surin Châmi chuan ka lehkha ken chu min chhuhsak a, midangin an hmuh ve hlauvin toilet lamah a tlânpui daih bawk.
"Hey Kâwli! Ding rawh ka chhiar ve duh ania i zak lo lutuk!"
Ka ûm phei chawn chawn a, a ding duh ţhak lo lehnghal! Thaw hluam hluam chunga a bul ka va thlen phei chuan toilet bang nghêngin thlanglamah a lo ding âwn duai a, lehkha chu a lo chhiar nui vur vur bawk.
"Love letter deuh reuh i dawng anih hi. Tu tak chu ni maw?" Nui pût pût chunga a lehkha ken lâi min rawn pêk pah chuan a ti zat zat a.
Lehkhaa hawrawp chu mâwi tak a ni. A sîn sang a, a kir deuh chiat bawk a. Mipa hawrawp anih ka ring lo ve ringawt bawk. Hmeichhe in uluk deuh, smart deuh hawrawp anih duh hmêl ka ti!
"Vawiina rawn exam ka hmuh zîngah hmêlţha ka ti fâl che" tih tê mai hi a lo inziak a, tu emawin min prank a tum te pawh a ni maithei! Nge kei hi, ka luck ve hrim hrim zawk?
"Lo luck bik khawp mai! U Arona te ang mai mai theihnghilh nan second khat bâk a ngai tawh lo ang chu.. Luck-i, i luck em mai sawhchiar plate khat min show rawh" te chu a ti vel ham ham a, zêp tlat bik ţhin lo se chu a lehkhathawn dawn zozai hi ţhuikhawma blanket thum daih lawih a ni tawh ang mawle.
"Lo kal khawm ula, Mualah chhukthla ang u. Kan in eipuar anga kan haw dawn nia" Miss Mafaki'n piah deuh hlek aţanga a rawn tih tâkah chuan ka lehkhathawn dawn chu bag-ah ka khung lût ţât ţât a, Op-a te pawh an haw tawh anih ka ring. An hmêl hmuh tur a awm tawh lo.
Sir-in a hnawhchhuah deuh hmak avang khan kan rualin an rawn kal ve lo va, a patea nen bike-in an rawn inphur phei a ni âwm e.
Muala kan in eipuar hnu chuan kan tlân haw leh vang vang a, kalkawng hi thui tehchiam lo mah se kawng a chhiat êm avangin insawp chauh hnawkna tham a ni ve a, vaivut khuin kawngtluana min bawh avangin zan lamah chuan lehkha zir peih mumal kan awm meuh lo.
Sir Isaac-a rawn duty in a subject kan zir nasa hlawm hle a, practical tih lohva kan exam hmasak ber tur anih vang a ni.
"Ka pum a nuam thei miah lo nimin piah aţang khan, haw ka dil anga an phal chuan ka chhuahsan leh lawk ang che aw. Naktuk Sunday a ni thoa vawiin tlaiah ka chhuah chuan naktuk tlaiah lo let leh hman ka tum dawn nia" chawhnu herah Toilet aţanga rawn chhuah ţhem ţhem pahin Châmi'n min rawn pan a, a pumnâ a sawina hi a rei ve leh deuh tawh bawk nen ngaihthah mai chi niin ka hre lo.
"Ka dilpui ang che lo kal rawh, ţha deuhin zuk inenkawl ang che. Chaw i nghei ziaha i pumpuiin a zo lo anih dawn kha. Ulcer neih te hi a hlauhawm asin" tih paha Sir Isaac-a awmna room lam ka panpui lai chuan, "awi ulcer rhyme word ka hlâu den!!" A ti duai duai a, ulcer rhyme word a tih awmzia pawh ka hre ve pek lo.
"Eng nge chu chu?" Ka ti deuh hâ a.
"Ulcer rhyme chu Cancer.. Pumpui Cancer hi ulcer vanga insiam te a awm ve thei a, a hlauhawm lo zawk tih vanga ngaihthah kha a chi loh ve tho mai" te chu a ti leh zawk zawk a, keimah zawk damlo chhuaha min han chhuah lel chu le!
Sir Isaac-a hnena chhuah kan dîl chuan a lo remti ve mai a, a dam hun huna rawn lût leh mai turin a thlah fel ve thân a, chutiang zâwng khera a thlah vang chuan ka lungni chiah lo. Kan Vanlalchâmi hian a dam hun huna lut tur a ni tih a inhriat chuan dam hun a nei har dawn riauin ka hre tlat pek atin ni.
"Rawn lêt har reng reng suh ang che mahnia awm ka peih miah lo ania aw. Op-a tal a awm tawh bawk si lo, min tihrilhhai reng reng suh" tia chah mawlh mawlh chungin gate thleng ka thlah a, "ka dam hunah ka rawn let ang" ka run tur tâwk leka mitko min sânkhum ûk ûk chunga tiin a liam thla nel nel a, a tê reuh si, mahni inrintawkna a ngah si. Henu neitu hi chu engti kawng pawhin a vannei ve thlawt ang mawle!
Thingtlang tih takah zan lam power supply kan hmu ţha lo ţhin hle a, zanin pawn current kan nei lehpek tawh lo. A thim deuh khup a, exam a hnaih tawh avangin batti erawh kan chhi deuh far thung. Current a thim maw? A pawi lo ve, batti ka chhi anga ka zir mai ang; lehkhazir is my life kan ti deuh fur hlawm tawh a ni mahna.
A dân ngâi tein corridor-ah bawk ka inchhawpchhuak leh a, puan lum sina chair a ke hlâng kâng chung meuhin a ni ka zir ni.
"Malsawmzel.. Inbia ang" rawn ti thûm dûttu lam hawi chuan ka dâk chho hâw a, meng khup deuh lup chunga min lo melh zuk zuktu Fabiana nen chuan inmelh fuh chawtin, "eng nge?" Ka ti liam satliah a, tuikhura thil thleng avang khan tun thlengin kan la inbe ţha leh ta lo. Hmelhriat loh ang maia inkalpelin kan inbiak ve chhunah pawh kan inkhei deuh fak fak ţhin a, zanin a taka min rawn be ve teh mial chu thilmak a ni hrim hrim.
"I bulah ka lo zir ve please!" Ka chhânna pawh ngaithla miah lova a chair châwi lai ka hmaah tak a rawn rem avang chuan ka lo melh râm ringawt a, a kiai suk duh chauh! Hepa hi a rawn inla cool ve khanglang emni?
Kei chuan ţhian ka ngah loh êm avang hian ka neihchhunte hi ka ngaihlu a, chân ka hlâu ngawih ngawih ţhin. Mahse vawikhat min tinâ anih chuan a tâwp thlenga kalsan vang vang ka duh ţhin a, chu chu ani pawh hian a hrechiang. Ka huatthu a chhe lo, kan ţhianho zingah pawh chhaih hlawh ber leh an kah rawn ber ka ni ţhin. Keimah zawk zawk hi ka nui uar uar a, fiamthua an mi perhna te pawh a nuih rin pui bertu ka ni ziah. Mahse thil duh loh zâwng riau ka nei a, chutianga ka laka an chêt chuan ngaihdam ka harsat tawh tlat zel.
"Pangngai deuhin kan inkar hi sawi ţha ang!"
"Teh tawp che chuan.." A ngaihna hre lo fêa ka tih lai chuan lû lo thing nghut nghutin, "ka thiam loh vek a ni tih ka hria ka tihpalh. I mimal nuna lo inrawlh lo tur ka ni tih ka hre vek. Mahse U Arona i duh ţhinzia leh i âtchilh ţhinzia, i duh chu neih ngei tuma hmâ i lâk ţhin dan engkim hretu nia ka lo inngaih ve naah khan ka insûm zo lo va, tiang khan tih dan ka hriat awmchhunin ka che ve tawp ringawt. Ka tihpalh a ni, ţhian kan nia, ţhiante chu an inkalsanin an inthlauhthla zung zung ngai lo. Pangngai deuhin kan ţhianho hian awm leh ang u. Duh leh Op-a bulah pawh kan inngaihzawn lohzia te ka hrilh mai ang" tiin min rawn melh ralh ralh a, a hmela inthiamloh takzetna lang chhuak chu ka hmuh hmaih lo.
"Op-a hrilhfiah buai a ngâi lo." Tiin sawi zawm tuma a âng leh zuau chu ka lo pawt chat a.
Op-a khan Ramngawa Fabiana nena kan lut dun, kan chhuak leh lam min hmuh khan kan inngaizawng emaw a ti ngei a, Fabiana lahin kan inngaihzawn lohzia a sawi duh bik miah lo bawk nen min thinrim khum ve hial kha ania. Mahse tunah chuan a hrethiam vek tawh, Fabiana hi ka mi duh tak a ni lo tih a hria a, ka ţhianţha tak a nihna chauh a hria. Buaina a awm tawh lo. Buaina zawk chu kei leh Fabiana inkar khi ber hi a ni ta rih.
"Anih chuan ţha deuha ngaihdam ka dilna che hi ţha deuhin lo pawm la, pangngai deuhin inkawm leh tawh ang u. Tih tak êmah te chuan i nu'n kawm min phal tawh loh lai zawng zawng pawn a rukin kan inkawm a, Biakcommon-i meuh pawhin a pawh hran theih loh kha mipa pahnih khat vang mai maia kan hran tâk thut nachhan tur a awm lo. Ka phei dawn ania, ţha deuhin awm leh tawh ang u" tia ka dâr rawn bêng det detin a tho nulh a.
"Ka nu kha rawn sawi tel kher a ngai lo" tia ka auhzuina chu, "kârah hmêlma Miss u Biakcommon-i lêng vel mah se!" Hla deuh aţangin a rawn ti leh lâwng lâwng a, a zak lo ve ţhin ham ham khawp mai. Ka ngaihdam thu pawh ka sawi hmain ngaihdam tawh lênin a lêng halh halh dawn tih ka hre vek.
Engpawh ni se ţhian chu ţhian kan ni a, thu inhmuh loh chângte, han inbakkaih avanga intihthiam loh châng te pawh a awm ve ţhin ang. Ţhian kan ni miau a, inngaidam tawn vek tur kan ni. Ngaihdamna hi a hlu a, ngaidamtu tana thawventhlak bawk, a ngaihdama te tana rilru nawm huaina tur ni bawk. Kei zawng, ţhian leh ţhian inkarah chuan inngaihdam tawnna te, inhriatthiam tawnna leh inthlâkhlelh tawnna te hi awm reng mai se la ka duh e.
Châmi a awm lo bawka mut hun an tih rualin dorm-ah ka lût a, stayback tumna ka nei lo. Hma deuhah muin zîngkârah ka ţhangharh a, chawlhni tûk a ni bawka insiam thuai thuaiin kan Inah ka chhukthla nal nal. Kâr khatah vawikhat chauh haw na hun kan nei a, nilenga mut theihna chance hi bawhpelh ka tum bau lo.
"Hmanni in exam chu i chhâng ţha em? Thiam loh te i nei em?" Bathlâr aţanga ka pa'n a lo tih chuan nui vur vurin lû ka bûk khum nghauh nghauh a, "khatiang vek kha chu ni se Mizoramah Topper sâng chuang kan awm ka ring" tih paha inchhûnga ka lut chu tapchhakah ka nu'n parcel a lo hem a, "i lo thleng dêr elo? I va tho hmâ awm ve!" A parcel hem lâi herkual vut chunga tiin min lo be ve sawk sawk a. A buai hmel khawp mai.
"Ka tho hmâ alawm. Eng nge kha kha?" Tia a ţhutna sîra ka ţhutthlâk ve chuan parcel chhûnga Vawk tereuhtê lo mu ngêt chu ka hmu ve ta chauh a. "Vawk in la thar elaw?" Ka ti deuh hâ bawk.
"Nimin piah khân kan la a, hei chu keimahni'n kan vulh lovang. I pa Lalnghînga vulh hlawh tur anih hi. Sesih ramah khuan Sawhthing hmun an siam a, riakin an enkawl bawk nen, 'Vawktê lâ ula ka lo vulh hlawh ang e, zû ka chhuang ţhina a fêin ka lo châwm ang, an ţhang duh lutuk' a ti roha, i pa'n ţha dawn riauvin a hriaa hei min lâktir anih hi. A la sên reuh lutuka meiah hem deuh a ngâi. Vawt tiin a lo khûr hlum mai ang tih te pawh a hlauhawm a" a tih lai chuan, "Pa Lalnghînga berkher! Ani te chu in ringtawk reng reng emni?" Ka ti hlut a. Kawngkhar aţangin ka pa a rawn lût ve chiah bawk.
"Miten misual ber an tih te hi a ngainatute tan chuan an lo fel viau zel a, miten lâktlak lo tak ngaiha an ngaih pawh a chhawr dan thiam chuan an ţangkai fû thei ania. I pa Nghînga pawh i ringtawk lo em em a, a ringtâwktu a nupui fanaute tan chuan an chhungkaw innghahna leh eibêl ber a ni ve tho alawm. Mi reng reng hi anmahni en thuaka ngaihdan lo siam ngawt chi a ni ngâi lo" rawn tilût chuar chuar mah se ka ngaih a ţha thei chuang lo. Pa Lalnghînga berkher!
"Sawi sawi a ngâi lo. Va intifai la chaw kan ei dawn nia. Chaw eikhamah mut i duh leh ang a, i mu hnem hman lovang" thuk aţanga ketli lianpui min khâi thlâksak paha tiin ka nu chuan bual Inah a châwi phei zui a. Lu thing nar nar chungin room-ah ka va inthlâk ta nge nge. Ka inthlâk chhûng zawng pawh chuan Pa Lalnghînga'n kan Vawk a enkawl tur mawlh chu ka mitthlâ a, a lo hralh daih mai ang tih te ka hlâu! Eng rilru pû a lo remti nge an nih ka la hrethiam thei ta chuang lo.
"Rawn inbual ta vat che mawle Malsawm!"
"Ka la hman lo anih hi! Lo vîn tûk suh ka hman hunah ka rawn inbual ve mai ang" meng nûr nûng chunga tiin ka thawmhnaw hâk thlâk ka hâi kual a, "inkhawm kan duha chaw kan ei tlâi ang tih ka hlau alawm mawle!" Rawn ti leh hrâm mah se ka speed ka sân duh bik lo. Duh leh Pa Lalnghînga inbual tir se! Ţawngthei ziap zuap si, kan chhung zînga an lo teltir ve lai pawh ka hre lo e a. A nupui tlân kan koh ţuma ka ngeina kha chu thuhran, kan ina a rawn lên apianga min puan mualpho zut zut zel te kha ka ngei zual chhan a ni. A ţawngthei si, ka teithei miah lo kei chuan.
Chaw ei laiin ka pa'n kan Insak mêk chungchang a sawi boh boh a, a pâwnlam an zawh thuak tawh thu leh mawi deuha a chhûng chei an tum thu a sawi lai chuan phûr fêin, "inchungah ka room tur siam ru aw" ka lo ti vat a.
"Awi awi, inhnuaiah i awm chung pawhin kan âu êih zo lo che ania, inchungah awm la engtikah nge zîng i thawh ang a? I pa nen kan tar ang a, kan chak loh tial tial hunah phei chuan tûk tin kaitho tur chea rawn chhoh ziah kan peih dawn lo nasa a ni" ka nu'n a tih hlawih hlawih lai chuan, "chutiang hisâp deuh chuan ania ka sawi!" Ka lo ti sap a.
"Malsawmzel!"
"Ka ti mai mai anih kha.. In upat hunah te chuan keiman tûktin ka kaitho ţhin zawk ang che u. Ka duat dawn cheu alawm, ka duat thei hlarh hlarh dawn lutuk cheu" nui pât pât chunga tiin chaw ka bâr zauh a, "Pasal neih i tum vak nange chu?" Ka pa'n a lo ti ve thung. Ka thil ţhial lai ka châwl chiang khawp mai.
"Pasal tih vel chu sawi lo teh u. Malsawmi'n pasal min neihsan chuan engtin nge kan awm ang? A âiawhtu tur mo kan nei ve dawn si lo. Tu nge ka hauh tâk ang?"
"Nu.. Chutiang mai mai ngati nge i ngaihtuah a? I rilru tihah duh reng reng suh. Ţawngthu chhe lovah lo awm lo ta thut pawh ni ila, ka pa i hau leh dawn tho a.. Thil a danglam vak dawn chuang lo i tih ngâi loh pawh a ni lo va!"
"Malsawm!"
"Ka uang anih kha.. Min melh tûr khûi zel suh teh. Tui deuhin ei rawh pasal neihsan cheu tih vel, ka la hlat lutuk. In fanu hi min en ula, heti ve buang mai hi ka nia, tuman mo atan min duh tak tak lo" tih leh thawhsan ka rual a, thlengsilnaa thlêng ka dah lai te chuan ka nû insût hraih thâwm ka hria.
Ani hian ka kalsan a hlâu tak tak em mawni? Min hâu reng a, min vînin min tîrkual reng ţhin mah se, awm lo thut ila hrehawm a ti hlê dawn tih ka hre ta! A fanu ka ni miau a, min chhanghal hlê mah se ka hlu ve em mai.
A châng chuan ka runluih ve ţhin a, a huat tawk tling hlê ţhin mah se a fanu hi engtikahmah min haw tak tak ngai lovang. Min hmangaih a, min thlahlel a, ka tellova awm a zuam ngâiin ka ring lo. Ka nu a ni miau a, a mitah kei tluka naupang fel leh ţha an awm bik lovang.
Chhûnah nilênga ka mut hnuin Sikulah ka lêt leh a, thla khat bâwr vel bâk kan camp tawh dawn lo bawka tiin lunglenna pawh ka tuar ve hrâm hrâm a ni. A thlâa thla têl inchhung aţanga han thangbo a, nu leh pate han awm hran san meuh chuan rilru a no a, inchhungkhur thlâkhlelhna leh pangchan a na duh khawp mai.
"I va rawn chho har em em ve. I thlen daih tawh ka ringa ka rawn pêngkâwi duh lo vel a, rawn kal vat teh thu pawimawh lutuk hrilh tur che ka nei ania" dorm kawt aţanga lo ti lâwng lâwngtu Châmi chu nui vur vur chunga pan hnaiin, "i va damlo rei si lo ve, homesick i nei a ni maw nang hi, i damloh tak tak pawh ka ring lo i tider aniang" ka tih chuan min melh rum nasa mai.
"Chutiang mai mai sawi hun pawh a ni lo. I thawmhnaw ho kha dorm-ah dah la school hnungah min rawn zui rawh. Aiah aaa" tih leh a pum dawm a han rual ngêi a! Damlo der ka tih vâng bâk anih ka ring lo e a.
Chutiang khawpa thu hmanhmawhthlak chu hriat ka châk ve tawh tho bawk nen ka mutbu intêlah chuan ka thawmhnaw ka theh phei lâwp a, hmanhmawh fêin school hnungah Châmi chu ka va zawng a, tanky sîrah inngaihtuah mûk hmêl fêin a lo ding ve khar reuh.
"Mifing deuh i ang ve lutuk. Thutak deuha i awm hian puitling ţhankin vek tawh, sâng em em si lo i ang thei ka ti" nui pât pât chunga tiin ka pan phei a, ka fiamthu thawh ve te chuan a tinui zo lo. Henu hian harsatna a nei reuh em mawni chu le?
"Enteh, thil ka sawi dawn a; dawnsawn dan chintâwk hria ang che. I mittui a tlâk vaih chuan ka bêng hrep ang che" tia bul ţanin min lo ban vut a, tereuhtê e ti lovin a lama min pawh hnaih hrut te chuan ka lêng ve dâwrh tho!
"Sawi vat vat mai teh. Ka rawn thlen tirh aţang khan hmêl hmâi hmuh nuamin i awm miah lo ania" ka ti ve sap a. A hmêl a puithû lutuka harsatna lian tak a nei anih ringin ka fiam zawm duh tawh bik lo.
"Enteh, ka sawi ngei ngei a ngâi sia. Min dem miah suh, ka sawi châk zawk zawk bik miah lo ania aw"
"Sawi vat mai teh Kâwli, beng tivir tâwk lekin i sawia ka ning" dawhthei lo zeta ka tih hlak lai chuan min melh hrâk a, a mengrum deuh khâi khâi chu inthlahrunpui leh deuhin, "harsatna i neih chuan min hrilh hreh suh tih ka tumna anih kha" pha deuh daiin ka ti leh sep a.
"U Arona ten palai tirh an tum!"
"I timak e a!" A sawi zawh hmâ hmâa ka lo tih chuan min melh ralhin chil a lem khalh a. "Min prank i tum tiraw kâwlte?" Nuichhuak haka ka tih leh pawh chuan fiamthu thawh hmêl a pu lo hrim hrim!
Thutak ngalin min melh a, a mitmengah chuan min lainat ngawih ngawih ni maiin ka hria! Ţah chhuak ngawih ngawih, vênthâwn neia insûm hrâm hrâm hi ang ka ti ber a. Kei erawh ka thu hriat chuan min ţhâwng lutuka han ngaihtuah zui vak ngaihna hre lovin ka dang lel ringawt!
"Enteh, nizan khan an sawi thâwi deuh a, a nî tur tak an la sawi fel chuang lo nâin an tirh har ka ring lo. U Arona khân a sawi thâwi deuh a, u Muani a râi a ni âwm e! Chutiang anih tawh chinah chuan inneih ngei ngei a ngâi tawh dawn a, an tirh har vak ka ring lo. Hrilh loh che ka tuma mahse, an tirh tak tak hunah a ţhâwng lutuk ang che tih ka hlau sia, chumi hrilh tur che chuan ania ka rawn luh vang vang" ka dâra rawn hmer salh paha a tih leh chuan ţhingţhi hnawkin, "a van timak" ka ti sep a. A bâk ka sawi thei lo.
Ka hrawkah hian min hnawh tlattu eng emaw a awm a, ka thin chhûng a tâwt up up a, boruak tlachhama thi mai tur ang te'n ka awm! Engkim mai chu a vâi ruai vek a, mumang hrehawm tak aţanga harhchhuak thei si lo ang mai hian ka chhehvela thil awm te rêng rêng chu an ngâwi ţhuap ni maiin ka hria!
"Sawmzel! I ţha em? Hey, inthing harh rawh. I ţha em? Thih tum ringawt suh aw i thi tak tak dawn lo.." Min sâwi nawk nawk chunga Châmi'n min âu lawm lawm thâwm chu a ring tial tial a, ka fîm tial tial a, ka na ngut ngut thung.
"I ţha tiraw?"
"Ka ţha!" Tih paha thawh chhuah mai ka tum chu ka rit deuh lûk a, ka hai chhulh bawk nen zâwi muangin leiah ka ţhusawp ta zawk a.
"Nupui a nei tak tak tawh dawn tihna a ni maw? A laka ka thutiam i hre duh em? A awmdan pangngaia awm a, engkim ka kuta dah turin ka hrilh asin. Ka beidawnsan ngâi dawn loh thu te ka hrilh a, ka hmangaih hmasa ber anih thu chenin ka hrilh vek asin. Mahse, mahse tûn hnâiah hian eng nge thleng pawh ka hre lo Châm! Ka phatsan a ni. U Arona hi keima hnawhkian ngei a ni. Beidawngin ka siam a, midang ka chhâi san vel a!" Ka mittui far tûr nûl kian thuak paha ka tih lai chuan min thing nawk nawkin,
"Mawli.. I mâwl chhah khattlat anih hi nang hi! I hnawh kian ni lovin engtiklai mahin i kiangah u Arona hi a awm ngai lo zawk. Chelhbeh tumin i theihtawp i chhuah a, vawitam a laka i rilru puthmang i hriattir chung pawhin hnaih che a tum tak tak ngai lo. Chuti chung chuan engtin nge nangmah leh nangmah i indem theih zawk? Kan tana khuanu ruatte chuan hetiang mai maiin min ti lo tawp ang" a ti ta piap piap a.
"Aih.. A ni lo, kan tana khuanu ruat te chuan vawitam min tina ţhin mah se, vawitam min nuihtir ţhin. U Arona lak aţanga nuihmêl ka put ţhin zawng zawngte kha engmahin an tluk zo ngâi lovang." Mittui luang zung zung chungin ka la ti hrâm a, hetiang khawp hian mahni mihringpui, laina hnâi pawh ni lo hi a lo hmangaih theih ngâi a ni maw?
"Ani chu i hmangaih hmasa chauh a ni. A dawtah tunge rawn kal ang a, tunge rawn inlâr leh dawn i hre lo. I hun leh nun pum i pêk a phû reng reng lo. Chak tak leh chhel takin awm la hmalam pan san ve tak tak tawh rawh."
"Hmalam pan san ka tum reng ţhin zawk. Châm! U Arona hi theihnghilh ka tum fo ţhin asin. A laka beidawn nan tiin Op-a te pawh ka hnaih lui a, mahse maw, a reh thei tak tak chuang lo. A hmêl ka hmuh apiangin rilruah a thar leh ţhin a. Ka la hmangaihzia leh ka la duhzia hi ka hrechiang tulh tulh zel zawk asin. Na tak taka min ţawng khumin atana ka tlin tâwk lohzia te pawh min hrilh ţhin. Amah haw ngawih ngawih turin min duh hial a, mahse ka thei lo. I hmangaihte chuan an tinat poh che leh i hmangaihna an dawng hnem zel ang a, an kalsan hlat poh che leh i ngâi zual ţhin ang. Chu chu a laka ka rilru puthmang leh ka awmdan dik tak a ni" tia tho chhuakin dorm lam ka pan a, ka khaw hmuh te chu a fiah tawh lo.
Ka ni chhulh a, ngaihtuahna a tâwi tup mai bawk. Hetiang êm hian mihring rilru hi a lo na thei ang tih rin ngaihna ka hre ngâi lo va, chutiang khawpa min tinatu ka hmangaih thei si chu mak ka tizual hliah hliah bawk.
Fa a nei dawn maw? A bialnu a râi a maw? Engtin nge anih theih? Amah ka chîk a, chutiang maia inthlahdah tur chi mipa niin ka hre lo! A fâlin vawitam kan awmdun ve tawh a, mawilo taka min chhaih emaw min khawih emaw pawh a la nei lo ania. Chutiang mipa chuan engtin nge sâwn a thlâk theih si? A mak ka ti a ni. Rin loh mai ka duh a, a nau ngeiin a sawi avangin ka ringhlel ngam chuang si lo.
Tun hmâ zawng kha chuan sava thlâwk lai ang mai a ni a, hêltu leh pêltu neiin a lakah ka tan beisei bo hlê ţhin mah se, chu beisei a bona tak chuan min beiseitir zel tho a, ngaihzawng te pawh nei lâwp lâwp ţhin mah se kan kâr dâltu lian tak anga ngaih lohna chin ka nei ţhin. Tunah erawh a dân a dang dawn ta.
Nupui neiin kârah fanau an awm tawh ang a, khaw khatah pawh awm reng mah ila kâr min dantu tam tak kan kârah an lêng vel tawh ang. Mî pâ tia sawi anih hnu chuan keia tan han beisei chi ziazâng a ni tawh dawn lova, mî nupa inkâra tlâkzeh lah thil mawi lo ber anih ka hre ve kur dawn si. Hmangaihna avanga mualpho huam ringawtin kawngro a su tawh lo ang a, naupangchhia leh mâwlmang taka ûmzui duan duan chi lah a ni tawh hek lovang.
'Pialralah tal' tiin han inhnêm ngawt dawn ila, pialralah pawh kei aia thlan hmasak tur a nupui ngêi te, a fate an awm ve dawn tho si. Engpawh ni se heihi ka duh a ni. Nun hi a bul aţanga ţan ţha lehin, mi zawng zawng hi a bul aţang vekin inthlang ţha leh ila, kei chuan amah bawk ka thlang leh dawn a, ani pawhin keimah min thlang ve tawh se. A rem lohna zawng zawng hlîpa a rem ve na tur hringnun thar hlakah han harhchhuak thei tehreng ila aw! Chu hmunah chuan beisei bo beiseiin ka na reng tawh bik lovang mawle!
"Sawm, chaw ei ang. Inngaihtuah lungpuamin awmzia a nei lo ania, ţap vak vak suh i lû a nâ anga zânah lehkha i zir thei lovang. Chaw ka va dawh kêp ang che aw" min sâwi det det paha Châmi'n atih lâi chuan inlet tapin, "a pathlâwi hunah pawh ka la iai chuangin ka ring lo" tiin ka nui chhuak hak a.
"Mâwli, mâwlchâwllonu!" Tia nui ve hak hakin a ngawi zui daih a, min melhna mitmeng chuan thu tam tak a sawi thung. Nuin a fâ na tuar lai tih theih nei si lova a thlîr ngawih ngawih hmêl hi ka chan ber a, ni e, ka ţhiannu mitmengah chuan hmangaihna thûk lutuk leh lainatna nasa tak infawmkhâwm ka hmu tel miau a ni.
"I dam leh ang" a ti sep a.
"Ka beisei takzet a ni."
(Comment hnutchhiah hrâm hrâm ang aw)
End of chapter - 29